གནམ་ཆོས་ལས་ཧུར་དྲག་མོ་ལས་སྐག་ཟློག་རྣམ་དགུའི་ཕྱག་ལེན་གཏན་ལ་ཕབ་པ།
གནམ་ཆོས་ལས་ཧུར་དྲག་མོ་ལས༔ སྐག་ཟློག་རྣམ་དགུའི་ཕྱག་ལེན་གཏན་ལ་ཕབ་པ་བཞུགས་སོ།
གུ་རུ་དྷེ་ཝ་ཌཱཀྐི་ནི་ཧཱུྃ༔ གནམ་ཆོས་ལས་ཧུར་དྲག་མོའི་སྐོར༔ ལྷ་མོའི་སྐག་ཟློག་རྣམ་དགུ་ཡི༔ ལག་ལེན་རིམ་པ་འདི་ལྟ་སྟེ༔ རང་དོན་སྤྲོས་མེད་བྱེད་པ་ན༔ དམར་གཏོར་གཅིག་གིས་ཆོག་པ་ཡིན༔ གཞན་དོན་སྤྲོས་བཅས་སྔགས་ནག་ལུགས༔ འཇིམ་པའི་སྐག་ཟློག་སོ་སོའི་གཟུགས༔ བུད་མེད་གཟུགས་ལ་རང་མདོག་བྱ༔ ཁ་དོག་བསྟོད་པའི་ནང་དུ་གསལ༔ དེ་མདུན་དམར་གཏོར་གཅིག་བཞག་སྟེ༔ གཡས་སུ་མདའ་བཀྲ་གཡོན་འཕང་བཀྲ་རྒྱབ་ཏུ་ནམ་མཁའ་ཤིང་རིས་བཙུགས༔ མཐེབ་སྐྱུ་ཆངས་བུ་གཙང་མ་དང་༔ ཤ་དུམ་འབྲུ་སྣ་རྣམས་ཀྱིས་གསོ༔ ཇ་ཆང་ཆུ་གཙང་གང་འཛོམ་བྲན༔ དབང་ལུང་ལ་སོགས་ཐོབ་ན་ནི༔ བདག་བསྐྱེད་ལས་ཧུར་དྲག་མོ་བསྒོམ༔ དེ་ཡི་དབང་ལུང་མ་ཐོབ་
ན༔ གུ་རུ་ཞི་དྲག་གང་རུང་ཞིག༔ བསྒོམས་ན་དེ་ཡིས་འཐུས་པ་སྟེ༔ ལས་ཧུར་དྲག་མོ་ཞེས་བྱ་བ༔ དོན་ལ་མནྡ་ར་བ་ཡིན༔ དེ་ནས་འདོན་བསྒོམ་སྦྲགས་པས་འཐུས༔ ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། སྟོང་པའི་ངང་ལས་ཧཱུྃ་ཡིག་ལས༔ གཏོར་སྣོད་རིན་ཆེན་ལས་གྲུབ་པ༔ ཡངས་ཤིང་རྒྱ་ཆེ་དེ་ཡི་ནང་༔ ཁཾ་ཡིག་ལས་བྱུང་གཏོར་མ་ནི༔ ཟག་མེད་ཡེ་ཤེས་བདུད་རྩི་མཚོ༔ ཁ་དོག་དྲི་རོ་ཕུན་སུམ་ཚོགས༔ འདོད་ཡོན་ལྔ་ལྡན་མཆོད་པའི་སྤྲིན༔ ནམ་མཁའ་བར་སྣང་ཁྱབ་པར་གྱུར༔ ཨོཾ་ཨཱཿཧཱུྃ་ཧ་ཧོ་ཧིསྭཱ་ཧཱཿ ལན་གསུམ། རང་མདུན་མཆོད་གཏོར་དེ་ཡི་སྟེང་༔ མཁའ་ལ་ཆུ་བུར་རྡོལ་བ་
ལྟར༔ སྒོའི་སྐག་ཟློག་ལྷ་མོ་ནི༔ རྒྱན་དང་ཆ་ལུགས་ཡོངས་རྫོགས་པ༔ སྐད་ཅིག་དྲན་རྫོགས་གསལ་བ་ལ༔ འོད་འཕྲོས་རང་འདྲ་སྤྱན་དྲངས་ཐིམ༔ བྷྱོ༔ མུ་ལེ་མཚོ་དང་ཡོངས་འདུའི་ཤིང་༔ དུར་ཁྲོད་བརྒྱད་སོགས་བཞུགས་གནས་ནས༔ རྒེའི་སྐག་ཟློག་སྤྱན་འདྲེན་ནོ༔ སྡང་དགྲའི་སྟེང་དུ་དགྱེས་པར་བཞུགས༔ ༀ་ཤྲཱི་དེ་ཝི་ཧཱུྃ་ཛཿ ཛཿཧཱུྃ་བཾ་ཧོ༔ དངོས་འབྱོར་ཡིད་ཀྱིས་སྤྲུལ་པ་ཡི༔ མེ་ཏོག་བདུག་སྤོས་མར་མེ་དྲི༔ བཤོས་བུ་གཟུགས་སྒྲ་དྲི་རོ་དང་༔ རེག་བྱ་སྨན་གཏོར་རཀྟའི་ཚོགས་སྒོའི་སྐག་ཟློག་བྱེད་པ་ཡི༔ ལྷ་མོ་འཁོར་དང་བཅས་ལ་འབུལ༔ འཁོར་བཅས་མཉེས་ཤིང་ཚིམ་གྱུར་ཅིག༔ ཨོཾ་ཤྲཱི་དེ་ཝི་ཨ་མྲྀ་ཏ་བ་ལིཾ་ཏ་རཀྟ་ཁཱ་ཧི་ཁཱ་ཧི༔ ཨརྒྷཾ་སོགས། ཧཱུྃ། ཆོས་སྐུ་སྐྱེ་མེད་ངང་ཉིད་ལས༔ འགྲོ་བའི་དོན་དུ་སྐུ་སྤྲུལ་ནས༔ འཇིག་རྟེན་འདས་ཀྱང་འཁོར་བའི་ཚུལ༔ མ་དང་སྲིང་ལྟར་བསྒྲུབ་ལ་བརྩོན་རྒེའི་སྐག་རྣམས་ཟློག་བྱེད་པའི༔ ལྷ་མོ་འཁོར་དང་བཅས་ལ་བསྟོད༔ དམ་རྫས་མཆོད་གཏོར་ཐུགས་དམ་བསྐང་༔ ཐུགས་དང་འགལ་བ་མཐོལ་ཞིང་བཤགས༔ བདག་ཅག་སློབ་དཔོན་འཁོར་བཅས་ཀྱི༔ ཡམས་ནད་མི་ནད་
ཞི་བ་དང་༔ འབྲུ་དང་རྐང་འགྲོ་འཕེལ་རྒྱས་མཛོད༔ འདོད་དགུ་ཐམས་ཅད་དབང་དུ་སྡུས༔ གནོད་ཅིང་འཚེ་བའི་དགྲ་བགེགས་སྒྲོལ༔ མ་གཡེལ་མྱུར་དུ་ལས་མཛོད་ཅིག་བཅོལ་བའི་ཕྲིན་ལས་འགྲུབ་པར་མཛོད༔ དེ་ཡན་སྐག་ཟློག་གང་བྱེད་ཀྱང༔ རྨེ་ཞེས་པར་མིང་བསྒྱུར་བྱ༔ དེ་མན་ཁྱད་པར་མེད་པ་ཡིན༔ དེ་ནས་སྐག་ཟློག་གང་ཡིན་གྱི༔ གཞུང་ཉིད་འདོན་པར་བྱ་བའི་རྗེས༔ སོ་སོའི་བཟློག་པ་གང་ཡིན་དེ༔ ཅི་འགྲུབ་བསྙེན་པོ་བྱེད་པ་སྟེ༔ གཏོར་ཆོག་ལྟ་བུ་ཡིན་ན་ནི༔ ཕྱོགས་ཀྱི་གཙང་སའམ་ཡས་ལམ་དུ༔ གཏོ་དེ་ཕུལ་རྒྱུ་བསྐུར་བ་ཡིན༔ གཏོར་མའང་དེ་དང་འདྲ་བ་སྟེ༔ སོག་གས་ན་ཕུལ་ཡང་རུང་༔ རང་གི་གལ་ཆེན་ཐམས་ཅད་ལ༔ གཏོར་མ་ཞག་མང་བཞག་ནས་ཀྱང་༔ ཉིན་རེ་ཚར་རེ་འདོན་པ་དང་༔ རྒྱུན་བསྙེན་ཞག་མང་བྱས་ནས་འབུལ༔ སྐག་ཟློག་འབུལ་ཁ་འདོན་ན་ཡང་༔ གཏོར་མ་སོ་སོར་བསྒྲིགས་ནས་བཤམས༔ རིམ་བཞིན་སོ་སོར་འདོན་ཞིང་བསྙེན༔ རིམ་བཞིན་སོ་སོར་འབུལ་བར་བྱ༔ གཏོར་ཟློག་ཚུལ་དུ་ཕྱོགས་གཅིག་བཅའ༔ གཏོར་ཟློག་བཞིན་དུ་བཅའ་འདོན་ནི༔ བྱས་ན་ལེགས་པར་འགྱུར་སྙམ་བྱེད༔ ལན་གསུམ་མཎྜལ་བརྒྱ་རྩ་སོགས༔ ཕུལ་ནས་གསོལ་བ་བཏབ་བྱས་ཀྱང་༔ དེ་འདྲ་མི་ཕོད་ཟེར་བ་བྱུང་༔ དེ་ཕྱིར་ཕྱོགས་གཅིག་མདོས་ཀྱི་ཚུལ༔ བཅའ་བར་བྱ་བ་མ་ཡིན་ནོ༔ སྤར་ཁའི་གཏོ་ཡི་གོ་ཆོད་ཀྱང་༔ བཙོག་གླུད་བླུགས་པར་མི་
བྱ་སྟེ༔ ཚངས་བུ་བཞག་ཀྱང་གཙང་མ་དགོས༔ སྐག་ཟློག་དགུ་པོ་འདི་དག་ཀྱང་༔ དཔལ་ལྡན་ལྷ་མོའི་སྤྲུལ་པ་སྟེ༔ མི་མངོན་ནམ་མཁའི་དབྱིངས་རུམ་ན༔ དཔལ་ལྡན་ལྷ་མོ་རེ་མ་ཏི༔ སྐུ་ལུས་གཅིག་ལ་སྤྲུལ་པ་སྟོང་༔ སྤྲུལ་པ་རེ་ལ་ཕྱག་བརྙན་འབུམ༔ སྐུ་ཡང་མི་གཅིག་སོ་སོར་བསྒོམ༔ མཚན་ཡང་མི་གཅིག་སོ་སོར་འབོད༔ སྔགས་ཀྱང་མི་གཅིག་སོ་སོར་བཟླ༔ ཇི་ལྟར་བྱས་ཀྱང་ངོ་བོ་གཅིག༔ ཅི་ལྟར་བྱས་ཀྱང་ཕྲིན་ལས་འགྲུབ༔ དེ་སྐད་ལྷ་མོའི་རྒྱུད་ལས་གསུངས༔ དེ་ཕྱིར་སྐག་ཟློག་དགུ་པོ་ཡང་༔ ལྷ་མོའི་སྐུ་ཡི་འགྱུར་བ་སྟེ༔ ཡིན་པར་ཤེས་ཤིང་དད་གུས་བསྐྱེད༔ སྐག་ཟློག་དགུ་པོ་གང་བྱེད་ཀྱང་༔ དམར་གཏོར་གཅིག་ནི་མདུན་བཤམ་བྲན༔ ལས་བྱང་སྔོན་ལྟར་བྱས་ནས་ཀྱང་༔ སོ་སོའི་གཞུང་ནི་གང་ཡིན་འདོན༔ ཨོྃ༔ ལས་ཧུར་དྲག་མོ་ལ་ཕྱག་འཚལ་ལོ༔ དགྲ་ཡི་སྐག་ཟློག་མ་ཡི་སྒྲུབ་ཐབས་ནི༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་འོ༔ བྷྱོ༔ ལྷ་མོ་དགྲ་ཡི་སྐག་ཟློག་མ༔ དབུ་ནི་དམར་ལ་ལུས་གཡས་ལྗང་༔ ཞབས་གཉིས་སྔོ་ལ་ལུས་གཡོན་དཀར༔ ཕྱག་གཉིས་དགྲ་སྟ་ཐོ་བ་འཛིན༔ ལུས་ལ་རས་ཁྲའི་འདུང་མ་གྱོན༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདུང་མ་མོ་བཙུན་གོས་ལྟ་བུ༔ སྐུ་ནི་ཞི་བའི་ཆ་ལུགས་ཅན༔ འདིར་གཤེགས་བརྒྱན་པའི་གཏོར་མ་བཞེས༔
གསོལ་ལོ་མཆོད་དོ་ཐུགས་དམ་བསྐང་༔ ཁྱོད་ཀྱི་ཐུགས་དམ་བསྐངས་གྱུར་ནས༔ བདག་དང་བསྲུང་བྱ་མི་ནོར་ལ༔ དགྲ་ཡི་སྐག་རྣམས་ཐམས་ཅད་ཟློག །སྔ་དགྲ་ལག་བརྡར་དགྲ་སྲི་ཟློག༔ ཕྱི་དགྲ་ཡིད་ལ་བསམ་པ་ཟློག༔ ད་དགྲ་ཐད་དུ་ལང་བ་ཟློག༔ ངོ་ལ་གདོང་ཐུག་བྱེད་པ་ཟློག༔ ལྐོག་ནས་འབུ་བཞིན་འབུགས་པ་ཟློག །མ་ཉེས་ཁ་ཡོག་བཏང་བ་ཟློག༔ བརྒྱ་ཡི་མི་ཁ་ཟུག་པ་ཟློག༔ སྟོང་གི་བྲ་མཆུ་གཏོང་བ་ཟློག༔ དགྲ་སྣ་མེ་ལྟར་འབར་བ་ཟློག༔ དགྲ་སྣ་ཆུ་ལྟར་འབྲུབ་པ་ཟློག༔ དགྲ་སྣ་རླུང་ལྟར་འཚུབ་པ་ཟློག༔ དགྲ་སྣ་བལ་ལྟར་གཡེངས་བ་ཟློག༔ གཡས་ནས་ཕོ་བརྒྱས་མདའ་བརྡར་ཟློག༔ གཡོན་ནས་མོ་བརྒྱས་དུག་གཡོས་ཟློག༔ མདུན་ནས་རྩང་བཞིན་འཛུགས་པ་ཟློག༔ རྒྱབ་ན་ཁྱི་བཞིན་ཟུག་པ་ཟློག༔ ཇག་པས་རྟ་ཁ་བསིགས་བ་ཟློག༔ རྐུན་བུས་ཤ་ཆིངས་ཁུར་བ་ཟློག༔ དགྲ་ཆེན་བདུད་དུ་ལངས་བ་ཟློག༔ དམག་སྣ་ཇག་སྣ་སྟོན་པ་ཟློག༔ དགྲ་སྣ་རྐུན་སྣ་སྟོན་པ་ཟློག༔ སྲོག་ལ་དགྲ་དར་གསོད་གཅོད་ཟློག༔ ལུས་ལ་དགྲ་དར་བརྡེག་བཙོག་ཟློག༔ དབང་ཐང་དགྲ་དར་འཕྲོག་བཅོམ་
ཟློག༔ རླུང་རྟ་དགྲ་དར་མི་ཁ་ཟློག༔ རྨ་ངོ་ཁྲག་ངོ་ཐམས་ཅད་ཟློག༔ ལྕགས་དང་ཞགས་པས་བཅིངས་བ་ཟློག༔ བཙན་གྱིས་ཐོག་བབ་བྱེད་པ་ཟློག༔ ཕྱི་ཡི་ཕྱི་དགྲ་ལངས་བ་ཟློག༔ ནང་ནས་ནང་འཁྲུག་ལངས་བ་ཟློག༔ ཟུར་ནས་གཅོད་དགོས་ཟེར་བ་ཟློག༔ གསོད་ཤོམ་བརྡུང་ཤོམ་བྱེད་པ་ཟློག༔ རྐུན་ཤོམ་འཕྲོག་ཤོམ་བྱེད་པ་ཟློག༔ ཕྱོགས་བཞིའི་དགྲ་བོ་ལངས་བ་ཟློག༔ མཚམས་བཞིའི་དགྲ་བོ་ལངས་བ་ཟློག༔ ལོ་ནི་སྐོར་ཆེན་དྲུག་ཅུ་ཡི༔ སྟེང་ནས་དགྲ་སྐག་ལངས་བ་ཟློག༔ ལོ་ཡི་རྒྱལ་པོ་བཅུ་གཉིས་ཀྱི༔ སྟེང་ནས་དགྲ་སྐག་ལངས་བ་ཟློག༔ བློན་པོ་ཟླ་བ་བཅུ་གཉིས་ཀྱི༔ སྟེང་ནས་དགྲ་སྐག་ལངས་པ་ཟློག༔ དམག་མི་ཞག་གྲངས་སུམ་བརྒྱ་དང་༔ དྲུག་ཅུའི་དགྲ་སྐག་ལངས་བ་ཟློག༔ དུས་ཚོད་སྟོང་དང་བདུན་བརྒྱ་ཡི༔ ཐོག་ནས་དགྲ་སྐག་ལངས་བ་ཟློག༔ གཟའ་བདུན་རྒྱུ་སྐར་ཉེར་བརྒྱད་ཀྱི༔ སྟེང་ནས་དགྲ་སྐག་ལངས་བ་ཟློག༔ དེ་མཚམས་ཀླུ་ཆེན་བརྒྱད་པོ་ཡི༔ དུས་སུ་དགྲ་སྐག་ལངས་བ་ཟློག༔ ལོ་ཟླའི་རྗེ་བློན་བཅུ་བདུན་གྱི༔ ཐད་ནས་དགྲ་སྐག་ལངས་བ་ཟློག༔ གཟུགས་ཅན་མི་ཡི་དགྲ་ལངས་ཟློག༔
གཟུགས་མེད་ལྷ་འདྲེའི་དགྲ་ལངས་ཟློག༔ བྷྱོ་བྷྱོ་ཟློག་ཟློག༔ ཐུགས་ཀར་ཟླ་སྟེང་ཁཾ་ཡིག་མཐར༔ སྔགས་འཕྲེང་གཡོན་དུ་འཁོར་བ་ལས༔ འོད་ཟེར་སྣ་ཚོགས་ཕྱོགས་བཅུར་འཕྲོས༔ དགྲ་སྐག་དགྲ་ངོ་ཐམས་ཅད་ནི༔ བ་མོར་ཉི་ཟེར་ཕོག་ལྟར་དག༔ དགྲ་ཡི་འཇིགས་པ་བྲལ་བར་བསྒོམ༔ མ་བྷྱོ་དགྲ་ཟློག༔ སྔགས་དེ་ཅི་ནུས་བསྙེན་པ་བྱ༔ དང་པོ་སྤྱན་འདྲེན་དུས་སུ་ཡང་༔ ཐུགས་ཀའི་ཁཾ་ལས་འོད་འཕྲོས་པས༔ སྤྱན་དྲངས་བསྐྱེད་པ་དེ་ལ་བསྟིམས༔ དུས་གཅིག་ཚར་གྲངས་མང་པོ་དང་༔ སྔགས་ནི་མང་དུ་བཟླས་ལ་འབུལ༔ ཡང་ན་རྒྱུན་བསྙེན་ཡུན་རིང་བྱ༔ འབུལ་ལུགས་ལ་སོགས་དགུ་ཁ་མཐུན༔ ལྷ་མོའི་དགྲ་ཟློག་ཟབ་ཅིང་མྱུར༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཞལ་གདམས་ནི་སྐུ་ཞི་བའི་ཆ་ལུགས་སོ༔ འདུང་མ་ནི་ནང་གྱོན་འདྲ་བའོ༔ སྔགས་གྲངས་སྒྲུབ་གྲངས་མེད༔ བདག་བསྐྱེད་ལས་ཧུར་དྲག་མོ་བསྐྱེད་ན་ལེགས༔ ཡི་དམ་གཞན་ཡང་རུང་ངོ་༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་རྟ་ཆེན་ཟླ་བའི་ཡར་ངོའི་ཚེས་བཅུ་ནུབ་དགྲའི་སྐག་ཟློག་མ་ཉིད་ཀྱིས་དངོས་སུ་གསུངས་སོ༔ ཞེས་པ་འདོན་ཆ་རཱ་ག་ཨ་སྱས་སྦྱར་བའོ༔ ཨོཾ༔ ངམཐ༔ ལས་ཧུར་དྲག་མོར་ཕྱག་འཚལ་ལོ༔ མེ་ཡི་སྐག་ཟློག་བསྒྲུབ་པ་ནི༔ དཀྱིལ་འཁོར་མེད་ཅིང་གཏོར་མ་མེད༔ སྤྲོན་དམར་གཏོར་གཅིག་བཅའ་འོ༔ བྷྱོ༔
ལྷ་མོ་མེ་ཡི་སྐག་ཟློག་དམར༔ ཞལ་གཅིག་ཕྱག་གཉིས་གཟར་བུ་མེ༔ སྐུ་ལ་རས་དཀར་འདུང་མ་གསོལ༔ ལྷ་མོའི་ཆས་རྣམས་ཡོངས་སུ་རྫོགས༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ བདག་དང་ཡོན་བདག་བསྲུང་བྱ་ལ༔ ཕྱི་དང་ནང་དང་གསང་བ་ཡི༔ མེ་ཡི་སྐག་རྣམས་ཐམས་ཅད་ཟློག༔ སྲོག་ལུས་དབང་ཐང་རླུང་རྟ་ལ༔ མེ་དགྲ་དར་བའི་སྐག་རྣམས་ཟློག༔ སྐོར་ཆེན་དྲུག་ཅུ་ཐམ་པ་ཡི༔ མེ་དགྲ་དར་བའི་མེ་སྐག་ཟློག༔ སྤར་ཁ་ལི་དང་རྟ་སྦྲུལ་གྱི༔ སྟེང་དུ་རྩུབ་པའི་མེ་སྐག་ཟློག༔ སྨེ་བ་དགུ་དམར་བདུན་དམར་གྱི༔ སྟེང་དུ་རྩུབ་པའི་མེ་སྐག་ཟློག༔ བློན་པོ་ཟླ་བ་བཅུ་གཉིས་དང་༔ ཞག་མ་སུམ་བརྒྱ་དྲུག་ཅུ་ཡི༔ སྟེང་དུ་རྩུབ་པའི་མེ་སྐག་ཟློག༔ ཉི་མ་དང་ནི་དམག་དཔོན་དང་༔ མེ་སྐར་དྲུག་གི་མེ་སྐག་ཟློག༔ རྟ་སྦྲུལ་ལི་དང་རང་ལོའི་སྐག༔ ཕྱིན་པ་མེ་ཡི་རང་སྐག་ཟློག༔ བྱ་སྤྲེལ་ལི་ལ་ཕྱིན་པ་ཡི༔ མེ་དགྲ་དར་བའི་མེ་སྐག་ཟློག༔ ལྷོ་ཕྱོགས་མེ་ཡི་དགྲ་དར་ཟློག༔ ཡུལ་
ཁམས་མེ་ཡིས་ཚིག་པ་ཟློག༔ སྦ་ཁྱིམ་མེ་ཡིས་ཚིག་པ་ཟློག༔ མཁར་ཁང་མེ་ཡིས་ཚིག་པ་ཟློག༔ ས་ཚིག་ཐན་ཆེན་འབར་བ་ཟློག༔ ལུས་ལ་མེ་སྐག་ལངས་བ་ཟློག༔ མགོ་ཚད་སྙིང་ཚད་གློ་ཚད་ཟློག༔ མཁལ་ཚད་ཕོ་ཚད་རྒྱུ་ཚད་ཟློག༔ གསང་བ་སེམས་ཀྱི་མེ་སྐག་ཟློག༔ ཞེ་སྡང་མེ་ལྟར་འབར་བ་ཟློག༔ སྐག་ཟློག་ལྷ་མོའི་དུས་ལ་བ༔ བཅོལ་བའི་ཕྲིན་ལས་འགྲུབ་པར་མཛོད༔ ལྷ་མོའི་ཐུགས་ཀར་རཾ་ལ་ནི༔ སྔགས་ཕྲེང་གཡོན་དུ་འཁོར་བ་ལས༔ འོད་ཟེར་དཔག་ཏུ་མེད་པ་འཕྲོས་མེ་ཡི་སྐག་ཟློག་སྤྱན་དྲངས་ནས༔ མདུན་དུ་བསྐྱེད་པ་དེ་ལ་ཐིམ༔ སླར་ཡང་འོད་ཟེར་སྣ་ཚོགས་འཕྲོས༔ མེ་ཡི་སྐག་དང་གནོད་པ་ཀུན༔ བ་མོར་ཉི་ཟེར་ཕོག་ལྟར་བསྒོམ༔ རཾ་ཁ་ལ་མེ་ཟློག༔ ཚར་གྲངས་སྔགས་གྲངས་ཅི་མང་བྱ༔ དེ་ཡིས་མེ་ཡི་སྐག་བོག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ རམཐ༔ ཅེས་པ་སྤྲུལ་སྐུ་དགུང་ལོ་བཅུ་གསུམ་པ་རྟ་ཆེན་ཟླ་བའི་ཉེར་བརྒྱད་ལ་ལྷ་མོ་མེ་ཡི་སྐག་ཟློག་མ་ཉིད་ཀྱིས་ཕུལ་ལོ༔ དེ་ལ་འདོན་ཆ་རཱ་ག་ཨ་སྱེས་སྦྱར་བའོ༔ ཨོྃ༔ ལས་ཧུར་དྲག་མོར་ཕྱག་འཚལ་ལོ༔ ས་ཡི་སྐག་བཟློག་མ་སྒྲུབ་ཐབས༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་
འོ༔ བྷྱོ༔ ལྷ་མོ་ས་ཡི་སྐག་ཟློག་སེར༔ ཞལ་གཅིག་ཕྱག་གཉིས་ཐོ་བ་བསྐྱེད༔ ལྷ་མོའི་ཆས་ཀུན་ཡོངས་སུ་རྫོགས༔ ཞབས་གཉིས་བཞེངས་པའི་སྟབས་ཀྱིས་བཞུགས༔ དར་སེར་འདུང་མ་སྐུ་ལ་གསོལ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ བདག་དང་བསྲུང་བྱ་ཐམས་ཅད་ཀྱི༔ སྲོག་ལུས་དབང་ཐང་རླུང་རྟ་ལ༔ ས་ཡི་གནོད་པའི་ས་སྐག་ཟློག༔ སྟག་ཡོས་ཁོན་ལ་ཕྱིན་པ་ཡི༔ སྤར་ཁ་ས་ཡི་དུར་སྐག་ཟློག༔ ལོ་ཟླ་ཞག་དུས་ལུག་གི་སྟེང་༔ སྟག་ཡོས་ཕྱིན་པའི་དུར་སྐག་ཟློག༔ ལྔ་སེར་སྟེང་དུ་ཕྱིན་པ་ཡི༔ སྨེ་བའི་ས་སྐག་ལངས་བ་ཟློག༔ ས་ལོ་བཅུ་གཉིས་སྟེང་རྩུབ་པ༔ ལོ་རྒན་དྲུག་ཅུའི་ས་ཐོསྐག་ཟློག༔ གཤེད་བཞིའི་སྟེང་དུ་རྩུབ་པ་ཡི༔ རྒྱལ་པོ་ལོ་ཡི་ས་སྐག་ཟློག༔ ཐ་ཆུང་བཞི་ལ་རྩུབ་པ་ཡི༔ བློན་པོ་ཟླ་བའི་ས་སྐག་ཟློག༔ གཤེད་བཞི་ཞག་ལ་རྩུབ་པ་ཡི༔ དམག་མི་ཞག་གི་ས་སྐག་ཟློག༔ གཤེད་བཞི་དུས་ལ་རྩུབ་པ་ཡི༔ དུར་ཚོད་མཚོན་ཆའི་ས་སྐག་ཟློག༔ རི་ཉིལ་ས་ལོག་མཁར་ཁང་འགྱེལ༔ ཕྱི་རོལ་སྣོད་ཀྱི་ས་སྐག་ཟློག༔
