མི་ནག་མགོ་གསུམ་གྱིས་འཇམ་དཔལ་ལ་ཡར་ཞུས་པ།
མི་ནག་མགོ་གསུམ་གྱིས་འཇམ་དཔལ་ལ་ཡར་ཞུས་པའི་དབུ་ཕྱོགས་ལགས་སོ།
༼ཀ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །སྔོན་དྲོད་ཀྱི་སྣ་ལ་བྱུང་བ་ཡི། །མི་ཁ་ཤང་ཤང་བྲ་མཆུ་དང་། །མི་ཁའི་བུ་མོ་བ་རུ་ཡིས། །འཇམ་དཔལ་ཁྱེད་ལ་ཞུ་བ་ལགས། །སྔོན་གྱི་བཀའ་བཞིན་ཁས་བླངས་པའི། དགོས་ན། །བ་ཚྭ་བུལ་ཐོག་སྒོག་པ་དང་། །ཚྭ་དང་གཡེར་མ་སྐག་དང་རམ། །མི་ཁ་ལྟས་ངན་བསྒྱུར་དགོས་ན། །བ་ཚྭ་བུལ་ཐོག་སྒོག་པ་དང་། །རམ་པ་རུག་པ་ལ་སོགས་པ། །མི་ཁའི་ཡས་རྣམས་གནང་བར་ཞུ། །དེ་ཙམ་ཁྱེད་ལ་ཞུ་བ་ལགས། ༼ཁ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །མིང་པོ་ཤང་ཤང་བྲ་མཆུ་དང་། །
ངེད་མི་ཁའི་བ་རུ་སྤྱན་རྣམས་ལ། །ཁྲ་བོ་མིན་ཏེ་ཟུར་གསུམ་པོ། །ལྕམ་པ་མིན་ཏེ་ངོ་གཉིས་པོ། །སྒོག་པ་མིན་ཏེ་དྲི་མི་ཞིམ། །ངན་དགུ་སྡིག་བཅུ་ང་ཡིས་ཐུབ། །ཁྱེད་ཀྱིས་ངེད་ལ་ཡས་རྣམས་བསྔོས། །ངས་ཀྱང་མི་ཁ་བྲ་མཆུ་བཟློག་ནས་འགྲོ། །དེ་སྐད་ཁྱེད་ལ་ཞུ་བ་འབུལ། ག༽ །ཀྱཻ། འཕགས་པ་འཇམ་དཔལ་སྙན་གསོན་དང་། །མི་དམར་མགོ་གསུམ་ཞུ་བ་འབུལ། །སྐྱེ་བ་འདི་ཡི་སྔ་མ་ལ། །འཇིགས་པའི་མི་ནག་མགོ་གསུམ་དང་། །གདུག་པའི་མི་དམར་མགོ་གསུམ་རྣམས། །མི་དང་ཕྱུགས་ཀྱི་གཤེད་མ་སྟེ། །ཁྱེད་
འཕགས་པ་འཇམ་དཔལ་ཐུགས་རྗེ་ཡིས། །བཀའ་ནན་དྲག་པོ་བྱུང་བ་ཡིན། །ངེད་རྣམས་བཟློག་བསྒྱུར་རྒྱལ་པོར་བསྐོས། །དམ་རྫས་དམ་ཚིག་ཕོག་ནས་ཀྱང་། །རྒྱུ་སྦྱོར་ཡོན་གྱི་བདག་པོ་ཡི། །ཐན་དང་ལྟས་ངན་བཟློག་པ་ཡི། །དགོས་པའི་ཡས་སྟགས་ཅི་བཞིན་ཡོད། །ཤ་ཁྲག་གཏོར་མ་གང་ཡང་ཡོད། །དགོས་པའི་གཏོར་མ་ཕྲིན་ལས་གང་ལ་འཇུག །ཁྱེད་ཀྱི་ལེགས་པར་གསུང་ཁྲོལ་ལ། །ངེད་ཀྱིས་དེ་ཙམ་ཁྱེད་ལ་ཞུ། ༼ང༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་དམར་མགོ་གསུམ་ཞུ་བ་འབུལ། །འབྲུ་ལ་བཞེངས་པའི་ངར་གཟུགས་དང་། །ཤ་ཁྲག་དམར་གྱི་གཏོར་མ་དང་། །མི་ཁའི་རྐན་མར་བརྟེན་བཅས་ནས། །ཡོན་བདག་རྐྱེན་ངན་བཟློག་ལ་སོགས། །མི་གླུད་ནོར་གླུད་དམ་རྫས་དང་། །དཔུང་བཟློག་མཐུ་དཔུང་རྒྱབ་རྟེན་དང་། །དགོས་པའི་ཡས་སྟགས་སྣ་ཚོགས་དགོས། །དེ་མིན་རྐྱེན་ངན་ཅི་ཡིས་ཟློག །དེ་ཙམ་ཁྱེད་ལ་ཞུ་བ་འབུལ། ༼ཅ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །།ངེད་མི་དམར་མགོ་གསུམ་ཞུ་བ་ལ། །སྔོན་གྱི་ཇི་ལྟར་བཀའ་བཞིན་དུ། །ཁྱེད་རྒྱུ་
སྦྱོར་ཡོན་གྱི་བདག་པོ་ལ། །རྐྱེན་ངན་བར་ཆད་བཟློག་པ་དང་། །ལྟས་ངན་ཆོ་འཕྲུལ་མི་ཁ་བཟློག་ཏུ་འགྲོ། །སྐག་རིགས་ཐམས་ཅད་བསྒྱུར་དུ་འགྲོ། །དགྲ་སྣ་ཡམས་སྣ་རྐུན་སྣ་དང་། །མི་ཁ་བྲ་མཆུ་བཟློག་ཏུ་འགྲོ། །དེ་ཙམ་ཁྱེད་ལ་ཞུ་བ་འབུལ། ༼ཆ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་ནག་མགོ་གསུམ་ཞུ་བ་ལ། །སེམས་ཅན་ཀུན་གྱི་སྲོག་བདག་ཡིན། །བར་དུ་ཁེན་ཁོན་གཉིས་ལས་སྐྱེས། །ཁྱེད་དཔའ་བོ་ཆེན་པོའི་བཀའ་ཉན་གྱིས། །བཀའ་དང་དམ་ལ་གནས་པར་བྱས། །ཀྱེ་མ་སེམས་ཅན་ཐམས་ཅད་ལ། །སྙིགས་མ་ལྔ་ཡི་དུས་ཚོད་ལ། །ངན་དགུ་སྡིག་བཅུ་བཟློག་པ་དང་། །སྐག་པོ་ཆེ་རྣམས་བསྒྱུར་བའི་ཕྱིར། །ང་མི་ནག་མགོ་གསུམ་བསྐོས་པ་ལ། །ང་ཡིས་མི་ཐུབ་གང་ཡང་མེད། །ང་ཡིས་མི་བཟློག་གང་ཡང་མེད། །ང་ཡིས་མི་འགྱུར་གང་ཡང་མེད། །དེ་ཕྱིར་མི་ནག་ཆས་པ་ལ། །གཏོར་མ་མཐེབ་སྐུ་བཅུ་གསུམ་དང་། །ཤ་ཕུད་རཀྟ་གཙང་མ་དགོས། །དེ་ཙམ་ཁྱེད་ལ་ཞུ་བ་འབུལ། ཇ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་ནག་མགོ་
གསུམ་ཞུ་བ་ལ། །ང་འཇིགས་པའི་མི་ནག་མགོ་གསུམ་དང་།། །མི་ཁའི་དམག་དཔོན་ཐམས་ཅད་ལ། །བླ་མེད་རྟེན་ལ་འཁོར་ནས་ཀྱང་། །རྒྱུ་སྦྱོར་ཡོན་གྱི་བདག་པོ་ཡི། །སྔོན་གྱི་ལས་ངན་རྐྱེན་བཟློག་ན། །དམ་རྫས་བདུད་རྩི་སྣ་ཚོགས་དང་། །ལན་ཆགས་གླུད་བདག་རྣམས་ལ་བསྔོས། །ངེད་མི་ནག་སྤུན་ལ་ཕྲིན་ལས་བཅོལ། །གཟུགས་དང་རྟེན་ལ་ཆད་ཅིག་ཕྱུངས། །དེ་འདྲ་ཅིས་ཀྱང་ལྟས་ངན་ཟློག །ཁྱེད་ལ་དེ་ཙམ་ཞུ་བ་འབུལ། ༼ཉ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་ནག་མགོ་གསུམ་ཞུ་བ་འབུལ། །སྐག་དང་ལྟས་ངན་བཟློག་པ་ལ། །དམ་རྫས་འདོད་ཡོན་མདོས་ལེན་ནས། །སྔོན་གྱི་བཀའ་ལས་མི་འདའ་ནས། །རྐྱེན་དང་བར་ཆད་ཟློག་པར་བྱེད། །ཕོ་བདུད་དལ་ཁ་གཡས་སུ་སྒྱུར། །མོ་བདུད་དལ་ཁ་གཡོན་དུ་སྒྱུར། །ཆུང་བདུད་དལ་ཁ་འོག་ཏུ་སྒྱུར། །སྤྱི་བདུད་དལ་ཁ་མཁའ་ལ་ཟློག །དེ་ཙམ་ཁྱེད་ལ་ཞུ་བ་འབུལ། ཏི༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མ་མོ་རྣམས་ཀྱི་ཞུ་བ་འབུལ། །འཇམ་དཔལ་ཁྱེད་ཀྱི་བཀའ་བྱུང་ནས། །དམ་ཉམས་དགྲ་ལ་
རྒྱུག་ཙམ་ན། །ཧཱུྃ་དང་བྷྱོ་སྒྲའི་སྒྲ་སྒྲོག་ཅིང་། །འཇིག་རྟེན་ཀུན་ཀྱང་འདར་ཞིང་བསྔངས། །རལ་པ་འཇོལ་བེར་ས་ལ་བཤལ། །ལུས་ལ་ནད་ཀྱི་རླངས་པ་འཐུལ། །ཁྲག་གི་ཆར་པ་སི་ལི་ལི། །སྤྱན་གསུམ་སྡང་མིག་བསྒྲད་པ་ཡིས། །དམ་ཉམས་དགྲ་བོ་བརྒྱལ་བར་བྱེད། །རལ་པ་ཁམ་ནག་དཀྲུགས་པ་ཡིས། །ལྷ་སྲིན་སྡེ་བརྒྱད་གདུག་པ་ཟློག །ལྗགས་ནི་གློག་འོད་དམར་པོ་འགྱུ། །མ་མོའི་གདུག་པ་དགྲ་ལ་ཟློག །རྐན་སྒྲས་ལྷ་འདྲེའི་གདུག་པ་ཟློག །ཡོན་གྱི་བདག་པོའི་རྐྱེན་རྣམས་ཟློག ། མདོས་དང་གཏོར་མ་ཚུར་ལ་སྔོས། །མདོས་ལ་ཁྱེད་ཀྱིས་བྱིན་གྱིས་རློབས། །དེ་སྐད་ཁྱེད་ལ་ཞུ་བ་འབུལ། ༼ཐ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །འབྱུང་བ་ལོ་སྐོར་བཅུ་གཉིས་པོ། །སྔོན་བྱུང་ཁྱེད་ཀྱིས་བཀའ་བྱུང་ནས། །ས་ས་སོ་སོར་འགྲོ་ཕྱོགས་སུ། །རྐྱེན་ངན་བར་ཆད་བཟློག་དགོས་ན། །དགོས་པའི་གླུད་ཡས་རྩིས་མཛོད་ལ། །ཐུབ་ཚོད་དབང་ཚོད་ད་ཚུར་སྔོས། །ཕྲིན་ལས་བཀའ་བསྒོ་ཁ་ཁར་མཛོད། །ལམ་དང་བཞུགས་ཡུལ་སོ་སོར་སྟོན། །ངེད་རྣམས་ཁྱེད་ཀྱི་བཀའ་ལ་ཉན། །
ལོ་སྐོར་བཅུ་གཉིས་དེ་སྐད་ཞུ། ༼ད༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་ནག་མགོ་གསུམ་ཞུ་བ་འབུལ། །འབྱུང་བ་ལོ་སྐོར་བཅུ་གཉིས་ཀྱི། ། སྐག་རིགས་ཐམས་ཅད་བཟློག་པ་དང་། །མོ་ངན་ལྟས་ངན་བསྒྱུར་བ་དང་། །དགྲ་ཇག་རྐུན་གསུམ་བསྒྱུར་བ་དང་། །མདོས་གླུད་བསྔོ་ཞིང་སྐྱེལ་མ་དགོས། །སོ་སོར་ཕྲིན་ལས་གང་དགོས་ཕོབ། །རང་རང་གླུད་ཡས་ངོ་བསྔོ་དགོས། དེ་ཙམ་ཁྱེད་ལ་ཞུ་བ་འབུལ། ༼ན༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