མགོ་གསུམ་གྱི་གསེར་མཛོད་ཤོག་དྲིལ།
མགོ་གསུམ་གྱི་གསེར་མཛོད་ཤོག་དྲིལ་བཞུགས་པའི་དབུ་ཕྱོགས་ལེགས་པར་ཡོད། །
མཁྱེན་རབ་ཀྱི་མངའ་བདག་འཕགས་པ་འཇམ་དཔལ་ལ་ཕྱག་འཚལ་ལོ། །བཀག་མདོས་སྙིང་ཐིག་མན་ངག་གསེར་མཛོད་ཅེས་བྱ་བ། ལྔ་བརྒྱ་དུས་ཀྱི་ཐ་མ་ལ། །དགེ་འདུན་ནང་རྨོ་བྱེད་པའི་དུས། །ནད་ཡམས་འགོ་ལོ་རྒོད་པ་དང་། །ཕྱོགས་བཞིར་དགྲ་བཞི་དར་བ་ལ། །བཟློག་པའི་ཐབས་ནི་འདི་ལྟར་རོ། །འཕགས་པ་འཇམ་དཔལ་གྱིས་སེམས་ཅན་གྱི་དོན་དུ་བཀག་མདོས་ཆེན་པོ་འདིས་ནད་ཡམས་བཅད་པ་དང་། དགྲ་སྣ་བསྒྱུར་བ་དང་། གོད་ཁ་བཅད་པ་དང་། ཐན་སྣ་བསྒྱུར་བ་དང་། སེར་བ་བཀག་པ་དང་། མགོ་གསུམ་འདི་ཡིས་མི་ཐུབ་པ་གང་ཡང་མེད། གནད་ཀྱི་ཤོག་དྲིལ་འདི་མེད་ན། རང་ལ་ལྡོག་ཉེན་ཡོད་པས་གཟབ་པར་བྱའོ། །དབུ་གསུམ་ལ་སྐུ་གསུང་ཐུགས་ཀྱི་ཤོག་དྲིལ་བཙུགས་པར་
བྱའོ། ༈ །མགོ་གསུམ་བཅའ་ཐབས་ལ། གཡས་སྟག་མགོ། གཡོན་ཕག་མགོ། དབུས་གླང་མགོ་ཤིན་ཏུ་བརྗིད་པ། མིག་བསྒྲད་པ། མཆེ་བ་གཙིགས་པ། དཔྲལ་བར་ཁྲོ་གཉེར་གསུམ་གཙིགས་ཡོད་པར་བྱས། སྙིང་ཁ་ཁྲག་མཚོ་འཁྱིལ་བ། ཕྱག་གཡས་དགྲ་སྟ་བསྣམས་པ། ལས་ཀ་གང་བྱེད་གཞུང་ལས་ཤེས་སོ། །མི་ཁའི་ཡས་རྣམས་སྙིང་ཁར་བཅུག་གོ །གཡོན་བདུད་ཀྱི་ཁྲམ་ཤིང་ལ། རྩེ་ལ་ཟློག་བྱ་བ་བྲིས་ལ་བཟུང་བཅུག །དབུས་གླང་མགོའི་སྟེང་ན། བདུད་ནག་པོ་གཅིག་གིས་དགྲ་བོའི་གློ་སྙིང་དྲོངས་ཤིག་བྱས་ལ་བཙུགས། །མདུན་དུ་སྣ་ཁྲིད་ཤང་ཤང་སེར་པོ་བྱས་ལ་དགྲ་བོ་ཟས་སུ་ཟ་བ་དང་། གཤོག་པ་དམར་པོ། དེའི་མཆེད་དུ་མི་མགོ་གསུམ། དབུས་ཕག་མགོ །གཡས་བྱ་མགོ །གཡོན་སྦྲུལ་མགོ །ཕྱག་
གཡས་བཙན་ཞགས་གཡོན་མདའ་གཞུ་འཛིན་པ། དེའི་མཆན་དུ་སྦྲུལ་ལ་ཞོན་པ་གཅིག་གི་གཡས་ན་དགྲའི་མིང་བྱང་བྲིས་པའི་ལིངྒ་གཅིག་དང་། ཁྲམ་ཤིང་སྦྲུག་ལ་བཟུང་བཅུག །གཡོན་ཁྲག་ཟོར་དམར་པོ་བཟུང་བར་བྱས། རྗེས་སུ་མ་མོ་རྔ་ཞོན་མ་ཕྱིན་ཅི་ལོག་ལ་ཞོན་ནས་ནད་ཀྱི་གྲུ་གུ་རྐང་གཅིག་བྱས། ལོ་བཅུ་གཉིས་ཀྱིས་བསྐོར་ལ་བཞག །ཤང་ཤང་བརྒྱད། བྲ་བ་བརྒྱད། ཤོ་ཕྲུག་བརྒྱད། སྤར་ཁ་བརྒྱད་ཀྱི་ཤིང་རིས་བཙུགས་སོ། །མ་མོ་སེང་ཞོན། སྟག་ཞོན། དྲེལ་ཞོན། སྤྱང་ཞོན། རྔ་མོང་ལ་ཞོན་པ་ཅན་བཞག་གོ །གཡོག་མོ་ཆུ་སྲིན་གདོང་ཅན་བྱས། ནམ་མཁའ་བཅུ་གཉིས་མདའ་བཀྲ་འཕང་བཀྲ་རྒྱང་བུ་བཅུ་གཉིས་རེ་བཙུགས། དེ་རྒྱབ་རྩང་ཉེར་བརྒྱད་སྲིན་མོ་འགྲོས་སུ་བཙུགས། མི་ཁའི་ཐུན་རྫས་ཀྱིས་བྲབ། གཏོར་མ་མཐེབ་སྐྱུ་དགྲ་བོའི་ཤ་དུམ་དམིགས་ལ་འབུལ། འདི་རྣམས་སླ་ང་ནག་པོའི་ནང་དུ་བཤམས། བཀག་མདོས་ལོ་བདུད་ཕྱོགས་སུ་བསྐྱལ། སྤྱི་རྒྱུན་གྱི་བཅས་དཀའ་ལག་ལེན་དང་བཅས་པ་འདི། བྱད་མ་ལྷ་སྲུང་དང་བཅས་པ་ཐལ་བ་རྡུལ་ཕྲན་བཞིན་དུ་བརླག་པར་བསམ། དམིགས་བྱ་ཡོད་ན་བཀུག་གཞུག་བྱ། ༈ བྱད་ཟློག་བྱེད་པར་འདོད་ན། འཇམ་དཔལ་གཤིན་རྗེ་གཤེད་དུ་བསྒོམ་ལ་འགུག་གཞུག་བྱས་ལ་མདོས་ལ་བསྟིམ། བྷྱོ་མ་ཧཱ་དྷེ་ཝ་བྷྱོ་ཟློག །མ་ཧཱ་དྷེ་ཝ་དགྲ་བོའི་སྲོག་ལ་རྨི་མཱ་ར་ཡ་ཆོད་ཆོད། མ་ཧཱ་དྷེ་ཝ་ཨུ་མ་དྷེ་ཝས་དགྲ་བོའི་སྲོག་སྙིང་ཕྱུངས་ཕྱུངས། མ་ཧཱ་དྷེ་ཝ་ས་མཱ་ཡ་དགྲ་
ལ་རྒྱུག་རྒྱུག །བྱད་མ་སོད་སོད། བྱད་མ་ལྷ་སྲུང་དང་བཅས་པ་མཱ་ར་ཡ་རྦད་རྦད། རྨི་ལོང་སྲོག་ཆོད་ཆོད་ས་མ་ཡ་བྷྱོ་བྷྱོཿ ཞེས་ཐུན་གྱིས་བྲབ། པོ་ནག་ལ་བྲིས་ལ་ཁོག་པར་གཞུག ༈ འདི་ཡི་བཅའ་ཐབས་ལ་མགོ་གསུམ་པ་གཅིག་བྱས་ལ། ཕྱག་དྲུག་གཡས་དང་པོ་རལ་གྲི། བར་མ་ཐོ་བ། འོག་མ་དགྲ་སྟ། གཡོན་དང་པོ་ཁྲམ་ཤིང་། གཉིས་པར་སྦྲུལ་ཞགས། འོག་མར་ཀོང་ཟོར་བཟུང་བར་བྱས། བཅའ་ཐབས་གོང་དང་འདྲ། མགོ་གསུམ་སྡེར་མོ་ལ་ལིངྒ་མི་ཁའི་ཡས་དང་སྦྲག་ལ་བཙུགས། རྩང་ཉེར་བརྒྱད་ཀྱིས་བསྐོར། རྩེ་ལ་མི་ཁ་བཟློག་ཅེས་བྱ་བའི་སྔགས་བྲིས་ལ། ཤ་དུམ་སྤེལ་ཚིག་དང་བཅས་པ་བྲིས་ལ་ཁོག་པར་བཅུག། ༈ །སྐག་བསྒྱུར་བར་འདོད་ན། རང་ཉིད་འཇམ་དཔལ་སྐུ་མདོག་སེར་པོ་ཞལ་གཅིག་ཕྱག་གཉིས་གཡས་རལ་གྲི། གཡོན་པོ་ཏི་འཛིན་པ་གཅིག་བསྒོམ། དེའི་ཐུགས་ཀ་ནས་འོད་ཟེར་འཕྲོས་པས་མགོ་གསུམ་སྤྱན་དྲངས་ལ་མདོས་ལ་བསྟིམ་མོ། །ལོ་སྐག་བསྒྱུར་བར་བསམ་ལ་དེའི་སྔགས་ལ། མ་ཧཱ་དྷེ་ཝ་བློ་ཟློག །མ་ཧཱ་དྷེ་ཝ་ས་མ་ཡ། ཨོཾ་མ་ཧཱ་ཙིག་པ་ར་ཏ་པ་ར་ལ་ཡ་ཡ། དགྲ་ལ་བྷྱོ་བྷྱོ་ཟློག་ཟློག །རྦད་ཆོད་སྐག་སྒྱུར། མ་ཧཱ་དྷེ་ཝ། ཨུ་མ་དྷེ་ཝ་མས་དགྲ་བོའི་སྲོག་ལ་ཡ་ཡ་བྷྱོ་བྷྱོ་ཟློག་ཟློག །སྐག་རིགས་སུམ་བརྒྱ་དྲུག་ཅུ་སྒྱུར་ཅིག །ཅེས་ཐུན་གྱིས་བྲབ། ༈ འདི་ཡི་བཅའ་ཐབས་ལ། མདོས་
གཞི་ལེགས་པ་གཅིག་གི་སྟེང་དུ། མ་ཧཱ་གསེར་གྱི་རུ་སྦལ། དེའི་སྟེང་མགོ་གསུམ་ཕྱག་དྲུག་པ། ཤིན་ཏུ་འཇིགས་པ། གཡས་དང་པོས་ཁྲམ་ཤིང་། གཉིས་པར་མདའ་གཞུ། འོག་མས་ལྕགས་ཀྱུ། གཡོན་དང་པོས་ཁྲམ་བམ། བར་མས་དམར་གཏོར། འོག་མས་མི་ལྤགས་ཀྱི་གཡང་གཞི་ཐུར་དུ་བཟུང་བར་བྱས། དེའི་གཡས་སུ་མི་དམར། གཡོན་དུ་བུད་མེད་དོམ་ཞོན། མདུན་དུ་ཤང་ཤང་སེར་པོ། ལོ་རྒན་དྲུག་ཅུ། ཕྱི་རྟེན་ནང་རྟེན། ལོ་སྐོར་བཅུ་གཉིས། སྤར་ཁ་བརྒྱད་མདའ་བཀྲ་འཕང་བཀྲ། ནམ་མཁའ་རྒྱང་བུ་བཅུ་གཉིས་རེ་བཙུགས། དེ་རྒྱབ་རྩང་ཉེར་བརྒྱད་ཀྱིས་བསྐོར། བཟློག་བྱང་སྐག་སྒྱུར་བྱ་བའི་སྤེལ་ཚིག་བྱས། ལོ་བདུད་ཕྱོགས་སུ་བསྐྱལ། ཕྱི་མཚམས་བཅད། བདག་བསྲུང་བའི་གུར་ཁང་བསྒོམ། རང་བསྲུང་བའི་སྔགས་འདི་བཟླས། ཨོཾ་ཝ་གི་ཤྭ་རི་མཱི། ཨོཾ་མ་ཎི་པདྨེ་ཧཱུྃ། ཨོཾ་བཛྲ་པཱ་ཎི་ཧཱུྃ། ༈ ཐན་བསྒྱུར་བར་འདོད་ན། མགོ་གསུམ་གཡས་གླང་མགོ་གཡོན་ཕག །དབུས་སྟག །གཡས་དང་པོས་རྡོ་རྗེ་གྲི་གུག །ཁྲག་ཟོར། ལྕགས་ཀྱུ། །གཡོན་དང་པོས་ཐོད་ཁྲག །ཐན་རྐྱལ་དགྲ་ལ་བྱོ་བའི་ཚུལ། འོག་མས་ཐན་སྤྲེལ་གླ་བ་དགྲ་ལ་འགྱེད་ཚུལ་བྱས། སྤྱི་བོར་བདུད་བྱ་ལྡིང་བ། ལུས་ལྟས་ངན་བྱ་ནག་གི་གཤོག་པ། མཇུག་མ་སྦྲུལ། ལུས་པོ་མིག་གིས་གང་བ། བཅའ་ཐབས་གཞན་དང་མཐུན། ༈ རང་ཉིད་དབང་ཕྱུག་ཆེན་པོ་དཀར་པོ། ཕྱག་གཡས་ཙནྡན་གྱི་བེང་ཕྱར་བ། གཡོན་སྡིགས་མཛུབ་རྩེ་
ལ་ལྕགས་ཀྱི་སྡིག་པ་ནག་པོ་མགོ་དགུ་མིག་དགུ་པ་བསྣམས་པ། སྤྱན་བསྒྲད་མཆེ་བ་གཙིགས་པ་ཞལ་གདང་བ་ལྗགས་བརྐྱངས་བ་བསྒོམ། དེའི་དབུ་ཐོག་ཏུ་འཇམ་དཔལ་བསྒོམ། དེའི་ཐུགས་ཀ་ནས་འོད་ཟེར་འཕྲོས་པས། མགོ་གསུམ་སྤྱན་འདྲེན་ལ་མདོས་ལ་བསྟིམ། མི་ཁའི་ཡས་ཀྱི་ཐུན་གྱིས་བྲབ་བོ། །གཏོར་མ་མཐེབ་སྐྱུ་སྦྱིན། ལྟས་ངན་སྒྱུར་བའི་ལིངྒ་རྣམས། སྔགས་ཀྱིས་བསྐོར་ལ་མགོ་གསུམ་ཁོག་པར་བཅུག །མ་ཧཱ་དྷེ་ཝ་བྷྱོ་བྷྱོ་ཨུ་མ་དྷེ་ཝ་བློ་བྷྱོཿ ལྟས་ངན་དགྲ་ལ་སྒྱུར་སྒྱུར། ཨོཾ་མ་ཧཱ་ས་རྩིག་པ་ར་ཏ་ཡར་ཡ་ལ་ལ། དམ་ཉམས་དགྲ་ལ་ལྟས་ངན་ཆར་ལྟར་ཕོབ། མི་ཁ་རྒྱལ་པོ་དགྲའི་གཟུགས། དགྲའི་སྲོག་རྩ་ཆོད་ཆོད། རྦད་རྦད་ས་མ་ཡ་བྷྱོ་བྷྱོ་ཟློག་ཟློག །ཅེས་ཐུན་གྱིས་བྲབ། ལྟས་ངན་བསྒྱུར་བའི་ཤོག་དྲིལ་རྫོགས་སོ། ༈ །།གོད་ཀ་གཅོད་པར་འདོད་ན། བཅའ་ཐབས་འདི་ལྟར་བྱས། མགོ་གསུམ་ཕྱག་དྲུག་པ། གཡས་དང་པོ་གོད་ཁ་དང་མི་ཁ་བྲིས་པའི་ཁྲམ་ཤིང་ཐོད་ཁྲག་སྦྲུལ་ཞགས། གཡོན་དང་པོས་ཕྱར་དར་ཕྱར་བ། ཕུར་པ། ནད་རྐྱལ་བཟུང་བ། གོད་འདྲེའི་རུས་པ་མིང་བྱང་བྲིས་ལ་ཁོག་པར་བཅུག་གོ །རྩང་ཉེར་བརྒྱད་བཙུགས། བཅའ་ཐབས་གཞུང་བཞིན་དང་མཐུན། ཨོཾ་མ་ཧཱ་དྷེ་ཝ་ས་མ་ཡ། ཨུ་མ་དྷེ་མ་ས་མ་ཡཱ། གོད་འདྲེའི་རྩ་རྒྱུད་ཕྱུངས་ཤིག སྲོག་རྩ་ཆོད་ཆོད། སྙིང་
ཕྱུང་ཅིག མ་ཧཱ་དྷེ་ཝ་གོད་འདྲེའི་སྲོག་ལ་རྦད་རྦད། །ཨུ་མ་དྷེ་མ་གོད་འདྲེའི་སྙིང་ལ་རྒྱུག་ཅིག །ཅེས་གཞུང་སྔགས་སྤེལ་ཚིག་བྱེད་ལ་ཐུན་གྱིས་བྲབ་བོ། །ལིངྒ་བྲག་ལ་མནན། མདོས་ལ་གཟའ་སྐར་གཟབ་པ་ཤེས་ཞེས། རང་ཉིད་ཕྱི་མཚམས་བཅད། གོད་འདྲེའི་ཟ་ཁ་དགྲ་ལ་བསྟན་པར་བསམས་ལ། གར་ཐོད་ཐོད་དུ་མི་བྱའོ། །རང་ལ་བཟློག་ཉེས་ཡོད། གོད་ཀ་གཅོད་པའི་ཤོག་འདྲིལ་རྫོགས་སོ།། ༈ །།ནད་ཡམས་གཅོད་པར་འདོད་ན། སླ་ངའི་ནང་དུ་མགོ་གསུམ་ཤིན་ཏུ་བརྗིད་པ་གཅིག་བྱས་ལ། །ཕྱག་གཡས་ཁྲམ་ཤིང་། གཡོན་གཏོར་ཟོར་བཟུང་བ། མགོ་ལ་སྦྲུལ་གྱིས་བརྒྱན་པ། དབུ་བརྒྱན་དང་སྐེ་རགས་ཀྱིས་བརྒྱན་པ་གཅིག་བྱས་ལ། སྙིང་གར་ཁྲག་ཐིགས་བླུགས། སྔོན་དུ་བུད་མེད་དྲེལ་ཞོན་ནད་ཀྱི་རྐྱལ་པ་བཟུང་བ་གཅིག་བྱས་ལ་བཞག །རྒྱབ་ཏུ་མི་ཁྲོ་བོའི་ཆ་བྱད་ཅན་ཤིན་ཏུ་འཇིགས་པ་གཅིག་གི་ཕྱག་གཡས་རལ་གྲི། གཡོན་པས་བ་དན་གྱིས་རྒྱབ་ནས་དེད་པར་བསམ། བུད་མེད་ནད་ཀྱི་བདག་མོ་བཞི། རེ་བའི་བ་དན་བཞི་གཡོན་དུ་བཟུང་བ། ལྟས་ངན་རྔ་མོང་ལ་ཞོན་པ། ཆུ་སྲིན་ལ་ཞོན་པ།
