མདོ་སྡེ་སྤྲིན་ཆེན་དང་ཀླུ་འབུམ་གཉིས་ཀྱི་གཞུང་ནས་བཏུས་པ་ཀླུ་གཉན་ས་བདག་རྣམས་ཀྱི་བསང་ཡིག་ཕན་བདེའི་རྒྱ་མཚོ་དངོས་གྲུབ་ནོར་བུའི་འབྱུང་གནས།
མདོ་སྡེ་སྤྲིན་ཆེན་དང་ཀླུ་འབུམ་གཉིས་ཀྱི་གཞུང་ནས་བཏུས་པ་ཀླུ་གཉན་ས་བདག་རྣམས་ཀྱི་བསང་ཡིག་ཕན་བདེའི་རྒྱ་མཚོ་དངོས་གྲུབ་ནོར་བུའི་འབྱུང་གནས་བཞུགས་སོ།།
ན་མོ་ལོ་ཀི་ཤྭ་ར་ཡེ། འཕགས་མཆོག་ཐུགས་རྗེ་ཅན་ལ་འདུད། །རང་དང་གཞན་ལ་ཕན་པའི་ཕྱིར། །ཀླུ་གཉན་ས་བདག་བསང་མཆོད་བྲི། །བསང་གཞུང་སྤྱི་ལྟར་ཚར་རྗེས་སུ། །མཆོད་པ་ཕུལ་ལ་འདི་སྐད་དོ། ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་ཆོས་ཀྱི་དབྱིངས་ནས་བྱུང་། །ཀུན་ཏུ་བཟང་མོའི་མཁའ་ཀློང་ནས། །རིགས་བཞིའི་ཡུམ་གྱི་རྣམ་འཕྲུལ་ལས། །དབང་ཆེན་འབྱུང་བ་རིམ་པར་བརྩེགས། །འབྱུང་བའི་དྭངས་མ་ཤིང་དུ་འཁྲུངས། །ཀླུ་ཤིང་རྣམ་པ་སྣ་ཚོགས་དང་། །ཕྱེ་མར་དཀར་གསུམ་མངར་གསུམ་དང་། །འབྲུ་སྣ་སྨན་སྣ་ཟས་ཕུད་རྣམས། །བསྲེགས་
པའི་དུད་པ་སྤྲིན་ལྟར་གཏིབས། །གང་གཱའི་བྱེ་སྙེད་སངས་རྒྱས་ཞིང་། །ཐམས་ཅད་སྤོས་སྤྲིན་དྲ་བས་འབྲེལ། །སྤོས་ཀྱི་ཁྲི་ཤིང་སྟོང་གསུམ་ཁྱབ། །དུད་པའི་ཆ་ཤས་རེ་རེ་ལ། །བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་སྣ་ཚོགས་ཆར་ལྟར་འབེབས། དུད་པའི་ཟེར་མ་རེ་རེས་ཀྱང་། །ཀླུ་གཉན་ས་བདག་འབུམ་ཕྲག་གི །རྨུགས་པ་སང་ཞིང་ཉམས་པ་སོས། །ལུས་སེམས་བདེ་བས་ཚིམ་པར་བྱེད། །དེ་འདྲའི་དཔག་མེད་བསང་མཆོད་འདིས། ཀྱཻ། ཀླུ་སྒྲུབ་སྙིང་པོ་ལ་སོགས་པའི། །ཀླུ་ནད་སེལ་མཛད་བླ་མ་བསང་། །ཕྱག་
རྡོར་ཀླུ་བརྒྱད་བསྐོར་བ་སོགས། །ཀླུ་ཡི་དཀྱིལ་འཁོར་ལྷ་ཚོགས་བསང་། །ཁྱུང་གི་འཇིགས་པ་སེལ་མཛད་པའི། །སངས་རྒྱས་སྤྲིན་གྱི་སྒྲོན་མེ་བསང་། །ཀླུ་ཁྱུང་འཁྲུག་པ་བསྡུམ་མཛད་པ། །སྟོན་པ་ཤཱཀྱ་ཐུབ་པ་བསང་། །སྤྲིན་ཆེན་མདོ་ལས་གསུངས་པ་ཡི། །སངས་རྒྱས་ལྔ་བཅུ་རྩ་ལྔ་བསང་། །ཀླུ་རྣམས་ཀུན་ལ་ཕན་མཛད་པའི། །ཀླུ་རྒྱལ་སངས་རྒྱས་བཅོམ་ལྡན་བསང་། །ཀླུ་དབང་རྒྱལ་པོའི་སྤྲུལ་པ་སྟེ། །ཀླུ་རྒྱལ་གཞོན་ནུ་གཏུམ་པོ་བསང་། །འཇམ་པའི་དབྱངས་ཀྱི་སྤྲུལ་པ་སྟེ། །ཀླུ་རྒྱལ་འཇོག་པོ་སེར་པོ་བསང་། །སྤྱན་རས་གཟིགས་ཀྱི་སྤྲུལ་པ་སྟེ། །ཀླུ་རྒྱལ་ནོར་རྒྱས་ཆེན་པོ་བསང་། །ཕྱག་ན་རྡོ་རྗེའི་སྤྲུལ་པ་སྟེ། །ཀླུ་རྒྱལ་དགའ་བོ་འཁོར་བཅས་བསང་། །འཇམ་དཔལ་ཐུགས་ཀྱི་སྤྲུལ་པ་སྟེ། །ཀླུ་རྒྱལ་མི་མགོན་དཀར་པོ་བསང་། །ས་བཅུ་ལ་གནས་སེམས་དཔའ་སྟེ། །ཀླུ་རྒྱལ་གཡོག་མཐའ་ཡས་པ་བསང་། །འཇིག་རྟེན་འདས་ཀྱང་འཇིག་རྟེན་ཚུལ། །ཀླུ་ཆེན་བརྒྱད་པོ་འཁོར་བཅས་བསང་། །ཐུགས་རྗེ་ཆེན་པོའི་བཀའ་ཉན་པ། །ཆུ་བདག་ཝ་རུ་ཎ་སེ་བསང་། །དྲག་པོ་ཐོད་ཕྲེང་བཀའ་ཉན་པ། །ཀླུ་རྒྱལ་མི་
སྔོན་རྟ་སྔོན་བསང་། །སློབ་དཔོན་པདྨའི་བཀའ་ཉན་པ། །ཀླུ་རྒྱལ་མ་དྲོས་གཟི་ཆེན་བསང་། །གྲུབ་ཆེན་པཀིའི་བཀའ་ཉན་པ། །ཀླུ་རྒྱལ་རྡོ་རྗེ་རྒྱལ་པོ་བསང་། །ཡེ་ཤེས་མགོན་པོའི་བཀའ་ཉན་པ། །ཀླུ་རྒྱལ་གང་པོ་མཛེས་མ་བསང་། །དཔལ་ཆེན་གྲྭ་ལོའི་བཀའ་ཉན་པ། །ཀླུ་རྒྱལ་བ་སུ་ཀི་ཞེས་བསང་། ཀྱཻ། ཡང་གཅིག་བསང་ཞིང་མཆོད་པ་ནི། །ཀླུ་རྒྱལ་ཉེར་དགའ་རྒྱ་མཚོ་བསང་། །དཔལ་གྱི་གཟི་བརྗིད་ས་སྲུང་བུ། །ནོར་རྒྱས་བུ་དང་བཏང་བཟུང་བསང་། །གཙུག་ན་ནོར་བུ་གཙུག་ནོར་ཐོགས། །ཀླུ་རྒྱལ་དཔལ་བཟང་གློག་ཕྲེང་བསང་། །སྣང་ལྡན་གཙུག་ཕུད་གཙུག་འཇའ་ཅན། །ཀླུ་རྒྱལ་དབང་པོའི་རྒྱལ་མཚན་བསང་། །དབང་པོའི་མཆོད་སྡོང་བཀྲ་ཤིས་ལྡན། །དཀྱིལ་འཁོར་ཆེན་པོ་སྐར་མདོག་བསང་། །འཛམ་བུའི་རྒྱལ་མཚན་ལག་འགྲོ་ཆེ། །དཔལ་གྱི་བློ་གྲོས་ཟླ་མཐོང་བསང་། །ཟླ་བའི་གཟི་བརྗིད་ཟླ་མཐོང་དང་། ། ལེགས་མཐོང་ཤིན་ཏུ་བསྟན་པ་བསང་། །མགུལ་ན་ནོར་བུ་སྤྲིན་འབྱུང་དང་། །ཆར་རྒྱུན་རྣམ་འཇོམས་རབ་འཇོམས་བསང་། །མཐུ་བསྒྱིང་གདེངས་ཀ་ཆེན་པོ་དང་། །ཆེར་
སྒྲོགས་རྣམ་པར་སྒྲ་འབྱིན་དང་། །ཨུཏྤ་ལ་དང་དབྱངས་ཟབ་བསང་། །གཤོལ་མདའ་འཛིན་དང་སྣ་ཚོགས་སྡེ། །རྩལ་ཆེན་ཞགས་པ་ཆེན་པོ་བསང་། །ཨེ་ལེའི་འདབ་མ་ཀུན་ཏུ་སྣང་། །སྣ་ཚུགས་དུང་དང་བདེ་བྱེད་བསང་། །ཨུཏྤལ་ད་ར་ད་ར་དང་། །ད་ར་ད་ར་འཁོར་བཅས་བསང་། །ལག་འགྲོ་ལག་འགྲོ་ཆེན་པོ་དང་། །དྲི་མ་ཆེན་པོ་འཕུར་ལྡིང་བསང་། །སྲིན་བུ་གནས་དང་འཕྱང་བ་དང་། །དབང་པོའི་སྡེ་དང་འདམ་བུ་བསང་། །ཉེ་བའི་འདམ་བུ་དུང་ཐོགས་དང་། །འགྲོ་ལྡིང་རབ་མཛེས་རྣོན་པོ་བསང་། །གླང་ཆེན་སྣ་དང་སེར་སྐྱ་དང་། །གློག་འོད་ཆེ་དང་གློག་འབར་བསང་། །སྟོབས་ལྷ་ཆུ་སྟོབས་དམ་པ་འགེང་། །གསེར་མདོག་སྒྲ་དང་གསེར་འོད་བསང་། །བདུད་རྩི་ཅན་དང་མུ་ཏིག་ཅན། །ཁེཌུར་འོད་དང་ཉི་འོད་བསང་། །ཟླ་བའི་རྒྱལ་མཚན་འཆར་བ་དང་། །གླང་མགོ་དང་ནི་གཤིན་རྗེ་དང་། །ཀླུ་རྒྱལ་དཀར་པོ་ནག་པོ་དང་། །ངང་པའི་གཟི་བརྗིད་དགེ་ཚུལ་བསང་། །ཧུ་ལུ་ཀ་དང་གང་གཱ་དང་། །མུ་ཁྱུད་འཛིན་དང་སྦལ་པ་བསང་། །མགོ་སྟོང་ཅན་དང་ས་འཛིན་དང་། །གཙུག་ན་ནོར་བུ་སྤྲིན་ཆེན་བསང་། །དོན་
ཡོད་མཐོང་དང་སྡེ་བཟང་དང་། །རྣམ་པར་དུལ་དང་ས་སྐྱོང་བསང་། །རྒ་བ་འབྱུང་དང་མིས་བྱིན་དང་། །ཆུ་སྲིན་ཀུམ་བྷི་ར་གདོང་བསང་། །དུག་འཛིན་ཆུ་སྲིན་ཀུམ་བྷི་ར། །མྱུར་གདུག་ཀླུ་རྒྱལ་མཇུག་མ་བསང་། །རབ་འཕྱངས་འཇིགས་བྱེད་པདྨ་ཀ །མགོ་ལྔ་གཟི་བརྗིད་མཛེས་པ་བསང་། །བིལ་ར་བླ་མ་མཇུག་རིང་དང་། །ཤིང་རྟ་རྒྱལ་དང་མགོ་ཆེན་བསང་། །སིམ་པི་ཀ་དང་བྷི་ཏ་ར། །མགྱོགས་འགྲོ་ཀླུ་རྒྱལ་མགོ་གསུམ་བསང་། །ཀླུ་སྡེ་གཟི་ཆེན་འདམ་བུ་བྱིན། །མགོ་བདུན་འོད་འབར་སྐྲག་བྱེད་བསང་། །རབ་ཏུ་ཆེར་གཏུམ་མཐོང་དགའ་དང་། །དྲི་མེད་གཟི་བརྗིད་སྟོང་ཆེན་བསང་། །མིག་བཟང་དྲག་པོ་འོད་ཆེན་པོ། །ཀླུ་ཡི་རྒྱལ་པོ་གཏུམ་པོ་བསང་། །འོད་འཕྲོའི་ཕུང་པོ་དབང་པོའི་འོད། །ཀླུ་རྒྱལ་ཁྲོ་བོ་དྲག་ཤུལ་བསང་། །རིན་ཆེན་ཆུ་སྦྱིན་སྐམ་པས་འཐུང་། །ཀླུ་རྒྱལ་ཆུ་སྦྱིན་སྤྲིན་ཆེན་བསང་། །ཀུ་མུའི་འབྱུང་གནས་རྒྱ་མཚོའི་སྤྲིན། །སྤྲིན་ཟླ་མེ་ཏོག་དྲི་ཆེན་བསང་། །རིན་ཆེན་མིག་དང་ནོར་རྒྱས་བུ། །མ་དྲོས་པ་དང་འོད་བཟང་བསང་། །དོན་ཡོད་དགའ་དང་མཐོང་དགའ་དང་། །སྤྲིན་གྱིས་
ལེགས་པར་འགེབ་པ་བསང་། །གཞན་གྱིས་མི་ཐུབ་སྤྲིན་ཆུ་སྦྱིན། །ཀླུ་རྒྱལ་བདེ་མཐོང་རླུང་འབྱུང་བསང་། །གཙུག་ན་ནོར་བུ་རླུང་འཁྲུག་བྱེད། །གཞན་ཡང་ཀླུ་རྒྱལ་སྟོང་ཕྲག་བསང་། །ཆུ་ཆེན་སྤྲིན་གྱིས་ཆུ་འཆང་བ། །ལག་འགྲོ་ཆེན་པོའི་གཡོག་རྣམས་བསང་། །སྦྲུལ་གདུག་གཟུགས་ཅན་དུག་ལྕེ་ཅན། །ནོར་བུ་ཅོད་པན་སྣ་ཚོགས་བསང་། །ཁྲོ་བོ་ཤུགས་ཅན་དྲག་ཤུལ་ཅན། །ཆུ་གནས་སྤྲིན་ཆེན་ཞོན་རྣམས་བསང་། །སྟོབས་ཆེན་ལྟོ་འཕྱེ་མགོ་སྟོང་ལྡན། །མིག་དམར་ཡོན་པའི་གཟུགས་རྣམས་བསང་། །སྟོབས་ཆེ་ཕ་རོལ་གནོན་པ་ཡི། །གཟི་བརྗིད་ཐོགས་མེད་ཀླུ་རྣམས་བསང་། །རྒྱལ་རིགས་རྗེ་རིགས་བྲམ་ཟེའི་རིགས། །དམངས་རིགས་གདོལ་པའི་རིགས་རྣམས་བསང་། ཀྱཻ། ཡང་གཅིག་བསང་ཞིང་མཆོད་པ་ནི། །སྤྲིན་བདག་ཀླུ་མོ་ཐམས་ཅད་བསང་། །སྤྲིན་ཆེན་ཆུ་འཛིན་མགྱོགས་བཞུད་མ། །སྤྲིན་ཆེན་མ་དང་སྤྲིན་ལྡན་བསང་། །སྤྲིན་ཆུ་འཛིན་མ་སྤྲིན་གསལ་མ། །དུད་སྤྲིན་མ་དང་སྤྲིན་འབྱུང་བསང་། །སྤྲིན་གྱི་འབྱུང་གནས་སྤྲིན་སྒྲོགས་མ། །ཀླུ་མོ་སྤྲིན་གྱི་ཅོད་པན་བསང་། །སྤྲིན་བཞུགས་སྤྲིན་གྱི་ཕྲེང་བ་ཡི། །སྤྲིན་གྱི་
རྣམ་པར་བརྒྱན་མ་བསང་། །སྤྲིན་བཅིབ་སྤྲིན་ལ་གནས་བཅས་པ། །སྤྲིན་སྙིང་སྤྲིན་རལ་སྤྲིན་འོད་བསང་། །རྒྱ་ཆེན་སྤྲིན་བཞུགས་སྤྲིན་འཁོར་ལྡན། །རི་སུལ་བཞུགས་མ་ཀླུ་ཡུམ་བསང་། །མཆོད་ཕྱིར་སྤྲིན་ཐོགས་ལོ་འོང་བསྒྲུབ། །སྤྲིན་ཆེན་དཔལ་ལྡན་དཀར་མདོག་བསང་། །བསིལ་རེག་འཚུབ་མའི་སྤྱོད་ཡུལ་མ། །ཀླུ་ཆེན་རྣམས་དང་རོལ་མཛད་བསང་། །དབུ་དགུ་ལྡན་མ་གློག་ཕྲེང་མ། །པོན་ཏྲ་བཅུད་ལེན་འཛིན་མ་བསང་། །སྤྲིན་ཆེན་ཕྲེང་ལྡན་ལག་འགྲོ་འཛིན། །ཀླུ་ཆེན་བརྒྱད་ཀྱི་ཡུམ་བརྒྱད་བསང་། །སྤྲིན་མནབ་མ་དང་སྤྲིན་བཀོད་བཅིབས། །དུག་དྲག་སྤྱོད་ཡུལ་སྒྲ་སྒྲོག་བསང་། །ཀླུ་ཚོགས་བསྐུལ་མ་འབྲུག་སྒྲོགས་མ། །ལྷ་མོ་སྤྲིན་ཆེན་ཕྲེང་ལྡན་བསང་། །གཞན་ཡང་ཀླུ་རྒྱལ་བསང་བ་ནི། །རྟོག་ཆེན་རྒྱལ་པོའི་རྒྱལ་མཚན་བསང་། །སྤྲིན་ཆེན་སྙིང་པོ་ཁ་བད་ཅན། །སྤྲིན་མཐུ་ཅན་དང་དཔལ་སྙིང་བསང་། །མཚན་མོ་འཛིན་དང་ཆུ་སྦྱིན་དང་། །གཟི་བརྗིད་མེ་འདྲ་ཁྲོ་མེད་བསང་། །ཆུ་སྦྱིན་ཆེན་པོ་ཀླུ་པ་དང་། །སྤྲིན་གྱི་དབང་ཕྱུག་རྒྱལ་པོ་བསང་། །ཆུ་འཛིན་ས་ཡི་བུམ་པ་དང་། །ཨིང་གི་ར་གདོང་སྤྲིན་
གདུག་བསང་། །གོམ་སྟབས་མཐའ་ཡས་ཆ་བྱད་མཛེས། །གཟི་བརྗིད་སྤྲིན་ལས་མངོན་བྱུང་བསང་། །སྤྱད་ལྟོ་ཞི་བ་དཔའ་བ་དང་། །གསེར་གདན་ཅན་དང་མཆོག་བཙན་དང་། །དུག་དྲག་དབྱངས་སྙན་བདུད་རྩི་སྙིང་། །མཚོ་སྨན་རྒྱལ་མོ་མཆེད་ལྔ་བསང་། །གནམ་གཡོ་འབྲུག་སྒྲ་རྔ་སྒྲ་དང་། །རབ་ཏུ་ཆར་འབེབས་ཆེན་པོ་བསང་། །བདུད་རྩིའི་རྒྱུན་དང་དགའ་བྱེད་དང་། །འབབ་སྡེ་དང་ནི་འབྲུག་སྒྲོག་བསང་། །སྲེད་མེད་བུ་དང་རྒྱ་མཚོའི་ཀློང་། །ཡོན་པོ་དང་ནི་སྐྱ་རེངས་བསང་། །བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞིའི་ཀླུ་རྣམས་བསང་། །རི་དྭགས་གཅན་གཟན་བ་གླང་སོགས། །མགོ་བརྙན་ཅན་གྱི་ཀླུ་རྣམས་བསང་། ཀྱཻ། ཡང་གཅིག་བསང་ཞིང་མཆོད་པ་ནི། །སྲིད་པའི་གཉན་རྗེ་གོང་སྔོན་བསང་། །ཁྲི་འབུམ་སྟོང་ཕྲག་གཉན་རྗེ་བཙན། །གཉན་ཆེན་དགྲ་འདུལ་གཤེད་མགོན་བསང་། །རྟ་ཚ་ཐོག་འབེབས་སྟོང་འབྱམས་དང་། །གཉན་ཆེན་དགྲ་འདུལ་ས་ཕྲེང་བསང་། །ཁྲོ་བོ་བདུད་འབེབས་འཕྲུལ་སྟོང་འདུལ། །འཕྲོ་བ་ཀུན་འདུལ་སྲིད་རྗེ་བསང་། །བདུད་ཚ་ཁྲོ་མཆོག་གཉན་རྒྱལ་བ། །གཉན་ཆེན་ཟོ་
ཐུབ་ཁྲོ་མཆོག་བསང་། །ཁྲོ་སྟོང་ཡུལ་རྗེ་འཕྲོ་རྩེ་དགུ། །གཉན་ཆེན་དྲག་པོ་ས་རྒྱལ་བསང་། །གསུམ་ཐོད་དེ་རྒྱལ་མི་མགོན་དཀར། །སྦི་ལ་གསེར་ཁྲབ་བས་ཅན་བསང་། །ཁྲོ་བོ་དུང་སྐྱོང་ནུབ་དགྲ་གསོད། །དགེ་བསྙེན་ས་ཡ་དགུ་འབུམ་བསང་། །ཤ་བ་དྲེད་དང་དོམ་གཟིག་རྟ། །དུད་འགྲོ་སྣ་ཚོགས་མགོ་ཅན་བསང་། །གཉན་ཆེན་དཀར་ནག་མགོ་བརྙན་ཅན། །མགོ་བརྙན་ལྡན་པ་དགུ་འབུམ་བསང་། །གཞན་ཡང་གཉན་གྱི་བཙུན་མོ་ནི། །ལི་བྱིན་འཕྲུལ་གྱི་རྒྱལ་མོ་བསང་། །གང་དྲག་འཕྲུལ་ཟ་ལྡེམ་བུ་མ། །བདུད་ཟ་འཕྲུལ་མོ་ཡིད་འོང་བསང་། །གཉན་མོ་དུང་གི་རལ་ཅན་སོགས། །གཉན་གྱི་ལྕམ་མོ་ཐམས་ཅད་བསང་། །ལི་བྱིན་འོད་དེ་བུད་མེད་ནག །གཉན་ཟ་ག་ག་གདན་ཐོང་བསང་། །གཉན་ཟ་ཐོག་ཐོག་ཤོལ་མོ་དཀར། །ཐོག་ཐོག་ཡ་མ་དཀར་མོ་བསང་། །དཀར་མོ་ཤེལ་འོད་ཐོག་འབེབས་མ། །གཉན་ཟ་འཕྲུལ་ཏིག་གསེར་མདོག་བསང་། །གཡུ་ཏིང་ལེན་མོ་ཧོར་མོ་མདོག །སྟོང་འདུས་མ་དང་འོད་འཕྲོ་བསང་། །ལྔ་ཚིག་མ་དང་སྟོང་མཆོག་མ། །བཀའ་ལ་བཅག་པའི་ལྕམ་མོ་བསང་། །
ཏི་སེ་ཐང་ལྷ་སྤོམ་ར་དང་། །ཀླུ་རྒྱལ་ལ་སོགས་མགུར་ལྷ་དང་། །དམག་དཔོན་དབྱི་རྒྱལ་རིན་ཆེན་སོགས། །ཕྱོགས་བཞིའི་གཉན་ཆེན་སྡེ་བཞི་བསང་། །སྨོན་སྐྱེས་གང་བཞུར་མཆེད་གསུམ་སོགས། །གཉན་ཕྲན་བཞི་བཅུ་ཞེ་གཉིས་བསང་། །གཉན་ཆེན་རི་ཏི་སྤོ་ཏོ་སོགས། །ངོམ་ཡུལ་གནས་པའི་གཉན་རྣམས་བསང་། ཀྱཻ། ཡང་གཅིག་བསང་ཞིང་མཆོད་པ་ནི། །དབང་ཆེན་ཤི་བྷ་ཏྲ་བསང་། །བཙུན་མོ་ས་ཡི་ལྷ་མོ་དང་། །སྲས་མཆོག་ས་འཛིན་ལག་པ་བསང་། །ས་བདག་རྒྱལ་པོ་རྟ་སྐད་དང་། །ས་བདག་སྟག་གི་རྐང་ལག་བསང་། །ས་བདག་སྟོང་ཁྲི་བཙན་པོ་དང་། །ཕྱོགས་བཞི་མཚམས་བརྒྱད་ས་བདག་བསང་། །ལོ་འཁོར་རྗེ་བློན་བཅུ་བདུན་དང་། །ཟླ་འཁོར་ཞག་དུས་ས་བདག་བསང་། །སྤར་ཁ་བརྒྱད་དང་སྨེ་བ་དགུ། །ལོ་སྐོར་བཅུ་གཉིས་ལོ་རྒན་བསང་། །ས་བདག་ལྟོ་འཕྱེ་ཆེན་པོ་དང་། །རི་དང་ས་ཡི་ལྷ་རྣམས་བསང་། ཀྱཻ། ངོམ་དུ་རུང་བའི་ས་བདག་སྟེ། །སྐྱེས་བུ་ངོམ་རྒྱལ་མཚོ་བཀྲ་བསང་། །བཙུན་མོ་གཉིས་དང་བློན་པོ་གཉིས། །མ་མོ་བླ་མཆོད་བཅས་པ་བསང་། །མདའ་ར་མདུང་ར་མཛོད་འཛིན་
དང་། །སྒོ་སྲུང་ལས་མཁན་བཅས་པ་བསང་། །ཀླུ་བདུད་དགེ་བསྙེན་ཆེན་པོ་སྟེ། །ཀླུ་རྒྱལ་དྲག་པོ་བདུད་འདུལ་བསང་། །ལྕི་ཆུ་རྒྱུད་དུ་མཚན་གསོལ་བ། །དགེ་བསྙེན་ཆེན་པོ་འབོ་རང་བསང་། །ངོམ་ཆུའི་རྒྱུད་དུ་མཚན་གསོལ་བ། །དབྱི་དོ་རྡོ་རྗེ་བདུད་འཇོམས་བསང་། །ལྕི་ངོམ་མཚམས་སུ་མཚན་གསོལ་བ། །རྡོ་གཟེའི་བླ་མཚོ་དམར་ནག་བསང་། །ཟླ་ངོམ་འདུས་པར་མཚན་གསོལ་བ། །དགེ་བསྙེན་ཆེན་པོ་རྫོང་ནག་བསང་། །ངོམ་ཡུལ་སྨད་ལ་མངའ་མཛད་པ། །ལྕམ་གཅིག་མཚོ་ནག་ཀླུ་མོ་བསང་། །ཆུ་བོ་ཆུ་མདོ་ཀུན་ལ་གནས། །འཁོར་གྱི་ཀླུ་བདུད་ཀླུ་བཙན་བསང་། །མཚོ་འཁོར་གདེངས་ཀ་ཀུན་ལ་གནས། །འཁོར་གྱི་ཀླུ་སྨན་མཚོ་སྨན་བསང་། །ཆུ་མིག་ལྗོན་པ་ཀུན་ལ་གནས། །ཡང་འཁོར་ཀླུ་བྲན་གྲངས་མེད་བསང་། །གཞན་ཡང་ཁྲ་བོ་གཉན་གྱི་རིགས། །གཏམ་རྒྱལ་དབྱི་དབྲོ་འཁོར་བཅས་བསང་། །རྒྱལ་མོ་བུ་སྤང་དཔལ་རི་རྩེ། །ཡུལ་བདག་གནས་བདག་ཐམས་ཅད་བསང་། །ཟོ་རྒྱལ་ཞྭ་དཀར་རྟ་འདྲ་དང་། །ནོར་བདག་ལ་སོགས་མདུན་རི་བསང་། །གནས་འདིའི་གཡས་གཡོན་མདུན་རྒྱབ་
ལ། །གནས་པའི་ས་བདག་ཐམས་ཅད་བསང་། ཀྱཻ། ས་བདག་ཀླུ་གཉན་ཐམས་ཅད་ལ། །དཀར་གསུམ་མངར་གསུམ་ཟས་ཕུད་དང་། །འབྲུ་སྣ་སྨན་སྣ་དར་ཟབ་དང་། །རིན་ཆེན་སྣ་ཚོགས་མཆོད་པ་འབུལ། །ཐམས་ཅད་མཉེས་ཤིང་ཚིམས་གྱུར་ཅིག །ཀླུ་ཤིང་ཤུག་པའི་བསང་དུད་ཀྱིས། །ཀླུ་ནད་རུས་དགུ་སོས་གྱུར་ཅིག །ཀླུ་ཤིང་བྲ་མའི་བསང་དུད་ཀྱིས། །ཀླུ་ཡི་མཆིན་ནད་སོས་གྱུར་ཅིག །ཀླུ་ཤིང་སེ་བའི་བསང་དུད་ཀྱིས། །ཀླུ་ཡི་སྟོད་ནད་སོས་གྱུར་ཅིག །ཀླུ་ཤིང་སྐྱེར་དཀར་བསང་དུད་ཀྱིས། །ཀླུ་ཡི་མཁྲིས་ནད་སོས་གྱུར་ཅིག །ཀླུ་ཤིང་ལྕང་མའི་བསང་དུད་ཀྱིས། །ཀླུ་ནད་གྲུམ་བུ་སོས་གྱུར་ཅིག །ཀླུ་ཤིང་ཉ་བྲིད་བསང་དུད་ཀྱིས། །ཀླུ་ནད་གག་པ་སོས་གྱུར་ཅིག །ཀླུ་ཤིང་སྨྱུག་གའི་བསང་དུད་ཀྱིས། །ཀླུ་རྣམས་ཤི་བ་སོས་གྱུར་ཅིག །ཀླུ་ཤིང་སྟག་མའི་བསང་དུད་ཀྱིས། །ཀླུ་རྣམས་མནོལ་བ་སངས་གྱུར་ཅིག །ཀླུ་ཤིང་སུར་དཀར་བསང་དུད་ཀྱིས། །ཀླུ་ཡི་མགོ་ནད་སོས་གྱུར་ཅིག །ཀླུ་ཤིང་དབྱར་པའི་བསང་དུད་ཀྱིས། །ཀླུ་ཡི་ཡན་ལག་ན་བ་སོས་གྱུར་ཅིག །ཀླུ་ཤིང་ཚར་བུའི་བསང་དུད་ཀྱིས། །ཀླུ་ཕྲུག་ན་བ་
སོས་གྱུར་ཅིག །ཀླུ་ཤིང་གླ་རྐང་བསང་དུད་ཀྱིས། །ཀླུ་ཡི་རྐང་ནད་སོས་གྱུར་ཅིག །ཀླུ་ཤིང་སྒྲོན་ཤིང་བསང་དུད་ཀྱིས། །ཀླུ་ཡི་མིག་ནད་སོས་གྱུར་ཅིག་ཀླུ་ཤིང་སྤེན་མའི་བསང་དུད་ཀྱིས། །ཀླུ་ཡི་གློ་ནད་སོས་གྱུར་ཅིག །ཀླུ་ཤིང་ས་ལའི་བསང་དུད་ཀྱིས། །ཀླུ་ཡི་མཁལ་ནད་སོས་གྱུར་ཅིག །ཀླུ་སྨན་སྣ་ཚོགས་བསང་དུད་ཀྱིས། །ཀླུ་ནད་ཀུན་ལས་ཐར་གྱུར་ཅིག །ཕྱེ་མར་ཟས་ཕུད་བསང་དུད་ཀྱིས། །ཀླུ་གཉན་ས་བདག་ཚིམ་གྱུར་ཅིག ཀྱཻ། ཀླུ་གཉན་ས་བདག་ཐམས་ཅད་ཀུན། །རྣལ་འབྱོར་བདག་ལ་དགོངས་སུ་གསོལ། །བདག་དང་ཡོན་བདག་འཁོར་བཅས་ཀུན། །ཚེ་རབས་ཐོག་མ་མེད་པ་ནས། །ད་ལྟའི་ལུས་འདི་ཡན་ཆད་དང་། །ཕ་མྱེས་བདུན་རྒྱུད་ཚུན་ཆད་ནས། །བུ་ཚ་ཡང་ཚ་ཡན་ཆད་དུ། །ཀླུ་གཉན་ས་བདག་ཁྱེད་རྣམས་ཀྱི། །ཐུགས་དང་འགལ་བར་གྱུར་པའི་ལས། །ས་གཉན་རྐོས་དང་ན་གཉན་བུས། །ཤིང་གཉན་བཅད་དང་ཀླུ་ཤིང་བྲེག །བྲག་གཉན་བཤིགས་དང་ཕ་བོང་གསེས། །རི་གཉན་མེ་བཀྱེས་ཀུ་ཆོ་བཏབ། །གཞུང་ཆུ་ཡུར་དྲངས་ཆུ་མིག་བསུབ། །མནའ་གཉན་སྐྱེལ་
ལེན་ཐབ་གཞོབ་བྱས། །གཏད་ཁྲམ་དྲག་ལས་གཏོར་ཟོར་བརྒྱབ། །ཞིང་མུ་བཅད་དང་ཁང་ལས་བྱས། །སྤང་གཉན་ཕེད་དང་བཙོག་ནལ་གཡོས། །རི་དྭགས་སྦལ་སྦྲུལ་ཆུ་གནས་བསད། །གང་བྱས་ཐམས་ཅད་མཐོལ་ཞིང་བཤགས། །བྱམས་པའི་ཐུགས་ཀྱིས་བཟོད་པར་གསོལ། །སྤྲིན་ཆེན་མདོ་ལས་གསུངས་པ་ཡི། །བདེ་གཤེགས་སྤྲིན་གྱི་ཆུ་འཛིན་སོགས། །ལྔ་བཅུ་རྩ་ལྔའི་བྱིན་རླབས་པ། །སྦྱིན་པའི་མཆོད་པ་ཕུལ་བའི་མཐུས། །ཀླུ་གཉན་ས་བདག་ཐམས་ཅད་ཀུན། །ནད་དང་སྡུག་བསྔལ་ཀུན་ཞི་སྟེ། །ཉམས་དང་རྨུགས་པ་ཀུན་བྱང་ནས། །བླ་མེད་རྫོགས་པའི་སངས་རྒྱས་ཏེ། །མཐུ་སྟོབས་ནུས་པ་ཆེར་འཕེལ་ནས། །མངའ་ཐང་ལོངས་སྤྱོད་ལྡན་གྱུར་ཅིག །དེ་ལྟར་ཁྱེད་ཅག་སྟོབས་འཕེལ་ནས། །བདག་ཅག་ཡོན་མཆོད་འཁོར་བཅས་ལ། །ཁ་འཛིན་སྟོང་གྲོགས་མེལ་ཚེ་མཛོད། །ཡག་དང་སྤྲོད་ལ་ཉེས་དང་བསྣོལ། །བསམ་པ་སྒྲུབས་ལ་རེ་བ་སྐོངས། །ཉིན་གྱི་དུས་སུ་བྱ་ར་གྱིས། །མཚན་གྱི་དུས་སུ་མེལ་ཚེ་མཛོད། །རྒྱལ་རིགས་ཀླུ་ཡི་མི་གཡང་ཕོབ། །མི་འཕེན་རྟ་ཧྲག་དངོས་གྲུབ་སྩོལ། །རྗེ་རིགས་ཀླུ་ཡི་ནོར་གཡང་ཕོབ། །
ནོར་ལུག་རྟ་དྲེལ་དངོས་གྲུབ་སྩོལ། །བྲམ་ཟེ་ཀླུ་ཡི་ཆུས་གཡང་ཕོབ། །བཙན་ཕྱུག་དར་གསུམ་དངོས་གྲུབ་སྩོལ། །གདོལ་པ་ཀླུ་ཡི་རྨ་གཡང་ཕོབ། །ཕུན་སུམ་ཚོགས་པའི་དངོས་གྲུབ་སྩོལ། །བདག་དང་ཡོན་བདག་འཁོར་བཅས་ལ། །མི་ལ་ན་ཚ་མ་གཏོང་ཞིག །ཕྱུགས་ལ་གོད་ཁ་མ་གཏོང་ཞིག །ཞིང་ལ་བཙའ་སད་སེར་གསུམ་མ་གཏོང་ཞིག །ཆར་ཆུ་དུས་སུ་འབེབས་པ་དང་། །ལོ་ཕྱུགས་རྟག་ཏུ་ལེགས་པར་མཛོད། །ཕ་རོལ་སྔགས་བོན་མུ་སྟེགས་ཀྱིས། །བདག་དང་ཡོན་བདག་འཁོར་བཅས་རྣམས། །ཁྱེད་ཅག་རྣམས་ལ་གཏད་པའམ། །དྲག་སྔགས་དབལ་གྱིས་ཆད་ན་ཡང་། །སྐུ་གླུད་བསང་མཆོད་འདི་བཞེས་ལ། །བཟུང་བ་ཐོངས་ལ་བཅིངས་པ་ཁྲོལ། །བསྡམ་པ་ཀློད་ལ་མནན་པ་ཁྱོག །གཞན་ཡང་ལས་དང་རྐྱེན་དབང་གིས། །སྔོན་ཆད་གནོད་པ་བྱས་ན་ཡང་། །ནད་རྣམས་སོལ་ལ་དུག་རྣམས་ཕྱུངས། །ཕྱིན་ཆད་མི་གནོད་དམ་ཆོས་ཤིག །རང་རང་གནས་སུ་བཞུད་ནས་ཀྱང་། །རྟག་ཏུ་སྤུན་དང་གྲོགས་ལྟ་བུར། །བྱམས་པའི་ཐུགས་ཀྱིས་དགོངས་མཛོད་ལ། །རྟག་ཏུ་ཁ་འཛིན་རྒྱབ་རྟེན་དང་། །
བཀྲ་ཤིས་བདེ་ལེགས་རྒྱས་པར་མཛོད། །ཅེས་བརྗོད་ཁུ་ཡེ་ལ་སོགས་བྱའོ། །འདི་ནི་ཕོག་ཐུག་འགྲམ་འཁྲུག་དང་། །ཆར་པ་འབོད་པའི་སྣ་སེལ་ལམ། །བབ་རྗེས་གཏང་རག་བཏང་བའམ། །ཁང་ལས་འཕྲུ་འདུལ་བྱེད་པའམ། །ཐབ་གཞོབ་རི་མེ་ཤོར་བ་དང་། །སྲིད་ཚོལ་རྟ་ནོར་གོད་ཁ་སོགས། །དེ་དག་ཀུན་ལ་འདི་ཉིད་མཆོག །འདི་བྲིས་ཉེས་འགལ་ཅི་མཆིས་པ། །ཀླུ་རྒྱལ་སེམས་དཔའ་རྣམས་ལ་བཤགས། །འདི་བྲིས་བསོད་ནམས་གང་མཆིས་དེས། །འགྲོ་ཀུན་བདེ་ལྡན་སྡུག་བསྔལ་བྲལ། །བདེ་ཆེན་ཞིང་དུ་སྐྱེ་བར་ཤོག །དེ་སྐད་༧རཱ་ག་ཨ་སྱས་སྨྲས། །ཕན་ཐོགས་རྒྱ་ཆེན་འབྱུང་བར་ཤོག །མངྒ་ལཾ། བྷ་ཝནྟུ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།