ས་བདག་དབང་ཆེན་སྟོང་གསུམ་འཁྲུགས་པ་ཡོ་བཅོས་ལས་ཚེ་དཔལ་གཡང་སྐྱབས་བཀྲ་ཤིས་ཕུན་ཚོགས་རྒྱུད་ཀྱི་ཚེ་གཡང་རིན་ཆེན་དཔལ་ཁེབས།
ས་བདག་དབང་ཆེན་སྟོང་གསུམ་འཁྲུགས་པ་ཡོ་བཅོས་ལས་ཚེ་དཔལ་གཡང་སྐྱབས་བཀྲ་ཤིས་ཕུན་ཚོགས་རྒྱུད་ཀྱི་ཚེ་གཡང་རིན་ཆེན་དཔལ་ཁེབས་ཞེས་བྱ་བ་བཞུགས་སོ།།
བླ་མ་རྣམས་དང་དཀོན་མཆོག་གསུམ། །ཡི་དམ་དཔའ་བོ་མཁའ་འགྲོ་དང་། །ཆོས་སྐྱོང་སྲུང་མ་དམ་ཚིག་ཅན། །ནོར་ལྷ་གཏེར་བདག་རྣམས་ལ་འདུད། །མི་ནོར་ཟས་གསུམ་ལ་སོགས་གཡང་ཉམས་ཤིང་དབུལ་བ་དང་། གོད་ཁ་མང་བ་དང་། དུར་ཉེས་པ་དང་། རྟག་ཏུ་ལོ་ཉེས་པ་དང་། རྨོངས་འདྲེ་ལངས་ནས་ཉེས་པ་ཡིན་པས། གཡང་སྐྱབས་དང་གཡང་ལེན་པར་བཤད། དེའི་བྱ་ཐབས་ནི། གཞི་དཀར་པོའི་སྟེང་དུ་ནས་ཀྱི་ར་བ། དེའི་ཕྱི་རིམ་གཡང་ཤིང་གི་ར་བ། སྤེན་དཀར་སུར་དཀར་མཁན་དཀར་སོགས་ཀྱི་ར་བས་བསྐོར། རྩྭ་དུར་བ་ཀུ་ཤས་བསྐོར་དཔུང་བརྩེགས། སོག་བལ་མར་གྱི་པུ་ལུ། མངར་གསུམ་རྣམས་དང་ནས་ཀྱི་ཚོམ་བུ། གཡང་གི་རྟེན་ལ་སེང་ལྡེང་ཕུར་པ། མེ་ལོང་མདའི་སྨྱུག་མ་ལ་དར་ལིང་དཀར་
པོ་བཏགས་པ་ལ། རིན་པོ་ཆེ་གཡུ་ལ་སོགས་པ། སྲུང་སྐུད་དཀར་པོ་མང་པོ། ལུག་ཤ་ལག་པ་གཡས་པ། ལུག་མགོ་ནམ་ཚོང་། མར་གྱི་བ་དཀར་མོ། གཡང་གི་གཏོར་མ་དཔེའུ་རིས་ལྟར་རིན་ཆེན་ཟུར་བརྒྱད་པ། གཡང་ཟན་ལྡིར་བ། ཚེ་ཟན་རིན་ཆེན་འབར་བ། ཕྱེ་མར་སྣ་ཚོགས། འབྲུ་སྣ་ཚོགས། གཡང་སྐྱབས་རྒྱས་བསྡུས་གང་བྱེད་ཀྱང་། །གཡང་ཕོར་ནང་དུ་མར་ཁུའི་མཚོ། །ཇ་དང་འོ་མ་ཆང་གི་རྒྱ་མཚོ། ཟས་སྣ་མང་པོ། རྟ་ལུག་འབྲི་ལ་སོགས་པ་གཟུགས་འགྲོས་མང་པོ། བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱི་མཆོད་གཏོར། ཕྱོགས་སྐྱོང་དང་གཞི་བདག་རྣམས་ལ་མཆོད་པ་འབྱོར་ཚད་བཤམས། རང་གཞན་གྱི་དོན་དུ་སྐྱབས་འགྲོ་སེམས་བསྐྱེད་བྱ། རང་ཡི་དམ་གང་རུང་ངམ་དབང་ཆེན་བསྒོམ། དང་པོ་
དུག་ཕྱུང་། ཁྲུས་བྱ། བགེགས་གཏོར་བཏང་། མཚམས་གཅོད་བྱ། དེ་ནས་གཡང་རབས་ཚང་བར་བརྗོད་པ་ནི། ཀྱཻ། དང་པོ་བཀའ་འདི་ཡར་ལྟོས་ལ། །ལྷ་རི་མཐིལ་གྱི་མཐིལ་སྟོད་ལ། །ལྷ་རི་གང་བ་ཡ་ཐ་ནས། །ལྷ་ཀོང་ཙེ་རྒྱལ་པོས་ས་དཔྱད་བྱས། །ཡང་རྩེ་རྒྱལ་པོས་རྩིས་དཔྱད་བྱས། །ཇི་ཙེ་རྒྱལ་པོས་ཚེ་དཔལ་བསྐྱེད། །ལིང་ཕྱིང་དཀར་པོའི་གདན་ཞིག་བཏིང་། །སྔོན་མོ་ནས་ཀྱི་ཕྱུག་པོ་སྤུངས། །བསང་ཤིང་རྩི་ཤིང་ར་བས་བསྐོར། །མདའ་དར་དཀར་པོ་རྟེན་དུ་བཙུགས། །དེ་ལ་དངུལ་དཀར་མེ་ལོང་དང་། །རིན་ཆེན་སྣ་ལྔའི་དར་སྣ་བཏགས། །མི་ཡི་ཚེ་གཡང་བསྐྱེད་པ་ནི། །ཡང་ཙེ་རྒྱལ་པོའི་ཕྱག་ཏུ་ཕུལ། །ཇི་ཙེ་རྒྱལ་པོའི་ཕྱག་ཏུ་གཏད། །ཇི་ཙེ་རྒྱལ་པོས་གཡང་སྡུས་པས། །སྦ་སྨྱུག་ཤུག་པ་སུར་དཀར་དང་། །དར་དཀར་རས་དཀར་ཡོལ་བ་བྲེས། །དཀོན་མཆོག་མཆོད་རྫས་སྣ་ཚོགས་བཤམས། །ཚེ་གཡང་རྟེན་པའི་མཆོད་པ་དང་། །སྐྱེམས་འཕང་ཆང་གི་མཚོ་མོ་འཁྱིལ། །ཇ་དང་མར་ཁུ་འོ་མ་དང་། །གཡང་མོ་ལུག་གི་སྟོད་ཤ་དང་། །ལུག་མགོ་བྲང་ལུམ་འབྲང་རྒྱས་དང་། །ཕྱེ་མར་འོ་ཀོན་ཕུད་ཀྱིས་མཆོད། ེ་ལར་མཆོད་པའི་
