སྲུང་བ་ལྔའི་ཆོ་ག་ནད་གདོན་ཀུན་སེལ།
སྲུང་བ་ལྔའི་ཆོ་ག་ནད་གདོན་ཀུན་སེལ་བཞུགས་པའི་དབུ་ཕྱོགས་ལགས་སོ།
ན་མོ་དེ་ཝཱི་པཉྩ་ཡེ། སྲུང་བ་ལྔ་ཡི་ཆོ་ག་ནི། །རབ་ཏུ་རྡུལ་ཚོན་དཀྱིལ་འཁོར་ནི། །དབུས་སུ་འདབ་བཞི་མུ་ཁྱུད་བྲི། །བསྡུ་ན་ནས་ཚོམ་ལྔ་ཡིས་ཆོག །དེ་དབུས་མཆོད་རྟེན་པུ་རི་བཤམས། །མེད་ན་སཱཙྪ་འམ་ཐུབ་པའི་སྐུ། །ཡང་ན་བྲིས་པའི་མཆོད་རྟེན་རུང་། །ཡང་ན་གནས་བཅུའི་ཐང་ཀ་བཤམས། །དབུས་སུ་གཏོར་མ་ཟླུམ་པོ་དང་། །ཕྱོགས་བཞིར་དཀར་གཏོར་བཞི་ཡི་ནང་། །འབྲུ་སྣ་མེ་ཏོག་བླུགས་པ་བཤམས། །གཏོར་མ་བཞི་ཡི་རྩེ་ལ་ནི། རྒྱལ་ཆེན་སྡེ་བཞིའི་ཙཀ་ལི་བཙུགས། །ཞོ་ཕུད་འོ་ཕུད་ཕྱེ་མར་དང་། །འབྲུ་སྣ་བསང་མཆོད་དུས་ལྟར་བཤམས། །མཆོད་པ་སྣ་བདུན་བསྐོར་བཤམས་བྱ། །ཟུར་བཞིར་མདའ་དར་བཞི་ཡང་བཙུགས། །ཚོན་སྐུད་སྣ་ལྔའམ་དཀར་ནག་དམར། །གཅིག་བསྒྲིམ་འདོམ་
གང་ཙམ་ཞིག་བཤམས། །མདུན་དུ་ས་སྟེགས་གཙང་མའམ། །སླ་ངའི་ནང་དུ་ཤིང་རྩི་དང་། །ཤུག་པ་ལ་སོགས་བསང་ཁང་ལྟར། །ཐམས་ཅད་ཆུ་གཙང་བྲན་ལ་བཞག༔ བདག་གིས་སེམས་ཅན་ཀུན་དོན་དུ། །རིག་པའི་ལྷ་མོ་ལྔ་བསྒྲུབ་སྟེ། །འགྲོ་བའི་སྡུག་བསྔལ་སེལ་བར་བྱ། །རང་ཉིད་ལྷ་མོ་ལྔར་གསལ་བའི། །ཐུགས་ལས་འོད་ཟེར་འཕྲོས་པ་ཡིས། །རིག་པའི་ལྷ་མོ་ལྔ་པོ་ནི། །སངས་རྒྱས་བྱང་སེམས་ཚོགས་དང་བཅས། །མདུན་གྱི་ནམ་མཁར་སྤྱན་དྲངས་བཞུགས། །སྒོ་གསུམ་གུས་པས་ཕྱག་འཚལ་ལོ། །བདག་དང་བསྲུང་བྱ་ཐམས་ཅད་ཀྱི། །སྡིག་ལྟུང་ལས་ཀུན་མཐོལ་ཞིང་
བཤགས། །དགེ་བསོད་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་མཛད་ཅིང་། །མྱ་ངན་མི་འདའ་རྟག་བཞུགས་གསོལ། །དཀོན་མཆོག་གསུམ་ལ་སྐྱབས་མཆི་ཞིང་། །བླ་མེད་བྱང་ཆུབ་སེམས་བསྐྱེད་དོ། །དགེ་བས་འགྲོ་ཀུན་སངས་རྒྱས་ཤོག །ཚོགས་ཞིང་རང་གི་སྙིང་ཁར་ཐིམ། །ཨོཾ་སྭ་བྷ་ཝ་སོགས། སྟོང་པའི་ངང་ལས་རྡོ་རྗེའི་ས་གཞི་དང་། །རྭ་གུར་མེ་རི་སྲུང་འཁོར་རྒྱ་ཆེན་ནང་། །པདྨ་འདབ་བཞི་ཟླ་གདན་ལྔ་ཡི་དབུས། །རང་ཉིད་རིག་པའི་རྒྱལ་མོ་ལྔ་གྱུར་ཏེ། །དབུས་སུ་པཾ་ལས་སོ་སོར་འབྲང་མ་ནི། །སེར་ནག་དཀར་བའི་ཞལ་གསུམ་སྤྱན་གསུམ་གསུམ། །དར་དང་རིན་ཆེན་རྒྱན་ལྡན་ཕྱེད་སྐྱིལ་བཞུགས། །ཕྱག་བཅུ་གཡས་ལྔ་རལ་གྲི་རྡོ་རྗེ་མདའ། །མཆོག་སྦྱིན་ཡུ་བ་ཐུགས་ཀར་གནས་པའི་གདུགས། །གཞུ་དང་རྒྱལ་མཚན་རིན་ཆེན་ཆུན་པོ་དང་། །དགྲ་སྟ་དུང་རྣམས་གཡོན་གྱི་ཕྱག་ན་བསྣམས། །ཤར་དུ་ཧཱུྃ་ལས་སྟོང་ཆེན་རབ་འཇོམས་དཀར། །ཞལ་གཅིག་པ་ལ་ཕྱག་ནི་དྲུག་པ་སྟེ། །གཡས་གསུམ་རལ་གྲི་མདའ་དང་མཆོག་སྦྱིན་ཕྱག །གཡོན་གསུམ་ཞགས་པ་གཞུ་དང་དགྲ་སྣ་འཛིན། །ལྷོ་རུ་མཾ་ལས་རྨ་བྱ་ཆེན་
