༼ཅ༽ །མི་ནག་མགོ་བོ་གསུམ་པའི་མདོས་ཀྱི་གཞུང་ཆེན་ལས། མཆོད་འབུལ་འདོད་ཡོན་ཆར་འབེབས།
༼ཅ༽ །མི་ནག་མགོ་བོ་གསུམ་པའི་མདོས་ཀྱི་གཞུང་ཆེན་ལས། མཆོད་འབུལ་འདོད་ཡོན་ཆར་འབེབས་ཞེས་བྱ་བ་བཞུགས་པའི་དབུ་ཕྱོགས་ལགས་སོ།།
འཕགས་པ་འཇམ་དཔལ་ལ་ཕྱག་འཚལ་ལོ། །མི་ནག་མགོ་གསུམ་འཁོར་དང་བཅས་པ་ལ་མཆོད་པ་སྣ་ཚོགས་འབུལ་བ་ནི། ཧཱུྃ། སྟོབས་ལྡན་མི་ནག་མགོ་བོ་གསུམ་པ་ལ། །མཆོད་པའི་བྱེ་བྲག་སྣ་ཚོགས་འབུལ་བ་ནི། །ཤ་ཁྲག་དམར་གྱི་གཏོར་མ་ཆེན་པོ་དང་། །མཐེབ་སྐྱུ་ཤ་དུམ་ཁྲག་ཐིགས་འབྲུ་སྣ་དང་། །དགྲ་བགེགས་བསྒྲལ་བའི་ཤ་ཁྲག་རུས་པ་དང་། །རྒྱ་ཇ་ངད་ལྡན་བདུད་རྩི་ཆང་ཕུད་དང་། །ཤེལ་ཚིགས་ཁྲི་དཀར་སྟོང་ནག་གསེར་སྐྱེམས་འབུལ། །ཞི་རྒྱས་དབང་དྲག་ཕྲིན་ལས་ཐམས་ཅད་སྒྲུབས། །དར་གདུགས་མདའ་དར་བ་དན་བླ་རེ་དང་། །ཤིང་རིས་
སྣ་ཚོགས་དར་ཟབ་རིན་པོ་ཆེ། །མདའ་འཕང་རྒྱང་བུ་བལ་ཚོན་མདའ་གཞུ་གྲི། །འབྱུང་བའི་ཁ་དོག་ནམ་མཁའ་སྣ་ཚོགས་འབུལ། །བསོད་ནམས་ལོངས་སྤྱོད་མངའ་ཐང་རྒྱས་པར་མཛོད། །བྱ་རིགས་སྣ་ཚོགས་གཅན་གཟན་རི་དྭགས་རིགས། །རྨིག་ཟླུམ་དུད་འགྲོ་ཆུ་གནས་གཟུགས་བརྙན་འབུལ། །ལྟས་ངན་ཐན་ལྟས་ངན་པ་ཐམས་ཅད་སྒྱུར། །ཡོན་བདག་སྐུ་གླུད་ངར་མའི་རྒྱན་ལྡན་དང་། །གླང་ཆེན་ཤུགས་ལྡན་ཡས་གླུད་སྣ་ཚོགས་བཀལ། །ཚངས་བུ་ཏིང་ལོ་རམ་རུག་བཙོད་མཚུར་དང་། །མི་ཁའི་ཡས་རྣམས་སྣ་ཚོགས་མཆོད་པ་འབུལ། །
དགྲ་གྱོད་འཁོན་གསུམ་མི་ཁ་བྲ་མཆུ་ཟློག །སྡང་དགྲ་གནོད་བྱེད་ལོ་ཟླ་ཞག་དུས་སྐག །ལྟས་ངན་མི་ཁ་བྲ་མཆུ་ཟས་སུ་སྦྱིན། །མི་མཐུན་དགྲ་སྣ་གྱོད་སྣ་མི་ཁ་སྒྱུར། །སྤར་སྨེ་ལོ་ཟླ་ཞག་དུས་སྐག་རིགས་དང་། །རྨི་ལྟས་མཚན་ངན་གོད་ཡམས་བཟློག་ཏུ་གསོལ། །ཧཱུྃ། གསོད་བྱེད་མི་དམར་མགོ་བོ་གསུམ་པ་ལ། །ཤ་ཁྲག་གཏོར་མ་མཐེབ་སྐྱུ་མི་ཁའི་ཡས། །དགྲ་བོའི་ཤ་ཁྲག་གློ་སྙིང་གསེར་སྐྱེམས་དང་། །མར་མེ་ཁྲག་ཐིགས་འབྲུ་སྣ་ངར་མི་དང་། །མདའ་འཕང་ནམ་མཁའ་ཡས་སྟགས་སྣ་ཚོགས་འབུལ། །དམ་ཉམས་དགྲ་བོའི་སྙིང་ལ་སྐྱེར་མདའ་རྒྱོབ། །གསོད་གཅོད་ལས་མཁན་ཤན་པ་ཁྱོད་ཀྱིས་གྱིས། །མི་ནག་མགོ་གསུམ་མདོས་སྣ་ཡས་སྣ་ཁྲིད། །ཧཱུཾ། ཤང་ཤང་སེར་པོ་དཔོན་གཡོག་བརྒྱ་རྩ་ལ། །བཤོས་བུ་རྩེ་གསུམ་ཚེར་མང་ཤ་ཁྲག་དང་། །ངར་མི་ཟན་དུམ་ཆངས་བུ་འབྲུ་སྣ་དང་། །གྲོད་པའི་སྒོང་ཐགས་མི་ཁའི་ཡས་རྣམས་བླུགས། །མཐེབ་སྐྱ་ནམ་མཁའ་ནག་པོ་བཅུ་གསུམ་འབུལ། །མི་མཐུན་བར་ཆད་ཐམས་ཅད་བཟློག་ཏུ་གསོལ། །ཧཱུྃ། བདུད་པོ་ནག་པོ་བཀྲག་མེད་འཁོར་བཅས་ལ། །ཤ་ཁྲག་གཏོར་མ་ཟུར་
གསུམ་ཁྲག་གི་མཚོ། །འབྲུ་སྣ་བྱ་ནག་རྟ་ནག་ཁྱི་ནག་གཟུགས། །ཁྲམ་ཤིང་རུ་མཚོན་ནམ་མཁའ་ནག་པོ་འབུལ། །བར་ཆད་བྱེད་པའི་བདུད་དགྲ་རྡུལ་དུ་རློགས། །བདུད་ཀྱི་ཞགས་པ་ནག་པོ་དགྲ་ལ་ཐོབས། །ཧཱུཾ། བཙན་རྗེ་ཤུ་བ་ཡམ་ཤུད་འཁོར་བཅས་ལ། །བཙན་བཤོས་དམར་པོ་ཤ་ཁྲག་རུས་པས་བརྒྱན། །འབྲུ་སྣ་བྱ་དམར་ཁྱི་དམར་རྟ་དམར་གཟུགས། །རིན་ཆེན་རྒྱལ་མཚན་བཙན་ཞགས་ནམ་མཁའ་དམར། །ཆང་ཕུད་གསེར་སྐྱེམས་དགྲ་བོའི་ཤ་ཁྲག་འབུལ། །བཙན་གྱི་ཆད་པ་མི་ལ་བབ་པ་ཟློག །བཙན་གྱི་གློ་བུར་ཡེ་འདྲོག་དགྲ་ལ་ཐོངས། །ཧཱུཾ། མ་མོ་རྔ་ཞོན་དཔོན་གཡོག་འཁོར་བཅས་ལ། །འབྲུ་ནག་བཤོས་བུ་ཟླུམ་པོ་བྱ་ནག་བརྒྱན། །བདུད་རྩི་སྨན་གཏོར་རཀྟ་མར་མེ་སྤོས། །མདའ་བཀྲ་འཕང་བཀྲ་མདའ་མདུང་རལ་གྲི་དང་། །བམ་རོ་དུར་ཁྲོད་ཆས་དང་ཡུངས་ཀར་ཐུན། །ནམ་མཁའ་དར་ཚོན་གཟུགས་འགྲོས་སྣ་ཚོགས་འབུལ། །ནད་ཁ་རིམས་སྣ་ཡམས་ནད་སྣ་ཚོགས་ཟློག །མ་མོའི་དལ་ཡམས་ཟོར་ཐུན་དགྲ་ལ་བྷྱོ༔ །ཧཱུྃ། མི་ཁ་བ་རུ་བུ་མོ་སྤུན་དགུ་མ། །ངར་མི་མདའ་བཀྲ་འཕང་བཀྲ་
