ཀླུ་གཉན་ལ་ཕོག་ཐུག་ཤོར་ན་ཀླུ་གླང་སྦ་ཐབས།
ཀླུ་གཉན་ལ་ཕོག་ཐུག་ཤོར་ན་ཀླུ་གླང་སྦ་ཐབས་བཞུགས་སོ།
ཀླུ་གཉན་ལ་ཕོག་ཐུག་ཤོར་ན་ཀླུ་གླང་སྦ་ཐབས་ནི། རབ་ཟངས། འབྲིང་རྫ་། ཐ་མ་ལ་གླང་དམར་ཁོག་སྟོང་གི་ནང་དུ། ཀླུ་གཟུངས་དང་། རྟ་ལ་མ་ཐ་སྙན་ལ་ཐ། མི་འཛད་ཡུན་གྱི་གཏེར་མཛོད་ཅིག །ཨོཾ་སུ་པྲ་ཏིཥྛ་དུན་ཏི་མི་ལི་མི་ལི་ཡེ་སྭཱ་ཧཱ། ཞེས་ཤོག་དྲིལ་དང་འབྲུ་སྣ་ཀླུ་སྨན་རིན་ཆེན་སྣ་ལྔ་བརྫང་ལ། ཨོཾ་སྭ་བྷ་ཝ་ཤུདྡྷསརྦ་དྷརཿསྭ་བྷཱ་ཤུདྡྷོཉཧཾ། སྟོང་པའི་ངང་ལས་ཧཱུྃ་ཡིག་ཡོངས་གྱུར་ལས། །རིན་ཆེན་སྣ་ཚོགས་ལས་གྲུབ་གླང་དམར་ནི། །དབང་པོ་དྲུག་གི་སྒོ་ལྔ་ཚང་བ་ལ། །རྭ་ལ་རིན་ཆེན་སྣ་ལྔའི་འོད་ཟེར་འཕྲོ། །མིག་གཉིས་ཉི་ཟླ་ཡིད་དུ་འོང་བའི་གཟུགས། །སྤུ་ལ་འདོད་ཡོན་སྣ་ཚོགས་
ཆར་དུ་འབེབས། །རྔ་མ་བདུད་རྩིའི་ཟེགས་མས་དགོས་འདོད་འབྱུང་། །དཔག་བསམ་ཤིང་ལྟར་ལོངས་སྤྱོད་ཡིད་བཞིན་འགྲུབ། །ཨོཾ་བཛྲ་སྤ་ར་ཎ་ཁཾ། སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས་ནས། ཧཱུྃ། སྔོན་གྱི་བསྐལ་པ་དང་པོ་བྱུང་བའི་དུས། །ཀླུ་ཡི་རྒྱལ་པོས་ཁྱུང་གི་སྒོ་ང་བརྐུས། །བྱ་ཁྱུང་ཁྲོས་ཏེ་རྒྱ་མཚོའི་གདིང་དུ་འཛུལ། །གཙུག་ན་རིན་ཆེན་སྦྲུལ་ནག་འབར་བ་ཡི། །མགོ་ནས་བཟུང་ནས་རི་རབ་རྩེ་ན་ཁྱེར། །དེ་ཚེ་རྒྱལ་བ་ཤཱཀྱ་ཐུབ་པ་ཡིས། །ཀླུ་དང་ཁྱུང་གཉིས་འཁྲུག་པ་བསྡུམས་པར་བྱས། །ཀླུ་རྒྱལ་གཙུག་གི་ནོར་བུ་རིན་ཆེན་
དེ། །སྒོ་ང་བརྐུས་པའི་སྟོང་དང་ཆད་དུ་འཇལ། །དང་པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྣུམ་ལ་འགྲས་པ་ཐམས་ཅད་སྦྱངས། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །ག་རུ་ཊ་དང་གསེར་མིག་འཁྱིལ་པ་དང་། །ཀླུ་ཡི་རྒྱལ་པོ་དུང་གཙུག་བྱ་བ་གཉིས། །དང་པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྡུམས་ལ་འགྲས་པ་ཐམས་ཅད་སྦྱང་། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །སྔོན་ཚེ་རྒྱལ་པོ་ཨ་ཤྭ་ཞེས་བྱ་དང་། །ཀླུ་ནི་ཤང་ག་རུ་ཏ་བྱ་བ་དང་། །དང་པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྣུམས་ལ་འགྲས་པ་ཐམས་ཅད་སྦྱངས། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །རྒྱ་ཡི་རྒྱལ་པོ་མ་ཏ་ཞེས་བྱ་དང་། །འཛམ་གླིང་བསྟན་པ་ཞེས་བྱའི་ཀླུ་རྒྱལ་གཉིས། །དང་
པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྡུམས་ལ་འགྲས་པ་ཐམས་ཅད་སྦྱངས། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །རྒྱལ་པོ་དར་མ་ཨ་ཤྭ་ཞེས་བྱ་དང་། །ཀླུ་ནི་སྲིད་པའི་ཁང་བསྟན་བྱ་བ་གཉིས། །དང་པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྡུམས་ལ་འགྲས་པ་ཐམས་ཅད་སྦྱངས། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །སྲིད་པའི་ཀླུ་གླང་བཙན་བདུད་བྱ་བ་དང་། །མཁའ་ལྡིང་ཐོགས་མེད་འཇིགས་བྱེད་བྱ་བ་གཉིས། །དང་པོ་འཁོན་ཡང་ཐ་མ་དུམ་པ་ལྟར། །དེ་བཞིན་བདག་དང་ཀླུ་གཉན་ས་བདག་ཀུན། །འཁོན་པ་བསྡུམས་ལ་འགྲས་པ་ཐམས་ཅད་སྦྱངས། །ཕོག་ཐུག་འགྲམ་འཁྲུག་གྱུར་པ་ཐམས་ཅད་བཤགས། །རྩི་སྨན་དཀར་གསུམ་བདུད་རྩིའི་མཆོད་པ་འབུལ། །སྔོན་ཚེ་སྲིད་པའི་དཔེ་དང་ལུང་བཞིན་དུ། །བདག་དང་ཀླུ་གཉན་ས་བདག་འཁོན་པ་བསྡུམས། །
སྨྲས་འགྲས་ཉམས་པ་བདུད་རྩི་སྨན་གྱིས་གསོ། །ཤེལ་ཚིགས་འབྲུ་སྣ་དར་ཚོན་ཆས་སུ་འཇལ། །ཧཱུྃ་ལས་རིན་ཆེན་གཏེར་གྱི་གླང་བུ་འདི། །འབྲུ་སྨན་རིན་ཆེན་ཀླུ་ཡི་གཟུངས་སྔགས་བཅས། །མི་ཟད་འདོད་དགུ་འབྱུང་བར་བྱིན་གྱིས་བརླབས། །ཀླུ་ཡི་ནོར་ཚབ་ས་ཡི་བཅུད་དུ་འབུལ། །ཟངས་རྫ་བག་ཟན་ལས་བྱས་གླང་བུ་ནི། །དངུལ་ཆུ་ཀླུ་སྨན་རིན་ཆེན་སྔགས་ཀྱིས་བཀང་། །ཀླུ་རྣམས་མི་ཟད་ཡུན་གྱི་གཏེར་དུ་འབུལ། །འདི་ལྟར་འཇལ་དུམ་ལེགས་པར་བྱས་ཟིན་གྱིས། །ཕྱིན་ཆད་འཁོན་སེམས་གནོད་པ་མ་བྱེད་ལ། །གདུག་པའི་སེམས་སྤོངས་རྒྱལ་བའི་བཀའ་ལ་ཉོན། །ཕ་བུ་སྤུན་ཟླ་ཤག་རོགས་ཇི་བཞིན་དུ། །བདག་ལ་རྟག་ཏུ་ཁ་འཛིན་སྡོང་གྲོགས་མཛོད། །རིག་འཛིན་རྒྱལ་བའི་བཀའ་ལས་མ་འདའ་བར། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །འོ་མའམ་ཆུ་དཀར་ནང་དུ་ཀླུ་སྨན་བཏབ་ལ། །སྔགས་འདི་བརྒྱ་རྩ་བརྒྱད་བཟླས་ཕུ་བྱས་པས། །གར་དགོས་ཐམས་ཅད་ཁྱབ་པར་བྲན་ལ་འདེབས། །ཨོཾ་སུ་པྲ་ཏིཥྛ་བཛྲ་དུན་ཏི་མི་ལི་མི་ལི་ཡེ་སྭཱ་ཧཱ། གླང་བུ་ས་དེའི་གར་བདེར་སྦས་ལ་བཞག །དེ་ཡིས་བཀྲ་ཤིས་ཀླུ་དང་དུམ་བྱས་གྱུར། །ཕོག་ཐུག་ཞི་ནས་ཅི་བསམ་ཡིད་བཞིན་འགྲུབ། །༧
ཅེས་རྭ་ཨ་སྱས་འཕྲལ་དུ་བྲིས་པ་ལས། །ཕོག་ཐུག་ཞི་ནས་འགྲོ་རྣམས་བདེ་བར་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།