ཡོན་ཏན་གྱིས། །མི་ནོར་འཕན་དར་པུ་རུ་རུ། །བཙན་ཕྱུགས་འཕན་དར་ཀྱི་ལི་ལི། །ཕྱ་དང་གཡང་རྣམས་མེ་རེ་རེ། །མི་ནོར་འཕན་དར་ཇེ་འབེབས་སོགས། །སྔོན་གྱི་སྲིད་པའི་དཔེ་བཞིན་དུ། །དེ་རིང་རྒྱུ་སྦྱོར་ཡོན་བདག་གིས། །ལིང་ཕྱིང་དཀར་པོའི་གདན་ཞིག་བཏིང་། །སྔོན་མོ་ནས་ཀྱི་ཚོམ་བུ་བཀོད། །དཀོན་མཆོག་མཆོད་པ་རྒྱ་ཆེན་བཤམས། །མདའ་གསུམ་རྨོས་པའི་ཐོག་ཕུད་དང་། །མཁྱེན་ལུག་རྙིང་པ་སོ་ཚང་གི །མགོ་དང་སྟོད་ཤ་ནམ་ཚོང་དང་། །ལག་པ་གཡས་པ་གཡང་གི་རྟེན། །མཚུངས་ཟན་འབྲང་རྒྱས་ཞལ་དཀར་དང་། །གཡང་སྤེལ་གཡང་ཟན་ལྡིར་བ་དང་། །ཚེ་ཟན་རིན་ཆེན་སྤུངས་པ་དང་། །ཚེ་རྒྱས་ནོར་བུ་འབར་བ་དང་། །འདོད་འཇོའི་བ་མོ་་དཀར་མོ་དང་། །གཡང་ཕུར་སེང་ལྡེང་ཕུར་པ་དང་། །སྦ་སྨྱུག་ཀུ་ཤ་དུར་བ་དང་། །ཇ་ཕུད་ཆང་ཕུད་མར་ཁུ་དང་། །འོ་མ་ལ་སོགས་གཡང་རྟེན་མཚོ། །རྟ་ནོར་ལ་སོགས་གཡང་གི་རྟེན། །ཕུན་སུམ་ཚོགས་པའི་མཆོད་པ་ཡི། །བཤམས་པའི་གནས་མཆོག་དམ་པ་འདིར། །རྒྱུ་སྦྱོར་ཡོན་བདག་འདི་དག་གིས། །ཚེ་དཔལ་མགོན་སྐྱབས་མཆོད་པའི་
ཕྱིར། །དེ་ནས་ཚེ་ལྷ་གཡང་ལྷ་རྣམས་སྤྱན་འདྲེན་པ་ནི། ལྷ་དཀོན་མཆོག་གསུམ་པོ་སྤྱན་འདྲེན་ནོ། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །འཇམ་དཔལ་དབྱངས་དང་སྤྱན་རས་གཟིགས། །ཕྱག་ན་རྡོ་རྗེ་འཁོར་དང་བཅས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །འོག་མིན་གནས་མཆོག་དམ་པ་ནས། །རྡོ་རྗེ་འཆང་ནས་བརྒྱུད་པའི་བར། །བཀའ་བརྒྱུད་བླ་མ་དམ་པ་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །བྱ་སྤྱོད་རྣལ་འབྱོར་བླ་མེད་ཀྱི། །རྒྱུད་སྡེ་བཞི་ཡི་ལྷ་ཚོགས་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །ཀུན་ཏུ་བཟང་པོས་གཙོར་མཛད་
པའི། །ཆེ་མཆོག་ཡོན་ཏན་ལྷ་ཚོགས་དང་། །སྒྲུབ་པ་བཀའ་བརྒྱད་ལྷ་ཚོགས་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །ཤར་གྱི་ཕྱོགས་ན་བཞུགས་པ་ཡི། །རྡོ་རྗེ་སེམས་དཔའི་ཚོགས་བཅས་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །ལྷོ་ཡི་ཕྱོགས་ན་བཞུགས་པ་ཡི། །རིན་ཆེན་འབྱུང་ལྡན་འཁོར་དང་བཅས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །ནུབ་ཀྱི་ཕྱོགས་ན་བཞུགས་པ་ཡི། །སྣང་བ་མཐའ་ཡས་འཁོར་དང་བཅས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་
