དཀར་པོ་མགོ་གསུམ་བསྐྱེད་ཆོག་གི་འདོན་འགྲིགས། མི་ནག་མགོ་གསུམ་གྱི་གོང་གནོན།
དཀར་པོ་མགོ་གསུམ་བསྐྱེད་ཆོག་གི་འདོན་འགྲིགས། མི་ནག་མགོ་གསུམ་གྱི་གོང་གནོན་བྱ་བ་བཞུགས་སོ། །
ན་མོ་མཉྫ་ཤི་ཡེ། མཁྱེན་རབ་ཀྱི་མངའ་བདག་འཕགས་པ་འཇམ་དཔལ་ལ་ཕྱག་འཚལ་ཞིང་ཉེ་བར་སྐྱབས་སུ་མཆིའོ། །མི་ནག་མགོ་བོ་གསུམ་པའི་གོང་གནོན་དུ་བྱ་བའི། དཀར་པོ་མགོ་གསུམ་གྱི་བཅའ་གཞི་ལ། གོང་དུ་གཞི་འགྲམ་དུ་ནས་ཀྱིས་འབྱུང་བ་རིམ་བརྩེགས་བྲིས་པའི་སྟེང་དུ། །ཀ་ཏོ་ར་སྡེར་གས་ཆག་མེད་པར་འབྲུའི་བཀང་བའི་སྟེང་དུ། གཏོར་མ་རི་རབ་གྲུ་བཞི་པ་བང་རིམ་བཞི་པ་གཅིག་བཞག །དེའི་སྟེང་དུ་རིགས་གསུམ་མགོན་པོའི་གཏོར་མ་ནི། འཇམ་དཔལ་ལ་རྒྱུས་པ་སྟོད་གྲུ་བཞི། སྤྱན་རས་གཟིགས་ལ་ཟླུམ་པོ། ཕྱག་ན་རྡོ་རྗེ་ལ་སྟོད་ཟུར་གསུམ་པ། གསུམ་ཀའི་སྨད་ཟླུམ་པོ་བྱས་ལ། རྩེ་ལ་མར་བརྒྱན་ཉི་ཟླ་ནོར་བུ་དང་། རིགས་གསུམ་གྱི་ཕྱག་མཚན་རལ་གྲི་པདྨ་རྡོ་
རྗེས་མཚན་པ་གསུམ་བཤམས་ལ། རྩེ་ལ་རིགས་གསུམ་གྱི་ཙཀ་ལི་དང་ཁྱུང་འབྲུག་སེང་གསུམ་གྱི་ཙཀ་ལི་བཙུགས། དར་སྣ་ལྔ་དང་རིན་པོ་ཆེ་སྣ་ལྔས་བརྒྱན། རི་རབ་ཀྱི་མཐར་དཀར་གསུམ་མངར་གསུམ་འབྲུ་སྣ་ཚོགས། སྨན་སྣ་ཚོགས། ཤིང་ཐོག་སྣ་ཚོགས། གསེར་དངུལ་གཡུ་གསུམ། ཀླུ་སྨན་རྣམས་དང་། མར་གྱི་རིལ་བུ་མང་པོ་དང་། མཆོད་པ་སྣ་བདུན་བཤམས། ༈ དེ་རྣམས་བསྡུས་པ་ལ། གཏོར་མ་གུར་ཐབས་གཅིག་ལ། མར་གྱིས་ཁྱུང་འབྲུག་སེང་གསུམ་བཅས་པ་རྩེར་བཙུགས་སྲོལ་ཡོད། བདག་བསྐྱེད་ཤེལ་གུར་རྐྱང་པའི་དབུས་སུ་རིགས་གསུམ་མགོན་པོ་བསྐྱེད་པ་དང་། མདུན་བསྐྱེད་ལ་རི་རབ་ཀྱི་སྟེང་ཤེལ་གུར་གྱི་ནང་དུ་རིགས་གསུམ་མགོན་པོ་བསྐྱེད་པ་དུས་གཅིག་ལ་གསལ་བཏབ་པར་བྱའོ། །དེ་ནས་སྐྱབས་
འགྲོ་སེམས་བསྐྱེད་དང་མཆོད་པ་བྱིན་རླབས་སྤྱི་ལྟར་བྱས་ལ། དངོས་གཞི་བསྐྱེད་པའི་རིམ་པ་ནི་འདི་ལྟར་བྷྱོ་པར་བྱའོ། །ཨོཾ་སྭ་བྷ་ཝས་སྦྱངས། སྟོང་པའི་ངང་ལས་རླུང་མེ་ཆུ་ས་བཞི་འབྱུང་བ་རིམ་པར་བརྩེགས་པའི་སྟེང་དུ། རི་རབ་གྲུ་བཞི་པ་བང་རིམ་དང་ལྡན་པ། དེའི་ཕྱི་རོལ་དུ་གསེར་གྱི་རི་བདུན། རོལ་པའི་མཚོ་བདུན། གླིང་བཞི་གླིང་ཕྲན་ལྕགས་རི་མུ་ཁྱུད་ཀྱིས་བསྐོར་བ། །བར་བར་ལྷ་མི་རྣམས་ཀྱིས་འདོད་པའི་ལོངས་སྤྱོད་མཆོད་རྫས་ཐམས་ཅད་ཆར་བཞིན་དུ་འབེབས་པ། རི་རབ་ཀྱི་སྟེང་དུ་ཤེལ་གྱི་གུར་ཁང་ཡངས་ཤིང་རྒྱ་ཆེ་བའི་དབུས་སུ། སྣ་ཚོགས་པདྨ་དང་ཉི་མའི་གདན་གྱི་སྟེང་དུ། རལ་གྲི་ཨཾ་གྱིས་མཚན་པ་དེ་ལས་འོད་ཟེར་འཕྲོས། སངས་རྒྱས་ཐམས་ཅད་ལ་སྐུ་གསུང་ཐུགས་མཉེས་པའི་མཆོད་པ་ཕུལ། སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་སྦྱངས། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཚུར་བསྡུས་ནས་ཐིམ། དེ་འོད་དུ་ཞུ་བ་ལས། རང་ཉིད་འཕགས་པ་འཇམ་དཔལ་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་པས་ཤེས་རབ་ཀྱི་རལ་གྲི། གཡོན་ཨུཏྤལ་ལའི་མེ་ཏོག་གི་སྟེང་ན་ཤེས་རབ་ཀྱི་ཕ་རོལ་ཏུ་
ཕྱིན་པ་བརྒྱད་སྟོང་པའི་པོ་ཏི་བཞག་པ་བསྣམས་པ། སྐུ་སྒེག་ཅིང་དཔའ་བའི་འགྱིངས་ཚུལ་དང་ལྡན་པ། དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། །ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་སྤྱི་གཙུག་ཏུ་སྐུའི་སྤྲུལ་པ་དུང་སེང་ང་རོ་སྒྲོག་པ། གཡས་སུ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་བགྲང་ཕྲེང་དང་གཡོན་པདྨ་དཀར་པོ་འཛིན་པ། ཞི་བའི་ངང་ཚུལ་ཅན། རིན་པོ་ཆེ་དང་དར་སྣ་ཚོགས་ཀྱིས་བརྒྱན་པ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། དེའི་དབུ་གཙུག་ཏུ་གསུང་གི་སྤྲུལ་པ་གཡུ་འབྲུག་ངར་སྐད་སྒྲོག་པ། གཡོན་དུ་ཕྱག་ན་རྡོ་རྗེ་སྐུ་མདོག་མཐིང་ནག །ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་དྲིལ་བུ་འཛིན་པ། ཅུང་ཞིག་ཁྲོས་པའི་ཉམས་དང་ལྡན་པ། སྟག་ཤམ་དང་སྦྲུལ་ཆུན་དར་སྣ་ཚོགས་ཀྱིས་བརྒྱན་པ། ཞབས་གཡས་བསྐུམས་གཡོན་བརྐྱངས་བའི་ཚུལ་དུ་བཞུགས་པ། དེའི་སྤྱི་གཙུག་ཏུ་ཐུགས་ཀྱི་སྤྲུལ་པ་བྱ་ཁྱུང་ལྡིང་བ། དེ་ལྟར་གསལ་བའི་གནས་གསུམ་ལས་འོད་ཟེར་འཕྲོས་པས། རང་བཞིན་གྱི་གནས་ནས་སྤྱན་དྲངས་བར་
