ཀླུ་གཏོར་མདོར་བསྡུས་ཁག་གཉིས།
ཀླུ་གཏོར་མདོར་བསྡུས་བཞུགས་སོ། །དེ་ནས་ཀླུ་གཏོར་བྱེད་ན། ཟངས་གཞོང་གཙང་མའི་ནང་དུ་ཀླུ་སྨན་རིལ་བུ་བཞག་ལ། རང་ཁ་བྱང་ཤར་དུ་བལྟས་ཏེ། ཨོཾ། ཡན་ལག་བརྒྱད་ལྡན་མཚོ་ཡི་དབུས། །ཀླུ་ཆེན་བརྒྱད་ཀྱིས་གཙོར་བྱས་པའི། །ཀླུ་རིགས་ཀུན་གྱིས་གང་བའི་དབུས། །རང་ཉིད་ཁ་སར་པཱ་ཎི་དཀར། །ཐུགས་ཀའི་ཧཱི༔ལས་འོད་འཕྲོས་པས། །ལྕགས་ཀྱུའི་ཕྱག་རྒྱ་བྱས་ལ། ཀླུ་རྒྱལ་འཁོར་བཅས་སྤྱན་དྲངས་ནས། །དམ་ཚིག་རྣམས་ལ་གཉིས་མེད་ཐིམ། །ནཱ་ག་ར་ཙ་ས་པཱ་རི་ཝཱ་ར་ཛཿཧཱུྃ་བཾ་ཧོཿ་ཆུ་དཀར་བསིལ་ཞིང་། མཆོག་སྦྱིན་ཕྱག་རྒྱ་ཁོང་སེང་གི །ཟླ་དཀྱིལ་ཧྲི༔ཡིག་དཀར་པོ་ལས། །བདུད་རྩི་སྨན་དང་འདོད་རྒུའི་རྒྱུན། །བབས་པས་ཀླུ་རིགས་ཀུན་ཚིམས་ནས། །བྱམས་ལྡན་ཕྲིན་ལས་བསྒྲུབ་པར་གྱུར། །ཨོཾ་བ་སུ་ཀི་མཾ་སྭཱ་ཧཱ། བརྒྱ་རྩ་བཟླ། ཆོས་རྣམས་རྨི་ལམ་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་དཔག་མེད་བྱོས། །འོན་ཀྱང་སྐྱོབས་པའི་སྲས་སུ་སྐྱེ། །ཀླུ་རྒྱལ་འཁོར་
བཅས་ཐམས་ཅད་ཀྱིས། །མཆོད་སྦྱིན་གཏོར་མ་འདི་བཞེས་ལ། །གནོད་སེམས་སྤོངས་ལ་བསྟན་པ་སྲུངས། །ཀླུ་སྨན་རྩི་སྨན་ཐམས་ཅད་ཀྱིས། །ཀླུ་ཡི་ནད་རིགས་སོས་གྱུར་ཅིག་དཀར་དམར་ལོངས་སྤྱོད་ཐམས་ཅད་ཀྱིས། །ཀླུ་ཡི་ཁ་ཟས་འདོད་དགུ་ཚིམས། །རིན་ཆེན་འབྲུ་ནོར་ཐམས་ཅད་ཀྱིས། །ཀླུ་ཡི་བང་མཛོད་འབྱོར་པ་འཕེལ། །ལྷག་བསམ་མཆོད་སྦྱིན་བསོད་ནམས་ཀྱིས། །ཀླུ་ཡི་ལས་སྒྲིབ་ཀུན་དག་ནས། །ཁྱད་པར་མ་ཉེས་གནོད་པའི་ཚོགས། །ཐམས་ཅད་ཞི་ཞིང་བདེ་ལེགས་ཤོག །བསམ་པའི་དོན་རྣམས་འགྲུབ་པ་དང་། །ཆར་ཆུ་དུས་སུ་འབབ་པ་དང་། །ལོ་ཕྱུགས་རྟག་ཏུ་ལེགས་པར་མཛོད། །བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་དང་། །དོན་རྣམས་གང་དག་བསམ་པ་ཀུན་། །དེ་དག་ཐམས་ཅད་ཅི་རིགས་པ། །ཐོགས་པ་མེད་པ་འབྱུང་གྱུར་ཅིག །ནཱ་ག་ཤིག་ཁྲོལ་བྱེར་ནཱ་ག་མུ༔ གཙྪ༔ དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ནས། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་
ཐོབ་པར་ཤོག །ཅེས་པ་འདི་ནི་༧ རཱ་ག་ཨ་སྱས་སྦྱར་བའོ།། །། ཀླུ་གཏོར་བསྡུས་པ་ནི། །རང་ཉིད་འཕགས་པ་ཀླུ་སྒྲུབ་ནི། །སངས་རྒྱས་སྤྲུལ་སྐུའི་ཆ་ལུགས་ཅན། །མདུན་དུ་ཀླུ་ཆེན་བརྒྱད་པོ་ནི། །རབ་མཛེས་ཐལ་སྦྱར་སྦྲུལ་མཇུག་ཅན། །ཀུན་ཀྱང་སྦྲུལ་མགོ་བདུན་བདུན་ལྡན། །རྒྱ་མཚོ་ཆེན་པོའི་ཀློང་དུ་གསལ། །སངས་རྒྱས་ཕྱག་ནས་བདུད་རྩིའི་རྒྱུན། །བབས་པས་ཀླུ་རིགས་ཐམས་ཅད་ཚིམ། །རྒྱ་མཚོ་དང་འདྲེས་ཀླུ་ནད་ཞི། །གང་འདོད་དངོས་གྲུབ་སྩོལ་བར་བསམ། །ཨོཾ་ནཱ་ག་ར་ཙ་བཱ་ཝེ་སུ་ཀི་མཾ་སྭཱ་ཧཱ། །བརྒྱ། ཨརྒྷཾ་སོགས། སངས་རྒྱས་ཐུགས་རྗེས་ཀླུ་རྣམས་བདེ་སྐྱིད་ལྡན། །ནད་ཞི་དངོས་གྲུབ་དེ་འདྲ་འཇིག་རྟེན་ལ། །རྒྱ་ཆེན་རྒྱུན་མི་འཆད་པ་འབྱུང་བར་གྱུར། །སངས་རྒྱས་སྲས་དང་བཅས་པས་བཀྲ་ཤིས་ཤོག །ཀླུ་ག་ཏོར་ཉུང་བསྡུས་རཱ་ག་ཨ་སྱས་སྦྱར་བ་དགེ་ལེགས་འཕེལ།། །།