ས་བདག་འཁྲུགས་བཅོས་བསང་གི་མངོན་རྟོགས།
ས་བདག་འཁྲུགས་བཅོས་བསང་གི་མངོན་རྟོགས་བཞུགས་སོ། །བསླུ་མེད་དཀོན་མཆོག་གསུམ་ལ་སྐྱབས་སུ་མཆི། །འཇིག་རྟེན་བདེ་ཕྱིར་ས་བདག་འཁྲུགས་པ་བཅོས། །ཆོས་རྣམས་སྨྲ་བསམ་བརྗོད་བྲལ་སྟོང་ཉིད་ངང་། །དེ་ཡི་རང་མདངས་རང་ཉིད་སྤྱན་རས་གཟིགས། །དཀར་གསལ་ཞི་འཛུམ་དར་དང་རིན་ཆེན་བརྒྱན། །ཕྱག་གཡས་མཆོག་སྦྱིན་གཡོན་པས་པད་དཀར་འཛིན། །པདྨ་ཟླ་སྟེང་སེམས་དཔའི་སྐྱིལ་ཀྲུང་བཞུགས། །ཐུགས་ཀར་ཡེ་ཤེས་སེམས་དཔའ་ཧྲི༔ཡིག་གསལ། །དེ་ལས་འོད་ཟེར་དཀར་པོ་འཕྲོས་པ་ཡིས། །ས་བདག་ཀླུ་གཉན་གཙོར་བྱས་སེམས་ཅན་ཀུན། །སྡུག་བསྔལ་ཀུན་བྲལ་བདེ་བ་ཚད་མེད་ཐོབ། །མདུན་གྱི་ནམ་མཁར་སེང་ཁྲི་པད་ཟླའི་སྟེང་། །ཧཱུྃ་ལས་བཅོམ་ལྡན་ཐུབ་པའི་དབང་པོ་ལ། །ཉེ་སྲས་བརྒྱད་དང་ཉན་ཐོས་མཆོག་བརྒྱད་དང་། །ལོ་ཟླ་ཞག་དུས་འབྱུང་བ་ས་བདག་དང་། །རྗེ་བློན་བཅུ་བདུན་སྤར་སྨེ་ལ་སོགས་དང་། །ཀླུ་དང་ས་བདག་སྣང་སྲིད་ལྷ་འདྲེས་བསྐོར། །རང་རང་ས་བོན་འོད་ཀྱིས་སྤྱན་དྲངས་གྱུར། །ཞེས་ཨ་རཱ་གས་སྦྱར་བའོ།། ས་སྙིང་མང་དུ་བཟླས་མཐར། ཨོཾ༔ བཙའ་སྲུང་གི་གདམས་པ་
ནི༔ སྔགས་འདི་བཟླས་པ་ཁོ་ནས་ཆོག༔ ཨོཾ་ཀིཾ་ཧི་ར་ཙ་པྲི་ཐི་དེ་ཝི་ཨ་ཏི་ནི་ཡེ་སྭཱ་ཧཱ༔ ས་མ་ཡཿ རྒྱ་རྒྱ་རྒྱ༔ གནམ་ཆོས་ས་སྙིང་ལས་ཚོགས་སོ༔ གཙང་པོ། འབྲུ་ཆུ། མ་ལ་སྔགས་ནས་ཞིང་རྣམས་ལ་ཁྱབ་པར་གཏོར་བས་ཐུབ་བོ།།