ཤིང་རྩི་འབུལ་བ།
ཀྱཻ། དེ་རིང་སྲིད་པའི་གནམ་གང་ལ། །བདག་དང་རྒྱུ་སྦྱོར་ཡོན་བདག་གིས། །ས་བདག་སྡེ་ཚོགས་ཁྱེད་རྣམས་ལ། །ཤིང་རྩི་རྒྱན་ལྡན་འབུལ་བ་ནི། །སྔོན་བྱུང་བསྐལ་པའི་དང་པོ་ལ། །ཀུན་ཏུ་བཟང་མོའི་མཁའ་ཀློང་དུ། །ཡུམ་ཆེན་ལྔ་ཡི་ཆོ་འཕྲུལ་ལས། །དབང་ཆེན་འབྱུང་བ་རིམ་ལྔ་ཆགས། །འབྱུང་ལྔའི་དྭངས་མ་ཤིང་དུ་སྲིད་། །སྣང་ཞིང་སྲིད་པའི་ས་བདག་རྣམས། །སྐྱེ་འགྲོ་ཡོད་དོ་ཅོག་ཀུན་རིགས། །འབྱུང་ལྔར་མ་བརྟེན་གང་ཡང་མེད། །དེ་བས་ས་བདག་སྡེ་ཚོགས་ལ། །འབྱུང་བ་ལྔ་ཡི་དྭངས་མ་ལས། །འཁྲུངས་པའི་བདུད་རྩི་ཅན་གྱི་ཤིང་། །གནས་དང་རྟེན་དུ་འབུལ་ལགས་ན། །དགྱེས་པ་རབ་བསྐྱེད་བརྟན་པར་བཞུགས། །ཤུག་པ་ལྷ་ཡི་བླ་ཤིང་ཡིན། །ཙན་དན་ཕོ་ལྷའི་བླ་ཤིང་ཡིན། །སུར་དཀར་མཚུན་གྱི་བླ་ཤིང་ཡིན། །བླ་ཤིང་འདི་ལ་བརྟན་པར་བཞུགས། །སྦ་འདི་ལྷ་ཡི་བླ་ཤིང་ཡིན། །སྟག་པ་གཉན་གྱི་བླ་ཤིང་ཡིན། འོམ་བུ་ཀླུ་ཡི་བླ་ཤིང་ཡིན། །བླ་ཤིང་འདི་ལ་བརྟན་པར་བཞུགས། །ཚར་བུ་གཏོད་ཀྱི་བླ་ཤིང་ཡིན། །དབྱར་པ་ས་བདག་བླ་ཤིང་ཡིན། །ཉ་བྲིད་ཡུལ་ལྷའི་བླ་ཤིང་ཡིན། །
བླ་ཤིང་འདི་ལ་བརྟན་པར་བཞུགས། །སྤ་མ་དགྲ་ལྷའི་བླ་ཤིང་ཡིན། །འབོ་དཀར་མི་ཡི་བླ་ཤིང་ཡིན། །ལྕགས་མ་ཤུག་མགོན་བླ་ཤིང་ཡིན། །བླ་ཤིང་འདི་ལ་བརྟན་པར་བཞུགས། །སྤེན་མ་ཀླུ་སྨན་བླ་ཤིང་ཡིན་། །སྟག་མ་མཚོ་སྨན་བླ་ཤིང་ཡིན། །གླང་མ་བུད་མེད་བླ་ཤིང་ཡིན། །བླ་ཤིང་འདི་ལ་བརྟན་པར་བཞུགས། །དེ་ལྟར་བླ་ཤིང་སྣ་ཚོགས་འདི། །རྩེ་མོ་མ་གྲུམ་མ་ཉམས་པ། །དར་ཚོན་བལ་ཚོན་བརྒྱན་པ་འདི། །ས་བདག་ཀླུ་གཉན་འཁོར་བཅས་དང་། །གཏོད་སྡེ་འཁོར་དང་བཅས་ལ་འབུལ། །དགྱེས་པའི་ཚུལ་གྱིས་རབ་བཞེས་ནས། །བདག་དང་རྒྱུ་སྦྱོར་ཡོན་བདག་ལ། །འཁོན་པ་སྡུམས་ལ་འགྲས་པ་སྦྱོངས། །མནོལ་པ་སངས་ལ་ཆད་པ་མཐུད། །ཞི་བ་བྱང་ཆུབ་སེམས་ལྡན་པས། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གནམ་ཆོས་ས་སྙིང་གི་ས་བདག་འཁྲུགས་བཅོས་ཀྱི་ལྷན་ཐབས་སུ་རཱ་ག་ཨ་སྱས་འཁྲུགས་པ་ཡོ་བཅོས་ལས་བསྒྲིགས་པའོ། །སརྦ་མངྒ་ལཾ། དགེའོ། དགེའོ། དགེའོ།། །།