ས་བདག་གསོལ་མཆོད།
ན་མོ་གུ་རུ། ས་བདག་གསོལ་མཆོད་ལ་སོགས་པའི། །ཡུལ་ལྷ་གཞི་བདག་གསོལ་མཆོད་ལ། །དཀར་གསུམ་གཏོར་མ་གསེར་སྐྱེམས་གཡག་ལུག་དང་། །བྱ་ཕོ་སོགས་ཀྱིས་བཀོད་དེ་བྲན། །སྦ་སྨྱུག་དར་ཚོན་ཕྱེ་མར་སོགས། །བྱིན་བརླབས་བྱས་ཏེ་མ་ཡེངས་བར། ཀྱཻ། སྟོང་གསུམ་སྲིད་པའི་འཇིག་རྟེན་དང་། །ས་ཕྱོགས་ཡུལ་རིས་འདི་དག་ན། །གནས་པའི་གཞི་བདག་ཀླུ་གཉན་དང་། །ཡུལ་ལྷ་གཞི་བདག་འཁོར་བཅས་རྣམས། །འཁོར་དང་བཅས་པ་མ་ལུས་ཀུན། །རྣལ་འབྱོར་བདག་གིས་སྤྱན་འདྲེན་ན། །མཆོད་པའི་གནས་འདིར་གཤེགས་སུ་གསོལ། །ཁྱེད་ནི་རྫུ་འཕྲུལ་སྟོབས་དང་ལྡན། །བར་སྣང་ས་གཞི་ཀུན་གྱི་བདག །ལེགས་ཉེས་ཀུན་གྱི་ཤན་བྱེད་པ། །འགྲོ་བ་མི་དང་ལྷན་ཅིག་གནས། །ཁྱད་པར་ཡུལ་རིས་ས་ཕྱོགས་འདིར། །ཡུལ་ལྷ་གཞི་བདག་འཁོར་དང་བཅས། །གནས་འདིར་མྱུར་དུ་སྤྱན་འདྲེན་ནོ། །མཆོད་པའི་གནས་འདིར་གཤེགས་སུ་གསོལ། །ཛཿཧཱུྃ་བཾ་ཧོཿ ཁྱོད་ལ་མཆོད་པ་འབུལ་བ་ནི། །རིན་ཆེན་འབྲས་ཀྱི་གཡག་ལུག་ར། །སྦ་སྙུག་རིན་ཆེན་མདའ་དར་དང་། །དར་སྣ་ལ་སོགས་མཆོད་པ་འབུལ། །ཕྱེ་མར་མཁན་ཤུག་བལ་བུ་
དང་། །ཆང་ཕུད་གསེར་སྐྱེམས་འབྲུ་སྣ་དང་། །འབྲས་ཀྱི་བཤོས་བུ་རྒྱན་ཅན་དང་། །བྱ་ཕོ་མཚལ་བུའི་གསུང་སྙན་དང་། །དཀར་གསུམ་མངར་གསུམ་སྨན་མཆོད་དང་། །དག་ཅིང་གཙང་མར་བཤམས་པ་ཡི། །མཆོད་པའི་བྱེ་བྲག་བསམ་མི་ཁྱབ། །བདག་གི་བསམ་པ་དག་པ་ཡི། །བདེ་གཤེགས་རྣམས་ཀྱི་བྱིན་རླབས་དང་། །སྔགས་དང་ཕྱག་རྒྱའི་ཏིང་འཛིན་གྱིས། །ཁྱོད་ཀྱི་དབང་པོའི་སྤྱོད་ཡུལ་དུ། །ཅི་འདོད་ཡིད་བཞིན་ཚིམས་གྱུར་ཅིག །སྒྲུབ་པ་པོ་ལ་དངོས་གྲུབ་སྩོལ། །མདའ་དར་བལ་ཚོན་མཆོད་པ་འབུལ། །སྒྲུབ་པ་པོ་ལ་དངོས་གྲུབ་སྩོལ། །འབྲང་རྒྱས་ཆང་ཕུད་འོ་མ་འབུལ། །སྒྲུབ་པ་པོ་ལ་དངོས་གྲུབ་སྩོལ། །ཐུག་པ་མཁན་དཀར་སུར་དཀར་གྱིས། །བསང་ཆེན་དུད་པའི་མཆོད་པ་འབུལ། །སྒྲུབ་པ་པོ་ལ་དངོས་གྲུབ་སྩོལ། །གཞི་བདག་ཁྱེད་རྣམས་སྤྱན་ལམ་དུ། །མཁོ་དགུ་ཅི་འདོད་ལྡན་གྱུར་ཅིག །ཁྱེད་རྣམས་ཅི་འདོད་ཚིམ་གྱུར་ཅིག །སྒྲུབ་པ་པོ་ལ་དངོས་གྲུབ་སྩོལ། །སྔོན་ཚེ་གཞི་བདག་ཁྱེད་རྣམས་ཀྱིས། །སློབ་དཔོན་པདྨའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་བདག་ཅག་