སྐང་ལོག་ས་སྐྱོན་ཤ་ལྷག་སོགས༔ ལུས་ཀྱི་ས་སྐག་ནད་རྣམས་ཟློག༔ ཕོ་བའི་ནད་དང་མཚེར་པའི་ནད༔ དོན་དང་སྣོད་ཀྱི་ས་སྐག་ཟློག༔ རྐང་ལག་རྐྱང་པ་ཞུ་རིང་སོགས༔ ཡན་ལག་བཞི་ཡི་ས་སྐག་ཟློག༔ ས་བདག་འཁྲུགས་པའི་གནོད་པ་སོགས༔ ཕྱི་དང་ནང་གི་ས་སྐག་ཟློག༔ ལྡི་འཐིབ་གཉིད་དང་རྨུགས་པ་སོགས༔ གསངབ་སེམས་ཀྱི་ས་སྐག་ཟློག༔ བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ལཾ་ལས་སྔགས་ཕྲེང་གཡོན་དུ་འཁོར༔ དེ་ལས་འོད་ཟེར་འཕྲོས་པ་ཡི༔ ས་ཡི་སྐག་ཟློག་སྤྱན་དྲངས་ནས༔ བསྒོམ་པ་དེ་ཡི་སྐུ་ལ་ཐིམ༔ སླར་ཡང་འོད་ཟེར་འཕྲོས་པ་ཡིས༔ ཕྱི་ནང་གསང་བའི་ས་སྐག་ཀུན༔ སྤྲིན་ནག་རླུང་གིས་གཏོར་ལྟར་བསྒོམ༔ སྔགས་འདི་ཅི་འགྲུབ་མང་དུ་བརྗོད༔ ལཾ་མ་ན་ས་ཟློག༔ དེ་ཡིས་ས་ཡི་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ དཀུ། ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་རྟ་ཆེན་ཟླ་བའི་གནམ་གང་ཉིན་ལྷ་མོ་སའི་སྐག་ཟློག་མ་ཉིད་ཀྱིས་དངོས་སུ་གསུངས་སོ༔ ཞེས་པ་འདོན་ཆ་རཱ་ག་ཨ་སྱས་སྦྱར་བའོ༔ ཨོཾ༔ ལས་ཧུར་དྲག་མོ་ལ་ཕྱག་འཚལ་ལོ༔ ལྕགས་ཀྱི་སྐག་ཟློག་མ་སྒྲུབ་ཐབས༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་
དམར་གཏོར་གཅིག་བཅའ་འོ༔ བྷྱོ༔ ལྷ་མོ་ལྕགས་ཀྱི་སྐག་ཟློག་དཀར༔ ཞལ་གཅིག་ཕྱག་གཉིས་ལྕགས་ཆ་བྲོ༔ ལྷ་མོའི་ཆ་ལུགས་ཡོངས་སུ་རྫོགས༔ དར་དཀར་འདུང་མ་སྐུ་ལ་གསོལ༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ ཕྱི་དང་ནང་དང་གསང་བ་ཡི༔ ལྕགས་ཀྱི་སྐག་རྣམས་ཐམས་ཅད་ཟློག༔ སྟག་དང་ཡོས་ཀྱི་ལོ་པ་ལ༔ ནུབ་ཀྱི་བྲག་དཀར་སྤྲེལ་འདུ་སོགས༔ ས་དགྲ་ལངས་བའི་ལྕགས་སྐག་ཟློག༔ བྲག་ཞིག་ལྷ་འདྲེས་རྡོ་འཕེན་དང་༔ རི་རྡོ་ཞིང་དུ་འགྲིལ་བ་སོགས༔ ལྟས་ངན་ཆོ་འཕྲུལ་ལྕགས་སྐག་ཟློག༔ མདའ་གྲི་མདུང་གསུམ་དགྲ་དར་སོགས༔ ལུས་ལ་མཚོན་གྱི་ལྕགས་སྐག་ཟློག༔ བྲག་སྲིན་བྲག་ཐིལ་གནོད་པ་སོགས༔ བྲག་གནས་ལྷ་འདྲེའི་ལྕགས་སྐག་ཟློག༔ སྟག་དང་ཡོས་ཀྱི་ལོ་པ་ཡི༔ དྭ་ཡི་སྟེང་དུ་ཕྱིན་པ་སོགས༔ སྤར་ཁའི་ལྕགས་སྟག་ལངས་བ་ཟློག༔ སྲོག་ལུས་དབང་ཐང་རླུང་རྟ་ལ༔ ལྕགས་དགྲ་དར་བའི་ལྕགས་སྐག་ཟློག༔ ལོ་ཟླ་ཞག་དང་ཟ་མ་ལ༔ སྨེ་བ་སྐར་
གསུམ་སྟེང་རྩུབ་པའི༔ སྨེ་བའི་ལྕགས་སྐག་ལངས་བ་བཟློག༔ དེ་བཞིན་ལོ་ཟླ་ཞག་དུས་སུ༔ དྭ་ཡི་སྟེང་དུ་རྩུབ་པ་ཡི༔ སྤར་ཁའི་ལྕགས་སྐག་ཐམས་ཅད་ཟློག༔ སྟག་དང་ཡོས་ཀྱི་ལོ་པ་ཡི༔ ལོ་ཟླ་ཞག་དང་ཟ་མ་རྣམས༔ བྱ་སྤྲེལ་ཐོག་ཏུ་ཕྱིན་པ་ཡི༔ ལོ་ཟླ་ཞག་དུས་ལྕགས་སྐག་ཟློག༔ ལྕགས་སྐག་དྲུག་དང་པ་སངས་ཀྱི་༔ གནོད་པའི་གཟའ་སྐར་ལྕགས་སྐག་ཟློག༔ ཤིང་ལོ་བཅུ་གཉིས་ལོ་པ་རྣམས༔ ལྕགས་ལོ་བཅུ་གཉིས་སྟེང་ཕྱིན་སོགས༔ དྲུག་ཅུ་ལོ་ཡི་ལྕགས་སྐག་ཟློག༔ རུས་པ་དཀར་པོ་ལྕགས་ཀྱི་ཁམས༔ རུས་པ་ན་བའི་ལྕགས་སྐག་ཟློག༔ མགོ་ཆག་ཀླད་པ་ལུག་པ་སོགས༔ སྒལ་ཚིགས་གཞུང་པའི་ནད་རྣམས་ཟློག༔ རྐང་ལག་ཆག་ཅིང་གྲུམ་པ་སོགས༔ ལྕགས་འདྲེ་གྲི་བོ་གྲི་མོ་ཟློག༔ བཙོན་བཟུང་ལྕགས་བླུག་ལྕགས་སྐག་ཟློག༔ ས་མ་ཡ་བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ཙཾ་མཐར་སྔགས་ཕྲེང་གཡོན་དུ་འཁོར༔ དེ་ལས་འོད་ཟེར་འཕྲོས་པ་ཡིས༔ ལྕགས་ཀྱི་སྐག་ཟློག་སྤྱན་དྲངས་ནས༔ མདུན་གྱི་བསྐྱེད་པ་དེ་ལ་བསྟིམ༔ སླར་ཡང་འོད་འཕྲོས་ལྕགས་ཀྱི་སྐག༔ བ་མོར་ཉི་ཟེར་
ཕོག་ལྟར་བསྒོམ༔ དེ་ནས་སྔགས་འདི་ཅི་འགྲུབ་བརྗོད༔ ཙ་དམར་ལྕགས་ཟློག༔ དེ་ཡིས་ལྕགས་ཀྱི་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཤཔ། ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་སྤོ་ཟླ་བའི་ཚེས་གཅིག་ལ་ལྷ་མོ་ལྕགས་ཀྱི་སྐག་ཟློག་མ་ཉིད་ཀྱིས་དངོས་སུ་ཕུལ་བའོ༔ ཞེས་པ་འདོན་ཆ་རཱ་ག་ཨ་སྱས་སྦྱར་བའོ༔ ཨོྃ༔ ལྕགས་ཐཾ༔ ལས་ཧུར་དྲག་མོ་ལ་ཕྱག་འཚལ་ལོ༔ གནམ་གྱི་སྐག་ཟློག་མ་སྒྲུབ་ཐབས༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་འོ༔ བྷྱོ༔ ལྷ་མོ་ནམ་མཁའི་སྐག་ཟློག་སྔོ༔ ཞལ་གཅིག་ཕྱག་གཉིས་འཇའ་ཚོན་གྲི༔ ལྷ་མོའི་ཆ་ལུགས་ཡོངས་སུ་རྫོགས༔ དར་སྔོན་འདུང་མ་སྐུ་ལ་གསོལ༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ ཕྱི་ནང་གསང་བ་གནམ་གྱི་སྐག་སྐག་ཟློག་ལྷ་མོའི་སྐག་བཟློག་ཅིག༔ ལི་དང་ཁེན་ལ་སྤུངས་པའམ༔ བུག་པའི་གནམ་སྒོ་བྱེ་བ་ཟློག༔ ལོ་ཟླ་ཞག་དང་དུས་ཚོད་ལ༔ རྟ་སྦྲུལ་ལི་དང་ཁེན་ལ་ཕྱིན༔ གནམ་གྱི་དུར་སྐག་ལངས་བ་ཟློག༔ གནམ་སྐག་ཐོག་དང་སེར་བ་ཟློག༔ གནམ་རྡོ་
