མགོ་གསུམ་བཞུགས་གསོལ་དང་དགོངས་གསོལ།
མགོ་གསུམ་བཞུགས་གསོལ་དང་དགོངས་གསོལ་གཉིས་དཔེ་རྙིང་ནས་ཁ་སབ་པ་འདི་ལྟ་སྟེ། །ཀྱཻ། སྟོབས་ལྡན་མི་ནག་མགོ་གསུམ་འཁོར་དང་བཅས། །སྔོན་གྱི་ཁས་བླངས་དམ་བཅས་བཞིན། །སྔགས་འཆང་ཡོན་མཆོད་འཁོར་བཅས་ཀྱིས། །བྱད་ཟློག་ཆེན་པོ་མཛད་པ་དང་། །བན་བྱད་བོན་བྱད་བཟློག་པ་དང་། །ལྟས་ངན་སྣ་ཚོགས་བསྒྱུར་བའི་ཕྱིར། །འབྱུང་བ་ལྔ་ཡི་གདན་ལ་སྡོད། །ས་བདག་རྒྱལ་པོ་ཡིན་པའི་ཕྱིར། །མི་ཁ་སྣ་ཚོགས་གདན་ལ་སྡོད། །ས་མ་ཡ་ཏིཥྛ་ལྷན། ཕྱག་འཚལ་བ་ནི། ཨརྒྷཾ་སོགས། ཧཱུྃ༔ འབྱུང་བ་ལྔ་ཡི་གདན་སྟེང་ནས། །ས་བདག་གཟའ་ཀླུ་ཁྲོས་པའི་སྤྲུལ་པ་ལས། །ནག་པོ་ཆེན་པོ་འཇིགས་བྱེད་མགོ་གསུམ་པོ། །ལག་དྲུག་སྟོབས་ཆེན་རྔམ་པའི་སྐུ་ལ་ཕྱག་འཚལ་བསྟོད། །ཧ་ཧ་ཧཱུྃ་ཕཊ་ང་རོ་འབྲུག་སྒྲ་སྒྲོག །སྣང་སྲིད་དབང་བསྒྱུར་གསུང་ལ་ཕྱག་འཚལ་བསྟོད། །ཡོན་ཏན་སྟོབས་ཀྱིས་སྲིད་པའི་བྱོལ་བཟློག་མཛད། །སྟོབས་ཆེན་ཡོན་ཏན་ལྡན་ལ་ཕྱག་འཚལ་བསྟོད། །ཕྲིན་ལས་གང་བཅོལ་ཐོགས་མེད་ལས་རྣམས་སྒྲུབས། །བཀའ་ཉན་ཕྲིན་ལས་བསྒྲུབ་ལ་ཕྱག་འཚལ་བསྟོད། །དེ་ནས་དགོངས་གསོལ་
ནི། །ཀྱཻ། གསོན་ཅིག་དགོངས་ཤིག་ལྷ་སྲིན་སྡེ་བརྒྱུད་ཚོགས། །འཇམ་དཔལ་དབྱངས་ཀྱི་དགོངས་པའི་ཚིག །མ་འདོད་པ་ལ་ཡས་མི་སྟེར། །མི་འདོད་པ་ལ་གླེད་མི་སྦྱིན། །མི་རྟོག་པ་ལ་གཏོ་མི་བསྔོ། །ཡོན་བདག་འདི་ཡི་དོན་ཆེད་དུ། །གཏོ་མཁན་རྒྱལ་པོ་བདག་གིས་ཀྱང་། །གཏོ་ཡི་རབ་འབྱམས་དཀྱིལ་འཁོར་འདིར། །འབྱུང་བ་ལས་ཀྱི་གཏོ་བྱེད་དོ། །སྲིད་པ་ལས་ཀྱི་ཁོག་སྦྱོར་རོ། །ཡེ་ཤེས་ལྷ་ཚོགས་དགོངས་སུ་གསོལ། །གནམ་ས་གཉིས་པོས་གཟུ་དཔང་མཛོད། །གསལ་བའི་ཉི་མས་གཟུ་དཔང་མཛོད། །རི་རབ་ཆེན་པོས་གཟུ་དཔང་མཛོད། །འབྱུང་བའི་ལྷ་ལྔས་གཟུ་དཔང་མཛོད། །ཀྱཻ། ང་ནི་གཏོ་མཁན་རྒྱལ་པོ་ཡིན། །དུས་གསུམ་སངས་རྒྱས་ཐམས་ཅད་ཀྱིས། །གཏོ་མཁན་རྒྱལ་པོར་དབང་ཡང་བསྐུར། །སྤྱད་མཁན་རྒྱལ་པོར་ལུང་ཡང་འབྱིན། །ཡེ་ཤེས་ལྷ་ལྔ་ལུས་ལ་བཀོད། །གཏོ་མཁན་རྒྱལ་པོར་ཁ་འཛིན་མཛོད། །ཁ་འཛིན་ལྷ་ལ་མཆོད་པ་འབུལ། །སྔོན་མོ་ནས་ཀྱི་སྙིང་ཁུ་དང་། །འདོད་འཇོ་བ་ཡི་འོ་མ་དང་། །དཀར་གསུམ་མངར་གསུམ་གཏོར་མ་དང་། །ཇ་ཕུད་ཆང་ཕུད་མཆོད་པར་
འབུལ། །གཏོ་བཅོས་ཡག་པའི་ཁ་འཛིན་མཛོད། །ཕྱོགས་བཞི་མཚམས་བརྒྱད་སྟེང་འོག་བཅུ། །འབྱུང་པོ་མང་པོ་ཀུན་ཉོན་ཅིག །ཧཱུྃ། སྟོང་གསུམ་སྟོང་གི་འཇིག་རྟེན་ཁམས། །སྲིད་གསུམ་གཏོ་ཡི་དཀྱིལ་འཁོར་འདིར། །གཙུག་ལག་སྲིད་པའི་ལྷ་འདྲེ་དང་། །ཁམས་བརྒྱད་སྲིད་པའི་རྒྱལ་པོ་དང་། །འབྱུང་བ་ལྔ་ཡི་ས་བདག་དང་། །སྣང་སྲིད་ལྷ་འདྲེ་ཐམས་ཅད་ལ། །འཁོན་པ་ཟླུམ་ཞིང་སྲོག་གླུད་འཇལ། །སྲིད་པའི་རྒྱལ་པོའི་གཟུ་དཔང་མཛོད། །ཚངས་པ་དུང་གི་ཐོར་ཚུགས་ཅན་པ་གསུམ་གྱི་བདག་པོ་ཡིན། །སྲིད་པ་གསུམ་གྱི་གཞི་ཡིན་པས། །གཏོ་བཅོས་ཡག་པའི་ཁ་འཛིན་མཛོད། །དཀར་པོའི་ཕྱོགས་རྣམས་སྐྱོང་བར་མཛོད། །ཧཱུྃ། རི་རབ་རི་ཡི་རྩེ་མོ་ནས། །རྣམ་པར་རྒྱལ་བའི་ཁང་བཟང་ནས། །ལྷ་ཡི་རྒྱལ་པོ་ཚངས་པ་ནི། །ལྷ་སྲིན་ཀུན་གྱི་གཟུ་དཔང་མཛོད། །དཀར་པོའི་ཕྱོགས་རྣམས་སྐྱོང་དུ་གསོལ། །དེང་གི་གཟུ་དང་དཔང་མཛོད་ཅིག །ས་ཡི་ལྷ་མོ་བརྟན་མ་ནི། །འདས་དང་མ་བྱོན་ད་ལྟར་གྱི། །སངས་རྒྱས་ཀུན་གྱི་ཡུམ་ཡིན་པས། །སྔོན་ཚེ་སྟོན་པས་གཟུ་དཔང་མཛོད། །
དེང་གི་གཟུ་དང་དཔང་མཛོད་ཅིག །དེང་གི་སྟོན་པས་གཟུ་དཔང་མཛོད། །གཏོ་བཅོས་ཡག་པའི་ཁ་འཛིན་མཛོད། །གཏོ་ཡི་རབ་འབྱམས་དཀྱིལ་འཁོར་འདིར། །འབྱུང་བ་ལས་ཀྱི་གཏོ་བྱེད་དོ། །སྲིད་པ་ལས་ཀྱི་ཁོག་སྦྱོར་རོ། །གཏོ་མཁན་བདག་ལ་མ་སྡིག་ཅིག །སྒོ་ཡི་ནོར་ལ་མ་སྡིག་ཅིག །བཞུགས་གསོལ་དང་དགོངས་གསོལ་གཉིས་དཔེ་རྙིང་ནས་ཁ་བཀང་བ། སརྦ་མངྒ་ལཾ། ཤུ་བྷཾ། ཀུརླན་ཏུ། ཛ་ཡ། ཟིལ་གནོན་དཔུང་བཅོལ་འདོན། མཆན།