༼ཁ༽ །དང་པོ་གུར་ཁང་བསྒོམ།
༼ཁ༽ །དང་པོ་གུར་ཁང་བསྒོམ། བདག་ལྷར་གསལ་གདབ་གཟི་བརྗིད་བསྐྱེད་ལ་འདི་སྐད་བརྗོད། བཀའ་ལན་གཅིག་པའོ། །ཀྱཻ། མི་ནག་མགོ་གསུམ་ཚུར་ཉོན་དང་། །ཀོང་ཙེ་ཀུན་མཁྱེན་བཀའ་ན་རེ། །ང་ནི་སྔགས་འཆང་བདག་ཉིད་ཀྱིས། །བདེན་པའི་བཀའ་བཤད་གོ་རིམ་འབྱེད། །དེ་རིང་མདོས་བཟློག་གནས་འདི་རུ། །མི་ནག་མགོ་གསུམ་དཔོན་གཡོག་ནི། །འདིར་འཚོགས་ཀུན་གྱི་མེས་པོ་དེ། །རྒྱལ་པོ་འཕགས་པ་ཁྲི་རྗེ་ཡིན། །ཡང་མེས་པོ་ལྷ་མོ་བརྟན་མ་ཡིན། །མེས་པོ་ཧ་ས་གརྒྷ་ཡིན། །ཕྱི་མོ་རུ་སྦལ་རྒྱ་བོ་ཡིན། །ཕ་དེ་ཁེན་པ་རྒན་པོ་ཡིན། །མ་དེ་ཁོན་མ་རྒན་མོ་ཡིན། །སྐག་ཟླ་ཡབ་སྲས་བཅུ་དྲུག་ཡིན། །བློན་པོ་ཁྱབ་འཇུག་ཆེན་པོ་ཡིན། །གོང་ནོན་མི་དཀར་མགོ་གསུམ་ཡིན། །བསད་མཁན་མི་དམར་མགོ་གསུམ་ཡིན། །གཟའ་བདུད་ས་བདག་ཀླུ་ཡི་བུ། །དེ་ལྟར་ཁྱོད་ཀྱི་ཤེས་པར་གྱིས། །ཕྱིར་གསུང་གཉིས་པ། །ཀྱཻ། མདོས་གླུད་བདག་པོ་ཚུར་ཉོན་དང་། །མིག་གི་དབང་པོས་མཐོང་བར་ལྟོས། །རྣ་བའི་དབང་པོས་ཉན་པར་གྱིས། །ཡིད་ཀྱི་དབང་པོས་དྲན་པར་གྱིས། །ཟློག་བྱེད་མི་ནག་མགོ་གསུམ་ནི། །སྐུ་
མདོག་སྨུག་ནག་འདུག་པ་ནི། །དུག་ལྔ་རྩོད་ནས་གཅོད་པ་ཡིན། །ཞལ་གསུམ་ཕྱག་དྲུག་བདེན་པ་ནི། །རྒྱུ་དྲུག་རྩད་ནས་གཅོད་པའི་རྟགས། །གཡས་སྟག་ཞལ་དམར་པོ་ཁྲོས་པ་ནི། །གཟའ་སྤེན་པ་ལྷུམས་སུ་ཞུགས་པའི་བུ། །དབུས་གླང་ཞལ་སེར་ནག་ཁྲོས་པ་ནི། །ཕུར་བུ་ལྷུམས་སུ་ཞུགས་པའི་བུ། །གཡོན་ཕག་ཞལ་ནག་པོ་རྔམས་པ་ནི། །ཟླ་བ་ལྷུམས་སུ་ཞུགས་པའི་བུ། །སེན་མོ་ལྕགས་ཀྱུ་བཀུག་པ་ནི། །དགྲ་བགེགས་སྲོག་རྩ་གཅོད་པ་ཡིན། །ཕྱག་དང་པོས་ཁྲམ་ཤིང་བསྣམས་པ་ནི། །གཤིན་རྗེའི་བྱོལ་ཁ་བཟློག་པ་ཡིན། །བར་མས་ཐལ་མོ་བརྡབ་པ་ནི། །བྱེད་ཁ་མི་ཁ་བཟློག་པ་ཡིན། །ཐ་མས་གླུད་ལེན་ཕྱག་རྒྱ་ནི། །ཡོན་བདག་སྐག་བཟློག་གླུད་ལེན་ཡིན། །ཕོ་རྟགས་སྦལ་མགོར་འདུག་པ་ནི། །ས་བདག་རྒྱལ་པོའི་བུ་ཡིན་རྟགས། །མཇུག་མ་སྦྲུལ་དུ་འདུག་པ་ནི། །ཀླུ་བདུད་ནག་པོའི་བུ་ཡིན་རྟགས། །བ་སྤུ་ཁབ་ཏུ་འདུག་པ་ནི། །གནོད་བྱེད་སྙིང་ལ་གཟིར་བའི་རྟགས། །ཁྱོད་མི་ནག་གྲོལ་ཕུག་སྐྱེས་རྒྱུད་ལགས། །ཕྱིར་གསུང་གསུམ་པ། །ཀྱཻ། ཀོང་ཙེ་ལྷ་ཡི་བཀའ་ན་རེ། །ཁྱོད་མདོས་ཀྱི་བདག་པོ་ཚུར་ཉོན་དང་། །
