སྲུང་བཞི་བཙུགས་པ།
དེ་ནས་སྲུང་བཞི་བཙུགས་པ་ནི། ༈ ཤར་དུ་སྟག་འབུལ་ལ། ཀྱཻ། ཤར་ཕྱོགས་བཞུགས་པའི་ས་བདག་ལ། །བདུད་རྩི་སྨན་དང་རྒྱ་སྟག་རྟེན་ཤིང་འབུལ། །ཤར་ཕྱོགས་ས་བདག་མཉེས་གྱུར་ཅིག །རྒྱ་སྟག་དམར་པོ་མཆེ་བ་ཅན། །ཤར་གྱི་གྲོགས་ལམ་ཕྱེ་རུ་གསོལ། །ཤར་ཕྱོགས་དགྲ་བགེགས་སྟག་གིས་ཐུལ། །དྲི་ཟའི་ཕྲག་དོག་ཞི་གྱུར་ཅིག །ལྷོ་རུ་གཡུ་འབྲུག་ཕུལ་ལ། ཀྱཻ། ལྷོ་ན་བཞུགས་པའི་ས་བདག་ལ། །བདུད་རྩི་སྨན་དང་གཡུ་འབྲུག་རྟེན་ཤིང་འབུལ། །ལྷོ་ཕྱོགས་ས་བདག་མཉེས་གྱུར་ཅིག །གཡུ་འབྲུག་སྔོན་མོ་ངར་སྐད་ཅན། །ལྷོ་ཕྱོགས་དགྲ་བགེགས་འབྲུག་གིས་ཐུལ། །གཤིན་རྗེའི་ཕྲག་དོག་ཞི་གྱུར་ཅིག །ནུབ་ཏུ་བྱ་ཕུལ་ལ། ཀྱཻ། ནུབ་ཕྱོགས་བཞུགས་པའི་ས་བདག་ལ། །བདུད་རྩི་སྨན་དང་ཟངས་བྱ་རྟེན་ཤིང་འབུལ། །ནུབ་ཕྱོགས་ས་བདག་མཉེས་གྱུར་ཅིག །ནུབ་བྱ་དམར་མོ་མཚལ་གཤོག་ཅན། །ནུབ་ཕྱོགས་བདུད་སྒོ་གཤིན་སྒོ་ཆོད། །ནུབ་ཕྱོགས་དགྲ་བགེགས་བྱ་ཡིས་ཐུལ། །ཀླུ་ཡི་ཕྲག་དོག་ཞི་གྱུར་ཅིག །བྱང་དུ་རུས་སྦལ་འབུལ་ལ། ཀྱཻ། བྱང་ཕྱོགས་བཞུགས་པའི་ས་བདག་ལ། །བདུད་རྩི་སྨན་དང་རུས་སྦལ་རྟེན་ཤིང་
འབུལ། །བྱང་ཕྱོགས་ས་བདག་མཉེས་གྱུར་ཅིག །བྱང་བདུད་བྱང་བཙན་དགྲ་ལ་བསྒྱུར། །བྱང་གི་དགྲ་བགེགས་རུས་སྦལ་ཐུལ། །གནོད་སྦྱིན་ཕྲག་དོག་ཞི་གྱུར་ཅིག །དེ་ལྟར་སྲུང་བཞི་ལ་ནི་ལྷ་བཞི་ཚང་། །ལྷ་བཞི་ལ་ནི་དཔལ་བཞི་ཚང་། །དཔལ་བརྒྱད་ལ་ནི་ལོ་སྐོར་བཅུ་གཉིས་ཚང་། །ས་བདག་ཀླུ་གཉན་གདུག་རྩུབ་ཞི་བ་དང་། །བདག་ཅག་བསམ་དོན་འགྲུབ་པའི་དགེ་ལེགས་སྩོལ། །ཅེས་བརྗོད། དེ་ནས་རྗེས་ཆོག་གཤེགས་གསོལ་བཀྲ་ཤིས་དང་། ཕྱོགས་མཚམས་གཏོར་མ་ཤིང་རྩི་རྣམས་འབུལ་བ་འཁྲུགས་བཅོས་མཇུག་ལྟར་ཐམས་ཅད་ཚང་བར་བྱའོ། །ཞེས་གནམ་ཆོས་ས་བདག་འཁྲུགས་བཅོས་ཀྱི་ལྷན་ཐབས་སུ། ༧ ཨ་རཱ་གས་སྦྱར་བས་འགྲོ་བ་རྣམས་ལ་ཕན་ཐོགས་པར་ཤོག། །།