སྟོང་གསུམ་འཁྲུགས་པ་ཡོ་བཅོས་ཀྱི་ས་བདག་བསང་།
སྟོང་གསུམ་འཁྲུགས་པ་ཡོ་བཅོས་ཀྱི་ས་བདག་བསང་གི་དབུ་ཕྱོགས་བཞུགས། པདྨ་འབྱུང་གནས་སྐུ་ལ་ཕྱག་འཚལ་ལོ། །འདིར་ས་བདག་བསང་བར་འདོད་ན། བཟང་ཤིང་འཚོགས་ཚད་དུད་པ་བཏང་ལ། དེ་ནས་གསེར་སྐྱེམས་དར་ཟབ་དང་། །དཀར་གསུམ་མངར་གསུམ་བཟང་དྲུག་དང་། །ཞོ་ཕུད་འོ་ཕུད་ཇ་ཕུད་དང་། །ཕྱེ་མར་ལ་སོགས་མཆོད་བྱས་ལ། །རང་ཉིད་མ་ཧཱ་གུ་རུར་གསལ། །དེ་ཡི་ངང་༡ལས་འདི་སྐད་དོ།། ཀྱཻ། སྲིད་པ་ཆགས་ནས་ས་ཡི་བདག །ས་ཡི་ལྷ་མོ་བརྟན་མ་དང་། །ས་བདག་དབང་ཆེན་ལྟོ་འཕྱེ་སོགས། །ས་ལ་དབང་བའི་ལྷ་རྣམས་དང་། །ཁྱད་པར་ཡུལ་འདིའི་གཞི་བདག་དང་། །ས་བདག་རི་བདག་ཆུ་ཡི་བདག །ཤིང་བདག་བྲག་བདག་རྡོ་བདག་དང་། །ཉིན་སྲིབ་ཕུ་མདའ་གཡས་གཡོན་དང་། །ཕ་རི་ཚུ་རི་ལ་གནས་དང་། །ཁྱད་པར་ས་སྐོར་ས་མིག་འདིར། །གཉུག་མར་གནས་པ་ཐམས་ཅད་དང་། །ཡུལ་ལྷ་ས་བདག་ཀླུ་གཉན་རྣམས། །སྐད་ཅིག་ཉིད་ལ་འདིར་གཤེགས་ལ། །རང་རང་མོས་པའི་གདན་ལ་བཞུགས། །ས་བདག་ཀླུ་གཉན་དགའ་བས་གསོན། །དངོས་སུ་འབྱོར་དང་ཡིད་ཀྱིས་སྤྲུལ། །རིན་ཆེན་རྣམ་པ་སྣ་ཚོགས་དང་། །དཀར་གསུམ་
མངར་གསུམ་མཆོད་པར་འབུལ། །གསེར་སྐྱེམས་དར་ཟབ་སྣ་ཚོགས་དང་། །ཇ་ཆང་ཞོ་ཕུད་འོ་ཕུད་དང་། །ཕྱེ་མར་བཟང་ཤིང་དུད་པ་དང་། །ཤེལ་ཚིགས་ཁྲི་དཀར་སྟོང་ནག་དང་། །རྟ་བརྒྱ་གནག་སྟོང་བེའུ་ལུག་ཁྲི། །གཡག་ལུག་ར་གསུམ་གཟུགས་འགྲོས་རྣམས། །ཏིང་འཛིན་སྔགས་ཀྱིས་བྱིན་བརླབས་པ། །དེ་འདྲའི་མཆོད་རྫས་ངོ་མཚར་ཅན། །ལྷ་ཀླུ་ས་བདག་ཐམས་ཅད་ལ། །འབུལ་ལོ་མཆོད་དོ་བསང་ངོ་བརྔན། །ཁྱེད་རྣམས་མཉེས་ཤིང་ཚིམ་པར་མཛོད། །སྔགས་འཆང་བདག་གི་ཚིག་ལ་གསོན། །ཁྱོད་ཀྱི་ཕོ་བྲང་གནས་མལ་དུ། །བདག་དང་རྒྱུ་སྦྱོར་ཡོན་བདག་གིས། །མ་ཤེས་པ་ཡི་དབང་གིས་ནི། །ས་གཉན་བརྐོས་པ་མ་མཆིས་སོ། །གལ་ཏེ་མཆིས་ན་ཞི་བས་ཟླུམས། །ཕྱེ་མར་དཀར་གསུམ་མཆོད་པས་བསང་། །རྡོ་གཉན་རློག་པ་མ་མཆིས་སོ། །གལ་ཏེ་མཆིས་ན་ཞི་བས་ཟླུམས། །ཕྱེ་མར་དཀར་གསུམ་མཆོད་པས་བསང་། །ཆུ་མིག་བསྒྱུར་བ་མ་མཆིས་སོ། །གལ་ཏེ་མཆིས་ན་ཞི་བས་ཟླུམས། །ཕྱེ་མར་དཀར་གསུམ་མཆོད་པས་བསང་། །ཤིང་གཉན་བཅད་པ་མ་མཆིས་སོ། །གལ་ཏེ་མཆིས་ན་ཞི་བས་ཟླུམས། །
ཕྱེ་མར་དཀར་གསུམ་མཆོད་པས་བསང་། །རི་བོའི་རྩེ་ནས་ཀུས་བཏབ་དང་། །རྫིང་དང་ཡུར་བ་དྲངས་བ་དང་། །ཆུ་མིག་གཉན་པོ་རློག་པ་དང་། །རི་ལ་མེ་ཆེན་ཤོར་བ་དང་། །གཉན་ཤ་བསད་དང་རི་དྭགས་བསད། །ཕོ་བྲང་གནས་ཁང་བཤིགས་པ་དང་། །གཉན་སར་ཤ་ཁྲག་ཐོར་བ་དང་། །དཀར་ཐབ་དམར་ཐབ་ཆུ་ཐབ་ཟླཤོར། །ཕོ་བྲང་མིག་ཏུ་ཉལ་བ་དང་། །གཉན་སར་གཅེར་བུར་བུད་པ་དང་། །ཡེངས་བའི་ལམ་ལ་ཕཊ་སྒྲ་དང་། །རྔ་དང་དུང་གིས་བསླང་བ་དང་། །ནུབ་མོ་མེ་འོད་ལྡང་བ་དང་། །གཉན་སར་རླངས་ཅན་ཕོས་པ་དང་། །ས་ཡི་མིག་ཏུ་མེ་བུས་དང་། །ས་གཉན་སློག་དང་ཁང་ལས་བྱས། །ཟབ་རྒོད་གཉེན་པོ་བསྒྲིལ་བ་དང་། །ཡུལ་ལྷ་གཉན་ལ་ཕོག་པ་དང་། །ས་གཉན་རི་གཉན་ཐམས་ཅད་ལ། །འཇོར་གྱིས་བརྐོས་དང་ཐོང་བཙུགས་པ། །བརྒྱལ་དང་སྔངས་དང་བསླངས་པ་དང་། །སྨྲས་དང་བསད་དང་ཕོག་ཐུག་སོགས། །འགྲམ་འཁྲུགས་འགལ་བ་བྱུང་གྱུར་ན། །རྩི་སྨན་སྣ་ཚོགས་མཆོད་པས་བསང་། །དར་ཟབ་སྨན་སྣ་ཚང་བས་བསང་། །ཇ་ཆང་འོ་ཕུད་ཚང་བས་བསང་། །བཟང་
ཤིང་སྣ་ཚོགས་དུད་པས་བསང་། །རྣལ་འབྱོར་དག་པའི་སེམས་ཀྱིས་བསང་། །ཡེ་ཤེས་ལྷ་ཡི་ཐུགས་རྗེས་བསང་། །སྔགས་དང་ཕྱག་རྒྱས་བྱིན་བརླབས་ཀྱིས། །འགྲས་པ་ཡོད་ན་ཞི་གྱུར་ཅིག །ཁྲོས་པ་ཡོད་ན་ཞི་གྱུར་ཅིག །ཕོག་ཐུག་འགྲམ་འཁྲུགས་ཞི་གྱུར་ཅིག །འཁོན་འགྲས་ཐམས་ཅད་ཞི་གྱུར་ཅིག །ཀོ་ལོང་ཆེ་བའི་ས་བདག་ཀླུ། །འདིར་གནས་ས་བདག་ཀླུ་གཉན་ལ། །ལུས་ཀྱིས་གུས་བཏུད་ངག་གིས་གསོལ། །ཡིད་ཀྱིས་གཡོ་སྒྱུ་མེད་པར་བསྟོད། །ཟས་ཕུད་རིན་ཆེན་མཆོད་རྫས་འབུལ། །ས་རྡོ་ཤིང་ལ་རིན་ཚབ་འབུལ། །གོ་བའི་གཏམ་དང་བདེན་པའི་ཚིག །ས་འདིར་བྱ་བ་གང་བསྒྲུབ་ཀྱང་། །ས་ལ་ངའི་ཡིན་མ་ཟེར་ཞིག །རྡོ་ལ་ངའི་ཡིན་མ་ཟེར་ཞིག །ཤིང་ལ་ངའི་ཡིན་མ་ཟེར་ཞིག །ཆུ་ལ་ངའི་ཡིན་མ་ཟེར་ཞིག །ཕོག་ཐུག་འགལ་བ་བྱུང་ན་ཡང་། །བཟོད་པ་དམ་པ་མཛད་དུ་གསོལ། །གདུག་རྩུབ་བསམ་ངན་ཀུན་སྤོངས་ལ། །བཟོད་པ་དམ་པ་མཛད་དུ་གསོལ། །བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་
མཆོད་པ་དང་། །སེམས་ཅན་རྣམས་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདིར་མ་ལུས་པ། །ཐོགས་པ་མེད་པར་འབྱུང་བར་ཤོག །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །འདི་ནི་སངས་རྒྱས་བསྟན་པ་ཡིན། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ནས། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་པོ་ཐོབ་པར་ཤོག །ཨོཾ་ཨ་ཀ་ནི་ནི་ཀ་ནི་ཨ་བྷི་ལ་མཎྜ་ལ་མ་ཡེ་སརྦ་ཤཱནྟིཾ་ཀུ་རུ་ཡེ་སྭཱ་ཧཱ། འགྲམ་འཁྲུགས་བཅོས་ན་འདི་ཅི་མང་བརྗོད། ཡིག་བརྒྱ་དབྱངས་གསལ་རྟེན་འབྲེལ་སྙིང་པོ་བརྗོད་དོ། །ཞེས་ས་བདག་བསང་རཱ་ག་ཨ་སྱས་མཛད་པའོ། ས་བདག་ཀླུ་གཉན་གདུག་རྩུབ་ཞི་གྱུར་ཅིག །སརྦ་མངྒ་ལཾ། །དགེའོ།། །།