གྱུར། སྤྱན་འདྲེན་པ་ནི། ཧཱུྃ། གནས་མཆོག་པོ་ཊ་ལ་དང་ལྕང་ལོ་ཅན། །རྒྱ་ནག་རི་བོ་རྩེ་ལྔའི་ཤེལ་ཁང་ནས། །འཕགས་མཆོག་རིགས་གསུམ་མགོན་པོ་གཤེགས་སུ་གསོལ། །ཤེལ་གུར་པདྨ་ཉི་ཟླའི་གདན་ལ་བཞུགས། །ཛཿཧཱུྃ་བཾ་ཧོཿ ཏིཥྛ་ལྷན། སླར་ཡང་ཐུགས་ཀར་ཚུ་ལས་འོད་འཕྲོས། རིགས་ལྔ་འཁོར་བཅས་སྤྱན་དྲངས་གྱུར། །ཨརྒྷཾ་སོགས་ཀྱིས་མཆོད། །མདུན་བསྐྱེད་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུཾ། ཞེས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས། གཙོ་བོ་ལ་རིན་ཆེན་འབྱུང་ལྡན། སྤྱན་རས་གཟིགས་ལ་སྣང་བ་མཐའ་ཡས། ཕྱག་ན་རྡོ་རྗེ་ལ་དོན་ཡོད་གྲུབ་པ་རྣམས་ཀྱིས་དབུ་བརྒྱན་པར་གྱུར། དེ་ནས་མཆོད་པ་ནི། དཔག་མེད་བསོད་ནམས་སྟོབས་ལས་བྱུང་བ་ཡི། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོ་དང་། །རྒྱལ་སྲིད་སྣ་བདུན་བཀྲ་ཤིས་རྟགས་བརྒྱད་དང་། །དཀར་གསུམ་མངར་གསུམ་ཤིང་ཐོག་སྨན་སྣའི་ཚོགས། །བདུད་རྩི་སྨན་གཏོར་ཞལ་ཡས་ཚོགས་མཆོད་སོགས། །
ལྷ་མི་ལོངས་སྤྱོད་དཔག་ཏུ་མེད་པ་འདི། །འཕགས་མཆོག་རིགས་གསུམ་འཁོར་དང་བཅས་ལ་འབུལ། །ཐུགས་རྗེའི་བརྩེ་བར་དགོངས་ཏེ་བཞེས་ནས་ཀྱང་། །བདག་གིས་ལུས་ངག་ཡིད་གསུམ་བྱིན་གྱིས་རློབས། །ཨོ་མནྡྲ་ཤི་ལོ་ཀི་ཤྭ་རི་བཛྲ་པཱ་ཎི་ཨརྒྷཾ་སོགས་ནས་ཤབྡ་པྲ་ཏིཙྪ་ཡེ་སྭཱ་ཧཱ། པཉྩ་ཨ་མྲྀ་ཏ༔ མ་ཧཱ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། དེ་ནས་བསྟོད་པ་ནི། ཧཱུྃ། དུས་གསུམ་རྒྱལ་བ་ཀུན་གྱི་སྐུ་གསུང་ཐུགས། །ཁམས་གསུམ་འགྲོ་བ་ཀུན་གྱི་སྐྱབས་གཅིག་པོ། །ལུས་ངག་ཡིད་གསུམ་སྲུང་བ་ལྷ་ཡི་མཆོག །རིགས་གསུམ་མགོན་པོའི་སྐུ་ལ་ཕྱག་འཚལ་བསྟོད། །སྟོང་གསུམ་འཇིག་རྟེན་ཟིལ་གནོན་སྤྲུལ་པའི་སྐུ། །རླབས་ཆེན་ཁྱུང་དང་རྩལ་ཆེན་སེང་གེ་དང་། །ངར་ཆེན་འབྲུག་སྟེ་དཀར་པོ་མགོ་གསུམ་ཞེས། །སྲུང་སྐྱོབ་སྤྲུལ་པའི་ལྷ་ལ་མཆོད་ཅིང་བསྟོད། །བདག་དང་བསྲུང་བྱ་རྣམས་ལ་བསྲུང་དུ་གསོལ། །དེ་ནས་བསྙེན་པ་བྱ་བའི་རིམ་པ་ནི། འཇམ་དཔལ་གྱི་ཐུགས་ཀར་ཟླ་བའི་སྟེང་དུ་ཡི་གེ་མྱི་ལ་སྔགས་ཕྲེང་གཡས་སུ་འཁོར་བ། སྤྱན་རས་གཟིགས་ཀྱི་ཐུགས་ཀར་ཟླ་བའི་སྟེང་དུ་ཧྲཱིཿལ་སྔགས་ཕྲེང་གཡས་སུ་འཁོར་བ། ཕྱག་ན་རྡོ་རྗེའི་ཐུགས་
ཀར་ཉི་མའི་སྟེང་དུ་ཧཱུྃ་ལ་སྔགས་ཕྲེང་གཡས་སུ་འཁོར་བ་ལས་འོད་ཟེར་འཕྲོས། སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་མཉེས་པའི་མཆོད་པ་འབུལ། སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་སྦྱངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས་དང་ཐུགས་རྗེ་ནུས་མཐུ་ཐམས་ཅད་གཅིག་ཏུ་བསྡུས་ནས། རང་ཉིད་རིགས་གསུམ་མགོན་པོའི་སྐུ་གསུང་ཐུགས་ལ་ཐིམ་པར་བྷེ་ལ། ༀ་ཝཱ་གི་ཤྭ་རི་མཱི། ཨོཾ་མ་ཎི་པདྨེ་ཧཱུྃ་ཧྲཱིཿ ཨོ་བཛྲ་པཱ་ཎི་ཧཱུྃ། ཞེས་པ་འདི་རབ་ཁྲི་ཚོ་གཅིག །འབྲིང་སྟོང་ཚོ་གཅིག །ཐ་མ་ཡང་སུམ་བརྒྱ་ཙམ་གཅིག་བཟླ། རང་ཉིད་ལྷ་གསུམ་ཀ་ཡིན་སྙམ་པའི་ང་རྒྱལ་དང་ལྡན་པར་བྱ་དགོས། གོང་བསྙེན་འདི་ལྟར་མ་བྱས་ན། འཇིག་རྟེན་གྱི་དྲེགས་པ་ཅན་འདི་རྣམས་དབང་དུ་མི་འདུས་ཤིང་། འཁུ་ལྡོག་དྲག་པོ་བྱེད་ཉན་ཡོད། དེ་ལྟར་ལྡན་ན་གཡོག་པོའི་དཔོན་མཐོང་བ་འདྲ་སྟེ། ཅི་བཅོལ་བའི་བཀའ་ཉན་ལས་བྱེད་དོ། །དེ་ལྟར་གོང་གནོན་གཉེན་པོ་ཡེ་ཤེས་པའི་ལྷ་ཞེས་བྱ་སྟེ། རང་དང་ཡོན་བདག་རྣམས་ལ་ཚེ་འདི་ཕྱི་གཉིས་ཀ་ལ་ཕན་ཐོགས་རྒྱ་ཆེན་པོ་འབྱུང་ངོ་། ༈ དེ་ནས་སྲུང་འཁོར་བསྒོམ་པའི་རིམ་པ་ནི། རང་ཉིད་རིགས་གསུམ་མགོན་པོ་གསལ་བའི་སྐུ་ལས་འོད་ཟེར་དཀར་པོ་འཕྲོས་པས། །
