སྨན་བླའི་སྒོམ་བཟླས་བླ་མའི་རྣལ་འབྱོར།
སྨན་བླའི་སྒོམ་བཟླས་བླ་མའི་རྣལ་འབྱོར་བཞུགས་སོ།། ན་མོ་བྷི་ཥ་ཛཱི་ཡེ། བསླུ་མེད་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་བཅོམ་ལྡན་སྨན་བླ་བསྒྲུབ། །བདག་གི་སྤྱི་བོར་པདྨ་ཟླ་བའི་སྟེང་། །ཧཱུྃ་ཡིག་མཐིང་ནག་འོད་ཀྱིས་འཕགས་པ་མཆོད། །སེམས་ཅན་ཀུན་གྱི་དོན་བྱས་ཚུར་འདུས་པས། །རྩ་བའི་བླ་མ་དབྱེར་མེད་བཅོམ་ལྡན་འདས། །སྨན་བླ་སྐུ་མདོག་བཻཌཱུརྱ་ཡི་མདོག །ཞལ་གཅིག་ཞི་འཛུམ་མཛོད་སྤུ་དཀར་པོས་བརྒྱན། །ཕྱག་གཉིས་གཡས་པས་མཆོག་སྦྱིན་ཕྱག་རྒྱ་ཡིས། །སྨན་མཆོག་རྣམ་རྒྱལ་ལོ་མ་དང་བཅས་འཛིན། །གཡོན་པས་མཉམ་བཞག་ལྷུང་བཟེད་བདུད་རྩིས་བཀང་། །རྡོ་རྗེའི་སྐྱིལ་ཀྲུང་པད་མའི་གདན་ལ་བཞུགས། །མཚན་དཔེ་རབ་རྫོགས་ཆོས་གོས་རྣམ་གསུམ་གསོལ། །འོད་ཟེར་ཉི་མ་འབུམ་གྱི་གཟི་བརྗིད་འབར། །དེ་ཡི་དཔྲལ་བར་ཨོཾ་དཀར་མགྲིན་པར་ནི། །ཨཱཿཡིག་དམར་པོ་ཐུགས་ཀར་ཟླ་བའི་སྟེང་། །ཧཱུྃ་ཡིག་སྔོན་པོའི་མཐའ་མར་གཟུངས་ཀྱིས་བསྐོར། །དེ་ལས་འོད་འཕྲོས་ཤར་ཕྱོགས་འཇིག་རྟེན་ཁམས། །བེཟླུརྒྱ་སྣང་ཞིང་ནས་ཡེ་ཤེས་པ། །ནམ་མཁའ་སྤྱན་དྲངས་གཉིས་སུ་
མེད་པར་ཐིམ། །གཞན་ཡང་ཕྱོགས་བཅུའི་རྒྱལ་བ་སྲས་བཅས་པ། །སྨན་བླའི་རྣམ་པར་སྤྱན་དྲངས་གཉིས་མེད་གྱུར། །སྐྱབས་གནས་ཀུན་འདུས་ངོ་བོ་སྨན་བླ་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །གླིང་བཞི་རི་རབ་རྒྱལ་སྲིད་རིན་ཆེན་བདུན། །བཀྲ་ཤིས་རྫས་རྟགས་བརྒྱད་དང་འདོད་ཡོན་ལྔ། །བདག་ལུས་ལོངས་སྤྱོད་སྣང་སྲིད་ཐམས་ཅད་འབུལ། །ཐོག་མེད་དུས་ནས་ད་ལྟ་ཡན་ཆད་དུ། །བཅས་དང་རང་བཞིན་ཁ་ན་མ་ཐོའི་ལས། །ཉེས་པའི་ཚོགས་རྣམས་གང་མཆིས་མཐོལ་ལོ་བཤགས། །འཕགས་སྐྱེས་བསོད་ནམས་ཀུན་ལ་རྗེས་ཡི་རང་། །གང་འདུལ་ཆོས་འཁོར་རྒྱ་ཆེན་བསྐོར་བར་བསྐུལ། །འཁོར་བ་ཇི་སྲིད་བཞུགས་པར་གསོལ་བ་འདེབས། །དགེ་བ་འདི་ཡིས་འགྲོ་ཀུན་བདེ་གྱུར་ཅིག །བཅོམ་ལྡན་ཁྱེད་ཀྱི་ཐུགས་བསྐྱེད་སྨོན་ལམ་དང་། །ཚད་མེད་ཐུགས་རྗེས་བདག་ལ་བརྩེར་དགོངས་ལ། རླུང་མཁྲིས་བད་ཀན་འདུས་པའི་ནད་རྣམས་དང་། །འཁོར་བའི་འཇིགས་པ་ཀུན་ལས་བསྐྱབ་ཏུ་གསོལ། །ཞེས་གསོལ་མོད་ལས་སྐུ་ལས་བདུད་རྩི་བབ། །ཚངས་བུག་ནས་
