གནམ་ཆོས་ས་བདག་འཁྲུག་བཅོས་དཀྱིལ་འཁོར་གྱི་ས་ཆོག་བསྡུས་པ་ས་ལྷ་མཉེས་བྱེད།
གནམ་ཆོས་ས་བདག་འཁྲུག་བཅོས་དཀྱིལ་འཁོར་གྱི་ས་ཆོག་བསྡུས་པ་ས་ལྷ་མཉེས་བྱེད་བཞུགས་སོ། །ས་ཡི་ལྷ་མོ་ལ་ན་མོ། འདིར་ས་བདག་འཁྲུག་བཅོས་ཀྱི་ས་ཆོག་ནི། དང་པོ་ས་སློང་བའི་ཐབས་ལ། དཔྱིད་གསུམ་བྱུང་། དབྱར་གསུམ་ཤར། སྟོན་གསུམ་ལྷོ། དགུན་གསུམ་ནུབ་ཏུ་ཁ་བལྟས་ལ། ས་ལ་སྐག་ལེ་ལན་ལྔ་རྒྱབ། དེ་ནས་དཀྱིལ་འཁོར་ལེགས་པར་བཅགས་ལ། སྟེང་དུ་དཀར་གཏོར་ཆེ་ལེགས་གཅིག་ལ། འབྲུ་སྣ་དང་ཡོས་བཀྲ་ཅུང་ཟད་བཏབ་ནས་ཆུ་གཙང་གིས་བྲན་ལ། ཨོཾ་ཨ་མྲྀ་ཏས་བསང་། སྭ་བྷ་ཝས་སྦྱང་། བྷྲཱུཾ་ལས་རིན་ཆེན་སྣོད་དུ་ཨོཾ་ལས་གཏོར་མ་དཀར་གསུམ་མངར་གསུམ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨ་ཀཱ་རོས་བྱིན་རླབས་ལན་གསུམ་བྱས་ལ། དབང་ཆེན་ལྟ་བུ་ལ། ཧཱུྃ། རང་ཉིད་ཕྱག་ན་རྡོ་རྗེ་སྔོ། །རྡོ་རྗེ་སྡིགས་མཛུབ་རིན་ཆེན་བརྒྱན། །ཧཱུྃ་ལས་འོད་འཕྲོས་ས་བདག་ཚོགས། །མདུན་དུ་སྤྱན་དྲངས་བཀའ་ཉན་བསམ། །འཁྲུགས་བཅོས་ལ། ཧཱུྃ། རང་ཉིད་ཀཾ་ལས་ས་སྙིང་དཀར། །སྨྱུ་གུ་དྲིལ་འཛིན་སྐྱིལ་ཀྲུང་བཞུགས། །མདུན་དུ་ས་སྐོར་ས་མིག་གི །ས་བདག་ཐམས་ཅད་སྤྱན་དྲངས་གྱུར། །དེ་གཉིས་གང་བྱེད་ཀྱང་གཏོར་མ་འབུལ་བ་ནི། ཧཱུྃ་ལས་རིན་ཆེན་སྣོད་ཡངས་པར། །གཏོར་མ་དཀརགསུམ་བདུད་
རྩིའི་མཚོ། །ཟག་མེད་དགོས་འདོད་ཀུན་འབྱུང་འདི། །སེམས་དཔའ་ས་ཡི་སྙིང་པོ་དང་། །ལྷ་མོ་བརྟན་མ་ཡབ་ཡུམ་སྲས། །དབང་ཆེན་རྗེ་བློན་བཅུ་བདུན་དང་། །འབྱུང་བ་སྤར་སྨེ་ལོ་ཞག་དུས། །ལྷ་བརྒྱད་ཀླུ་བརྒྱད་གནོད་སྦྱིན་བརྒྱད། །གཟའ་བརྒྱད་རྒྱུ་སྐར་ལོ་རྒན་སོགས། །ལྟོ་འཕྱེ་སྤྲེལ་ཁོག་ས་སྨན་དང་། །ལྔ་སེར་འབྱུང་བའི་ལྷ་མོ་ལྔ། །ས་ལ་དབང་བའི་ལྷ་ཀླུ་དང་། །སྲིད་པའི་ས་བདག་རྣམས་ལ་འབུལ། །ཁྱད་པར་ཡུལ་ཕྱོགས་ས་དམིགས་འདིར། །གནས་པའི་འཇིག་རྟེན་སྐྱོང་བ་ཡི། །ས་བདག་རི་བདག་ཟློབྲག་གི་བདག །ཆུ་བདག་ཤིང་བདག་གནས་ཀྱི་བདག །ཡུལ་ལྷ་ཟོག་དོར་དཀར་ཕྱོགས་ཅན། །མ་ལུས་འཁོར་དང་བཅས་པ་ཡིས། །མཆོད་སྦྱིན་གཏོར་མ་འདི་བཞེས་ལ། །དཀྱིལ་འཁོར་ས་འདི་བསྩལ་དུ་གསོལ། །ཕོ་བྲང་དཀྱིལ་འཁོར་བཞེངས་པ་ལ། །སུས་ཀྱང་ཕྲག་དོག་མ་མཛད་ཅིག །བདེ་ལེགས་བྱང་ཆུབ་སེམས་ལྡན་ཤོག །བདག་ཅག་ཡོན་མཆོད་མི་ཕྱུགས་ལ། །ཁ་འཛིན་སྡོང་གྲོགས་བསམ་པ་སྒྲུབས། །སངས་རྒྱས་བསྟན་རྒྱས་ཡུལ་ཕྱོགས་འདིར། །འབྱུང་བཞི་གཡོ་འཁྲུག་རྐྱེན་ངན་རིགས། །སད་སེར་ནད་
ཡམས་དུས་འཁྲུགས་ཞི། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་མཛོད། །ཨོཾ་ཀིཾ་ཧི་ར་ཙ་པྲི་ཐི་དེ་ཝི་མ་ཧཱ་དེ་ཝཱ་སརྦ་ལོ་ཀ་བྷུ་མི་པ་ཏི་ས་པཱ་རི་ཝ་ར་ཨི་དཾ་བ་ལིཏྟ་ཁཱ་ཧི། ལན་གསུམ་མམ་བདུན་བརྗོད་ལ་ས་སློང་སར་འབུལ། དེ་ནས་འབྱུང་བཞི་ཕྱོགས་མདོག་ལྟར་བཤམས་ལ། ཧཱུྃ། རྡུལ་ཚོན་ཐིག་སྐུད་སྐད་ཅིག་དྲན་རྫོགས་ལས། །ཨོཾ་ཧཱུྃ་ཏྲཾ་ཧྲི་ཨཱཡི་ངོ་བོ་རུ། །རྒྱལ་བ་རིགས་ལྔའི་སྐུ་རུ་ལམ་མེར་གསལ། །འོག་མིན་གནས་ནས་འོད་ཟེར་ལྔ་པོ་འཕྲོས། །རིགས་ལྔའི་སྐུར་གྱུར་རིགས་ལྔ་འོད་ཞུ་ནས། །རྡུལ་ཚོན་ཐིག་སྐུད་རིགས་ལྔའི་སྐུར་གྱུར་ཞིང་། །དུག་ལྔ་ཞི་ནས་ཡེ་ཤེས་ལྔ་ལྡན་གྱུར། །ཅི་བསམ་དོན་རྣམས་འབད་མེད་འགྲུབ་པར་ཤོག །བཛྲ་ཙི་ཏྲ་ས་མ་ཡེ་ཧཱུྃ། ལན་ལྔས་ཚོན་བྱིན་བརླབས། ཨ་བྱ་བྷྱ་ཨ་ནུ་ག་ཏ་པྲ་བིཥྚ་སརྦ་དྷརྨ་བཛྲ་ཨཉྫ་ལི། ལྷ་དང་རྡུལ་ཚོན་རོ་གཅིག་པར་གྱུར། བཛྲ་ས་མ་ཡ་སུ་ཏྲ་མ་ཏི་ཀྲ་མ་ཡ་ཧཱུྃ། ཞེས་བརྗོད་པས་ཐིག་སྐུད་བྱིན་གྱིས་བརླབས། དེ་ནས་དཀྱིལ་འཁོར་གྱི་ཤར་ནས་སློབ་དཔོན་དང་། ནུབ་ནས་ལས་གཡོག་པས་ཐིག་སྐུད་སྣེ་དྲངས་ལ་ཐིག་གདབ། དེ་ནས་ཉ་
ལྟོ་སྐོར་ལ་ཐིག་ཆེན་བརྒྱད་གདབ་ལ། དཀྱིལ་འཁོར་དཔེའུ་རིས་ལྟར་དང་། སློབ་དཔོན་གྱི་ཞལ་ཤེས་ལྟར། དཀྱིལ་འཁོར་ཆེན་པོ་དང་བཅས་པ་ལེགས་པར་བྲིས། དེ་ནས་སུམྦྷ་ནི༔ སོགས་བགེགས་བསྐྲད་དང་། ཡེ་དྷརྨཱ༴ སོགས་རབ་གནས་སློབ་དཔོན་གྱི་ལུགས་དེ་ནས་གཏོར་མ་བཤམས་པ་དང་། ཙཀ་ལི་དང་། ཤིང་རྩི་སྐྱོན་པ་སོགས་གཞུང་ལྟར་བྱའོ། །ཞེས་པ་འདི་ནི་ས་བདག་འཁྲུགས་བཅོས་ལ་ཤིན་ཏུ་མཁོ་བར་འདུག་ཕྱིར། ས་བདག་དབང་ཆེན་ས་ཆོག་ཤིན་ཏུ་བསྡུས་ནས། རྣལ་འབྱོར་པ་དགེ་སློང་རཱ་ག་ཨ་སྱས་བྲིས་པའོ། །འདི་ས་ཆོག་ཀུན་ལ་ལེགས་པར་ཡོད་དགོས་སོ།། །། ཨྠྀི།