ས་བདག་འཁྲུགས་བཅོས་ཀྱི་སྔོན་འགྲོ་ས་སྲིན་བཀར་ཐབས།
ས་བདག་འཁྲུགས་བཅོས་ཀྱི་སྔོན་འགྲོ་ས་སྲིན་བཀར་ཐབས་བཞུགས་སོ། །ཅོག་རྡོག་གསུམ་ཆངས་བུ་ཏིང་ལོ་བཅས་འདུ་བྱས་ལ། ཧཱུྃ་ལས་རིན་ཆེན་སྣོད་དུ་གཏོར་མ་ནི། །ཁ་དོག་དྲི་རོ་བཅུད་ནུས་ཕུན་ཚོགས་པ། །ཟད་མི་ཤེས་ཤིང་ཟག་མེད་བདེ་སྐྱིད་པ། །ལྷ་ཡི་བདུད་རྩི་ལྟ་བུར་བཅུད་ལྡན་གྱུར། །ཨོཾ་ཨ་ཀཱ་རོ་སོགས་ཨོཾ་ཨཱ༔ཧཱུྃ་ཕཊ་སྭཱ་ཧཱ། རང་གི་ཐུགས་ནས་འོད་ཟེར་ལྕགས་ཀྱུའི་དབྱིབས། །འཕྲོས་པས་ས་སྲིན་འབྱུང་པོའི་ཚོགས་རྣམས་ཀུན། །བཀུག་ཅིང་དབང་བསྡུས་གཏོར་མར་ལོངས་སྤྱོད་ཅིང་། །བདག་གི་བཀའ་ཉན་དམ་ལ་སྡོད་པར་གྱུར། །ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། བདག་གིས་ས་བདག་ཚོགས་རྣམས་མཆོད་པ་ལ། གནོད་ཅིང་འཚེ་དང་བར་ཆད་བྱེད་པའི་བགེགས། །ས་སྲིན་ཀླུ་སྲིན་འབྱུང་པོའི་ཚོགས་རྣམས་ཀུན། །འདིར་གཤེགས་མཆོད་སྦྱིན་གཏོར་མ་རྒྱ་ཆེན་པོ། །འབུལ་གྱིས་བཞེས་ལ་སྔོན་ཚེ་གསང་བདག་སོགས། །རྒྱལ་བའི་བཀའ་ལས་མ་འདའ་རང་གནས་དེངས། །གལ་ཏེ་མི་ཉན་འཚེ་བར་བྱེད་པ་ན། །གསང་བདག་ཁྲོས་པའི་བྱ་ཁྱུང་ག་རུ་ཊས། །ལུས་སེམས་རྡུལ་དུ་བརླག་པར་གདོན་མི་ཟ། །
དེ་བས་ད་ལྟ་ཉིད་དུ་ཕྱིར་དེངས་ཤིག །ཨོཾ་སུམྦྷ་ནི་སོགས་དྲག་སྔགས་བརྗོད། ཅེས་པའང་ཨ་རཱ་གས་མཛད་པའོ། སརྦ་མངྒ་ལཾ།། །།