༼ཀ༽ །མི་ནག་མགོ་གསུམ་གྱིས་དང་པོ་ཡར་ཞུས་པའི་དོན།
༼ཀ༽ །མི་ནག་མགོ་གསུམ་གྱིས་དང་པོ་ཡར་ཞུས་པའི་དོན་བཞུགས་སོ།། ཡར་ཞུས་དང་པོའོ། །ཀྱཻ། སྔགས་འཆང་བདག་པོའི་ཞལ་ན་རེ། །ཀོང་ཙེ་འཕྲུལ་རྒྱལ་ཕྱིར་གསོན་དང་། །དེ་རིང་དགོས་དོན་ཞུ་བ་ཚིག་གསུམ་བྱེད། །དེ་རིང་གཏོ་བཟློག་གོང་འདི་རུ། །འཕགས་པ་འཇམ་དཔལ་བཀའ་སྩལ་པ། །མི་ནག་མགོ་གསུམ་མདོས་བཅས་ནས། །སྲུང་ཟློག་བསད་གསུམ་ལས་བྱས་པས། །མགོ་བོ་གསུམ་པའི་ཆོ་འབྲང་ལ། །འདི་སུ་དང་སུ་ཡི་རིགས་ལ་ཆད། །ཕ་དང་མེས་པོ་གང་འདྲ་ཡིན། །ལྷ་ཀླུ་གཟའ་དང་གང་ལ་ཆད། །ངེས་པར་བདག་ལ་བཀའ་སྩོལ་ཅིག །ཡར་ཞུས་གཉིས་པ། །ཀྱཻ། ཀོང་ཙེ་འཕྲུལ་གྱི་རྒྱལ་པོ་སྙན་གསོན་དང་། །ཐུགས་ཀྱིས་དགོངས་ལ་སྤྱན་གྱིས་གཟིགས། །མི་ནག་མགོ་གསུམ་འདི་ཀུན་གྱིས། །སྐུ་མདོག་སྨུག་ལ་ནག་པ་ཅི་ཡི་དོན། །།ལག་པ་བྱ་སྡེར་འདུག་པ་ཅི་ཡི་དོན། །གླང་སྟག་ཕག་ཞལ་ཡོད་པ་ཅི་ཡི་དོན། །ཕྱག་དྲུག་དང་པོ་ཁྲམ་ཤིང་ཅི་ཡི་དོན། །བར་མ་ཐལ་མོ་བརྡབ་པ་ཅི་ཡི་དོན། །འོག་མ་ཕྱག་རྒྱ་གླུད་ལེན་ཅི་ཡི་དོན། །མཚན་མ་སྦལ་མགོར་འདུག་པ་ཅི་ཡི་
དོན། །མཇུག་མ་སྦྲུལ་དུ་འདུག་པ་ཅི་ཡི་དོན། །བ་སྤུ་ཁབས་སུ་འདུག་པ་ཅི་ཡི་དོན། །ངེས་པར་བདག་ལ་བཀའ་སྩོལ་ཅིག །ཡེར་ཞུས་གསུམ་པ། །ཀྱཻ། ཀོང་ཙེ་རྒྱལ་པོ་བདག་ལ་གསོན། །མི་ནག་མགོ་གསུམ་མཐུ་ཆེན་ལ། །སྤར་ཁ་བརྒྱད་ཀྱི་བསྐོར་བ་ཅི་ཡི་དོན། །སྨེ་བ་ལོ་སྐོར་བསྐོར་བ་ཅི་ཡི་དོན། །མི་དམར་ཤང་ཤང་སྔོན་དུ་འགྲོ་བ་ཅི་ཡི་དོན། །མ་མོ་རྔ་ཞོན་རྒྱབ་ནས་འདེད་པ་ཅི་ཡི་དོན། །བལ་མོ་ཆུ་སྲིན་མགོ་ཅན་གྱིས། གཏོར་ཟོར་ཐོད་ཟོར་བསྣམས་པ་ཅི་ཡི་དོན། །ཤང་ཤང་བྲ་མཆུ་ལས་མཁན་ཅི་ཡི་དོན། །མགོ་གསུམ་སྤྲུལ་པ་བརྒྱད་ཀྱིས་བསྐོར་བ་ཅི་ཡི་དོན། །ཡ་ཐན་མ་ཐན་བར་ཐན་གསུམ། །ཐན་རིགས་དགུ་ཡིས་བསྐོར་བ་ཅི་ཡི་དོན། །གླང་ཆེན་རོལ་དུ་ཁྲིད་པ་ཅི་ཡི་དོན། །ངར་མི་ཚངས་བུའི་བསྐོར་བ་ཅི་ཡི་དོན། །ངེས་པར་བདག་ལ་བཀའ་སྩོལ་ཅིག །ཡར་ཞུས་བཞི་པ། །ཀྱཻ། ཀོང་ཙེ་གཏོ་མཁན་ཕྱིར་གསོན་དང་། །མི་ནག་མགོ་གསུམ་འཁོར་བཅས་ལ། །ཤ་ཁྲག་གཏོར་མས་བསྐོར་བ་ཅི་ཡི་དོན། །བྷ་ལིང་གཏོར་མས་བསྐོར་བ་ཅི་ཡི་དོན། །མདའ་བཀྲ་བཅུ་གསུམ་བསྐོར་བ་ཅི་ཡི་དོན། །འཕང་