སྒྲུབ་པ་པོ། །བསམ་པ་ཡིད་བཞིན་མྱུར་དུ་སྒྲུབས། །འདོད་པའི་དངོས་གྲུབ་མྱུར་དུ་སྩོལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་འདོད་པའི་དོན་ལ་གསོལ་བ་བཏབ་པ་དང་ལོ་རྟག་ཏུ་བསང་འདི་བཏང་བའི་འདོད་དོན་ལྷུན་གྱིས་གྲུབ་ཅིང་། ཡུལ་ཕྱོགས་བཀྲ་ཤིས་བདེ་ལེགས་སུ་གྱུར་ཅིག །ཨོཾ་ལྷ་མིའི་ཕན་བདེའི་ལོངས་སྤྱོད་རྒྱས། །ཟས་ནོར་གཏེར་དང་བདུད་རྩི་འབྱུང་། །ཚེ་རིང་ནད་མེད་དགྲ་རྒོལ་གཞོམ། །ཐམས་ཅད་ཡིད་བཞིན་འགྲུབ་པར་གྱུར། །གནས་གཙང་དཀྱིལ་འཁོར་བྱ་བ་དང་། །ཁྲུས་གཙང་གོས་གསར་གྱོན་བྱས་ནས། །སྐུ་གསུམ་རྣམ་དག་རྟེན་དྲུང་འདུག །སྤོས་དང་མེ་ཏོག་ཁ་ཟས་མཆོད། །རྣལ་འབྱོར་དམ་ཚིག་གཙང་ན་འགྲུབ། །ཅེས་བྲིས་ལ་བཅུག །འདི་ནི་ས་ཡི་ལྷ་མོའི་ས་བདག་པདྨ་ལ་དངོས་སུ་གསུངས་པས་བྱིན་རླབས་ཆེ། མཆོད་གསོལ་སྒྲུབ་པའི་སྐབས་སུ་བརྗོད་དོ། །དེ་སྐད་ལྷ་མོའི་ཞལ་བཞེས་ལྟར། །ཁྱོད་ལ་བསང་མཆོད་ཕུལ་བའི་མཐུས། །བདག་དང་ཡོན་བདག་འཁོར་བཅས་ལ། །ནད་མེད་ཚེ་དང་ལྡན་པ་དང་། །ལོ་ཡག་ནོར་ཕྱུགས་འཕེལ་བ་དང་། །རྨང་པོ་བུ་དང་ལྡན་པ་དང་། །རྟག་ཏུ་བཙན་ཞིང་ཕྱུག་པ་དང་། །རྒྱུན་དུ་འཕེལ་ཞིང་དར་
བར་ཤོག །བསམ་པ་ཡིད་བཞིན་འགྲུབ་པར་མཛོད། །ཚོང་ལ་འགྲོ་ན་ཚོང་དཔོན་མཛོད། །རང་སེམས་འདོད་དགུའི་ནོར་དང་སྤྱོད། །བྱེས་སུ་འགྲོ་ན་ལམ་སྣ་མཛོད། །གཞི་ལ་འདུག་ན་ཡུལ་དཔོན་མཛོད། །མཐུ་དཔུང་རྒྱབ་རྟེན་སྡོང་གྲོགས་མཛོད། །རྣལ་འབྱོར་བདག་གི་བསམ་པ་སྒྲུབས། །ཡོན་བདག་དྲིན་ལེན་ཆུད་མ་གསན། །བདག་དང་ཡོན་བདག་འཁོར་བཅས་རྣམས། །སྔོན་ནས་བསུས་ནས་རྒྱབ་ནས་སྐྱོལ། །ལེགས་ཁ་ཟུངས་ལ་རྒྱལ་ཁ་བསྟོད། །ཚེ་དང་བསོད་ནམས་སྤེལ་བར་མཛོད། །དཔལ་དང་གྲགས་པ་བསྒྲུབ་ཏུ་གསོལ། །ལོ་ཟླ་ཞག་དང་ཟ་མའི་ཀག །ཡེ་འདྲོག་གློ་བུར་བཟློག་ཏུ་གསོལ། །བསྟན་པ་སྲུང་ཞིང་བསམ་པ་སྒྲུབས། །མཐུན་པའི་སྡོང་གྲོགས་མཛད་དུ་གསོལ། །བཀྲ་ཤིས་བདེ་ལེགས་འཕེལ་བར་མཛོད། །ཡུལ་ལྷའི་བསངས་མཆོད་རཱ་ག་ཨ་སྱས་སྦྱར་བའོ། །སརྦ་མངྒ་ལཾ།། །།