ཀླུའི་བསང་མཆོད་ཕན་བདེའི་རྒྱ་མཚོ་ཀླུ་གཡང་དངོས་གྲུབ་ཀྱི་རླབས་ཕྲེང་རབ་ཏུ་གཡོ་བ།
ཀླུའི་བསང་མཆོད་ཕན་བདེའི་རྒྱ་མཚོ་ཀླུ་གཡང་དངོས་གྲུབ་ཀྱི་རླབས་ཕྲེང་རབ་ཏུ་གཡོ་བ་ཞེས་བྱ་བ་བཞུགས་སོ།།
ན་མོ་ལོ་ཀི་ཤྭ་ར་ཡེ། འཇིག་རྟེན་དབང་ཕྱུག་ཞབས་ལ་ཕྱག་འཚལ་ནས། །འཇིག་རྟེན་ཀུན་ལ་ཕན་བདེ་འབྱུང་བའི་ཕྱིར། །འཇིག་རྟེན་འཇིག་རྟེན་འདས་པའི་ཀླུརྣམས་ལ། །འཇིག་རྟེན་དྲེགས་པའི་བསང་མཆོད་འབུལ་འདོད་ན། །འཇིག་རྟེན་འདིར་སྐྱེས་བཟང་ཤིང་སྣ་ཚོགས་དང་། །དཀར་གསུམ་མངར་གསུམ་ཕྱེ་མར་ལ་སོགས་པ། །ཤ་ཁྲག་སྤང་བའི་འཇིག་རྟེན་ཟས་ཕུད་བསྲེག །བདག་ཉིད་བྱམས་ཆེན་གཉུག་མའི་ཏིང་འཛིན་གྱིས། །ངག་གིས་གང་བརྗོད་ཡིད་ཀྱིས་གྱེར་བསྒོམ་བྱ། །ཨེ་མ་ཧོ༔ བདག་དང་ཀླུ་ཡི་གཙོར་བྱས་སེམས་ཅན་ཀུན། །བསླུ་མེད་དཀོན་མཆོག་གསུམ་ལ་སྐྱབས་སུ་མཆི། །ཀླུ་དང་ས་བདག་ལ་སོགས་སེམས་ཅན་ཀུན། །བདེ་ལ་
འགོད་ཕྱིར་བྱང་ཆུབ་སེམས་བསྐྱེད་དོ། །སྟོང་པའི་རང་མདངས་སྐད་ཅིག་དྲན་རྫོགས་སུ། །རང་ཉིད་འཕགས་པ་ཐུགས་རྗེ་ཆེན་པོའི་སྐུ། །དཀར་གསལ་ཞལ་གཅིག་ཞི་འཛུམ་ཐོར་ཙུགས་ཅན། །དར་དང་རིན་ཆེན་རྒྱན་ལྡན་ཕྱེད་སྐྱིལ་བཞུགས། །ཀྲིཥྛ་ས་རིའི་པགས་པས་ནུ་གཡོན་བཀབ། །ཕྱག་གཡས་མཆོག་སྦྱིན་བདུད་རྩི་སྨན་ཆར་འབེབས། །གཡོན་པས་པད་དཀར་ཡུ་བ་ཐུགས་ཀར་འཛིན། །ཡེ་ནས་དམ་ཡེ་དབྱེར་མེད་ཉིད་དུ་གསལ། །ཐུགས་ཀའི་ཧཱུྃལས་བྱམས་པའི་འོད་ཟེར་འཕྲོས། །འཇིག་རྟེན་འདས་དང་མ་འདས་ཀླུ་ཡི་ཚོགས། །ནམ་
