ནག་པོ་མགོ་གསུམ་གྱི་ཞལ་གདམས་ཟིན་བྲིས་གསལ་བ།
ནག་པོ་མགོ་གསུམ་གྱི་ཞལ་གདམས་ཟིན་བྲིས་གསལ་བ་བཞུགས་སོ།
ན་མོ་ཨཱརྱ་མཉྫ་ཤྲཱི་ཡེ། རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །ཧ་ས་གརྒྷའི་ཟིན་བྲིས་འདོན་འགྲིགས་འགོད། །བཀའ་ཡི་གནང་བ་སྩོལ་ལ་བྱིན་གྱིས་རློབས། །འདི་ལ་ཡེ་ཤེས་འཇིག་རྟེན་གཉིས་ཡོད་དེ། །ཡེ་ཤེས་པ་ནི་འཇམ་དབྱངས་སྤྲུལ་པ་ཡིན། །དེ་ཕྱིར་མགོ་གསུམ་བདག་བསྐྱེད་ལུགས་ཀྱང་ཡོད། །འཇིག་རྟེན་མགོ་གསུམ་གཟའ་ཀླུ་ས་བདག་བུ། །དེ་ཡང་འཇམ་པའི་དབྱངས་ཀྱི་སྤྲུལ་པ་སྟེ། །རྒྱ་གར་ལུགས་ལ་ནཱ་ག་རཀ་ཟེར། །རྒྱ་ནག་ལུགས་ལ་ཧ་ས་གརྒྷ་ཟེར། །དེང་སང་བོད་འདིར་ནག་པོ་མགོ་གསུམ་ཟེར། །ཞི་བ་བྱས་ན་མི་མགོན་
དཀར་པོ་ཡིན། །དྲག་པོ་བྱས་ན་ཀླུ་བདུད་མགོ་དགུ་ཡིན། །འཇིག་རྟེན་དྲེགས་པ་ཤིན་ཏུ་གཉན་པོ་ཡིན། །ས་བདག་གཏོ་རྒྱུད་ནག་པོ་ཞེས་བྱ་བ། །རྒྱ་ནག་རྩིས་ཀྱི་རྒྱུད་ལས་བྱུང་བ་ཡིན། །རྒྱས་པར་ཀོང་ཙེ་འཕྲུལ་གྱི་རྒྱལ་པོས་མཛད། །འཕྲུལ་གྱི་མི་བཞིས་ལག་ལེན་འགྲིགས་སུ་བསྡེབས། །བོད་དུ་སྔ་ཕྱི་བར་ས་གསུམ་དུ་འགྱུར། །ཁྱད་པར་སྒྲོལ་མའི་སྤྲུལ་པ་དབོན་ཆུང་མས། །འདི་ཡི་ཡིག་སྣ་སྟག་སྒོ་གང་བྱས་ཁྱེར། །རྫོངས་བ་ཀུན་གྱི་ནང་ནས་དམར་བར་བྱས། །དེ་ནས་རྒྱལ་མོ་རང་དུ་ཕེབ་ཙམ་ན། །འཇམ་དཔལ་དམར་པོའི་སྤྲུལ་པ་ལས་འཕྲོ་ཅན། །
མཁས་པ་དྲག་སྡེ་ཞེས་བྱ་དེ་ལ་སྤེལ། །དེ་ནས་དབུས་སུ་རྒྱ་བཟས་རྒྱལ་པོ་མཇལ། །བལ་བཟས་ར་ས་འཕྲུལ་སྣང་བཞེངས་པའི་ཚེ། །ལྷ་འདྲེས་ཆོ་འཕྲུལ་བསྟན་ནས་བཞེངས་མ་ཐུབ། །འདི་ཡི་གཏོ་ཐིག་བྱས་པས་ལྷ་ཁང་ཞེང་། །གཞན་ཡང་བཀྲ་ཤིས་ཕན་ཐོགས་དཔག་མེད་བྱུང་། །དེ་ནས་རྒྱ་གར་ཡུལ་དུ་ཕར་ལ་བསྒྱུར། །ཛེ་ཏ་རི་པ་དགྲ་ལས་རྣམ་རྒྱལ་ས། །མུ་སྟེགས་པ་དང་མཐུ་འདྲེན་བྱས་པའི་དུས། །འདི་ཡི་བཟློག་བསྒྱུར་བྱས་པས་མུ་སྟེགས་ཕམ། །དེ་ནས་རྒྱ་གར་རྡོ་རྗེ་གདན་པ་ལ། །བརྒྱུད་པའི་ལུགས་ཀྱང་རྒྱ་གར་ཡུལ་དུ་དར། །དེ་ནས་རྒྱལ་པོ་ཁྲི་སྲོང་སྐུ་རིང་ལ། །རྒྱ་ནག་ཧྭ་ཤང་མ་ཧཱ་ཡ་ན་སོགས། །ལོ་པཎ་རྣམས་ཀྱིས་བོད་དུ་བསྒྱུར་བ་སྟེ། །བོད་དུ་ཐོག་མར་བསམ་ཡས་ཕྱག་དཔེ་ལ། །མང་དུ་འཕེལ་ནས་དར་ཆ་ཆེ་བར་བྱུང་། །འདན་གྱི་གླང་ཐང་སྒྲོལ་མའི་གཙུག་ལག་ཏུ། །གཏོ་དང་རྩིས་སོགས་གཏེར་དུ་སྦས་པ་རྣམས། །ཁམས་པ་ཉི་མ་གྲགས་པས་གཏེར་ནས་བཏོན། །འགྲོ་མགོན་ཆོས་འཕགས་རྒྱ་ནག་ཡུལ་བྱོན་དུས། །སླར་ཡང་འདི་ཡི་སྐོར་རྣམས་བོད་ལ་བསྒྱུར། །ས་སྐྱ་པ་ཡི་བསྟན་སྲུང་འཐིལ་པོ་བྱེད། །ས་སྐྱས་ཟླ་བ་རེ་ལ་ལན་རེ་བཅའ། །དེ་
