ཀླུ་བསང་ནོར་བུ་དགོས་འདོད་ཀུན་འབྱུང་།
ཀླུ་བསང་ནོར་བུ་དགོས་འདོད་ཀུན་འབྱུང་ཞེས་བྱ་བ་བཞུགས་སོ། ཀྱཻ། རྒྱ་མཚོ་ཆེ་དང་རོལ་མཚོ་བདུན། །ཀླུ་ཐོའི་ཆུ་མིག་དམ་པ་ནས། །ཀླུ་རྒྱལ་གཙུག་ན་རིན་ཆེན་ནི། །རིན་པོ་ཆེ་ཡི་ཁྲི་སྟེང་དུ། །སྐུ་སྟོད་མཚན་ལྡན་མི་ཡི་ལུས། །སྐུ་སྨད་སྦྲུལ་གྱི་མཇུག་མ་ཅན། །སྦྲུལ་མགོ་སྟོང་གི་གདེངས་ཀ་ཅན། །ཕྱག་ན་དགོས་འདོད་ནོར་བུ་བསྣམས། །ཀླུ་ཚོགས་མང་པོའི་འཁོར་གྱིས་བསྐོར། །སེམས་ཅན་དབུལ་བ་སེལ་མཛད་པ། །འདིར་གཤེགས་བསངས་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་་བསང་། །མཐའ་ཡས་འཇོག་པོ་སྟོབས་ཀྱི་རྒྱུ། །རིགས་ལྡན་ནོར་རྒྱས་དུང་སྐྱོང་དང་། །པདྨ་པདྨ་ཆེན་པོ་སོགས། །ཀླུ་ཆེན་བརྒྱད་པོ་འཁོར་བཅས་རྣམས། །འདིར་གཤེགས་བསངས་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །རྒྱལ་རྗེ་བྲམ་ཟེ་དམངས་གདོལ་རིགས། །ཀླུ་གཉན་ས་བདག་འཁོར་དང་བཅས། །འདིར་།གཤེགས་བསངས་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །ཀླུ་ཡི་ཕྱུག་གཡང་འཕེལ་གཡང་དང་། །ཀླུ་ཡི་ཟས་གཡང་ནོར་གཡང་དང་། །ཀླུ་ཡི་དཔལ་
དང་འབྱོར་པའི་གཡང་། །དེ་རིང་བདག་ལ་བསྩལ་དུ་གསོལ། །གཞན་ཡང་ཡུལ་ཕྱོགས་འདིར་གནས་པའི། །ལྷ་ཀླུ་གནོད་སྦྱིན་དྲི་ཟ་དང་། །འབྱུང་པོ་ཡི་དྭགས་ཤ་ཟ་དང་། །སྨྱོ་བྱེད་བརྗེད་བྱེད་མཁའ་འགྲོ་མ། །མ་མོ་རྒྱལ་པོ་གཟའ་དང་བཙན། །ཀླུ་དང་ཐེའུ་རང་སྨན་དང་གཟའ། །གཞོན་ནུ་སྐེམ་བྱེད་ཐམས་ཅད་ཀུན། །འདིར་གཤེགས་བསངས་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱིས་བསང་། །ཐམས་ཅད་དགྱེས་ཤིང་ཚིམས་གྱུར་ཅིག །རྣལ་འབྱོར་བདག་ཅག་འཁོར་བཅས་ཀྱི། །ནད་གདོན་བར་ཆད་ཞི་བར་མཛོད། །ཚེ་བསོད་དཔལ་འབྱོར་རྒྱས་པར་མཛོད། །ཟས་ནོར་སྣང་སྲིད་དབང་དུ་བསྡུས། །དགྲ་འདྲེ་གདོན་གསུམ་ཚར་ཆོད་ཅིག །བཅོལ་བའི་ཕྲིན་ལས་འགྲུབ་པར་མཛོད། །ཅེས་རཱ་ག་ཨ་སྱས་མཛད་པའོ། །དགེ་ལེགས་འཕེལ།། །།