མདོས་ཟློག་སྤྱི་ཡི་རྩང་གྱེར་བི་ཛ་ཧ་རཾ།
མདོས་ཟློག་སྤྱི་ཡི་རྩང་གྱེར་བི་ཛ་ཧ་རཾ། ཧཱུྃ། དཔལ་ཆེན་ཁྲག་འཐུང་ཧེ་རུ་ཀ །དྲག་པོའི་བཟློག་མདོས་ལྕགས་རི་ལ། །དབང་དྲག་ལས་ཀྱི་རྩང་ཕུར་བཙུགས། །བཀའ་སྡོད་ཕོ་ཉ་མཉེས་པའི་རྫས། །རྩང་ཕུར་ཡར་གྱི་རྩེ་མོ་ལ། །འུར་འུར་ཆེམ་ཆེམ་སྤྲིན་ནག་འཁྲིགས། །མ་རུངས་འབྲུག་སྒྲ་ཤི་རི་རི། །རྐེད་པ་རྒྱ་མདུད་འབར་བ་ལ། །མི་བཟད་གློག་དམར་སྐྱེམས་སེ་སྐེམ། །གནམ་ལྕགས་ཐོག་གི་བུ་ཡུག་འཚུབ། །གདུག་པའི་རྩང་ཕུར་མར་རྩེ་ན། །རྡོ་རྗེ་མེ་ཡི་སེར་བ་འབེབས། །དགྲ་བགེགས་ཐལ་བ་རྡུལ་དུ་རློགས། །དངུལ་ལམ་དཀར་པོའི་ཤིང་དག་ལ། །ཤར་ཕྱོགས་ཞི་བའི་རྩང་ཕུར་བདུན། །རྩེ་མོ་ཟུར་གསུམ་དུག་གསུམ་ཞི། །ཡར་རྩེ་དུང་གི་སེང་གེ་འགྱིང་། །སྤྲུལ་པའི་སེང་ཆེན་ནམ་མཁའ་གང་། །གཡུ་རལ་སྤྲུག་ཅིང་སེང་སྐད་འདོན། །མར་རྩེ་ཆུ་སྲིན་མཆེ་བ་གཙིགས། །སྤྲུལ་པའི་ཆུ་སྲིན་ས་འོག་ཁྱབ། །དྲག་པོའི་རྐན་སྒྲ་ཐགས་སེ་ཐག༔ རྐེད་པ་རྒྱ་མདུད་ཟླུམ་པོའི་ནང་། །ཤར་ཕྱོགས་ཞི་བའི་ལས་མཛད་པའི། །ཤར་གྱི་དབང་ཕྱུག་མ་བདུན་གནས། །ནད་གདོན་དགྲ་བགེགས་འཇིགས་པ་བརྒྱད། །ཞི་བར་མ་
གྱུར་གང་ཡང་མེད། །ཞི་མཛད་མ་ཡིས་ཞི་བར་མཛོད། །བར་ཆད་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། གསེར་རམ་སེར་པོའི་ཤིང་དག་ལ། །ལྷོ་ཕྱོགས་རྒྱས་པའི་རྩང་ཕུར་བདུན། །རྩེ་མོ་ཟུར་གསུམ་སྐུ་གསུམ་གནས། །ཡར་རྩེ་རྒྱ་སྟག་དམར་པོ་མཆོངས། །སྟག་མོ་འཛུམ་དྲུག་ཤིགས་སེ་ཤིག །མར་རྩེ་ཕག་རྒོད་མཆེ་བ་གཙིགས། །ཕག་རྒོད་མཆེ་བ་ཐགས་སེ་ཐག །རྐེད་པ་རྒྱ་མདུད་གྲུ་བཞི་གནས། །ལྷོ་ཕྱོགས་རྒྱས་པའི་ལས་མཛད་པའི། །ལྷོ་ཡི་དབང་ཕྱུག་སྲིང་བདུན་གནས། །ཚེ་དང་བསོད་ནམས་འབྱོར་པ་དྲུག །རྒྱས་པར་མ་གྱུར་གང་ཡང་མེད། །རྒྱས་མཛད་མ་ཡིས་རྒྱས་པར་མཛོད། །ཚེ་དང་བསོད་ནམས་པུཊྚི་ཀུ་རུ་ཡེ་སྭཱ་ཧཱ། ཟངས་སམ་དམར་པོའི་ཤིང་དག་ལ། །ནུབ་ཕྱོགས་དབང་གི་ཟངས་ཕུར་བདུན། །རྩེ་མོ་ཟུར་གསུམ་ཁམས་གསུམ་སྡུད། །།ཡར་རྩེ་གཟིག་ཆེན་ཐིག་ལེ་འགྱིང་། །གཟིག་མོའི་ངར་སྐད་འུ་རུ་རུ། །མར་རྩེ་དོམ་ནག་མཆེ་བ་གཙིགས། །དོམ་ནག་མཆེ་གཙིག་ཐམས་སེ་ཐམ། །སྐེད་པ་རྒྱ་མདུད་ཟླ་གམ་ནང་། །ནུབ་ཕྱོགས་དབང་གི་ལས་མཛད་པའི། །ནུབ་ཀྱི་དབང་ཕྱུག་མ་བདུན་གནས། །ཁམས་གསུམ་སྲིད་གསུམ་འཁོར་འདས་
