གཟའ་ཀླུ་འཁྲུགས་བཅོས།
གཟའ་ཀླུ་འཁྲུགས་བཅོས་བཞུགས་སོ།། ཨོཾ། སྟོང་གསུམ་མི་མཇེད་འཇིག་རྟེན་ཁམས། །གཡོ་མེད་རྒྱ་མཚོའི་ཀློང་རུམ་ན། །འཇིག་རྟེན་ཡོངས་ལ་བཞུགས་པ་ཡི། །གཙང་མ་ཀླུ་རིགས་འཁོར་དང་བཅས། །གཟའ་ཀླུའི་འཁྲུགས་པ་བསལ་བ་དང་། །གདུག་རྩུབ་ནད་རྣམས་ཞི་བའི་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། །ཧཱུྃ། འཇིག་རྟེན་སྐྱོང་བར་ཞལ་བཞེས་པའི། །སེམས་ཅན་ཀུན་ལ་ཕན་གནོད་མཛད། །ཉི་མ་ཟླ་བ་འོད་ཀྱི་ཚོགས། །རྒྱུ་ནི་བར་སྣང་མཁའ་ལ་རྒྱུ། །འཁོར་ལོ་སྲིད་པ་རླུང་གིས་བསྒྱུར། །ཁྱབ་ནི་སེམས་ཅན་ཡོངས་ལ་ཁྱབ། །སེམས་ཅན་ཀུན་ལ་གདུག་རྩུབ་བཏང་། །གཟའ་དང་རྒྱུ་སྐར་འཁོར་དང་བཅས། །གཟའ་ཀླུའི་འཁྲུགས་པ་བསྡུམ་པ་དང་། །ནད་རྣམས་ཐམས་ཅད་ཞི་བའི་ཕྱིར་། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ། ཤར་ཕྱོགས་ཀླུ་རྒྱལ་མཐའ་ཡས་ནི། །སྐུ་མདོག་དཀར་པོ་མདངས་དང་ལྡན། །ཕྱག་མཚན་རིན་ཆེན་འབར་བ་བསྣམས། །ཁྱོད་ལ་ཕྱག་འཚལ་མཆོད་པ་འབུལ། །བདུད་རྩི་ཤིང་སྣ་དར་སྣ་སྨན། །དཀར་མངར་རིན་
ཆེན་གསེར་གཡུས་མཆོད། །གཟའ་ཀླུའི་འཁྲུགས་པ་མ་མཛད་ཅིག །ཤར་ཕྱོགས་གཟའ་ཀླུ་མ་འཁྲུགས་ཤིག །གཟའ་ཀླུའི་འཁྲུགས་པ་དུམ་པར་གྱིས། །ཤར་ཕྱོགས་ཀླུ་བདུད་གདུག་རྩུབ་ཞི་བར་མཛོད། །ཧཱུྃ། ཤར་ཕྱོགས་གཟའ་ཆེན་པ་ཝ་སངས། །སྐུ་མདོག་དཀར་པོ་ཤེལ་རྟ་ཆིབས། །གཡས་པས་འགྱིང་དཀར་གཡོན་འཁོར་ལོ། །ཤིང་ཁམས་ཡོངས་ལ་དབང་སྒྱུར་བ། །ཁྱེད་ལ་མཉེས་པའི་གཟའ་ར་ལུག །ཚར་བུ་གསེར་རྒོད་གཡུ་རྒོད་དང་། །པན་གདུགས་ཤོག་ཤོག་ཏང་ཚེ་དང་། །ཤེལ་ཚིགས་བྱ་སྤུ་སྤྱན་གཟིགས་མཆོད། །འདོད་པའི་དཀོར་ནོར་ཚོགས་ཀྱིས་མཆོད། །རྒྱུ་སྦྱོར་ཡོན་གྱི་བདག་པོ་ལ། །རྒྱལ་རིགས་ཀླུ་དང་མ་འཁྲུགས་ཤིག །གཟའ་ཀླུའི་གདུག་པ་མ་བཏང་ཞིག །ཀླུ་དང་གཟའ་གཉིས་མ་བསྡོངས་ཤིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་བཤོལ་ལ་གདུག་འཕྲོ་ཆོད། །ཕྱིན་ཆད་གཟའ་ཀླུ་མ་འཁྲུགས་ཤིག །དགའ་བདེ་ཞི་བའི་ངང་ལ་བཅོས། །ཨོཾ། ལྷོ་ཕྱོགས་ཀླུ་རྒྱལ་འཇོག་པོ་ནི། །སྐུ་མདོག་སྔོ་ལ་འོད་ཟེར་འབར། །ཕྱག་མཚན་ཨུཏྤལ་སྔོན་
