ཀླུ་བསང་བདུད་རྩི་འཁྱིལ་བའི་རྦ་རླབས་རིན་པོ་ཆེའི་འབྱུང་གནས།
ཀླུ་བསང་བདུད་རྩི་འཁྱིལ་བའི་རྦ་རླབས་རིན་པོ་ཆེའི་འབྱུང་གནས་བཞུགས་སོ།
ཧཱུྃ། རང་ཉིད་ཐུགས་རྗེ་ཆེན་པོ་སྤྱན་རས་གཟིགས། །གསལ་བའི་ཐུགས་ལས་རཾ་ཡཾ་ཁཾ་གསུམ་འཕྲོས། །མཆོད་རྫས་མི་གཙང་འབག་བཙོག་དྲི་མ་སྦྱངས། །ཨ་སྟོང་པའི་ངང་ལས་ཧཱུྃ་ཡིག་ལས་བྱུང་བའི། །དུ་བའི་ལྷ་མོ་སྔོན་མོ་ལང་ཚོ་རྒྱས། །སྣ་ཚོགས་རྒྱན་ལྡན་བཞེངས་པའི་སྟབས་ཀྱིས་བཞུགས། །ཕྱག་གཡས་ཁྲུས་བུམ་མི་གཙང་ཉམས་གྲིབ་འཁྱུད། །གཡོན་པས་སྨན་གཞོང་སྨན་གྱི་སྤོས་སྤྲིན་འཁྲིགས། །རབ་འབྱམས་རྒྱལ་བའི་ཞིང་རྣམས་མ་ལུས་པ། །སྤོས་ཀྱི་འཁྲི་ཤིང་དྲྭ་བས་ཡོངས་སུ་ཁྱབ། །དུ་བའི་ཆ་ཤས་རེ་རེའི་གསེབ་ནས་
ཀྱང་། །འདོད་ཡོན་ལྔ་དང་རྒྱལ་སྲིད་རིན་ཆེན་བདུན། །ཅི་འདོད་ལོངས་སྤྱོད་མཁོ་རྒུའི་ཆར་རྒྱུན་འབེབས། །འདི་འདྲའི་ངོ་མཚར་བསང་མཆོད་རྒྱ་ཆེན་འདིས། །སྔོན་ཚེ་རྒྱལ་བ་ཤཱཀྱ་ཐུབ་པ་ཉིད། །རྒྱལ་པོ་ཆོས་ཀྱི་དབང་ཕྱུག་གྱུར་པའི་ཚེ། །བདེ་བར་གཤེགས་པ་འོད་ཟེར་མཐའ་ཡས་ལ། །བསང་གི་མཆོད་པ་ཕུལ་བ་ཅི་བཞིན་དུ། །དེང་འདིར་བདག་གིས་རྒྱལ་བ་སྲས་བཅས་བསང་། །ཁྱད་པར་སྤྲིན་ཆེན་མདོ་ལས་གསུངས་པ་ཡི། །ཀླུ་ལ་ཕན་བྱེད་སངས་རྒྱས་མ་ལུས་པ། །འདིར་གཤེགས་ནམ་མཁའ་བར་སྣང་གང་བར་བཞུགས། །དངོས་
འབྱོར་ཡིད་སྤྲུལ་མཆོད་པ་དཔག་མེད་འབུལ། །ཀླུ་ཡི་ནད་དང་སྡུག་བསྔལ་ཞི་བར་མཛོད། །བཅོམ་ལྡན་རྣམ་སྣང་སྙིང་པོའི་སྤྲིན་ཆེན་དང་། །ཀླུ་རིགས་ལས་བྱུང་སྤྲིན་གྱི་རྣམ་མཛེས་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སྤྲིན་ཆེན་ཆུ་འཛིན་སྤྲིན་གྱི་གཟི་བརྗིད་དང་། །སྤྲིན་ཆེན་འབྱུང་ཞེས་བྱ་བའི་སངས་རྒྱས་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །བདེ་གཤེགས་རླུང་དཀྱིལ་རྣམ་འཇོམས་སྤྲིན་དང་ནི། །སྤྲིན་ཆེན་གློག་འོད་མཐུ་རྩལ་དཔའ་བོ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་ནམ་མཁའ་དཔག་མེད་ནམ་འོད་འཕྲོ། །སངས་རྒྱས་སྤྲིན་མཛེས་སྤྲིན་སྡུག་ཆེན་པོ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །བདེ་གཤེགས་སྤྲིན་གྱི་དཀྱིལ་འཁོར་སྤྲིན་འོད་དང་། །སྤྲིན་ཆེན་སེང་གེ་དང་ནི་སྤྲིན་གདུགས་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་
