ས་བདག་དབང་ཆེན་སྟོང་གསུམ་འཁྲུགས་བཅོས་ལས། སྙིང་གི་གཏེར་སྦས་རིན་ཆེན་བང་མཛོད་བཀྲ་ཤིས་དོན་གྲུབ།
ས་བདག་དབང་ཆེན་སྟོང་གསུམ་འཁྲུགས་བཅོས་ལས། སྙིང་གི་གཏེར་སྦས་རིན་ཆེན་བང་མཛོད་བཀྲ་ཤིས་དོན་གྲུབ་བཞུགས་སོ།།
འཕགས་པ་འཇམ་དཔལ་དབྱངས་ལ་ཕྱག་འཚལ་ལོ། །འགྲོ་ལ་ཕན་ཕྱིར་རིན་ཆེན་གཏེར་སྦས་འདི། །དབུལ་ཕོངས་རྨོངས་པ་སེལ་ཕྱིར་འཇམ་དབྱངས་ཀྱིས། །ས་སྐྱོང་ཀོང་ཙེ་འཕྲུལ་གྱི་རྒྱལ་པོ་ལ། །སྙིང་གི་དྭངས་མ་བདུད་རྩིའི་བུམ་པ་བསྟན། །ཕྱི་ནང་གནོད་སྦྱིན་ཀླུ་དང་གཞི་བདག་གཉན། །གསས་མཁར་གསར་རྙིང་གང་ལ་ཅི་དགོས་བཏག །ས་བདག་ཀླུ་གཉན་རྣམས་ལ་གཏེར་སྦས་པས། །འདི་ཡི་བཅའ་ཀ་བྱ་བ་འདི་ལྟར་རོ། །རིན་ཆེན་བུམ་པ་སྦ་སྨྱུག་ཤིང་ཤུན་དང་། །ནང་དུ་གསེར་དངུལ་མུ་མེན་བྱུ་རུ་ཤེལ། །གཟི་མཆོང་མུ་ཏིག་དུང་དང་སྙིང་ཞོ་ཤ །མཁལ་མ་གླ་གོར་ཞོ་ཤ་དབང་ལག་དང་། །ཆུ་སྲིན་སྡེར་མོ་ཀླུ་སྨན་བཟང་པོ་དྲུག །དཀར་གསུམ་མངར་གསུམ་དར་སྣ་འཛོམ་པར་བྱས། །རི་བོང་སྙིང་
དང་རིན་པོ་ཆེ་ཡི་རིགས། །མཚོ་འམ་རི་བཟང་ཆུ་སྣ་བཟང་པོ་རུ། །གསས་མཁར་ས་མིག་བཟང་པོའི་ནང་རྫོངས་བྱས། ༈ །འཇམ་དབྱངས་ས་སྙིང་ཉེ་སྲས་སྙིང་པོ་ས་བདག་ཀླུ་གཉན་གཞི་བདག་རྣམས་ཀྱི་གཟུངས། །རྫས་རྟགས་བཀྲ་ཤིས་སྙིང་པོ་རྣམས་བྲིས་ལ་བཅུག །གཞུང་དང་མཐུན་པར་ས་མིག་བཟང་པོ་རུ། །ཁྲོ་བོའི་བགེགས་བསྐྲད་བསང་དང་ཆབ་གཏོར་བྱ། །དེ་ནས་སྙན་པའི་དབྱངས་ཀྱིས་འདི་སྐད་དོ། ཀྱཻ། སྔོན་གྱི་བསྐལ་པ་དང་པོ་ལ། །རིན་པོ་ཆེ་ཡི་ཡར་སྟེང་དུ། །ཨ་མོ་ལི་ཀའི་རྡོ་ལེབ་སྟེང་། །རྣམ་པར་རྒྱལ་བའི་ཁང་བཟང་དུ། །རིན་ཆེན་སྣ་ཚོགས་ལས་གྲུབ་པའི། །རུས་སྦལ་ཆེན་པོའི་ལྟོ་བ་རུ། །རིན་པོ་ཆེ་ཡི་གཏེར་སྦས་
པས། །གཏེར་བདག་ཆེན་པོ་སྤྱན་འདྲེན་ནོ། །དབུས་ཕྱོགས་པདྨའི་གདན་སྟེང་ནས། །མཁྱེན་རབ་བདག་པོ་འཇམ་དཔལ་དབྱངས། །གསེར་གྱི་མདོག་ཅན་སྤྱན་འདྲེན་ནོ། །རིན་ཆེན་སྣ་ལྔའི་གཏེར་ལ་བཞུགས། །སྐུ་ཡི་རྟེན་དང་གནས་མཛོད་ལ། །དེ་ཡི་བཀའ་ཉན་བརྟན་སྐྱོང་མ། །ས་ཡི་ལྷ་མོ་བརྟན་མ་ཡུམ། །ས་འཛིན་ལག་པ་སྲས་འཁོར་བཅས། །ཡབ་ཡུམ་སྲས་དང་བཀའ་བློན་བཅས། །གཏེར་ཆེན་འདི་ལ་སྤྱན་འདྲེན་ནོ། །དད་པའི་ཚུལ་གྱིས་གཤེགས་སུ་གསོལ། །རིན་ཆེན་སྣ་ལྔའི་གཏེར་སྦས་པས། །སྐུ་ཡི་རྟེན་དང་གནས་མཛོད་ཅིག །ནམ་ཟླ་དུས་བཞི་མངའ་མཛད་པ། །འབྱུང་བ་བཞི་ཡི་རྒྱལ་མོ་བཞི། །སོ་སོར་རང་རང་འཁོར་བཅས་རྣམས། །གཏེར་ཆེན་འདི་ལ་སྤྱན་འདྲེན་ནོ། །དད་པའི་ཚུལ་གྱིས་གཤེགས་སུ་གསོལ། །རིན་ཆེན་སྣ་ལྔའི་གཏེར་སྦས་པས། །སྐུ་ཡི་རྟེན་དང་གནས་མཛོད་ཅིག །སྨེ་བ་དགུ་ཡི་ལྷ་རྣམས་དང་། །སྤར་ཁ་བརྒྱད་ཀྱི་ལྷ་རྣམས་དང་། །ལོ་སྐོར་བཅུ་གཉིས་ས་བདག་དང་། །ལྷ་ཀླུ་གཉན་དང་གཟའ་ཆེན་བརྒྱད། །ཐེ་སེ་ལ་སོགས་ལོ་སྐོར་བཅས། །འབྲུག་རྗེ་ལ་སོགས་ཟླ་འཁོར་
བཅས། །གསེར་མཛོད་གཡུ་མཛོད་ལ་སོགས་པ། །ཞག་དང་དུས་ཚོད་འཛིན་པ་ཡི། །ས་བདག་གདུག་པ་ཅན་རྣམས་དང་། །ཡུལ་ལྷ་གཞི་བདག་ཐམས་ཅད་དང་། །བར་སྣང་ཁམས་གསུམ་འགྲིམས་པ་ཡི། །སྣང་སྲིད་ལྷ་འདྲེ་མཐུ་བོ་ཆེ། །གཏེར་ཆེན་འདི་ལ་སྤྱན་འདྲེན་ནོ། །དད་པའི་ཚུལ་གྱིས་གཤེགས་སུ་གསོལ། །རིན་ཆེན་སྣ་ལྔའི་གཏེར་སྦས་པས། །སྐུ་ཡི་རྟེན་དང་གནས་མཛོད་ཅིག །རྣམ་པར་རྒྱལ་བའི་ཁང་བཟང་དབུས། །ཨ་མོ་ལི་ཀའི་རྡོ་ལེབ་སྟེང་། །རིན་ཆེན་སྣ་ཚོགས་གཏེར་སྦས་པས། །ལྷ་རྣམས་གཟི་བརྗིད་མདངས་དང་ལྡན། །ལྷ་རྣམས་བཀྲ་ཤིས་དོན་ཀུན་གྲུབ། །ཡོན་བདག་བཀྲ་ཤིས་ཕུན་སུམ་ཚོགས། །འོག་ཕྱོགས་རྒྱ་མཚོ་འཁྱིལ་པའི་དབུས། །མ་གྲོས་མཚོ་ཡི་ཀློང་དཀྱིལ་ནས། །ཀླུ་ཡི་རྒྱལ་པོ་འཁོར་བཅས་ལ། །རིན་ཆེན་སྣ་ཚོགས་གཏེར་ཆེན་འབུལ། །གཏེར་ཆེན་འདི་ལ་སྤྱན་འདྲེན་ནོ། །དད་པའི་ཚུལ་གྱིས་གཤེགས་སུ་གསོལ། །རིན་ཆེན་སྣ་ལྔའི་གཏེར་སྦས་པས། །སྐུ་ཡི་རྟེན་དང་གནས་མཛོད་ཅིག །རིན་ཆེན་སྣ་ལྔའི་གཏེར་ཆེན་འབུལ། །ཀླུ་རྣམས་མདངས་དང་ལྡན་གྱུར་ཅིག །
ཀླུ་ཡི་འཕེལ་གཡང་དངོས་གྲུབ་སྩོལ། །བདག་ཅག་ཡོན་མཆོད་འཁོར་བཅས་ལ། །ཀླུ་ཡི་དངོས་གྲུབ་བསྩལ་དུ་གསོལ། །ས་བདག་གདུག་པའི་དབལ་ཟེར་དང་། །མི་ནད་ཕྱུགས་ནད་སྣ་ཚོགས་དང་། །ཞིང་གི་བཙའ་སད་སེར་གསུམ་དང་། །དལ་ཡམས་གཡུལ་འཁྲུགས་ལང་བ་སོགས། །ལྷ་ཀོང་ཙེ་འཕྲུལ་གྱི་རྒྱལ་པོ་ཡིས། །རྒྱལ་པོ་གྱིམ་ཤིང་དོན་ཆེད་དུ། །རིན་ཆེན་སྣ་ཚོགས་གཏེར་ཆེན་སྦས། །གཏེར་བདག་ཆེན་པོ་སྤྱན་འདྲེན་ནོ། །ཐུགས་རྗེའི་དབང་གིས་གཤེགས་སུ་གསོལ། །སྐུ་ཡི་རྟེན་དང་གནས་མཛོད་ཅིག །དེ་ལྟར་རྒྱལ་པོ་གྱིམ་ཤིང་བདེ་སྐྱིད་ལྡན། །ནག་པོ་རྒྱ་ཡི་འཕེལ་གཡང་ལེན། །བསོད་ནམས་དཔལ་འབྱོར་དར་རྒྱས་འབྱུང་། །སྔོན་ཚེ་སྲིད་པའི་དཔེ་བཞིན་དུ། །དེ་རིང་རྣལ་འབྱོར་བདག་ཅག་ལ། །ཡིད་བཞིན་དངོས་གྲུབ་འཕེལ་གཡང་སྩོལ། །དེ་རིང་རྣལ་འབྱོར་བདག་ཅག་གི །ལོ་སྐག་ཟླ་སྐག་བཟློག་པ་དང་། །མོ་ངན་ལྟས་ངན་བསྒྱུར་བ་དང་། །གཞི་བདག་རྟེན་ལ་དགྱེས་པ་དང་། །ཀླུ་རྣམས་མཉེས་ཕྱིར་གཏེར་འདི་འབུལ། །བུ་ནོར་དབང་ཐང་འཕེལ་བའི་ཕྱིར། །རིན་ཆེན་སྣ་ཚོགས་གཏེར་ཆེན་འབུལ། །སྐུ་ཡི་རྟེན་
དང་གནས་མཛོད་ཅིག །ཞག་དང་དུས་ཚོད་འཛིན་པ་དང་། །ཀླུ་དང་ས་བདག་གཉན་རྣམས་དང་། །ནོར་ལྷ་གཏེར་བདག་ཐམས་ཅད་དང་། །ཡུལ་ལྷ་གཞི་བདག་ཐམས་ཅད་དང་། །སྔགས་འཆང་བདག་ཅག་འཁོར་བཅས་ལ། །མགོན་སྐྱབས་ཕན་འདོགས་བྱེད་པ་རྣམས། །རིན་ཆེན་གཏེར་ལ་སྤྱན་འདྲེན་ནོ། །དད་པའི་ཚུལ་གྱིས་གཤེགས་སུ་གསོལ། །རིན་ཆེན་སྣ་ཚོགས་གཏེར་སྦས་པས། །སྐུ་ཡི་རྟེན་དང་གནས་མཛོད་ཅིག །ས་གཞི་འདི་ལ་གནས་པ་ཡི། །གཞི་བདག་གནས་བདག་ཀླུ་གཉན་ལ། །རྟེན་བཙུགས་རྟེན་བཅའ་མཆོད་པ་འབུལ། །ཕྱག་འཚལ་བསྟོད་དོ་དབུ་འཕང་བསྟོད། །རྒྱུ་སྦྱོར་ཡོན་གྱི་བདག་པོ་ལ། །འབྲུ་དྲུག་ནས་ཀྱི་གཏེར་སྦས་པས། །མི་འབྲུ་ནས་བས་འཕེལ་བར་ཤོག །རིན་ཆེན་གསེར་གྱི་གཏེར་སྦས་པས། །མི་རྒྱུད་གསེར་བས་བཟང་བར་ཤོག །རིན་ཆེན་གཡུ་ཡི་གཏེར་སྦས་པས། །མི་བཀྲ་གཡུ་བས་བཀྲ་བར་ཤོག །རིན་ཆེན་དུང་གི་གཏེར་སྦས་པས། །ལྷ་ཞལ་དུང་བས་དཀར་བར་ཤོག །རྩི་བཅུད་མར་གྱི་གཏེར་སྦས་པས། །མི་སྣུམ་མར་བས་སྣུམ་པར་ཤོག །རིན་ཆེན་ཟངས་ལྕགས་འདི་
འབུལ་བས། །མི་སྲོག་ལྕགས་བས་སྲ་བར་ཤོག །བཙན་ཕྱུག་འཕེན་དར་འཛོམ་པར་ཤོག །བསྟན་པའི་བཀྲ་ཤིས་བདེ་ལེགས་ཤོག །ཅེས་པ་གཏེར་སྦས་རིན་ཆེན་བང་མཛོད་འདི། །འཕགས་པ་འཇམ་དཔལ་གྱིས་ཀོང་ཙེ་འཕྲུལ་གྱི་རྒྱལ་པོ་ལ་གདམས་པའོ། །ཀོང་ཙེ་འཕྲུལ་རྒྱལ་གྱིས་གྱིམ་ཤིང་པའི་དོན་དུ་མཛད་པ་བདེ་སྐྱིད་དང་ལྡན་པ་འབྱུང་ངོ་། །ཨ་རཱ་གས་ས་བདག་དབང་ཆེན་འཁྲུགས་བཅོས་སུ་བཞག་པའོ། །སརྦ་མངྒ་ལཾ། །དགེའོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།