དྲེལ་ལ་ཞོན་པ། བོང་བུ་ལ་ཞོན་པ་བྱས་ལ་བཞག་གོ །སྤར་ཁ་བརྒྱད། ལོ་སྐོར་བཅུ་གཉིས། ཤ་དུམ། ཚངས་བུ། མཐེབ་སྐྱུ། གཏོར་མ། འབྲུ་ཟན། ནས་ཀྱི་ངར་མི་རྣམས་ཉེར་གཅིག་བྱས་ལ་ཡས་ལ་བསྔོས། ཨོཾ་མ་ཧཱ་ས་རྩིག་པ་ར་ཏ་ཡ་ལ་དགྲ་བོ་ལ་བྷྱོ་བྷྱོཿ ན་མ་ཙུ་ཏུ་བྷིར་ཧ་བས་ཤ་ར་སྭཱ་ཧཱ། ན་མ་སརྦ་ཏ་ཐཱ་ག་ཏ་བྷྱོཿ བྷི་ཤྭ་མུ་ཁེ་བྷྱཱ། སརྦ་ཏཱ་ཨུཏྟ་སྟེ། སྤུ་ར་ན་ཨི་མཾ་ག་ག་ན་ཁཾ་སྭཱ་ཧཱ། ཞེས་ལན་ཆགས་ཡི་དྭགས་ལ་བསྔོའོ། །དམིགས་པ་གོང་དང་མཐུན། ནད་ཡམས་དགྲ་བོའི་སྟེང་དུ་བསྒྱུར་བར་བསམ། མཚམས་གཅོད་བྱས། མཚན་བརྗོད་འདོན། ནད་ཡམས་གཅོད་པའི་ཤོག་དྲིལ་རྫོགས་སོ།། ༈ །།མི་ཁ་བསྒྱུར་བའི་ལྡོག་འདྲིལ་བྱེད་པས་འདོད་པས། རང་ཉིད་གསེར་གྱི་རྡོ་རྗེ་རྩེ་དགུ་པ་གཅིག་བསྒོམ། དེ་ཡོངས་སུ་གྱུར་པ་ལས། འཕགས་པ་འཇམ་དཔལ་སྐུ་མདོག་གསེར་བཙོ་མའི་མདོག་ལྟ་བུ། ཕྱག་གཡས་པས་ཤེས་རབ་རལ་གྲི། གཡོན་ན་གསེར་གྱི་པད་སྡོང་སྟེང་གསེར་གྱི་པོ་ཏི། ཞལ་འཛུམ་བག་ཅན། དེའི་ཐུགས་ཀ་ནས་འོད་ཟེར་གཅིག་བྱུང་བས་མདུན་གྱི་ནམ་མཁར་བྱང་ཆུབ་
སེམས་དཔའ་ཐམས་ཅད་ཀྱི་མཐུ་དང་བྱིན་རླབས་ཀྱིས། དབང་ཕྱུག་ཆེན་པོ་སྐུ་མདོག་མཐིང་ནག །ཤིན་ཏུ་བརྗིད་པའི་འགྱིང་བག་དང་ལྡན་པ། ཕྱག་གཡས་རྡོ་རྗེའི་ཐོ་བ། །ལྷགཡོན་སྡིགས་མཛུབ་མེའི་ཚྭ་ཚྭ་འཕྲོ་བ་འཕགས་པ་འཇམ་དཔལ་གྱི་བཀའ་ཉན་གསུང་སྡོད་པར་བསྒོམ། དེ་ལྟར་རང་གི་ཐུགས་ཀ་ནས་འོད་ཟེར་འཕྲོས་པས། དབང་ཕྱུག་ཆེན་པོ་ལ་ཕོག །ཐུགས་དམ་གྱི་བརྒྱུད་བསྐུལ་ནས། ལྟས་ངན་གྱི་རྒྱལ་པོ། འཕགས་པ་འཇམ་དཔལ་སྤྲུལ་པ་ནག་པོ་མགོ་གསུམ་པ་རང་དབང་མེད་པར་བཀུག་ལ་རང་གི་མདུན་དུ་བསམ། དེས་དམ་བཅས་ཁས་བླངས་པར་བསམ། གཏོར་མ་མཐེབ་ཀྱུ་ཁྱོད་ལ་སྦྱིན། མི་ཁ་ལྟས་ངན་དགྲ་ལ་བསྒྱུར་བའི་གཉེར་གཏད། མགོ་གསུམ་གྱིས་ཀྱང་བདག་གི་བཀའ་ཉན་གསུང་སྡོད་པར་བསམ། བྷྱོ་མ་ཧཱ་དྷེ་ཝ་བྷྱོ་བྷྱོ་ཟློག་ཟློག །མ་ཧཱ་དྷེ་ཝ་ས་མ་ཡཱ། ཨུ་མ་དྷེ་མ་དགྲ་བོའི་རྨི་མཱ་ར་ཡ་ཆོད་ཆོད། ཨུ་མ་དྷེ་མ་དགྲ་བགེགས་སྲོག་ལ་ས་མ་ཡ་ཛ་ཛཿ མི་ཁ་ཧུར་ཐུམ་རྦད་རྦད། དྲིལ་དྲིལ། ཐུམ་ཐུམ། ཤིག་ཤིག་བྷྱོ་བྷྱོ་ཟློག་ཟློག །ཅེས་དྲག་ཏུ་བཟླས། པོ་ནག་ལ་བྲིས་ལ་མི་ནག་ཁོག་པར་བཅུག །དགྲ་བོའི་མིང་བྱང་སྤེལ་ཚིག་ཡང་