སྟེང་འོག་ཐམས་ཅད་ཤེལ་གྱི་གུར་ཁང་ཡངས་ཤིང་རྒྱ་ཆེ་བ། དེའི་ནང་དུ་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་ཐམས་ཅད་ཚུད་པར་གྱུར། །བདག་གི་སྤྱི་གཙུག་ཏུ་ཁྱུང་ཆེན་གཡུ་འབྲུག་སེང་གེ་གསུམ་གྱིས་ངར་སྐད་བསྒྲགས་ཤིང་འགྱིང་བ། སྣང་སྲིད་ལྷ་འདྲེ་སྡེ་བརྒྱད་གཟའ་ཀླུ་རྒྱལ་བསེན། ས་བདག་ཀླུ་གཉན་ཐམས་ཅད་ཟིལ་གྱིས་མནན་ནས་གནོད་མི་ནུས་པར་སྲུང་བ་དང་། སླར་ཡང་ཕྱག་ན་རྡོ་རྗེའི་ཐུགས་ཀ་ལས་འོད་ཟེར་འཕྲོས་པས། ཤེལ་གུར་གྱི་ཕྱི་རོལ་དུ། སྟེང་རྡོ་རྗེ་སྔོན་པོའི་བླ་བྲེ། འོག་རྡོ་རྗེ་སྔོན་པོའི་ས་གཞི། བར་ཕྱོགས་མཚམས་ཐམས་ཅད་རྡོ་རྗེ་སྔོན་པོའི་གུར་ཁང་དུ་གྱུར་ཅིག །སླར་ཡང་འཇམ་དཔལ་གྱི་སྐུ་ལས་འོད་ཟེར་སེར་པོ་འཕྲོས་པས། །དེའི་ཕྱི་རོལ་དུ་སྟེང་འོག་ཕྱོགས་མཚམས་ཐམས་ཅད་གསེར་གྱི་འཁོར་ལོ་རྩིབས་སྟོང་དང་ལྡན་པ་གཉིས་གུར་ཐབས་སུ་འཁོར་བ། སླར་ཡང་སྤྱན་རས་གཟིགས་ཀྱི་གསུང་ལས་འོད་ཟེར་འཕྲོས་པས། དེའི་ཕྱི་རོལ་དུ་པདྨ་དཀར་པོས་ཡུ་བ་བྱས་པའི། མཚོན་ཆ་སྣ་ཚོགས་ནི། རལ་གྲི། ཕུར་པ། ཁ་ཊཾ། མདུང་ཐུང་། ཐོ་བ། གྲི་གུག་ལ་སོགས་
པ་རྩེ་མོ་ཕྱིར་བསྟན་པའི་བར་མཚམས་མེད་པར་གཡས་སུ་འཁོར་བའི་གུར་ཁང་། དེ་རྒྱབ་ཏུ་ཡེ་ཤེས་ཀྱི་མེ་རི་མེ་དཔུང་ཁ་དོག་ལྔ་ལྡན་གཡས་སུ་དམར་ཀྱི་ལི་ལི་འཁོར་བའི་གུར་དུ་གྱུར་ཅིག །སླར་ཡང་རིགས་གསུམ་མགོན་པོའི་སྤྲུལ་པ་ཁྱུང་འབྲུག་སེང་གསུམ་ལས་འོད་ཟེར་འཕྲོས་པས། བདག་དང་བསྲུང་བྱའི་ལུས་ངག་ཡིད་གསུམ་ལ་ཐིམ་པས། ནད་གདོན་བགེགས་དང་སྣང་སྲིད་ལྷ་འདྲེའི་གནོད་པས་མི་ཚུགས་པའི་རང་བཞིན་ཏུ་གྱུར་ཅིག ཁྲོ་བཛྲ་ག་རུ་ཊ་ཧཱུྃ་ཕཊ༔ རཀྵ་རཀྵ་སྭཱ་ཧཱ། དུ་ན་དུ་ན་ཧཱུྃ་ཕཊ༔ རཀྵ་རཀྵ་སྭཱ་ཧཱ། ཡ་མ་རཱ་ཛ་ཧཱུྃ་ཕཊ༔ རཀྵ་རཀྵ་སྭཱ་ཧཱ། བརྒྱའམ་ཉེར་གཅིག་ཙམ་རེ་བཟླ། དེས་ནི་བར་ཆད་ཐམས་ཅད་ཀྱིས་མི་ཚུགས་ཏེ། དཔའ་བོ་གོ་ཁྲབ་གྱོན་པ་དང་འདྲ་བའོ།། ༈ དེ་ནས་རི་རབ་གླིང་བཞིའི་འཕྱོང་བཤད་ཧཱུྃ། འབྱུང་བ་ལྔ་ཡི་ཁྱད་པར་ལས། །དབང་ཆེན་རྣམ་ལྔ་རིམ་པར་ཆགས། །དབང་ཆེན་རྣམ་ལྔའི་རིམ་པ་ལས། །འོག་ཏུ་རླུང་གི་དཀྱིལ་འཁོར་ཆགས། །དེ་ལ་མེ་ཡི་ད་ལ་འབར། །སྲིད་པ་གཞི་མ་རྒྱ་མཚོ་ཆགས། །དེ་ནང་གསེར་གྱི་ས་གཞི་ཆགས། །དེ་སྟེང་རི་རབ་ལྷུན་པོ་ཆགས། །རྩ་བ་ཟབ་སྟེ་རྩེ་མོ་འཕགས། །དཔག་ཚད་བརྒྱད་
ཁྲི་ཕྱིར་ནུབ་སྟེ། །ཀླུ་ཡི་གནས་སུ་ལོ་འདབ་རྒྱས། །དཔག་ཚད་བརྒྱད་ཁྲི་ཡར་འཕག་སྟེ། །ལྷ་ཡི་གནས་སུ་འབྲས་བུ་སྨིན། །ཕྱོགས་བཞི་གྲུ་བཞི་ཁ་བད་བཏགས། །མཚན་ཉིད་མི་མཇེད་འཇིག་རྟེན་ཁམས། །རིན་ཆེན་རྒྱལ་བ་ཀེ་ཀེ་རུ། །བདེ་བའི་ཚལ་དང་དགའ་བའི་ཚལ། །འབྲུ་ཡི་ཚལ་ལ་སོགས་པ་ཡི། །ལྷ་གནས་དེ་ནི་བསམ་མི་ཁྱབ། །ཕྱི་རོལ་གསེར་གྱི་རི་བདུན་ཆགས། །བར་དུ་རོལ་པའི་མཚོ་བདུན་འཁྱིལ། །ཕྱི་རོལ་གསེར་གྱི་ས་གཞིའི་སྟེང་། །ཤེར་ཕྱོགས་ཟླུམ་པོ་ཞི་བའི་ངང་། །ཤར་གྱི་ལུས་འཕགས་གླིང་དུ་ཆགས། །ལྷོ་ཕྱོགས་སོག་ཀ་རྒྱས་པའི་གླིང་། །ལྷོ་ཡི་འཛམ་བུ་གླིང་དུ་ཆགས། །ནུབ་ཕྱོགས་ཟླ་གམ་དབང་གི་གླིང་། །ནུབ་ཀྱི་བ་ལང་སྤྱོད་དུ་ཆགས། །བྱང་ཕྱོགས་གྲུ་གསུམ་དྲག་པོའི་གླིང་། །བྱང་གི་སྒྲ་མི་སྙན་དུ་ཆགས། །དེ་ལ་གླིང་གཡོགས་གླིང་ཕྲན་ཆགས། །དེ་ལ་ལྕགས་རི་མུ་ཁྱུད་པསྐོར། །དེ་གླིང་བཞི་ལ། །འགྲོ་བ་རིགས་དྲུག་སེམས་ཅན་བརྟེན། །སྣང་སྲིད་ལྷ་འདྲེ་དེ་ལ་གནས། །སྟེང་ནས་ནམ་མཁའི་གུར་ཁང་ཕུབ། །འོག་ཏུ་ས་གཞིའི་དཀྱིལ་འཁོར་ཆགས། །
བར་དུ་ཉི་ཟླའི་འཁོར་ལོ་འཁོར། །ལོ་ཟླ་ཞག་དུས་ཚེས་གྲངས་འཛིན། །འབྱུང་བ་ཆེན་པོ་རྣམ་ལྔ་ལས། །ལོ་སྐོར་ཆེན་པོ་བཅུ་གཉིས་འཁོར། །དེ་ལ་བསྐོར་ཆེན་དྲུག་ཅུ་སྤྲུལ། །དེ་ལ་ཕོ་བྲང་ལིང་དགུ་འཁོར། །དེ་ལ་སྤར་ཁ་བརྒྱད་པོ་འཁོར། །ལོ་གཅིག་ཟླ་བ་བཅུ་གཉིས་ལས། །ཚེས་ལྷ་སུམ་བརྒྱ་དྲུག་ཅུ་འཁོར། །ཟ་མ་བདུན་བརྒྱ་ཉི་ཤུ་བྱུང་། །མཁྱེན་རབ་བདག་པོ་འཇམ་དཔལ་གྱིས། །བྱི་བའི་ལོ་ལ་རྩིས་བཏབ་ནས། །ཕག་གི་ལོ་ལ་མཇུག་བཏབ་སྟེ། །ལོ་ཟླ་ཞག་དུས་སྤར་སྨེ་དང་། །གཟའ་དང་རྒྱུ་སྐར་རྩིས་ལ་བཏབ། །རྒྱ་ནག་རྩིས་བྱེད་ཆེན་པོ་དང་། །ཀུན་མཁྱེན་ཡེ་ཤེས་སྤྱན་གྱིས་གཟིགས། །ཡག་ཉེས་ཐམས་ཅད་ཐུགས་ལ་དགོངས། །སེམས་ཅན་རྣམས་ལ་ཕན་པའི་ཕྱིར། །བྱ་ལས་ཐམས་ཅད་གཏན་ལ་ཕབ། །དེ་ལྟར་རིགས་དྲུག་སེམས་ཅན་རྣམས། །བདེ་སྐྱིད་དཔལ་ལ་སྤྱོད་པར་ཤོག །ཧཱུྃ། དུས་གསུམ་སངས་རྒྱས་སྐུ་སྤྲུལ་པ། །མཁྱེན་རབ་མངའ་བདག་འཇམ་དཔལ་ནི། །ཞལ་གཅིག་ཕྱག་གཉིས་ཞི་བའི་ཚུལ། །སྐུ་མདོག་སེར་པོ་གསེར་འོད་འཕྲོ། །ཕྱག་གཉིས་རལ་གྲི་ཨུཏྤལ་འཛིན། །ཞབས་གཉིས་རྡོ་རྗེའི་
སྐྱིལ་ཀྲུང་བཞུགས། །འཕགས་པ་འཇམ་དཔལ་སྐུ་ལ་བསྟོད། །དྲེགས་པ་ཅན་ཀུན་འདུལ་བར་བྱིན་གྱིས་རློབས། །ལོ་ཟླ་ཞག་དུས་རྩིས་འདེབས་ནི། །ལོ་ཡི་དང་པོ་བྱི་བ་ལོ། །ཟླ་བའི་དང་པོ་སྟག་ཟླ་བ། །ཞག་གི་གྲངས་འཛིན་ཚེས་གཅིག་སྟེ། །ཟ་མའི་དང་པོ་ནམ་ལང་ཡོས། །འབྱུང་བ་རྣམ་ལྔའི་ཁ་དོག་ལས། །ལོ་སྐོར་བཅུ་གཉིས་འཁོར་བར་བསྐོར། །དེ་ལྟར་ལོ་ཟླ་ཞག་དུས་ཀྱི། །སྐག་པོ་ཆེ་རྣམས་ཟློག་པ་དང་། །འཆི་བདག་དབང་ཆེན་བཤོལ་བ་དང་། །འདུ་བའི་ནད་རྣམས་བསལ་བ་དང་། །རྣམ་རྟོག་བགེགས་རྣམས་འདུལ་བ་དང་། །སྟོང་ཕྲག་བརྒྱད་ཅུའི་བགེགས་རིགས་དང་། །ཁམས་གསུམ་འཁོར་བའི་སྐག་ཆེན་དང་། །མི་མཐུན་ཕྱོགས་རྣམས་བཟློག་པའི་ཕྱིར། །འཕགས་པ་འཇམ་དཔལ་བཀའ་བྱུང་གིས། །ཟློག་བྱེད་ནག་པོ་མགོ་གསུམ་བཞེངས། །སླ་ང་ནག་པོའི་གདན་ལ་བཞུགས། །རྒྱ་ཇ་ངད་ལྡན་ཆས་ཇ་འདྲེན། །མི་ཁ་སྣ་ཚོགས་ཟས་སུ་སྦྱིན། །གཏོར་མ་མཐེབ་སྐྱུ་ཤ་དུམ་དང་། །ཁྲག་ཐིགས་ཆང་ཕུད་མཆོད་པ་འབུལ། །བདུན་མོ་རྔ་ཞོན་བཙུན་མོ་དང་། །མི་དམར་མགོ་གསུམ་སྣ་ཁྲིད་
སྦྱར། །ཤང་ཤང་བྲ་རུ་གཡོག་ཏུ་འབྲང་། །མི་ཁ་བ་རུས་ལས་མཁན་བྱེད། །སྟོབས་ལྡན་གླང་ཆེན་ཁལ་དུ་ཁོལ། །མི་ཁའི་ཡས་རྣམས་ཁོལ་ལ་སོང་། །མི་མཐུན་རྐྱེན་ངན་ཐམས་ཅད་དང་། །རྩིས་ཕན་ཐན་ལྟས་ངན་པ་དང་། །སྐག་རིགས་ཐམས་ཅད་བཟློག་པར་མཛོད། །ཧཱུྃ། བླ་མེད་དཀོན་མཆོག་གསུམ་པོ་དང་། །བཅོམ་ལྡན་ཤཱཀྱའི་རྒྱལ་པོ་དང་། །རྒྱལ་སྲས་རིགས་གསུམ་མགོན་པོ་ལ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་འདོད་ཡོན་ལྔ། །གཟུགས་སྒྲ་དྲི་རོ་རེག་བྱ་ཆོས། །བདུད་རྩི་སྨན་གཏོར་ཚོགས་མཆོད་དང་། །བཀྲ་ཤིས་རྟགས་བརྒྱད་རིན་ཆེན་རིགས། །རྒྱལ་སྲིད་སྣ་བདུན་ལོངས་སྤྱོད་ཚོགས། །མཆོད་པའི་བྱེ་བྲག་དཔག་མེད་འབུལ། །བདག་དང་ཡོན་བདག་བྱིན་གྱིས་རློབས། །བསོད་ནམས་ཚོགས་ཆེན་ཡོངས་རྫོགས་ནས། །སྒྲིབ་གཉིས་སྐྱོན་དང་བྲལ་བར་ཤོག །ཧཱུྃ། འཕགས་པ་འཇམ་དཔལ་བཀའ་ཉན་པ། །རི་རབ་གླིང་བཞི་ཁོར་ཡུག་ལ། །མངའ་མཛད་ས་བདག་དབང་ཆེན་དང་། །བཙུན་མོ་ས་ཡི་ལྷ་མོ་དང་། །ས་འཛིན་ལག་པ་ལྟོ་འཕྱེ་དང་། །འབྱུང་བ་ལོ་ཟླ་སྤར་སྨེའི་བདག །
