གནམ་ཆོས་ས་བདག་འཁྲུགས་བཅོས་དང་། བུམ་གཏེར་སྦྲགས་སྒྲུབ་དང་འདོན་འགྲིགས་ཀྱི་ཟིན་བྲིས།
གནམ་ཆོས་ས་བདག་འཁྲུགས་བཅོས་དང་། བུམ་གཏེར་སྦྲགས་སྒྲུབ་དང་འདོན་འགྲིགས་ཀྱི་ཟིན་བྲིས་བཞུགས་སོ།།
སེམས་དཔའ་ས་ཡི་སྙིང་པོ་ལ་ཕྱག་འཚལ་ལོ། །འདིར་གནམ་ཆོས་ལས་བྱུང་བའི་སེམས་དཔའ་ས་ཡི་སྙིང་པོ་དང་། སའི་ལྷ་མོ་བརྟན་མ་གཉིས་ཀྱི་སྦྲགས་སྒྲུབ་ལ་བརྟེན་ནས་ས་བདག་འཁྲུགས་བཅོས་དང་ས་བདག་སྙིང་གཏེར་སྦས་ཚུལ་ནི། ས་བདག་འཁྲུགས་བཅོས་ཀྱི་དཀྱིལ་འཁོར་མཆོད་གཏོར་རྣམས། གཞུང་ནས་འབྱུང་བ་ལྟར་བཤམས། བུམ་པ་བཅས་ལ་བགེགས་བསྐྲད་པ། གཏེར་བུམ་གྱི་རྫས་རྣམས་ཚང་བར་བསགས་ལ། བུམ་པ་དཀྱིལ་འཁོར་གྱི་དབུས་ཀྱི་རྒྱབ་ནས་བཤམས་ལ་ཁ་བཅད་ལ། ཨ་མྲྀ་ཏ་སོགས་ཀྱིས་བསངས་ལ། ཀླུ་སྨན་བཏབ་པའི་བུམ་པ་ཆུ་གཙང་གིས་བྲན་ལ་བཞག །འཁྲུགས་བཅོས་ཀྱི་མངོན་རྟོགས་འདོན་པ་འདི་ལྟར་རོ། །སྒོ་བཞི་སྲུང་བཞི་དང་བཅས་གསལ། །ཅེས་
སོགས་མངོན་རྟོགས་རྫོགས་སྐབས་བུམ་བསྐྱེད་ལ་དམིགས་བུམ་གཏེར་གཞུང་ལྟར་བྱ། ཨོཾ་སྭ་བྷ་ཝས་སྦྱངས། སྟོང་པའི་ངང་ལས་འབྱུང་བ་རིམ་བརྩེགས་སྟེང་། །ཧཱུྃ་ལས་རིན་ཆེན་སྣ་ཚོགས་ལས་གྲུབ་པའི། །ཕྱི་ནི་བུམ་པ་ནང་ནི་གཞལ་ཡས་ཁང་། །ཤིན་ཏུ་ཉམས་དགའ་སོགས། བུམ་བསྐྱེད་མངོན་རྟོགས་འདོན་པའི་མཐར། །རྒྱ་ཆེན་རྒྱུན་མི་འཆད་པའི་གཏེར་དུ་གྱུར། །ཨོཾ་བཛྲ་སྤ་ར་ཎ་ཁཾ། ཞེས་པའི་བར་འདོན། དེ་ནས་འཁྲུགས་བཅོས་གཞུང་གཙོ་བོ་གསུམ་གྱི་གནས་གསུམ་འབྲུ་གསུམ་གྱི། །ཡིག་འབྲུ་གསུམ་གྱི་སོགས་ནས། སྤྱན་དྲངས་པར་གྱུར། ཧོཿ དེང་འདིར་མཆོད་པ་རྒྱ་ཆེན་སྙན་གསན་
