ས་བདག་གི་བཀྲ་ཤིས་བརྗོད་པ།
ས་བདག་གི་བཀྲ་ཤིས་བརྗོད་པ་ནི། ཀྱཻ། འཇམ་དཔལ་གཞོན་ནུ་གསེར་མདོག་དཔལ་གྱི་སྐུ། །ཕྱག་གཉིས་རལ་གྲི་ཨུཏྤལ་པོ་ཏི་བསྣམས། །ལོངས་སྤྱོད་རྫོགས་སྐུ་ཐམས་ཅད་མཁྱེན་པའི་སྐུ། །བཅོམ་ལྡན་འཇམ་དཔལ་མགོན་གྱི་བཀྲ་ཤིས་ཤོག །དེ་ཡི་སྤྲུལ་པ་གསེར་གྱི་རུས་སྦལ་ཆེ། །འབྱུང་བ་ལྔ་དང་ཁམས་ལྔའི་རང་བཞིན་ཅན། །ཐུགས་རྗེས་ཡོངས་ཁྱབ་འགྲོ་བ་ཀུན་གྱི་མ། །གསེར་གྱི་རུས་སྦལ་མཆོག་གི་བཀྲ་ཤིས་ཤོག །ས་ལ་དབང་མཛད་བརྟན་མ་གསེར་གྱི་མདོག །མི་ཟད་གཏེར་གྱི་བུམ་པ་ཕྱག་ན་བསྣམས། །སྐུ་སྟོད་ས་སྟེང་ཐོན་པས་དབུལ་བ་སེལ། །དོན་གྲུབ་ལྷ་མོ་བརྟན་མའི་བཀྲ་ཤིས་ཤོག །ཤར་ཕྱོགས་ཤིང་ལ་མངའ་མཛད་ལོ་ཟླའི་བདག །ཤིང་ཁམས་རྒྱལ་པོ་ལ་སོགས་སྐུ་མདོག་ལྗང་། །ཕྱག་ན་དཔག་བསམ་ལྗོན་ཤིང་ལོ་བཟང་བསྣམས། །དཔག་བསམ་ཤིང་ལྟར་རྒྱས་པའི་བཀྲ་ཤིས་ཤོག །ལྷོ་ཕྱོགས་མེ་ལས་གྲུབ་པ་ལོ་ཟླའི་བདག །མེ་ཁམས་རྒྱལ་པོ་ལ་སོགས་སྐུ་མདོག་དམར། །ཕྱག་ན་གསལ་བྱེད་མེ་ཡི་སྒྲོན་མེ་བསྣམས། །དཔལ་དང་གཟི་བརྗིད་རྒྱས་པའི་བཀྲ་ཤིས་ཤོག །ནུབ་ཕྱོགས་ལྕགས་ཁམས་ལས་
གྲུབ་ལོ་ཟླའི་བདག །ལྕགས་ཁམས་རྒྱལ་པོ་ལ་སོགས་སྐུ་མདོག་དཀར། །ཕྱག་ན་སྲ་བརྟན་གསེར་གྱི་སྡོང་པོ་བསྣམས། །མི་འགྱུར་རྡོ་རྗེ་ལྟ་བུའི་བཀྲ་ཤིས་ཤོག །བྱང་ཕྱོགས་ཆུ་ཁམས་ལས་གྲུབ་ལོ་ཟླའི་བདག །ཆུ་ཁམས་རྒྱལ་པོ་ལ་སོགས་སྐུ་མདོག་མཐིང་། །ཕྱག་ན་བདུད་རྩི་ཆུ་ཡི་བུམ་པ་བསྣམས། །ཆབ་སྲིད་ཆུ་བོའི་རྒྱུན་ལྟར་བཀྲ་ཤིས་ཤོག་མཚམས་བཞི་ས་ལས་གྲུབ་པ་ལོ་ཟླའི་བདག །ས་ཁམས་རྒྱལ་པོ་ལ་སོགས་སྐུ་མདོག་སེར། །ཕྱག་ན་རིན་ཆེན་རི་རབ་འབར་བ་བསྣམས། །མི་འགྱུར་ལྷུན་པོ་ལྟ་བུའི་བཀྲ་ཤིས་ཤོག །འབྱུང་བ་ལྔ་ཡི་ས་དཔལ་ཆུ་དཔལ་དང་། །ལྷ་མོ་བརྟན་མ་མི་ཟད་གཏེར་གྱི་བདག །ཡུལ་ཁམས་ས་ཕྱོགས་ཐམས་ཅད་བདེ་སྐྱིད་ལྡན། །མི་ནོར་བསོད་ནམས་འཕེལ་རྒྱས་བཀྲ་ཤིས་ཤོག །ཅེས་རྟེན་འབྲེལ་སྙིང་པོ་བརྗོད། དེ་ནས་བཀྲ་ཤིས་གང་འོས་བྱའོ། །ཞེས་པ་ཨ་རཱ་གས་སོ། །