རློབས། །བྱང་གི་ཕྱོགས་ན་བཞུགས་པ་ཡི། །དོན་ཡོད་གྲུབ་པ་འཁོར་དང་བཅས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །དབུས་ཀྱི་ཕྱོགས་ན་བཞུགས་པ་ཡི། །རྣམ་པར་སྣང་མཛད་འཁོར་བཅས་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །སངས་རྒྱས་སྤྱན་དང་མ་མཱ་ཀི། །གོས་དཀར་མོ་དང་དམ་ཚིག་སྒྲོལ། །དབྱིངས་ཕྱུག་མ་ལ་སོགས་པ་ཡི། །ཡུམ་ཆེན་ལྔ་ཡི་ལྷ་ཚོགས་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །རྡོ་རྗེ་ཕག་མོས་གཙོར་མཛད་ཅིང་། །མཁའ་འགྲོ་མ་ཚོགས་རྒྱ་མཚོ་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་
ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །བསིལ་བ་ཚལ་གྱི་དུར་ཁྲོད་དང་། །སྟེང་འོག་ཕྱོགས་མཚམས་སོ་སོ་ནས། །ཆོས་སྐྱོང་མ་མགོན་ལྕམ་དྲལ་རྣམས། །ལྷ་ཚོགས་མ་ལུས་ཐམས་ཅད་ཀུན། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། ཀྱཻ། རྒྱལ་པོ་ཆེན་པོ་རྣམ་ཐོས་སྲས། །ཛམ་བྷ་ལ་དང་ཀུ་བེ་ར། །ནོར་བུ་བཟང་དང་གང་བ་བཟང་། །ཡང་དག་ཤེས་དང་འགྲོག་གནས་དང་། །ལྔས་རྩེན་ཛི་བྷི་ཀུཎྜ་ལཱི། །ཕྱུགས་ལྷ་ལྷ་མོ་ནོར་རྒྱུན་མ། །ནོར་ལྷའི་ཚོགས་རྣམས་མ་ལུས་ཀུན། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། ཀྱཻ། རྒྱལ་ཆེན་བཞི་དང་ཕྱོགས་སྐྱོང་བཅུ། །ཕྱི་རྒྱུད་འཇིག་རྟེན་སྲུང་མའི་ཚོགས། །མ་ལུས་འཁོར་དང་བཅས་པ་རྣམས། །འགྲོ་བའི་དོན་དུ་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །
བདག་ཅག་ཡོན་མཆོད་འཁོར་བཅས་ཀྱི། །ཚེ་དཔལ་གཡང་སྐྱོབས་བྱིན་གྱིས་རློབས། །བཛྲ་ས་མཱ་ཡ་ཛ་ཛཿ ཛཿཧཱུྃ་བཾ་ཧོཿ པདྨ་ཀ་མ་ལ་ཡེ་ཧཱུྃ། དེ་ནས་ཕ་མཚུན་དང་། ལྷ་མཚུན། ཡུལ་ལྷ་གཉན་པོ་རྣམས་དར་དཀར་ཡབ་མོས་སྤྱན་འདྲེན་པ་ནི་འདི་སྐད་དོ།། ཀྱཻ། ལྷ་མཚུན་གཉན་པོ་སྤྱན་འདྲེན་ནོ། །མ་མཚུན་གཉན་པོ་སྤྱན་འདྲེན་ནོ། །ཡང་མྱེས་སྲས་བཙུན་སྤྱན་འདྲེན་ནོ། །དེ་མི་ངོ་གསུམ་གྱི་དགྲ་ལྷ་ཡིན། །དགྲ་ལྷ་གསུམ་པོ་སྤྱན་འདྲེན་ནོ། །ཕ་ལྷ་གཉན་པོ་སྤྱན་འདྲེན་ནོ། །མ་ལྷ་གཉན་པོ་སྤྱན་འདྲེན་ནོ། །ཞང་ལྷ་གཉན་པོ་སྤྱན་འདྲེན་ནོ། །མ་ཕྱི་གཉན་པོ་སྤྱན་འདྲེན་ནོ། །སྲོག་ལྷ་གཉན་པོ་སྤྱན་འདྲེན་ནོ། །དགྲ་ལྷ་གཉན་པོ་སྤྱན་འདྲེན་ནོ། །ཡུལ་ལྷ་གཉན་པོ་སྤྱན་འདྲེན་ནོ། །བཟང་བྱེད་ཡག་བྱེད་སྤྱན་འདྲེན་ནོ། །མཁར་ལྷ་རྩེ་རྒྱལ་སྤྱན་འདྲེན་ནོ། །སྦྲ་ལྷ་རི་བོ་སྤྱན་འདྲེན་ནོ། །སྒོ་ལྷ་སྟག་གཡག་སྤྱན་འདྲེན་ནོ། །ཞིང་ལྷ་ཚངས་པ་སྤྱན་འདྲེན་ནོ། །ཁྱིམ་ལྷ་གེ་ཐུང་སྤྱན་འདྲེན་ནོ། །མ་ལྷ་བུ་རྫི་སྤྱན་འདྲེན་ནོ། །ཐབ་ལྷ་ཡུ་མོ་སྤྱན་འདྲེན་ནོ། །མཆོད་པའི་གནས་འདིར་གཤེགས་སུ་གསོལ། །དར་དཀར་གཡབ་མོས་མྱུར་དུ་སྤྱན་འདྲེན་