ཚེ་མགོ་གསུམ་གཟུགས་ཀྱིས་གསུང་བསྒགས་ནས། །མགྲིན་པ་ཨེན་ཙམ་ཡོ་བ་མ་གཏོགས་པ། །ང་ཡི་གཟུགས་འདི་འདྲ་འོ་སྨྲས་སོ་སྐད། །དེ་དུས་ཧོར་སྟོད་དམག་གི་གནོད་པ་ཟློག །དེ་རྗེས་ཀརྨ་པཀྵིས་འདི་བཅས་པས། །རྒྱ་དམག་བོད་དུ་འོང་བ་བཟློག་གོ་སྐད། །ཨོ་རྒྱན་མགོན་པོས་ལྷ་ཁང་བཞེངས་པའི་ཚེ། །སྐུ་སྐག་ཆེ་ཞིང་བར་ཆད་མང་བ་ལ། །ཆེ་ཚངས་སངས་རྒྱས་ཡེ་ཤེས་དེར་ཕེབས་ནས། །ཟླ་བ་གསུམ་གྱི་བར་དུ་མདོས་ཆ་བསྒྲུབ། །ལྷ་ཁང་ཉིད་ཀྱི་ཚད་ཙམ་བཅས་ནས་འབུལ། །བར་ཆད་ཀུན་ཞི་སྐུ་ཚེ་མཐར་ཕྱིན་གྱུར། །འདི་ལ་ལུགས་གསུམ་བཅའ་ཐབས་བཅོ་བརྒྱད་དེ། །དུས་ཕྱིས་སྔགས་པས་དཔེ་ཆ་གར་རྙེད་བྲིས། །དབྱེ་གསལ་མ་ཤེས་རྫོགས་རྒྱུ་མེད་པ་བྱུང་། །རྒྱས་པ་ཡབ་ལུགས་འབྲིང་པོ་སྲས་ལུགས་དང་། །བསྡུས་པ་ཡུམ་ལུགས་གསུམ་དུ་ཞེས་གྲགས་སོ། །ཁྲོ་བོ་ཕ་བརྒྱུད་བུ་བརྒྱད་གཉིས་ཀ་འབྱར། །རུ་འདྲེན་སྡེ་བཞི་སོ་སོར་ལེའུ་ཁ་རེ། །པོ་ཏི་ཆེན་པོ་བྱུང་བ་ཡབ་ལུགས་ཡིན། །ཁྲོ་བོ་ཕ་བརྒྱད་མི་འབྱར་བུ་བརྒྱད་འབྱར། །རུ་འདྲེན་སྡེ་བཞི་ལེའུ་ཁ་གཅིག་ལ་ཚང་། །རྒྱས་བསྡུས་འཚམས་པ་བྱུང་བ་སྲས་ལུགས་ཡིན། །ཁྲོ་བོ་ཕ་བུ་
གཉིས་ཀ་གཅིག་ཀྱང་མེད། །འདོན་ཆོག་བསྡུས་པ་བྱུང་བ་ཡུམ་ལུགས་ཡིན། །ཤིང་རིས་རྩང་ཐུར་ནམ་མཁའ་གསུམ་ཁ་ཡོད། །དེ་ནི་མགོ་གསུམ་མདོས་ཐབས་ཞེས་བྱའོ། །ཤིང་།རིས་མེད་ཅིང་རྩང་ཐུར་རྐྱང་པ་བཙུགས། །དེ་ནི་མགོ་གསུམ་རྩང་ཐབས་ཞེས་བྱའོ། །མདོས་ཐབས་རྩང་ཐབས་གཉིས་པོ་གང་བྱེད་ཀྱང་། །དེ་ལ་ལས་ཚོགས་བཅའ་ཐབས་བཅོ་བརྒྱད་བྱུང་། །དེ་དག་སོ་སོའི་ཕྱག་གཡས་ཕྱག་མཚན་ཁྱད། །སྐག་ཟློག་སྤར་ཁ་གང་ཡིན་ཕྱག་མཚན་འཛིན། །དེ་བཞིན་ལོ་ཡི་སྐག་ཟློག་ལོ་ཡི་གཟུགས། །ལྟས་ངན་བཟློག་ན་གང་བྱུང་ཐན་གྱི་གཟུགས། །ཞིང་ནང་དབབ་བྱུང་དབབ་རྡོ་ཕྱག་གཡས་བཞག །དེ་བཞིན་གང་མཛད་རིག་པས་བརྟག་སྟེ་ཤེས། །སྤྱི་ལ་དང་པོ་གྲི་གུག་ཐོད་ཁྲག་སྟེ། །གཞན་རྣམས་ཕྱག་མཚན་མངོན་རྟོགས་ལྟར་དུ་བྱ། །སྤར་ཁ་རྩུབ་པ་མང་པོ་ཡོད་ན་ནི། །ཕྱག་དྲུག་སྤར་ཁ་གང་རྩུབ་ཕྱག་ཏུ་བཞག །ནད་ཡམས་བཟློག་པའི་དོན་དུ་བཅའ་བ་ནི། །དང་པོའི་ཕྱག་གཉིས་ཉི་མ་ཟླ་བ་ཕྱིར། །བར་པའི་ཕྱག་གཉིས་ཁྲམ་ཤིང་དཀར་ནག་གཉིས།། །ཐ་མ་གཉིས་ཀྱིས་ཐལ་མོ་བརྡབ་ཚུལ་བྱ། །བུད་མེད་ནད་རྐྱལ་ཐོགས་པ་བརྒྱ་ཡིས་བསྐོར། །དེ་ལ་
གཟུགས་བརྙན་གཞན་ནི་མི་དགོས་སོ། །བྱད་ཁ་བཟློག་ན་དང་པོ་གྲི་ཐོད་དེ། །བར་པ་གཉིས་ཀྱིས་ཕུར་པ་འདྲིལ་བའི་ཚུལ། །ཐ་མ་གཉིས་ཀྱིས་ཐལ་མོ་རྡེབ་པ་སྟེ། །ལུས་ལ་ཕུར་པ་མང་པོའི་དོ་ཤལ་ཚུལ། །འཁོར་གྱི་བཅའ་ཚོགས་ཧྲག་བསྡུས་གཞུང་ལྟར་བྱ། །དམག་སྣ་བཟློག་ན་དང་པོའི་ཕྱག་གཉིས་ཀྱིས། །ཕྱར་དར་དང་ནི་རྒྱལ་མཚན་འཛིན་པ་སྟེ། །བར་པས་རལ་གྲི་དང་ནི་མདུང་འཛིན་པ། །ཐ་མས་ཐལ་མོ་བརྡབ་པར་བྱ་བ་སྟེ། །འཁོར་ནི་སྐྱ་མི་ཁྲབ་ཅན་བརྒྱ་ཡིས་བསྐོར། །དེ་ལ་འཁོར་གཞན་བཅའ་ནི་མི་དགོས་སོ། །ཐན་ཟློག་ཕྱག་གཡས་སྦྲུལ་ནག་མགོ་དགུ་དང་། །རྔ་མོང་ངམ་ནི་གང་བྱུང་ཐན་གྱི་གཟུགས། །འཁོར་དུ་ཐན་རིགས་བརྒྱ་ཡིས་བསྐོར་བར་བྱ། །ཁ་མཆུ་གླེང་གཞི་ལ་སོགས་བཟློག་པ་ལ། །དང་པོའི་ཕྱག་གཉིས་མི་ཁ་ཟ་བའི་ཚུལ། །འཁོར་ནི་མི་ཁའི་མགོ་བརྙན་བཅུ་གསུམ་སྟེ། །བུད་མེད་བ་རུ་སིལ་པོ་ཁུར་བའོ། །དེ་རྒྱབ་ཤང་ཤང་བྲ་མཆུ་བརྒྱ་ཡིས་བསྐོར། །དགྲ་སྣ་བསྒྱུར་ན་ཕྱག་མཚན་རལ་གྲི་མདུང་། །མི་ནག་རལ་གྲི་ཐོགས་པ་བརྒྱ་ཡིས་བསྐོར། །གོད་ཁ་དང་ནི་སྙིང་སྟོང་བསྒྱུར་བ་ལ། །ཕྱག་རྣམས་ཀུན་གྱིས་བ་དན་
བཟུང་བ་སྟེ། །འཁོར་ནི་མི་ནག་ཡས་ཁུར་བརྒྱ་ཡིས་བསྐོར། །རྨི་ལམ་ངན་པ་བསྒྱུར་ན་དང་པོའི་ཕྱག །མདའ་གཞུ་འཛིན་ཅིང་དེ་ཡི་འཁོར་དུ་ནི། །རྨི་ལམ་ངན་པ་གང་རྨིས་གཟུགས་ཀྱིས་བསྐོར། །རྒྱལ་འགོང་གནོད་པ་བཟློག་ན་དེ་ཡིས་འཁོར། །རྒྱལ་འགོང་གཟུགས་བརྙན་མང་པོས་བསྐོར་བར་བྱ། །འདྲེ་མོའི་གནོད་ན་འདྲེ་མོའི་གཟུགས་མང་པོ། །འདྲེ་མོའི་ཡས་རྣམས་རྒྱབ་ལ་ཁུར་བར་བྱ། །གྱོད་བྱུར་བཟློག་ན་གྱོད་གྱུར་མང་པོའི་གཟུགས། །མི་ཁ་བཟློག་ན་མི་ཁའི་གཟུགས་ཡས་དང་། །དེ་རྣམས་རིགས་པས་དཔག་སྟེ་གང་གནོད་གཟུགས། །ཕྱག་ཏུ་བཟུང་སྟེ་འཁོར་དུ་བསྐོར་བྱས་པས། །ལས་ཚོགས་བཅའ་ཐབས་བཅོ་བརྒྱད་འབྱུང་བ་ཡིན། ༈ །སྤྱི་ལ་བཅའ་ལུགས་རྒྱས་འབྲིང་བསྡུས་གསུམ་སྟེ། །རྒྱས་པ་མངོན་རྟོགས་ལྟར་དུ་འཁོར་མང་གཟུགས། །འབུར་དོད་བཅའ་དང་བྲིས་སྐུ་ཆ་གཉིས་བྱ། །འབྲིང་ལ་འཁོར་མང་མཐོ་དོ་ཙམ་ཞིག་བྱ། །བསྡུས་པ་གོང་ནོན་རིགས་གསུམ་མགོན་པོ་བྲི། །དེ་མིན་མཐོ་རེ་ཙམ་གྱི་གཟུགས་བཅས་ལ། །འཁོར་མང་ཡིད་ལ་བསྒོམས་པས་འཐུས་པ་ཡིན། ༈ །དང་པོ་མདོས་ཐབས་རྒྱས་པར་བཅའ་བ་ནི། །མདོས་གདན་