མོ་ལྗང་། །ཞལ་གཅིག་ཕྱག་གཉིས་སྒྲོ་མདངས་མཆོག་སྦྱིན་ཕྱག །ནུབ་ཏུ་ཧཱུྃ་ལས་གསང་སྔགས་རྗེས་འཛིན་ནག །བྱང་དུ་ཛ་ལས་བསིལ་བའི་ཚལ་མ་དམར། །གཉིས་ཀ་ཞལ་གཅིག་ཕྱག་ནི་བཞི་མ་སྟེ། །གཡས་གཉིས་རལ་གྲི་མཆོག་སྦྱིན་གཡོན་གཉིས་ན། །དགྲ་སྟེ་ཞགས་པ་འཛིན་ཅིང་ཉི་མའི་གདན། །ཀུན་ཀྱང་དར་དང་རིན་ཆེན་རྒྱན་གྱིས་བཀླུབས། །རོལ་པའི་སྟབས་ཀྱིས་འགྱིང་བའི་ཚུལ་གྱིས་བཞུགས། །ཀུན་གྱི་གནས་གསུམ་ཨོཾ་ཨཱཿཧཱུྃ་གསུམ་དང་། །རང་རང་ཐུགས་ཀའི་ས་བོན་འོད་ཟེར་གྱིས། །རང་འདྲའི་ཡེ་ཤེས་སེམས་དཔའ་སྤྱན་དྲངས་ནས། །ཛཧཱུྃ་བཾ་ཧོ༔གཉིས་སུ་མེད་པར་གྱུར། །དབང་ལྷ་རིགས་ལྔ་སྤྱན་དྲངས་དབང་བསྐུར་ནས། །དབང་རྟགས་གཙོ་མོ་ལ་ནི་རིན་འབྱུང་དང་། །རྣམ་སྣང་དོན་གྲུབ་འོད་དཔག་རིམ་བཞིན་བརྒྱན། །རང་གི་ཐུགས་ལས་སྤྲུལ་པའི་མཆོད་ལྷའི་ཚོགས། །མཆོད་རྫས་དུ་མ་འཛིན་པས་བདག་བསྐྱེད་ཀླུ་མཆོད། །དེ་ཝི་པཉྩ་ཨརྒྷཾ་སོགས། ཉོན་མོངས་ལྔ་པོ་རྣམ་དག་ཅིང་། །ཕུང་པོ་ལྔ་ཡི་ངོ་བོ་ཉིད། །རིགས་ལྔ་ཡེ་ཤེས་ལྔ་ཡི་རང་བཞིན་ནི། །རིག་པའི་ལྷ་མོ་ལྔ་ལ་བསྟོད། །
རང་རང་ཐུགས་ཀར་ཟླ་སྟེང་ས་བོན་མཐར། །རང་རང་སྔགས་ཕྲེང་འོད་ཟེར་གྱིས། །སངས་རྒྱས་ཀུན་མཆོད་བྱིན་རླབས་བསྡུས། །འགྲོ་ཀུན་སྒྲིབ་པ་སྦྱངས་བར་གྱུར། །ཨོཾ་་ཨཱཿཋཔྲ་ཏི་སཱ་རེ་པྲ་ཧཱུྃ། ཨོཾ་ཨཱཿཋམ་ཧཱ་ས་ཧ་སྲ་པྲ་མརྡ་ནི་ཧཱུྃ་ཧཱུྃ། ཨོཾ་ཨཱཿམ་ཧཱ་མ་ཡུ་རི་མཾ་ཧཱུྃ། ཨོཾ་ཨཱཿམ་ཧཱ་མནྟ་ཨ་ནུ་དྷཱ་རི་ཧཱུྃ་ཧཱུྃ༔ ཨོཾ་ཨཱཿམ་ཧཱ་ཤཱི་ཏ་བ་རི་ཛ་ཧཱུྃ༔ ཞེས་ཅི་ནུས་བརྗོད་བསྙེན་པ་བྱ། ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། རིམ་གྱིས་ཐམས་ཅད་སྟོང་པ་ལས། །བྷྱོ་ལས་གཞན་ལས་ཁང་པ་ནི། །གྲུ་བཞི་སྒོ་བཞི་རྟ་བབས་སོགས། །མཚན་ཉིད་ཐམས་ཅད་ཡོངས་རྫོགས་པའི། །ཕྱོགས་བཞིར་ཐེམ་སྐས་ལྡན་པ་ཡི། །ཕྱི་ཁྱམས་མཚོ་དང་རྫིང་བུ་ནི། །ཆུ་བྱ་སྣ་ཚོགས་བཅས་པ་དང་། །དཔག་བསམ་ཤིང་དང་བུམ་པ་བཟང་། །མེ་ཏོག་སྣ་ཚོགས་ཀྱིས་ཁྱབ་པ། །རྡོ་རྗེའི་རྭ་བ་འོད་ཟེར་གྱིས། །ཕྲེང་བས་ཀུན་ནས་བསྐོར་བ་ཡི། །དབུས་དང་ཕྱོགས་བཞི་གཡས་གཡོན་དང་། །སྒོ་བཞི་པདྨ་ཟླ་བའི་གདན། །བུམ་པ་ཧཱུྃ་ལས་གཞལ་ཡས་ཁང་། །བཅུད་ནི་བོ་ལས་བདུད་རྩིའི་མཚོ། །དེ་ནང་པཾ་ལས་པད་འདབ་བཞི། །དབུས་དང་འདབས་བཞིར་ཟླ་བའི་གདན། །གཞལ་