་འདི་ཡི་དོན་ཆེད་དུ། །མི་ནག་མགོ་གསུམ་དཔོན་གཡོག་རྣམས། །ཉི་མ་ཤར་དུ་འགྲོ་དགོས་ན། །ཤར་གྱི་ཕྱོགས་སུ་ལམ་བསྟན་འཚལ། །ཡས་དང་གླུད་རྣམས་ངོ་བསྔོས་ལ། །སྔོན་གྱི་བསུ་བ་རྒྱབ་ཀྱི་སྐྱེལ་མ་མཛོད། །ལམ་བསྟན་རྫོངས་འདེབས་དྲག་པོ་མཛོད། །དེ་ཙམ་ཁྱེད་ལ་ཞུ་བ་འབུལ། ༼པ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་འདི་ཡི་དོན་ད་ཆེད་དུ། །ངེད་མི་ནག་མགོ་གསུམ་འཁོར་བཅས་ཀུན། །ཉི་མ་ལྷོ་རུ་འགྲོ་དགོས་ན། །ལྷོ་ཡི་ཕྱོགས་སུ་ལམ་བསྟན་འཚལ། །ཡས་དང་
གླུད་རྣམས་ངོ་བསྔོས་མཛོད། །སྔོན་བསུ་རྒྱབ་ཀྱི་སྐྱེལ་མ་མཛོད། །ཡས་དང་གླུད་ཀྱི་བརྫོང་བ་གྱིས། །ངེད་མི་ནག་འཁོར་བཅས་མི་འདུག་འགྲོ་བ་ཡིན། །ལྷོ་ཕྱོགས་འཇང་གི་མི་ཁ་ཟློག་པར་བྱེད། །དེ་ཙམ་ཁྱེད་ལ་ཞུ་བ་འབུལ། ༼ཕ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་འདི་ཡི་དོན་ཆེད་དུ། ། མི་ནག་མགོ་གསུམ་དཔོན་གཡོག་འཁོར་བཅས་རྣམས། །ཉི་མ་ནུབ་ཏུ་འགྲོ་དགོས་ན། །ནུབ་ཀྱི་ཕྱོགས་སུ་ལམ་བསྟན་འཚལ། །སྔོན་བསུ་རྒྱབ་སྐྱེལ་དྲང་པོར་མཛོད། །ཕྲིན་ལས་བཀའ་བསྒོ་དྲང་པོར་མཛོད། །ངེད་ཀྱང་མི་འདུག་འགྲོ་བ་ཡིན། །ནུབ་ཕྱོགས་མོན་གྱི་མི་ཁ་ཟློག་པར་བྱེད། །དེ་ཙམ་ཁྱེད་ལ་ཞུ་བ་འབུལ། ༼བ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་རྐྱེན་ངན་བར་ཆད་ཟློག །ངེད་བྱང་གི་ཕྱོགས་སུ་འགྲོ་དགོས་ན། །སྔོན་བསུ་རྒྱབ་སྐྱེལ་དྲང་པོ་མཛོད། །ཡས་ཀྱི་གླུད་ཀྱི་ལམ་བསྟན་མཛོད། །བྱང་ཕྱོགས་ཧོར་གྱི་མི་ཁ་བཟློག་ཏུ་འགྲོ། །དེ་ཙམ་ཁྱེད་ལ་ཞུ་བ་འབུལ། ༼མ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་འདི་
ཡི་དོན་ཆེད་དུ། །མི་ནག་མགོ་གསུམ་དཔོན་གཡོག་འཁོར་བཅས་ཀུན། །འོག་གི་ཕྱོགས་སུ་འགྲོ་དགོས་ན། །སྔོན་བསུ་རྒྱབ་སྐྱེལ་རྫོངས་བཏབ་མཛོད། །འོག་ཕྱོགས་ས་བདག་ཀླུ་གཉན་གདུག་པ་ཟློག་པར་བྱེད། །དེ་ཙམ་ཁྱེད་ལ་ཞུ་བ་འབུལ། ༼ཙ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ཡོན་བདག་འདི་ཡི་དོན་ཆེད་དུ། །མི་ནག་མགོ་གསུམ་དཔོན་གཡོག་རྣམས། །སྟེང་གི་ཕྱོགས་སུ་འགྲོ་དགོས་ན། །སྔོན་བསུ་རྒྱབ་སྐྱེལ་རྫོངས་བཏབ་མཛོད། །ཡས་དང་སོ་སོར་ལམ་བསྟན་མཛོད། །སྟེང་ཕྱོགས་གཟའ་དང་རྒྱུ་སྐར་གདུག་པ་ཟློག །དེ་ཙམ་ཁྱེད་ལ་ཞུ་བ་འབུལ། ༼ཚ༽ །ཀྱཻ། འཕགས་པ་འཇམ་དཔལ་སྙན་གསོན་དང་། །ངེད་མི་ནག་མགོ་གསུམ་དཔོན་གཡོག་ལ། །གྲ་ཁལ་ཅི་ཡོད་ངོ་བསྔོ་མཛོད། །འདྲེ་མོ་སྤུན་དགུ་ལ་སོགས་པ། །ཟུར་དང་བསེ་རག་ཐམས་ཅད་ལ། །ཡས་གླུད་ཅི་ཡོད་ངོ་བསྔོ་མཛོད། །ཡོན་བདག་རྣམས་ལ་མི་གནོད་པའི། །གླུད་དང་ཡས་སྟགས་ཅི་ཡོད་དང་། །སྒོ་ཡི་ནོར་ལ་མི་གནོད་པའི། །ནོར་གླུད་གང་ཡོད་ངོ་ཚུར་སྔོས། །སྣང་སྲིད་ལྷ་འདྲེ་མཉེས་པ་ཡི། །ཤ་ཁྲག་གཏོར་མ་ངོ་
ཚུར་སྔོས། །ངེད་ཀྱིས་བར་ཆད་བཟློག་ཏུ་འགྲོ། །དེ་ཙམ་ཁྱེད་ལ་ཞུ་བ་འབུལ། ༼ཛ་༽ །ཀྱཻ། འཕགས་པ་འཇམ་དཔལ་སྙན་གསོན་དང་། །རྒྱུ་སྦྱོར་ཡོན་བདག་འཁོར་བཅས་ཀྱི། །ཡས་གླུད་ངེད་ཀྱིས་ཁྱེར་ནས་འགྲོ། །ད་ནི་ཁྱེད་ཀྱིས་ངོ་བསྔོས་མཛོད། །ད་ནི་ངེད་ལ་དབང་གཅིག་བསྐུར། །ད་ནི་ངེད་ལ་རྫོངས་ཤིག་ཐོབ། །ད་ནི་ངེད་ཀྱི་སྒོ་དབྱེ་མཛོད། །སྔགས་འཆང་ཁྱེད་ཀྱི་བདག་ལ་སྐྱེལ་མ་མཛོད། །དེ་ཙམ་ཁྱེད་ལ་ཞུ་བ་འབུལ། ༼ཝ༽ །ཀྱཻ། འཕགས་པ་འཇམ་དཔལ་སྙན་གསོན་ཨ་དང་། །མི་ནག་མགོ་གསུམ་དཔོན་གཡོག་རྣམས། །སྣང་ཞིང་སྲིད་པའི་ལྷ་འདྲེ་ལ། །གླུད་ཡས་དམ་པ་ངོ་ཚུར་སྔོས། །མཐོ་སྲིད་པའི་རྩེ་མོ་མན་ཆད་དང་། །དམའ་ན་རག་གཙང་པོ་ཡན་ཆད་ཀྱི། །སྣང་ཞིང་སྲིད་པའི་ལྷ་འདྲེ་ལ། །ཚུར་མི་ལོག་པའི་བཀའ་བསྒོ་མཛོད། །ས་མཚམས་སྔགས་འཆང་ཁྱེད་ལ་བསྒོ། །ངེད་མི་ནག་དཔོན་གཡོག་དམག་ལ་ཆས། །ད་ནི་དགྲ་བགེགས་སྟེང་དུ་ཆས། །མི་ཁ་བྲ་མཆུ་བཟློག་ཏུ་ཆས། །ཐན་དང་ལྟས་སྡིག་བསྒྱུར་དུ་ཆས། །ཡོན་བདག་བར་ཆད་བསྒྱུར་དུ་ཆས། །སྔགས་འཆང་སྐུ་
ཚེ་བསྲིང་དུ་ཆས། །སངས་རྒྱས་བསྟན་པ་སྲུང་དུ་ཆས། །ལོ་སྐག་ཟླ་སྐག་ཞག་སྐག་དང་། །ཟ་མའི་སྐག་རྣམས་བསྒྱུར་དུ་ཆས། །ཁྱེད་ཀྱི་ཕྲིན་ལས་དྲག་པོ་བསྒྲུབ། །རྫོགས་སོ། །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།