ཞི་བར་མཛོད། །སངས་རྒྱས་བལྟས་སྡུག་སྤྲིན་ཆེན་སྤྲིན་ཁེབས་དང་། །སྤྲིན་འབྱུང་ཕྱོགས་བཅུར་འགེངས་པའི་སྒྲ་སྒྲོག་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་བསིལ་འབྱུང་མི་དགའ་རབ་འཇོམས་སྒྲོགས། །སྤྲིན་ཆེན་བརྡལ་བ་གང་གཱའི་ཆུ་སྤྲིན་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་འབྲུག་སྒྲ་སྒྲོག་དང་སྤྲིན་སྟོན་དང་། །ཆུ་སྤྲིན་རྩལ་ལྟར་རབ་རྒྱས་དཔའ་བོ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །བདེ་གཤེགས་སྤྲིན་རྒྱ་ཆེ་དང་སྤྲིན་ཆུ་འཛག །སྤྲིན་ལྟར་རྣམ་སྒྲོགས་སྤྲིན་སྦྱངས་སྤྲིན་སྐུ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་སྤྲིན་འཕགས་སྤྲིན་གྱི་ན་བཟའ་དང་། །སྤྲིན་གནས་ལ་གནས་སྤྲིན་སྟོན་བསྒྲུབ་པ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །བདེ་གཤེགས་སྤྲིན་གྱི་ལོ་ཐོག་བསྐྱེད་པ་
དང་། །སྤྲིན་གྱི་མེ་ཏོག་སྤྲིན་གྱི་ཐོག་བསྐྲུན་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་སྤྲིན་ལྟར་མཐོ་དང་སྤྲིན་རྣམས་འཐོར། །སྤྲིན་ཆེན་རབ་གཡོས་སྤྲིན་རྣམས་རྒྱས་པ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །རྒྱལ་བ་ཆར་གྱི་སྤྲིན་དང་སྤྲིན་འདུ་མཛད། །སྤྲིན་གྱི་ཨུ་དུམ་སྤྲིན་རི་བརྩེགས་པ་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་སྤྲིན་ཆེན་བྱིན་དང་སྤྲིན་ས་བོན། །སྤྲིན་ཆེན་རབ་འཕགས་སྤྲིན་གྱི་དབང་ཕྱུག་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སྤྲིན་ཆེན་མེ་ཏོག་བཀྲམ་དང་སྤྲིན་ཆོས་སྐུ། །སྤྲིན་ཆེན་རབ་འཕགས་སྤྲིན་གྱི་དབང་ཕྱུག་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །སངས་རྒྱས་སྤྲིན་ཆེན་རྣམ་བསྒྲུབ་སྤྲིན་གྱི་དཔལ། །གཟི་བརྗིད་འོད་འབྱུང་སྤྲིན་གྱི་འོད་ཟེར་ལ། །ཕྱག་འཚལ་གཡུ་ཤུག་ཕྱེ་མར་དུད་པས་
མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །ཀླུ་དབང་རྒྱལ་པོ་ཀླུ་རིགས་སྒྲོན་མེ་དང་། །ཀླུ་ཡི་རྒྱལ་པོ་སངས་རྒྱས་བཅོམ་ལྡན་ལ། །ཕྱག་འཚལ་གཡུ་ཤུག་ཕྱེ་མར་དུད་པས་མཆོད། །ཀླུ་ཡི་ནད་དང་སྡུག་བསྔལ་ཞི་བར་མཛོད། །དེ་བཞིན་གཤེགས་པ་ཁྱེད་རྣམས་མཆོད་པའི་མཐུས། །སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ། །གནས་འདིར་གནས་པའི་ཀླུ་གཉན་ས་བདག་གི །ནད་དང་སྡུག་བསྔལ་ཐམས་ཅད་རབ་ཞི་ནས། །བདེ་སྐྱིད་བཀྲག་མདངས་རྒྱས་པར་བྱིན་གྱིས་རློབས། །ཧཱུྃ། རི་རབ་རི་བྲན་ཀུན་གྱི་སྟེང་ཤོད་དང་། །རྒྱ་མཚོ་མཚོ་བྲན་རྣམས་ཀྱི་ཁ་ཞབས་དང་། །སྟོང་གསུམ་འཛམ་གླིང་ཀུན་གྱི་མཐའ་དབུས་ནས། །ཀླུ་གཉན་ས་བདག་མ་ལུས་འཁོར་བཅས་རྣམས། །བདག་གིས་བསང་མཆོད་འབུལ་ཕྱིར་སྤྱན་འདྲེན་ན། །དུག་ལྔ་ཞེ་སྡང་སེམས་ཀྱིས་མ་འབྱོན་པར། །བྱམས་དང་སྙིང་རྗེ་དགའ་བའི་སེམས་ཀྱིས་ནི། །གློག་ལྟར་མྱུར་བའི་ཡིད་ཀྱིས་འདིར་གཤེགས་ཤིག །ཀླུ་ཡི་རྒྱལ་པོ་བཙུན་མོ་གཡོག་འཁོར་བཅས། །གནས་འདིར་གནས་པའི་ཀླུ་རྣམས་མྱུར་དུ་བྱོན། །ཡིད་སྤྲུལ་གཙོ་འཁོར་
