ས་བདག་ལྷན་ཐབས།
ན་མོ་བཛྲ་པཱ་ཎི་ཡེ། །གསང་བའི་བདག་པོའི་སྒྲུབ་པ་ནི། །སྐྱབས་སེམས་ལྷ་སྒོམ་བསྡུས་པ་བྱ། །བླ་མ་དཀོན་མཆོག་གསུམ་ལ་སྐྱབས་སུ་མཆི། །སེམས་ཅན་སྲོག་ནི་བདག་ཡིན་ཏེ། །བདག་ནི་དོན་མེད་དོན་བསྒོམས་པས། །སྲིད་པའི་ལྷ་འདྲེ་དབང་སྡུད་གྱུར། །བདག་མེད་སྙིང་རྗེ་བསྒོམས་པའི་མཐུས། །ས་བདག་ཐམས་ཅད་གྲོགས་སུ་གྱུར།། བྱང་སེམས་ངོ་བོ་ཟླ་དཀྱིལ་དབུས། །རང་སེམས་ཧཱུྃ་གི་འཕྲོ་འདུ་ལས། །རང་ཉིད་ཕྱག་ན་རྡོ་རྗེ་ནི། །འཇིག་རྟེན་གསུམ་ན་རྣམ་རྒྱལ་བ། །མཐིང་ནག་ཞལ་གཅིག་ཕྱག་གཉིས་ནི། །རུས་རྒྱན་ཁྲོ་ཆས་མ་ལུས་རྫོགས། །སྟག་གི་པགས་པའི་ཤམ་ཐབས་ཅན། །ཕྱག་གཉིས་རྡོ་རྗེ་དྲིལ་བུ་བསྣམས། །དམ་ཚིག་ཡེ་ཤེས་དབྱེར་མེད་པ། །ཐུགས་ཀར་པདྨ་ཉི་ཟླའི་སྟེང་། །ཧཱུྃ་ལས་སྔགས་ཕྲེང་གཡས་སུ་འཁོར། །དེ་ལས་འོད་ཟེར་ཕྱོགས་བཅུར་འཕྲོས། །ས་བདག་ཀླུ་གཉན་ཐམས་ཅད་ཀྱི། །ནད་དང་གནོད་པ་ཐམས་ཅད་བྲལ། །དགའ་བདེ་ཞི་བའི་ངང་ལ་གནས། །འོད་ཟེར་ཚུར་འདུས་ཧཱུྃ་ལ་ཐིམ། །མཐུ་སྟོབས་གཟི་བརྗིད་རབ་ཏུ་རྒྱས། །མི་བསྐྱོད་པ་ཡིས་དབུ་བརྒྱན་གྱུར། །བཛྲ་པཱ་ཎི་ས་
པཱ་རི་ཝཱ་ར་ས་མཱ་ཡ་ཛ་ཛ༔ ཛཿཧཱུྃ་བཾ་ཧོཿ བཟླས་པ་ནི། ཨོཾ་བཛྲ་པཱ་ཎི་ཧཱུྃ། མ་ཡེངས་ངང་ནས་འཛབ་འདི་བརྒྱ་སྟོང་གང་འགྲུབ་བཟླས། ཨོཾ་བཛྲ་པཱ་ཎི་ཨརྒྷཾ་ནས་ཤབྟ་པྲ་ཏིཙྪ་སྭཱ་ཧཱ། བསྟོད་པ་ནི། ཧཱུྃ། སྣ་ཚོགས་པདྨ་ཉི་ཟླ་བརྩེགས་པའི་སྟེང་། །དཔལ་ཆེན་ལྷ་མཆོག་ཕྱག་ན་རྡོ་རྗེ་ནི། །སྐུ་མདོག་མཐིང་ནག་རལ་པ་གྱེན་ལ་བརྗེས། །དུར་ཁྲོད་ཆས་བརྒྱད་སྟག་ཤམ་སྦྲུལ་གྱིས་བརྒྱན། །ཞབས་གཉིས་བརྐྱང་བསྐུམ་འགྱིང་བག་འདོར་སྟབས་ཅན། །དུས་གསུམ་རྒྱལ་བ་མ་ལུས་ཐུགས་ཀྱི་མཆོག །གདུག་པའི་ཚོགས་འཇོམས་ གསང་བདག་།རྡོ་རྗེ་འཛིན། །བཅོམ་ལྡན་ཕྱག་རྡོར ་སྐུ་ལ་ཕྱག་འཚལ་བསྟོད། །ས་བདག་མཆོད་སྒྲུབ་ཀྱི་བདག་བསྐྱེད་རཱ་ག་ཨ་སྱས་སྦྱར་བའོ། །༄༅། །གནམ་ཆོས་ས་བདག་མཆོད་སྒྲུབ་ལས། དང་པོ་ས་སྲིན་བཀར་བ་ནི། ལྕོག་རྡོག་ཆངས་བུ་ཏིང་ལོ་བཤམས། །ཨ། སྟོང་པའི་ངང་ལས་རང་སེམས་ཡི་གེ་ཁྲོ། །དེ་ལས་རྡོ་རྗེ་ཁྱུང་ཆེན་སྐུ་མདོག་དཀར། །གསེར་གྱི་མིག་ཅན་རྭ་དང་མཆུ་སྡེར་ལྕགས། །རལ་གྲིའི་གཤོག་པ་ཆུ་གྲིའི་རྐང་པ་ཅན། །ཡེ་ནས་དམ་ཡེ་དབྱེར་མེད་ཉིད་དུ་གསལ། །བཀའ་དང་དམ་ལ་མི་གནས་གདུག་པ་ཅན། །ནག་པོའི་ཕྱོགས་གྱུར་ཀླུ་
སྲིན་ས་སྲིན་དང་། །བྲག་སྲིན་ལ་སོགས་ས་བདག་མཆོད་བསྒྲུབས་ལ། །གནོད་བྱེད་སྒབ་འདྲེ་ཐམས་ཅད་འདིར་འདུས་ཤིག །ཏྲི་ཛ༔ཧཱུྃ་བཾ་ཧོཿ འོ་དེ་ཤན་དང་རོལ་མཚོའི་བྲག་ནག་ལ། །གནས་པའི་ས་སྲིན་སྒབ་འདྲེ་སྦྲུལ་མཇུག་ཅན། །བུ་ནི་བྲག་སྲིན་སྐྱིན་ལུས་སྦྲུལ་མཇུག་ཅན། །དེ་ཡི་མཇུག་མ་བྲག་དང་ཆུ་ཤིང་ས། །མེ་ལ་བརྡབས་པས་སོ་སོའི་སྲིན་བུ་བྱུང་། །ས་སྲིན་ཀླུ་སྲིན་བྲག་སྲིན་འཁོར་བཅས་ལ། །མཐུན་རྫས་གཏོར་མ་ཆངས་བུ་ཏིང་ལོ་སྦྱིན། །འདི་རུ་མ་འདུག་མྱུར་བར་གཞན་དུ་དེངས། །ཟོག་རུ་ཊ་གནོད་བྱེད་ཨུཙྪ་ཏ་ཡ་ཕཊ། །ཅེས་ཁྲག་ནག་གམ་ཤིང་གི་རྩ་བར་བསྐྱལ་ལོ། །དེ་ནས་མཚམས་གཅོད་སྲུང་འཁོར་བསྒོམ་པ་ནི། ཧཱུྃ། ཤར་ལྷོ་ནུབ་བྱང་སྟེང་གི་མཚམས་གཅོད་པ། །ཡེ་ཤེས་སྤྲུལ་པའི་རིགས་ཀྱི་ག་རུ་ཊ། །དཀར་སེར་དམར་ལྗང་མཐིང་ནག་རབ་ཏུ་རྔམས། །སྤྲུལ་པའི་ཁྱུང་ཆེན་ལྔ་ཡིས་མཚམས་ཆོད་ཅིག །བྷུད་དྷ་བཛྲ་རཏྣ་པདྨ་ཀརྨ་ག་རུ་ཊ་རཀྵ་རཀྟ་ཡེ་སྭཱ་ཧཱ། ཞེས་ས་བདག་འཁྲུགས་བཅོས་ཀྱིས་ལྷན་ཐབས་རཱ་ག་ཨ་སྱས་སྦྱར་བའོ།།