ནམ་མཁའ་དང་། །གོད་རྒྱུ་གོད་རུས་རམ་རུག་བཅོད་མཚུར་དང་། །རྫ་དྲེག་སྟོང་དྲེག་སྐྱེད་དྲེག་སྦྱང་མ་ཕབས། །ཤ་དང་ཚྭ་སྐག་སྐྱ་ག་བྱ་ནག་སྤུ། །མི་ཁའི་ཡས་སྟགས་སྣ་ཚོགས་ཁྱོད་ལ་འབུལ། །བརྒྱ་ཡི་མི་ཁ་སྟོང་གི་བྲ་མཆུ་ཟློག །གྱོད་སྣ་འཁོན་སྣའི་མི་ཁ་དགྲ་ལ་སྒྱུར། །ཧཱུྃ། ས་བདག་ཁྲོ་བོ་ཕ་བརྒྱད་བུ་བརྒྱད་ལ། །གཏོར་མ་ཆང་ཕུད་གསེར་སྐྱེམས་འབྲུ་སྣ་དང་། །ཤེལ་ཚིགས་མཐེབ་སྐྱུ་ནམ་མཁའ་ཤིང་རིས་དང་། །དར་ཚོན་གཟུགས་འགྲོས་སྣ་ཚོགས་མཆོད་པ་འབུལ། །སྡང་དགྲ་གནོད་བྱེད་བར་ཆད་ཐམས་ཅད་ཟློག །ཧཱུྃ། སྤར་ཁ་བརྒྱད་པོ་འཁོར་དང་བཅས་པ་ལ། །བཤོས་བུ་པད་ཕོར་མགོ་ཅན་ཤེལ་ཚིགས་དང་། །འབྲུ་སྣ་དར་ཟབ་སྤར་ཁའི་ཤིང་རིས་བརྒྱད། །གཟུགས་འགྲོས་སྣ་ཚོགས་མཆོད་པ་རྒྱ་ཆེན་འབུལ། །འགྲམ་འཁྲུགས་བདུད་གཅོད་སྤར་ཁའི་སྐག་རྣམས་ཟློག །ཧཱུྃ། སྨེ་བའི་ལྷ་ཚོགས་བཞི་བཅུ་ཞེ་ལྔ་ལ། །གཏོར་མ་དགུ་ལིང་གསེར་སྐྱེམས་འབྲུ་སྣ་དང་། །ནམ་མཁའ་དར་ཟབ་ཤིང་རིས་མཐེབ་སྐྱུདང་། །བྱ་དང་རི་དྭགས་གཅན་གཟན་དུད་འགྲོའི་གཟུགས། །མདོས་དང་གཏོར་མ་སྣ་ཚོགས་མཆོད་པ་
འབུལ། །སྨེ་བ་དབུས་ཚུད་གཅོད་འདྲལ་སྐག་རིགས་ཟློག །ཧཱུྃ། ལོ་སྐོར་ཆེན་པོ་བཅུ་གཉིས་འཁོར་བཅས་ལ། །བཤོས་བུ་འབྲང་རྒྱས་ཞལ་དཀར་བཅུ་གཉིས་དང་། །ཤ་ཁྲག་གཏོར་མ་མཐེབ་སྐྱུཆང་ཕུད་དང་། །དར་ཚོན་བལ་ཚོན་ཤིང་རིས་སྣ་ཚོགས་འབུལ། །བདུན་ཟུར་དགྲ་གཤེད་ལོ་སྐག་ཐམས་ཅད་ཟློག །ཧཱུྃ། ལོ་རྒན་དྲུག་ཅུའི་ལྷ་ཚོགས་ཐམས་ཅད་ལ། །གཏོར་མ་བཤོས་བུ་ཟླུམ་པོ་གསེར་སྐྱེམས་དང་། །འབྲུ་སྣ་ཤེལ་ཚིགས་གཟུགས་འགྲོས་སྣ་ཚོགས་དང་། །མཐེབ་སྐྱུ་ཤིང་རིས་དར་ཚོན་སྣ་ཚོགས་འབུལ། །སྐོར་ཆེན་དྲུག་ཅུའི་ལོ་སྐག་བསྒྱུར་དུ་གསོལ། །ཧཱུྃ། གཙང་རིགས་དཔལ་མགོན་བདུན་ཅུ་རྩ་བརྒྱད་ལ། །བདུད་རྩི་གསེར་སྐྱེམས་དཀར་གསུམ་མངར་གསུམ་དང་། །གཏོར་མ་མཐེབ་སྐྱུ་འབྲུ་སྣ་ཤེལ་ཚིགས་དང་། །གཟུགས་འགྲོས་སྣ་ཚོགས་ཤིང་རིས་མདོས་མཆོད་འབུལ། །སྟེང་འོག་ཕྱོགས་མཚམས་གདོན་བགེགས་ཚོགས་རྣམས་དང་། །མི་མཐུན་བར་ཆད་ཐམས་ཅད་བསྒྱུར་དུ་གསོལ། །ཧཱུྃ། ལོ་ཟླ་ཞག་དུས་ས་བདག་རྒྱལ་བློན་ལ། །དཀར་གསུམ་མངར་གསུམ་གཏོར་མ་ཤེལ་ཚིགས་དང་། །
འབྲུ་སྣ་དར་ཚོན་མཐེབ་སྐྱུ་གཟུགས་འགྲོས་འབུལ། །དུས་ཚོད་སྐག་རིགས་ཐམས་ཅད་བསྒྱུར་བ་དང་། །ཀོ་ལོང་འཁོན་འགྲས་ཐམས་ཅད་ཞི་བར་མཛོད། །ཧཱུྃ། སྒྱུར་བྱེད་རུ་འདྲེན་ཆེན་པོ་སྡེ་བཞི་ལ། །དགྲ་བོ་བསྒྲལ་བའི་ཤ་ཁྲག་རུས་པ་དང་། །ཤ་ཁྲག་དམར་གྱི་གཏོར་མ་ཆེན་པོ་དང་། །མདོས་ཆས་གཟུགས་འགྲོས་སྣ་ཚོགས་མཆོད་པ་འབུལ། །མདོས་སྣ་ཟོར་ཁ་དམ་ཉམས་དགྲ་ལ་དྲོངས། །ཧཱུྃ། གཏོ་མཁན་ཆེན་པོ་རིགས་བཞི་ཁྱེད་རྣམས་ལ། །རིན་ཆེན་སྣ་ཚོགས་དར་དང་ཟ་འོག་དང་། །བདུད་རྩི་ཇ་ཆང་དཀོར་ནོར་སྣ་ཚོགས་དང་། །འདོད་པའི་ལོངས་སྤྱོད་ས་གཞི་བཀང་སྟེ་འབུལ། །སྔགས་འཆང་ཡོན་བདག་འཁོར་དང་བཅས་པ་ལ། །གཏོ་བཅོས་འདི་ཉིད་ཡག་པའི་ཕྲིན་ལས་མཛོད། །ཧཱུྃ། སྒོ་སྲུང་ཆེན་པོ་གཉེན་ཆེན་སྡེ་བཞི་ལ། །ཤེལ་ཚིགས་དཀར་གསུམ་མངར་གསུམ་གཏོར་མ་དང་། །འབྲུ་སྣ་དར་ཚོན་གཟུགས་འགྲོས་སྣ་ཚོགས་འབུལ། །སྒོ་བཞི་སྲུངས་ལ་དཔལ་བསྐྱེད་བར་ཆད་ཟློག །ཧཱུྃ། ས་ཆ་ཡུལ་ཕྱོགས་འདི་ལ་གནས་པ་ཡི། །ལྷ་ཀླུ་གཞི་བདག་གཉན་དང་ཡུལ་ལྷ་ལ། །དཀར་གཏོར་གསེར་སྐྱེམས་འདོད་ཡོན་
