ཤེལ་ཚིགས་རྒྱན་འབུལ།
ཤེལ་ཚིགས་རྒྱན་འབུལ་ནི་འདི་སྐད་དོ། །ན་མོ་བཛྲ་པཱ་ཎི་ཡེ། ཨོཾ་བཛྲ་ཨ་མྲྀ་ཏ་སོགས། སྟོང་པའི་ངང་ལས་རིན་ཆེན་ལྷོ་ངོས་བཟང་ལས། བྱ་རིགས་རྣམ་པ་སྣ་ཚོགས། །གཅན་གཟན་རྣམ་པ་སྣ་ཚོགས། རི་དྭགས་རྣམ་པ་སྣ་ཚོགས། དུད་འགྲོ་རྣམ་པ་སྣ་ཚོགས། དེ་དག་ཐམས་ཅད་གཟུགས་མཛེས་རྒྱན་དང་ལྡན་པར་གྱུར། ཨོཾ་ཨཱཿཧཱུྃ། ལན་གསུམ་བརྗོད། ཧཱུྃ། ཕྱག་ན་རྡོ་རྗེའི་བཀའ་བྱུང་བས། །སྲིད་པའི་ས་བདག་ཀླུ་གཉན་ཉོན། །ཤེལ་ཚིགས་ཁྲི་དཀར་སྟོང་ནག་འདི། །མེད་པ་དེ་ནི་མི་ལས་བཙལ། །དཀོན་པ་དེ་ནི་རིན་གྱིས་ཉོས། །སྲ་བ་དེ་ནི་བྲག་ལས་བརྐོས། །རྒྱུ་ནི་རྒྱལ་པོའི་མཛོད་ནས་བཏོན། །མྱེས་པོ་གནམ་རྗེ་གོང་སྔོན་ཡིན། །ཕྱི་མདོས་སྨན་གྱི་འཕྲུལ་མོ་ཡིན། །ཕ་ནི་བདུད་རྩི་རྒྱལ་པོ་ཡིན། །མ་ནི་དྲོད་ཀྱི་རྒྱལ་མོ་ཡིན། །ཞིང་པ་རྒན་པོས་འདུ་བྱེད་ཀྱིས། །དཔྱིད་ཟླ་གསུམ་ལ་རྫུ་འཕྲུལ་བསྡེབས། །དབྱར་ཟླ་གསུམ་ལ་ཆབ་ཀྱིས་བྲན།། སྟོན་ཟླ་གསུམ་ལ་འབྲས་བུ་སྨིན། །མིང་པོ་རྒྱ་འབྲེལ་འཕེལ་ཆེན་ཡིན། །སྲིང་མོ་སྔོན་མོ་འབྲུ་བདུན་ཡིན། །སྐུ་གསུམ་ཐབ་ཀྱི་སྒྱེད་པུ་ལ། །ཐེག་པ་ཆེན་པོའི་སླ་ང་བཙུགས། །
རྫོགས་པ་ཆེན་པོའི་མེ་སྦར་ནས། །ཐབས་མཆོག་ཆེན་པོའི་ཡོག་པས་དཀྲུགས། །ཤེས་རབ་ཆེན་པོའི་སྐམ་པས་ཕོག །དཀར་བ་གཡང་མོ་ལུག་བརྒྱ་འབའ། །ནག་པོ་ཟལ་མོ་འབྲི་བརྒྱ་ངུར། །སེར་པོ་ཅང་ཤེས་རྟ་བརྒྱ་འཚེར། །ཁམ་པ་འགྱིང་བ་གཡག་བརྒྱ་ངར། །གླང་ཆེན་བརྒྱ་དང་མ་ཧེ་སྟོང་། །བ་ཟོག་བརྒྱ་དང་བེའུ་ཁྲི་སྟོང་། །ཤེལ་ལུག་བརྒྱ་དང་གཡུ་རལ་སྟོང་། །དཀར་བརྒྱ་གནག་སྟོང་བེའུ་ལུག་ཁྲི། །སྲིད་པའི་ས་བདག་ཀླུ་གཉན་ལ། །མ་བསད་པ་ཡི་སྟོང་དུ་འཇལ། །མ་རྐུས་པ་ཡི་ཆད་དུ་འཇལ། །མ་འཕྲོག་པ་ཡི་རིན་དུ་འབུལ། །འཁོན་པ་དུམ་ལ་འགྲས་པ་སྦྱངས། །འགྲས་པ་བསལ་ལ་འཁྲུག་པ་གསོ། །ཚེ་གླུད་སྲོག་གི་སྐྱིན་དུ་འབུལ། །སྐྱེས་པ་ཕོ་ཡི་སྲོག་གླུད་འབུལ། །ཟ་མ་མོ་ཡི་སྲིད་གླུད་འབུལ། །བྱིས་པ་ཆུང་གི་ཚེ་གླུད་འབུལ། །སྒོ་ཡི་ནོར་གྱི་གཡང་གླུད་འབུལ། །བཞེས་སོ་ཚེ་གླུད་སྲོག་སྐྱིན་མཛོད། །དེ་བཞིན་གཤེགས་པའི་བྱིན་རླབས་ཀྱིས། །ཤེལ་ཚིགས་ཁྲི་དཀར་སྟོང་ནག་འདི། །ཁྲ་བོ་ཀུ་རུ་རྟ་བརྒྱ་ཡིན། །ཁམ་པ་འགྱིང་བ་གཡག་བརྒྱ་ཡིན། །ཟིལ་ཆུང་ཐུ་ལེ་འབྲི་བརྒྱ་ཡིན། །དཀར་བ་གཡང་མོ་ལུག་