བྱའོ། ༈ །འདིའི་བཅའ་ཐབས་ལ་མི་ནག་མགོ་གསུམ། གཡས་ཁྲམ་ཤིང་རྡོ་ཟོར། གཡོན་དགྲ་བོའི་ཙིཏྟ་དམར་པོ་ཞལ་དུ་གསོལ་བ། སྦྲུལ་གྱི་པགས་པས་བརྒྱན་པ། བརྗིད་པ། སྐུ་གསུང་ཐུགས་མོན་པའི་འཁོར་ལོ་གསུམ་དབུས་སུ་བཞག སྙིང་གར་བྲུབ་ཁུང་གྲུ་གསུམ་ལ། དགྲ་བོའི་མིང་བྱང་མི་ཁའི་ཡས་རྣམས་བླུག །མདུན་དུ་ཐོད་པ་ཁྲག་བཀང་བཞག །མ་མོ་གསུམ་བཙུགས། སྟེང་ན་བྱ་ནག་ལྡིང་ཚུལ་སྙིང་བཙུགས། མདུན་དུ་མི་དམར་ཤང་ཤང་། གཡས་སུ་བུད་མེད་རྔ་ཞོན། རྒྱབ་ཏུ་བུད་མེད་དྲེལ་ཞོན་ཁྲོ་ཆས་ཅན། སྤར་ཁ་བརྒྱད། ལོ་སྐོར་བཅུ་གཉིས། མི་ཁའི་ཡས་སྟགས་ཚང་བར་བཞག །རྔ་མོང་དང་གླང་གཉིས་ལ་མི་ཁའི་ཡས་འགེལ། བྲ་བ་ཤང་ཤང་ཆོ་ལོ་མིག་མང་རྣམས་བཞི་ནག་པོའི་སྟེང་དུ་བཞག་ལ། རྒྱང་བུ་ཉེར་གཅིག །ས་ཀོང་། ཟོར་བརྒྱད་བཞག །མདའ་འཕང་ཉེར་གཉིས་རེ། དེ་རྒྱབ་ཆུང་ཉེར་གཉིས་ལ་ཉ་བོ་ཤ་དུམ་སྦུག་ལ་བཞག །ཤིང་ཕ་དགུའི་ཕོ་ཐོང་བཙུགས། བཟློག་བྱང་སྤེལ་ཚིག་དང་བཅས་པ་བཙུགས། མདོས་དགྲ་ཕྱོགས་སུ་བསྐྱལ། རང་ཉིད་ཏིང་ངེ་འཛིན་གསལ་བ་གལ་ཆེ། མཚམས་བཅད་དོ། །སྔགས་བཟླས་ནས་རྨི་ལམ་འོང་། ཟབ་བོ། ༈ །མི་ཁ་ཟློག་དྲིལ་བྱེད་པར་འདོད་ན། རང་ཉིད་འཕགས་པ་འཇམ་དཔལ་གྱི་ཐུགས་ཀ་ནས་འོད་ཟེར་འཕྲོས་པ་ཡི། འཇམ་དཔལ་སྤྲུལ་པ། སྐག་པོ་ཆེ་རྣམས་བཟློག་པའི་མི་ནག་མགོ་གསུམ་བཀུག་གཞུག་
བྱས་ལ། གཏོར་མ་མཐེབ་སྐྱ། མི་ཁའི་ཡས་སྣ་ཚོགས་མགོ་གསུམ་ཞལ་དུ་བསྟབ་བོ། །དམ་ཉམས་དགྲ་དང་འབྱུང་པོ་ལྟས་ངན་ཐམས་ཅད་མགོ་གསུམ་ཞལ་དུ་གསོལ་བར་བསམ། མི་ཁའི་ཡས་སྣ་ཚོགས། བྱ་རོག །ཅོ་ག །སྲེག་པ། རི་བོང་། གླ་བ། ར་གསོབ། ཕུག་ཤུད། ཚྭ་སྒོག་རམ་གསུམ། ཀེ་ཚེ། བཙོད་མཚུར། །སྐག །དེ་རྣམས་ཞིབ་པར་བྱས་ལ། གོང་གི་སྔགས་པཾ་ནག་ལ་བྲིས་ལ་ཕྱེ་མ་བསྲེས་ལ་ཆངས་བུ་རེ་བླུག །ཤཱ་ཆོ་ལོ་བྲ་བ་བཅུ། ཤང་ཤང་ལྔ། བྱང་བུ་ལ་བཅུག་གོ །དྲག་པོ་ལ་དམར་ནག་གི་ས་བརླང་ལ་བསྲེས། དེ་ནས་སྐུད་པས་ཕྱིར་གྱིས་དགུ་བསྒྲིལ་ལ། རང་གི་ཉལ་སའི་ཞབས་སུ་བཞག །དེ་ནས་རང་ཉིད་དབང་ཕྱུག་ཆེན་པོ་སྐུ་མདོག་མཐིང་ནག །རལ་པ་ཁམ་ནག་ཏུ་འདུག་པ། སྲིད་པ་གསུམ་གྱི་ལྷ་འདྲེ་ལ་དབང་ཐོབ་པ། སྣང་སྲིད་ཐམས་ཅད་བཀའ་ཉན་གསུང་སྡོད་པར་བསྒོམ། དེ་ཐམས་ཅད་དམ་ཉམས་དགྲ་བོ་བྱད་མ་གནོད་བྱེད་གྱུར་མི་ཁ་ཉེས་ལེན་པ་གང་ཡིན་པ་ཐམས་ཅད་རང་དབང་མེད་པར་བཀུག་ནས། མདུན་གྱི་ཡས་སྟགས་དང་ལིང་ག་རྣམས་ལ་བསྟིམ། ༈ དེ་ནས་རང་ཉིད་ཀྱི་
ཞབས་གཡས་པ་གནམ། གཡོན་པ་ས་ལ་བསྒོམ། གནམ་ས་གཉིས་ཀྱི་བར་དུ་བསྒྲིམ་པར་བསམ། རང་གི་ཕྱག་གཡས་གནམ། གཡོན་པ་ས། དེ་གཉིས་ཀྱི་བར་དུ་གནོད་པ་བྱེད་པ་གང་ཡིན་པ་དེའི་རྣམ་པར་ཤེས་པ་མར་མེ་གཅིག་ལ་བསྒོམ། ཐལ་མོ་བརྡབས་པས་གནམ་ས་གཉིས་ཀྱི་བར་དུ་ནག་ཀམས་ཀམས་རྣམ་ཤེས་བསད་པར་བསྒོམ། ཡང་དམ་ཉམས་དགྲ་བོའི་རྣམ་པར་ཤེས་པ་སྒོ་ང་ཅིག་བསམ། དེ་ལ་དམོད་པ་བྱས་ནས་ཐལ་མོ་བརྡབས་པས། ནག་ཀམ་གྱིས་བཏང་བར་བསམ། རྨི་ལམ་བྱུང་ན་རྒྱ་གྲམ་ལམ་དུ་མནན་པར་བྱས། ཡང་དགྲ་ཕྱོགས་སུ་མནན། བྷྱོ་མ་ཧཱ་དྷེ་ཝ་བློ་ཟློག་ཟློག །དྲིལ་དྲིལ་ཨུ་མ་དྷེ་ཝ་བྷྱོ་སྦྱོ་ཟློག་ཟློག །མི་ཁ་དགྲ་ལ་སྒྱུར། མི་ཁ་ཧུར་ཐུམ་རྦད་རྦད། དྲིལ་དྲིལ། ཐུམ་ཐུམ། རི་ལི་ལི་རྦད་རྦད། དྲིལ་དྲིལ་ཐུམ་ཐུམ། ཤིག་ཤིག་བྷྱོ་སྦྱོ་ཟློག་ཟློག །བརྒྱ་ཡི་མི་ཁ་སྒྱུར། སྟོང་གི་བྲ་མཆུ་སྒྱུར། ཞེས་སྤེལ་ཚིག་བྱས་ལ། བྷྱོ་བྷྱོ་ཟློག་ཟློག་གི་གདབ་བོ། །སྐག་མདོས་ཀྱི་ཤོག་དྲིལ། གཞན་ལ་མ་བསྟན་ཕལ་ལ་མེད། གསང་ཚིག་གོ །མི་ཁ་ཚངས་ཕུང་གི་བཅའ་ཐབས་ལག་ལེན་ཚང་བ་རྫོགས་སོ།། ༈ །།འཕགས་པ་