ཕྱོགས་སྐྱོང་བཅུ་དང་རྒྱལ་ཆེན་བཞི། །ལྷ་ཆེན་བརྒྱད་དང་ཀླུ་ཆེན་བརྒྱུད། །གཉན་ཆེན་བརྒྱད་དང་གཟའ་ཆེན་བརྒྱད། །རྒྱུ་སྐར་ཉེར་བརྒྱད་ཉེ་དབང་ཚོགས། །ས་བདག་རྒྱལ་བློན་བཅུ་བདུན་དང་། །ལོ་ཟླ་ཞག་དུས་ས་བདག་ཚོགས། །ཡུལ་འདིའི་གཞི་བདག་ཀླུ་གཉན་སོགས། །ཞི་བར་བཞུགས་པའི་ལྷ་རྣམས་ལ། །གསེར་དངུལ་ཟངས་ལྕགས་མུ་ཏིག་དང་། །གཡུ་དང་བྱི་རུ་མུ་མེན་ཤེལ། །བཻཌཱུརྱ་དང་ཨརྨ་ཀ །རིན་ཆེན་སྣ་ཚོགས་མཆོད་པ་འབུལ། །ཀ་ར་བུ་རམ་ཁམ་བུ་དང་། །ཤིང་མངར་ཨ་རུ་བ་རུ་ར། །སྐྱུ་རུ་ར་ལ་སོགས་པ་ཡི། །རྩི་སྨན་འབྲས་བུས་མཆོད་པ་འབུལ། །ནད་རིགས་ཐམས་ཅད་ཞི་བར་མཛོད། །ཤིང་ཐོག་འབྲས་བུ་བདུད་རྩིའི་སྨན། །ཨ་ལི་ཀ་དང་འབྲས་ཆེན་དང་། །འབྲུ་དང་ནས་དང་གྲོ་དང་མཆན། །བྲ་བོ་སྲན་མ་སྟར་སྒྲ་དང་། །ཁམ་བུ་གཡེར་མ་སྒ་ཡུང་དང་། །འབྲུ་རིགས་ཤིང་ཐོག་མཆོད་པ་འབུལ། །ཡོན་ཏན་རྒྱས་པར་མཛད་དུ་གསོལ། །བདུད་རྩིའི་མཚོ་དང་ཟས་ཀྱི་རིགས། །དཀར་གསུམ་མངར་གསུམ་འདོད་ཡོན་ཚོགས། །ཇ་ཆང་མར་ཁུ་འོ་མའི་མཚོ། །དཀར་གསུམ་ཟས་སྣའི་
མཆོད་པ་འབུལ། །མི་ཟས་ནོར་ལ་སྤྱོད་པར་ཤོག །སྲོག་ཆགས་རྐང་འགྲོ་སྣ་ཚོགས་དང་། །བྱ་རིགས་གཅན་གཟན་མཆོད་པ་འབུལ། །ཕྲིན་ལས་འགྲུབ་པར་མཛད་དུ་གསོལ། །སྒྲུབ་མཆོག་ཡོན་མཆོད་འཁོར་བཅས་ཀྱི། །ལན་ཆགས་བྲལ་ཞིང་བུ་ལོན་བྱང་། །ཚེ་རབས་སྔོན་གྱི་འབྲེལ་བའོ། །དུག་ལྔའི་རྟོག་པ་གང་ཡིན་པ། །ཆགས་འཁོན་སྦྱང་བའི་ཡོན་དུ་འབུལ། །འགལ་བ་ཡོད་ན་སྦྱང་དུ་གསོལ། །ན་བ་ཡོད་ན་སྨན་གྱིས་བཅོས། །ཤི་བ་ཡོད་ན་སྟེང་ནས་བསལ། །རྐྱེན་ངན་ཡོད་ན་མདོས་ཀྱིས་ཟློག །མི་ལུས་སྒྱུ་མ་རིན་ཆེན་ལ། །ཚེ་ལོ་བརྒྱ་ཐུབ་མཛད་དུ་གསོལ། །ས་བདག་ཀླུ་གཉན་འཁོར་བཅས་རྣམས། །རང་རང་གནས་སུ་བཞུགས་ནས་ཀྱང་། །བདེན་པའི་བཀའ་ལ་མ་འདའ་བར། །གནམ་ནས་རྒྱལ་བྱིན་མ་འབེབས་ཤིག །བར་དུ་བདུད་བཞི་མ་ལྡང་ཞིག །འོག་ཏུ་དུར་ཕག་མ་འཁུན་ཅིག །སྟེང་ནས་གནམ་དལ་མ་འབེབས་ཤིག །བར་སྣང་ཀིང་ཀང་མ་འཁོར་ཅིག །འོག་ནས་ས་བདག་མ་གདངས་ཤིག །སྒྲུབ་མཆོག་ཡོན་བདག་འཁོར་བཅས་ཀུན། །ལོ་ལ་ཐར་ནས་ཚེ་ལ་ཕྱིན། །མི་ཕྱུགས་རྩིས་ནས་སྐག་ལས་
ཐར། །མི་མཐུན་ཕྱོགས་ལས་རྒྱལ་བར་ཤོག །ཤི་སྒབ་ཆོད་ལ་གསོན་སྒབ་སྤེལ། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་མ་ཧཱ་དྷེ་ཝ་ལོ་ཀ་པཱ་ལ་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨནྡྷུ་སོགས་ཀྱིས་མཆོད། དེ་ནས་དཀར་བ་གསུམ་གྱིས་འཕྱོང་བཤད་དེ། །ཀྱཻ། ཀོང་ཙེ་འཕྲུལ་གྱི་རྒྱལ་པོ་གཏོ་ལ་བཞེངས། །འགྲོ་བ་རིགས་དྲུག་སེམས་ཅན་རྣམས། །འབྱུང་བ་ལྔ་ལ་མ་བརྟེན་གང་ཡང་མེད། །ནམ་མཁའ་འདི་ནི་སྟོང་ལགས་ཀྱང་། །དེ་ཡང་འབྱུང་བ་ལྔ་ལ་བརྟེན། །འབྱུང་བ་བཞི་ནི་ས་ལ་བརྟེན། །འབྱུང་བ་ས་ཡང་ཐེག་པ་ཆེ། །མེ་ནི་ཐམས་ཅད་དྲོ་བར་བྱེད། །ཆུ་ནི་ཐམས་ཅད་སྨིན་པར་བྱེད། །རླུང་ནི་ཐམས་ཅད་གཡོ་བར་བྱེད། །ཤིང་ནི་ཐམས་ཅད་སྐྱེད་པར་བྱེད། །དེ་བས་སྐྱེ་འགྲོ་སེམས་ཅན་རྣམས། །འབྱུང་བ་ལྔ་ལས་གྲུབ་པ་ཡིན། །དེ་ལས་གྲུབ་པའི་སེམས་ཅན་ལ། །དཔའ་སྟོབས་ལྡན་པ་གསུམ་མཆིས་ཏེ། །ཀུན་ལ་འཇིགས་པ་སེང་གེ་ཡིན། །སྒྲ་ཡི་རྒྱལ་པོ་གཡུ་འབྲུག་ཡིན། །ཀུན་གྱི་ཟིལ་གནོན་བྱ་ཁྱུང་ཡིན། །དྲག་ཤུལ་སྟོབས་ལྡན་སེམས་ཅན་རྣམས། །འཇིག་རྟེན་ཁམས་ན་གཞན་མ་
