ས་བདག་བསྟོད་པ།

ཧཱུྃ། ས་བདག་གཙོ་བོ་སྐུ་མདོག་སེར་པོ་ནི། །འབྱུང་ལྔའི་རང་བཞིན་ཞལ་ལྔ་ཕྱག་བཞི་པ། །སྦྲུལ་ཆེན་འཁྱིལ་པ་རུས་སྦལ་གདན་ལ་བཞུགས། །དགེ་བསྙེན་བྱང་ཆུབ་སེམས་དཔའ་ཁྱོད་ལ་བསྟོད། །བཙུན་མོ་ས་ཡི་ལྷ་མོ་བརྟན་མ་ནི། །གསེར་མདོག་རྒྱན་ལྡན་རིན་ཆེན་བུམ་པ་འཛིན། །དུས་གསུམ་རྒྱལ་བ་ཀུན་གྱི་དཔང་པོ་མ། །ས་འཛིན་ལྷ་མོ་ཁྱོད་ལ་བདག་བསྟོད་དོ། །སྲས་པོ་ས་འཛིན་ལག་པ་ཆེན་པོ་དང་། །ས་བདག་རྒྱལ་པོ་ལ་སོགས་འཁོར་གྱི་ཚོགས། །འབྱུང་བ་ལོ་ཟླ་ཞག་དུས་སྤར་སྨེའི་བདག །སྲིད་པའི་དབང་ཆེན་རྣམས་ལ་བདག་གིས་བསྟོད། ༈ །ས་ཆ་ཡུལ་རིས་ལ་གནས་གཟུགས་ཅན་རྣམས། །གཉན་དང་ས་བདག་ཡུལ་བདག་གྲོང་གི་བདག །ཅེ་རེ་ལྟ་ཞིང་ཀྲོག་གེ་ཉན་པའི་ཚོགས། །ལེགས་ཉེས་སྟངས་འཛིན་རྣམས་ལ་བདག་གིས་བསྟོད། །སརྦ་མངྒ་ལཾ། །དགེའོ། །དགེའོ། །དགེའོ།། །།