སྣ་ཚོགས་དང་། །གཟུགས་འགྲོས་འབྲུ་སྣ་ཤེལ་ཚིགས་ཤིང་རིས་འབུལ། །འཁོན་འགྲས་ཕོག་ཐུག་གང་སོང་ཞི་བ་དང་། །ཁ་འཛིན་སྡོང་གྲོགས་དུས་རྣམས་ཀུན་ལ་མཛོད། །ཧཱུྃ། བགེགས་རིགས་ལན་ཆགས་མགྲོན་རྣམས་ཐམས་ཅད་ལ། །སྐུ་གླུད་ངར་མི་ཆངས་བུ་ཏིང་ལོ་དང་། །འབྲུ་སྣ་མར་མེ་ཤ་ཤུན་གོད་རུས་དང་། །ཤ་ཁྲག་བཟའ་བཏུང་བཙོག་གླུད་སྣ་ཚོགས་འབུལ། །བདག་དང་རྒྱུ་སྦྱོར་ཡོན་བདག་ཐམས་ཅད་ཀྱི། །ལན་ཆགས་བྱང་ཞིང་བུ་ལོན་དག་གྱུར་ནས། །གནོད་ཅིང་འཚེ་བའི་བསམ་པ་མ་ཆུང་ལ། །སོ་སོ་རང་རང་གནས་སུ་ད་སོང་ལ། །ཕྱིན་ཆད་གནོད་ཅིང་འཚེ་བར་མ་བྱེད་ཅིག །ནད་རིམས་གོད་འདྲེ་རྐྱེན་ཁ་བཟློག་ཏུ་གསོལ། །ཐན་དང་ལྟས་ངན་ཐམས་ཅད་བསྒྱུར་དུ་གསོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཨོ་ནག་པོ་ཕེ་ཤ་ཀེ་རུ་ཧཱུཾ། མ་ཧཱ་ལོ་ཀ་པཱ་ལ་སརྦ་བྷུ་མི་པཱ་ཏི་ས་པཱ་རི་ཝཱ་ར་ཨརྒྷཾ༴ པཱདྱ༴ པུཥྤེ༴ དྡྷུ་པེ༴ ཨ་ལོ་ཀེ༴ གྷནྡྷེ༴ ནཻ་ཝི་ཏེ༴ ཤབྟ་པྲ་ཏཱིཙྪ་ཡེ་ཨཱཿཧཱུྃ། མ་ཧཱ་བ་ལིཾ་ཏ༴ རཀྟ༴ མཱཾ་ས༴ སརྦ་པཱ་ཙ་ལ་ཁ་ཁ་ཁཱ་ཧི་ཁཱ་ཧི། ཞེས་པ་མི་ནག་འཁོར་དང་བཅས་པ་ལ།
གང་ལ་གང་འདོད་ཅི་ལ་ཅི་དགྱེས་པའི་ལོངས་སྤྱོད་ཐམས་ཅད་ཆར་ལྟར་བབ་ནས། ཞལ་ཟས་བཟའ་བཏུང་སྣ་ཚོགས་གསོལ་ཞིང་འདོད་པའི་ཡོན་ཏན་ལྔ་ལ་ལོངས་སྤྱོད་པས། བསམ་མོ། །མཆོད་འབུལ་འདི་ཤིན་ཏུ་གལ་ཆེའོ། །དེ་ནས་ངར་མདོས་ལ་འཇུག་པའོ། ༧ ཨ་རཱ་གས་འདོན་འགྲིགས་སུ་བྲི་ས་སོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།