པོ་བསྣམས། །ཁྱེད་ལ་ཕྱག་འཚལ་མཆོད་པ་འབུལ། །དཀར་མངར་འབྲུ་བཅུད་རིན་ཆེན་ཚོགས། །དཀོར་ནོར་སྣ་ཚོགས་ཤིང་རྩིས་མཆོད། །གཟའ་ཀླུའི་འཁྲུགས་པ་མ་མཛད་ཅིག །ལྷོ་ཕྱོགས་གཟའ་དང་མ་འཁྲུགས་ཤིག །གཟའ་ཀླུའི་འཁྲུགས་པ་དུམ་པར་གྱིས། །ལྷོ་ཕྱོགས་ཀླུ་ཡི་གདུག་རྩུབ་ཞི་བར་མཛོད། །ཧཱུྃ། ལྷོ་ཕྱོགས་གཟའ་བློན་མིག་དམར་ནི། །སྐུ་མདོག་དམར་པོ་རུ་མཚོན་གཡས། །གཡོན་ན་མེ་དཔུང་འབར་བ་བསྣམས། །མེ་ཁམས་ཡོངས་ལ་དབང་སྒྱུར་བ། །ཁྱེད་ལ་ཡོན་བད་གསེར་གཡུ་དར། །གཟའ་ར་ལུག་དང་ཚར་བུ་བལ་ཚོན་དང་། །གསེར་དངུལ་ཟངས་ལྕགས་ཤོག་ཤོག་པན། །ཏང་ཚེ་ཀརྨ་པཱ་ཎི་ཤ་ཁྲག་ཕུད། །ཤེལ་ཚིགས་བྱ་སྤུ་ཆང་ཕུད་གཡི་སྤྱང་འབུལ། །རྒྱུ་སྦྱོར་ཡོན་གྱི་བདག་པོ་ལ། །རྒྱལ་རིགས་ཀླུ་དང་མ་སྡོངས་ཤིག །གཟའ་ཀླུའི་གདུག་པ་མ་བྱེད་ཅིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འབྲས་པ་བཤོལ་ལ་གདུག་འཕྲོ་ཆོད། །ཕྱིན་ཆད་གཟའ་ཀླུ་མ་འཁྲུགས་ཤིག །དགའ་བདེ་ཞི་བའི་ངང་ལ་བཅོས། །ཨོཾ། ནུབ་ཕྱོགས་ཀླུ་རྒྱལ་
སྟོབས་རྒྱུ་ནི། །སྐུ་མདོག་དམར་ལ་འོད་ཟེར་འབར། །ཕྱག་མཚན་ལག་ན་སྤྲིན་སྤུང་བསྣམས། །དེ་ལ་ཕྱག་འཚལ་མཆོད་པ་འབུལ། །དཀར་མངར་འོ་ཞོ་ཕུམ་ཐུད་མར། གསེར་དངུལ་ཟངས་ལྕགས་ཤིང་ཐོག་འབྲུ། །ལན་ཚྭ་ཟེ་ཚྭ་འབྲུ་སྲན་དང་། །བྲམ་ཟེ་ཀླུ་རྒྱལ་ཁྱེད་ལ་འབུལ། །རྒྱུ་སྦྱོར་ཡོན་གྱི་བདག་པོ་ལ། །བྲམ་ཟེ་ཀླུ་དང་མ་སྡོངས་ཤིག །ནུབ་ཕྱོགས་གཟའ་དང་མ་འཁྲུགས་ཤིག །གཟའ་ཀླུའི་འཁྲུགས་པ་དུམ་པར་གྱིས། །ནུབ་ཕྱོགས་ཀླུ་ཡི་གདུག་རྩུབ་སྒྱུར། །ཧཱུྃ། ནུབ་ཕྱོགས་གཟའ་ཆེན་ཕུར་བུ་ནི། །སྨུག་ནག་ཙནྡན་ཕུར་པ་འཛིན། །གཡོན་ན་ཟངས་གྱི་འཁོར་ལོ་བསྒྱུར། །ལྕགས་ཁམས་ཡོངས་ལ་མངའ་མཛད་པ། །ཁྱེད་ལ་གསེར་གཡུ་དར་ཟབ་བལ་ཚོན་དང་། །གཟའ་ཡི་ར་ལུག་ཚར་བུ་ཤ་ཆང་ཕུད། །སྤོས་མར་བདུད་རྩི་བུ་རམ་འབྲུ་སྲན་དང་། །གསེར་རྒོད་གཡུ་རྒོད་མཆོད་པའི་ཡོ་བྱད་འབུལ། །རྒྱུ་སྦྱོར་ཡོན་གྱི་བདག་པོ་ལ། །དམངས་རིགས་ཀླུ་དང་མ་སྡོངས་ཤིག །གཟའ་ཀླུའི་གདུག་པ་མ་མཛད་ཅིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་བཤོལ་ལ་གདུག་འཕྲོ་
ཆོད། །ཕྱིན་ཆད་གཟའ་ཀླུ་མ་འཁྲུགས་ཤིག །དགའ་བདེ་ཞི་བའི་ངང་ལ་བཅོས། །ཨོཾ། ཀླུ་རྒྱལ་རིགས་ལྡན་བྱང་གི་བདག །སྐུ་མདོག་ལྗང་ལ་འོད་ཟེར་འབར། །ཕྱག་མཚན་རིན་ཆེན་སྡོང་བུ་བསྣམས། །ཁྱོད་ལ་ཕྱག་འཚལ་མཆོད་པ་འབུལ། །དཀར་མངར་སྤྱན་གཟིགས་འབྲུ་སྣ་དར་སྣ་དང་། །བལ་ཚོན་བུ་རམ་སྦྲང་རྩི་ལན་ཚྭ་དང་། །བ་ར་དཀར་མོའི་འོ་མ་དཀོར་ནོར་མང་པོ་མཆོད། །གཟའ་ཀླུའི་འཁྲུགས་པ་བསལ་དུ་གསོལ། །བྱང་ཕྱོགས་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་དུམ་པར་གྱིས། །བྱང་ཕྱོགས་ཀླུ་ཡི་གདུག་རྩུབ་སྒྱུར། ཧཱུྃ། བྱང་ཕྱོགས་གཟའ་ཆེན་ལྷག་པ་ནི། །སྐུ་མདོག་དམར་པོ་བེ་ཅོན་བསྣམས། །ཆུ་ཁམས་ཡོངས་ལ་དབང་སྒྱུར་བ། །ཁྱེད་ལ་མཉེས་པའི་ཡོན་འབུལ་བ། །གསེར་གཡུ་བལ་ཚོན་བཟང་ཤིང་དང་། །གསེར་རྒོད་གཡུ་རྒོད་དཀོར་ནོར་ཆས་ཆེན་འབུལ། །འདོད་པའི་དཀོར་ནོར་ཚོགས་ཀྱིས་བཅོས། །རྒྱུ་སྦྱོར་ཡོན་གྱི་བདག་པོ་ལ། །གདོལ་པ་ཀླུ་དང་མ་སྡོངས་ཤིག །གཟའ་ཀླུའི་གདུག་པ་མ་བྱེད་ཅིག །གཟའ་དང་ཀླུ་གཉིས་མ་འཁྲུགས་ཤིག །བཟུང་བ་ཐོངས་
ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་ཟླུམས་ལ་གདུག་འཕྲོ་ཆོད། །ཕྱིན་ཆད་གདུག་རྩུབ་མ་བྱེད་ཅིག །དགའ་བདེ་ཞི་བའི་ངང་ལ་བཅོས། །ཨོཾ། ཤར་ལྷོ་ཀླུ་རྒྱལ་ནོར་རྒྱས་ནི། །སྐུ་མདོག་དཀར་སེར་ཕྲེང་བ་བསྣམས། །ཁྱེད་ལ་ཕྱག་འཚལ་མཆོད་པ་འབུལ། །བཟང་དྲུག་སྨན་དང་འོ་ཕུད་དང་། །དར་སྣ་བལ་ཚོན་བཟང་ཤིང་དང་། །མཉེས་པའི་ཀླུ་ནོར་སྣ་ཚོགས་རྣམས། །ཤར་ལྷོ་ཀླུ་རྒྱལ་ཁྱོད་ལ་འབུལ། །གཟའ་ཀླུའི་འཁྲུགས་པ་མ་བྱེད་ཅིག །ཤར་ལྷོ་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་དུམ་པར་གྱིས། །ཤར་ལྷོ་ཀླུ་ཡི་གདུག་རྩུབ་སྒྱུར། །ཧཱུྃ། ཤར་ལྷོ་གཟའ་ཆེན་ཉི་མ་ནི། །སྐུ་མདོག་སྔོ་སྐྱ་མཛེས་པ་ལ། །གཡས་ན་ཟིའོད་ཟེར་འཁོར་ལོ་འཛིན། །གཡོན་ན་ཟངས་ཀྱི་སྤར་མོ་བསྣམས། །འཁྲུགས་བཟླུམ་མཉེས་པའི་ཡོན་འབུལ་བས། །གསེར་རྒོད་གཡུ་རྒོད་སྟག་གཟིག་གཡི་སྤྱང་དང་། །དར་སྣ་གཟའ་ཡི་ར་ལུག་ཚར་བུ་དང་། །ཤེལ་ཚིགས་དར་ཚོན་དཀར་མངར་འོ་ཆང་ཕུད། །འོ་ཡོས་སྤོས་མར་ལ་སོགས་ཡོ་བྱད་འབུལ། །འདོད་པའི་ཡོ་བྱད་ཚོགས་ཀྱིས་བཅོས། །
རྒྱུ་སྦྱོར་ཡོན་གྱི་བདག་པོ་ལ། །ཤར་ལྷོ་ཀླུ་དང་མ་སྡོངས་ཤིག །གཟའ་ཀླུའི་འཁྲུགས་པ་མ་བྱེད་ཅིག །གཟའ་དང་ཀླུ་གཉིས་མ་སྡོངས་ཤིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་བཤོལ་ལ་གདུག་འཕྲོ་ཆོད། །ཕྱིན་ཆད་གནོད་པ་མ་བྱེད་ཅིག །དགའ་བདེ་ཞི་བའི་ངང་ལ་བཅོས། །ཨོཾ། ལྷོ་ནུབ་ཀླུ་རྒྱལ་དུང་སྐྱོང་ནི། །སྐུ་མདོག་དམར་ལྗང་འོད་ཟེར་འབར། །ཕྱག་མཚན་ཕྱག་ན་འབུད་དུང་བསྣམས། །དེ་ལ་ཕྱག་འཚལ་མཆོད་པ་འབུལ། །དཀར་མངར་འོ་ཞོ་ཐུད་དང་ཕྲུམ། །འབྲུ་སྲན་མེ་ཏོག་ཤིང་ཐོག་དང་། །དར་སྣ་པགས་བུ་བལ་ཚོན་ཡོ་བྱད་མཆོད། །གཟའ་ཀླུའི་འཁྲུགས་པ་དུམ་པར་གྱིས། །ལྷོ་ནུབ་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་མ་མཛད་ཅིག །ལྷོ་ནུབ་ཀླུ་ཡི་གདུག་རྩུབ་བསྒྱུར། །ཧཱུྃ། ལྷོ་ནུབ་གཟའ་ཡི་ཕྱག་བརྙན་བྱི་ཏྲི་པ་ཏྲ་ནི། །མཐིང་ག་བདུད་རྩི་བུམ་པ་བསྣམས། །ཁྱེད་ལ་མཉེས་པའི་མཆོད་པ་ནི། །གསེར་རྒོད་གཡུ་རྒོད་དར་སྣ་དང་། །བལ་ཚོན་ཤེལ་ཚིགས་གཟའ་ར་དང་། །གཟའ་ལུག་ཚར་བ་ཏང་ཚེ་དང་། །