ངེས་པར་ཁྱོད་ལ་བདག་གིས་བཤད། །མི་ནག་མགོ་བོ་གསུམ་པ་ལ། །སྤར་ཁ་བརྒྱད་ཀྱིས་བསྐོར་བ་དེ། །སྤཆའི་བཀག་གཉན་བཟློག་པ་ཡིན། །ལོ་སྐོར། བཅུ་གཉིས་བསྐོར་བ་དེ། །ལོ་ཟླ་ཞག་དུས་སྐག་བཟློག་རྟགས། །མི་དམར་སྔོན་དུ་ཆས་པ་ནི། །བཟློག་པའི་ལས་རྣམས་འགྲུབ་པ་ཡིན། །མ་མོས་རྒྱབ་ནས་དེད་པ་ནི། །མདོས་སྒབ་མ་མོས་བཅད་པ་ཡིན། །ཆུ་སྲིན་མགོ་ཅན་ཐོད་ཟོར་བསྣམས། །དགྲ་ལ་ཁྲག་ཟོར་འཕེན་པ་ཡིན། །ཤང་ཤང་བྲ་མཆུའི་ལས་བྱེད་པ། །མི་ཁ་དགྲ་ལ་བཟློག་པ་ཡིན། །ཡབ་སྲས་བཅུ་དྲུག་བསྐོར་བ་དེ། །སྐག་དང་ཆགས་ཆེན་བཟློག་པའི་རྟགས། །སྨེ་བ་འཁོར་དུ་བསྐོར་བ་ནི། །ཀིང་ཀང་མོ་ངན་བཟློག་པའི་རྟགས། །གླང་ཆེན་རོལ་དུ་ཁྲིད་པ་ནི། །གོད་འདྲེ་བསེ་རག་བཟློག་པ་ཡིན། །ཐན་སྐྱ་ཐན་གཟུགས་མང་པོས་བསྐོར། །ཐན་ལྟས་དགྲ་ལ་བསྒྱུར་བ་ཡིན། །ངར་མི་གླུད་སྣས་བསྐོར་བ་ནི། །ལན་ཆགས་བུ་ལོན་བྱང་བ་ཡིན། །དེ་ལྟར་ཁྱོད་ཀྱི་གོ་བར་གྱིས། །ཕྱིར་གསུང་བཞི་པའོ། །ཀྱཻ། ཀོང་ཙེ་འཕྲུལ་རྒྱལ་ཞལ་ན་རེ། །ཁྱོད་མདོས་གླུད་བདག་པོ་ཡར་ཉོན་དང་། །
དགོས་ཚིག་སྨྱུང་ཚིག་འདི་ལྟར་བཤད། །མི་ནག་མགོ་གསུམ་འཁོར་བཅས་ལ། །ཤ་ཁྲག་གཏོར་མས་བསྐོར་བ་ནི། །དགྲ་བགེགས་ཐམས་ཅད་བཟློག་པའི་རྟགས། །དམ་རྫས་བྷ་ལིང་ལིངྒ་འབུལ། །གནོད་བྱེད་ཟས་སུ་ཟ་བའི་རྟགས། །མདའ་བཀྲ་བཅུ་གསུམ་ཕོ་ཡི་གླུད། །འཕང་བཀྲ་བཅུ་གསུམ་མོ་ཡི་གླུད། །རྒྱང་བུ་བཅུ་གསུམ་སེམས་ཀྱི་གླུད། །ཤུལ་དིལ་བཅུ་གསུམ་བཙུགས་པ་དེ། །བུ་ཚ་བུ་མོ་ཀུན་གྱི་གླུད། །ཕོ་ཐོང་བཅུ་གསུམ་ཕོ་རིགས་ཀུན་གྱི་གླུད། །ནམ་མཁའ་བཅུ་གསུམ་བཙུགས་པ་དེ། །སྐུ་གསུང་ཐུགས་ཀྱི་རྟེན་ཡིན་ནོ། །རྩང་དམར་ཉེར་གཅིག་བཙུགས་པ་དེ། །དགྲ་བགེགས་མཚོན་གྱི་ཁ་ལ་བསད། །ལིངྒ་ཞལ་དུ་གསོལ་བ་ནི། །གནོད་བྱེད་ཞལ་དུ་གསོལ་བའི་རྟགས། །གླང་ཆེན་གླུད་ཡས་བཀལ་བ་ནི། །སྐག་རིགས་གནོད་བྱེད་ཁྱེར་བའི་རྟགས། །ངར་མི་ཆས་ཅན་ཕུལ་བ་ནི། །ཆགས་ཆེན་ཉམ་ང་བཟློག་པའི་རྟགས། །དེ་དོན་ཁྱོད་ཀྱི་ཤེས་པར་གྱིས། །ཕྱིར་གསུང་པའི་ལེན་ལྔ་པའོ། །ཀྱཻ། གཏོ་མཁན་བདག་གི་ཞལ་ན་རེ། །ཁྱོད་གླུད་བདག་མདོས་བདག་རྫོ་ངས་རེ་རན། །བྷྱོ་མི་ནག་མགོ་གསུམ་ད་ཆོས་
ཤིག །མགོ་གསུམ་ཡབ་སྲས་ད་ཆོས་ཤིག །སྐག་དང་ཀིང་ཀང་བཟློག་བསྒྱུར་ཅིག །སྤར་ཁ་བརྒྱད་པོ་བློན་པོར་རྫོངས། །སྤར་ཁའི་སྐག་ངན་ཐམས་ཅད་ཟློག །ལོ་སྐོར་བཅུ་གཉིས་འཁོར་དུ་རྣོ་ངས། །ལོ་ཟླ་ཞག་གི་སྐག་འཁྲུགས་ཟློག །སྨེ་བ་སྤྱན་དགུ་རོལ་དུ་རྫོ་ངས། །སྨེ་བ་དབུས་ཚུད་མི་མཐུན་ཟློག །ཤང་ཤང་བྲ་མཆུ་ལོ་ལར་རྫོངས། །ཁ་མཆུ་མི་ཁ་དགྲ་ལོ་སྒྱུར། །མི་དམར་མགོ་གསུམ་ཕོ་ཉར་རྫོ་ངས། །དགྲ་བགེགས་བྱད་མར་ལྕགས་མདའ་རྒྱོབས། །གཟའ་དང་གདོང་མོས་སྣ་ཁྲིད་གྱིས། །གནོད་བྱེད་ཐམས་ཅད་ཐལ་བར་རློགས། །མི་ཁ་སྤུན་དགུ་གཡོག་ཏུ་ཁྲིད། །མི་ཁ་སྣ་ཚོགས་དགྲ་ལ་ཕོབ། །གླང་ཆེན་སྟོབས་ལྡན་རོལ་དུ་ཁྲིད། །སྲིད་པའི་འདྲེ་དགུ་གདོན་སྟོང་ཕྲག །ནད་རིགས་ཡེ་འདྲོགས་ཁལ་དུ་བཀལ། །གོད་ཁ་བསེ་རག་དབུལ་འདྲེ་དང་། །ནད་ཡམས་ཇག་རྐུན་སྣ་ཚོགས་དང་། །མི་ཁ་མོ་རྨིས་ཁལ་དུ་བཀལ། །ནམ་མཁའ་མདའ་འཕང་རྒྱང་བུ་དང་། །ཕོ་ཐོང་མོ་ཐོང་ཤུག་དིལ་དང་། །ཐམས་ཅད་གླུད་དུ་ཁྱོད་ལ་བཀལ། །གླང་ཆེན་སུ་ཀ་སྟོབས་ཆེན་ཁྱོད། །ཡས་གདོན་གནོད་བྱེད་ཁུར་ལ་
སོང་། །མི་ནག་དཔོན་གཡོག་ཐམས་ཅད་ཀྱིས། །ཕོ་བདུད་དལ་ཁ་གཡས་སུ་སྒྱུར། །མོ་བདུད་དལ་ཁ་གཡོན་དུ་སྒྱུར། །ཆུང་བདུད་དལ་ཁ་ཐད་དུ་སྒྱུར། །སྤྱི་བདུད་དལ་ཁ་མཁའ་ལ་སྒྱུར། །སྐག་རིགས་མོ་རྨིས་ལྟས་ངན་རྣམས། །སྡང་དགྲ་གནོད་བྱད་སྟེང་དུ་སྒྱུར། །ཕུང་འདྲེ་དམ་ཉམས་སྟེང་དུ་སྒྱུར། །བྱད་མ་མཱ་ར་ཡ་སོད་སོད་བྷྱོ་བྷྱོ་ཟློག་སྒྱུར་ཅིག །དེ་ནས་རྫོངས་བཏབ་པ་གསེར་སྐྱེམས་སྒོ་དབྱེ་བཟློག་བསྒྱུར་དམོད་མོ་རྣམས་བྱའོ། །སརྦ་མངྒ་ལཾ། །དགེའོ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།