ས་བདག་འཁྲུགས་བཅོས་ཀྱི་རྫོངས་འདེབས་བྱ་བ་ནི། རིན་ཆེན་ཕྱེ་མར་འབྲུ་སྣ་སྨན་སྣ་ཤེལ་ཚིགས་འཐོར་ཞིང་འདི་སྐད་དོ།། ཀྱཻ། སྲིད་པའི་ས་བདག་དབང་ཆེན་རྒྱལ། །སྙན་གྱིས་གསོན་ལ་སྤྱན་གྱིས་གཟིགས། །རིན་ཆེན་གསེར་གཡུ་དངུལ་ཟངས་ལྕགས། །གཟི་མཆོང་སྤུས་ཤེལ་བཻཌཱུརྱ་སོགས། །ས་བདག་རྒྱལ་པོའི་ཕྱག་རྫོངས་འབུལ། །ས་བདག་རིན་ཆེན་བང་མཛོད་གང་། །བདག་དང་ཡོན་བདག་ཁ་འཛིན་མཛོད། །རིན་ཆེན་ལོངས་སྤྱོད་ལྡན་པར་ཤོག །དར་ཟབ་སྟག་གཟིག་ཟ་འོག་གི། །རིན་ཆེན་སྲབ་འཇམ་ལྡན་པ་འདི། །ས་བདག་རྣམས་ལ་ཕྱག་རྫོངས་འབུལ། །དར་ཟབ་མཛོད་གུར་ལྡན་གྱུར་ཅིག །ས་བདག་བང་མཛོད་གང་གྱུར་ནས། །བདག་དང་ཡོན་བདག་གོས་ཕྱུག་སྟེ། །མི་ཟད་ནོར་དང་ལྡན་གྱུར་ཅིག །འབྲུ་སྣ་གང་འཛོམ་སྣ་ཚོགས་དང་། །དར་ཟབ་དར་སྣ་ཕུན་སུམ་ཚོགས། །འབྲུ་ཡི་ཆར་འབེབས་ལྟ་བུ་ཡི། །ཟག་མེད་རྒྱ་ཆེན་དམིགས་ཏེ་
ཕུལ། །སྲིད་པའི་ས་བདག་བང་བ་གང་། །བདག་དང་ཡོན་བདག་ཁ་འཛིན་མཛོད། །བང་མཛོད་བཅུད་དང་ལྡན་པར་ཤོག །ཤེལ་ཚིགས་ཁྲི་དཀར་སྟོང་ནག་འདི། །དཀར་པོ་ལུག་གི་འབའ་སྐད་ལྡིར། །ཁམ་པ་ཞོལ་ཆེན་གཡག་རོག་དང་། །ནག་པོ་ཟིལ་མོ་འབྲི་བརྒྱ་སྟོང་། །ཁྲ་བོ་མདོ་ཕྲུག་རྟ་བརྒྱ་སྟེ། །སྲིད་པའི་ས་བདག་ཁྱེད་རྣམས་ལ། །དེ་རིང་འབྱོན་པའི་རྫོངས་སུ་འབུལ། །དཀོར་ནོར་ལོངས་སྤྱོད་ལྡན་པའི་ཕྱིར། །བདག་དང་ཡོན་བདག་བང་མཛོད་ལ། །ནོར་དང་ལོངས་སྤྱོད་ལྡན་པར་ཤོག །སྔོན་ཚེ་སློབ་དཔོན་པདྨ་ཡིས། །སྲིད་པའི་ས་བདག་དམ་ལ་བཞག །ཆོས་མཛད་དངོས་གྲུབ་སྟེར་བ་དང་། །ལོངས་སྤྱོད་སྩོལ་བ་དམ་དུ་བཞག །དངོས་གྲུབ་འབྱུང་བ་མ་ཟད་པར། །དམ་ཚིག་གཉན་པོའི་གཏོར་མ་དང་། །ལྗོངས་འདེབས་བཞེས་ལ་དངོས་གྲུབ་སྩོལ། །དེ་ནས་སྒོ་ཕྱེ་བ་ནི། མཆོད་གཡོག་པས་ལག་ཏུ་མདའ་དར་ལྡེ་མིག་ཐོགས་ལ་འོ་ཕུད་མཆོད། རྡོ་རྗེ་སློབ་དཔོན་གྱིས་དཀྱིལ་འཁོར་ནང་དུ་མེ་ཏོག་འཐོར་ལ་འདི་སྐད་དོ།། ཀྱཻ། དཀྱིལ་འཁོར་འདི་ལ་བཞུགས་པ་ཡི། །ས་བདག་ཀླུ་གཉན་འཁོར་བཅས་རྣམས། །མ་ལུས་འཁོར་