ནོ། །བཛྲ་ཨཾ་ཀུ་ཤ་ཛ༔ ཛཿཧཱུྃ་བཾ་ཧོཿ དེ་ནས་མཆོད་རྫས་བྱིན་གྱིས་བརླབ་པ་ནི། ཨོཾ་ཨཱཿཧཱུྃ། ལན་གསུམ་བརྗོད། ཨོཾ་བྷྲཱུྃ། ཧཱུྃ་བྷྲཱུྃ། ཏྲཱྃ་བྷྲཱུྃ། ཧྲཱིཿབྷྲཱུྃ། ཧ་བྷྲཱུྃ། ཨོཾ་ཨཱཿཧཱུྃ། ཨོཾ་བྷྲཱུྃ། བཛྲ་ཨཱ་ཡུ་ཥེ་ཧཱུྃ་བྷྲཱུྃ། ཨཱ་ཡུ་ཥེ་ཛྷཱ་ན་ལ་སུ་ནི་ཧཱུྃ། ཨོཾ། བདེ་སྐྱིད་དཔལ་དང་གཡང་རྣམས་བརྟན། །དོ་ནས་ནོར་ལྷའི་གཟུངས་སྔགས་རྣམས་ཀྱང་བརྗོད་པར་བྱའོ། །དེ་ནས་ཕྱག་འཚལ་ཞིང་སྡིག་པ་བཤགས་པ་ནི། ན་མོ། སངས་རྒྱས་ཆོས་དང་དགེ་འདུན་དང་། །རྡོ་རྗེ་འཆང་ནས་བཀའ་བརྒྱུད་ཀྱི། །བླ་མ་དམ་པ་ཐམས་ཅད་རྣམས། །ཡི་དམ་ལྷ་ཚོགས་ཐམས་ཅད་དང་། །བཀའ་སྲུང་ཆོས་སྐྱོང་ཐམས་ཅད་ལ། །ཕྱག་འཚལ་མཆོད་ཅིང་སྡིག་པ་བཤགས། །རྗེས་སུ་ཡི་རང་ཆོས་འཁོར་བསྐོར། །དགེ་རྩ་བླ་མེད་བྱང་ཆུབ་བསྔོ། །དེ་ནས་མཆོད་པ་འབུལ་བ་ནི། ཨོཾ་ཨཱཿཧཱུྃ། བླ་མ་ཡི་དམ་མཁའ་འགྲོ་དང་། །སངས་རྒྱས་ཆོས་དང་དགེ་འདུན་དང་། །ཆོས་སྐྱོང་མ་མགོན་བསྟན་སྲུང་ཚོགས། །ནོར་ལྷ་མཆེད་བརྒྱད་ཕྱོགས་སྐྱོང་བཅུ། །མཆོད་པར་འོས་པ་ཐམས་ཅད་ལ། །ཡན་ལག་བརྒྱད་ལྡན་མཆོད་པ་འབུལ། །ཆུ་སྐྱེས་མཛེས་པའི་མཆོད་པ་འབུལ། །དྲི་བཟང་སྤོས་མཆོག་
མཆོད་པ་འབུལ། །གསལ་བྱེད་འབྲུ་མར་མར་མེ་འབུལ། །ངད་བཟང་ལྡན་པའི་དྲི་མཆོག་འབུལ། །རོ་མཆོག་ལྡན་པའི་ཞལ་ཟས་འབུལ། །ཡིད་འོང་སྒྲ་སྙན་རོལ་མོ་འབུལ། །མཆོད་ཡོན་དམ་པ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །གཡང་སྐྱབས་བྱིན་རླབས་མཛད་དུ་གསོལ། །རིག་འཛིན་ཚེ་ཡི་དངོས་གྲུབ་སྩོལ། །དར་རྒྱས་ཆོས་སྲིད་རྒྱས་པ་དང་། །བསོད་ནམས་ཟས་ནོར་འཕེལ་བ་དང་། །བཙན་ཕྱུག་འཕེན་དར་དངོས་གྲུབ་སྩོལ། ཀྱཻ། གཞན་ཡང་མཆོད་པ་འབུལ་བ་ནི། །འཇིག་རྟེན་ཁམས་ནི་ཐམས་ཅད་ཀྱི། །།སྤྱན་ལ་མཛེས་པའི་གཟུགས་མཆོག་རྣམས། །མཆོད་འོས་ལྷ་ཚོགས་རྣམས་ལ་མཆོད། །སྙན་ལ་མཛེས་པའི་སྒྲ་མཆོག་རྣམས་། །མཆོད་འོས་ལྷ་ཚོགས་རྣམས་ལ་མཆོད། །ཤངས་ལ་མཛེས་པའི་དྲི་མཆོག་རྣམས། །མཆོད་འོས་ལྷ་ཚོགས་རྣམས་ལ་མཆོད། །ལྗགས་ལ་མཛེས་པའི་ཟས་མཆོག་རྣམས། །མཆོད་འོས་ལྷ་ཚོགས་རྣམས་ལ་མཆོད། །སྐུ་ལ་མཛེས་པའི་ན་བཟའི་ཚོགས། །མཆོད་འོས་ལྷ་ཚོགས་རྣམས་ལ་མཆོད། །འདོད་ཡོན་ལྔ་ཡི་མཆོད་པ་རྣམས། །
མཆོད་པ་དམ་པ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །གཡང་སྐྱབས་བྱིན་རླབས་མཛད་དུ་གསོལ། །རིག་འཛིན་ཚེ་ཡི་དངོས་གྲུབ་སྩོལ། །དར་རྒྱས་ཆོས་སྲིད་རྒྱས་པ་དང་། །བསོད་ནམས་ཟས་ནོར་འཕེལ་བ་དང་། །བཙན་ཕྱུག་འཕེན་དར་དངོས་གྲུབ་སྩོལ། །དེ་ནས་གཡང་མཚོ་བདུད་རྩིའི་མཆོད་པ་ནི། ཀྱཻ། དེ་རིང་རྒྱུ་སྦྱོར་ཡོན་བདག་དང་། །བདག་ཅག་རྣལ་འབྱོར་སྒྲུབ་པ་པོས། །རིན་ཆེན་ས་གཞི་གཙང་མ་ལ། །དྲ་ཕྱིང་དཀར་པོའི་གདན་ཡང་བཤམས། །སྔོན་མོ་རིན་ཆེན་ནས་ཚོམ་སྤུངས། །ཡར་མཆོད་བསང་ཤིང་ར་བས་བསྐོར། །རིན་ཆེན་སྣ་ཚོགས་སྣོད་ཡངས་སུ། །ཇ་ཆང་མར་ཁུ་འོ་མ་དང་། །མཆོད་པའི་གཡང་མཚོ་བསྐྱིལ་བ་འདི། །རྒྱུན་ཆད་མེད་པ་བདུད་རྩིའི་མཚོ། །གཡང་གི་མཚོ་མོར་བྱིན་གྱིས་བརླབས། །བྱིན་རླབས་མཚོ་མོ་མེ་རེ་རེ། །ཟག་མེད་ཆུ་རྒྱུན་ན་ར་ར། །གཡང་འཕེལ་བདུད་རྩིའི་རྒྱ་མཚོ་འདི། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་མ་མགོན་བསྟན་སྲུང་རྣམས། །ནོར་ལྷ་མཆེད་བརྒྱད་ཕྱོགས་སྐྱོང་བཅུ། །གཏེར་བདག་མཆོད་འོས་ཚོགས་བཅས་ལ། །
མཆོད་པ་དམ་པ་འབུལ་བར་བགྱི། །བདག་ཅག་ཡོན་མཆོད་འཁོར་བཅས་ཀྱི། །གཡང་སྐྱོབས་བྱིན་གྱིས་བརླབ་ཏུ་གསོལ། །རིག་འཛིན་ཚེ་ཡི་དངོས་གྲུབ་སྩོལ། །དར་རྒྱས་ཆོས་སྲིད་རྒྱས་པ་དང་། །བསོད་ནམས་ནོར་ཟས་སྤེལ་བ་དང་། །བཙན་ཕྱུག་འཕེན་གསུམ་དངོས་གྲུབ་སྩོལ། །དེ་ནས་གཡང་གི་གཏོར་མའི་མཆོད་པ་ནི། ཀྱཻ། དེ་རིང་བདག་ཅག་ཡོན་མཆོད་ཀྱི། །རིན་པོ་ཆེ་ཡི་སྣོད་ནང་དུ། །མཆོད་གཏོར་གཡང་དཔེ་ཟུར་བརྒྱད་འདི། །རི་བོ་མཆོག་རབ་དཔེ་བླངས་ཡིན། །གྲུ་བཞི་ཟུར་བརྒྱད་རྩེ་དང་དགུ། །ཉི་ཟླ་པད་ཁུང་རྒྱན་དང་ལྡན། །ཟས་མཆོག་སྣ་ཚོགས་དག་གིས་བརྒྱན། །བང་རིམ་བཞི་དང་མུ་ཁྱུད་གསུམ། །ངོ་མཚར་ཆེ་བའི་རྟེན་འབྲེལ་འགྲིགས། །རྩེ་མོ་མཐོ་བས་རི་རབ་འདྲ་། །ལོགས་བཞི་ཡོད་པས་གླིང་བཞི་འདྲ། །ཟུར་བཞི་ཡོད་པས་གླིང་ཕྲན་འདྲ། །བང་རིམ་ཡོད་པས་མཆོད་རྟེན་འདྲ། །པདྨས་བརྒྱན་པ་དྲི་མ་མེད། །ཉི་ཟླས་བརྒྱན་པ་གླིང་བཞི་གསལ། །ནོར་བུས་བརྒྱན་པ་དགོས་འདོད་འབྱུང། །མེ་རིས་བརྒྱན་པ་བག་ཆགས་བསྲེག །མར་སྐུད་གྱེན་དུ་འཐེན་པ་དེ། །ཡོན་བདག་མི་ནོར་ཐམས་ཅད་ཀྱི། །ཚེ་
རིང་གླུ་དག་འཐེན་པ་ཡིན། །ཟས་སྣ་མང་པོས་བརྒྱན་པ་དེ། །སྣ་ཚོགས་ཟས་སྣ་འཕེལ་གཡང་ཆེ། །འཕྲེད་དུ་མར་སྐུད་དགུ་བསྐོར་དེ། །མི་རབས་དགུ་ཡི་བར་དུ་ནི། །ཚེ་རིང་ནད་མེད་ལོངས་སྤྱོད་ཆེ། །མར་གྱི་མཐེབ་རྒྱན་མང་བ་དེ། །མི་མང་ཕྱུགས་འཕེལ་རྟེན་འབྲེལ་ཡིན། །རྩ་བར་མུ་ཁྱུད་གསུམ་བསྐོར་བས། །ཇ་ཆང་མར་ཁུ་འོ་མ་ཡིན། །ཆུ་བོ་རྒྱུན་དུ་འབེབས་པ་ཡིན། །དེ་འདྲའི་གཡང་དཔེ་ཟུར་བརྒྱད་འདི། །གཡང་གི་རྟེན་དུ་བཤམས་པ་ཡི། །བླ་མ་ཡི་དམ་མཁའ་འགྲོ་རྣམས་ལ་འབུལ། །བདག་ཅག་ཡོན་མཆོད་འཁོར་བཅས་ལ། །ཚེ་གཡང་ཉམས་པ་སྤེལ་དུ་གསོལ། །ནོར་གཡང་ཉམས་པ་སྤེལ་དུ་གསོལ། །རྟ་གཡང་ཉམས་པ་སྤེལ་དུ་གསོལ། །ལུག་གཡང་ཉམས་པ་སྤེལ་དུ་གསོལ། །ཟས་གཡང་ཉམས་པ་སྤེལ་དུ་གསོལ། །མཚོན་གཡང་ཉམས་པ་སྤེལ་དུ་གསོལ། །གོས་གཡང་ཉམས་པ་སྤེལ་དུ་གསོལ། །འཕེལ་བ་བརྟན་པར་མཛད་དུ་གསོལ། །དེ་ནས་ཚེ་འབྲང་འབུལ་བ་ནི། ཀྱཻ། དེ་རིང་རྣལ་འབྱོར་བདག་ཅག་དང་། །ཡོན་བདག་ཕོ་མོ་འཁོར་བཅས་ཀྱིས། །རིན་པོ་ཆེ་ཡི་སྣོད་ནང་དུ། །ཚེ་ཟན་རིན་
