ས་བདག་དབང་ཆེན་ལས། གནམ་ཁྱི་བཅོས་པ།
ས་བདག་དབང་ཆེན་ལས། །གནམ་ཁྱི་བཅོས་པ་བཞུགས་སོ། །གནམ་ཁྱི་སྤྱན་འདྲེན་པ་ནི། ཀྱཻ། དེ་རིང་ཡོན་བདག་འདི་ཡི་དོན་ཆེད་དུ། །ནམ་མཁའི་ལྷ་མོ་སྤུན་བདུན་དང་། །ཕོ་ཉ་གནམ་ཁྱི་འཁོར་དང་བཅས། །གནམ་ཁྱིའི་འཁྲུགས་པ་བཅོས་པའི་ཕྱིར། །བདག་ཅག་དད་པས་སྤྱན་འདྲེན་ན། །ཞི་བ་བྱང་ཆུབ་སེམས་དང་ནི། །མཆོད་པའི་གནས་འདིར་གཤེགས་སུ་གསོལ། །གདུག་རྩུབ་ཐམས་ཅད་ཞི་བར་མཛོད། །མཆོད་ཡོན་དམ་པ་འབུལ་བ་ནི། །ར་བདུན་དང་ནི་ལུག་བདུན་དང་། །བུམ་པ་བདུན་དང་འོ་མའི་རྫིང་བུ་བདུན། །རལ་གྲི་བདུན་དང་མེ་ལོང་བདུན་། །མདུང་བདུན་དང་ནི་མདའ་དར་བདུན། །སྤོས་མེ་བདུན་དང་ལྷ་བཤོས་བདུན། །ལྷ་ཡི་རྒྱལ་མོ་བདུན་ལ་འབུལ། །བདག་ཅག་དད་པས་སྤྱན་འདྲེན་ན། །བརྩེ་བར་དགོངས་ལ་བཞེས་སུ་གསོལ། །ལྷ་མོའི་ཆོ་འཕྲུལ་མ་གཏོང་ཞིག །གནམ་ཁྱིའི་གདུག་པ་མ་གཏོང་ཞིག །ནད་དང་གློ་བུར་མ་གཏོང་ཞིག །རྐྱེན་དང་བར་ཆད་བསྒྱུར་དུ་གསོལ། །འཁྲུགས་པ་བཅོས་སོ་འགྲས་པ་བསྡུམས། །ཡོ་བ་སྲོངས་ལ་རལ་བ་དྲུབ། །ཆད་པ་མཐུད་ལ་གས་པ་སྦྱོར། །མཆོད་
ཡོན་བཞེས་ལ་དགྱེས་པར་མཛོད། །སྲིད་ལ་སྨོན་ལམ་བཏབ་ཏུ་གསོལ། །ཀོང་ཙེ་ང་ཡི་བསྟན་པ་ཡང་། །འཛམ་བུའི་གླིང་དུ་དར་བར་གྱིས། །གནམ་ཁྱིའི་གདུག་པ་ཞི་བར་མཛོད། །ནད་དང་གློ་བུར་བཟློག་ཏུ་གསོལ། །རྐྱེན་དང་བར་ཆད་བསྒྱུར་དུ་གསོལ། །རྩ་དཀར་སྲིད་རྣམས་སྤེལ་དུ་གསོལ། །ད་ནི་གནམ་ཁྱིའི་བཅོས་པ་ནི། ཀྱཻ། ད་ནི་ས་བདག་འཁྲུགས་པ་བཅོས་པའི་ཕྱིར། །ནམ་མཁའི་ལྷ་མོ་སྤུན་བདུན་དང་། །གནམ་ཁྱི་ནག་པོ་འཁོར་བཅས་ལ། །མཆོད་ཡོན་དམ་པ་འབུལ་བ་ནི། །ཟས་སྐོམ་རྣམ་པ་སྣ་ཚོགས་དང་། །སྤོས་དང་གུ་གུལ་དཀར་པོ་དང་། །ར་རྒྱ་བོ་མིག་བཞི་ལ་སོགས་དབང་པོ་ལྔ། །ལེ་བརྒན་དམར་པོ་འདི་དང་ནི། །འབྲང་རྒྱས་ཞལ་དཀར་འདི་འབུལ་བས། །བརྩེ་བར་དགོངས་ལ་བཞེས་སུ་གསོལ། །ཡོན་བདག་མི་ནོར་འདི་དག་ལ། །འགོང་པོའི་ཕྱག་བརྙན་མ་འགྱེད་ཅིག །སྲིད་ལ་གནོད་པ་མ་བྱེད་ཅིག །ཐེའུ་རང་གི་རྒྱབ་རྟེན་མ་བྱེད་ཅིག །གནམ་ཁྱིའི་རྒྱལ་ཁ་མ་གཏོང་ཞིག །མཐུ་དཔུང་སྟོངས་གྲོགས་མཛད་དུ་གསོལ། །སྨིན་བདུན་ནམ་མཁའི་ལྷ་མོ་དང་། །མཆོད་ཡོན་དམ་པ་འབུལ་བ་ནི། །ལེབ་