བཅས་སྙན་གསོན་འཚལ། །རང་རང་གནས་སུ་གཤེགས་པའི་ཕྱིར། །དཀྱིལ་འཁོར་ཕྱི་ནས་སྒོ་ཕྱེ་འཚལ། ཀྱཻ། ཤར་གྱི་ཕྱོགས་སུ་སྒོ་ཕྱེ་འཚལ། །ཤར་ཕྱོགས་ས་བདག་ཐེ་སེ་དང་། །ཤིང་ཁམས་རྒྱལ་པོ་འཁོར་བཅས་རྣམས། །པདྨ་སྔོན་པོའི་གདན་ལ་བཞུགས། །ཁྱེད་ནི་ས་བདག་རྒྱལ་པོ་སྟེ། །བཙུན་མོ་སྲས་དང་བློན་པོ་དང་། །ཕོ་ཉ་མངག་གཞུག་བཅས་པ་རྣམས། །ཡིད་བཞིན་ནོར་བུའི་ལྡེ་མིག་གིས། །སྨོན་ལམ་རྟེན་འབྲེལ་ཤར་ནས་ཕྱེས། །རྩ་དཀར་སྨོན་ལམ་ཤར་ནས་ཕྱེས། །དངོས་གྲུབ་ནོར་གཡང་ཤར་ནས་ཕྱེས། །དཀྱིལ་འཁོར་ཤར་གྱི་སྒོ་ཕྱེ་འཚལ། །ས་བདག་ཐམས་ཅད་ཤར་དུ་གཤེགས། །བདག་དང་ཡོན་བདག་འཁོར་བཅས་ལ། །མཐའ་འཁོབ་རྨོངས་སྡུག་ཐམས་ཅད་སོལ། །ལྗོན་ཤིང་ལོ་འབྲས་བསྐྱེད་པར་ཤོག །ཅེས་ཤར་གྱི་ཤིང་རྩི་རྣམས་སྡུས་ལ་ཕུལ། ཀྱཻ། དཀྱིལ་འཁོར་ལྷོ་ཡི་སྒོ་ཕྱེ་འཚལ། །ལྷོ་ཕྱོགས་ས་བདག་ཙང་ཀུན་དང་། །མེ་ཁམས་རྒྱལ་པོ་འཁོར་བཅས་རྣམས། །པདྨ་སེར་པོའི་གདན་ལ་བཞུགས་། །ཁྱེད་ནི་ས་བདག་རྒྱལ་པོ་སྟེ། །བཙུན་མོ་སྲས་དང་བློན་པོ་དང་། །ཕོ་ཉ་མངག་གཞུག་བཅས་པ་
རྣམས། །རིག་པ་ཐབས་ཀྱི་ལྡེ་མིག་གིས། །ཟས་ནོར་རྒྱལ་ཁ་ལྷོ་ནས་ཕྱེས། །ནོར་གཡང་དངོས་གྲུབ་ལྷོ་ནས་སྩོལ། །དཀྱིལ་འཁོར་ལྷོ་ཡི་སྒོ་ཕྱེ་འཚལ། །ས་བདག་ཐམས་ཅད་ལྷོ་རུ་གཤེགས། །བདག་དང་ཡོན་བདག་འཁོར་བཅས་རྣམས། །གཟི་བརྗིད་མེ་ལྟར་འབར་བར་ཤོག །ཅེས་ལྷོ་ཡི་རྩི་ཤིང་རྣམས་ཕུལ། ཀྱཻ། དཀྱིལ་འཁོར་ནུབ་ཀྱི་སྒོ་ཕྱེ་འཚལ། །ནུབ་ཕྱོགས་ས་བདག་ཧང་ཕན་དང་། །ལྕགས་ཁམས་རྒྱལ་པོ་འཁོར་བཅས་རྣམས། །པདྨ་དམར་པོའི་གདན་ལ་བཞུགས། །ཁྱེད་ནི་ས་བདག་རྒྱལ་པོ་སྟེ་། །བཙུན་མོ་སྲས་དང་བློན་པོ་དང་། །ཕོ་ཉ་མངག་གཞུག་བཅས་པ་རྣམས། །རྡོ་རྗེ་ཐ་རམ་ལྡེ་མིག་གིས། །ཡར་རྩ་དཀར་པོའི་འཕེལ་སྒོ་ཕྱེས། །རྨོངས་འདྲེ་རྩ་ནག་འདྲེ་སྒོ་ཆོད། །ཤི་ཁ་ཆོད་ལ་རལ་ཁ་དྲུབ། །གོད་ཁ་ཆོད་ལ་རྐྱེན་ཁ་བསྒྱུར། །ནུབ་སྒོ་ཕྱེས་ལ་གནས་སུ་གཤེགས། །ཞེས་ནུབ་ཀྱི་ཤིང་རྩི་རྣམས་སྡུས་ལ་ཕུལ། ཀྱཻ། དཀྱིལ་འཁོར་བྱང་གི་སྒོ་ཕྱེ་འཚལ། །བྱང་ཕྱོགས་ས་བདག་འབུམ་རྗེ་དང་། །ཆུ་ཁམས་རྒྱལ་པོ་འཁོར་བཅས་རྣམས། །པདྨ་ནག་པོའི་གདན་ལ་བཞུགས། །ཁྱེད་ནི་ས་བདག་རྒྱལ་པོ་སྟེ། །
བཙུན་མོ་སྲས་དང་བློན་པོ་དང་། །ཕོ་ཉ་མངག་གཞུག་བཅས་པ་རྣམས། །རྫུ་འཕྲུལ་ནོར་བུའི་ལྡེ་མིག་གིས། །བདུད་རྩི་ཆར་གྱི་སྒོ་ཕྱེས་ཤིག །ཆར་ཆུ་དུས་སུ་འབེབས་པར་ཤོག །འབྲུ་དྲུག་ནས་ཀྱི་གཡང་སྒོ་ཕྱེས། །དཀྱིལ་འཁོར་བྱང་གི་སྒོ་ཕྱེས་ལ། །ས་བདག་རང་རང་གནས་སུ་གཤེགས། །མི་མཐའ་ཆུ་ལས་རིང་བར་ཤོག །ཅེས་བྱང་གི་ཤིང་རྩི་རྣམས་ཕུལ། ཀྱཻ། དཀྱིལ་འཁོར་ཕྱོགས་མཚམས་སྟེང་འོག་གི། །ས་བདག་རྗེ་བློན་སྲས་འཁོར་བཅས། །བཙུན་མོ་ཕོ་ཉ་མངག་གཞུག་དང་། །ས་བདག་ཀླུ་རིགས་གཉན་རྣམས་ཀྱི། །རིན་ཆེན་སྣ་ཚོགས་ལྡེ་མིག་གིས། །ལོངས་སྤྱོད་སྣ་ཚོགས་སྒོ་ཕྱེ་འཚལ། །དགོས་འདོད་ཆར་ལྟར་འབེབས་པར་ཤོག །རྒྱུ་སྦྱོར་ཡོན་བདག་འཁོར་བཅས་རྣམས། །བཟུང་བ་ཡོད་ན་ད་ཐོངས་ཤིག །བཅིངས་པ་ཡོད་ན་ད་ཁྲོལ་ཅིག །བསྡམས་པ་ཡོད་ན་ད་སློད་ཅིག །རྒྱུ་སྦྱོར་ཡོན་བདག་འཁོར་བཅས་ལ། །མི་ལ་ན་ཚ་མ་གཏོང་ཞིག །ཞིང་ལ་བཙའ་སེར་མ་གཏོང་ཞིག །ཁ་འཛིན་མཐུ་དཔུང་སྡོང་གྲོགས་མཛོད། །ཅེས་མཚམས་བཞིའི་ཤིང་རྩི་རྣམས་ཕུལ། །དེ་ནས་གཤེགས་སུ་གསོལ་བ་ནི། ཀྱཻ། དཀོན་
མཆོག་གསུམ་དང་བདེ་གཤེགས་རྣམས། །ཕྲིན་ལས་ཀུན་ཀྱི་བདག་ཉིད་ཅན། །བཅོམ་ལྡན་ཕྱག་ན་རྡོ་རྗེ་ནི། །ཀོང་ཙེ་འཕྲུལ་གྱི་རྒྱལ་པོ་དངོས། །ཡི་དམ་ལྷ་དང་བཅས་པ་རྣམས། །ཁྱེད་ཀྱི་སེམས་ཅན་དོན་སོགས་ནས། འབྱོན་པར་མཛད་དུ་གསོལ། །དེ་ནས་ས་བདག་རྣམས་གཤེགས་པ་ནི། ཀྱཻ། ཕྱག་ན་རྡོ་རྗེའི་བཀའ་ཉན་པ། །ས་བདག་རྒྱལ་པོ་བཙུན་མོ་དང་། །དབང་ཆེན་ལོ་ལྷ་འཁོར་དང་བཅས། །ལོ་ཟླ་ཞག་དང་དུས་ཚོད་ལ། །མཆོད་པའི་གནས་སུ་བྱོན་པ་རྣམས། །ས་བདག་དགོངས་པ་འགྲུབ་པར་མཛོད། །བྱམས་པའི་སེམས་ཀྱིས་གཤེགས་སུ་གསོལ། །བདག་གིས་འབོད་ན་དེ་སྤྱོད་ཅིག །གཞན་ཡང་ལྷ་ཀླུ་མཐུ་ཆེན་རྣམས། །གཟའ་དང་རྒྱུ་སྐར་འཁོར་དང་བཅས། །ཡུལ་ལྷ་དགྲ་ལྷ་ཁྱིམ་ལྷ་དང་། །ས་སྐོར་རྩི་ཤིང་ནགས་ཚལ་དང་། །ཆུ་དང་རྡོ་དང་ལམ་ལ་སོགས། །གནས་པའི་ས་བདག་ཀླུ་གཉན་ཀུན། །མཆོད་སྦྱིན་ཆེན་པོས་མཉེས་བྱས་ནས། །བདག་གི་རེ་བ་བསྐང་བར་མཛོད། །ས་བདག་ལྷ་ཀླུ་རྫུ་འཕྲུལ་ཅན། །དང་པོ་བྱོན་པ་ཞལ་རེ་དྲོ། །སླར་ཡང་འབྱོན་པ་དོན་རེ་ཆེ། །ད་ནི་གཤེགས་པ་འགབ་རེ་
བཟང་། །གཤེགས་ཤུལ་བཀྲ་ཤིས་བདེ་ལེགས་མཛོད། །ས་སྙིང་ས་ཡི་ལྷ་མོ་གཉིས། །བདག་དང་ཡོན་བདག་སྦྲ་ཁང་དང་། །ཞིང་ལ་བརྟན་བཞུགས་ས་བཅུད་སྤེལ། །འཇིག་རྟེན་པ་ཡི་ས་བདག་རྣམས། །རང་རང་སོ་སོའི་གནས་སུ་གཤེགས། །ལོ་ཀ་བྷུ་མི་པ་ཏི་སརྦ་གཙྪ། དེ་ནས་མཇུག་གི་བསྡུ་ཆོག་ནི། །ཡེ་ཤེས་སེམས་དཔའ་གནས་སུ་གཤེགས། །དམ་ཚིག་སེམས་དཔའ་རང་ལ་བསྡུ། །བསྐྱེད་རིམ་མི་དམིགས་ན་ད་ཡལ། །ཡེ་ཤེས་དབྱེར་མེད་དབྱིངས་སུ་ཐིམ། །ས་མ་ཡ་ཧོ། ས་མ་ཡ་ཧཱ། བཛྲ་ས་ཏཱ་ཨཱ༔ དགེ་བ་འདི་དང་དགེ་བ་གཞན། །མ་ལུས་གཅིག་ཏུ་བསྡོམས་བྱས་ནས། །སེམས་ཅན་ཀུན་གྱི་དོན་གྱི་ཕྱིར། །རྫོགས་པའི་སངས་རྒྱས་མྱུར་ཐོབ་ཤོག །ཅེས་བསྔོ་སྨོན་རྒྱས་པར་བྱ། བཀྲ་ཤིས་གང་ཤེས་བརྗོད་པར་བྱའོ། །བཛྲ་མུ། ཞེས་ས་བདག་སྤྱི་གཏོར་དངོས་གྲུབ་ཏུ་རོལ། །ཞེས་པ་འདི་ནི་གནམ་ཆོས་འཁྲུགས་བཅོས་དང་དབང་ཆེན་ཀོང་ཙེ་བཅས་ཀྱི་ལྷན་ཐབས་ཁ་སྐོང་དུ། །ཀརྨ་རཱ་ག་ཨ་སྱས་སྦྱར་བ་འདིས་ཡུལ་ཕྱོགས་ཐམས་ཅད་དུ་དགེ་ལེགས་སུ་གྱུར་ཅིག །བཀྲ་ཤིས། །དགེའོ།། །།