ཆེན་འབར་བ་བཤམས། །དཔེ་ནི་གསེར་གྱི་བུམ་པའི་དཔེ། །པདྨ་འདབ་བརྒྱད་གདན་དུ་བྱས། །ཟེའུ་འབྲུ་བུམ་པ་ཟླུམ་པོ་བྱས། །ཚེ་དཔལ་ནོར་བུ་རྒྱན་དུ་བཏགས། །ཚེ་སྲིང་ཀུ་ཤ་རྩི་ཤིང་དང་། །ཚེ་འབྲང་མངར་གསུམ་པ་ལུ་དང་། །མར་དཀར་ཐུད་དཀར་པུ་ལུ་དང་། །འབྲས་ཕུད་ནས་ཕུད་སྟེང་དུ་བཤམས། །སྲ་བརྟན་རྡོ་རྗེ་ཕྱེད་པ་ཡང་། །རྩེ་ལྔ་པ་ཡི་རྒྱན་གྱིས་སྤྲས། །དེ་འདྲའི་ཚེ་ཟན་མཆོད་པའི་རྫས། །ཁྱད་པར་ཚེ་གཡང་ཉམས་པ་ཡི། །ཚེ་སྲིང་གཡང་རྟེན་དམ་པ་འདི། །མགོན་པོ་ཚེ་དབང་ཚེ་དཔག་མེད། །འོད་དཔག་མེད་དང་འཆི་མེད་ལྷ། །ཚེ་འཛིན་རིགས་ལྔའི་འཁོར་གྱིས་བསྐོར། །ཚེ་འཛིན་ལྷ་མོ་དཀར་མོ་ལ། །མ་ཚོགས་མཁའ་འགྲོ་སྡེ་ལྔས་བསྐོར། །ཚེ་ཡི་རིག་འཛིན་འཁོར་དང་བཅས། །མཆོད་གཏོར་དམ་པ་འབུལ་བར་བགྱི། །རྒྱུ་སྦྱོར་ཡོན་བདག་འཁོར་བཅས་ཀྱི། །ཚེ་གཡང་ཉམས་ནི་མ་ཉམས་ཏེ། །གལ་ཏེ་ཉམས་པར་གྱུར་ན་ནི། །བདུད་དང་གཤིན་རྗེའི་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །བཙན་དང་རྒྱལ་པོའི་ལག་ནས་ཚེ་ཁུག་ཅིག །
རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །ཀླུ་དང་ས་བདག་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །འདྲེ་མོ་དར་སྲིའི་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །ཆུང་སྲི་བསྒྲེན་འདྲེའི་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །སྒབ་འདྲེ་ཕྱོགས་འདྲེའི་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །ཆོས་སྐྱོང་མ་མགོན་ལྕམ་དྲལ་དང་། །མ་མོ་ལ་སོགས་བརྟན་མར་བཅས། །ཐམས་ཅད་ལག་ནས་ཚེ་ཁུག་ཅིག །རིག་འཛིན་ཚེ་ཡི་དངོས་གྲུབ་སྩོལ། །ཚེ་གཡང་བརྟན་པར་མཛད་དུ་གསོལ། །ལྷ་ཚོགས་མཐུ་རྩལ་ཅན་གྱི་ལག་ནས་ཚེ་ཁུག་ཅིག །མཆོད་པ་དམ་པ་འབུལ་བར་བགྱི། །རྒྱུ་སྦྱོར་ཡོན་བདག་འཁོར་བཅས་ཀྱི། །རིག་འཛིན་ཚེ་གཡང་བརྟན་པར་མཛོད། ཀྱཻ། རྒྱལ་ཆེན་བཞི་དང་ཕྱོགས་སྐྱོང་བཅུ། །ནོར་ལྷ་མཆེད་བརྒྱད་
གཏེར་བདག་ཚོགས། །ཚེ་དབང་རིག་འཛིན་བསྒྲུབ་པ་ཡི། །ཚེ་ཕུར་དམ་པ་མཛད་དུ་གསོལ། །ཚེ་དབང་རྒྱས་པར་མཛད་དུ་གསོལ། །ལྷ་སྲུང་ནོར་ལྷའི་ཚོགས་རྣམས་ཀྱིས་། །མཆོད་གཏོར་དམ་པ་འདི་བཞེས་ལ། །རྒྱུ་སྦྱོར་ཡོན་བདག་འཁོར་བཅས་ཀྱི། །ཚེ་ཕུར་དམ་པ་མཛད་དུ་གསོལ། །ཚེ་དཔལ་རྒྱས་པར་མཛད་དུ་གསོལ། །ཨོཾ་ཧཱུྃ་ཏྲཱཾ་ཧྲཱིཿཨཱ༔ བཛྲ་གུ་རུ་དྷེ་ཝ་དྷཱཀྐི་ནི་ཧ་རི་ནི་ས། མ་ཧཱ་ཀཱ་ལ་ཧཱུྃ། ཨོཾ་ཨཱཿཧཱུྃ། སྐབས་འདིར་ཚེ་གཟུངས་བརྗོད། ཀྱཻ། དེ་རིང་བདག་ཅག་ཡོན་མཆོད་ཀྱིས། །རིན་ཆེན་སྣོད་མཆོག་ཞལ་བུ་དུ། །འབྲུ་མཆོག་ཕྱེ་མར་གཙང་མ་ལ། །བཟང་ལྡན་ལྡིར་བ་མེར་ཆེན་བཤམས། །མར་རྒྱན་པུ་ལུའི་རྩེ་ལ་བརྒྱན། །ནོར་བཟང་ཆས་པ་འབྲས་སྤུངས་འདྲ། །གཡང་རྟེན་ཟས་མཆོག་བཟང་པོ་འདི། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་བསྟན་སྲུང་རྣམས་ལ་འབུལ། །མཆོད་གཏོར་བཟང་པོ་འདི་བཞེས་ལ། །དེ་རིང་འདིར་ཚོགས་ཡོན་བདག་ལ། །གཡང་སྐྱབས་གཡང་ལེན་དངོས་གྲུབ་སྩོལ། །བུ་ཆུང་སྲི་ལས་ཐར་བ་དང་། །ཚེ་རིང་འཕེལ་སྐྱིད་རྩེ་མཛད་གསོལ། །ཟས་མཆོག་གཡང་ཟན་ལྡིར་བ་
འདི། །ནོར་ལྷ་བརྒྱད་དང་ཕྱོགས་སྐྱོང་བཅུ། །འཇིག་རྟེན་མཆོད་འོས་ལྷ་ཚོགས་དང་། །ས་ཡི་ལྷ་མོ་བརྟན་མ་དང་། །ཡུལ་ལྷ་མགོན་བྱེད་རྣམས་ལ་འབུལ། །མཆོད་ཡོན་དམ་པ་འདི་བཞེས་ལ། །དེ་རིང་འདིར་ཚོགས་ཡོན་བདག་ལ། །གཡང་སྐྱབས་གཡང་ལེན་དངོས་གྲུབ་སྩོལ། །བུ་ཆུང་སྲི་ལས་ཐར་བ་དང་། །ཚེ་རིང་འཕེལ་སྐྱིད་མཛད་དུ་གསོལ། །མི་ནོར་འཕེལ་སྐྱིད་དངོས་གྲུབ་སྩོལ། །ཕུག་སྲིས་བང་མཛོད་གང་བ་དང་། །འཛད་མེད་གཏེར་ཁ་ཕྱེས་མཛད་གསོལ། །བསོད་ནམས་ཡིད་བཞིན་ལ་དངོས་གྲུབ་སྩོལ། །དེ་ནས་གཡང་རྟེན་གྱིས་མཆོད་པ་ནི། ཀྱཻ། དེ་རིང་རྒྱུ་སྦྱོར་ཡོན་བདག་གིས། །ཕ་མྱེས་སྤྲ་མཚུན་མཆོད་པ་དང་། །ནོར་ལྷ་དགྲ་ལྷ་མཆོད་པའི་རྫས། །གཡང་དཀར་ལུག་གི་སྟོད་ཤ་དང་། །མགོ་དང་བྲང་ལུམ་ནམ་ཚོང་དང་། །ལག་པ་གཡས་པ་བཤམས་པ་འདི། །ལུག་མགོ་འདི་ལ་རྟེན་འབྲེལ་ཆེ། །ལུག་མགོ་དགྲ་ལྷ་བརྟེན་པའི་མཁར་། །ལུག་མགོ་མ་ཡིན་ལྷ་མཁར་ཡིན། །ལྷ་མཁར་དཀར་པོའི་ནང་ཤེད་ནས། །ཀླད་སྤྲིན་རས་དཀར་གུར་ནང་དུ། །ཀླད་པ་བུདྡྷའི་ལྷ་ཚོགས་བཞུགས། །རྭ་རྩེ་
གཡས་གཡོན་མཁར་གྱིས་བརྒྱན། །གསེར་འཕྲུ་གཡུ་འཕྲུ་རྟེན་འབྲེལ་ཚང་། །མིག་གཉིས་གསལ་བྱེད་བ་གམ་སྟེ། །ཕྱི་ནང་བར་ཆད་སྲུང་བར་བྱེད། །རྣ་བ་གཡས་གཡོན་གཡང་གི་ལྷ། །ལྷ་བདུད་གསུམ་གྱི་སོ་བ་བྱས། །སྣ་བུག་གཉིས་སུ་རླུང་བུས་པས། །དགྲ་འདྲེ་གདོན་གསུམ་ཐུར་དུ་སྡུད། །མན་འགྲམ་གཉིས་སུ་དོད་པ་དེ། །ཐབས་ཤེས་གཉིས་ཀྱི་མཚོན་ཆ་ཡིན། །གནོད་པར་བྱེད་པའི་འདྲེ་གདོན་དང་། །དམ་སྲི་ཆུང་སྲི་སྒྲལ་བར་བྱེད། །མྱུར་མགྱོགས་ལྕེ་ནི་འབའ་སྐད་བདེ། །ཡིད་འོང་ལྷ་ལུག་འབོབ་ཤེས་ཡིན། །ཡར་སྟེང་དུ་བབ་ན་གཉན་དམག་འདུ། །འོག་ཏུ་བབ་ན་ཀླུ་དམག་འདུ། །བར་གྱི་མི་ལ་བབ་ན་ལྷ་དམག་འདུ། །ལུག་མགོ་ལྷ་ཡི་མགོ་ཁང་ཡིན། །དེ་ཕྱིར་གཡང་གི་འདུ་རྟེན་ཡིན། །གཡང་དཀར་ལུག་གི་བྲང་ལུམ་འདི། །བརྟག་ན་ཡིད་བཞིན་ནོར་བུའི་དབྱིབས། །བྲང་སྟོད་མཐོ་ལ་བྲང་སྨད་སྣུམ། །ཤ་ཚིལ་འཐུག་ལ་བྲང་རྟེན་གཡང་། །འདི་མ་སྲུ་ཕྱི་མེས་གཡང་རྟེན་ཡིན། །མཚུན་རིགས་ལག་པ་གཡས་པ་འདི། །ལག་པ་མི་ཟེར་ལེགས་པ་ཟེར། །ལེགས་པའི་རྟེན་འབྲེལ་མང་པོ་ཚང་། །ལག་