འཚམས་པའི་གདན་ལ་བཞུགས། །སྔོན་ཚེ་ཤཱཀ་ཐུབ་གསང་བདག་པད་འབྱུང་གི །སྤྱན་སྔར་ཁས་བླངས་དམ་ཚིག་དྲན་མཛོད་ལ། །བདག་གིས་བཅོལ་བའི་ལས་རྣམས་མྱུར་དུ་སྒྲུབས། །དངོས་འབྱོར་ཡིད་སྤྲུལ་བསང་མཆོད་དམ་པ་འདི། །བདག་གིས་རབ་ཏུ་གུས་པས་ཕྱག་འཚལ་བསྟོད། །ཀླུ་གདོན་ཀླུ་ཐེའུ་སྒབ་འདྲེའི་རིགས་རྣམས་ཀུན། །དུ་བའི་ཟེར་མ་ཙམ་གྱིས་ཚིམས་གྱིས་ལ། །འདི་རུ་མ་འདུག་མྱུར་བར་གཞན་དུ་དེངས། །བདེ་གཤེགས་ཀླུ་དབང་རྒྱལ་པོའི་སྤྲུལ་པ་སྟེ། །ཀླུ་ཡི་རྒྱལ་པོ་སྔགས་བདག་སོག་མ་མེད། །གསེར་མདོག་སྦྲུལ་མགོ་བདུན་གྱི་གདེངས་ཀ་ཅན། །བརླ་གཉིས་ལྟོ་འཕྱེ་སྦྲུལ་གྱི་མཇུག་མས་དཀྲིས། །བཙུན་མོ་མཆོག་དང་སྲས་པོ་རི་བོ་སོགས། །འཁོར་ཚོགས་དྲུག་ཁྲི་ཡང་འཁོར་བཅས་པ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་ངོ་བོ་ཛཾ་ལྷ་སེར་པོ་སྟེ། །བདག་ལ་ལོངས་སྤྱོད་ནོར་གྱི་དངོས་གྲུབ་སྩོལ། །འཕགས་མཆོག་སྤྱན་རས་གཟིགས་ཀྱི་སྤྲུལ་པ་སྟེ། །ཀླུ་ཡི་རྒྱལ་པོ་ནོར་རྒྱས་དུང་གི་མདོག །གདེངས་ཀ་བདུན་ལྡན་སྦྲུལ་མཇུག་གཡས་
སུ་འཁྱིལ། །བཙུན་མོ་གཡོག་འཁོར་བྱེ་བ་གྲངས་མེད་བཅས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་གར་བཞུགས་ལོངས་སྤྱོད་འཕེལ་བའི་ལྷ། །གནས་འདིར་བཞུགས་ལ་བདག་གི་མི་ནོར་སྤེལ། །གསང་བདག་ཕྱག་ན་རྡོ་རྗེའི་སྤྲུལ་པ་སྟེ། །ཀླུ་ཡི་རྒྱལ་པོ་དགའ་བོ་མཐིང་གསལ་སྐུ། །གདེངས་ཀ་སྦྲུལ་མཇུག་རབ་འཁྱིལ་འཁོར་གཡོག་བཅས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་ཁས་གྲགས་སྟོབས་ཤུགས་རྒྱས་བྱེད་ལྷ། །བདག་ལ་བཙན་ཕྱུག་དར་གསུམ་དངོས་གྲུབ་སྩོལ། །འཕགས་པ་འཇམ་དཔལ་དབྱངས་ཀྱི་སྤྲུལ་པ་སྟེ། །ཀླུ་ཡི་རྒྱལ་པོ་འཇོག་པོ་གསེར་གྱི་མདོག །རིན་ཆེན་གཙུག་ཕུད་སྦྲུལ་མཇུག་གདེངས་ཀ་ལྡན། །རྗེ་རིགས་ཀླུ་གཉན་མང་པོའི་གཡོག་དང་བཅས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་བསོད་ནམས་ལོངས་སྤྱོད་འཕེལ་བའི་ལྷ། །བདག་ལ་ཕུན་སུམ་ཚོགས་པའི་དངོས་གྲུབ་
སྩོལ། །རྒྱ་གར་ཡུལ་གྱི་ཆུ་བོ་གང་གཱ་དང་། །བོད་ཡུལ་སྨར་ཁམས་ཆུ་མིག་དཀར་པོ་ནས། །བཅོམ་ལྡན་འཇམ་དཔལ་དབྱངས་ཀྱི་སྤྲུལ་པ་སྟེ། །ཀླུ་ཡི་རྒྱལ་པོ་མི་མགོན་དཀར་པོ་ནི། །དུང་མདོག་གདེངས་ཀ་བདུན་ལྡན་སྦྲུལ་མཇུག་ཅན། །ཕྱག་གཉིས་ཐལ་སྦྱར་བར་དུ་གཏེར་བུམ་འཛིན། །རྒྱལ་རིགས་ཀླུ་གཉན་མང་པོའི་འཁོར་དང་བཅས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་མི་ནོར་འཕེལ་བྱེད་ལྷ་ཡིན་ཏེ། །བདག་ལ་མི་འཕེན་རྟ་ཧྲག་དངོས་གྲུབ་སྩོལ། །རྒྱ་མཚོ་ཆེ་དང་རོལ་པའི་མཚོ་བདུན་ནས། །འཇིག་རྟེན་འདས་ཀྱང་ཀླུ་ཡི་ཚུལ་བཟུང་ནས། །དཀྱིལ་འཁོར་ཀུན་གྱི་མཐའ་སྐྱོང་བསྟན་པ་སྲུངས། །འཇིག་རྟེན་སྐྱོང་བའི་དཔལ་མགོན་ཆེན་པོ་སྟེ། །བཙུན་མོ་སྲས་དང་གཡོག་འཁོར་བཅས་པ་ཀུན། །ཁ་དོག་ནག་པོ་གདེངས་ཀ་སྦྲུལ་མཇུག་ཅན། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་ཀླུ་རིགས་ཀུན་གྱི་རྗེ་བོ་སྟེ། །འཁོར་རྣམས་ཀུན་ལ་བཀའ་ནན་མ་ཆུང་ལ། །བདག་དང་ཡོན་
བདག་མི་ནོར་འཁོར་བཅས་ལ། །ཀླུ་ཡི་ནད་དང་གནོད་པ་མ་གཏོང་ཞིག །སྟོང་གསུམ་འཇིག་རྟེན་ཆེན་པོའི་ཕ་མཐའ་ནས། །ས་བཅུའི་སེམས་དཔའ་ཀླུ་རྣམས་ཀུན་གྱི་བདག །གཡོག་མཐའ་ཡས་ཞེས་ལག་འགྲོ་ཆེན་པོ་ཁྱེད། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་ནི་ཀླུ་རྣམས་ཀུན་གྱི་བདག་པོ་སྟེ། །གནས་འདིའི་ཀླུ་ཡང་གཞན་དུ་མི་འཁྱལ་བར། །གནས་འདིར་རྟག་ཏུ་གནས་པའི་བཀའ་ལུང་བྱིན། །དབུས་གཙང་གནས་ཆེན་བརྒྱད་དང་ཁམས་ཕྱོགས་ཀྱི། །ཆུ་ཆེན་བཅོ་བརྒྱད་ཀུན་ལ་དབང་བསྒྱུར་བའི། །ས་བརྒྱད་ལ་གནས་སེམས་དཔའ་ཆེན་པོ་སྟེ། །སྨྱོ་ཁ་ཞེས་བྱ་རྡོ་རྗེ་རྒྱལ་པོ་ནི། །ཡུམ་ཆེན་ཀླུ་མོ་ན་རསིང་སྔོན་དང་། །ཀླུ་ཆེན་མིང་སྲིང་བར་བློན་ཆེན་པོ་སོགས། །ཀླུ་བདུད་ཀླུ་བཙན་མང་པོའི་འཁོར་དང་བཅས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་ཅག་འཁོར་བཅས་ཐུགས་དང་གང་འགལ་བ། །མཐོལ་ལོ་བཤགས་སོ་བཟོད་པར་མཛད་ནས་ཀྱང་། །བདག་ཅག་ཡོན་མཆོད་
འཁོར་དང་བཅས་པ་ལ། །ཆུ་གྲི་འཁྲུགས་གག་ལྷོག་པ་མ་གཏོང་ཞིག །གངས་རི་བྲག་དཀར་རྫ་རི་དཀར་པོ་དང་། །མེ་ཏོག་ཆུ་གནས་ཁ་དོག་དཀར་གསལ་ཞིང་། །ཤར་གྱུའི་ཆུ་མིག་མཚོ་སྒོ་ཤར་བསྟན་ནས། །རྒྱལ་རིགས་ཀླུ་རྒྱལ་དཔག་ཏུ་མེད་པ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་དཀར་ཕྱོགས་ཆོས་ལ་དགའ་བ་སྟེ། །བདག་གི་དམ་ཆོས་སྒྲུབ་པའི་སྡོང་གྲོགས་མཛོད། །སྤང་རི་རྫ་བྲག་སེར་པོ་རྩི་ཤིང་ཕྱུག །མེ་ཏོག་སེར་དང་ཆུ་གནས་སེར་པོ་མང་། །མཚོ་སྒོ་ལྷོར་བསྟན་ཆུ་མིག་ལྷོར་ལྟ་ནས། །རྗེ་རིགས་ཀླུ་རྒྱལ་དཔག་ཏུ་མེད་པའི་ཚོགས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་ལོངས་སྤྱོད་འཕེལ་བའི་ཀླུ་ཡིན་པས། །བདག་ལ་ཀླུ་གཡང་དངོས་གྲུབ་ཆར་ལྟར་ཕོབ། །རྫ་རི་བྲག་རི་དམར་དང་ས་མདོག་དམར། །ལྗོན་ཤིང་མེ་ཏོག་དམར་ཤས་ཆུ་གནས་དམར། །མཚོ་དང་ཆུ་མིག་ནུབ་ལྟ་ཐམས་ཅད་ནས། །བྲམ་ཟེ་ཀླུ་རིགས་དཔག་ཏུ་མེད་པ་རྣམས། །འདིར་གཤེགས་
དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་རྣམ་རྟོག་རྩེ་རིག་སྐྱོན་པའི་རིགས། །ཐུགས་དང་འགལ་བར་གྱུར་ན་བཟོད་པར་གསོལ། །རི་ནག་བྲག་ནག་རྫ་རི་ནག་པོ་དང་། །ཤིང་ནག་ཚེར་ནག་མེ་ཏོག་སྔོན་པོ་མང་། །སྲོག་ཆགས་ཆུ་གནས་ནག་པོ་མང་བ་དང་། །མཚོ་སྒོ་ཆུ་མིག་བྱང་དུ་ལྟ་བ་ནས། །གདོལ་པའི་ཀླུ་རིགས་དཔག་ཏུ་མེད་པ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་ཞེ་ནག་གདུག་པ་ཆེ་བའི་རིགས། །བདག་ཅག་ཡོན་མཆོད་མི་ནོར་ཐམས་ཅད་ལ། །གནོད་འཚེ་ན་ཚ་གོད་ཁ་མ་གཏོང་ཞིག །རི་བྲག་ཁ་དོག་མ་ངེས་སྣ་ཚོགས་ལ། །ལྗོན་ཤིང་མེ་ཏོག་སྣ་ཚོགས་ཅིར་ཡང་འཁྲུངས། །ཆུ་གནས་སྣ་ཚོགས་ཁ་དོག་མ་ངེས་ཤིང་། །མཚོ་སྒོ་ཆུ་མིག་མཚམས་བཞིར་བསྟན་པ་ནས། །ཀླུ་རིགས་སྣ་ཚོགས་གཉན་དང་ས་བདག་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །བསམ་བཞིན་ཁྱེད་ལ་གནོད་པ་མ་
བྱས་ཀྱང་། །ཕོག་ཐུག་འགྲམ་འཁྲུག་བྱུང་ན་བཟོད་པར་བཞེས། །ཤིང་ཆེན་ལང་ལོང་ན་མིག་ནེའུ་སིང་དང་། །ཆུ་མིག་ལང་ལོང་ཆུ་རྐང་གཉིས་གསུམ་ལྡང་། །ཕ་ཝང་ཐག་ཐུག་མཚོ་ཆུང་ཁྲོན་པ་ནས། །ཀླུ་བྲན་ས་བདག་དབུལ་ཕོངས་གཉོམ་ཆུང་རིགས། །ཞ་བོ་ལོང་བ་འོན་པ་ལྐུགས་པ་དང་། །ནད་ཅན་ཀླུ་དང་ས་བདག་ཕྲན་བུ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་རྣམས་གནོད་ལེན་ཕན་ལེན་སྐྱེན་པའི་རིགས། །ཕོག་ཐུག་གནོད་པ་བྱུང་ན་མཐོལ་ལོ་བཤགས། །ཁྱེད་ཅག་ནད་དང་སྡུག་བསྔལ་ཞི་གྱུར་ཅིག །རང་རང་ཅི་ལྟར་ནུས་པའི་དངོས་གྲུབ་བྱིན། །རྒྱ་མཚོ་ཆེ་དང་རོལ་པའི་མཚོ་བདུན་དང་། །ངོམ་སྨད་ཀླུ་ཐོ་ཆུ་མིག་ལ་གནས་པའི། །ཀླུ་ཡི་རྒྱལ་པོ་གཙུག་ན་རིན་ཆེན་ནི། །གསེར་མདོག་སྦྲུལ་མགོ་སྟོང་གི་གདེངས་ཀ་ཅན། །རིན་ཆེན་གཙུག་རྒྱན་སྦྲུལ་མཇུག་གཡས་སུ་འཁྱིལ། །ཕྱག་གཉིས་ཐལ་སྦྱར་བར་དུ་ནོར་བུ་བསྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ནི་ནོར་གཡང་
