སྟོང་གསུམ་འཁྲུགས་པ་ཡོ་བཅོས་ཀྱི་ལོ་སྐོར་བཅོས་པ།
སྟོང་གསུམ་འཁྲུགས་པ་ཡོ་བཅོས་ཀྱི་ལོ་སྐོར་བཅོས་པ་བཞུགས་སོ། ཀྱཻ། །བདག་དང་ཡོན་བདག་དོན་ཆེད་དུ། །འཁྲུགས་པ་བཅོས་ལ་ཡོ་བ་བསྲང་དོན་དུ། །ལོ་སྐོར་བཅུ་གཉིས་ལྷ་ལ་མཆོད་པ་འབུལ། །ཤེལ་ཚིགས་དཀར་ནག་བྱ་སྤུ་སྣ་ཚོགས་དང་། །རིན་ཆེན་སྣ་ལྔ་དར་ཚོན་བལ་ཚོན་དང་། །དཀྱིལ་འཁོར་གཙང་ཡང་རང་གི་གཟུགས་བརྙན་དང་། །འདབ་ཆགས་སྣ་ཚོགས་རི་དྭགས་གཡུང་དྭགས་དང་། །དུད་འགྲོ་སྣ་ཚོགས་མར་མེ་ལྷ་བཤོས་དང་། །སྤོས་དང་མེ་ཏོག་འབྲང་རྒྱས་དང་། །བདུད་རྩི་སྨན་སྤོས་དཀར་གསུམ་རྣམས། །ཡོན་བདག་དད་པས་འབུལ་ལགས་ན། །བརྩེ་བར་དགོངས་ལ་བཞེས་སུ་གསོལ། །ལོ་ཡི་འཁྲུགས་པ་བསལ་དུ་གསོལ། ཀྱཻ། །ཤར་ཕྱོགས་ཤིང་གི་གཞལ་ཡས་ན། །འབྱུང་བ་ཤིང་གི་གདན་སྟེང་ན། །ས་བདག་སྟག་གི་མགོ་བོ་ཅན། །བཙུན་མོ་ཡོས་བུའི་མགོ་བོ་ཅན། །སྐུ་མདོག་ལྗང་ལ་འོད་ཟེར་འབར། །ཕྱག་ན་དཔག་བསམ་ལྗོན་ཤིང་བསྣམས། །ཁྱོད་ལ་མཆོད་ཡོན་འདི་འབུལ་ལོ། །སྟག་ཡོས་འཁྲུགས་པ་བསལ་དུ་གསོལ། །བྱ་སྤྲེལ་བདུད་དང་གཤེད་དུ་མ་འབེབས་ཤིག །ཉི་མ་
ཤར་ཀྱི་ཕྱོགས་སུ་བཅོས། ཀྱཻ། ལྷོ་ཕྱོགས་མེ་ཡི་གཞལ་ཡས་ན། །འབྱུང་བ་མེ་ཡི་གདན་སྟེང་ན། །ས་བདག་རྟ་ཡི་མགོ་བོ་ཅན། །བཙུན་མོ་སྦྲུལ་གྱི་མགོ་བོ་ཅན། །སྐུ་མདོག་དམར་ལ་འོད་ཟེར་འབར། །ཕྱག་ན་མེ་ཡི་མགལ་བ་བསྣམས། །ཁྱོད་ལ་མཆོད་ཡོན་འདི་འབུལ་ལོ། །རྟ་སྦྲུལ་འཁྲུགས་པ་བསལ་དུ་གསོལ། །བྱི་ཕག་བདུད་དང་གཤེད་དུ་མ་འབེབས་ཤིག །ཉི་མ་ལྷོ་ཡི་ཕྱོགས་སུ་བཅོས། ཀྱཻ། ནུབ་ཕྱོགས་ལྕགས་ཀྱི་གཞལ་ཡས་ན། །འབྱུང་བ་ལྕགས་ཀྱི་གདན་སྟེང་ན། །ས་བདག་སྤྲེའུའི་མགོ་བོ་ཅན། །བཙུན་མོ་བྱ་ཡི་མགོ་བོ་ཅན། །སྐུ་མདོག་དཀར་ལ་འོད་ཟེར་འབར། །ཕྱག་ན་ལྕགས་ཀྱི་རལ་གྲི་བསྣམས། །ཁྱོད་ལ་མཆོད་ཡོན་འདི་འབུལ་བས། །བྱ་སྤྲེའུའི་འཁྲུགས་པ་བསལ་དུ་གསོལ། །སྟག་ཡོས་བདུད་དང་གཤེད་དུ་མ་འབེབས་ཤིག །ཉི་མ་ནུབ་ཀྱི་ཕྱོགས་སུ་བཅོས། ཀྱཻ། བྱང་ཕྱོགས་ཆུ་ཡི་གཞལ་ཡས་ན། །འབྱུང་བ་ཆུ་ཡི་གདན་སྟེང་ན། །ས་བདག་བྱི་བའི་མགོ་བོ་ཅན། །བཙུན་མོ་ཕག་གི་མགོ་བོ་ཅན། །སྐུ་མདོག་ནག་པོ་འོད་ཟེར་འབར། །ཕྱག་ན་ཆུ་ཡི་རྐྱལ་པ་ཐོགས། །ཁྱོད་ལ་མཆོད་