ཞུགས་ནད་གདོན་སྡིག་སྒྲིབ་རྣམས། །དུད་ཁུའི་རྣམ་པ་འོག་གི་སྒོ་ནས་ཐོན། །ས་འོག་སོང་བས་ལས་ཀྱི་གཤིན་རྗེ་ཚིམ། །བདག་ལུས་དྲི་མེད་ཤེལ་སྒོང་ལྟ་བུའི་ནང་། །འཆི་མེད་སྨན་གྱི་བདུད་རྩིས་ལྟེམ་གྱིས་གང་། །ཞེས་བསྒོམས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་སྨན་གྱི་བླ་་༔ བཻཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཞེས་ལན་གསུམ། བདུན་ནམ་ཉེར་གཅིག་གམ་བརྗོད། ཏདྱ་ཐཱ། ཨོཾ་བྷཻ་ཥ་ཛྱཻ་བྷེ་ཥ་ཛྱཻ་མ་ཧཱ་བྷཻ་ཥ་ཛྱཻ་རཱ་ཛ་ས་མུཏྒ་ཏེ་སྭཱ་ཧཱ། ཞེས་ཅི་ནུས་བཟླ། སྨན་བླའི་སྐུ་གསུང་ཐུགས་ལས་འོད་ཟེར་ནི། །དཀར་དམར་མཐིང་གསུམ་རང་གི་གནས་ལྔར་ཐིམ། །སྐུ་གསུང་ཐུགས་ཀྱི་དབང་མཆོག་ཐོབ་གྱུར་ནས། །བཅོམ་ལྡན་འོད་ཞུ་བདག་དང་དབྱེར་མེད་ཐིམ། །རྒྱལ་བ་ཀུན་གྱི་ཐུགས་དང་རང་གི་སེམས། །དེ་བཞིན་ཁམས་གསུམ་འགྲོ་བའི་སེམས་ཉིད་ཀུན། །དབྱེར་མེད་ཆོས་ཀྱི་དབྱིངས་སུ་ངོ་བོ་གཅིག །རང་སེམས་གདོད་ནས་ཆོས་སྐུ་ཡིན་པའི་ཕྱིར། །རེ་དོགས་བཅོས་སླད་མི་དགོས་རང་སར་ཞོག །བཟང་འདོད་འཇུར་བུས་མ་བཅིངས་ལྷོད་ལ་ཞོག །རྣམ་རྟོག་དགྲ་རུ་མ་བལྟ་ཡན་དུ་
ཆུག །འདབ་ཆགས་ཇི་ལྟར་འཕུར་ཡང་ནམ་མཁའི་ངང་། །ཉ་མོ་ཇི་ལྟར་འཕྱོ་ཡང་རྒྱ་མཚོའི་ངང་། །རྣམ་རྟོག་ཇི་ལྟར་འཕྲོ་ཡང་སེམས་ཉིད་ངང་། །མ་ཡེངས་དྲན་རྫི་མ་བརྗེད་ཉམས་ལེན་ཡིན། །འདིས་མཚོན་དུས་གསུམ་དགེ་བ་ཅི་བསགས་མཐུས། །ཚེ་འདིར་ཚེ་རིང་ནད་མེད་ཉམས་རྟོགས་འཕེལ། །ནམ་ཞིག་འཕོས་ཚེ་འཆི་བ་ཆོས་ཀྱི་སྐུ། །མངོན་སངས་རྒྱས་ནས་བར་དོ་ལོངས་སྐུ་འགྲུབ། །སྐྱེ་བ་སྤྲུལ་སྐུ་ནུབ་ཕྱོགས་བདེ་ཆེན་དུ། །རྒྱལ་བ་འོད་དཔག་མེད་པའི་ཞབས་དྲུང་དུ། །གསེར་གྱི་པད་མོ་མཆོག་ལ་རྫུས་སྐྱེས་ནས། །བྱང་ཆུབ་སྤྱོད་པ་རྒྱ་ཆེན་སྤྱོད་པར་ཤོག །ཅེས་པ་དགེ་སློང་གླིང་བཀྲ་ཤིས་གྱི་ཐུགས་དམ་བྱ་ཕྱིར། དགེ་སློང་རཱ་ག་ཨ་སྱས་འཕྲལ་དུ་བྲིས་པ་དགེ་ལེགས་འཕེལ།། །།