འཕེལ་བྱེད་ཀླུ་ཡིན་པའི། །བདག་ལ་རྐང་བཞི་ཕྱུགས་ཀྱི་དངོས་གྲུབ་སྩོལ། །ཀླུ་རྒྱལ་སྤོར་མཐོ་ཞེས་བྱ་ཀླུ་གཉན་རིགས། །དུང་མདོག་སྦྲུལ་མགོ་སྟོང་ལྡན་དར་དཀར་གསོལ། །སྦྲུལ་མཇུག་དཀར་དཀྲིས་ཁྲི་སྟེང་སྐྱིལ་ཀྲུང་བཞུགས། །ངོམ་ཡུལ་སྨད་ཀྱི་བདག་པོ་ཁྱོད་ཡིན་པས། །བདག་ལ་ཁ་འཛིན་སྡོང་གྲོགས་མེལ་ཚེ་མཛོད། །ངོམ་ཡུལ་སྨད་ཀྱི་ཆུ་ལ་དབང་སྒྱུར་བའི། །འཇིག་རྟེན་འདི་ན་མཚོ་ནག་མཚོ་སྨན་ཟེར། །རྡོ་རྗེ་ཕུར་པའི་བཀའ་སྲུང་མཐུ་མོ་ཆེ། །མོན་མོ་སྦྲུལ་གྱི་མགོ་ཅན་ཞེས་བྱ་བ། །རྫུ་འཕྲུལ་སྟོབས་ཀྱིས་ཆ་ལུགས་མ་ངེས་ཀྱང་། །ཞི་བར་བསྟན་ཚེ་སྨན་བཙུན་མཛེས་མའི་གཟུགས། །ཕྱག་ན་སྦ་གླིང་འབུད་ཅིང་མེ་ལོང་ལྟ། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱོད་ཀྱང་མཐུ་ཆེན་དངོས་གྲུབ་བདག་མོ་སྟེ། །མི་ལ་ནཱ་ག་ཀླུ་ཡི་གཡང་ཕོབ་ཅིག །ཙོ་རྒྱལ་ལྷ་ཞོལ་འདོས་སྣ་ཆུ་མིག་ཡི། །ཆུ་མིག་མགོ་མང་ལ་གནས་ཀླུ་ཡི་རྒྱལ། །བདུད་རྩི་འབུམ་ཞེས་དུང་མདོག་སྦྲུལ་མཇུག་ཅན། །གདེངས་ཀ་བཅུ་གསུམ་རྩེ་ལ་རྡོ་རྗེའི་མཚན། །དེ་སོགས་ཆུ་སྲིབ་
ལ་གནས་ཀླུ་རིགས་ཀུན། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །རྒྱང་ལེན་སྐྱེན་པོའི་འབེན་དང་འདྲ་བའི་ཕྱིར། །ཕ་རིའི་ཀླུས་ཀྱང་ཚུར་རིའི་སྡོང་གྲོགས་མཛོད། །དཀར་པོ་ཆམ་མཛེས་ལ་སོགས་རྒྱལ་རིགས་དང་། །ནག་པོ་སྦལ་མཛེས་ལ་སོགས་གདོལ་པའི་རིགས། །ཁྲ་བོ་ཉ་མགོ་ལ་སོགས་གཉན་རིགས་ཀྱི། །ཀླུ་རྣམས་མ་ལུས་འཁོར་དང་བཅས་པ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །འགལ་རྐྱེན་བར་ཆད་སོལ་ལ་མཐུན་རྐྱེན་སྒྲུབས། །བྱང་དྲག་མོ་མོ་མཆེད་གསུམ་གསའ་གཡས་དང་། །ཁ་ཙོ་འོ་ཙེ་རུ་གུག་ལ་སོགས་པ། །ས་ཕྱོགས་འདིར་གནས་ས་བདག་ཡུལ་ལྷ་རྣམས། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱེད་ཅག་རྣམས་ནི་ཡུལ་འདིར་གནས་པའི་ལྷ། །བདག་ཅག་ཡོན་མཆོད་ཡུལ་འདིར་གནས་པའི་མི། །ལྷས་ཀྱང་མི་ལ་ཁ་འཛིན་སྡོང་གྲོགས་མཛོད། །མིས་ཀྱང་ལྷ་ལ་དུས་སུ་མཆོད་པ་འབུལ། །འདིར་གཤེགས་
དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཁྱད་པར་རྗེའི་ཞེས་བྱ་བ། །གནས་འདིར་གཉུག་མར་གནས་པའི་ཀླུ་ཁྱེད་ནི། །གཞན་དུ་མ་འབྲོས་མ་འཁྱམ་མ་སྐྲག་པར། །འདིར་གཤེགས་དཀར་གསུམ་ཀླུ་སྨན་མཆོད་པ་བཞེས། །ཤིང་རྩི་ཕྱེ་མར་གསུར་གྱི་དུད་པས་བསང་། །ཕོག་ཐུག་འགལ་བ་བྱུང་ན་བཟོད་པར་གསོལ། །བདག་གིས་དྲག་སྔགས་སྒོམ་བཟླས་བྱེད་པ་ཡང་། །ཁྱོད་ལ་གནོད་པ་བྱེད་པ་མ་ཡིན་པས། །མ་སྐྲག་མ་སྔངས་མ་བྲོས་བརྟན་པར་བཞུགས། །གནས་པོ་ཁྱོད་ལ་བདག་གིས་མཆོད་ཅིང་བསྟོད། །ཁྱོད་ཀྱང་ཅི་ལྟར་ནུས་པའི་སྡོང་གྲོགས་མཛོད། །གནས་མགྲོན་གཉིས་ཀྱི་དམ་ཚིག་སྲུང་བར་གྱིས། །ཀླུ་ཡི་པའི་རྒྱལ་པོ་སྲས་དང་བཙུན་མོ་དང་། །འཁོར་གཡོག་ཡང་འཁོར་ས་བདག་ཁྱེད་རྣམས་ལ། །དཀར་གསུམ་ཞོ་དང་འོ་མའི་ཕུད་ཀྱིས་མཆོད། །མངར་གསུམ་འབྲུ་སྣ་སྣ་ཚོགས་ཁྱེད་ལ་འབུལ། །ཀླུ་སྨན་སྣ་ཚོགས་བདུད་རྩིས་ནད་རྣམས་གསོ། །ཇ་ཆང་ཟས་ཕུད་སྣ་ཚོགས་ཁྱེད་ལ་འདྲེན། །བཟང་ཤིང་སྣ་ཚོགས་དུད་པས་རྨུགས་པ་བསང་། །དཀར་གཏོར་རྒྱན་
དང་ལྡན་པའི་བ་ལི་བསྔོ། །དར་ཟབ་ཤེལ་ཚིགས་རིན་ཆེན་དཀོར་དུ་འབུལ། །ཁྱེད་ཅག་འཁོར་བཅས་མཉེས་ཤིང་ཚིམས་གྱུར་ཅིག །བདག་གི་ཕ་མྱེས་བདུན་བརྒྱུད་ཚུན་ཆད་ནས། །བུ་དང་ཚ་བོ་ཡང་ཚ་ཡན་ཆད་ལ། །བདག་ཅག་ཡོན་མཆོད་འཁོར་དང་བཅས་པ་ཡི། །སྐྱེ་བ་འདི་དང་སྔ་མ་ཡང་སྔ་ཚུན། །ཀླུ་དང་ས་བདག་ཐུགས་དང་ཅི་འགལ་བ། །མཐོལ་ལོ་བཤགས་སོ་བྱང་ཞིང་དག་གྱུར་ཅིག །ཤིང་གཉན་བཅད་དང་ས་གཉན་བརྐོས་པ་དང་། །བྲག་གཉན་ཕ་བོང་བཤིགས་དང་རྫོགས་པ་དང་། །ཆུ་གཉན་ཡུར་དྲངས་ན་གཉན་བརྐོས་པ་དང་། །བྱ་དང་རི་དྭགས་ཆུ་གནས་བསད་པ་དང་། །རོ་བག་དྲངས་ཉེས་དུར་ས་ཉེས་པ་དང་། །ཞིང་མུ་ཕེད་དང་མཁར་ལས་བྱས་ཉེས་དང་། །འཐབ་འཁོན་བཙོག་ནལ་མི་གཙང་གཡོས་པ་དང་། །མནའ་གཉན་སྐྱལ་ལེན་དཔང་པོ་བྱས་ལ་སོགས། །ཁྱེད་ཅག་ཐུགས་དང་འགལ་བ་གང་བྱས་བཤགས། །འཁོན་པ་སྣུམ་ལ་འགྲས་པ་ཐམས་ཅད་སྦྱངས། །སྔོན་ཚེ་ཁྱུང་དང་གཙུག་ན་རིན་ཆེན་གཉིས། །དང་པོ་འཁོན་ཡང་ཤཱཀྱ་ཐུབ་པས་སྡུམས། །དེ་བཞིན་བདག་དང་ཡོན་བདག་འཁོར་དང་བཅས། །ཀླུ་དང་
ས་བདག་འཁོན་པ་དེ་རིང་སྡུམས། །ཀླུ་རྒྱལ་དུང་གཙུག་བྱ་ཁྱུང་གསེར་མིག་ཅན། །དང་པོ་འཁོན་ཡང་ཐ་མ་འདུམ་པར་བྱས། །རྒྱལ་པོ་ཨ་ཤོ་ཤང་ཀ་རུ་ར་ཀླུ། །དང་པོ་འཁོན་ཡང་ཐ་མ་གྲོགས་པོར་གྱུར། །རྒྱལ་པོ་མ་ཏ་འཛམ་གླིང་བསྟན་པའི་ཀླུ། །དང་པོ་འཁོན་ཡང་ཐ་མ་དུམ་པར་བྱས། །མཁའ་ལྡིང་འཇིགས་བྱེད་ཀླུ་གླང་བཙན་བཙུན་གཉིས། །དང་པོ་འཁོན་ཡང་ཐ་མ་དུམ་པར་གྱུར། །རྒྱལ་པོ་དར་མ་ཨ་ཤོ་ཞེས་བྱ་དང་། །ཀླུ་ནི་སྲིད་པའི་ཁང་བསྟན་ཞེས་བྱ་གཉིས། །དང་པོར་འཁོན་ཡང་ཐ་མ་དུམ་པ་ལྟར། །སྔོན་གྱི་སྲིད་པའི་དཔེ་ལུང་དེ་བཞིན་དུ། །བདག་དང་ཡོན་བདག་འཁོར་དང་བཅས་པ་རྣམས། །ཀླུ་དང་ས་བདག་གཉན་པོ་ཁྱེད་རྣམས་དང་། །སྔར་ནས་འཁོན་དང་འགྲས་པའང་མ་མཆིས་ལ། །གལ་ཏེ་ཡོད་ན་འཁོན་པ་དེ་རིང་སྡུམས། །འགྲས་པ་ཡོད་ན་འགྲས་པ་དེ་རིང་སྦྱངས། །བསང་དང་མཆོད་པ་སྣ་ཚོགས་ཆས་སུ་འཇལ། །སྨྲས་འགྲམ་ནད་དུ་གྱུར་པ་སྨན་གྱིས་གསོ། །ཁྱེད་རྣམས་ནད་དང་སྡུག་བསྔལ་ཀུན་བྲལ་ནས། །བཀྲག་མདངས་མཐུ་སྟོབས་གཟི་བརྗིད་འཕེལ་གྱུར་ཅིག །དེ་ལྟར་