དཀར་མངར་འོ་ཕུད་ཆང་ཕུད་དང་། །སྤོས་མར་འོ་ཡོས་བདུད་རྩི་བུ་རམ་འབུལ། །འདོད་པའི་དཀོར་ནོར་འདི་འབུལ་བས། །རྒྱུ་སྦྱོར་ཡོན་གྱི་བདག་པོ་ལ། །ལྷོ་ནུབ་ཀླུ་དང་མ་སྡོངས་ཤིག །གཟའ་ཀླུའི་འཁྲུགས་པ་དུམ་པར་གྱིས། །གཟའ་དང་ཀླུ་གཉིས་འགྲས་པ་སྡུམས། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་བཤོལ་ལ་གདུག་འཕྲོ་ཆོད། །ཕྱིན་ཆད་གདུག་རྩུབ་མ་བྱེད་ཅིག །དགའ་བདེ་ཞི་བའི་ངང་ལ་བཅོས། །ཨོཾ། ནུབ་བྱང་ཀླུ་རྒྱལ་པདྨ་ནི། །སྐུ་མདོག་དམར་ལ་འོད་ཟེར་འབར། །ཕྱག་མཚན་མེ་ཏོག་པདྨ་བསྣམས། །དེ་ལ་ཕྱག་འཚལ་མཆོད་པ་འབུལ། །གསེར་གཡུ་དར་སྣ་སྤྱན་གཟིགས་བཟང་དྲུག་སྨན། །བདུད་རྩི་བེ་རག་ཧོར་ཐན་དཀར་མངར་དང་། །སྤོས་མར་ཡོས་མར་འོ་མ་ཆང་ཕུད་བུ་རམ་དང་། །དཀར་མངར་གསུམ་དང་ཀླུ་སྨན་མཆོད་པ་འབུལ། །གཟའ་ཀླུའི་འཁྲུགས་པ་དུམ་པར་གྱིས་། །ནུབ་བྱང་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་མ་མཛད་ཅིག །ནུབ་བྱང་ཀླུ་ཡི་གདུག་རྩུབ་བསྒྱུར། །ཧཱུྃ། ནུབ་བྱང་གཟའ་ཆེན་ཟླ་བ་ནི། །སྐུ་
མདོག་དཀར་པོ་རྒྱན་དང་ལྡན། །ཕྱག་མཚན་གཡུང་དྲུང་ཤུག་པ་བསྣམས། །དེ་ལ་ཕྱག་འཚལ་མཆོད་པ་འབུལ། །མཉེས་པའི་ཡོན་འབུལ་གསེར་གཡུ་དར་སྣའི་པན། །སྟག་གཟིག་རྒྱལ་མཚན་གཟའ་ར་གཟའ་ལུག་དང་། །དཀར་མངར་འོ་ཆང་ཕུད་དང་སྤོས་མར་དང་། །འོ་ཡོས་བདུད་རྩི་བུ་རམ་འབུལ། །འདོད་པའི་དཀོར་ནོར་འདི་དག་འབུལ། །རྒྱུ་སྦྱོར་ཡོན་གྱི་བདག་པོ་ལ། །ནུབ་བྱང་ཀླུ་དང་མ་སྡོངས་ཤིག །གཟའ་ཀླུའི་འཁྲུགས་པ་དུམ་པར་གྱིས། །གཟའ་དང་ཀླུ་གཉིས་མ་འཁྲུགས་ཤིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་སྡུམས་ལ་འཁོན་པ་སྦྱངས། །ཕྱིན་ཆད་གདུག་རྩུབ་མ་བྱེད་ཅིག །དགའ་བདེ་ཞི་བའི་ངང་ལ་བཅོས། །ཨོཾ། བྱང་ཤར་ཀླུ་རྒྱལ་ཆུ་ལྷ་ནི། །སྐུ་མདོག་དཀར་ལ་འོད་ཟེར་འབར། །ཕྱག་མཚན་ཨུཏྤལ་ཞགས་པ་བསྣམས། །དེ་ལ་ཕྱག་འཚལ་མཆོད་པ་འབུལ། །དཀར་མངར་སྤྱན་གཟིགས་བ་དཀར་ར་དཀར་འོ་མ་དང་། །གྲོ་མ་མོན་བུ་འབྲུ་སྣ་དར་སྣ་དང་། །པགས་བུ་དར་ཚོན་དཀོར་ནོར་འབུལ། །གཟའ་ཀླུའི་འཁྲུགས་པ་