དུས་མིན་ཁ་ཆར་ཟློག༔ གནམ་ཁྱི་ངུ་ཟུག་བྱེད་པ་ཟློག༔ གནམ་ཐིལ་ས་ལ་བབ་པ་ཟློག༔ གཟའ་སྐར་ཐང་ལ་ལྷུང་བ་ཟློག༔ གནམ་ནད་གཟའ་ཡི་གདོང་ཐུག་ཟློག༔ གནམ་གྱི་དལ་ཁ་བབ་པ་ཟློག༔ སྐར་མདའ་ས་ལ་བབ་པ་ཟློག༔ གནམ་སྒྲོན་གཤིན་རྗེའི་མཆེ་ཟུར་ཟློག༔ བྱ་ཆེན་སྟེང་དུ་བབ་པ་ཟློག༔ བྱ་ཐན་ལུས་ལ་ཕོག་པ་ཟློག༔ གཟའ་ཆེན་བརྒྱད་ཀྱི་གཟེར་འདེབས་ཟློག༔ གཟའ་དང་རྒྱུ་སྐར་འཁྲུག་པ་ཟློག༔ རྒྱུ་སྐར་རྣམས་ཀྱི་ཉེས་སྐྱོན་ཟློག༔ འཇའ་སྣ་ཁྱིམ་དུ་ཟུག་པ་ཟློག༔ གཡུ་འབྲུག་ས་ལ་འབབ་པ་ཟློག༔ གནམ་རྟ་གནམ་ལུག་བབ་པ་ཟློག༔ འུར་སྒྲ་ཐུག་ཆོམ་བྱུང་བ་ཟློག༔ གཟའ་བདུད་རྒྱུག་གྲངས་མང་བ་ཟློག༔ གྲོང་ཁྱེར་སྟོང་པའི་གནམ་སྐག་ཟློག༔ སྦྲ་ཁྱིམ་སྟོང་པའི་གནམ་སྐག་ཟློག༔ བང་མཛོད་སྟོང་པའི་གནམ་སྐག་ཟློག༔ མེད་སྣང་ལྟོགས་སྣང་ལངས་བ་ཟློག༔ སྟོང་པ་ནམ་མཁའི་སྐག་རྣམས་ཀུན༔ སྐག་ཟློག་ལྷ་མོའི་ད་ཟློག་ཅིག༔ ས་མ་ཡ་བྷྱོ་བྷྱོ༔ ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ཨེ་མཐར་སྔགས་ཕྲེང་གཡོན་དུ་འཁོར༔ དེ་ལས་འོད་ཟེར་འཕྲོས་པ་ཡིས༔ ནམ་མཁའི་
སྐག་བཟློག་སྤྱན་དྲངས་བསྟིམས༔ སླར་ཡང་འོད་ཟེར་འཕྲོས་པ་ཡིས༔ གནམ་ནད་གནམ་གྱི་སྐག་རྣམས་ཀུན༔ མུན་པར་ཉི་མ་ཤར་བཞིན་གསལ༔ སྔགས་འདི་ཅི་ནུས་བརྗོད་པར་བྱ༔ ཨེ་མོ་ཐེ་གནམ་གྱི་སྐག་ཟློག༔ དེ་ཡིས་གནམ་གྱིས་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཤ་རྒྱ༔ ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་པ་བྱ་ལོ་སྤོ་ཟླ་བའི་ཚེས་གསུམ་གྱི་ཉིན་ལྷ་མོ་ནམ་མཁའི་སྐག་ཟློག་མ་ཉིད་ཀྱིས་དངོས་སུ་ཕུལ་ལོ༔ ཞེས་པ་འདོན་ཆ་རཱ་ག་ཨ་སྱས་སྦྱར༔ ཨོཾ༔ ལས་ཧུར་དྲག་མོར་ཕྱག་འཚལ་ལོ༔ ཆུ་ཡི་སྐག་ཟློག་བསྒྲུབ་པ་ནི༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་འོ༔ བྷྱོ༔ ལྷ་མོ་ཆུ་ཡི་སྐག་ཟློག་སྔོ༔ ཞལ་གཅིག་ཕྱག་གཉིས་ཆུ་རྐྱལ་ཐོགས༔ ལྷ་མོའི་ཆུ་ལུགས་ཡོངས་སུ་རྫོགས༔ དར་སྔོན་འདུང་མ་སྐུ་ལ་གསོལ༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ བདག་དང་བསྲུང་བྱ་ཐམས་ཅད་ལ༔ ཆུ་ཡི་གནོད་པའི་སྐག་རྣམས་ཟློག༔ སྲོག་ལུས་དབང་ཐང་རླུང་རྟ་རྣམས༔ འབྱུང་བ་མེ་ཁམས་ཡིན་རྣམས་ལ༔
ཆུ་དང་འཕྲད་པའི་ཆུ་སྐག་ཟློག༔ སྤར་ཁ་ཟླ་བ་ཞག་དུས་སུ༔ རྟ་སྦྲུལ་ཁཾ་ལ་ཕྱིན་པ་ཟློག༔ གཉིས་ནག་དང་ནི་གསུམ་མཐིང་ལ༔ རྩུབ་པ་སྨེ་བའི་ཆུ་སྐག་ཟློག༔ རྟ་དང་སྦྲུལ་གྱི་ལོ་པ་རྣམས༔ བྱི་ཕག་ལོ་ལ་ཕྱིན་པ་སོགས༔ རྒྱལ་པོ་ལོ་ཡི་ཆུ་སྐག་ཟློག༔ དེ་བཞིན་རྟ་དང་སྦྲུལ་ལོ་པ༔ ཞག་དང་ཟ་མ་ལ་སོགས་པ་བྱི་ཕག་ཤར་བའི་ཆུ་སྐག་ཟློག༔ སྲོག་ལུས་དབང་རླུང་མེ་ཁམས་པ༔ ཆུ་ཡི་སྐར་མ་ཟླ་ལག་སོགས༔ གཟའ་དང་སྐར་མའི་ཆུ་སྐག་ཟློག༔ ལ་ངུར་གངས་རྡིབ་གངས་རྒྱུག་དང་༔ རྐང་ལག་ཕྱིད་པའི་ཆུ་སྐག་ཟློག༔ ཆུས་ཁྱེར་གྲུ་ལོག་ཤ་སྦྱད་སོགས༔ ཆུ་ཡིས་ཤི་བའི་ཆུ་སྐག་ཟློག༔ སྡུག་གི་མཆི་མ་བབ་པ་སོགས༔ མྱ་ངན་ཆེན་པོའི་ཆུ་སྐག་ཟློག༔ དམུ་ཆུ་གྲང་ནད་ཆུ་འགག་སོགས༔ ཆུ་སེར་གྲང་འབྱམས་ཆུ་སྐག་ཟློག༔ གྲང་སྲིན་རྣག་ཁྲག་འཛག་པ་དང་༔ བཤལ་དང་སྐྱག་པའི་ཆུ་སྐག་ཟློག༔ རྟ་དང་སྦྲུལ་གྱི་ལོ་པ་ལ༔ བྱང་གི་ཆུ་བོ་རྒྱུན་འབབ་སོགས༔ ས་ཡི་ས་དགྲ་ཆུ་སྐག་ཟློག༔ གྲོང་པའི་བྱང་དུ་མཚོ་ཆུང་དང་༔ ཆུ་སྒྲོན་ཉི་མའི་སྲབ་མདའ་སོགས༔ ས་དགྲ་ཆུ་སྐག་ལངས་བ་ཟློག༔ ཡུལ་མི་
