ཟློག་བྱེད་ནག་པོ་མགོ་གསུམ་གྱི་གླུད་གྱེར།
ཟློག་བྱེད་ནག་པོ་མགོ་གསུམ་གྱི་གླུད་གྱེར་བཞུགས་སོ།
ནག་པོ་མགོ་གསུམ་གྱི་གླུད་གྱེར་ནི་འདི་སྐད་དོ།། ཧཱུྃ། འཕགས་པ་འཇམ་དཔལ་བཀའ་བྱུང་བས། །ལན་ཆགས་གླུད་ཀྱི་བདག་པོ་དང་། །ལྷ་སྲིན་སྡེ་བརྒྱད་མ་ལུས་རྣམས། །དེ་རིང་འདིར་བྱོན་ཡས་གླུད་ལོངས། །བདག་དང་རྒྱུ་སྦྱོར་ཡོན་བདག་གིས། །ལུས་ངག་ཡིད་གསུམ་བརྗེ་བའི་གླུད། །རིན་ཆེན་འབྲུ་སྣའི་ངར་མི་འདི། །ཁམས་དང་སྐྱེ་མཆེད་འབུར་དུ་བཞེངས། །ཡན་ལག་ཐབས་ཤེས་རྫུ་འཕྲུལ་ལྡན། །འགྱིངས་ཤིང་ལྡན་པའི་སྐུ་ལུས་ལ། །དར་ཟབ་སྣ་ཚོགས་གོས་སུ་བསྐོན། །གཟི་ཆུང་རི་བཀྲ་སྤྱན་དུ་བཞག །སྤྱན་མིག་ཁྲ་དང་ཁྱུགས་སེ་ཁྱུག །སྒྲོན་
བུ་དཀར་པོ་བཞད་པའི་ཚེམས། །ཞལ་ནས་གསུང་སྙན་ལྷངས་སེ་ལྷང་། །དར་དམར་ལེ་བརྒན་སྨྲ་བའི་ལྗགས། །ཁ་ནས་སྨྲ་ཚིག་ཤ་ར་ར། །སྟབས་སྡུག་གར་དང་རོལ་མོ་མཁན། །སྟག་དང་གཟིག་གི་ལག་པ་ལ། །ཕྱག་རྒྱ་རོལ་མོ་ཁྱུགས་སེ་ཁྱུག །དྲེད་དང་དོམ་གྱི་རྐང་པ་ལ། །གར་དང་བྲོ་རྡུང་ཁྲིགས་སེ་ཁྲིག །ཁ་མིག་མཚལ་གྱིས་བྱུག་པ་ལ། །སྔོན་དམར་འཇའ་འོད་ལམས་སེ་ལམ། །ཁོང་བཅུད་གསེར་དང་གཡུ་ལས་བྱས། །ཁམས་དང་སྐྱེ་མཆེད་འདི་ལ་ཚང་། །དབང་པོ་རྣམ་ལྔ་འདི་ལ་ཚང་། །སྔགས་འཆང་རྒྱལ་པོའི་མཐུ་སྟོབས་
ཀྱིས། །གྱེར་གྱེར་དེ་ནི་བགྲང་བགྲང་ནས། །སྐྱེས་བུ་དམག་ལ་ཆས་པ་འདྲ། །བརྫངས་བརྫངས་དེ་ནི་བརྒྱན་བརྒྱན་ནས། །བུད་མེད་བག་ལ་ཆས་པ་འདྲ། །བསྟབ་བསྟབ་དེ་ནི་གཡེངས་གཡེངས་ནས། །རྒོད་པོའི་ནམ་འཕང་བསྐྱོད་པ་འདྲ། །ཕྱག་ཏུ་མདུང་དར་ཁྲོ་བོ་རྣམས། །སྟག་རལ་གཡས་ལ་གཟིག་ཤུབས་གཡོན། །ལེགས་ལྡན་ངར་གྱི་མི་པོ་ཆེ། །སྤུང་སྤུང་བྲིས་བྲིས་བཀོལ་བཀོལ་ནས