སྨན་བླའི་འཆི་བསླུ།
སྨན་བླའི་འཆི་བསླུ་བཞུགས་སོ༔ ན་མོ་གུ་རུ་བྷི་ཥ་ཛཱི༔ གནམ་ཆོས་དགོངས་གཏེར་ལས་བྱུང་བའི་སྨན་ལྷའི་དབང་གི་སྔོན་འགྲོ་ཤོག་ཁྲའི་འཆི་བསླུ་བྱེད་ན༔ སྨན་བླའི་དབང་བསྐུར་དུས་ཡིན་ན་བཟང་༔ འཕྲལ་དུ་ཡིན་ན་གཞི་དཀར་སྟེང་དུ་མཆོད་པ་ཅི་འབྱོར་དང་བྲིས་སྐུ་བཀྲམ་ལ་ཆོ་ག་རྒྱུན་ཁྱེར་རང་གིས་བསྒྲིགས་པ་བསྙེན་པ་བརྒྱ་རྩ་བཟླས་རྗེས༔ ནད་པའི་ལུས་བཀྲུས་པའི་དྲི་ཆུའི་ཆངས་བུ་བཞི་བཅུ་རྩ་བཞི་དང་ཏིང་ལོ་དེ་ཙམ་ཤ་དུམ་བཅས་པ་གྱོ་ཆག་ལ་སོགས་སྣོད་ནང་དུ༔ ངར་མི་གླང་གི་མགོ་ཅན༔ རྒྱབ་ཏུ་སྤྲེལ་གྱི་མགོ་ཅན༔ མདུན་དུ་ཕག་གི་མགོ་ཅན༔ གཡས་སུ་གནམ་ལོའི་མགོ་ཅན༔ གཡོན་དུ་ལོ་བདུད་བཞག༔ གོས་དུམ་སྐྲ་འཇག་བཞག༔ གཞི་སྟེང་མཎྜལ་སྟེང་དུ་འབྲུ་སྣའི་ཚོམ་བུ་བཀོད་ལ་བཞག༔ ནད་པ་ཡང་མདུན་དུ་འདུག༔ རང་ཉིད་སྨན་བླར་གསལ་བའི་མདུན་དེར་མདུན་བསྐྱེད་དཀྱིལ་འཁོར་ལྟརཿ༔ མཐའ་སྐོར་དུ་ཞང་བློན་སྡེ་དགུ་སྲུང་སྐྱོབ་བྱེད་པའི་སྲུང་མ་ལྷན་ཅིག་སྐྱེས་པའི་ལྷ་དང་༔ འགོ་བའི་ལྷ་ལྔ་དང་ཡུལ་ལྷ་བཅས་པ་གསལ་བཏབ་ལ། བདག་འཛིན་ཐམས་ཅད་སྟོང་པའི་ངང་ལས་སེངྒེའི་ཁྲི་ཡངས་ཤིང་རྒྱ་ཆེ་བ་ལྷ་རྫས་ཀྱི་གོས་ཀྱིས་བཀབ་པའི་སྟེང་དུ་པདྨ་དང་ཟླ་བའི་སྟེང་དུ་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་མཚན་བཟང་དང་དཔེ་བྱད་ཐམས་ཅད་ཀྱིས་བརྒྱན་པ། དེ་ལ་ཐུབ་པ་ལ་སོགས་སངས་རྒྱས་བདུན་གྱིས་བསྐོར་ནས་བཞུགས་པ། དེ་རྒྱབ་ཏུ་ཞང་བློན་སྡེ་དགུ་
ཡེ་ཤེས་དང་འཇིག་རྟེན་གྱི་ཆོས་སྐྱོང་སྲུང་མ་འགོ་བའི་ལྷ་ལྔ། སྐྱོབ་པའི་ལྷ་དགུ། ཡུལ་ལྷ་ཟོར་དོར་དང་བཅས་པ་གསལ་བར་གྱུར། ཏདྱ་ཐཱ། ཨོཾ་བྷེ་ཥ་ཛྷི་བྷི་ཥ་ཕྱི་དྷརྨ་པཱ་ལ་ལོ་ཀ་པཱ་ལ་ལོ་ཀ་དྷེ་ཝ་ཨེ་ཧྱ་ཧི་ས་མཱ་ཡ་ཛ༔ཛཿ གཉིས་སུ་མེད་པར་ཐིམ་པར་གྱུར། བགེགས་གཏོར་བསང་ཆུས་བྲན། ཨོཾ་བཛྲ་ཨ་མྲྀ་ཏེ་སོགས། སྭ་བྷ་ཝ་སོགས། སྟོང་པའི་ངང་ལས་འཆི་བདག་གི་རྒྱལ་པོ་གླང་གི་གདོང་པ་ཅན་སྤྱན་དམར་ལ་ལུས་ནག་པ། གཡས་བཤའ་གྲི་དམར་པོ་དང་། གཡོན་ཁྲམ་ཤིང་འཛིན་པ། མདུན་དུ་སྲོག་བདག་རཀྵ་ཕག་མགོ། རྒྱབ་ཏུ་ཚེ་བདག་སྤྲེལ་མགོ་དམར་པོ། གཡས་སུ་ནད་བདག་གནམ་ལོའི་གཟུགས་ཅན། གཡོན་དུ་ནད་པའི་ལོ་བདུད་མིང་གང་ཡིན་སྨོད། མཐའ་སྐོར་དུ་ལན་ཆགས་བུ་ལོན་ཤ་འཁོན་སྟོང་མགྲིན། བགེགས་ཀྱི་རིགས་སུ་གྱུར་པ་ངར་མི་དང་གཉིས་སུ་མེད་པར་ཐིམ་པར་དམིགས། དེ་ནས་བདེན་སྟོབས་ནི། ན་མོ། དཀོན་མཆོག་གསུམ་དང་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མ་དང་། །བཅོམ་ལྡན་སྨན་བླ་མཆེད་བརྒྱད་དང་། །ཚངས་དང་བརྒྱ་བྱིན་རྒྱལ་ཆེན་བཞི། །གནོད་སྦྱིན་སྡེ་དཔོན་འཁོར་ཚོགས་བཅས། །ལྷ་ཚོགས་ཀུན་གྱི་བདེན་
པའི་མཐུས། །བསྲུང་བྱ་ནད་པ་འདི་ཉིད་ཀྱི། །ལུས་ངག་ཡིད་གསུམ་ལ་གནོད་ཅིང་། །འཚེ་བའི་ནད་འདྲེ་གདོན་བགེགས་ཀུན། །མྱུར་དུ་རང་གཟུགས་གླུད་ཡས་ལ། །ཁུག་ཅིག་ཛཿཧཱུྃ་བཾ་ཧོ༔ ཨཱཿ ལན་གསུམ་བརྗོད། བགེགས་གཏོར་བྱིན་གྱིས་བརླས་པ་ནི། ཨ་ཀཱ་རོ་སོགས་ཀྱི་མཐར། དེ་བཞིན་གཤེགས་པ་བཞིའི་མཚན་བརྗོད། ཁ་འབར་མའི་སྔགས་བསྒྲུང་། དེ་ནས་འབྲུ་སྣ་ཐོགས་ལ་འདི་སྐད་དོ། །འབྲུ་སྣ་ལྔ་ཡི་མཆོད་པ་འདི། །རྟག་ཏུ་མགོན་སྐྱོབ་བྱེད་པ་དང་། །ལྷན་ཅིག་སྐྱེས་པའི་ལྷ་ལ་འབུལ། །དེ་ནས་ཆངས་བུ་བསྔོ་བ་ནི། ཚངས་བུ་ཤ་དུམ་འོ༔ ཏིང་ལོ་འདི། །བགེགས་རིགས་སྟོང་ཕྲག་བརྒྱད་ཅུ་དང་། །མཉམ་པོར་འོང་བའི་བདུད་ལ་སྦྱིན། །གཱིཏ་ཨི་དཾ་བ་ལིཾ་ཏ་ཁཱ་ཧི། དེ་ནས་ཤོག་བཀྲ་བཀོད་ལ། ཧཱུྃ། ནད་ཀྱིས་ཟིན་པའི་ནད་པ་ལ། །ཨ་རུ་རུ་ཡིས་ནད་པ་བསླ། དེའི་འགྲེས་ལ་སོ་སོར་བསྔོས་རྗེས། ཧཱུྃ། ཡེ་ཤེས་བསྐལ་པ་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེགས། །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །དཔའ་བོ་ཆེན་པོའི་དཔའ་མཚན་སྟག་ཤམ་ཅན། །རིག་
པའི་རྒྱལ་པོ་ཁྲོ་རྒྱལ་གཤེགས་སུ་གསོལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱིས་གཤེགས་སུ་གསོལ། །ཨོཾ་བཛྲ་ཀྲོ་དྷ་རཱ་ཛ་ས་པཱ་རི་ཝཱ་ར་ཨརྒྷཾ་པྲ་ཏིཙྪ་སྭཱ་ཧཱཿ རྣམ་ལྔ་རོ་མོ་དང་བཅས་པས་མཆོད། ཧཱུྃ། ཆོས་ཉིད་སྟོང་པ་གཉིས་མེད་ངང་ཉིད་ལས། །འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པ་ཁྲོ་བོའི་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་བསྟོད། །ཡེ་ཤེས་ཞི་བའི་ངང་ལས་མ་གཡོས་ཀྱང་། །སྐུ་ཡི་ཆ་ལུགས་ཟ་བྱེད་རྔམས་སྟབས་ཀྱིས། །གསུང་གི་ང་རོས་འབྲུག་སྟོང་ལྡིར་བའི་སྒྲས། །མ་ལུས་དབང་དུ་བསྡུས་ལ་ཕྱག་འཚལ་བསྟོད། །ལྷག་པའི་རོལ་པ་ཡེ་ཤེས་སྟོན་མཛད་ཅིང་། །སྡིག་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོམ་མོངས་དུག་གསུམ་རྩད་ནས་གཅོད་མཛད་པའི། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་བསྟོད། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །དཔའ་བོའི་སྟངས་སྟབས་བརྐྱང་བསྐུམ་ཚུལ་གྱི་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་བསྟོད། །གཏུམ་ཆེན་དུས་མཐའི་མེ་ལྟར་གཟི་བརྗིད་འབར། །གློག་སྟོང་འཁྱུར་འདྲའི་ཁྲོ་གཉེར་
མཆེ་བ་གཙིགས། །རྔམས་པའི་ང་རོས་འབྲུག་སྒྲ་སྟོང་གསུམ་སྒྲོག །ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད། །ཧཱུྃ་འཇིགས་པའི་ཧཱུྃ་སྒྲ་ངེས་སྒྲོག་ཅིང་བགེགས་རྣམས་མ་ལུས་འཇོམས་མཛད་པ༔ དངོས་གྲུབ་མ་ལུས་སྩོལ་བའི་ལྷ༔ བགེགས་ཀྱི་དགྲ་ལ་ཕྱག་འཚལ་བསྟོད༔ བཀའ་བསྒོ་བ་ནི། ཧཱུྃ། ང་ནི་གནས་འདིར་སྐལ་ལྡན་དབང་བསྐུར་ཞིང་། །བགེགས་རྣམས་འདི་རུ་མ་འདུག་གཞན་དུ་དེངས། །གལ་ཏེ་ང་ཡི་བཀའ་ལ་འདས་པ་ན། །ཡེཤེས་ཅན་གྱི་རྡོ་རྗེ་འབར་བ་ཡི། །མགོ་བོ་ཚལ་པ་བརྒྱར་ནས་འགས་གྱུར་ཞིང་། །བགེགས་རྣམས་བརླག་པར་འགྱུར་བ་གདོན་མི་ཟ། །བགེགས་རྣམས་འདི་རུ་མ་འདུག་གཞན་དུ་དེངས། །སུམྦྷ་ནིས་བགེགས་བསྐྲད། འོག་ཐམས་ཅད་རྡོ་རྗེའི་ས་གཞི་སོགས། སྲུང་འཁོར་བཅས། སོགས་ཀྱིས་བགེགས་བསྐྲད་ལ། གུ་གུལ་བདུག །ཡུངས་ཀར་གྱིས་བྲབ་ལོ་བདུད་ཡོད་ཕྱོགས་དོར། སྨན་བླའི་དབང་བརྒྱ་གྲུབ་ན་ལེགས། མ་གྲུབ་ན་ཡང་རུང་། དེ་ནས་བཀྲ་ཤིས་གང་ཤེས་བརྗོད། བསྔོ་བ་སྨོན་ལམ་བྱ། མི་འགྱུར་རྡོ་རྗེའི་དགོངས་གཏེར་འཆི་བསླུའི་ཤོག་བཀྲའི་ལྷན་ཐབས་སུ་ཨ་རཱ་གས་སྦྱར་བའོ། །མངྒ་ལཾ།། །།