ཡས་ཁང་གི་ཁྱམས་རྣམས་སུ། །གཏོར་མ་དཀར་གསུམ་བདུད་རྩིའི་མཚོ། །ཡིད་མཐུན་ལོངས་སྤྱོད་མཆོད་པའི་སྤྲིན། །ཀུན་ཏུ་བཟང་པོའི་རྣམ་ཐར་བཞིན། །ས་དང་བར་སྣང་གང་བར་གྱུར། །ཨོཾ་བཛྲ་སྤ་ར་ཎ་ཁཾ། བདག་བསྐྱེད་ཐུགས་ཀའི་འོད་ཟེར་གྱིས། །ལྷ་མོ་ལྔ་དང་མགྲོན་གྱི་ཚོགས། །སྤྱན་དྲངས་གདན་ལ་བཞུགས་པར་གྱུར། །ཧཱུྃ། མགོན་པོ་ཀུན་གཤེགས་ཐུགས་རྗེ་ཅན། །ད་ལྟ་སྙིགས་མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང་། །འདྲེན་པའི་བསྟན་པ་སྲུང་བ་དང་། །སེམས་ཅན་ཀུན་ལ་ཕན་གདགས་ཕྱིར། །རིག་པའི་རྒྱལ་མོ་ཆེན་མོ་ལྔ། །ཚངས་དང་བརྒྱ་བྱིན་རྒྱལ་ཆེན་བཞི། །རང་རང་འཁོར་ཚོགས་དཔུང་དང་བཅས། །མཆོད་པ་འབུལ་གྱིས་བཞེས་སླད་དུ། །སྐད་ཅིག་ཙམ་གྱིས་གཤེགས་སུ་གསོལ། །རྒྱལ་ཆེན་སྡེ་བཞི་བཀའ་འཁོར་ན། །དྲི་ཟ་གྲུལ་བུམ་ཀླུ་གནོད་སྦྱིན། །གདོན་རིགས་དུང་ཕྱུར་གྲངས་མེད་སྒྱུ་རྣམས། །མདོ་སྡེའི་ཞགས་པས་དྲངས་ནས་ཀྱང་། །སྐད་ཅིག་ཉིད་ལ་འདིར་ཁུག་ཅིག །ཛཧཱུྃ་བཾ་ཧོ༔ཏིཥྛ་ལྷན། །དཀྱིལ་འཁོར་དབུས་དང་བུམ་པའི་ནང་། །ལྷ་མོ་ལྔ་པོ་
བཞུགས་སུ་གསོལ། །རབ་འཕགས་མདུན་གྱི་བར་སྣང་ལ། །ཐུབ་སྐུ་གསེར་གྱི་ཁ་དོག་ལ། །མཚན་རྣམས་ཀྱིས་ནི་རབ་ཏུ་བརྒྱན། །མཆོད་རྟེན་རིང་བསྲེལ་འཕགས་པའི་ཚོགས། །གསེར་གྱི་མཆོད་སྡོང་དང་ཡང་འདྲ། །མེ་ཏོག་པདྨ་བཞིན་དུ་རྒྱས། །ཚངས་པས་སྤྲུལ་པའི་གཞལ་མེད་ཁང་། །རྡོ་རྗེའི་གདན་ལ་བཞུགས་སུ་གསོལ། །གཡས་གཡོན་ཚངས་དང་བརྒྱ་བྱིན་གཉིས། །ཐལ་མོ་སྦྱར་ནས་འཁོད་པར་གྱུར། །དཀྱིལ་འཁོར་ཆེན་པོའི་ཕྱོགས་བཞི་རུ། །དཔལ་དང་གཟི་བརྗིད་འབར་བ་ཡི། །རྒྱལ་པོ་ཆེན་པོ་དཔལ་དང་ལྡན། །ཤར་ཕྱོགས་ན་ནི་ཡུལ་འཁོར་སྲུང་། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་སྤྱན་མི་བཟང་། །བྱང་ཕྱོགས་ན་ནི་ལུས་ངན་པོ། །ཆོས་ཀྱི་གོ་ཆ་བསྒོས་གྱུར་ཏེ། །བཟང་པོའི་ཁྲི་ལ་བཞུགས་སུ་གསོལ། །དངོས་འབྱོར་ཡིད་ཀྱིས་རྣམ་སྤྲུལ་པའི། །མཆོད་སྤྲིན་རྒྱ་མཚོ་དཔག་མེད་མཆོད། །ཐུབ་པའི་དབང་པོ་མཆོད་རྟེན་བཅས། །ཕྱག་འཚལ་སྐྱེས་བུ་དཔལ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་འཚལ་བསྟོད། །རིག་པའི་རྒྱལ་མོ་ལྔ་པོ་དང་། །ཚངས་དང་