བརྒྱ་ཡིན། །གཡུ་ར་བརྒྱ་དང་ཤེལ་ར་སྟོང་། །བ་ཟོག་བརྒྱ་དང་བེའུ་ཁྲི་སྟོང་། །ས་བདག་ཀླུ་གཉན་རྣམས་ལ་འབུལ། །རྟ་ནོར་ལུག་གི་དངོས་གྲུབ་སྩོལ། །རྟ་ཁྲ་བརྒྱ་དང་རྟེའུ་ཆུང་སྟོང་། །ས་བདག་ཀླུ་གཉན་རྣམས་ལ་འབུལ། །མི་ནོར་ཕུན་སུམ་ཚོགས་པའི་དངོས་གྲུབ་སྩོལ། །གཡུ་གཡག་བརྒྱ་དང་དུང་གཡག་སྟོང་། །ས་བདག་ཀླུ་གཉན་རྣམས་ལ་མཆོད་པ་འབུལ། །ཟས་ནོར་ཕུན་སུམ་ཚོགས་པའི་དངོས་གྲུབ་སྩོལ། །གསེར་གླང་བ་དང་མ་ཧེ་སྟོང་། །ཡིད་ལ་འདོད་པའི་དཀོར་ནོར་རྣམས། །ས་བདག་ཀླུ་གཉན་རྣམས་ལ་མཆོད་པ་འབུལ། །ལོངས་སྤྱོད་ཕུན་སུམ་ཚོགས་པའི་དངོས་གྲུབ་སྩོལ། །ས་བདག་ཀླུ་གཉན་ཁྱེད་རྣམས་ལ། །འདོད་པའི་ལོངས་སྤྱོད་རྟ་ནོར་འདི་འབུལ་བས། །དགའ་མགུ་སྐུ་གསུང་ཐུགས་མཉེས་ནས། །ཕྲག་དོག་རུ་ང་མ་མཛད་ཅིག །ཡུལ་ལ་ངའི་ཡུལ་མ་ཟེར་ཅིག །རི་ལ་ངའི་རི་མ་ཟེར་ཅིག །ས་ལ་ངའི་ས་མ་ཟེར་ཅིག །བྲག་ལ་ངའི་བྲག་མ་ཟེར་ཅིག །རྡོ་ལ་ངའི་རྡོ་མ་ཟེར་ཅིག །ཤིང་ལ་ངའི་ཤིང་མ་ཟེར་ཅིག །སྤང་ལ་ངའི་སྤང་མ་ཟེར་ཅིག །ཆུ་ལ་ངའི་ཆུ་མ་ཟེར་ཅིག །མཚོ་ལ་ངའི་མཚོ་མ་
ཟེར་ཅིག །ལམ་ལ་ངའི་ལམ་མ་ཟེར་ཅིག །བདག་དང་རྒྱུ་སྦྱོར་ཡོན་བདག་གིས། །ལས་ཐབས་བཟང་ངན་ཅི་བྱས་ཀྱང་། །གདུག་རྩུབ་ཀོ་ལོང་མ་མཛད་ཅིག །ས་རྐོ་རྡོ་སློག་རྩི་ཤིང་བཅད། །རྦབ་བསྒྲིལ་ཆུ་དྲང་དར་ཕྱུར་དང་། །དུང་འབུད་རོ་དང་བག་མ་ལེན། །ཐབ་གཞོབ་འཁོན་དང་དྲག་ལས་དང་། །འགལ་དང་གནོད་པ་ཅི་མཆིས་པ། །ས་བདག་ཀླུ་གཉན་མི་མཐུན་པའི། །ཕྲག་དོག་གདུབ་རྩུབ་གནོད་སེམས་མ་མཛད་ཅིག །ར་ཡི་རྩེ་ལ་ཕོག་ཀྱང་མ་རྡུངས་ཤིག །ལྟ་བའི་མིག་ལ་ཕོག་ཀྱང་སྡང་མིག་མ་བསྒྲད་ཅིག་་བསམ་པའི་སྙིང་ལ་ཕོག་ཀྱང་ངན་སེམས་མ་འཆང་ཞིག །ཕྱི་ཡི་སྤུ་ལ་ཕོག་ཀྱང་མ་སྤྲུག་ཅིག །རྨིག་པའི་རྩེ་ལ་ཕོག་ཀྱང་མ་ཁྲོ་ཞིག །གདུག་པའི་སེམས་ངན་མ་འཆང་ཞིག །ཕན་བདེ་བྱང་ཆུབ་སེམས་དང་ལྡན་གྱུར་ཅིག །མཆོག་དང་ཐུན་མོང་དངོས་གྲུབ་སྩོལ། །བཅོལ་བའི་ཕྲིན་ལས་འགྲུབ་པར་མཛོད། །ཤེལ་ཚིགས་མཆོད་འབུལ་རཱ་ག་ཨ་སྲས་སྦྱར་བའོ།། །།