དུམ་པར་གྱིས། །བྱང་ཤར་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་མ་མཛད་ཅིག །བྱང་ཤར་ཀླུ་ཡི་གདུག་རྩུབ་སྒྱུར། །ཧཱུྃ། བྱང་ཤར་གཟའ་ཆེན་སྤེན་པ་ནི། །སྐུ་མདོག་སྔོ་སྐྱ་རྒྱན་དང་ལྡན། །ཕྱག་མཚན་ཟངས་ཀྱི་སྤར་ལང་བསྣམས། །ཁྱོད་ལ་ཡོ་བྱད་འབུལ་བ་ནི། །གསེར་རྒོད་གཡུ་རྒོད་སྤྱན་གཟིགས་དང་། །ཤ་ཁྲག་ཕུད་དང་ཆང་ཕུད་དང་། །རིན་ཆེན་ཏང་ཚེ་སྨན་དང་འབྲུ་སྣ་དང་། །འདོད་པའི་དཀོར་ནོར་དམ་པ་འབུལ། །རྒྱུ་སྦྱོར་ཡོན་གྱི་བདག་པོ་ལ། །བྱང་ཤར་གཟའ་དང་མ་སྡོངས་ཤིག །གཟའ་ཀླུའི་འཁྲུགས་པ་དུམ་པར་གྱིས། །གཟའ་དང་ཀླུ་གཉིས་མ་འཁྲུགས་ཤིག །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་ཀློད་ལ་མནན་པ་ཁྱོག །འགྲས་པ་སྡུམས་ལ་འཁོན་སྦྱང་ངོ་། །ཕྱིན་ཆད་གདུག་རྩུབ་མ་བྱེད་ཅིག །དགའ་བདེ་ཞི་བའི་ངང་ལ་བཅོས། །ཧཱུྃ། རི་རབ་ཆེན་པོའི་ལྷོ་ནུབ་ནས། །ཀླུ་སྲིན་འཁྲུགས་པའི་རཱ་ཧུ་ལ། །རོ་སྟོད་མི་ལ་རོ་སྨད་སྦྲུལ། །ཆུ་སྲིན་ཞགས་པ་མདའ་གཞུ་འཛིན། །སྐུ་ལས་མེ་ཡི་ཚྭ་ཚྭ་འཕྲོ། །རལ་པ་དམར་སེར་གྱེན་དུ་འབར། །སྐུ་མདོག་དམར་སེར་འོད་དུ་འབར། །
ལུས་གཅིག་མགོ་དགུ་མིག་གིས་གང་། །དམར་དང་དགྱེས་པའི་གཏོར་མ་འབུལ། །སྦ་དཀར་འདི་ལ་སྐུ་རྟེན་གྱིས། །པགས་བུ་འདི་ལ་སྔས་ཡར་ཁྱོགས། རིན་ཆེན་སྣ་ལྔས་ཐུགས་བརྟན་པ། །ཞང་པོ་ཀླུ་དང་མ་འཁྲུགས་ཤིག །འགལ་འཁྲུལ་སོང་ན་ཡོན་གྱིས་བཅོས། །གཟའ་ཀླུའི་འཁྲུགས་པ་དུམ་པར་གྱིས། །གདུག་རྩུབ་ཐམས་ཅད་ཞི་བར་མཛོད། །སེམས་ཅན་ནད་རྣམས་བྱང་བར་ཤོག