ཆུ་ཁམས་གནོད་པ་སོགས༔ མིང་གི་ཆུ་སྐག་ལངས་བ་ཟློག༔ འདོད་ཆགས་ཆུ་ལྟར་འཁྲུགས་པ་ཟློག༔ ཆུ་ལ་གནས་པའི་གདོན་རྣམས་ཟློག༔ ཕྱི་དང་ནང་དང་གསང་བ་ཡི༔ ལྷཆུ་ཡིས་གནོད་པའི་སྐག་རྣམས་ཟློག༔ ཐམས་ཅད་མ་ལུས་བཟློག་ཏུ་གསོལ༔ ས་མ་ཡ་བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ཁཾ་མཐར་སྔགས་ཕྲེང་གཡོན་དུ་འཁོར༔ དེ་ལས་འོད་ཟེར་འཕྲོས་པ་ཡིས༔ ཆུ་ཡི་སྐག་ཟློག་སྤྱན་དྲངས་ནས༔ སྒོམ་པ་དེ་ཡི་སྐུ་ལ་ཐིམ༔ སླར་ཡང་འོད་ཟེར་སྣ་ཚོགས་འཕྲོས༔ ཆུ་ཡི་སྐག་དང་གནོད་པ་ཀུན༔ བ་མོར་ཉི་ཟེར་ཕོག་ལྟར་གྱུར༔ ཁཾ་མ་ར་ཆུ་ཟློག༔ མང་དུ་བརྗོད༔ དེ་ཡིས་ཆུ་ཡི་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཧཁ༔ ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་པ་བྱ་ལོ་སྤོ་ཟླ་བའི་ཚེས་བཞིའི་ནུབ་དཔལ་ལྡན་ལྷ་མོ་ཆུའི་སྐག་བཟློག་མ་ཉིད་ཀྱིས་དངོས་སུ་ཕུལ་ལོ༔ འདོན་ཆ་རཱག་ཨ་སྱས་སྦྱར་བའོ༔ ཤམ༔ ཨོཾ༔ ཤམཛྷ་ལས་ཧུར་དྲག་མོ་ལ་ཕྱག་འཚལ་ལོ༔ ཤིང་གི་སྐག་ཟློག་བསྒྲུབ་པ་ནི༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་འོ༔ བྷྱོ༔ ལྷ་མོ་ཤིང་གི་སྐག་ཟློག་མ༔ ལྗང་ཁུ་ཞལ་གཅིག་ཕྱག་གཉིས་མ༔ གཡས་པས་ཤིང་ལོ་གཡོན་དུ་དྲྭ་
བ༔ ལྷ་མོའི་ཆས་ཀུན་ཡོངས་སུ་རྫོགས༔ ཞབས་གཉིས་བཞེངས་པའི་སྟབས་ཀྱིས་བཞུགས༔ རས་ལྗང་འདུང་མ་སྐུ་ལ་གསོལ༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ ཕྱི་ནང་གསང་བ་ཤིང་གི་སྐག༔ ཐམས་ཅད་བཟློག་པའི་དུས་ལ་བབ༔ ལོ་ཟླ་ཞག་དང་དུས་ཚོད་རྣམས༔ ཟིན་གྱི་སྟེང་དུ་རྩུབ་པ་ཡི༔ སྤར་ཁའི་ཤིང་སྐག་ལངས་བ་ཟློག༔ གཤེད་བཞི་སྟག་ཡོས་ཟིན་ལ་ཕྱིན༔ ཤིང་གི་དགྲ་སྐག་ལངས་བ་ཟློག༔ ས་ལོ་བཅུ་གཉིས་ལོ་པ་རྣམས༔ ཤིང་ལོ་བཅུ་གཉིས་སྟེང་དུ་ཕྱིན༔ དྲུག་ཅུ་ལོ་ཡི་ཤིང་སྐག་ཟློག༔ མཚམས་བཞི་ལོ་པའི་མི་རྣམས་ནི༔ སྟག་དང་ཡོས་ཀྱི་ལོ་ལ་ཕྱིན༔ གནམ་ལོ་ལོག་མན་ཤིང་སྐག་ཟློག༔ དེ་བཞིན་གཤེད་བཞི་ལོ་པ་རྣམས༔ དཔྱིད་ཟླ་ར་དང་འབྲིང་ལ་བབ༔ བློན་པོ་ཟླ་བའི་ཤིང་སྐག་ཟློག༔ དེ་བཞིན་ཞག་དང་དུས་ཚོད་ལ༔ སྟག་དང་ཡོས་བུ་ཤར་བའི་ཚེ༔ མཚམས་བཞི་ལོ་པའི་ཤིང་སྐག་ཟློག༔ ཤར་སྐར་དྲུག་དང་ཕུར་བུ་ཡིས༔ གནོད་པའི་གཟའ་སྐར་ཤིང་སྐག་ཟློག༔ ཤར་དང་ནུབ་ཀྱི་
ཤིང་གཅིག་དང་༔ ཤིང་ནག་རེ་བའི་གཡབ་མོ་སོགས༔ ས་དགྲ་ཤིང་སྐག་ལངས་པ་བཟློག༔ ཤིང་ཆེན་འགྱེལ་བའི་འོག་ཚུད་དང་༔ ཤིང་གཉན་བཅད་པའི་གནོད་པ་ཟློག༔ ཀ་གདུང་འཕྲེད་དུ་ཆག་པ་དང་༔ བོང་བའི་བཅུད་རྩི་ཟག་པ་སོགས༔ ཤིང་སྐག་ལྟས་ངན་ལངས་བ་ཟློག༔ རྩ་དང་རྒྱུས་པ་ནང་གི་ཤིང་༔ རྩ་སྐྱོན་འཐེང་སྡོད་བྱུང་བ་ཟློག༔ རྩ་དང་ཆུ་རྒྱུས་ཆད་པ་ཟློག༔ རྩ་རྒྱུད་གཟེར་ཞིང་ཁུམ་པ་ཟློག༔ མཆིན་པ་ཤིང་གི་ཁམས་ཡིན་པས༔ མཆིན་ནད་མཆིན་སྐྲན་ཞུགས་པ་ཟློག༔ རང་རྒྱུད་ཤིང་ལྟར་རེངས་བ་ཟློག༔ ས་མ་ཡ་བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཧཱུྃ་ལྗང་མཐར༔ སྔགས་ཕྲེང་གཡོན་དུ་འཁོར་བ་ལས༔ འོད་ཟེར་དཔག་ཏུ་མེད་པ་འཕྲོས༔ ཤིང་གི་སྐག་ཟློག་སྤྱན་དྲངས་ནས༔ མདུན་དུ་བསྐྱེད་པ་དེ་ལ་ཐིམ༔ སླར་ཡང་འོད་འཕྲོས་ཤིང་གི་སྐག༔ ཐམས་ཅད་སངས་སེ་དག་པ་བསྒོམ༔ སྔགས་འདི་ཅི་མང་བརྗོད་པར་བྱ༔ ཤཾ་མ་ན་ཤིང་ཟློག༔ དེ་ཡིས་ཤིང་གི་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ གམ། ཅེས་པ་སྤྲུལ་སྐུ་ལ་རྟ་ཆེན་ཟླ་བའི་ཉེར་དྲུག་ནུབ་མོ་ལྷ་མོ་ཤིང་གི་སྐག་ཟློག་མ་ཉིད་ཀྱིས་དངོས་སུ་ཕུལ་ལོ༔ འདོན་ཆ་རཱ་ག་ཨ་སྱས་སྦྱར་བའོ༔
ཨོྃ༔ ལས་ཧུར་དྲག་མོ་ལ་ཕྱག་འཚལ་ལོ༔ རླུང་གི་སྐག་ཟློག་མ་སྒྲུབ་ཐབས༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་གཅིག་བཅའ་འོ༔ བྷྱོ༔ ལྷ་མོ་རླུང་གི་སྐག་ཟློག་ལྗང་༔ གཡས་ནི་རླུང་ཞགས་གཡོན་སྦྲུལ་ཞགས༔ དར་ལྗང་འདུང་མ་སྐུ་ལ་གསོལ༔ ལྷ་མོའི་ཆས་ཀུན་ཡོངས་སུ་རྫོགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ ལོ་ཟླ་ཞག་དང་དུས་ཚོད་རྣམས༔ བཞི་ལྗང་སྟེང་དུ་རྩུབ་པ་ཡི༔ སྨེ་བའི་རླུང་སྐག་ལངས་བ་ཟློག༔ ལོ་ཟླ་ཞག་དང་དུས་ཚོད་རྣམས༔ ཟོན་གྱི་སྟེང་དུ་རྩུབ་པ་ཡི༔ སྤར་ཁའི་རླུང་སྐག་ལངས་བ་ཟློག༔ རླུང་ནག་འཚུབ་མས་བཏུམ་པ་ཟློག །ཁང་ཁྱིམ་རླུང་གིས་བསྐྱེལ་བ་ཟློག༔ སྦྲ་གུར་རླུང་གིས་ཁྱེར་བ་ཟློག༔ རླུང་རྟ་རྒུད་པའི་རླུང་སྐག་ཟློག༔ དགྲ་སྣ་རླུང་ལྟར་འཚུབ་པ་ཟློག༔ མི་ཁ་རླུང་ལྟར་འཚུབ་པ་ཟློག༔ རླུང་ཁ་དགྲ་ལ་ཤོར་བ་ཟློག༔ གཏམ་རླུང་ཕམ་པའི་རླུང་སྐག་ཟློག༔ རླུང་འཁྱོམས་ཆེན་པོ་ལངས་བ་ཟློག༔ བད་རླུང་མགོ་བོ་འཁོར་བ་ཟློག༔ སེམས་རླུང་སྨྱོ་དང་འབོག་པ་