བསང་དང་མཆོད་པ་འདི་ཕུལ་བས། །སྤྲིན་ཆེན་མདོ་ལས་གསུངས་པའི་བདེ་གཤེགས་རྣམས། །ས་སྐོར་འདི་ཡི་ཀླུ་ལ་བྱིན་གྱིས་རློབས། །ཀླུ་རྣམས་བདེ་ཞིང་སྐྱིད་པའི་ཁ་འཛིན་མཛོད་། །ཡེ་ཤེས་སྤྲུལ་པའི་ཀླུ་རྒྱལ་ཁྱེད་རྣམས་ཀྱིས། །འཇིག་རྟེན་ཐམས་ཅད་བདེ་ཞིང་སྐྱིད་པ་དང་། །བདག་ཅག་ཡོན་མཆོད་སྲུང་སྐྱོབ་ཁ་འཛིན་མཛོད། །སྡོང་གྲོགས་མཛོད་ལ་ཁ་འཛིན་མ་གཡེལ་ཞིག །ས་ཕྱོགས་འདིར་གནས་ཀླུ་དང་ས་བདག་རྣམས། །བདག་དང་ཡོན་བདག་རྣམས་ལ་ཁ་འཛིན་མཛོད། །ཀླུ་རྒྱལ་མི་མགོན་དཀར་པོའི་མི་གཡང་དེ། །ཕྱྭ་ཁུག་གཡང་ཁུག་ཁུ་ཡེ་གཡང་དུ་ལེན། །ཀླུ་རྒྱལ་གཙུག་ན་རིན་ཆེན་ནོར་གཡང་དེ། །ཕྲུ་ཁུག་གཡང་ཁུག་ཁུ་ཡེ་གཡང་དུ་ལེན། །ཀླུ་ཡི་རྒྱལ་པོ་ནོར་རྒྱས་དར་གཡང་དེ། །ཕྲུ་ཁུག་གཡང་ཁུག་ཁུ་ཡེ་གཡང་དུ་ལེན། །བྲམ་ཟེ་ཀླུ་ཆེན་ཀུན་དགའི་དར་གཡང་དེ། །ཕྲུ་ཁུག་གཡང་ཁུག་ཁུ་ཡེ་གཡང་དུ་ལེན། །ཀླུ་རྒྱལ་རིན་ཆེན་དོན་འགྲུབ་འཕེན་གཡང་དེ། །ཕྲུ་ཁུག་གཡང་ཁུག་ཁུ་ཡེ་གཡང་དུ་ལེན། །བསང་མཆོད་འབག་བཙོག་ཉེས་པ་གང་ཤོར་བཤགས། །གནས་འདིར་གཉུག་མར་གནས་པའི་ཀླུ་རིགས་རྣམས། །
གཞན་དུ་མ་འབྲོས་གནས་འདིར་བརྟན་པར་བཞུགས། །ཡེ་ཤེས་འཇིག་རྟེན་ཀླུ་དང་ས་བདག་རྣམས། །རང་རང་སོ་སོའི་གནས་སུ་གཤེགས་ནས་ཀྱང་། །རྟག་ཏུ་ཕ་ཁུ་སྤུན་དང་ཤག་རོགས་ལྟར། །བདག་དང་ཡོན་བདག་རྣམས་ལ་ཁ་འཛིན་མཛོད། །འཕགས་ལམ་ཐོབ་ཀྱང་འགྲོ་ལ་ཕན་པའི་ཕྱིར། །ཀླུ་ཡི་ཚུལ་བཟུང་བསྟན་པ་སྲུང་མཛད་པ། །ཡེ་ཤེས་ཀླུ་རྒྱལ་རྣམས་ཀྱི་བཀྲ་ཤིས་ཤོག །རྒྱལ་བའི་ཞལ་མཐོང་དགེ་བསྙེན་སྡོམ་པ་འཛིན། །འབྲུག་སྒྲོག་གློག་འབྱིན་དུས་སུ་ཆར་འབེབས་པ། །འཇིག་རྟེན་ཀླུ་རྒྱལ་རྣམས་ཀྱི་བཀྲ་ཤིས་ཤོག །རིག་འཛིན་གོང་མའི་ཞལ་མཐོང་དམ་ལ་གནས། །རང་རང་ཡུལ་ལྗོངས་སྲུང་ཞིང་བདེ་ལེགས་བསྒྲུབ། །ཀླུ་བྲག་ཡུལ་ལྷ་རྣམས་ཀྱི་བཀྲ་ཤིས་ཤོག །འདི་ལྟར་བསང་མཆོད་ཕུལ་བའི་བསོད་ནམས་ཀྱིས། །ལོ་ལེགས་འབྲུ་འཕེལ་འཇིག་རྟེན་བདེ་གྱུར་ཅིག །ཅེས་པ་འདི་བསང་ཆེན་འཇུག་ཏུའམ། ཐབ་བསང་ལ་སོགས་བསང་ཆུང་བྱེད་ནའང་། །འདི་ཉིད་ཁོ་ན་བཏོན་པས་འཐུས་པ་ཡིན། །རཱག་ཨ་སྱ་ཞེས་བྱའི་རྣལ་འབྱོར་པས། །སྤྲེལ་ལོ་སྤྲེལ་ཟླའི་ཉེར་བདུན་ཉིན་པར་བྲིས། །ཉེས་འགལ་མཆིས་ན་བཤགས་ཤིང་དགེ་བ་དེས། །འགྲོ་ཀུན་བདེ་ཆེན་ཞིང་དུ་སྐྱེ་ཕྱིར་
བསྔོ། །བ་ནུ་ཆུ་མིག་ཟེར་བའི་ཚིགས་གཅིག་སྒྱུར་ནས་སུས་ཀྱང་བཏོན་ཀྱང་རུང་ངོ་། །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།