རྣམས། །དབང་དུ་མ་གྱུར་གང་ཡང་མེད། །དབང་བྱེད་མ་ཡིས་དབང་དུ་སྡུད། །ཁམས་གསུམ་སྲིད་གསུམ་བ་ཤང་ཀུ་རུ་ཡེ་སྭཱ་ཧཱ། ལྕགས་སམ་དྲག་པོའི་ཤིང་དག་ལ། །བྱང་ཕྱོགས་དྲག་པོའི་རྩང་ཕུར་བདུན། །རྩེ་མོ་ཟུར་གསུམ་གདོན་གསུམ་འདུལ། །ཡར་རྩེ་བསེ་ཡི་བྱ་གླག་ལྡིང་། །བྱ་ཁྲ་འཇུམ་དང་ཆུམས་སེ་ཆུམ། །མར་རྩེ་ལྕགས་ཀྱི་ཕོ་རོག་འགྱེད། །བྱ་རོག་རྐང་འགྲོས་ཀྲངས་སེ་ཀྲང་། །རྐེད་པ་རྒྱ་མདུད་གྲུ་གསུམ་ནང་། །བྱང་ཕྱོགས་དྲག་པོའི་ལས་མཛད་པའི། །བྱང་གི་དབང་ཕྱུག་སྲིང་བདུན་གནས། །བདུད་བཞིའི་དགྲ་བགེགས་ལོག་འདྲེན་རྣམས། །བརླགས་པར་མ་གྱུར་གང་ཡང་མེད། །རློག་བྱེད་མ་ཡིས་བརླག་པར་མཛོད། །དགྲ་བགེགས་མཱ་ར་ཡ་ཧཱུྃ་ཕཊ། གདུག་རྩུབ་ཚེར་མའི་ཤིང་རྣམས་ལ། །ལས་བྱེད་རྩང་ཕུར་དྲུག་ཅུ་ལ། །རྩེ་མོ་ཟུར་གསུམ་སྲིད་གསུམ་འདུལ། །ཡར་རྩེ་ཡེ་ཤེས་མེ་དཔུང་འབར། །བཙན་དམག་ལས་ལ་ཤ་ར་ར། །མར་རྩེ་བསྐལ་པའི་མུན་ནག་འཁྲིགས། །བདུད་དམག་བྲོ་བརྡུང་ཁྲིགས་སེ་ཁྲིག །སྐེད་པ་རྒྱ་མདུད་གཞལ་ཡས་ཁང་། །སྲིན་མོ་དྲུག་ཅུ་རྩ་བཞི་གནས། །ཤར་གྱི་རྩང་
བཙུགས་ཨ་ལོང་རིས། །དྲ་མིག་ཟླུམ་པོ་ལྷུན་གྱིས་གྲུབ། །ལྷོ་ཡི་རྩང་བཙུགས་ཨ་ལོང་རིས། །དྲ་མིག་གྲུ་བཞི་ལྷུན་གྱིས་གྲུབ། །ནུབ་ཀྱི་རྩང་བཙུགས་ཟླ་གམ་རིས། །དྲ་མིག་ཟླ་གམ་ལྷུན་གྱིས་གྲུབ། །དྲག་པོའི་རྩང་བཙུགས་ཕུར་སོ་རིས། །དྲ་མིག་གྲུ་གསུམ་ལྷུན་གྱིས་གྲུབ། །དབང་ཕྱུག་རྩང་བཙུགས་འཚུབ་མ་རིས། །མེ་ལོང་འཚུབ་མ་ལྷུན་གྱིས་གྲུབ། །ལས་ཀྱི་རྩང་བཙུགས་སྲིན་པོའི་འགྲོས། །སྲིན་མོའི་གར་སྟབས་ལྷུན་གྱིས་གྲུབ། །རྩང་ཕུར་གདུག་རྩུབ་དྲ་མིག་ན། །མྱུར་མགྱོགས་ཕོ་ཉ་འགྱུ་བའི་སྲང་། །དགྲ་བགེགས་བྱད་མ་ཁྲམ་ལ་ཐོབ། །ཆག་ཆེན་ཉམ་ང་ཐམས་ཅད་ཟློག །སྔོ་དམར་ཞགས་པས་སྡོམ་པ་ཡིས། །རིམས་ནད་དལ་ཁ་ཐམས་ཅད་ཟློག །བ་སུ་ཏ་ཡིས་དཀྲིས་པ་ཡིས། །ཁྲག་ནད་རྒྱུག་གཟེར་ཐམས་ཅད་ཟློག །ཤ་ཁྲག་ལིང་གས་བརྒྱན་པ་ཡིས། །སྲིན་མོའི་དམག་ཚོགས་ཐུགས་དམ་བསྐང་། །སྲིད་པའི་དལ་ཁ་ཐམས་ཅད་ཟློག །ཟློག་བྱེད་དར་སྟག་བརྒྱན་པ་ཡིས། །དཔལ་ཆེན་འཁོར་བཅས་ཐུགས་དམ་བསྐང་། །བཅོལ་བའི་ཕྲིན་ལས་འགྲུབ་པར་མཛོད། །གྲྭ་ལོའི་གསུངས་ལས། རཱ་ག་ཨ་སྱས་བཏུས་པའོ། །མངྒ་ལཾ།། །།