རི་རབ་གྲུ་བཞི་བྲིས་པའི་སྟེང་། །མི་ཁ་བྲ་མཆུ་ལྟས་ངན་ལ་སོགས་པ། །གང་གནོད་ལིང་ག་བྲིས་ཏེ་བཅིངས་བའི་སྟེང་། །མགོ་གསུམ་ཉིད་ཀྱི་སྐུ་གཟུགས་བཅའ་བ་ནི། །མི་ནག་མགོ་གསུམ་ཤིན་ཏུ་འཇིགས་པའི་གཟུགས། །དབུས་མ་གླང་མགོ་འབྲུག་གི་སྣ་ལྗགས་ཅན། །སྤྱན་དམར་རལ་པ་རེ་གཡབ་གྱེན་ལ་གཡེངས། །རྭ་ནི་གནམ་ལྕགས་སྔོན་མོ་ཟངས་སེ་བ། །ཐོད་སྐམ་ལྔ་དང་ཉི་ཟླ་ནོར་བུས་བརྒྱན། །མཆེ་གཙིགས་ལྗགས་འདྲིལ་ཁྲོ་བོའི་སྐུར་བསྐྱེད་བྱ། །འཇམ་དཔལ་བཀའ་ཉན་ཕྱིར་དུ་སེར་པོ་འོ། །གཡས་སུ་སྟག་མགོ་དམར་བཀྲ་གཡོན་དུ་ནི། །ཕག་མགོ་ནག་པོ་གཉིས་ནི་དུད་འགྲོའི་མགོ །མགོ་དབུས་སེར་པོ་ཐོད་སྐམ་དབུ་རྒྱན་ཅན། །སྐུ་མདོག་ནག་པོ་ཕྱག་ནི་དྲུག་པ་སྟེ། །ཐོད་རློན་དོ་ཤལ་གླང་ལྤགས་སྟོད་གཡོགས་དང་། །སྦྲུལ་གྱི་དོ་ཤལ་སྟག་གི་ཤམ་ཐབས་དང་། །རྔ་མ་རེ་འབྱམ་སྦྲུལ་གྱི་ཚུལ་དུ་འཁྱིལ། །ཞབས་གཉིས་འདོར་ཐབས་བཞུགས་པ་ཀུན་ལ་སྟེ། །སྤྱི་ལ་དང་པོ་གྲི་གུག་ཐོད་ཁྲག་སྟེ། །བར་པས་རལ་གྲི་དང་ནི་ལྕགས་ཀྱུ་འཛིན། །ཐ་མ་གཉིས་ཀྱིས་མདའ་དང་གཞུ་འཛིན་པ། །དེ་ཡི་ཕྱོགས་མཚམས་བརྒྱད་དུ་སྲས་བརྒྱད་ནི། །
མངོན་རྟོགས་ལྟར་དུ་ཚོན་མདོག་མ་ནོར་འགོད། །དེ་ཡི་ཕྱི་རིམ་སྨེ་བ་དགུ་པོ་ནི། །མདུན་དུ་ལྔ་སེར་དེ་མདུན་དགུ་དམར་དང་། །མདུན་གཡས་གཉིས་ནག་གཡས་སུ་བདུན་དམར་ཏེ། །རྒྱབ་གཡས་དྲུག་དཀར་རྒྱབ་ཏུ་གཅིག་དཀར་ཏེ། །རྒྱབ་གཡོན་བརྒྱད་དཀར་གཡོན་དུ་གསུམ་མཐིང་དང་། །མདུན་གཡོན་ཟུར་དུ་བཞི་ལྗང་གཟུགས་རྣམས་ནི། །སྐྱ་མི་སོ་སོའི་གཟུགས་སུ་བྱས་པས་འཐུས། །དེ་རྒྱབ་སྤར་ཁ་བརྒྱད་པོའི་གཟུགས་བཅས་ལ། །ལི་ནི་བུད་མེད་དམར་མོ་རྟ་དམར་ཅན། །དེ་ནི་གཙོ་བོའི་མདུན་བཞག་ལྷོ་ཕྱོགས་ཡིན། །ལྷོ་ནུབ་ཁོན་མ་རྒན་མོ་བུད་མེད་གཟུགས། །ནུབ་ཏུ་དྭ་ནི་སྐྱེས་ཕྲན་དཀར་པོ་དང་། །ནུབ་བྱང་ཁེན་པ་མི་རྒན་སེར་པོ་དང་། །བྱང་དུ་ཁཾ་ནི་མི་ནག་རལ་པ་ཅན། །བྱང་ཤར་གིན་ནི་་བན་གཟུགས་སེར་པོ་དང་། །ཤར་དུ་ཟིན་ནི་བུད་མེད་ལྗང་གུའི་གཟུགས། །ཤར་ལྷོར་ཟོན་ནི་བུད་མེད་སེར་མོའི་གཟུགས། །དེ་དག་སོ་སོའི་ཞོན་པ་ལ་སོགས་པ། །བྲི་དུས་ཡིན་གྱིས་བཅའ་དུས་རྐང་ཐང་ཆོག །དེ་རྒྱབ་ལོ་སྐོར་བཅུ་གཉིས་བཅའ་བ་ནི། །ལོ་སྐོར་བཅུ་གཉིས་སོ་སོའི་མགོ་ཅན་ལ། །ལུས་པོ་མི་ཡི་གཟུགས་སུ་བྱས་པས་འཐུས། །སྟག་ཡོས་ལྗང་
ཁུ་རྟ་སྦྲུལ་དམར་པོ་དང་། །བྱ་སྤྲེལ་དཀར་པོ་བྱི་ཕག་ནག་གམ་སྔོ། །མཚམས་བཞི་སེར་པོ་རང་རང་ཕྱོགས་སུ་བཀོད། །དེ་རྒྱབ་གཡས་སུ་མི་ནག་རྟ་ནག་བདུད། །མདུན་དུ་ཤང་ཤང་བྲ་བའི་མགོ་ཅན་ལ། །ལག་པ་གཉིས་ཀྱིས་རག་དུང་འབུད་པ་བྱ། །གཡོན་དུ་བཙན་ནི་མི་དམར་རྟ་དམར་ཅན། །རྒྱབ་ཏུ་མ་མོ་ནག་མོ་རྔ་མོང་ཞོན། །དེ་དང་མཉམ་དུ་གླང་ཆེན་ཁལ་འགེལ་བཞག །མདུན་དུ་མི་དམར་མགོ་བོ་གསུམ་པོ་ནི། །ལག་པ་གཉིས་ཀྱིས་མདའ་གཞུ་འགེངས་པའི་ཚུལ། །ཁོག་སྟོད་དམར་ལ་ཁོག་སྨད་ནག་པོ་བྱ། །མགོ་དབུས་ཕག་མགོ་ནག་པོ་གཏི་མུག་མགོ །གཡས་པ་བྱ་དཀར་གཡོན་པ་སྦྲུལ་མགོ་དམར། །འདི་ལ་གསོད་བྱེད་མི་དམར་མགོ་གསུམ་ཟེར། །དེ་རྒྱབ་ཕྱོགས་བཞིར་གཏོ་མཁན་བཞི་ལ་པོའམ། །ཡང་ན་སྲུང་བཞི་སྒོ་སྲུང་ཚུལ་དུ་བཅའ། །བཅའ་ཚོགས་བསྡུས་པ་དེ་དག་ཙམ་གྱིས་འཐུས། ༈ །དེ་ལས་བསྡུས་པ་འདོད་ན་སྨེ་བ་སྐྱུར། །དེ་ལས་རྒྱས་པ་ཐན་སྐྱ་ཉི་ཤུ་བཅའ། །ཁྲོ་བོ་རྣམས་ནི་པར་དུ་འདེབས་པའམ། །ཡང་ན་ཙཀླུ་བཙུགས་པས་འཐུས་པ་ཡིན། །འཁོར་མང་ཐམས་ཅད་དེང་སང་བཅའ་སྲོལ་མེད། །སྔོན་ཚེ་སངས་རྒྱས་ཡེ་ཤེས་
ཀྱིས་བཅས་པས། །ཁྲ་འགྱེལ་མ་དང་མཉམ་པ་བྱུང་ངོ་སྐད། །དེ་འདྲ་དེང་སང་ཆོས་པའི་ཐབས་མེད་པས། །དེང་སང་ཧྲག་བསྡུས་བཅའ་བ་ཀུན་གྱི་སྲོལ། །དེ་རྒྱབ་ལོ་སྐོར་བཅུ་གཉིས་བྲིས་སམ་གདབ། །ཤིང་རིས་བཅུ་གསུམ་རང་རང་ཕྱོགས་སུ་བཙུགས། །ཕྱོགས་བཞིར་ཁྲམ་ཤིང་དཀར་སེར་དམར་ལྗང་བཞི། །གཡས་སུ་ཕོ་ཐོང་གཡོན་དུ་མོ་ཐོང་དང་། །མདུན་དུ་བུ་ཐོང་མདའ་བཀྲ་འཕང་བཀྲ་དང་། །བཅུ་གསུམ་བཞི་དང་གསུམ་སོགས་རེ་རེ་བཙུགས། །དབུས་སུ་ནམ་མཁའ་གཅིག་གི་མགུལ་དུ་ནི། །རིགས་གསུམ་མགོན་པོའི་ཙཀ་ལི་བཏགས་པ་ནི། །མགོ་གསུམ་དབུ་རྒྱན་གོང་ནོན་ཚུལ་ཡིན་ནོ། །ཤིང་རིས་རྒྱབ་ཏུ་རྩང་ཐུར་དྲུག་ཅུ་བཞི། །ཡང་ན་ཤི་ཤུ་རྩ་བརྒྱད་བཙུགས་པ་རྣམས། །སྟོད་དམར་སྨད་ནག་སྐེད་པ་རྒྱ་མདུད་སེར། །སྲིན་མོ་འགྲོས་བཙུགས་ཚོན་སྐུད་སྣ་ལྔས་དཀྲིས། །ཤ་དུམ་མཐེབ་སྐྱུ་གཏོར་ཆུང་གཙང་མ་ལ། །འབྲུ་སྣ་ཡོས་བཀྲ་གཙང་མས་གསོ་བར་བྱ། ༈ །ལོགས་སུ་བཙོ་གཞོང་ལ་སོགས་སྣོད་ཀྱི་ནང་། །ངར་གླུད་ཆེ་བ་གཅིག་བཅས་གོས་དུམ་བསྐོན། །དེ་ལ་བཙོག་གླུད་ཚྭ་ཡོས་རིམ་རུག་བླུག །དེ་ནི་མགོ་གསུམ་དེ་ཡི་དྲུང་དེར་བཞག །མགོ་གསུམ་
ནང་དུ་བཙོག་གླུད་མི་བླུག་གོ ༈ །ཡར་མཆོད་གཞི་སྟེང་ཕུགས་གཏོར་ཉིད་ཀྱི་མཐར། །བཙོ་ཆུང་ངམ་ནི་སྡེར་མ་ནས་བཀང་སྟེང་། །གཏོར་མ་གུར་གྱི་དབྱིབས་ཅན་མར་རྒྱན་གཟབ། །དབུས་སུ་ཁྱུང་དང་གཡས་སུ་སེང་གེ་དང་། །གཡོན་དུ་འབྲུག་གཟུགས་མར་ལ་བཅས་ལ་བཙུགས། །མར་དང་ཐུད་ཀྱི་རིལ་བུ་མང་པོས་བརྒྱན། །དེ་ནི་དཀར་པོ་མགོ་གསུམ་བཅའ་ཐབས་ཡིན། །དཀར་པོ་མགོ་གསུམ་སྲུང་བ་ཡིན་པ་སྟེ། །ནག་པོ་མགོ་གསུམ་ཉིད་ནི་ཟློག་པ་ཡིན། །དམར་པོ་མགོ་གསུམ་ཉིད་ནི་བསད་པ་ཡིན། །དེ་གསུམ་མགོ་གསུམ་གཞུང་ཆེན་གསུམ་པོ་ཡིན། །གཞན་རྣམས་དེ་ཡི་ཡན་ལག་ཡིན་པའི་ཕྱིར། །རྒྱས་ཀྱང་རུང་ལ་བསྡུས་ཀྱང་ཆོག་པ་ཡིན། །བདག་བསྐྱེད་རང་གི་ཡི་དམ་ལྷ་གཞུང་བསྲང་། །དེ་ནས་རིགས་གསུམ་མགོན་པོ་གནས་འགྱུར་རམ། །དྲག་པོ་བྱེད་ན་རིགས་གསུམ་ཁྲོ་བོ་བསྐྱེད། །དེ་ནས་ཉིན་རེ་ཚར་རེ་མི་དགོས་ཏེ། །རྩ་བའི་གཞུང་ཆེན་རྣམས་ལ་ཚར་རེ་དང་། །གཞན་རྣམས་འདོན་རེས་བྱས་པས་འཐུས་པ་ཡིན། །གཙོ་བོར་དཀར་པོ་མགོ་གསུམ་སྲུང་འཁོར་བསྒོམ། །སྔ་དྲོ་རིགས་གསུམ་མགོན་པོའི་བསྙེན་པ་འབད། །ཉིན་
གུང་ནག་པོ་མགོ་གསུམ་ཟློག་པ་འདོན། །ཟ་འདྲེ་ཤི་གཤེད་ལ་སོགས་གསོད་པ་ལ། །དམར་པོ་མགོ་གསུམ་སྔགས་དམིགས་བཅུག་པར་བྱ། །སྤྱིར་ནི་རིམ་གྲོ་སྲུང་ཟློག་གཉིས་པོ་གཙོ། །བསད་པའི་སྔགས་དམིགས་དགོས་པ་ཆུང་བ་ཡིན། །མགོ་གསུམ་གལ་ཆེན་རྟགས་ཐོན་བྱེད་འདོད་ན། །དུས་བཞིར་མངོན་རྟོགས་སྤྱན་འདྲེན་གཏོར་འབུལ་དང་། །ཟློག་བྱེད་མགོ་གསུམ་ཉིད་ཀྱི་སྔགས་ལ་འབད། །བསྲུངས་རྟོགས་བཟློག་རྟགས་རྨི་ལམ་འབྱུང་། །བཟང་ངན་བརྟག་ལུགས་སྤྱི་དང་མཐུན། །དེ་ནས་ཞག་གྲངས་ཐེམ་པ་དང་། །རང་དང་ཡོན་བདག་ལོ་ཐོག་མིན། །རྒྱུ་ལྡོག་ཞིབ་ཏུ་བརྩི་བ་རབ། །མིན་ཀྱང་རང་དང་ཡོན་བདག་གི །ལོ་ཐོག་མིན་ཅིང་ཕྱོགས་གཙང་སར། །ཁྱད་པར་ཐེ་སེ་ཧལ་ཁྱི་དང་། །བླ་མཁྱེན་མེད་པའི་ཕྱོགས་སུ་ཕུལ། །དཀར་བགེགས་གཉིས་ཀྱིས་སྣ་དྲངས་ཤིང་། །དེ་རྗེས་གཏོར་ཟློག་དར་ནག་ཁྱེར། །གསེར་སྐྱེམས་གཏོར་མ་འབུལ་ལུགས་རྣམས། །ཕལ་ཆེར་མཐོང་བ་བརྒྱུད་ལྟར་ཤེས། །ཧ་ཀྱང་ཀུན་གྱིས་ཤེས་མོད་ཀྱིས། །དྲི་གླུད་ལ་སོགས་མི་གཙང་རྫ་ས། །མགོ་གསུམ་ཉིད་ལ་མཆོད་མི་རུང་། །ཀླུ་དང་ས་བདག་ཀུན་གྱི་དཔོན། །ཀླུ་བདུད་
མགོ་དགུ་ཞེས་ཀྱང་། །ས་བདག་ནཱ་ག་རཀྵ་ནི། །མགོ་གསུམ་འདི་ཉིད་ཡིན་ངེས་ཏེ། །ས་བོན་ཡི་གེ་ཕེ་དང་ནི། །སྲོག་སྔགས་ཕེ་ཤ་ཀེ་རུ་ཧཱུཾ། །ནཱི་ག་རཀཱ་དང་ནི་གཅིག །དེ་ཕྱིར་འདི་ལ་གཙང་སྦྲ་གལ་ཆེའོ། །འོན་ཀྱང་གཙང་སྦྲ་བྱེད་མཁན་དཀོན་པར་སྣང་། །འདི་ནི་མི་ཤེས་ལོག་པ་ཆེན་པོ་སྣང་། །མགོ་གསུམ་ཞེས་བྱ་འདྲེ་ངན་མ་ཡིན་ཏེ། །ས་བདག་རིགས་ཀྱི་ཆོས་སྐྱོང་གཅིག་ཡིན་ནོ། །བཙོག་གླུད་ངར་མི་ལོགས་སུ་བཅའ་བ་གཅེས། །དེ་དག་བཅའ་ཚོགས་ཞལ་གདམས་མདོར་བསྡུས་ཡིན། །སྔགས་འཆང་ཨོ་རྒྱན་བཀྲ་ཤིས་ཀྱིས་བསྐུལ་ནས། །༧རཱ་ག་ཨ་སྱས་འཕྲལ་དུ་ངག་ནས་སྨྲས། །བསྐུལ་བ་པོ་དེས་འཕྲལ་དུ་ཡི་གེར་བཀོད། །ཕྱི་རབས་སྔགས་འཆང་འགལ་ལ་ཕན་པར་ཤོག ༈ ཞར་བྱུང་ཤིང་རིས་བྲི་བའི་ཞལ་གདམས་ནི། །ཤིང་རིས་བཅུ་གཉིས་སྟོད་ན་བྲི་ལུགས་འདྲ། །རྩེ་ལ་ནོར་བུ་དེ་འོག་ཉི་ཟླ་དང་། །དེ་འོག་དུང་ཕྲེང་དེ་འོག་དར་དཔྱང་བྲི། །དེ་འོག་སྤྲིན་གྱི་རི་མོ་བྲི་བ་རྣམས། །ཤིང་རིས་སྤྱི་ཡི་རི་མོ་བྲི་ལུགས་ཡིན། །དེ་འོག་ལོ་སྐོར་བཅུ་གཉིས་ནི། །མི་ལུས་དུད་འགྲོ་སོ་སོའི་མགོ །ལག་པ་བྱ་སྡེར་ཐལ་མོ་སྦྱར། །གཤོག་པ་
བྱ་ཡི་གཤོག་པ་ལ། །ཁོག་སྨད་སྦྲུལ་དུ་འཁྱིལ་བ་བྲི། །དེ་དག་རྣམས་ཀྱི་བར་མཚམས་སུ། །ས་བཅད་རི་མོ་གཉིས་སམ་གསུམ། །དེ་ཡི་ཤིང་རིས་མ་གང་ན། །ས་བཅད་རི་མོ་གཉིས་ཀྱི་བར། །ཁྲམ་རིས་འདྲ་བའི་རྒྱ་གྲམ་གཅིག །དེ་འོག་ཡི་གེ་དབུ་ཅན་གྱི། །བྱི་བ་ལོ་པའི་སྐག་སྒྱུར་ཅིག །ཅེས་སོགས་རིམ་བཞིན་བྲི་བར་བྱ། །ཤར་ཕྱོགས་ཁྲམ་ཤིང་དཀར་པོ་ལ། །ཤར་ཕྱོགས་དྲི་ཟའི་ཁྲམ་ཁ་ཟློག །ལྷོ་ཕྱོགས་ཁྲམ་ཤིང་སེར་པོ་ལ། །ལྷོ་ཕྱོགས་གཤིན་རྗེའི་ཁྲམ་ཁ་ཟློག །ནུབ་ཕྱོགས་ཁྲམ་ཤིང་དམར་པོ་ལ། །ནུབ་ཕྱོགས་ཀླུ་ཡི་ཁྲམ་ཁ་ཟློག །བྱང་ཕྱོགས་ཁྲམ་ཤིང་ལྗང་གུ་ལ། །བྱང་ཕྱོགས་གནོད་སྦྱིན་ཁྲམ་ཁ་ཟློག །ཕོ་ཤིང་སྟག་པའི་ཕོ་ཐོང་ལ། །སྐྱེས་པ་ཕོ་ཡི་གཟུགས་བྲིས་འཛུགས། །སྐྱེས་པ་ཕོ་ཡི་སྐག་བཟློག་ཅིག །མོ་ཤིང་གླང་མའི་མོ་ཐོང་ལ། །ཟ་མ་མོ་ཡི་གཟུགས་བྲིས་འཛུགས། །ཟ་མ་མོ་ཡི་སྐག་བཟློག་ཅིག །བུ་ཤིང་ཚར་བུའི་བུ་ཐོང་ལ། །བྱིས་སྦ་ཆུང་གི་གཟུགས་བྲིས་འཛུགས། །བྱིས་སྦ་ཆུང་གི་སྐག་བཟློག་ཅིག །དེ་དག་ཀུན་གྱི་རྒྱབ་ཏུ་ནི། །འཇའ་རིས་བྲི་བ་ཀུན་གྱི་སྲོལ། །དེ་བཞིན་མདའ་བཀྲ་འཕང་བཀྲ་ཡང་། །རྒྱས་པར་འཛོམ་ན་
བཅུ་གསུམ་ཙམ། །འབྲིང་དུ་བདུན་རེ་ལྔ་རེ་དང་། །བསྡུ་ན་གསུམ་མམ་རེ་རེས་ཆོག །དེང་སང་མདའ་བཀྲ་འཕང་བཀྲ་ནི། །བཙུགས་སྲོལ་མེད་པས་ཕྱག་ལེན་འཕྱུགས། །ཤིང་རིས་ཡོད་ན་མདའ་བཀྲ་དང་། །འཕང་བཀྲ་མེད་པའི་མདོས་མི་སྲིད། །ཕོ་གླུད་མོ་གླུད་གཙོ་བོ་ནི། །མདའ་བཀྲ་འཕང་བཀྲ་ཡིན་ཕྱིན་རོ། །མདོས་རྣམས་གཞན་ལ་ནམ་མཁའ་ཡང་། །ཤིང་རིས་གྲངས་སུ་མཉམ་པ་མང་། །མགོ་གསུམ་ཉིད་ལ་དེ་མི་སྲོལ། །ནམ་མཁའ་གཅིག་གིས་ཆོག་པ་ཡིན། །འདི་ནི་བསྡུས་པའི་ལུགས་ཡིན་ནོ། །རྒྱས་པར་བྱེད་ན་གདུགས་ནམ་དང་། །སྲིད་གསུམ་ཟིལ་གནོན་ནམ་མཁའ་དང་། །ནོར་བུ་ཏོག་གི་ནམ་མཁའ་སོགས། །ཤིན་ཏུ་རྒྱས་པ་བྱེད་ན་དགོས། །ཆེ་ཚང་སངས་རྒྱས་ཡེ་ཤེས་ཀྱིས། །རི་བོ་ཆེ་རུ་བཅས་པའི་དུས། །ནམ་མཁའ་གསེར་འཕུར་མཉམ་མོ་སྐད། །དེང་སང་ནམ་མཁའ་གཅིག་མ་གཏོགས། །ནམ་གདུགས་ཙམ་ཡང་སྲོལ་མི་འདུག །ལ་ལས་ལིང་ག་བསྒྲལ་ཆོག་ནི། །ཉིན་རེ་རེ་རེ་བྱེད་པ་སོགས། །ཕྱག་ལེན་མི་འདྲ་འགའ་ཡོད་དེ། །ང་ཡི་སློབ་དཔོན་སྔགས་འཆང་བ། །པྲ་བ་ཤྭ་རའི་ཕྱག་ལེན་འདི། །སྔོན་གྱི་སྔགས་པ་
མང་པོ་ཡི། །ཕྱག་ལེན་རྒྱུན་ལྡན་ཁོ་ན་སྟེ། །རང་བཟོ་ཕྱག་ལེན་མ་ཡིན་པས། །བཅའ་ཚོགས་རྒྱས་བསྡུས་འདོན་ལུགས་ཀུན། །མཐོང་བ་བརྒྱུད་པ་རྣམ་དག་ཡིན། །འདོན་ཆོག་རྒྱས་བསྡུས་མང་ན་ཡང་། །དངོས་གཙང་དོན་འཐུས་མང་ཉུང་རན། །འགྲིག་ཆོག་བཞིན་དུ་འདོན་པས་འཐུས། །འདི་རུ་མ་ཚང་འདོན་ཆའི་ཚོགས། །པོ་ཏི་མང་བ་གཞན་འདུག་ཀྱང་། །མ་ཚང་སྙམ་དུ་བྲི་མི་དགོས། །འདི་ཉིད་བཏོན་པས་ཐམས་ཅད་འཐུས། །མགོ་གསུམ་གཙོ་བོར་བྱེད་འདོད་ན། །འདོན་ཆ་མང་བས་ཟབ་པ་མིན། །སྔགས་དང་དམིགས་པ་འབད་པ་ཟབ། །དེ་སྐད་ཤིང་རིས་བྲི་ཐབས་སོགས། །ཞལ་གདམས་ཉེ་བར་མཁོ་བ་དེ། །དྲང་སྲོང་རཱ་ག་ཨ་སྱས་གསུངས། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།