ངར་མ་ཡིན་ལྷ་ངར་ཡིན། །ལྷ་ངར་དགྲ་འདྲེའི་ཐོག་ཏུ་ངར། །དཔུང་པ་མ་ཡིན་སྤུངས་པ་ཡིན། །གཡང་དང་མི་ནོར་སྤུངས་པ་ཡིན། །སླ་བ་སྣུམ་ལ་ཆེ་བ་དེ༔ །ཕུགས་སྲས་མང་ལ་སྣུམ་པའི་རྟེན། །སོག་པ་མ་ཡིན་བསོགས་པ་ཡིན། །ལྷ་སྲུང་མང་པོ་འཚོགས་རྟེན་ཡིན། །སོག་སྟོད་ཁ་གྱེར་ཆེ་བ་དེ། །བསོད་ནམས་ཁ་རྗེ་ཆེ་བའི་རྟགས། །ཤ་ཚིལ་འཐུག་ལ་རྒྱས་པ་དེ། །དགྲ་བླ་དམག་དཔུང་ཆེ་བའི་རྟགས། །དེ་ལྟར་གཡང་ལྷའི་གཏོར་རྫས་འདི། །དཀོན་མཆོག་གསུམ་དང་ཡི་དམ་ལྷ། །ཆོས་སྐྱོང་བསྟན་སྲུང་ཚོགས་བཅས་མཆོད། །གཡང་ལྷ་ནོར་ལྷ་ཐམས་ཅད་མཆོད། ཀྱཻ། ཕོ་ལྷ་དགྲ་ལྷ་མཆོད་པའི་རྫས། །སྟོད་ཤ་བྲང་ལུམ་ནམ་ཚོང་དང་། །མཚུན་དང་དགྲ་༔ ལྷ་མཆོད་པའི་རྫས། །ཡུལ་ལྷ་ཟོ་དོར་མཆོད་པར་བགྱི། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་སྤྱི་མཐུན་ལྟར་བསྟོད་པ་བྱ་བ་ནི།་སྟོན་པ་བླ་མེད་སངས་རྒྱས་རིན་པོ་ཆེ་། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་བསྟོད། །ཞེས་དང་། ཆོས་སྐུ་ནམ་མཁའ་
བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པས། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །ཀུན་བཟང་རྡོ་རྗེ་འཆང་ཆེན་གྱི། །བཀའ་བརྒྱུད་གསང་འཛིན་བླ་མ་སོགས། །རྩ་བ་དང་ནི་བརྒྱུད་པ་ཡི། །བླ་མ་རྣམས་ལ་ཕྱག་འཚལ་བསྟོད། །བྱ་སྤྱོད་རྣལ་འབྱོར་རྒྱུད་སྡེ་བཞི། །སྟོན་པ་ཉིད་ཀྱིས་གང་གསུངས་པ། །ཕྱི་དང་ནང་དང་གསང་བ་ཡི། །ཡི་དམ་རྣམས་ལ་ཕྱག་འཚལ་བསྟོད། །རྩ་དང་ཞིང་ལ་གནས་གྱུར་པ། །དུས་གསུམ་རྒྱལ་བ་ཀུན་གྱི་ཡུམ། །དམ་ཚིག་ཅན་ལ་སྐྱོབ་མཛད་པ། །མཁའ་འགྲོའི་ཚོགས་ལ་ཕྱག་འཚལ་བསྟོད། །སྟོན་པའི་བསྟན་པ་རིན་པོ་ཆེ། །སྟོན་པ་ཉིད་ཀྱི་ཞབས་དྲུང་དུ། །བསྟན་པ་བསྲུང་བར་ཞལ་བཞེས་པའི། །ཆོས་སྐྱོང་རྣམས་ལ་ཕྱག་འཚལ་བསྟོད། །ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་ནོར་འཆང་དབང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་པོ་ཛམྦྷ་ལ། །དངོས་གྲུབ་མཆོག་སྩོལ་ནོར་ལྷར་ཕྱག་འཚལ་བསྟོད། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་
སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །བསྟོད་པ་སྤྱི་དང་མཐུན་པར་བྱས་ཤིང་རྗེས་ཀྱི་བསྔོ་བ་སྨོན་ལམ་བཀྲ་ཤིས་སོགས་བྱའོ། །རང་ཡི་དམ་གང་ཡིན་གྱི་ལྷ་གཞུང་ལྟར་རྒྱས་པར་བྱའོ། །དེ་ལྟར་ཨ་རྭགས་འཁྲུགས་བཅོས་སུ་བཞག་པའོ། །སརྦ་མངྒ་ལཾ། །དགེའོ། །དགེའོ། །དགེའོ། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།