ཕྱིང་དཀར་པོ་དང་ལུག་གྲོ་མོ་ཡོན་དུ་འབུལ། །སྨྱུག་མ་ཚིགས་བདུན་དང་། །དར་ཐག་པན་བདུན་འབུལ། །པགས་བུ་དཀར་འཁྱིལ་དང་། །སྤོས་དང་གུ་གུལ་དཀར་པོ་དང་། །གསེར་རྒོད་གཡུ་རྒོད་མཆོད་པ་འབུལ། །བརྩེ་བས་དགོངས་ལ་བཞེས་སུ་གསོལ། །གནོད་པ་སྣ་ཚོགས་མ་གཏོང་ཞིག །མཐུ་དང་སྟོངས་གྲོགས་མཛད་དུ་གསོལ། །འཁྲུགས་པ་སོལ་ལ་བསོད་ནམས་སྤེལ། །ཁྱོད་ལ་ཕྱག་འཚལ་མཆོད་པ་འབུལ། །ད་ནི་ཟ་འོག་རི་མོ་བསྒྲང་ལ་འབུལ་བ་ནི། །ནམ་མཁའི་ལྷ་མོ་སྤུན་བདུན་དང་། །གནམ་ཁྱི་ནག་པོ་འཁོར་བཅས་ལ། །ཟ་འོག་སྣ་ཚོགས་འབུལ་བ་ནི། །མཁར་དགུའི་མིག་མང་བྲིས་པ་ལ། །འཇའ་ཚོན་སྤྲིན་དཔུང་གཉན་གྱི་ཟ་འོག་དང་། །རིན་ཆེན་དྲྭ་མིག་ཚུལ་དུ་བྲིས་པ་དང་། །ཉི་ཟླ་གཟའ་སྐར་ཚུལ་དུ་བྲིས་པ་དང་། །རི་རབ་གླིང་བཞིའི་ཚུལ་དུ་བྲིས་པ་དང་། །རིན་ཆེན་ཤ་བ་དཀོར་ནོར་བཅོས་པའི་ཟ་འོག་དང་། །རྒྱ་མཚོ་འཆིང་ནམ་ཚུལ་དུ་བྲིས་པ་དང་། །གསེར་གྱི་གཡུ་འབྲུག་ཆུ་སྲིན་བཅོས་པའི་ཟ་འོག་དང་། །ལྷ་མོ་བརྒྱད་སྟོང་རོལ་མོ་བྱེད་པའི་ཟ་འོག་དང་། །དཔག་བསམ་ལྗོན་ཤིང་མེ་
ཏོག་དང་། །གསེར་བྱིལ་གཡུ་བྱིལ་བཅོས་པའི་ཟ་འོག་དང་། །ཤུག་ཁྱིམ་འཁོར་བཅས་རིན་ཆེན་ལ། །སྣ་ཚོགས་རིན་ཆེན་བྲིས་པའི་ཟ་འོག་དང་། །ཧ་ལོ་མེ་ཏོག་བྲིས་པའི་ཟ་འོག་དང་། །འདབ་ཆགས་རྨ་བྱ་བྲིས་པའི་གཟུགས་བརྙན་དང་། །སེར་ཆེན་དང་ནི་གུར་ཐབས་དང་། །སེང་གེ་ཟ་བེར་ལྷ་ཡི་གཡུང་དྲུང་ཚུལ་དུ་བྲིས་པའི་ཟ་འོག་དང་། །སྨྱུག་མ་བལ་ཚོན་རྒྱན་དང་ཆས། །དཔག་བསམ་ལྗོན་ཤིང་ཚུལ་དུ་བྱས་པ་ནི། །མཆོད་ཡོན་དམ་པ་འདི་འབུལ་ན། །བཞེས་ནས་སྡོང་གྲོགས་མཛད་དུ་གསོལ། །འཁྲུགས་པ་བཅོས་སོ་འགྲས་པ་སྡུམས། །གནམ་ཁྱིའི་འཁྲུགས་པ་ཡོན་གྱིས་བཅོས། །ཅེས་གནམ་ཁྱིའི་བཅོས་རྫོགས་སོ། །དགེའོ། །དགེའོ། །དགེའོ། །སརྦ་མངྒ་ལཾ། ཤུ་བྷཾ།