མཆིས། །རྩལ་ཆེན་སེམས་ཅན་རྒྱལ་པོ་གསུམ། །རི་རབ་རྩེ་ནས་གཤེགས་སུ་གསོལ། །པདྨའི་གདན་ལ་བཞུགས་སུ་གསོལ། །འདིར་བཤམས་མཆོད་པ་གཏོར་མ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །སྒྲུབ་མཆོག་ཡོན་བདག་བསྲུང་དུ་གསོལ། །བར་ཆད་གདོན་བགེགས་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །པཉྩ་ཨ་མྲྀ་ཏ། མ་ཧུ་བྷ་ལི་ཏ། མ་ཧཱ་རཀྟ། སརྦ་པཱུ་ཛ་ཁཱ་ཧི། དེ་ནས་སྐུའི་སྤྲུལ་པ་ལ་བསྟོད་པ་ནི། ཧཱུྃ། འཇམ་དཔལ་སྐུ་ཡི་སྤྲུལ་པ་ལས། །དབང་ཆེན་ས་གཞིའི་དཀྱིལ་འཁོར་ནས། །རི་རབ་གངས་རིའི་རྩེ་མོ་ནས། །སེམས་ཅན་ཀུན་གྱི་རྒྱལ་པོ་ནི། །དུང་སེང་གཡུ་ཡི་རལ་པ་ཅན། །ཞལ་ནས་སྒྲ་སྒྲོག་དྷི་རི་རི། །མཆེ་བ་གནམ་ལྕགས་སྟ་རེ་འདྲ། །སྤྱན་མིག་ཉི་མ་ཤར་བ་འདྲ། །ཨོག་ཚོམ་གཡུ་ཡི་འབྲུག་རིས་ཅན། །ཤངས་ནི་ཁྲོ་གཉེར་གསུམ་དང་ལྡན། །རལ་པ་བར་སྣང་ཁམས་སུ་བསིགས། །སྡེར་མོས་དགྲ་བགེགས་སྲོག་རྩ་གཅོད། །གང་ལ་བབ་ཀྱང་ཐོག་ལྟར་རྒྱུག །སེམས་ཅན་གང་གི་གཤེད་དུ་ཆེ། །རྩལ་ཆེན་སེང་གེའི་སྤྲུལ་པའི་སྐུ། །སེམས་ཅན་སྲོག་ཆགས་གང་ཡིན་ཡང་། །
ཐམས་ཅད་མ་ལུས་ཟིལ་གྱིས་གནོན། །འབྱུང་པོ་མི་མིན་རྡུལ་དུ་རློགས། །མཐུ་ཆེན་སེང་གེའི་ངར་སྐད་ཀྱིས། །ས་བདག་ས་སྲིན་རྩད་ནས་གཅོད། །དྲེགས་པ་ཅན་རྣམས་འདར་ཞིང་བསྔངས། །གནོད་བྱེད་ཕོ་མོ་ཞབས་ཀྱིས་གནོན། །དམ་ཉམས་རྣམས་ཀྱི་གཉའ་གནོན་མཛོད། །དཀར་བ་གསུམ་ལ་བྱིན་གྱིས་རློབས། །གནུས་ཁང་འདི་ལ་བྱིན་ཅིག་ཕོབ། །བདག་ཅག་ཡོན་མཆོད་བསྲུང་དུ་གསོལ། །བར་ཆད་རྐྱེན་ངན་བཟློག་ཏུ་གསོལ། །བདག་དང་རྒྱུ་སྦྱོར་ཡོན་བདག་གི །སྐག་དང་ལྟས་ངན་བཟློག་པའི་ཕྱིར། །ནག་པོ་མགོ་གསུམ་མདོས་བྱེད་ན། །མདོས་འདིས་གོང་ནོན་ཁྱེད་ཀྱིས་གྱིས། །མདོས་འདི་ལོགས་སུ་མ་བཅུག་ཅིག །མདོས་འདི་འཁྱམས་སུ་མ་བཅུག་ཅིག ། བདག་ཅག་ཡོན་བདག་འཁོར་བཅས་ལ། །སྐུ་སྤྲུལ་སེང་གེའི་བསྲུང་དུ་གསོལ། །ལུས་ངག་ཡིད་གསུམ་བསྲུང་དུ་གསོལ། །མི་མཐུན་རྐྱེན་ངན་བཟློག་ཏུ་གསོལ། །དགྲ་བོ་དམ་ཉམས་རྡུལ་དུ་རློགས། །བྱད་མ་རྣམས་ནི་རྩད་ནས་ཆོད། །སྐག་དང་ལྟས་ངན་བཟློག་ཏུ་གསོལ། །ཡ་མ་རཱ་ཛ་ཧཱུྃ་ཕཊ༔ རཀྵ་རཀྵ་སྭཱ་ཧཱ། ཞེས་ལན་བདུན་བརྗོད། དེ་ནས་
གསུང་གི་སྤྲུལ་པ་ལ་བསྟོད་པ་ནི། ཧཱུྃ། འཕགས་པ་སྤྱན་རས་གཟིགས་དབང་གིས། །གསུང་གི་སྤྲུལ་པ་གཡུ་འབྲུག་སྤྲུལ། །འགྲོ་དྲུག་སེམས་ཅན་འདི་རྣམས་ནི། །ལས་ཀྱི་རྒྱ་མཚོ་གཏིང་རེ་ཟབ། །བསྐལ་པ་ཆེན་པོ་མཐའ་རེ་ཡངས། །འཁོར་བའི་འཇིག་རྟེན་གཉུག་རེ་རིང་། འཆི་བདག་ཆེན་པོ་དབང་རེ་ཆེ། །གཤིན་རྗེ་ཁྲོ་ཐོག་རྒྱུག་ཅིང་འགྲོ། །དེ་རྣམས་བདེ་བར་བྱ་བའི་ཕྱིར། །གསུང་གི་སྤྲུལ་པ་འབྲུག་ལྟར་གྲག །བར་སྣང་ཁམས་ཀྱི་དཀྱིལ་འཁོར་ནས། །ལྕགས་འབྲུག་དཀར་པོ་རལ་པ་ཅན། །སྤྲིན་དང་ན་བུན་ནང་ན་རྒྱུག །འབྲུག་རུ་སྲིད་པའི་རྩེ་ལ་ཉུལ། །འབྲུག་ལྕེ་བར་སྣང་ཁམས་སུ་བརྐྱངས། །གློག་གི་ཞགས་པས་གར་ཡང་བཅིང་། །གསུང་གི་འབྲུག་སྒྲ་བསྒྲགས་པའི་ཚེ། །ཐོག་དང་སེར་བ་གར་ཡང་འབབ། །ལག་པས་རི་རབ་འབུམ་ཡང་བསྙིལ། །རྐང་པས་འཇིག་རྟེན་ཁམས་རྣམས་བསྒྲོད། །སྤྱན་མིག་བསྒྲད་པས་གནམ་ཐེའུ་བརྒྱལ། །དུས་ཚོད་འཛིན་ཞིང་མཚམས་བཞི་སྲུང་། །མཁའ་ལ་རྒྱུ་ཞིང་ཞག་ཟླ་སྲུང་། །སྲིད་པའི་བསྐོས་མཁན་རྫུ་འཕྲུལ་ཅན། །སྐྱེ་འགྲོ་རྩི་ཤིང་ནགས་ཚལ་ལ། །ཀུན་གྱི་གཤེད་དུ་མཐུ་བོ་
ཆེ། །བསོད་ནམས་མི་ཡི་གཉེན་དུ་བབ། །ཡེ་ཤེས་ཚོགས་ལ་རང་གསལ་འཆར། །ཡང་དག་དོན་ལ་དགོངས་པ་མཛད། །བསྟན་པ་དར་རྒྱས་མཐུ་བོ་ཆེ། །མདོས་གླུད་ཀུན་གྱི་ཟིལ་གནོན་མཛོད། །བདག་ཅག་ཡོན་མཆོད་འཁོར་བཅས་ཀྱི། །ནད་རིམས་གདོན་ཁ་ཟློག་པ་དང་། །དགྲ་སྣ་ཁ་མཆུ་བཟློག་པའི་ཕྱིར། །སྲིད་པའི་བསྐོས་མཁན་མགོ་གསུམ་བཞེངས། །སྒྱུར་ཅིག་བཟློག་པའི་དཔང་པོ་མཛོད། །མདོས་འདི་ལོགས་སུ་མ་བཅུག་ཅིག །མདོས་འདི་འགྲམས་སུ་མ་བཅུག་ཅིག །མདོས་འདི་འཁྱམས་སུ་མ་བཅུག་ཅིག །མདོས་འདིས་རྐྱེན་ངན་བཟློག་ཏུ་གསོལ། །རྣལ་འབྱོར་བདག་ཅག་འཁོར་བཅས་ལ། །གསུང་གི་སྤྲུལ་པས་བྱིན་གྱིས་རློབས། །ལུས་ངག་ཡིད་གསུམ་བསྲུང་དུ་གསོལ། །བཙན་པོས་ཁ་ཡོག་མ་སྡིག་ཅིག །ཕྱུགས་ལ་བཤས་ལག་མ་གཏོང་ཞིག །ལོ་དུས་ལོ་ལ་ལོ་བདུད་མ་འབེབས་ཤིག །ཟླ་དུས་ཟླ་ལ་ཟླ་སྲི་མ་གཏོང་ཞིག །ཞག་དུས་ཞག་ལ་ཞག་སྐག་མ་འབེབས་ཤིག །གནམ་བདུད་དལ་ཡམས་མ་གཏོང་ཞིག །འཚེར་རྩུབ་ལྟས་ངན་ཐམས་ཅད་ཟློག །ཟློག་ཅིག་སྒྱུར་ཅིག་ཕྲིན་ལས་མཛོད། །
དུ་ན་དུ་ན་ཧཱུྃ་ཕཊ༔ རཀྵ་རཀྵ་སྭཱ་ཧཱ། ཞེས་ལན་བདུན་བརྗོད། ༈ དེ་ནས་ཐུགས་ཀྱི་སྤྲུལ་པ་ལ་བསྟོད་པ་ནི། ཧཱུྃ། དཔལ་ཆེན་ཕྱག་རྡོར་ཐུགས་སྤྲུལ་ལས། །དབུ་ལ་ཁྱུང་ཆེན་འབར་བས་བརྒྱན། །རི་རབ་ལྷུན་པོའི་ཡར་རྩེ་ནས། །དཔག་བསམ་ཤིང་གི་རྩེ་མོ་ནས། །འདབ་ཆགས་རྒྱལ་པོ་ག་རུ་ཊ། །སྤྲུལ་པས་སྣང་སྲིད་ཟིལ་གྱིས་གནོན། །མཐུ་རྩལ་དྲག་པོས་སྡེ་བརྒྱུད་འདུལ། །མཆུ་སྡེར་གནམ་ལྕགས་ཐོག་ལས་གྲུབ། །སྤྱན་མིག་ཉི་ཟེར་ཟླ་ཟེར་འཕྲོ། །གཤོག་པས་སྟོང་གསུམ་བར་སྣང་ཁེབས། །ཀླུ་གཉན་ས་བདག་དབང་དུ་སྡུད། །སྣང་སྲིད་སྡེ་བརྒྱད་རླབས་ཀྱིས་གཅོད། །གནོད་བྱེད་གདུག་པ་རྡུལ་དུ་རློགས། །ཀླུ་རིགས་གདུག་པ་དབང་དུ་བསྡུས། །གནོད་སྦྱིན་དྲི་ཟ་ཕོ་མོ་དང་། །གཟའ་ཀླུ་ས་བདག་རྒྱལ་ཆེན་བཞི། །ཕྱོགས་སྐྱོང་བཅུ་པོ་གདོན་འཁོར་ཚོགས། །ཐམས་ཅད་མ་ལུས་དབང་དུ་བསྡུས། །བདག་ཅག་ཡོན་མཆོད་བསྲུང་བ་དང་། །ཁྱུང་ཆེན་སྤྲུལ་པས་བྱིན་གྱིས་རློབས། །དཀར་བ་གསུམ་ལ་བྱིན་ཕོབ་ཅིག །ས་བདག་ཀླུ་གཉན་གདུག་པ་ཟློག །ཁྱུང་གི་སྤྱི་གཙུག་ནོར་བུ་ཡིས། །དངོས་གྲུབ་དགོས་འདོད་ཆར་ལྟར་འབེབས། །སྒྲུབ་
མཆོག་བདག་ལ་དངོས་གྲུབ་སྩོལ། །ཁྱུང་ཆེན་དབུ་ཡི་རྭ་གཉིས་ལ། །གནམ་ལྕགས་ཐོག་གི་ཚྭ་ཚྭ་འཕྲོ། །སྟེང་གདོན་མ་ལུས་རྡུལ་དུ་རློགས། །ཁྱུང་གི་གཤོག་པ་གཡས་གཡོན་ལ། །ཡེ་ཤེས་མེ་སྒྲ་འབྲུག་སྒྲ་སྒྲོག །ལྟས་ངན་ཐམས་ཅད་ཟློག་པར་བྱེད། །ཡེ་ཤེས་མ་མོས་དགྲ་བགེགས་འདུལ། །ཞལ་ནས་ཀྲྀ་ཀྲྀ་ཏྲི་སྒྲ་སྒྲོག །སྣང་སྲིད་ལྷ་འདྲེ་བསླང་བར་བྱེད། །གནོད་བྱེད་གདུག་པ་རྡུལ་དུ་རློགས། །ཁྱུང་གི་མཐུ་རྩལ་བསམ་མི་ཁྱབ། །སྒྲུབ་མཆོག་ཡོན་མཆོད་བྱིན་གྱིས་རློབས། །བདག་དང་རྒྱུ་སྦྱོར་བདག་གི །བར་ཆད་རྐྱེན་རྣམས་བཟློག་པའི་ཕྱིར། །ནག་པོ་མགོ་གསུམ་མདོས་བཤམས་ནས། །མདོས་འདི་ལོགས་སུ་མ་བཅུག་ཅིག །མདོས་འདི་འགྲམས་སུ་མ་བཅུག་ཅིག །མདོས་འདི་འཁྱམས་སུ་མ་བཅུག་ཅིག །གནོད་བྱེད་རྣམས་ཀྱི་གཉའ་གནོན་མཛོད། །སྒྲུབ་མཆོག་ཡོན་བདག་འཁོར་བཅས་ལ། །མཐུ་རྩལ་ཁྱུང་གིས་བྱིན་གྱིས་རློབས། །ལུས་ངག་ཡིད་གསུམ་བསྲུང་དུ་གསོལ། །མི་མཐུན་བར་ཆད་བཟློག་ཏུ་གསོལ། །སྐག་དང་ལྟས་ངན་བཟློག་ཏུ་གསོལ། །མོ་ངན་རྩིས་ངན་བཟློག་ཏུ་གསོལ། །
བཅོལ་བའི་ཕྲིན་ལས་འགྲུབ་པར་མཛོད། །ཁྲོ་བཛྲ་གྷ་རུ་ཊ་ཧཱུྃ་ཕཊ། རཀྵ་རཀྵ་སྭཱ་ཧཱ། ཞེས་པ་འདི་ལན་བདུན་བཟླའོ། །དེ་ནས་སྲུང་འཁོར་ནི། ཧཱུྃ། འཕགས་པ་རིགས་གསུམ་མགོན་པོ་ཡི། །སྐུ་གསུང་ཐུགས་ཀྱི་སྤྲུལ་པ་ལས། །ཁྱུང་འབྲུག་སེང་གསུམ་སྤྲུལ་པ་འགྱེད། །སྒྲུབ་མཆོག་ཡོན་བདག་འཁོར་བཅས་ཀྱི། །ལུས་ངག་ཡིད་གསུམ་བསྲུང་དུ་གསོལ། །ཐུགས་ཀྱི་སྤྲུལ་པ་ཁྱུང་ཆེན་གྱིས། །སྤྱི་བོའི་གཙུག་ནས་བསྲུང་དུ་གསོལ། གསུང་གི་སྤྲུལ་པ་ལྕགས་འབྲུག་གིས། །མགྲིན་པའི་གནས་ནས་བསྲུང་དུ་གསོལ། །སྐུ་ཡི་སྤྲུལ་པ་སེང་ཆེན་གྱིས། །ཐུགས་ཀྱི་དཀྱིལ་ནས་བསྲུང་དུ་གསོལ། །རྣལ་འབྱོར་བདག་ཅག་འཁོར་བཅས་ཀྱི། །གཙུག་གནས་ལྷ་ཡི་བཀོད་པ་ནི། །སྤྱི་གཙུག་གོ་ཁྲབ་ཅན་གྱིས་བསྲུང་དུ་གསོལ། །མགྲིན་པར་ཟངས་ཁྲབ་ཅན་གྱིས་བསྲུང་དུ་གསོལ། །སྙིང་ཁར་དབང་བེར་ཅན་གྱིས་བསྲུང་དུ་གསོལ། །ལྟེ་བར་བསེ་ཁྲབ་ཅན་གྱིས་བསྲུང་དུ་གསོལ། །གསང་གནས་ལྕགས་ཁྲབ་ཅན་གྱིས་བསྲུང་དུ་གསོལ། །ལུས་ལ་བཙན་པའི་གོ་གྱོན་འཚལ། །སྲོག་ལ་བཙན་པའི་དབང་བསྐུར་འཚལ། །གློ་ན་རྣོ་བའི་མཚོན་