དབབ། དུང་དང་རོལ་མོ་བསྒྲག །ཧཱུྃ། དད་པ་དང་ནི་དམ་ཚིག་གིས། །བསྐུལ་ལོ་སོགས་ནས། ས་མ་ཡ་ཧོ། སོགས་གཞུང་ལྟར་འདོན། དེ་ནས་བུམ་གཏེར་གྱི་གཞུང་གི་སྤྱན་འདྲེན་པ་ནི། ཧོཿ གསོན་ཅིག་དགོངས་ཤིག་མངོན་ཤེས་ཅན། །ཡེ་ཤེས་སྤྱན་དང་ལྡན་པ་སོགས། དགོངས་གསོལ་དང་། སྤྱན་འདྲེན་བྱས་ལ། ན་མསརྦ་ཏ་ཐཱ་ག་ཏ་བྷོ་བྷི་ཤྭ་མུ་ཁེ་བྷྱཱ་སོགས། བར་བུམ་བསྐྱེད་།གཞུང་ལྟར་འདོན་ལ། བུམ་པ་ལ་བསྟིམ། དེ་ནས་བུམ་པ་སྦས་དུས། འདོན་པ་བསྒྱུར་ལ། ཧཱུྃ། རྒྱལ་བ་ཀུན་གྱི་སོགས། སྤྱན་འདྲེན་སོགས་འཁྲུགས་བཅོས་གཞུང་ལྟར་འདོན་ལ། མདུན་བསྐྱེད་བུམ་བསྐྱེད། །རྣམས་ལ་མཆོད་པ་རྣམས་དུས་གཅིག་བྱ། བསྟོད་པའི་གོང་དུ་དཀར་གཏོར་འབུལ། བཤགས་པ་ཚར་ནས་བསྙེན་པ་ནི། ས་སྙིང་ཐུགས་ཀར་ཟླ་བའི་སྟེང་། །ཀྵི་མཐར་སྔགས་ཀྱིས་བསྐོར་བ་སོགས། འཛབ་བཟླས་བསྐུལ་བ་བྱས་པ་ལ། ཨོཾ་ཀྵི་ཧི་ར་ཙ་པྲི་ཐི་དྷེ་ཝི་སྭཱ་ཧཱ། ས་སྙིང་བརྟན་མའི་སྦྲགས་སྒྲུབ་སྙིང་པོ་ཅི་རིགས་བཟླས་སོ། །དེ་ཡང་ཤིན་ཏུ་གལ་ཆེ་ཕན་ཐོགས་ཆེ་བར་བྱེད་ན། བདུན་གཉིས་གསུམ་ཞག་གསུམ་དགུ་སོགས་ལ་སྒྲུབ་པ་བྱེད་དེ་འཁྲུགས་བཅོས་ཀྱི་མཆོད་གཏོར་གསོས་ལ། ཚར་གྲངས་བསོགས་ཏེ། རབ་སྟོང་ཚར། འབྲིང་ལྔ་བརྒྱ། ཐ་མ་སུམ་བརྒྱ། ཡང་མཐའ་བརྒྱའམ་ཉེར་གཅིག་བདུན་ལས་མི་ཉུང་བར་བྱ། དེ་ཞོར་བུམ་པ་བསྒྲུབས་ཏེ་
ཞག་གྲངས་བདུན་ནམ་གཉིས་ཐ་མ་བདུན་གཅིག་སོགས་བསྒྲུབ་ཅིང་སྦས་པའི་རིམ་གྲོ་མཆོག་སྟེ། ཡུལ་ཕྱོགས་དེར་ལོ་ལེགས་ཤིང་ཆར་ཆུ་དུས་སུ་འབབས་པ། བཙའ་སད་སེར་བའི་གནོད་པ་ཞི་ཞིང་། མི་ནད་ཕྱུགས་ནད་འཆད་ཅིང་ས་བཅུད་རྒྱུས་ལ་ནོར་ཕྱུགས་འཕེལ་ལོ། །དེ་ལ་ཡང་སྔགས་འདི་རབ་འབུམ་ཚོ། འབྲིང་ཁྲི་ཚོ་ལྔ། ཐ་མ་ཡང་ཁྲི་ཚོ་གསུམ་བཟླས་པས་ལོ་ལེགས། ཕོག་ཐུག་ཤོར་བ། ནད་ཞི་བ་སོགས་ཤམ་བུ་འདི་རྣམས་གང་དགོས་པ་དེ་བཟླས་པས། དེར་སྦས་མཆོག་ཏུ་ཕན་ཡོན་ཆེ་བའོ། །དེ་ཡང་ཕན་ཐོགས་ཤིན་ཏུ་ཆེ་བར་བྱེད་ཅིང་བསྒྲུབ་པའོ། །ཞག་གྲངས་ཅི་མང་བདུན་གསུམ་གཉིས་གཅིག་སོགས་ལ་ཚར་གྲངས་བསོགས་ལ་བསྙེན་པ་ཅི་མང་བཟླས་ཏེ་མཆོད་། གཏོར་གསོས་ལ། རབ་སྟོང་ཚར། འབྲིང་ལྔ་བརྒྱ། ཐ་མ་སུམ་བརྒྱ། ཉུང་བསྡུས་བརྒྱ་རྩ་སོགས་བྱས་ན་ཕན་ཆེ། སྔགས་གྲངས་ཀྱང་ས་སྙིང་བརྟན་མ། སྦྲགས་སྒྲུབ་ལ་རབ་འབུམ་ཚོ། འབྲིང་ཁྲི་ཚོ། ཐ་མ་ཡང་སྟོང་ཚོ་བཟླས་ཤིང་། ལས་སྦྱོར་ཤམ་བུ་ལ་སོགས་རྣམས་གང་དགོས་བཟླས་ཤིང་། དེ་ལྟར་འབྲས་བུ་འབྱུང་ངོ་། །དམིགས་པ་ནི། འདོན་འགྲིགས་གཞུང་ལྟར་དཔྱད་ལ་བཟླས་སོ། །བསྙེན་པའི་དུས། ས་སྙིང་ཐུགས་ཀར་ཟླ་བའི་གདན་ལ་ཐིག་ལེ་དཀར་པོ་མིང་ཡིག་དང་པོས་མཚན་པ་དེ་མཐར་ཨོཾ་དང་མིང་ཡིག་སྔགས་སུ་བསམ་པ་སྭཱ་ཧཱ་ཕོ་རྣམས་གཡས་སྐོར་མོ་རྣམས་གཡོན་དུ་འཁོར་བ་ལས་རང་ཡི་དམ་གྱི་
ཐུགས་ཀའི་ས་བོན་ལས་འོད་ཟེར་འཕྲོས་པས་མདུན་བསྐྱེད་ཀྱི་ཐུགས་ཀའི་སྔགས་ཕྲེང་ལ་ཕོག་དེ་ལས་སྔགས་ཕྲེང་གཡས་གཡོན་དུ་འཁོར་བ་ངོ་བོ་བདུད་རྩི་ཡིན་པ་ལ། རྣམ་པ་འོད་ཟེར་དཀར་པོའི་ཚོགས་དཔག་ཏུ་མེད་པ་འཕྲོས་བདག་དང་ཡོན་བདག་མི་ནོར་ཐམས་ཅད་ལ་ཕོག །སྡིག་སྒྲིབ་ནད་གདོན་བར་ཆད་ཐམས་ཅད་བ་མོར་ཉི་ཟེར་ཕོག་པ་ལྟར་དག་པ་དང་། སླར་ཡང་འོད་ཟེར་བདུད་རྩི་ཚངས་བུག་ནས་ཞུགས་པས་བདུད་རྩིས་ལུས་ཀུན་ལྡེམས་སེ་གང་ནས། ས་བདག་ཀླུ་གཉན་གྱི་གནོད་པའི་ནད་ཐམས་ཅད་དབང་པོའི་སྒོ། །བ་སྤུའི་བུ་ག་དང་སེན་ཕྲག་ཐམས་ཅད་ནས་འབུ་སྲིན་གྱི་ཚུལ་དུ་ཕྱིར་ཐོན་ནས། བར་སྣང་ཁམས་སུ་འཇའ་ལྟར་ཡལ་བར་བསམ། སླར་ཡང་མདུན་གྱི་ལྷ་རྣམས་ལས། །གསེར་གྱི་མདོག་ཅན་འོད་འཕྲོས་པས། །བདག་དང་ཡོན་བདག་ཉིད་ལ་ཕོག་པས་ཚེ་དང་བསོད་ནམས་དཔལ་དང་འབྱོར་པ་ཕྱུགས་དང་ལོངས་སྤྱོད་ཐམས་ཅད་རྒྱས་པ་དང་། སླར་ཡང་འོད་ཟེར་སེར་པོ་འཕྲོས་པས་དཔག་ཚད་བརྒྱད་ཁྲི་བརྒྱད་སྟོང་གི་ས་ཡི་བཅུད་ཐམས་ཅད་དང་། འབྲུ་དང་རྩི་ཤིང་ནགས་ཚལ་གྱི་བཅུད་ཐམས་ཅད་བསྡུས་ནས་འབྲོག་པའི་སྦྲ་ལྷས་དང་།
ཡུལ་པའི་ཞིང་ས་ཁང་པ་རྣམས་ལ་ཐིམ་པས་ས་བཅུད་ཐམས་ཅད་རྒྱས་ཤིང་ལོ་ཏོག་རྩི་ཤིང་ཐམས་ཅད་རྒྱས་ཏེ་ས་བཅུད་དངོས་གྲུབ་ཐམས་ཅད་ཐོབ་པར་བསམ། ཨོཾ་ཀྵིཾ་ཧི་རཱ་ཙ་པྲི་ཐི་དྷེ་ཝི་སྭཱ་ཧཱ། ཞེས་ས་སྙིང་དང་བརྟན་མའི་སྦྲགས་སྒྲུབ་ཀྱི་སྔགས་འདི་འབུམ་ཚོ་གསུམ་མམ་གཅིག །འབྲིང་ཁྲི་ཚོ་ལྔ། ཐ་མ་ཁྲི་ཚོ་གསུམ་བསྒྲུབ་པའོ། །ལས་སྦྱོར་ཤམ་བུ་ལོ་ལེགས་པའི་སྔགས་སམ་འཁྲུགས་པ་བཅོས་པ་ལ་སྣང་བརྒྱད་ཀྱི་སྔགས། ཕོག་ཐུག་ཤོར་བ་ལ་གོང་དེའི་བཅུ་ཆ་གཅིག་སྔགས་བཏགས་དགོས། ས་བདག་གི་ནད་གདོན་ཞི་བའི་སྔགས་རྣམས་ཁྲི་ཚོ་རེ་བཟླས་པས་འདོད་དོན་རྣམས་འགྲུབ་བོ། །རང་གི་བླ་མ་ཡི་དམ་ཆོས་སྐྱོང་རྣམས་ཀྱི་ལས་བྱང་ཉུང་བསྡུས་ཙམ་བཏོན་ནས་གཞན་ཡང་བསང་མཆོད་ཉུང་བསྡུས་དང་། ས་བདག་འཁྲུགས་བཅོས་ཀྱི་བསང་མཆོད་བསྡུས་པ་རྣམས་མ་གཏོགས་གཞན་འདོན་བྱ་མང་པོ་བསྒྱུར་ལ། འཁྲུགས་བཅོས་ཉིད་དང་སྔགས་རྣམས་ལ་འབད་ན་རིམ་གྲོའི་མཆོག་ག། །ས་བདག་ཀླུ་གཉན་ཡུལ་ལྷ་མཉེས་ཤིང་དར་རྒྱས་ཆེ་ཡུལ་ཕྱོགས་དེར་མི་ནད་ཕྱུགས་ནད་ཆད་ཅིང་ཆར་ཆུ་དུས་སུ་འབབས་ཏེ་རྩི་བཅུད་རྒྱས་ནོར་ཕྱུགས་འཕེལ་ཞིང་བཙའ་སད་སེར་གསུམ་ཞི་ནས་ལོ་ལེགས་པར་ཡྻའགྱུར་རོ། །ས་བཅུད་རྒྱས་ནས། ཡུལ་དེར་མི་རྣམས་ལོངས་སྤྱོད་ཆེ་ཞིང་དར་རྒྱས་ཆེ་ལ་བཀྲ་ཤིས་བདེ་ལེགས་འབྱུང་ངོ་། །དེ་ནས་གྲོལ་དུས་མཆོད་བསྟོད་བསྡུས་པ་དང་བཤགས་པ་བྱས་ལ། ཤིང་རྩི་རྣམས་ཕྱོགས་སུ་འབུལ་བཅུག་
ལ། དེ་ནས་བུམ་བསྐྱེད་མི་གཤེགས་པར་བརྟན་བཞུགས་བྱའོ། །བུམ་བསྐྱེད་ཡེ་ཤེས་པ་དང་འཇིག་རྟེན་པ་ཐམས་ཅད་བུམ་རྫས་རྟེན་འདི་རྣམས་འབྱུང་བ་བཞིའི་གནོད་པས་མ་ཞིག་བར་བུམ་པ་གཞལ་ཡས་ཁང་འདོད་ཡོན་ལོངས་སྤྱོད་ཀྱིས་གང་བ་འདི་ལ་བརྟན་པར་བཞུགས་པར་མཛོད་ཅིག །ཨོཾ་ཀྵིཾ་ཧི་རཱ་ཙ་བྲི་ཐི་དྷེ་ཝི་སྭཱ་ཧཱ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། ཨོཾ་ཡེ་དྷརྨ་སོགས༔ མདུན་བསྐྱེད་ས་བདག་འཁྲུགས་བཅོས་གཞུང་ལྟར་གཤེགས་གསོལ་བྱེད། དེ་ནས་བུམ་པ་རྒྱབ་རི་ས་དཔལ་བཟང་སར་ཁྲུ་གང་དང་སོར་བཞི་སོགས་གྲུ་བཞིར་རྡོ་ཁྲོལ་སོལ་བ་ཤུག་ཤུན་རྣམས་ཀྱིས་ལྕིབ་ལ་བཞག་འོ་ཆབ་ཀྱིས་བྲན་ལ་སྙིང་གཏེར་སྦས་ཚུལ་འདོན་འགྲིགས་ལྟར་ཚར་བདུན་ནམ་གསུམ་སོགས་དལ་ཁོམ་དང་བསྟུན་ལ་འདོན། ས་རྡོ་བཅག་ལ་རྗེས་མི་མངོན་པར་བྱའོ། །ཞེས་པ་ས་བདག་སྙིང་གཏེར་དང་འཁྲུགས་བཅོས་ཀྱི་སྦྲགས་སྒྲུབ་ཀྱི་འདོན་འགྲིགས་སྔགས་ཆུང་གསར་བུ་རྣམས་ལ་ཕན་པའི་བསམ་པས་ཨ་རཱ་གས་བྲིས་པ། དགེ་བས་སེམས་ཅན་རྣམས་ལ་ཕན་ཐོགས་རྒྱ་ཆེན་པོ་འབྱུང་ཞིང་། འཇིག་རྟེན་གྱི་ཁམས་སུ་མི་ནད་དང་ཕྱུགས་ནད་རྒྱུན་ཆད་ཅིང་། ཆར་ཆུ་དུས་སུ་བབ་ཅིང་། བདེ་ལེགས་ལོངས་སྤྱོད་དངོས་གྲུབ་ཀྱི་གཏེར་ལ་ལོངས་སྤྱོད་པར་ཤོག་ཅིག །སརྦ་མངྒ་ལཾ། དགེའོ། །དགེ་ལེགས་འཕེལ།། །།