འཇམ་དཔལ་ལ་ཕྱག་འཚལ་ལོ། །མི་ཁ་དགྲ་བོ་གསོད་པར་འདོད་ན། ས་ཡི་བྲ་བ་ཁོང་སེང་བྱས། ནང་དུ་ཡས་དང་མཐུན་རྫ་ས་བླུག །དེ་ནས་ཞག་གསུམ་ལ་སྔགས་ལ། །བྲ་བ་དེ་མི་ཁའི་བུ་མོ་ལྕེ་རྣོན་མ་གཅིག་གིས་འཁོན་འཐབ་དང་། ཁ་མཆུ་བྱེད་པ་ལ་དགའ་བ་གཅིག་ཏུ་དམིགས་ལ། རང་ཉིད་རྡོ་རྗེ་འཇིགས་བྱེད་དབུ་དགུ་པ། དབུས་མ་ཧེའི་གདོང་པ་ཅན་གཅིག་ཏུ་བསྒོམ། དེ་ནས་མི་ཁའི་བུ་མོ་སྤུན་དགུ་ཡོད་པ་དེ། བྲ་བ་དགུ་རུ་སྤྲུལ་ནས། དགྲ་བོའི་ཁང་ཁྱིམ་དུ་ཚང་བཅས་ནས། །ཕུགས་ཀྱི་ལྷ་དང་ཕྱེས། སྒོ་ཡི་ནོར་དང་ཕྱེས། མཆན་གྱི་བུ་དང་ཕྱེས། འོག་གི་ཆུང་མ་ཕྱེས། འོག་རྟ་དང་ཕྱེས། ཁང་ཞིང་དང་ཕྱེས། ཁྱིམ་ཕུག་ཏུ་ཞུགས་པར་བསྒོམ། ༈ བྲ་བ་དེ་ཁ་བསྒྱུར་ལ། དགྲ་བོའི་ཁང་རྙིང་དུ་རྒྱ་གྲོག་གི་ཚང་དང་བཅས་པ་བཞག །ཕར་ལ་དམོད་པ་བྱས་ལ། དམ་ཉམས་དགྲ་བོ་འདི་མི་ཁའི་རྒྱལ་མོ་ཁྱོད་ལ་གཏད་དོ། །མ་ཤོར་ཅིག །ཚང་ཆོས་ཤིག །ཁྱོད་ཀྱི་ཟ་བསྐལ་གྱིས། གཉེར་དུ་གཏད་དོ། །བྷྱོ་མ་ཧཱ་དྷེ་ཝ་དགྲ་ལ་བྷྱོཿ མི་ཁ་ཧུར་ཐུམ་རྦད་རྦད། དྲིལ་དྲིལ། ཐུམ་ཐུམ་ཤིག་ཤིག །བྷྱོ་བྷྱོཿ ཟློག་
ཟློག །སྒྱུར་སྒྱུར། བརྒྱ་ཡི་མི་ཁ་དགྲ་ལ་སྒྱུར། སྟོང་གི་བྲ་མཆུ་དགྲ་ལ་སྒྱུར། དམ་ཉམས་དགྲ་བོ་འདིས་སངས་རྒྱས་ཀྱི་བསྟན་པ་བཤིག །དཀོན་མཆོག་གི་དབུ་འཕང་སྨད། །རྣལ་འབྱོར་སྐུ་ལ་བསྡོས། སྟོང་གསུམ་རྔ་ཐོག་གི་བསྐོར་ལ་བསྙབས། དེ་བས་སྡིག་ཅན་སྡང་བའི་དགྲ་བོ་འདི། མི་ཁའི་བུ་མོ་སྤུན་དགུ་ལ་གཏད། བཙན་གྱི་ཇག་པ་རྐང་མང་ཁྱོད་ལ་གཏད། བདུད་ཀྱི་ཇག་པ་རྐང་མང་ཁྱོད་ལ་གཏད། གཤིན་རྗེའི་ཇག་པ་རྐང་མང་ཁྱོད་ལ་གཏད་དོ། །མ་མོའི་ཇག་པ་རྐང་མང་ཁྱོད་ལ་གཏད་དོ། །སྲིན་པོའི་ཇག་པ་རྐང་མང་ཁྱོད་ལ་གཏད་དོ། །མི་ཁའི་ཇག་པ་རྐང་མང་ཁྱོད་ལ་གཏད་དོ། །མི་ཁའི་བུ་མོ་ལྕེ་རྣོན་མ་ཁྱོད་ལ་གཏད་དོ། ཞེས་དམོད་མོ་གང་ཤེས་བྱས་སོ། །ཐལ་མོ་བརྡབ་བོ། །མི་ཁའི་ཚང་སྤྲོས་འདི། བྱུར་མདོས་དང་སྦྲག་ཅིང་བྱས་ན། རང་གི་བསོད་ནམས་ལ་ཕན་ནོ། །རྫོགས་སོ། །རྒྱ་ཡི་གཏོ་ནག་གསང་བའི་མན་ངག་གསེར་མཛོད་ཀྱི་ཤོག་དྲིལ་གནད་ཟབ་མོ་རྫོགས་སོ། །དགེའོ། །བཀྲ་ཤིས་པར་ཤོག །ཞལ་དྲོ། སརྦ་མངྒ་ལཾ། ས་བདག་གཏོ་ཕུག། །། ༧ འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །