ས་བདག་དབང་ཆེན་གྱི་བཟླས་དམིགས།
ས་བདག་དབང་ཆེན་གྱི་བཟླས་དམིགས་ནི། མདུན་བསྐྱེད་ཀྱི་གཙོ་བོའི་ཐུགས་ཀར་དྷིཡིག་སེར་པོ་གསེར་ཞུན་མའི་མདོག་ཅན། འཁོར་རྣམས་ཀྱི་སྙིང་གར་ཨེ་ཡཾ་ཁཾ་རཾ་ལཾ་རྣམས་ཀྱི་ཡི་གེ་དཀར་སེར་དམར་སྔོ་ལྗང་གུའི་མདོག་ཅན་འོད་ཟེར་འཕྲོ་བ། དེ་རྣམས་ཀྱི་མཐར་རང་རང་གི་སྔགས་ཀྱི་ཕྲེང་བས་ཡོངས་སུ་བསྐོར་བར་གྱུར། གཙོ་བོའི་ཐུགས་ཀའི་ས་བོན་ལས་འོད་ཟེར་སེར་པོ་གསེར་གྱི་མདངས་ཅན་འཕྲོས། འཁོར་རྣམས་ཀྱི་ཐུགས་རྒྱུད་བསྐུལ་བས་གཙོ་བོ་ལ་འདུད་ཅིང་བཀའ་ཉན་པར་གྱུར། རང་ཉིད་གསང་བའི་བདག་པོའི་ཐུགས་ཀའི་སྔགས་ཕྲེང་ལས་འོད་ཟེར་སྔོན་པོ་བཻཌཱུརྱའི་མདངས་ཅན་འཕྲོས། མདུན་གྱི་ས་བདག་དབང་ཆེན་གྱི་ཐུགས་ཀར་ཕོག་པས་དེ་ཡི་རྒྱུད་རབ་ཏུ་བསྐུལ། ས་བདག་གི་ཐུགས་ཀ་ནས་འོད་ཟེར་སེར་པོ་འཕྲོས་པས་འཁོར་རྣམས་ཀྱི་རྒྱུད་བསྐུལ་བས་དེ་རྣམས་ཀྱི་ཐུགས་ཀའི་འོད་ཟེར་སྤྲོ་བསྡུས་ཀྱིས་བརྟན་གཡོའི་དགེ་མཚན་བསྐྱེད་ཅིང་། སླར་ཡང་མདུན་གྱི་ས་བདག་གི་ཐུགས་སྲོག་སྔགས་ཕྲེང་མར་མེའི་ཕྲེང་བ་ལྟ་བུ་ལྟེ་གོང་ནས་ཐོན། རང་གི་ལྟེ་གོང་དུ་ཞུགས་ཤིང་ཞལ་ནས་ཐོན་མདུན་གྱི་ས་བདག་གི་ཞལ་དུ་ཞུགས་ཤིང་བར་
མེད་མགལ་མེ་ལྟར་འཁོར་བས་དངོས་གྲུབ་ཐམས་ཅད་བསྩལ་ཞིང་བརྟན་པར་གྱུར། ཞེས་བསམས་ལ་སྔགས་རྣམས་བཟླའོ། །གཞུང་དུ་བཟླས་དམིགས་ཡོད་ཀྱང་འདོན་བདེར་མེད་སྟབས་གཞུང་དོན་བཀླག་ཆོག་ཏུ་བསྡེབས་པ་དགེ།། །།