ཀྱཻ། རྒྱུ་སྐར་ཉི་ཤུ་རྩ་བརྒྱད་ལ། །རྫ་ས་དང་ཡོ་བྱད་སྣ་ཚོགས་འབུལ། །གཟའ་ཀླུ་འཁྲུགས་པའི་བསྡོང་མ་། མཛད། །སོ་སོའི་གནས་སུ་བདེ་བར་བཅོས། །མཐུ་ལྡན་རྒྱལ་པོ་ཆེན་པོ་བཞི། །དྲི་ཟ་གྲུལ་བུམ་ཀླུ་གནོད་སྦྱིན། །གནམ་ལ་དབང་བསྐུར་མཐུ་དང་དཔལ་ལྡན་པ། །ཡིདའོང་མཛེས་པའི་མཆོད་པ་འབུལ། །རྒྱལ་ཆེན་སྡེ་བཞིའི་འཁྲུགས་པ་བསལ་དུ་གསོལ། །སྟོང་གསུམ་སྟོང་གི་འཇིག་རྟེན་ཁམས། །དེ་ལ་གནས་པའི་ལྷ་སྲིན་སྡེ་བརྒྱད་ཀྱི། །གདུག་རྩུབ་ཐམས་ཅད་ཞི་གྱུར་ཅིག །དཔག་བསམ་རྩེ་ནས་སྤྱི་རྗེ་ཁྱུང་ཆེན་གྱིས། །རྒྱ་མཚོ་ཀླུ་ཡི་འཁྲུགས་པ་ཞི་གྱུར་ཅིག །རི་རབ་ཆེན་པོའི་ཕྱོགས་བཞི་ནས། །རྒྱལ་ཆེན་
བཞི་ཡི་འཁྲུགས་པ་ཞི་གྱུར་ཅིག །རི་རབ་ཆེན་པོའི་ཁོང་གསེང་ནས། །ལྷ་མ་ཡིན་གྱི་འཁྲུགས་པ་ཞི་གྱུར་ཅིག །ཡེ་ངམ་གཉིས་ཀྱི་འཁྲུགས་པ་ཞི་གྱུར་ཅིག །གཉན་སྡང་གཉིས་ཀྱི་འཁྲུགས་པ་ཞི་གྱུར་ཅིག །དམུ་བདུད་གཉིས་ཀྱི་འཁྲུགས་པ་ཞི་གྱུར་ཅིག །ཀླུ་དང་ས་བདག་འཁྲུགས་པ་ཞི་གྱུར་ཅིག །གཟའ་དང་རྒྱུ་སྐར་གྱི་འཁྲུགས་པ་ཞི་གྱུར་ཅིག །སྣང་སྲིད་ཐམས་ཅད་ཀྱི་འཁྲུགས་པ་ཞི་གྱུར་ཅིག །ལྷ་སྲིན་སྡེ་བརྒྱད་ཀྱི་འཁྲུགས་པ་ཞི་གྱུར་ཅིག །འདི་ཐོག་སེར་བཙའ་སད་དང་། བྱོལ་སོང་ལ་ནད་མང་བ། གཟའ་ནད་མང་བ། གཟའ་ཀླུའི་ནད་མང་བ་བྱུང་ན་མང་དུ་འདོན། སྔགས་འདི་མང་དུ་བགྲང་། ཨོཾ་ནཱ་ག་ཕུ་ཡེ་མ་ཡུ་ཀེ་སྭཱ་ཧཱ། ཨོཾ་ཨ་འབར་ཤ་དུ་བ་ར་ནི་སྭཱ་ཧཱ། ཨོཾ་ནཱ་ག་བ་མུན་ཡེ་སྭཱ་ཧཱ། ཨོཾ་ཤ་དེ་བ་རི་ནི་སྭཱ་ཧཱ། ཨོཾ་མུར་ཟང་དུ་མུ་ཡེ་སྭཱ་ཧཱ། ཨོཾ་པི་ཤ་ར་དེ་སྭཱ་ཧཱ། ཨོཾ་མུར་ཟང་དེ་པ་སྲན་སྭཱ་ཧཱ། ཨོཾ་ཕན་ཤ་དེ་བེ་སྭཱ་ཧཱ། ཨོཾ་མུར་ཟང་དུ་ཡེ་སྭཱ་ཧཱ། ཨོཾ་དུ་ཤ་ར་བ་དེ་སྭཱ་ཧཱ། ཨོཾ་མུར་ཟང་འདུ་ར་ཁ་ཏ་སྭཱ་ཧཱ་ཨོཾ་ཤ་མ་ར་ནུ་སྭཱ་ཧཱ། ཨོཾ་མུར་ཟང་དུ་མུན་ཡེ་སྭཱ་ཧཱ། ཨོཾ་ཤ་མ་ར་ནི་རི་སྲི་ཀ་སྭཱ་ཧཱ། ཨོཾ་མུར་ཟང་འདུ་དཀར་ལི་ནི་ནན་སྭཱ་ཧཱ། ཨོཾ་ཤ་ར་ཏི་རུ་ཏ་ལ་སྭཱ་ཧཱ། ཨོཾ་དྷ་ལ་མ་དྷུ་
སི་ཡེ་པདྨེ་ཧཱུྃ། སྔགས་དེ་ཅི་མང་དུ་བགྲང་ངོ་། །སརྦ་མངྒ་ལཾ། །དགེའོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།