། །གཏོ་མཁན་ཡོན་བདག་གླུད་དུ་ནི། །སྣང་སྲིད་ལྷ་འདྲེའི་སྤྱན་སྔར་འབུལ། །སྐུ་གསུང་ཐུགས་མཆོག་དགྱེས་པར་མཛོད། །ཤ་རི་རིན་དང་ཁྲག་ཚབ་མཛོད། །འབྲུ་མཆོག་ངར་གྱི་མི་ཆེན་འདི། །མི་ནག་མགོ་གསུམ་ཁྱོད་ལ་འབུལ། །ཕོ་རྒྱུད་དལ་ཁ་གཡས་སུ་སྒྱུར། །མོ་རྒྱུད་ཁྲམ་ཁ་གཡོན་དུ་སྒྱུར། །སྤྱི་བདུད་གཡོས་པ་ཐད་དུ་སྒྱུར། །ཆུང་བདུད་ཆུང་སྲི་མཁའ་ལ་སྒྱུར། །སྐག་ངན་འཚེར་རྩུབ་ཐམས་ཅད་སྒྱུར། །དགྲ་སྣ་མཚོན་སྣ་ཡམས་སྣ་སྒྱུར། །མི་ཁོ་བྲ་མཆུ་ལྟས་ངན་སྒྱུར། །འབྲུ་མཆོག་ངར་གྱི་མི་ཆེན་འདི། །མི་དམར་མགོ་གསུམ་ཁྱོད་ལ་འབུལ། །གཤིན་རྗེའི་ཁྲམ་ཁ་བསྒྱུར་དུ་གསོལ། །བདུད་ཀྱི་ཆོ་འཕྲུལ་བཟློག་ཏུ་གསོལ། །བཙན་
གྱི་ཤོར་མདའ་བསྒྱུར་དུ་གསོལ། །ཡམས་ནད་རིམས་ནད་བསྒྱུར་དུ་གསོལ། །ལོ་སྐག་ཞག་སྐག་ཟ་སྐག་བསྒྱུར་དུ་གསོལ། །འབྲུ་མཆོག་ངར་གྱི་མི་ཆེན་འདི། །མ་མོ་ནག་མོ་ཁྱོད་ལ་འབུལ། །མ་མོའི་ཁྲག་ནད་བསྒྱུར་དུ་གསོལ། །ལྟས་ངན་ཐམས་ཅད་བསྒྱུར་དུ་གསོལ། །།ཐན་ལྟས་ཆོ་འཕྲུལ་བསྒྱུར་དུ་གསོལ། །ནོར་ལུག་ལྷག་ཆད་ཐན་སྣ་སྒྱུར། །རི་བྱ་ཁྱིམ་དུ་འོང་བའི་ཐན་སྣ་སྒྱུར། །རི་དྭགས་ཁྱིམ་དུ་འོང་བའི་ཐན་སྣ་སྒྱུར། །གཅན་གཟན་སྡེར་ཐོག་ཐན་སྣ་སྒྱུར། །ལྟས་ངན་བརྒྱད་ཅུ་རྩ་གཅིག་སྒྱུར། །འབྲུ་མཆོག་ངར་གྱི་མི་ཆེན་འདི། །ཤང་ཤང་བྲ་མཆུ་ཁྱོད་ལ་འབུལ། །བརྒྱ་ཡི་མི་ཁ་བསྒྱུར་དུ་གསོལ། །སྟོང་གི་བྲ་མཆུ་བསྒྱུར་དུ་གསོལ། །མི་ཁ་གཏམ་ངན་བསྒྱུར་དུ་གསོལ། །མི་ཁའི་གླེང་གཞི་དགྲ་ལ་སྒྱུར། །འབྲུ་མཆོག་ངར་གྱི་མི་ཆེན་འདི། །གླང་ཆེན་སྣ་ཡོན་ཁྱོད་ལ་འབུལ། །དགྲ་སྣ་གྱོད་སྣ་བཙོན་སྣ་སྒྱུར། །བག་སྣ་གོད་སྣ་གཅན་སྣ་སྒྱུར། །ཡམས་སྣ་རིམས་སྣ་དམག་སྣ་སྒྱུར། །གྲི་སྣ་ནལ་སྣ་འགྲོན་སྣ་བསྒྱུར། །སྣ་འདྲེ་ཐན་སྣ་ཐམས་ཅད་སྒྱུར། །འབྲུ་མཆོག་ངར་གྱི་མི་ཆེན་འདི། །སྤར་ཁ་
