ས་བདག་དབང་ཆེན་གྱི་ས་སློང་བསོད་ནམས་རི་རབ།
ས་བདག་དབང་ཆེན་གྱི་ས་སློང་བསོད་ནམས་རི་རབ་བཞུགས་སོ། །གུ་རུ་རིན་པོ་ཆེ་ལ་ཕྱག་འཚལ་ལོ། །ས་སྟེགས་དཀྱིལ་འཁོར་བཞེངས་པ་ལ། །ས་ལ་བདག་པོ་ཡོད་པས་ས་བསླང་དགོས། །དེ་མིན་ས་བདག་ཁྲོས་པས་བཀྲ་མི་ཤིས། །མ་བྱིན་བླང་བའི་ཉེས་པས་ཕན་མི་ཐོགས། །དེ་ཕྱིར་དཀར་གཏོར་འབྲུ་སྣ་སྐག་ལེ་ཁྱེར། །ས་ནི་ཡོད་སར་སོང་ལ་གཏོར་མ་བྲན། །ཧཱུྃ། དམ་ཚིག་ཡེ་ཤེས་དབྱེར་མེད་པའི། །རང་ཉིད་འཇིག་རྟེན་དབང་ཕྱུག་དཀར། །ཞལ་གཅིག་ཕྱག་གཉིས་གཡས་མཆོག་སྦྱིན། །གཡོན་པས་པདྨ་དཀར་པོ་བསྣམས། །དར་དང་རིན་ཆེན་རྒྱན་གྱིས་སྤྲས། །པདྨ་ཟླ་སྟེང་སྐྱིལ་ཀྲུང་བཞུགས། །ཕྱག་གཡས་ལན་གསུམ་ས་ལ་བརྡབ། །ས་ཡང་རྣམ་པ་དྲུག་ཏུ་གཡོས། །ས་ཡི་འོག་ནས་བརྟན་མ་ནི། །གསེར་མདོག་རྒྱན་རྣམས་ཀུན་གྱིས་སྤྲས། །ཕྱག་གཡས་ཁས་ལེན་ཕྱག་རྒྱ་དང་། །གཡོན་པས་གཏེར་གྱི་བུམ་པ་འཛིན། །ལྟེ་བ་ཡན་ཆད་ས་ནས་ཐོན། །ས་བདག་ཚོགས་ཀྱིས་བསྐོར་ནས་བྱོན། །ཨོཾ་བཔྲི་ཐི་དེ་ཝི་ས་པཱ་རི་ཝ་ར་བཛྲ་ས་མ་ཡ་ཛ༔ ཏིཥྛ་ལྷན། ཨརྒྷཾ་སོགས། ཧཱུྃ་ལས་རིན་ཆེན་སྣོད་ནང་དུ། །གཏོར་མ་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ ས་ཡི་ལྷ་
མོ་བརྟན་མ་དང་། །ལྟོ་འཕྱེ་ལ་སོགས་ས་བདག་ཚོགས། །འདིར་གནས་ས་ཡི་བདག་པོ་ཀུན། །ས་གླུད་གཏོར་མ་འདི་བཞེས་ལ། །ས་འདི་བདག་ལ་གནང་བར་མཛོད། །སཙྪལ་སོགས་ཡིན་ན་ཡང་། །བདག་གིས་མཆོད་རྟེན་བཞེངས་པ་ཡི། །དགེ་བའི་ཆ་ཤས་ཁྱོད་ལ་སྦྱིན། །དེ་ཕྱིར་དགའ་ཞིང་བྱང་སེམས་ཀྱིས། །ས་འདི་བཀྲ་ཤིས་མཛད་དུ་གསོལ། །བརྗོད་པས་བརྟན་མ་ལ་སོགས་དགྱེས། །ས་འདི་གནང་བའི་འགྲོ་དོན་སྤྱོད། །གསུངས་ནས་བརྟན་མ་ས་ལ་ཐིམ། །ས་བདག་གཞན་རྣམས་བྱེར་བར་འགྱུར། །སེང་ལྡེང་ཕུར་པ་སོར་བརྒྱད་འདི། །སྟོད་ནི་རྟ་མགྲིན་དམར་པོ་སྟེ། །རྟ་སྐད་སྒྲོག་ཅིང་གྲི་ཐོད་འཛིན། །སྐུ་སྨད་ཕུར་པ་མེ་དཔུང་འབར། །གདེངས་ཤིང་ས་ལ་གདབ་པ་ཡིས། །གཏོརམས་བྲིད་ཅིང་མི་ཉན་པའི། །གདུག་པ་ཅན་རྣམས་བྲོས་པར་གྱུར། །ཨོཾཔདྨནྟ་ཀྲིཏ་བཛྲ་ཀཱི་ལི་ཀཱི་ལ་ཡ་སརྦ་དུཥཱན་ཧཱུྃ་ཕཊ། དེ་ནས་ཧཱུྃ་མཛད་ཀྱི་ཕྱག་རྒྱས་སྐག་ལེ་བཟུང་། །དཔྱིད་གསུམ་བྱང་དང་དབྱར་གསུམ་ཤར་གྱི་ཕྱོགས། །སྟོན་གསུམ་ལྷོ་དང་དགུན་གསུམ་ནུབ་ཀྱི་ཕྱོགས། །ཁ་གྱུས་བརྐོས་པས་ལྟོ་འཕྱེའི་ལྟོ་ཚིལ་ལོན། །ས་གཡང་རིན་ཆེན་སྣ་ལྔའི་གཏེར་ཁ་སྟེ། །ས་གཡང་དངོས་གྲུབ་ཐམས་
ཅད་ཐོབ་པར་གྱུར། །བཛྲ་ག་རུ་ཊ་ཧཱུྃ་ཕཊ། ཅེས་པ་བརྗོད་པས་སྐག་ལེ་ལན་ལྔ་བརྒྱབ། །ཚེས་གྲངས་བཅུ་གཉིས་ཐེ་སེ་སྤྲེལ་ཁོག་རྒྱུ། །དེ་ཉིན་སོར་གྲངས་དུ་བརྐོས་མི་རེ་འཆི། །དེ་ཕྱིར་བཅུ་གཉིས་ས་ཆོག་ས་སློང་སྤང་། །དེ་མིན་ས་སློང་ཚར་ནས་ནམ་འདོད་དུ། །ལས་མི་རྣམས་ཀྱིས་རྐོ་དང་ལེན་ཡང་རུང་། །ས་བདག་དབང་ཆེན་དཀྱིལ་འཁོར་ས་ཆོག་ཏུ། བསླང་བར་གསུངས་ལྟར་ཡང་ཡིག་ཚུལ་དུ་ནི། །སྔགས་འཆང༧ར་ག་ཨ་སྱ་ཞེས་པ་ཡིས། །འདི་བྲིས་ཉེས་པ་ས་ཡི་ལྷ་ལ་བཤགས། །དགེ་བས་ཡོན་མཆོད་བར་ཆད་རྐྱེན་ངན་ཞི། །མཆོག་དང་ཐུན་མོང་དངོས་གྲུབ་སྩོལ་ཕྱིར་བསྔོ།། །།