ཐོགས་འཚལ། །དགྲ་ལ་གཟུགས་པའི་མདའ་འཕེན་འཚལ། །བགེགས་དཔུང་བསྲེགས་པའི་མེ་འབར་འཚལ། །དེ་ལྟར་སྲུང་བའི་ལྷ་བཀོད་ཅིང་། །ལུས་ལ་བཙན་པའི་གོ་གྱོན་པས། །ལྷ་ཀླུ་བཙན་བདུད་དྲི་ཟ་དང་། །གཤིན་རྗེ་གནོད་སྦྱིན་བགེགས་ཀྱི་ཚོགས། །གཟའ་དང་ས་བདག་གཉན་རིགས་དང་། །རྒྱལ་བསེན་ཕོ་མོ་དམ་སྲི་སོགས། །བར་ཆད་བདུད་ཀྱིས་མི་ཚུགས་པར། །ཉིན་མཚན་ཀུན་ཏུ་བསྲུང་དུ་གསོལ། །བར་མཚམས་མེད་པར་བསྲུང་དུ་གསོལ། །གཡེལ་མེད་རྟག་ཏུ་བསྲུང་དུ་གསོལ། །བཛྲ་རཀྵ་རཀྟ་ཡེ་སྭཱ་ཧཱ། དེ་ནས་ཕྲིན་ལས་བཅོལ་བ་ནི། ཧཱུྃ། རིགས་གསུམ་མགོན་པོའི་སྤྲུལ་པ་ལ། །ཁྱུང་འབྲུག་སེང་གསུམ་མཐུ་སྟོབས་ཀྱིས། །ནག་པོ་མགོ་གསུམ་ཕོ་ཉར་ས་འགྱེད། །བྱད་དང་རྦོད་གཏོང་ཟློག་པར་བྱེད། །ལོ་སྐག་ཟླ་སྐག་དགྲ་ལ་ཟློག །མི་ཁ་བྲ་མཆུ་བསྒྱུར་བ་དང་། །ལྟས་ངན་འཚེར་རྩུབ་དགྲ་ལ་སྒྱུར། །དམར་པོ་མགོ་གསུམ་སྣ་ཁྲིད་སྦྱར། །དགྲ་བོའི་སྙིང་ལ་སྐྱེར་མདའ་རྒྱོབས། །ཡོན་བདག་ཚེ་གླུད་ཁྱོད་ཀྱིས་གྱིས། །བདུད་ཀྱི་ངོ་ལེན་ཁྱོད་ཀྱིས་གྱིས། །བདུད་མོ་རྔ་ཞོན་བཙུན་མོ་ཡིས། །ཁྲག་
རིམས་ནད་བཟློག་ཏུ་གསོལ། །ཤང་ཤང་བྲ་མཆུ་གཡོག་ཏུ་ཁྲིད། །མི་ཁ་བ་རུའི་ལས་མཁན་བྱེད། །སྟོབས་ལྡན་གླང་ཆེན་ཁལ་དུ་བཀལ། །མི་ཁའི་ཡས་རྣམས་ཁོལ་ལ་སོང་། །ཤཱ་རྡེལ་དཀར་ནག་གཏོར་ལ་སོང་། །ལོ་ཡི་སྐག་རྣམས་སྒྱུར་ལ་སོང་། །འཆེར་རྩུབ་སྐག་རྣམས་ཟློག་ལ་སོང་། །འཕགས་པ་འཇམ་དཔལ་བཀའ་མ་བཅག །སྔགས་འཆང་བདག་གི་དམ་མ་བཀྲལ། །ཡོན་བདག་དྲིན་ལེན་ཆུད་མ་གསན། །དམ་རྫས་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །གནོད་ཅིང་འཚེ་བར་བྱེད་པ་ཡི། །སྡང་བྱེད་དགྲ་དང་གནོད་བྱེད་བགེགས། །བྱད་མ་རྦོད་གཏོང་ལས་ངན་དང་། །བསྟན་པ་བཤིགས་པའི་རུ་ཏྲ་དང་། །དམ་བཅས་བྱས་པའི་དམ་ལོག་དང་། །ལེ་གུ་བྱས་པའི་ལྷ་ལོག་དང་། །ཤག་རོགས་བྱས་པའི་མནའ་ཟོས་དང་། །སློབ་མ་བྱས་པའི་དམ་ལོག་དང་། །ཆུང་མ་བྱས་པའི་རྒྱབ་རྟེན་དང་། །དེ་ཡི་གཤེད་མ། ཁྱོད་ཀྱིས་མཛོད། །མཆོད་ཅིང་བསྟོད་ན་ངོ་མ་ཆུང་། །རྦད་ཅིང་མངག་ན་མཐུ་མོ་ཆུང་། །གཏོ་གླུད་བོར་ན་འཕང་མ་ལྗི། །གླུད་དུ་འབུལ་ན་འཕང་མ་དམའ། །ལོ་དུས་ལོ་ལ་
ལོ་བདུད་མ་འབེབས་ཤིག །ཟླ་དུས་ཟླ་ལ་ཟླ་སྲི་མ་འབེབས་ཤིག །ཞག་དུས་ཞག་ལ་ཞག་སྐག་མ་འབེབས་ཤིག །ཟ་མ་དུས་ཚོད་སྐག་རྣམས་མ་འབེབས་ཤིག །དགྲ་སྣ་གྱོད་སྣ་བཟློག་ཏུ་གསོལ། །ནད་སྣ་རིམས་སྣ་བཟློག་ཏུ་གསོལ། །རྐུན་སྣ་ཇག་སྣ་བཟློག་ཏུ་གསོལ། །མོ་ངན་རྩིས་ངན་བཟློག་ཏུ་གསོལ། །རྨི་ལྟས་མཚན་ངན་བཟློག་ཏུ་གསོལ། །ཐན་ལྟས་ངན་པ་བཟློག་ཏུ་གསོལ། །མདོར་ན་མི་མཐུན་རྐྱེན་ངན་རྣམས། །ཐམས་ཅད་མ་ལུས་བཟློག་ཏུ་གསོལ། །བཅོལ་བའི་ཕྲིན་ལས་འགྲུབ་པར་མཛོད། །རཀཱ་ཙིཏྟ་དགྲ་བགེགས་ཀྱི་སྲོག་ལ་མཱ་ར་ཡ་རྦད། སྙིང་ལ་མཱ་ར་ཡ་ཟད། སརྦ་བིག་ནཱན་མཱ་ར་ཡ་རྦད། ཅེས་བརྗོད་པར་བྱའོ། །དེ་ལྟར་བྱས་པས་སྐག་ངན་ཟློག་པ་དང་། ལོ་སྤར་ཁའི་འགྲམས་འཁྲུག་བཅོས་པ་དང་། ཐན་ལྟས་ངན་པ་ཟློག་པ་དང་། མི་ཁ་སྡང་བ་དང་། མི་ནོར་ལ་བྱད་ཁ་ཟུག་པ་དང་། །ལྷ་འདྲེའི་བསམ་སྦྱོར་ངན་པ་དང་། གཏད་ཁྲམ་གྱིས་ཞབས་སུ་སོང་བ་དང་། མོ་རྩིས་རྨི་ལྟས་ངན་པ་དང་། མདོར་ན་མི་མཐུན་པའི་བར་ཆད་ཐམས་ཅད་ཟློག་པ་ལ། མི་ནག་མགོ་བོ་གསུམ་པའི་མདོས་འདི་མཆོག་ཏུ་ཟབ་པར་འགྱུར་རོ། །དེ་ལྟར་དཀར་པོ་མགོ་གསུམ་གྱི་གོང་གནོན་བྱས་ཚར་ནས། མི་ནག་གི་མངོན་རྟོགས་མདུན་བསྐྱེད་
ལ་འཇུག་གོ །སྔགས་འཆང་རཱ་ག་ཨ་སྱས་བསྒྲིགས་པའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།