མཁའ་ས་གཞི་གང་བར་སྤྱན་དྲངས་གྱུར། །རི་རབ་སྟེང་ཤོད་རོལ་མཚོ་རྒྱ་མཚོ་ཆེ། །གླིང་བཞི་གླིང་ཕྲན་སྟོང་གསུམ་འཇིག་རྟེན་ཁམས། །འཛམ་གླིང་མཐའ་དབུས་ཁྱད་པར་གངས་རིའི་ལྗོངས། །ཆུ་བོ་ཆུ་བྲན་འབབ་ཆུ་གདེངས་ཀ་དང་། །ལུ་མ་ཁྲོན་པ་ཆུ་མིག་ཆུ་ཡི་མདོ། །རི་བོ་ལྗོན་ཤིང་བྲག་རི་སྐྱེད་མོས་ཚལ། །སྤང་ལྗོངས་ནགས་ཚལ་ནེའུ་སིང་ལ་སོགས་ལ། །གནས་པའི་ཀླུ་གཉན་ས་བདག་མ་ལུས་ཀུན། །བདག་གིས་བསང་མཆོད་འབུལ་ཕྱིར་སྤྱན་འདྲེན་ན། །ཐོགས་མེད་ཡིད་ལྟར་མྱུར་བའི་རྫུ་འཕྲུལ་གྱིས། །བྱམས་པའི་སེམས་དང་བཅས་ཏེ་འདིར་གཤེགས་ཤིག །ཡིད་ལས་བྱུང་བའི་རིན་ཆེན་ཁྲི་སྟེང་དུ། །གཉིས་མེད་དགྱེས་པའི་ཚུལ་གྱིས་བཞུགས་ནས་ཀྱང་། །སྔོན་ཚེ་ཐུབ་དབང་གསང་བདག་པད་འབྱུང་གི །དམ་ཚིག་གཉན་པོ་རྗེས་སུ་དྲན་མཛོད་ལ། །བདག་གིས་གང་བཅོལ་ཕྲིན་ལས་འགྲུབ་པར་མཛོད། །སརྦ་ནཱ་ག་རཱ་ཛ་ས་པ་རི་ཝཱ་ར་བཛྲ་ས་མ་ཡ་ཛ་ཛཿ ཛཿཧཱུྃ་བཾ་ཧོཿ པདྨ་ཀ་མ་ལཱ་སིཾ༔ ས་མ་ཡ་ཧོ༔ ས་མ་ཡ་ཧཱུྃ། སྟོང་པའི་ངང་ལས་བསང་ཁང་ཡི་གེ་ཧཱུྃ། །དེ་ལས་དུ་བའི་ལྷ་མོ་ནམ་མཁའི་མདོག །བཞེངས་
སྟབས་རིན་ཆེན་རྒྱན་ལྡན་དར་ཟབ་གསོལ། །ཕྱག་གཡས་ཁྲུས་བུམ་བདུད་རྩིས་ཀླུ་རྣམས་བཀྲུ། །གཡོན་པས་སྨན་གྱི་གཞོང་པར་སྤོས་སྡོང་ལས། །སྤོས་ཀྱི་དུད་སྤྲིན་སངས་རྒྱས་ཞིང་ཀུན་ཁྱབ། །སྤོས་ཀྱི་ཁྲི་ཤིང་དྲ་བས་ནམ་མཁའ་གང་། །དེ་ལས་བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་ལོངས་སྤྱོད་ཆར་རྒྱུན་ལྟ་བུར་འབེབས་། །ཁྱད་པར་ཀླུ་ལ་མཁོ་བའི་ཡོ་བྱད་དང་། །བདུད་རྩི་ཀླུ་སྨན་ན་བུན་ལྟ་བུར་འབེབས། །ཟད་མི་ཤེས་པ་ནམ་མཁའི་མཛོད་དུ་གྱུར། །ཨོཾ་བཛྲ་དྷུ་པེ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡ་ཨཱཿཧཱུྃ་སྭཱ་ཧཱ། བཛྲ་སྤ་ར་ཎ་ཁཾ། ཀྱཻ། བསང་གི་རྒྱུད་བྱུང་གང་ནས་བྱུང་། །བསང་བྱུང་ཆོས་ཀྱི་དབྱིངས་ལས་བྱུང་། །ཀུན་ཏུ་བཟང་པོའི་མཁའ་ཀློང་ནས། །སངས་རྒྱས་སྤྱན་དང་མཱ་མ་ཀཱི། །གོས་དཀར་སྒྲོལ་མའི་སྤྲུལ་པ་ལས། །རླུང་མེ་ཆུ་ཡི་དཀྱིལ་འཁོར་ཆགས། །འབྱུང་ཆེན་ལྔ་ཡི་དྭངས་མ་ལས། །བཟང་ཤིང་ཀླུ་ཤིང་སྣ་ཚོགས་འཁྲུངས། །ཀླུ་ཤིང་སྣ་ཚོགས་དུད་པ་དང་། །ཕྱེ་མར་དཀར་གསུམ་མངར་གསུམ་དང་། །ཀླུ་སྨན་རྣམ་པ་སྣ་ཚོགས་ཀུན། །བསྲེགས་པའི་དུད་པ་སྤྲིན་ལྟར་
གཏིབས། །དངོས་འབྱོར་ཡིད་སྤྲུལ་མཆོད་པ་འདིས། ཀྱཻ། ཀླུ་སྒྲུབ་པད་འབྱུང་བྱ་ཡུལ་བ། །སྐྱེར་སྒོང་བ་དང་སངས་རྒྱས་དབོན། །པཀྴི་རང་བྱུང་རྡོ་རྗེ་སོགས། །ཀླུ་འདུལ་རིག་འཛིན་བླ་མ་བསང་། །གཏུམ་ཆེན་གཏུམ་ཆུང་གོས་སྔོན་ཅན། །འཁོར་ཆེན་ནཱ་ག་རཀ་དང་། །རྟ་མགྲིན་ནག་པོ་ཀླུ་འདུལ་སོགས། །ཡི་དམ་ལྷ་ཚོགས་ཐམས་ཅད་བསང་། །སྤྲིན་ཆེན་མདོ་ལས་གསུངས་པ་ཡི། །ཀླུ་ལ་ཕན་མཛད་བཅོམ་ལྡན་འདས། །སྤྲིན་གྱི་ཆུ་འཛིན་ལ་སོགས་པ། །བདེ་གཤེགས་ལྔ་བཅུ་རྩ་ལྔ་བསང་། །ཁྱུང་གི་འཇིགས་པ་སེལ་མཛད་པ། །བདེ་གཤེགས་སྤྲིན་གྱི་སྒྲོན་མེ་བསང་། །ཀླུ་ཁྱུང་འཁྲུག་པ་བསྡུམ་མཛད་པ། །བཅོམ་ལྡན་ཤཱཀྱ་ཐུབ་པ་བསང་། །ཀླུ་རྣམས་ཀུན་ལ་ཕན་མཛད་པ། །ཀླུ་རྒྱལ་སངས་རྒྱས་བཅོམ་ལྡན་བསང་། །ས་བཅུའི་སེམས་དཔའ་ཀླུ་ཡི་བདག །ཀླུ་རྒྱལ་གཡོག་མཐའ་ཡས་པ་བསང་། །ཀླུ་དབང་རྒྱལ་པོའི་སྤྲུལ་པ་སྟེ། །ཀླུ་རྒྱལ་གཞོན་ནུ་གཏུམ་པོ་བསང་། །སྤྱན་རས་གཟིགས་ཀྱི་སྤྲུལ་པ་སྟེ། །ཀླུ་ཡི་རྒྱལ་པོ་ནོར་རྒྱས་བསང་། །གསང་བའི་བདག་པོའི་སྤྲུལ་པ་སྟེ། །ཀླུ་ཡི་རྒྱལ་པོ་དགའ་བོ་བསང་། །
འཇམ་དཔལ་དབྱངས་ཀྱི་སྤྲུལ་པ་སྟེ། །ཀླུ་ཡི་རྒྱལ་པོ་འཇོག་པོ་བསང་། །ཐུགས་རྗེ་ཆེན་པོའི་བཀའ་ཉན་པ། །ཆུ་བདག་ཝ་རུ་ཎ་སེ་བསང་། །ཕྱག་ན་རྡོ་རྗེའི་བཀའ་ཉན་པ། །ཡེ་ཤེས་ཀླུ་ཆེན་བརྒྱད་པོ་བསང་། །འཇམ་དཔལ་སྤྲུལ་པ་བཀའ་ཉན་ཚུལ། །ཀླུ་རྒྱལ་མི་མགོན་དཀར་པོ་བསང་། །པད་འབྱུང་བཀའ་ཉན་གཏེར་གྱི་བདག་ཀླུ་བདུད་དགེ་བསྙེན་སྨྱོ་ཁ་བསང་། །པཀིའི་བཀའ་ཉན་བསྟན་པ་སྲུངས། །ཀླུ་བདུད་རྡོ་རྗེ་རྒྱལ་པོ་བསང་། །གསང་སྔགས་ཀུན་གྱི་བསྟན་སྲུང་མཆོག །ཀླུ་བདུད་ནག་པོ་མགོ་དགུ་བསང་། །དགེ་བསྙེན་དགྱེས་པ་བསྐྱེད་པའི་ཡུམ། །ཀླུ་མོ་ན་ར་སེང་སྔོན་བསང་། །དགེ་བསྙེན་ཆེན་པོའི་བཀའ་ཉན་པ། །ཀླུ་ཆེན་མིང་སྲིང་གཉིས་པོ་བསང་། །བཀའ་ཡི་ལས་བྱེད་ཆེན་པོ་སྟེ། །བར་བློན་ཆེན་པོ་འཁོར་བཅས་བསང་། ཀྱཻ། འོད་སྲུང་བསྟན་ལ་དགེ་བསྙེན་མཛད། །ས་བརྒྱད་ནོན་པའི་སེམས་དཔའ་བསང་། །ལྷ་དབང་བརྒྱ་བྱིན་གཉེན་ཟླ་སྟེ། །གནམ་མཚོ་ཕྱུག་མོའི་ཡབ་གཅིག་བསང་། །དབུ་རུ་བྱང་དུ་མཚན་བཏགས་པ། །ཇོ་བོ་གཉན་ཆེན་ཐང་ལྷ་བསང་། །སྐྱི་ཤོད་
གཞུང་དུ་མཚན་གསོལ་བ། །ཀླུ་བདུད་གཉན་ཆེན་མཁར་ནག་བསང་། །ལྷོ་བྲག་ཕྱོགས་སུ་མཚན་གསོལ་བ། །གཏེར་སྲུང་དགེ་བསྙེན་སྨྱོ་ཁ་བསང་། །བྱང་ཕྱོགས་རྒྱུད་དུ་མངའ་མཛད་པ། །ཀླུ་རྒྱལ་དུང་སྐྱོང་སྲས་པོ་བསང་། །དེ་ཡི་སྤྲུལ་པ་འཁོར་དང་སྡེ། །དངུལ་ཆུ་རྒྱུད་དུ་མཚན་གསོལ་བ། །ཀླུ་བདུད་ཉ་ཆེན་ནག་མདངས་བསང་། །ལྕི་ཆུ་རྒྱུད་དུ་མཚན་གསོལ་བ། །འབོ་རང་རྡོ་རྗེ་བདུད་འདུལ་བསང་། །ངོམ་ཆུ་རྒྱུད་དུ་མཚན་གསོལ་བ། །དབྱི་དོ་རྡོ་རྗེ་བདུད་འདུལ་བསང་། །ལྕི་ངོམ་མཚམས་སུ་མཚན་གསོལ་བ། །རྡོ་གཟེའི་བླ་མཚོ་དམར་ནག་བསང་། །དགེ་བསྙེན་དགྱེས་པ་བསྐྱེད་པའི་ཡུམ། །མཚོ་ནག་ཀླུ་མོ་ཆེན་པོ་བསང་། །དགེ་བསྙེན་ཆེན་པོའི་བཀའ་ཉན་པ། །ཀླུ་བདུད་ཀླུ་བཙན་མང་པོ་བསང་། །གཞན་ཡང་སྟོང་གསུམ་འཇིག་རྟེན་ན། །བཞུགས་པའི་ཀླུ་རིགས་ཐམས་ཅད་བསང་། །རྒྱལ་རིགས་རྗེའུ་རིགས་བྲམ་ཟེའི་རིགས། །དམངས་རིགས་གདོལ་པ་ཐམས་ཅད་བསང་། །ཀླུ་ཡི་རྒྱལ་པོ་བློན་པོ་དང་། །བུ་དང་ཚ་བོ་ཐམས་ཅད་བསང་། །ཀླུ་ཡི་སྤུན་ཡ་ནང་མི་དང་། །འཁོར་དང་ཡང་གཡོག་ཐམས་ཅད་
བསམས་པས་།བསང་། །ཁྱད་པར་ཡུལ་ཕྱོགས་འདིར་གནས་པའི། །ཀླུ་གཉན་ས་བདག་ཐམས་ཅད་བསང་། །རི་བྲག་སྤང་ལྗོངས་ནགས་ཚལ་དང་། །ནེའུ་སིང་ལ་གནས་ཀླུ་རྣམས་བསང་། །ཆུ་བོ་ཆུ་མདོ་འབབ་ཆུ་དང་། །ཆུ་མིག་ལ་གནས་ཀླུ་རྣམས་བསང་། །སྐྱེད་མོས་ཚལ་དང་ལྗོན་ཤིང་དང་། །ཤིང་གཅིག་ལ་གནས་ཀླུ་རྣམས་བསང་། །མཚེར་ས་གནས་ཁང་འདི་ཉིད་ལ། །གནས་པའི་ཀླུ་གཉན་ས་བདག་བསང་། ཀྱཻ། སྲིད་པའི་གཉན་རྗེ་གོང་སྔོན་སོགས། །གཉན་རིགས་བྱེ་བ་དུང་ཕྱུར་བསང་། །དབྱི་རྒྱལ་རིན་ཆེན་ལ་སོགས་པའི། །ཕྱོགས་བཞིའི་གཉན་ཆེན་སྡེ་བཞི་བསང་། །སྨོན་སྐྱེས་གང་ཞུར་ལ་སོགས་པའི། །གཉན་ཕྲན་བཞི་བཅུ་རྩ་གཉིས་བསང་། །དབང་ཆེན་ཡབ་ཡུམ་སྲས་གསུམ་སོགས། །སྲིད་པའི་ས་བདག་ཐམས་ཅད་བསང་། །གཉན་ཟ་དཀར་མོ་ཤེལ་འོད་སོགས། །གཉན་གྱི་ལྕམ་མོ་ཐམས་ཅད་བསང་། །ངོམ་རྒྱལ་མཚོ་བཀྲ་ལ་སོགས་པ། །ངོམ་གྱི་རྒྱལ་ཆེན་བཅོ་བརྒྱད་བསང་། །སྐུ་ལྷ་རྒེ་ལ་སོགས་པའི། །ཡུལ་འདིའི་གཞི་བདག་ཐམས་ཅད་བསང་། ཀྱཻ། ཀླུ་ཤིང་ཤུག་པའི་དུད་
པ་ཡིས། །ཀླུ་ནད་རིགས་དགུ་སོས་གྱུར་ཅིག །ཀླུ་ཤིང་བྲ་མའི་དུད་པ་ཡིས། །ཀླུ་ཡི་མཆིན་ནད་སོས་གྱུར་ཅིག །ཀླུ་ཤིང་སེ་བའི་དུད་པ་ཡིས། །ཀླུ་ཡི་སྟོད་ནད་སོས་གྱུར་ཅིག་ཀླུ་ཤིང་སྐྱེར་པའི་དུད་པ་ཡིས། །ཀླུ་ཡི་མཁྲིས་ནད་སོས་གྱུར་ཅིག །ཀླུ་ཤིང་ལྕང་མའི་དུད་པ་ཡིས། །ཀླུ་ནད་གྲུམ་བུ་སོས་གྱུར་ཅིག །ཀླུ་ཤིང་ཉ་བྲིད་དུད་པ་ཡིས། །ཀླུ་ནད་གག་པ་སོས་གྱུར་ཅིག །ཀླུ་ཤིང་སྨྲ་གའི་དུད་པ་ཡིས། །ཀླུ་རྣམས་ཤི་བ་སོས་གྱུར་ཅིག །ཀླུ་ཤིང་སྟག་པའི་དུད་པ་ཡིས། །ཀླུ་རྣམས་མནོལ་བ་སངས་གྱུར་ཅིག །ཀླུ་།ཤིང་སུར་དཀར་དུད་པ་ཡིས། །ཀླུ་ཡི་མགོ་ནད་སོས་གྱུར་ཅིག །ཀླུ་ཤིང་དབྱར་པའི་དུད་པ་ཡིས། །ཀླུ་ཡི་ཡན་ལག་ན་བ་སོས་གྱུར་ཅིག །ཀླུ་ཤིང་ཚར་བའི་དུད་པ་ཡིས། །ཀླུ་ཕྲུག་ན་བ་སོས་གྱུར་ཅིག །ཀླུ་ཤིང་གླ་རྐང་དུད་པ་ཡིས། །ཀླུ་ཡི་རྐང་ནད་སོས་གྱུར་ཅིག །ཀླུ་ཤིང་སྒྲོན་ཤིང་དུད་པ་ཡིས། །ཀླུ་ཡི་མིག་ནད་སོས་གྱུར་ཅིག །ཀླུ་ཤིང་སྤེན་མའི་དུད་པ་ཡིས། །ཀླུ་ཡི་གློ་ནད་སོས་གྱུར་ཅིག །ཀླུ་ཤིང་ས་ལའི་དུད་པ་ཡིས། །ཀླུ་ཡི་མཁལ་ནད་སོས་གྱུར་ཅིག །དཀར་གསུམ་མངར་གསུམ་མཆོད་པ་ཡིས། །ཀླུ་
རྣམས་མཉེས་ཤིང་ཚིམས་གྱུར་ཅིག །འབྲུ་སྣ་མང་པོ་མཆོད་པ་ཡིས། །ཀླུ་ཡི་བང་མཛོད་གང་གྱུར་ཅིག །ཀླུ་སྨན་མང་པོའི་མཆོད་པ་ཡིས། །ཀླུ་ཡི་ནད་རྣམས་སོས་གྱུར་ཅིག །རིན་ཆེན་སྣ་ཚོགས་མཆོད་པ་ཡིས། །ཀླུ་རྣམས་བཀྲག་མདངས་ལྡན་གྱུར་ཅིག །དར་ཚོན་སྣ་ཚོགས་མཆོད་པ་ཡིས། །ཀླུ་རྣམས་གཟི་བརྗིད་ལྡན་གྱུར་ཅིག །ཀྱཻ། ཀླུ་གཉན་ས་བདག་འཁོར་བཅས་རྣམས། །རྣལ་འབྱོར་བདག་ལ་ཚུར་གསོན་དང་། །བདག་དང་ཡོན་བདག་འཁོར་བཅས་རྣམས། །སྐྱེ་བ་ལྔ་བརྒྱའི་གོང་རོལ་ནས། །ད་ལྟའི་དུས་འདི་ཡན་ཆད་དུ། །ཕ་མྱེས་བདུན་བརྒྱུད་མན་ཆད་ནས། །བུ་དང་ཚ་བོ་ཡན་ཆད་ཀྱིས། །ཀླུ་དང་ས་བདག་འཁོར་བཅས་ཀྱི། །ཐུགས་དང་འགལ་བའི་ལས་བགྱིས་པ། །ས་གཉན་བརྐོས་དང་རྡོ་གཉན་རློག །བྲག་གཉན་བཤིགས་སམ་ཤིང་གཉན་བཅད། །ན་གཉན་བརྐོས་སམ་ཆུ་གཉན་དཀྲུགས། །ཞིང་མུ་བཅད་དམ་མཁར་ལས་བྱས། །ལམ་གཉན་བཅད་དམ་ཆུ་ཡུར་དྲངས། །མནའ་གཉན་སྐྱེལ་ལེན་ཐབ་གཞོབ་བྱས། །གཏད་ཁྲམ་དྲག་ལས་གཟེར་མནན་སོགས། །ཚོར་དང་མ་ཚོར་མ་རིགས་
དབང་། །ལས་ཐབས་བྱ་བ་ཅི་ཉེས་པ། །ཐམས་ཅད་གནོང་འགྱོད་མཐོལ་ལོ་བཤགས། །བྱམས་པའི་ཐུགས་ཀྱིས་བཟོད་པར་བཞེས། །རིག་སྔགས་འཆང་བའི་ལྷ་འདྲེ་ཡིས། །བདག་ཅག་ཡོན་མཆོད་འཁོར་བཅས་རྣམས། །ཁྱེད་ཅག་རྣམས་ལ་གཏད་པའམ། །དྲག་པོའི་སྔགས་ཀྱིས་ཟད་ན་ཡང་། །སྐུ་གླུད་བསང་མཆོད་འདི་བཞེས་ཀྱིས། །བཟུང་བ་ཐོངས་ལ་བཅིངས་པ་ཁྲོལ། །གཞན་ཡང་ལས་དང་རྐྱེན་དབང་གིས། །སྔོན་ཆད་གནོད་པ་བྱས་ན་ཡང་། །བསྡམ་པ་ཀློད་ལ་མནན་པ་ཁྱོག །ཕྱིན་ཆད་མི་གནོད་དམ་ཆོས་ཤིག ཀྱཻ། ཀླུ་དང་ས་བདག་གཉན་པོ་རྣམས། །བསང་མཆོད་དམ་པ་འདི་བཞེས་ལ། །བདག་དང་ཡོན་མཆོད་འཁོར་བཅས་ལ། །མི་ལ་ན་ཚ་མ་བཏང་ཞིག །ཕྱུགས་ལ་ཁོད་ཁ་མ་བཏང་ཞིག །ཞིང་ལ་བཙའ་སད་མ་བཏང་ཞིག །ཉིན་གྱི་དུས་སུ་བྱ་ར་གྱིས། །མཚན་གྱི་དུས་སུ་མེལ་ཚེ་གྱིས། །ཁྱེད་རྣམས་ཡུལ་གྱི་ལྷ་ཡིན་ཏེ། །བདག་ནི་ཡུལ་འདིར་གནས་པའི་མི། །མིས་ཀྱང་ལྷ་ཁྱེད་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །གནས་མགྲོན་གཉིས་ཀྱི་དམ་ཚིག་སྲུངས། །མི་ལ་མངོན་ཤེས་སྤྱན་མེད་
པས། །མ་ཤེས་མ་མཁས་ཐུག་ཕོག་ན། །ཁྱེད་ཀྱིས་བཟོད་པ་དང་དུ་བཞེས། །ཀླུ་ཡི་རྒྱལ་པོ་འཁོར་བཅས་ཀྱིས། །བསང་མཆོད་དམ་པ་འདི་བཞེས་ལ། །ཚེ་དང་བསོད་ནམས་འཕེལ་བར་མཛོད། །རྒྱལ་རིགས་ཀླུ་ཡི་མི་གཡང་ཕོབ། །མི་འཕེན་རྟ་ཧྲག་དངོས་གྲུབ་སྩོལ། །རྗེ་རིགས་ཀླུ་ཡི་ནོར་གཡང་ཕོབ། །ནོར་ལུག་དྲེལ་རྟའི་དངོས་གྲུབ་སྩོལ། །བྲམ་ཟེ་ཀླུ་ཡི་བཙན་གཡང་ཕོབ། །ཆོས་