ཡོན་འདི་འབུལ་ལོ། །བྱི་ཕག་འཁྲུགས་པ་བསལ་དུ་གསོལ། །རྟ་སྦྲུལ་བདུད་དང་གཤེད་དུ་མ་འབེབས་ཤིག །ཉི་མ་བྱང་གི་ཕྱོགས་སུ་བཅོས། ཀྱཻ། །ཉི་མ་ཤར་ལྷོ་མཚམས་ཤེད་ན། །ས་རླུང་ཁམ་པའི་གཞལ་ཡས་ན། །གཤེད་པོ་འབྲུག་གི་མགོ་བོ་ཅན། །ཕྱག་ན་རླུང་གི་འཁོར་ལོ་བསྣམས། །ཁྱོད་ལ་མཆོད་ཡོན་དམ་པ་འབུལ། །འབྲུག་གི་འཁྲུགས་པ་བསལ་དུ་གསོལ། །ཁྱི་ཡི་བདུད་དང་གཤེད་དུ་མ་འབེབས་ཤིག །ཉི་མ་ཤར་ལྷོ་མཚམས་སུ་བཅོས། ཀྱཻ། ཉི་མ་ལྷོ་ནུབ་མཚམས་ཤེད་ན། །གསེར་གྱི་ས་གཞིའི་གདན་སྟེང་ན། །གཤེད་མོ་ལུག་གི་མགོ་བོ་ཅན། །ཕྱག་ན་གསེར་གྱི་དབྱག་པ་ཐོགས། །ཁྱོད་ལ་མཆོད་ཡོན་དམ་པ་འབུལ། །ལུག་གི་འཁྲུགས་པ་བསལ་དུ་གསོལ། །གླང་གི་བདུད་དང་གཤེད་དུ་མ་འབེབས་ཤིག །ཉི་མ་ལྷོ་ནུབ་མཚམས་སུ་བཅོས། ཀྱཻ། ཉི་མ་ནུབ་བྱང་མཚམས་ཤེད་ན། །ནམ་མཁའ་སྟོང་པའི་གཞལ་ཡས་ན། །གཤེད་པོ་ཁྱི་ཡི་མགོ་བོ་ཅན། །ཕྱག་ན་གནམ་ལྕགས་སྟ་མོ་བསྣམས། །ཁྱོད་ལ་མཆོད་ཡོན་དམ་པ་འབུལ། །ཁྱི་ཡི་འཁྲུགས་པ་བསལ་དུ་གསོལ།
འབྲུག་གི་བདུད་དང་གཤེད་དུ་མ་འབེབས་ཤིག །ཉི་མ་ནུབ་བྱང་མཚམས་སུ་བཅོས། ཀྱཻ། ཉི་མ་བྱང་ཤར་མཚམས་ཤེད་ན། །རི་རབ་ཆེན་པོའི་གཞལ་ཡས་ན། །གཤེད་པོ་གླང་གི་མགོ་བོ་ཅན། །ཕྱག་ན་གསེར་གྱི་མཆོད་རྟེན་བསྣམས། །ཁྱོད་ལ་མཆོད་ཡོན་དམ་པ་འབུལ། །གླང་གི་འཁྲུགས་པ་བསལ་དུ་གསོལ། །ལུག་གི་བདུད་དང་གཤེད་དུ་མ་འབེབས་ཤིག །ཉི་མ་བྱང་ཤར་མཚམས་སུ་བཅོས། །ལོ་སྐོར་བཅུ་གཉིས་མ་འཁྲུགས་ཤིག །ལོ་ཡི་འཁྲུགས་པ་བཅོས་ལ་འགྲས་པ་སྡུམས། །ཟླ་བའི་ལྷ་དང་ཞག་དུས་ཟླུལྷ་། །ཁྱོད་ལ་མཆོད་ཡོན་སྣ་ཚོགས་འབུལ། །ཟླ་བ་ཞག་དུས་བདུད་དང་གཤེད་དུ་མ་འབེབས་ཤིག །ཁྱེད་རྣམས་གདུག་རྩུབ་མ་བཏང་ཞིག །བདག་དང་ཡོན་གྱི་བདག་པོ་ལ། །མཐུ་དཔུང་སྟོངས་གྲོགས་མཛད་དུ་གསོལ། །བཅོལ་བའི་ཕྲིན་ལས་གྲུབ་པར་མཛོད། །ལོ་མི་མཐུན་པ་མང་ན་འདི་མང་དུ་འདོན། །དགེའོ། །དགེའོ། །དགེའོ།། །།