ཟློག༔ རླུང་འགག་ཕོ་ལྷོག་གླང་འཐབ་ཟློག༔ རླུང་གཟེར་སྟོད་འཚང་ལངས་བ་ཟློག༔ རླུང་གཟའ་ཁ་མིག་ཡོ་བ་ཟློག༔ རླུང་འཁྲུག་མཐོང་སྣང་སྐྲག་སྣང་ཟློག༔ གསང་རླུང་སེམས་ཀྱི་འཕྲོ་རྒོད་ཟློག༔ དོན་མེད་ཚིག་པ་ཟ་བ་ཟློག༔ རང་སྲོག་རང་གིས་གཅོད་པ་ཟློག༔ ཕྱི་ནང་གསང་བའི་རླུང་སྐག་རྣམས༔ སྐག་ཟློག་ལྷ་མོས་ད་བཟློག་ཅིག༔ ས་མ་ཡ་བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ཡཾ་མཐར་སྔགས་ཕྲེང་གཡོན་དུ་འཁོར༔ དེ་ལས་འོད་ཟེར་འཕྲོས་པ་ཡིས༔ རླུང་གི་སྐག་ཟློག་སྤྱན་དྲངས་ནས༔ མདུན་དུ་བསྐྱེད་པ་དེ་ལ་ཐིམ༔ སླར་ཡང་འོད་ཟེར་འཕྲོས་པ་ཡིས༔ རླུང་གི་ནད་དང་གནོད་པ་ཀུན༔ བྱང་ཞིང་དག་ནས་མེད་པར་བསྒོམས༔ སྔགས་འདི་ཅི་ནུས་བརྗོད་པར་བྱ༔ ཡཾ་མ་ར་ན་ཁཾ་ཁཾ་ནི༔ ཚྭ་ཏ་ནི་རླུང་ཟློག༔ དེ་ཡིས་རླུང་གི་སྐག་ཟློག་འགྲུབ༔ ས་མ་ཡ༔ རྒྱ༔ ཁ་ཐཾ༔ གུ་ཧྱ༔ ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་རྟ་ཆེན་ཟླ་བའི་ཉེར་བདུན་ནུབ་ལྷ་མོ་རླུང་གི་སྐག་ཟློག་མ་ཉིད་ཀྱིས་དངོས་སུ་ཕུལ་ལོ༔ འདོན་ཆ་རཱ་ག་ཨ་སྱས་སྦྱར་བའོ༔ ཨོཾ༔ ལས་ཧུར་དྲག་མོར་ཕྱག་འཚལ་ལོ༔ ཕྱོགས་ཀྱི་སྐག་ཟློག་མ་སྒྲུབ་ཐབས༔ དཀྱིལ་འཁོར་མེད་ཅིང་གཏོར་མ་མེད༔ སྤྲོ་ན་དམར་གཏོར་
ༀ་གཅིག་བཅའ་འོ༔ བྷྱོ༔ ལྷ་མོ་ཕྱོགས་ཀྱི་སྐག་ཟློག་མ༔ སྐུ་མདོག་དམར་སེར་ཞལ་གཅིག་ཕྱག་གཉིས་རི་རབ་ཕུར་པ་འཛིན༔ ལྷ་མོའི་ཆ་ལུགས་ཡོངས་སུ་རྫོགས༔ དར་འདུང་དམར་སེར་སྐུ་ལ་གསོལ༔ ཞབས་གཉིས་བཞེངས་པའི་སྟབས་ཀྱིས་བཞུགས༔ འདིར་གཤེགས་བརྒྱན་པའི་གཏོར་མ་བཞེས༔ གསོལ་ལོ་མཆོད་དོ་ཐུགས་དམ་བསྐང་༔ ཁྱེད་ཀྱི་ཐུགས་དམ་བསྐངས་གྱུར་ནས༔ ཤར་ཕྱོགས་དྲི་ཟའི་སྐག་རྣམས་ཟློག༔ ལྷོ་ཕྱོགས་གཤིན་རྗེའི་སྐག་རྣམས་ཟློག༔ ནུབ་ཕྱོགས་ཀླུ་ཡི་སྐག་རྣམས་ཟློག༔ བྱང་ཕྱོགས་གནོད་སྦྱིན་སྐག་རྣམས་ཟློག༔ ཤར་ལྷོ་མེ་ལྷའི་སྐག་རྣམས་ཟློག༔ ལྷོ་ནུབ་སྲིན་པོའི་སྐག་རྣམས་ཟློག༔ ནུབ་བྱང་རླུང་ལྷའི་སྐག་རྣམས་ཟློག༔ བྱང་ཤར་དབང་ལྡན་སྐག་རྣམས་ཟློག༔ སྟེང་ཕྱོགས་གཟའ་སྐར་སྐག་རྣམས་ཟློག༔ འོག་ཕྱོགས་ས་བདག་སྐག་རྣམས་ཟློག༔ འདྲེ་ལྔ་གནས་པའི་ཕྱོགས་སྐག་ཟློག༔ བདུད་གཅོད་།གནས་པའི་ཕྱོགས་སྐག་ཟློག༔ གནོད་བྱེད་གནས་པའི་ཕྱོགས་སྐག་ཟློག༔ སྤར་ཁ་རང་ཐོག་ཕྱོགས་སྐག་ཟློག༔ སྤར་ཁ་དགྲ་ཡི་ཕྱོགས་སྐག་ཟློག༔ ཐེ་སེ་ཧལ་ཁྱི་ཙང་ཀུན་
སོགས༔ ཕྱོགས་སུ་འགྲོ་བའི་ཕྱོགས་སྐག་ཟློག༔ གཟའ་དང་ཁྲ་ཚ་ཟིན་ཕུང་སོགས༔ གདོང་དང་ཐུག་པའི་ཕྱོགས་སྐག་བཟློག༔ ཕྱོགས་དེར་སོང་ན་རྐྱེན་འོང་བའི༔ ཡུལ་ལྷ་ཁྲོས་པའི་ཕྱོགས་སྐག་ཟློག༔ མཆོད་རྟེན་ལྷ་ཁང་ཡོད་ཕྱོགས་སུ༔ འགྲོ་མི་རུང་བའི་ཕྱོགས་སྐག་ཟློག༔ གྲུ་ཟམ་རུ་ནག་ཡོད་ཕྱོགས་སུ༔ འགྲོ་མི་རུང་བའི་ཕྱོགས་སྐག་ཟློག༔ ལྕགས་བཟོ་མགར་ཚང་ཡོད་ཕྱོགས་སུ༔ འགྲོ་མི་རུང་བའི་ཕྱོགས་སྐག་ཟློག༔ ཤིང་བཟོ་མཁར་ལས་བྱེད་ཕྱོགས་སུ༔ འགྲོ་མི་རུང་བའི་ཕྱོགས་སྐག་ཟློག་བང་སྟོང་སྨོན་མ་ཡོད་ཕྱོགས་སུ༔ འགྲོ་མི་རུང་བའི་ཕྱོགས་སྐག་ཟློག༔ རྟ་བཤའ་བག་མ་བཏང་ལེན་སར༔ འགྲོ་མི་རུང་བའི་ཕྱོགས་སྐག་ཟློག༔ ས་རྐོ་ཁང་ནག་བཤུ་འགེབ་སར༔ འགྲོ་མི་རུང་བའི་ཕྱོགས་སྐག་ཟློག༔ མི་ཤི་རྡོ་ཟན་བྱེད་ས་རུ༔ འགྲོ་མི་རུང་བའི་ཕྱོགས་སྐག་ཟློག༔ ལི་ལ་ཁྱི་ཟླའི་བཅུ་བདུན་བར༔ ནུབ་ཏུ་འགྲོ་བའི་ཕྱོགས་སྐག་ཟློག༔ ཁོན་ལ་ཕག་གི་ཟླ་བ་ཡི༔ བཅུ་བཞི་ནས་ནི་བཅུ་བདུན་བར༔ བྱང་དུ་འགྲོ་བའི་ཕྱོགས་སྐག་ཟློག༔ དྭ་ལ་སྟག་ཟླའི་ཉེར་གཅིག་ལ༔ ཤར་དུ་འགྲོ་བའི་ཕྱོགས་སྐག་ཟློག༔
ཁེན་ལ་རྟ་ཡི་ཟླ་བ་ཡི༔ ཚེས་གཅིག་ནས་ནི་བཅུ་བདུན་བར༔ ལྷོ་རུ་འགྲོ་བའི་ཕྱོགས་སྐག་ཟློག༔ ཁོ་ལ་ལུག་གི་ཟླ་བ་ཡི༔ ཚེས་བཅུ་ནས་ནི་ཉེར་གཅིག་བར༔ ལྷོ་ནུབ་འགྲོ་བའི་ཕྱོགས་སྐག་ཟློག༔ གིན་ལ་འབྲུག་གི་ཟླ་བ་ཡི༔ ཚེས་གཅིག་ནས་ནི་བདུན་གྱི་བར༔ ཤར་ལྷོར་འགྲོ་བའི་ཕྱོགས་སྐག་ཟློག༔ ཟིན་ལ་སྤྲེའུ་ཟླ་བ་ཚེས་གཅིག་ནས་ནི་བདུན་གྱི་བར༔ ནུབ་ཏུ་འགྲོ་བའི་ཕྱོགས་སྐག་ཟློག༔ ཟོན་ལ་གླང་གི་ཟླ་བ་ཡི༔ ཚེས་གཅིག་ནས་ནི་བདུན་གྱི་བར༔ བྱང་ཤར་འགྲོ་བའི་ཕྱོགས་སྐག་ཟློག༔ བྱི་ལིང་རྒྱུ་བའི་གདོང་ཕྱོགས་སུ༔ བྱིས་སྦ་ཁྲིད་པའི་ཕྱོགས་སྐག་ཟློག༔ སྒྲ་གཅན་འཕར་བ་གནས་ཕྱོགས་སུ༔ དམག་མི་གཤར་བའི་ཕྱོགས་སྐག་ཟློག༔ ཧལ་ཁྱི་རོ་ཟན་གནས་ཕྱོགས་སུ༔ མཚོན་རྩེ་བསྟན་པའི་ཕྱོགས་སྐག་ཟློག༔ བ་དན་ཁྲ་བོ་གནས་ཕྱོགས་སུ༔ དར་ཕྱར་དུང་འབུད་ཕྱོགས་སྐག་ཟློག༔ གཞི་བདག་དྲག་པོ་གནས་ཕྱོགས་སུ༔ དྲག་ལས་བྱས་པའི་ཕྱོགས་སྐག་ཟློག༔ ཙང་ཀུན་འཕྱེ་བོ་གནས་ཕྱོགས་སུ༔ ཁ་མཆུ་གཏམ་པའི་ཕྱོགས་སྐག་ཟློག༔ ཕྱོགས་མི་གཙང་བའི་ཕྱོགས་རྣམས་སུ༔ ཀོ་