སྲིད་དར་བའི་དངོས་གྲུབ་སྩོལ། །གདོལ་པ་ཀླུ་ཡི་རྨ་གཡང་ཕོབ། །བཙན་ཕྱུག་དར་གསུམ་དངོས་གྲུབ་ཀཾ་སྩོལ། །ཆར་ཆུ་དུས་འབེབས་ལོ་ལེགས་ཤིང་། །ཚེ་རིང་ནད་མེད་ལོངས་སྤྱོད་ལྡན། །བསམ་པ་འགྲུབ་པའི་དངོས་གྲུབ་སྩོལ། །གཤེགས་གསོལ་བྱ་བ་ནི། སྤྱན་དྲངས་ཀླུ་གཉན་ས་བདག་ཀུན། །རང་རང་ཕོ་བྲང་གནས་སུ་གཤེགས། །རྟག་ཏུ་སྤུན་དང་གྲོགས་ལྟ་བུར། །བྱམས་པའི་སེམས་ཀྱིས་སྡོང་གྲོགས་མཛོད། །འདི་ལྟར་བསང་མཆོད་དགེ་བ་འདིས། །ཀླུ་དང་ས་བདག་ལ་སོགས་པ། །ཁམས་གསུམ་སེམས་ཅན་ཐམས་ཅད་ཀུན། །རྟག་ཏུ་བདེ་སྐྱིད་ལྡན་པ་དང་། །མྱུར་དུ་རྫོགས་སངས་རྒྱས་པར་ཤོག །སྣོད་
བཅུད་རང་ཐིམ་རང་ཉིད་ཀྱང་། །ཐུགས་ཀའི་ཧཱིཐིམ་དེ་ཡང་ཡལ། །ཀླུ་རྒྱལ་སངས་རྒྱས་བཅོམ་ལྡན་འདས། །ཀླུ་ལ་ཕན་བྱེད་བདེ་གཤེགས་ཐུགས། །ཀླུ་རྣམས་ཀུན་གྱི་སེམས་རྒྱུད་དང་། །རང་སེམས་འོད་གསལ་སྟོང་ཉིད་གསུམ། །དབྱེར་མེད་ཆོས་ཀྱི་དབྱིངས་སུ་ཅིག །བསང་བྱ་བསང་བྱེད་བྲལ་བའི་བསང་། །འཁོར་གསུམ་དག་པའི་བསང་མཆོད་འདིས། །འཁྲུལ་པའི་དྲི་མ་ཀུན་སངས་ནས། །བདེ་ཆེན་ཆོས་སྐུར་ལྷུན་གྱིས་གྲུབ། །སརྦ་སིདྡྷི་ཕ་ལ་ཧཱུྃ་སྭཱ་ཧཱ། ཀླུ་ཡི་བསང་མཆོད་མདོར་བསྡུས་ཆ་ཚང་འདི། །ཀླུ་ཡི་གནོད་འཚེ་ཆོ་འཕྲུལ་ཆེ་རྣམས་ལ། །ཕན་པར་གྱུར་སྙམ་བསམ་པ་བཟང་པོ་ཡིས། །༧ རཱ་གའི་མིང་ཅན་དགེ་སློང་དེ་ཡིས་བྲིས། །འདི་ལ་འགལ་འཁྲུལ་ཉེས་པ་ཅི་མཆིས་པ། །ཀླུ་རྒྱལ་བཅོམ་ལྡན་འཁོར་དང་བཅས་ལ་བཤགས། །དགེ་བས་འགྲོ་ཀུན་ཀླུ་ཡི་ནད་གནོད་ཞི། །ཚེ་འདིར་བདེ་སྐྱིད་རྒྱ་མཚོས་འགྲོ་ཀུན་ཚིམས། །ཕྱི་མ་བདེ་ཆེན་ཞིང་དུ་སྐྱེ་ཕྱིར་བསྔོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།