བཀྲ་བཅུ་གསུམ་བསྐོར་བ་ཅི་ཡི་དོན། །རྒྱང་བུ་བཅུ་གསུམ་བསྐོར་བ་ཅི་ཡི་དོན། །ཤུག་ཏི་བཅུ་གསུམ་བསྐོར་བ་ཅི་ཡི་དོན། །ཕོ་ཐོང་མོ་ཐོང་བཙུགས་པ་ཅི་ཡི་དོན། །ནམ་མཁའ་བཅུ་གསུམ་བཙུགས་པ་ཅི་ཡི་དོན། །ཅུང་དམར་ཉེར་གཅིག་བཙུགས་པ་ཅི་ཡི་དོན། །དགྲ་འདྲེ་ལིངྒ་ཞལ་དུ་བསྟབ་པ་ཅི་ཡི་དོན། །མི་གླུད་ཆས་ལྡན་རྟ་ནོར་ར་ལུག་གི །གླུད་ཡས་སྣ་ཚོགས་མདོས་སྔོན་དུ། །བཤམས་པ་ཅི་དོན་ངེས་པར་བཀའ་སྩོལ་ཅིག །ཡར་ཞུས་ལྔ་པའོ། །ཀྱཻ། ཀོང་ཙེ་ཡེ་མཁྱེན་བདག་ལ་གསོན། །ད་རུང་ཊཾ་དགོས་དོན་ཞུ་བ་འདི་ལྟར་ལགས། །མི་ནག་མགོ་གསུམ་འཁོར་བཅས་ཀྱིས། །ཡིན་ལུགས་བདེན་ཚིག་བཤད་ལགས་ཀྱང་། །ད་རུང་རྫོངས་འདེབས་མདོས་འདི་མི་བསྔོ་ན། །ངས་ཀྱང་ཅི་བྱེད་ཆ་ཡང་མེད། །བཟློག་བསྒྱུར་སྒྲུང་གི་མི་བརྗོད་ན། །ཅི་ཡི་ཅི་བཟློག་ངས་མི་ཤེས། །ཡས་ཀྱི་གོ་རིམ་མ་ཕྱེས་ན། །གང་གི་གང་འགྱེད་ཆ་ཡང་མེད། །སྐག།ས་ཁྲམ་ཁ་མ་བཟློག་ན། །ཅི་ཡི་ཅི་བཟློག་ངས་མི་ཤེས། །བདུད་བཙན་ལྷ་འདྲེའི་དལ་ཁ་མ་བཟློག་ན། །ལྷ་འདྲེའི་དལ་ཁ་ཡམས་ཁོ་སུ་ཡིས་བཟློག །ལྷ་འདྲེའི་ཟ་ཁ་མ་
བསྟན་ན། །ལྷ་འདྲེའི་ཟ་ཁ་ཅི་ཡི་བཙང་། །མདོས་ལམ་ཡས་ལམ་མ་བསྟན་ན། །མདོས་འགྲོ་ཡས་འགྲོ་གང་དུ་འགྲོ། །མདོས་རྫོངས་ཡས་རྫོངས་མ་བྱས་ན། །མདོས་ལ་རྫོངས་ཤིག་སུ་ཡིས་བཏབ། །ངར་མི་ཡས་བསྔོ་མ་བྱས་ན། །གླུད་བསྔོ་ཡས་བསྔོ་སུ་ཡིས་བྱེད། །མདོས་ལ་རྫོངས་ཤིག་མ་བཏབ་ན། །གང་འགྲོ་གང་ཁྱེར་ཆ་ཡང་མེད། །དེ་ནས་མདོས་ལ་རྫོངས་ཡས་ཐོབ། །དེ་བས་མདོས་ལ་ལམ་ཞིག་སྟོན། །དེ་བས་མདོས་ཀྱི་ཟ་ཁ་བསྟན་དུ་གསོལ། །མདོས་སྒྲུབ་སྔགས་དང་ཟོར་གྱིས་ཆོད། །ད་ནི་མི་འདུག་ད་ནི་འགྲོ། །དགྲ་བགེགས་སྟེང་དུ་དམག་ལ་ཆས། །ཡེ་མཁྱེན་དེ་ལྟར་ཞུ་བ་ལགས། །སྤྱིར་བོད་ཁམས་བཀྲ་ཤིས་བདེ་ལེགས་ཤོག །འདིར་ཚོགས་ཡོན་མཆོད་བཀྲ་ཤིས་ཤོག །མདོས་སྒབ་ཡང་ནི་བདེ་ལེགས་ཤོག །སྨོན་ལམ་ཐམས་ཅད་བསྟན་པར་ཤོག །རྒྱ་ནག་རི་བོ་རྩེ་ལྔ་ནས། འཕགས་པ་འཇམ་དཔལ་གྱིས། །ཀོང་ཙེ་འཕྲུལ་རྒྱལ་ལ་གསུངས། །དེས་ཝང་སྟེ་འཕྲུལ་རྒྱལ་ལ་གསུངས། དེས་རྒྱ་བཟའ་ཨོང་ཆུང་ལ་གསུངས་ཤིང་དར་བར་མཛད་པའོ། །སརྦ་མངྒ་ལཾ། །