ལོང་བསྡོམས་པའི་ལས་བྱས་པ༔ དེ་དག་ཐམས་ཅད་བཟློག་ཅིང་སྒྱུར༔ ས་མ་ཡ་བྷྱོ་བྷྱོ་ཟློག་ཟློག༔ ལྷ་མོའི་ཐུགས་ཀར་ཟླ་བའི་སྟེང་༔ ཕྱི་མཐར་སྔགས་ཕྲེང་གཡོན་དུ་འཁོར༔ འོད་ཟེར་དཔག་མེད་འཕྲོས་པ་ཡིས༔ ཕྱོགས་ཀྱི་སྐག་ཟློག་སྤྱན་དྲངས་ནས༔ བསྒོམ་པ་དེ་ཡི་སྐུ་ལ་ཐིམ༔ སླར་ཡང་འོད་ཟེར་འཕྲོས་པ་ཡིས༔ ཕྱོགས་དང་ཕྱོགས་ངན་གནོད་པ་ཀུན༔ བ་མོར་ཉི་ཟེར་ཕོག་ལྟར་ཞི༔ ཕྱི་མ་ར་ཕྱོགས་ཟློག༔ དེ་ཡིས་ཕྱོགས་ཀྱི་སྐག་ཟློག་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ གཅེས་པ་སྤྲུལ་སྐུ་དགུང་ལོ་བཅུ་གསུམ་པ་བྱ་ལོ་སྤོ་ཟླ་བའི་ཚེས་ལྔ་ལ་ལྷ་མོ་ཕྱོགས་ཀྱི་སྣག་བཟློག་མ་ཉིད་ཀྱིས་དངོས་སུ་གསུངས་སོ༔ འདོན་ཆ་རཱ་ག་ཨ་སྱས་སྦྱར་བའོ༔ དེ་ནས་སྐག་ཟློག་གང་ཡིན་ཀྱང་འབུལ་ཁ་འདི་འདོན༔ བྷྱོ༔ མི་མངོན་ནམ་མཁའི་དབྱིངས་རུམ་ནས༔ དཔལ་ལྡན་ལྷ་མོ་རེ་མ་ཏི༔ སྐུ་ལུས་གཅིག་ལ་སྤྲུལ་པ་སྟོང་༔ སྤྲུལ་པ་རེ་ལ་ཕྱག་བརྙན་འབུམ༔ སྐུ་ཡང་མི་གཅིག་སོ་སོར་བསྒོམ༔ སྔགས་ཀྱང་མི་གཅིག་སོ་སོར་བཟླ༔ མཚན་ཡང་མི་གཅིག་སོ་སོར་འབོད༔ ཇི་ལྟར་བྱས་ཀྱང་ངོ་བོ་གཅིག༔ ཇི་ལྟར་བྱས་ཀྱང་ཕྲིན་ལས་འགྲུབ༔ ལྷ་མོ་ཆེ་གེའི་སྐག་ཟློག་མ་བརྒྱན་པའི་གཏོར་མ་འདི་བཞེས་ལ༔
བདག་གིས་ཇི་ལྟར་བཅོལ་བ་ཡི༔ སྐག་རྣམས་ཟློག་པའི་ཕྲིན་ལས་མཛོད༔ མཐུ་དང་ནུས་པ་ཅི་འདུག་ལྟ༔ རྟགས་དང་མཚན་མ་དངོས་སུ་སྟོན༔ དམ་ལ་མ་འདའ་དམ་ཚིག་ཅན༔ དུས་ལ་བབ་བོ་ས་མ་ཡ༔ སྟོང་གསལ་ནམ་མཁའི་དབྱིངས་རུམ་ནས༔ སྤྲིན་དང་གློག་དང་འཇའ་ཚོན་གསུམ༔ ལན་གཅིག་སྤྲུལ་པ་དངོས་སུ་བྱུང་༔ དེ་ནས་སྤྲུལ་པ་དབྱིངས་སུ་ཐིམ༔ མ་གཅིག་ཐུགས་ཀྱི་མཁའ་ཀློང་ནས༔ ལྷ་མོ་སྒོའི་སྐག་ཟློག་མ༔ ལན་གཅིག་སྤྲུལ་པ་དངོས་སུ་བྱོན༔ ད་ནི་ཆོས་ཀྱི་དབྱིངས་སུ་ཐིམ༔ ལྷ་མོ་སྒོའི་སྐག་ཟློག་མ༔ ད་ནི་རང་གི་གནས་སུ་གཤེགས༔ བདག་དང་བསྲུང་བྱ་འདི་དག་ལ༔ གནོད་པའི་སྐག་རིགས་དེ་རྣམས་ཀུན༔ ཐམས་ཅད་བསྡུས་ཏེ་ཁྱེར་ལ་གཤེགས༔ མ་མོ་མཁའ་འགྲོ་འདུ་བའི་གནས༔ རྒྱ་གར་དུར་ཁྲོད་བརྒྱད་དུ་གཤེགས༔ མ་ཚོགས་མཁའ་འགྲོ་འདུ་བའི་གནས༔ ནུབ་ཕྱོགས་ཨོ་རྒྱན་ཡུལ་དུ་གཤེགས་ལྷ་མོ་དཔོན་གཡོག་བཞུགས་པའི་གནས༔ མུ་ལེ་མཐིང་མཚོའི་ནང་དུ་གཤེགས༔ ཡོངས་འདུ་ཤིང་གི་རྩ་བར་གཤེགས༔ བྱང་ཤར་ཆོས་དབྱིངས་གནས་སུ་གཤེགས༔ ཨོཾ་དེ་ཝི་བཛྲ་མུཿ
གཙཱ་གཙྩ༔ ཅེས་བརྗོད་ཕྱོགས་ཀྱི་གཙང་སའམ༔ ཡས་ལམ་ཕྱོགས་སུ་ཕུལ་རྒྱུ་བསྐུར༔ སྤར་ཁའི་གཏོ་ལ་འདི་བཅས་ན༔ སྤར་ཁ་རང་གནས་ཕྱོགས་སུ་ཕུལ༔ ནད་པའི་དོན་དུ་བཅའ་བ་ན༔ ལོ་བདུད་ཐོག་ཏུ་ཕུལ་བར་བྱ༔ གནོད་པ་བྱུང་ནས་འདི་བཅས་ན༔ དགྲ་སོགས་གང་གནོད་ཕྱོགས་སུ་ཕུལ༔ རང་གི་བདེ་རིམ་བཅའ་བ་ན༔ ཕྱོགས་སོགས་བརྩི་བར་མ་ཤེས་ན༔ བྱང་ཤར་ལྷ་མོ་གནས་ཕྱོགས་ཕུལ༔ སྐག་སོགས་ཞིབ་རྩིས་མི་ཤེས་ན༔ ལི་ནི་མེ་ལ་ཁོན་ནི་ས༔ དྭ་ནི་ལྕགས་ལ་ཁེན་ནི་གནམ༔ ཁམ་ནི་ཆུ་ལ་ཟིན་ནི་ཤིང་༔ ཟོན་ནི་རླུང་གི་སྐག་ཟློག་བཅའ༔ གང་ཐོགས་བཞི་ལ་འདུས་མཁན་དང་༔ དགྲ་དང་ཁ་མཆུ་ལངས་བ་ནི༔ དགྲ་ཡི་སྐག་ཟློག་བཅའ་བར་བྱ༔ གིན་ཐོག་ཕྱོགས་སུ་འགྲོ་མཁན་ནམ༔ གཞན་ཡང་ཐག་རིང་འགྲོ་དགོས་ན༔ ཕྱོགས་ཀྱི་སྐག་ཟློག་བཅའ་བར་བྱ༔ འདི་ནི་ཅུང་ཟད་སྤྲོས་བཅས་ཡིན༔ སྤྲོས་བཅས་བཅའ་འདོན་ལོང་མེད་ཅིང་༔ མེ་མཆེད་གྲུ་ཁ་རབ་སོ་དང་༔ གློ་བུར་ཇག་རྐུན་ལ་སོགས་པ༔ དམིགས་པ་བསྒོམ་ཞིང་སྔགས་བཟླས་ཆོག༔ གཏེར་གཞུང་དུ་མའི་ལུགས་སུ་སྣང་༔ སྤྲོ་ན་དམར་གཏོར་གཅིག་བཅའ་གསུངས༔ དེ་ལ་འདོན་ཆ་གཞུང་ན་མེད༔ དེ་ཕྱིར་འདོན་ཆ་དང་བཅས་པའི༔ ཕྱག་ལེན་གསལ་ཞིང་ཁྱེར་བདེ་བ༔ གཏེར་བློན་རཱ་ག་ཨ་སྱས་སྦྱར༔ དགེ་སློང་བཅས་ཡི་གེར་བཀོད༔ ཉེས་འགལ་ལྷ་མོའི་ཚོགས་ལ་བཤགས༔ དགེ་བས་འདི་ཉིད་ཆེར་འཕེལ་ནས༔ མ་འོངས་རྐང་གཉིས་འགྲོ་རྣམས་ལ༔ ཕན་ཐོགས་རྒྱ་ཆེན་
འབྱུང་བར་ཤོག༔ མངྒ་ལཾ༔ བཀྲ་ཤིས༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།