བརྒྱད་ཀྱི་ས་བདག་དང་། །སྨེ་བ་དགུ་ཡི་ས་བདག་དང་། །ལོ་སྐོར་བཅུ་གཉིས་ཀུན་ལ་འབུལ། །བྱི་རྟ་གཉིས་ཀྱི་རུ་ཆོད་དགྲ་ལ་སྒྱུར། །གླང་ལུག་གཉིས་ཀྱི་ཕུང་གྱོད་དགྲ་ལ་སྒྱུར། །སྟག་སྤྲེལ་གཉིས་ཀྱི་མཆེ་བརྡར་དགྲ་ལ་སྒྱུར། །ཁྱི་འབྲུག་གཉིས་ཀྱི་ཐོག་རྫིས་དགྲ་ལ་སྒྱུར། །བྱ་ཡོས་གཉིས་ཀྱི་བྱེ་བྲལ་དགྲ་ལ་སྒྱུར། །ཕག་སྦྲུལ་གཉིས་ཀྱི་དགྲ་གཤེད་བསྒྱུར་དུ་གསོལ། །ལོ་སྐག་ལོ་གཤེད་བདུན་ཟུར་བསྒྱུར་དུ་གསོལ། །འབྲུ་མཆོག་ངར་གྱི་མི་ཆེན་འདི། །ས་བདག་སྤར་ཁ་བརྒྱད་ལ་འབུལ། །ལི་ཁོན་ཕྱིང་དྲིལ་བྱེད་པ་བདུན་ཟུར་སྒྱུར། །གིན་ཟོན་གཉེན་སྦྱོར་ཉེས་པ་སྒྱུར། །དྭ་ཟིན་གྲི་ཕུར་ཁྲག་ངོ་སྒྱུར། །ཁེན་ཁམ་མྱ་ངན་བྱེད་པ་བསྒྱུར་དུ་གསོལ། །སྤར་ཁ་རང་བདུད་འབེབས་པ་བསྒྱུར་དུ་གསོལ། །འབྲུ་མཆོག་ངར་གྱི་མི་ཆེན་འདི། །སྨེ་བ་དགུ་ཡི་ལྷ་ལ་འབུལ། །ན་ངོ་གཟེར་ངོ་བསྒྱུར་དུ་གསོལ། །ཤི་ངོ་ཆད་ངོ་བསྒྱུར་དུ་གསོལ། །མྱ་ངན་སྡུག་བསྔལ་འོང་བ་བསྒྱུར་དུ་གསོལ། །བྱུར་འདྲེ་མི་ཁ་ཆས་པ་བསྒྱུར་དུ་གསོལ། །བྱེ་བྲལ་ཕུང་གྱོད་འོང་བ་བསྒྱུར་དུ་གསོལ། །ས་བདག་སྨེ་བ་དགུའི་ཆད་པ་བསྒྱུར་དུ་གསོལ། །འབྲུ་མཆོག་
ངར་གྱི་མི་ཆེན་འདི། །གཡས་ཀྱི་རུ་འདྲེན་བདུད་པོ་ཁྱོད་ལ་འབུལ། །བདུད་ཀྱི་ཁྲམ་ཁ་ཆོ་འཕྲུལ་དགྲ་ལ་སྒྱུར། །བདུད་ཀྱི་ཞགས་པ་བཟུང་བ་དགྲ་ལ་སྒྱུར། །བདུད་བཞིའི་ཁྲམ་ཁ་འདེབས་པ་དགྲ་ལ་སྒྱུར། །བདུད་རྒྱལ་རལ་ཀ་དགྲ་ལ་སྒྱུར། །འབྲུ་མཆོག་ངར་གྱི་མི་ཆེན་འདི། །གཡོན་གྱི་རུ་འདྲེན་བཙན་རྒྱལ་ཁྱོད་ལ་འབུལ། །བཙན་གྱི་ཁ་གཡོག་འབེབས་པ་དགྲ་ལ་སྒྱུར། །བཙན་མདའ་ཤོར་བ་འཕེན་པ་དགྲ་ལ་བསྒྱུར། །གྲི་བཙན་རྒྱལ་ནད་གཏོང་བ་དགྲ་ལ་སྦྱར། །འབྲུ་མཆོག་ངར་གྱི་མི་ཆེན་འདི། །བྱུར་མི་ལའི་རྒྱལ་པོ་རི་བོང་བཅིབས་པ་ཁྱོད་ལ་འབུལ། །བྱུར་སྣ་བྱུར་འདྲེ་བསྒྱུར་དུ་གསོལ། །མི་ལ་བྱུར་ཆེ་ཅི་བྱས་མི་ཉན་དགྲ་ལ་སྒྱུར། །ནོར་ལ་བྱུར་ཆེ་གོད་ཁ་དགྲ་ལ་སྒྱུར། །བྱུར་གྱི་དམག་ཚོགས་དགྲ་ལ་སྒྱུར། །གྱུར་གྱི་སྐྱས་སྣ་དགྲ་ལ་སྒྱུར། །བྱུར་ཕོའི་ལྟས་ངན་དགྲ་ལ་སྒྱུར། །གྱུར་མོའི་མྱ་ངན་དགྲ་ལ་སྒྱུར། །གྱུར་ཕུག་ཇོ་ར་བྱེད་པ་དགྲ་ལ་སྒྱུར། །བྱུར་སྣ་ཡམས་སྣ་དགྲ་ལ་སྒྱུར། །འབྲུ་མཆོག་ངར་གྱི་མི་ཆེན་འདི། །མི་ཁའི་རྒྱལ་མོ་བ་རུ་མ་ལ་འབུལ། །རྒྱུ་སྦྱོར་ཡོན་གྱི་བདག་པོ་ལ། །མ་ཉེས་
ཁ་ཡོག་འོང་བ་དང་། །མ་བསད་སྟོང་ཁྲིད་དེད་པ་དང་། །གྲོས་བྱས་གཞན་གྱིས་མི་བཟོད་པ། །ཕོ་བརྒྱའི་ཁ་ནས་མི་ཁ་མདའ་ལྟར་གསོར་བ་དང་། །མོ་བརྒྱའི་ཁ་ནས་མི་ཁ་བལ་ལྟར་གཡེངས་བ་དང་། །བཙུན་སྡེ་འཚོགས་པའི་མི་ཁ་དགྲ་ལ་བསྒྱུར་དུ་གསོལ། །སྡེ་བརྒྱད་ལྷ་འདྲེའི་བྱད་ཁ་སྟོན་པ་བཟློག་ཏུ་གསོལ། །མོ་རྨིས་པྲ་ལྟས་ངན་པ་བསྒྱུར་དུ་གསོལ། །སྐག་བདུད་གཤེད་གསུམ་ཐམས་ཅད་བཟློག་ཏུ་གསོལ། །ཀྱཻ། ནག་པོ་ཆེན་པོ་དགྲ་ལ་བྷྱོ༔ །ཟློག་བྱེད་ཆེན་པོ་དགྲ་ལ་བྷྱོ༔ །གཏུམ་བྱེད་ཆེན་པོ་དགྲ་ལ་བྷྱོ༔ །སྟོབས་ལྡན་ཆེན་པོ་དགྲ་ལ་བྷྱོ༔ །ཟ་བྱེད་ཆེན་པོ་དགྲ་ལ་སྦྱོ། །ཟློག་བྱེད་ཆེན་པོ་དགྲ་ལ་བྷྱོ༔ །སྒྱུར་བྱེད་ཆེན་པོ་དགྲ་དང་བགེགས་ལ་བློ་བྷྱོ༔་ཟློག་ཟློག །ཟློག་བྱེད་ནག་པོ་མགོ་གསུམ་གྱི་གླུད་གྱེར་རྫོགས་སོ། །ཟློག་སྒྱུར་འདོན། མཆན། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།