བརྒྱ་བྱིན་རྒྱལ་ཆེན་བཞི། །ཆོས་རྒྱལ་ཁྱོད་ལ་ཕྱག་འཚལ་བསྟོད། །རང་གི་ཐུགས་ཀའི་འོད་ཟེར་གྱིས། །བུམ་ནང་ལྷ་མོ་ལྔ་པོ་བསྐུལ། །སྐུ་ལས་བདུད་རྩིའི་རྒྱུན་བབས་པས། །བུམ་པ་བདུད་རྩིས་གང་བར་གྱུར། །ཨོཾ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་ས་རེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་ཨ་མྲྀ་ཏ་ཝ་རེ་ཝ་ར་པྲ་ཝ་ར་བི་ཤུདྡྷེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་མ་ཧཱ་མ་ཡུ་རི་བདུ་རཱཛཱི་ཧཱུྃ་ཧཱུྃ་ཕྲཊ་ཕྲཊ་སྭཱ་ཧཱ། ཨོཾ་བི་མ་ལེ་བི་པུ་ལེ་ཛ་ཡ་ཝ་རེ་ཨ་མྲྀ་ཏེ་བི་ར་ཛ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་བྷ་ར་བྷ་ར་སཾ་བྷ་ར་སཾ་བྷ་ར། ཨིནྡྲི་ཡ་ཝ་ལ་བི་ཤཱ་དྷ་ནི་རུ་རུ་ཙ་ལེ་ཧཱུྃ་ཧཱུྃ་ཕཊ་ཕཊ་སྭཱ་ཧུ། རེ་རེ་ལ་ཡང་བརྒྱ་རྩ་བརྒྱད་བཟླ། བུམ་ལྷ་འོད་དུ་ཞུ་ནས་བདུད་རྩིར་གྱུར་པར་བསམ། དེ་ནས་ནད་པ་མདུན་དུ་བཞག །ཙོག་པུར་རྐང་ལག་བསྣོལ་ཏེ་འདུག །སྐུད་པ་ཁྲ་བོས་གཉའ་བ་ནས། །སྲིན་ལག་གཉིས་དང་རྐང་པའི་མཐེབ། །གཉིས་བཏགས་སྐུད་པས་རྒྱ་གྲམ་བྲི། །ནད་གདོན་དུག་དང་བྱད་སྟེམས་སོགས། །སྐུད་པ་དེ་ལ་ཐིམ་པར་བསྒོམ། །ཤིང་སྣས་མེ་སྦར་དུད་པ་བཏང་། །སྦྱིན་སྲེག་བླངས་བར་གྱིས་ཟེར་དུས། །མཆོད་པའི་ཕུད་རྣམས་མེ་ལ་ཕུལ། །གཏོར་མ་ལྔ་པོ་འོ་མའམ། །ཆུ་གཙང་བྲན་ལ་ཨ་ཀཱ་རོ། །ལན་གསུམ་བརྗོད་པས་བྱིན་གྱིས་བརླབས། །ཧཱུྃ། རྫོགས་སངས་རྒྱས་དང་དེ་ཡི་སྲས། །
ཉན་ཐོས་དང་ནི་རང་སངས་རྒྱས། །རིག་པའི་རྒྱལ་མོ་ཆེན་མོ་ལྔ། །ཚངས་པ་དང་ནི་བརྒྱ་བྱིན་སོགས། །རིགས་བྱེད་ཀུན་གྱི་ཕ་རོལ་ཕྱིན། །སྐྱེ་བོ་དགའ་མཛད་སྨན་པའི་རྗེ། །འཇིག་རྟེན་ཐམས་ཅད་གསོ་མཛད་པ། །གནོད་སྦྱིན་སྲིན་པོ་གང་དག་རྣམས། །ཕྱོགས་དང་ཕྱོགས་མཚམས་གནས་པ་དང་། །ས་ཡི་འོག་དང་ས་ཡི་སྟེང་། །ནམ་མཁའ་དག་ལ་གནས་པའི་གདོན། །ཐམས་ཅད་གཏོར་མ་འདི་བཞེས་ལ། །ནད་གདོན་བྱད་སྟེམས་དུག་རྣམས་སོལ། །ན་མསརྦ་བུདྡྷ་བྷྱོ་དྷི་སཏཱ་དེ་ཝ་པཉྩལོ་ཀ་པཱ་ལ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་བརྗོད། གཏོར་མ་ལག་ཏུ་ཐོགས་ནས། ནད་པ་ལ་གཡས་གཡོན་དུ་བསྐོར་ཞིང་། དེ་བཞིན་གཤེགས་པའི་མཚན་དང་། སྟོབས་དང་། དབང་ཕྱུག་དང་བྱིན་གྱིས་རླབས་ཀྱིས་བསྲུང་བྱ་འདི་བདེ་ལེགས་སུ་གྱུར་ཅིག་སྭཱ་ཧཱ། ཕྱོགས་ཐམས་ཅད་དུ་བདེ་ལེགས་སུ་གྱུར་ཅིག་སྭཱ་ཧཱ། དེ་ནས་དབུས་ཀྱི་གཏོར་མ་ཁང་སྟེང་ངམ་གུང་ཁར་ཕུལ་བཅུག །ཕྱེ་མར་སོགས་མེ་ནང་དུ་མཆོད་བཅུག་ཅིང་། ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་དབང་ཕྱུག་དང་། །གནོད་སྦྱིན་སྡེ་དཔོན་ཐམས་ཅད་དང་། །འཕྲོག་མའི་བུ་དང་བཅས་པ་
ཡང་། །བདག་གི་མེ་ཏོག་སྤོས་དག་དང་། །སྦྱིན་སྲེག་འདི་ནི་བླངས་བར་གྱིས། །དེ་དག་གིས་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །ནད་རྣམས་ཐམས་ཅད་བཅོམ་པར་འགྱུར། །བསྲུང་བྱ་འདི་ཡི་འཇིགས་པ་དང་། །གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། རྒྱལ་པོ་ཡུལ་འཁོར་སྲུང་བ་ཡང་། །མེ་ཏོག་ཚོགས་ལྟར་རྒྱས་གྱུར་ཅིག །ཀ་ལ་པིང་ཀའི་སྒྲ་དབྱངས་ཅན། །ཁུ་བྱུག་དང་ནི་རྨ་བྱའི་སྒྲ། །རྔ་དང་འབྲུག་གི་སྒྲ་སྒྲོག་པ། །ཐུབ་ཆེན་གནོད་སྦྱིན་སྲིན་པོ་དང་། །དྲི་ཟ་སྟོང་ཕྲག་དྲུག་ཅུ་བཞི། །ཤར་གྱི་ཕྱོགས་ཆའི་ཕྱོགས་ན་གནས། །འཁོར་བཅས་གཏོར་མ་འདི་བཞེས་ལ། །དྲི་ཟ་ལས་གྱུར་ནད་དང་གདོན། །ཐམས་ཅད་ཞི་ཞིང་མེད་པར་མཛོད། །ཨོཾ་དྷྲྀ་ཏ་རཱཥྛ་ཡ་ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་བྱ། དེ་ནས་གཏོར་མ་ལག་ཏུ་ཐོགས་ལ་ནད་པ་ལ་གཡས་གཡོན་དུ་བསྐོར་ཞིང་། རྒྱལ་པོ་ཆེན་པོ་ཡུལ་འཁོར་སྲུང་གི་མིང་དང་། སྟོབས་དང་། དབང་ཕྱུག་དང་། བྱིན་གྱིས་བརླབས་ཀྱིས་བསྲུང་བྱ་འདི་ཡི་གདོན་ཐམས་ཅད་དང་། གནོད་པ་ཐམས་ཅད་ལས་
ཐར་བར་གྱུར་ཅིག་སྭཱ་ཧཱ། བསྲུང་བྱ་འདི་ཤར་ཕྱོགས་སུ་བདེ་ལེགས་སུ་གྱུར་ཅིག་སྭཱ་ཧཱ། ཞེས་ཤར་ཕྱོགས་སུ་ཕུལ་ལ་ཙཀ་ལི་ཚུར་བླང་། ཡང་མཆོད་པ་བྱ། ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་དབང་ཕྱུག་དང་། །གནོད་སྦྱིན་སྡེ་དཔོན་ཐམས་ཅད་དང་། །འཕྲོག་མའི་བུ་དང་བཅས་པ་ཡང་། །བདག་གི་མེ་ཏོག་སྤོས་དག་དང་། །སྦྱིན་སྲེག་འདི་ནི་བླང་བར་གྱིས། །དེ་དག་གིས་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །ནད་རྣམས་ཐམས་ཅད་བཅོམ་པར་འགྱུར། །བསྲུང་བྱ་འདི་ཡི་འཇིགས་པ་དང་གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། །རྒྱལ་པོ་ཆེན་པོ་འཕགས་སྐྱེས་པོ། །གྲུམ་བུམ་ཡི་དྭགས་སྲུལ་པོ་དག །སྟོང་ཕྲག་བརྒྱད་ཅུ་རྩ་བཞི་རྣམས། །ལྷོ་ཕྱོགས་ཆ་ཡི་ཕྱོགས་ན་གནས། །འཁོར་བཅས་གཏོར་མ་འདི་བཞེས་ལ། །གཤིན་རྗེ་གྲུལ་བུམ་ལས་གྱུར་པའི། །ནད་གདོན་གནོད་པ་མེད་པར་མཛོད། །ཨོཾ་བེ་རུ་ཌྷ་ཀཱ་ཡེ་ས་པ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཅེས་ལན་གསུམ་མམ་བདུན་བརྗོད་ལ། གཏོར་མ་སྔར་ལྟར་ནད་པ་ལ་བསྐོར་ཞིང་། རྒྱལ་པོ་ཆེན་པོ་འཕགས་སྐྱེས་པོ་ཡི་མིང་དང་། སྟོབས་དང་།
དབང་ཕྱུག་དང་བྱིན་གྱིས་བརླབས་ཀྱིས། བསྲུང་བྱའི་གདོན་དང་གནོད་པ་ཐམས་ཅད་ཞི་བར་གྱུར་ཅིག་སྭཱ་ཧཱ། བསྲུང་བྱ་ལྷོ་ཕྱོགས་སུ་བདེ་ལེགས་སུ་གྱུར་ཅིག་སྭཱ་ཧཱཿ ཅེས་ལྷོ་ཕྱོགས་སུ་ཕུལ། ཡང་མཆོད་པ་བྱ། ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་དབང་ཕྱུག་དང་། །གནོད་སྦྱིན་སྡེ་དཔོན་ཐམས་ཅད་དང་། །འཕྲོག་མའི་བུ་དང་བཅས་པ་ཡང་། །བདག་གི་མེ་ཏོག་སྤོས་དག་དང་། །སྦྱིན་སྲེག་འདི་ནི་བླང་བར་གྱིས། །དེ་དག་གིས་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །ནད་རྣམས་ཐམས་ཅད་བཅོམ་པར་འགྱུར། །བསྲུང་བྱ་འདི་ཡི་འཇིགས་པ་དང་། །གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། རྒྱལ་པོ་མིག་མི་བཟང་བ་ཡང་། །ཀླུ་དང་འདབ་བཟང་གསང་བ་སོགས། །སྟོང་ཕྲག་དྲུག་ཅུ་རྩ་བཞི་དག །ནུབ་ཀྱི་ཕྱོགས་ཀྱི་ཆ་ལ་གནས། །འཁོར་བཅས་གཏོར་མ་འདི་བཞེས་ལ། །ཀླུ་ལས་གྱུར་པའི་ནད་དང་གདོན། །ཐམས་ཅད་ཞི་ཞིང་མེད་པར་མཛོད། །ཨོཾ་བྷེ་རུ་པཀྵ་ཡེ། ས་པ་རི་ཝཱ་ར་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ཞེས་གསུམ་མམ་བདུན་བརྗོད། གཏོར་མ་ལག་ཏུ་ཐོགས་ལ་
ནད་པ་ལ་བསྐོར་ཞིང་། རྒྱལ་པོ་ཆེན་པོ་མིག་མི་བཟང་གི་མིང་དང་། སྟོབས་དང་། དབང་ཕྱུག་དང་། བྱིན་གྱིས་བརླབས་ཀྱིས་བསྲུང་བྱ་འདི་རྣམས་བདེ་ལེགས་སུ་གྱུར་ཅིག་སྭཱ་ཧཱ། བསྲུང་བྱ་ནུབ་ཕྱོགས་སུ་བདེ་ལེགས་སུ་གྱུར་ཅིག་སྭཱ་ཧཱ། ཞེས་ནུབ་ཕྱོགས་སུ་ཕུལ། ཡང་མཆོད་པ་གཅིག་བྱ། ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་དབང་ཕྱུག་དང་། །གནོད་སྦྱིན་སྡེ་དཔོན་ཐམས་ཅད་དང་། །འཕྲོག་མའི་བུ་དང་བཅས་པ་ཡང་། །བདག་གི་མེ་ཏོག་སྤོས་དག་དང་། །སྦྱིན་སྲེག་འདི་ནི་བླང་བར་གྱིས། །དེ་དག་གིས་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །ནད་རྣམས་ཐམས་ཅད་བཅོམ་པར་འགྱུར། །བསྲུང་བྱ་འདི་ཡི་འཇིགས་པ་དང་གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། རྒྱལ་པོ་ཆེན་པོ་རྣམ་ཐོས་བུ། །གནོད་སྦྱིན་གསང་སྔགས་མི་མཛད་ཅན། །སྟོང་ཕྲག་དྲུག་ཅུ་རྩ་བཞི་དག །བྱང་གི་ཕྱོགས་ཆའི་ཕྱོགས་ན་གནས། །འཁོར་བཅས་གཏོར་མ་འདི་བཞེས་ལ། །གནོད་བྱེད་ལས་གྱུར་ནད་དང་གདོན། །ཐམས་ཅད་ཞི་ཞིང་མེད་པར་མཛོད། །ཨོཾ་བཻ་ཤྲ་ཝ་ཎ་ཡ་ས་པ་རི་ཝཱ་ར་ཨི་དཾ་བྷ་ལི་
ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མམ་བདུན་བརྗོད་ལ། གཏོར་མ་བཟུང་ལ་ནད་པ་ལ་བསྐོར་ཞིང་། རྒྱལ་པོ་ཆེན་པོ་རྣམ་ཐོས་ཀྱི་བུ་ཡི་མིང་དང་། སྟོབས་དང་། དབང་ཕྱུག་དང་། བྱིན་གྱིས་བརླབས་ཀྱིས་བསྲུང་བྱ་འདི་བདེ་ལེགས་སུ་གྱུར་ཅིག་སྭཱ་ཧཱ། བསྲུང་བྱ་བྱང་ཕྱོགས་སུ་བདེ་ལེགས་སུ་གྱུར་ཅིག་སྭཱ་ཧཱ། ཞེས་གཏོར་མ་བྱང་དུ་ཕུལ། སླར་ཡང་མཆོད་པ་བྱེད་ཅིང་། ཚངས་པ་དང་ནི་བརྒྱ་བྱིན་དང་། །འཇིག་རྟེན་སྐྱོང་དང་དབང་ཕྱུག་དང་། །གནོད་སྦྱིན་སྡེ་དཔོན་ཐམས་ཅད་དང་། །འཕྲོག་མའི་བུ་དང་བཅས་པ་ཡང་། །བདག་གི་མེ་ཏོག་སྤོས་དག་དང་། །སྦྱིན་སྲེག་འདི་ནི་བླང་བར་གྱིས། །དེ་དག་གིས་ནི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །ནད་རྣམས་ཐམས་ཅད་བཅོམ་པར་འགྱུར། །བསྲུང་བྱ་འདི་ཡི་འཇིགས་པ་དང་གནོད་པ་ཐམས་ཅད་ལས་བདེ་ལེགས་སུ་གྱུར་ཅིག་སྭཱ་ཧཱ། དེ་ནས་རལ་གྲི་ལག་ཏུ་ཐོགས་ལ། གང་དག་སངས་རྒྱས་རང་སངས་རྒྱས། །སངས་རྒྱས་རྣམས་དང་ཉན་ཐོས་དང་། །ཚངས་དབང་དང་ནི་འཇིག་རྟེན་སྐྱོང་། །གནོད་སྦྱིན་སྡེ་དཔོན་དབང་ཕྱུག་དང་། །དེ་བཞིན་གནོད་སྦྱིན་སྟོབས་ཆེན་དང་། །
འཕྲོག་མ་བུ་དང་བཅས་པ་ཡང་། །དེ་དག་མཐུ་དང་གཟི་བརྗིད་ཀྱིས། །རོ་ལངས་ལས་ཀྱང་ཆད་གྱུར་ཅིག །རྡོ་རྗེས་རིན་ཆེན་ཕུག་པ་དང་། །མེ་ཡིས་བུད་ཤིང་བསྲེགས་པ་དང་། །རླུང་གིས་སྤྲིན་ནི་འཐོར་བ་དང་། །ཉི་མས་ནགས་ཚལ་སྐེམ་བྱེད་པ། །བདེན་པའི་ཚིག་ནི་འདི་དག་གིས། །བྱད་སྟེམས་ལས་རྣམས་ཚིམ་པར་ཤོག །རྒྱས་པར་བུམ་བསྐྱེད་སྐབས་ཀྱི་སྔགས་ལྔ་སྦྲེལ། འབྲིང་པོ་བདག་བསྐྱེད་སྐབས་ཀྱི་སྔགས་ལྔ་སྦྲེལ། བསྡུ་ན་ནི། ཨོཾ་མ་ཎི་དྷ་རི་བདྲི་ཎཱི་མ་ཧཱ་པྲ་ཏི་ས་རེ་ཧཱུྃ་ཧཱུྃ་ཕྲཊ་ཕྲཊསྭཱ་ཧཱ། ཨོཾ་ཧཱུྃ་སྭཱ་ཧཱ། ཨོཾ་ཨཾ་སྭཱ་ཧཱ། ཨོཾ་ཧཱུྃ་སྭཱ་ཧཱ། ཨོྃ་ཛ་སྭཱ་ཧཱ། ཞེས་པ་ལྷ་མོ་ལྔའི་སྔགས་བསྡུས་པ་དང་། ཨོཾ་སརྦ་བྷན་ཀ་ཁོརྡ་ཙྪེ་ད་ན་ཡེ་སྭཱ་ཧཱ། ཞེས་པ་ཅི་མང་བརྗོད་ཅིང་ཚོན་སྐུད་གྲི་ཡིས་བཅད་ལ་བཀྲོལ་ལ། སྔགས་རྗེས་མ་བཟླ་ཞིང་དུམ་བུ་མང་དུ་གཏུབས། ཡོད་ན་ཡུངས་ཀར་མེད་ན་འབྲུ་གང་འཛོམ་དང་མཉམ་དུ་སྐུད་དུམ་གོང་གི་ལྷ་མོ་ལྔའི་སྔགས་མཇུག་ཏུ། ནད་གདོན་སརྦ་ཛྭ་ལ་རཾ་ཤཱནཾ་ཀུ་རུ་ཡེ་སྭཱ་ཧཱ། ཞེས་བདུན་ནམ་ཉེར་གཅིག་གི་སྦྱིན་སྲེག་གིས་མེ་ནང་དུ་བསྲེགས་ལ། ལྷ་ཐམས་ཅད་ཀྱིས་གསང་སྔགས་འདི་དག་གི་བྱད་དང་། རོ་ལངས་དང་། སྨན་དང་། སྔགས་དང་། དུག་དང་། དུག་སྦྱར་མ་རྣམས་བཅད་དོ། །བཤིག་
གོ། །ཕམ་པར་བྱས་སོ། །སྭཱ་ཧཱ། ལྔ་བ་དང་། ཤུ་བ་དང་། སྨྱོ་བ་དང་། འབྲས་དང་། འབྲུམ་བུ་དང་། རྐང་འབམ་དང་། དུག་འཐུང་བ་ལས་ཐར་བར་འཚལ་ལོ། །ཞེས་བརྗོད་ལ་ནས་འཐོར། དེ་ནས་བུམ་པ་ལག་ཏུ་ཐོགས་ལ། སངས་རྒྱས་ཀུན་གྱི་གཟི་བརྗིད་དང་། །རང་རྒྱལ་དག་གི་གཟི་བརྗིད་དང་། །དགྲ་བཅོམ་རྣམས་ཀྱི་མཐུ་དག་དང་། །གསང་སྔགས་འཛིན་པ་ཐམས་ཅད་དང་། །ཤཱ་རིའི་བུ་ཡི་ཤེས་རབ་དང་། །མོའུ་འགལ་བུ་ཡི་རྫུ་འཕྲུལ་དང་། །མ་འགགས་པ་ཡི་མིག་དང་ནི། འོད་སྲུང་སྦྱངས་བའི་ཡོན་ཏན་དང་། །ཀཽཎྜི་ནྱ་ཡི་སྔར་ཐོབ་དང་། །ཀུན་དགའ་བོ་ཡི་ཐོས་པ་དང་། །ཚངས་པ་ཡི་ནི་བྱམས་པ་དང་། །བརྒྱ་བྱིན་གྱི་ནི་དབང་རྣམས་དང་། །འཇིག་རྟེན་སྐྱོང་བའི་ཡུལ་རྣམས་དང་། །དབང་ཕྱུག་ཆེན་པོའི་སྟོབས་དག་དང་། །སྡེ་དཔོན་རྣམས་ཀྱི་མཐུ་དང་ནི། །འཕྲོག་མའི་གཟི་བརྗིད་རྫུ་འཕྲུལ་དང་། །དེ་དག་རྣམས་ཀྱི་མཐུ་དང་གཟིས། །བསྲུང་བྱ་འདི་ཡི་ནད་དང་གདོན། །འབྱུང་པོའི་དུག་ནི་དུག་མེད་ཤོག །དུག་མེད་དུག་རྣམས་དག་གྱུར་ཅིག །གོང་གི་རྩ་སྔགས་ལྔའི་མཇུག་ཏུ། ༀ་ཨེ་ཧོ་ཤུདྡྷེ་
ཤུདྡྷེ། ཡཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། བཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། ཨེ་ཡཾ་རཾ་བཾ་ལཾ། ཙིཏྟ་བི་ཤུདྡྷེ་ཨ་ཨཱཿ་སྭཱ་ཧཱ། ཞེས་བརྗོད་ཅིང་ཡན་ལག་ལྔ་ཁྲུས་བྱ། བུམ་ཆུ་བཏུང་། དེ་ནས་ཚིག་རེའི་མཚམས་སུ་སྔགས་རེ་བརྗོད་ཅིང་མེ་ལོང་ངོས་ནས་ཁྲུས་རེ་བྱ། འབྲས་དང་རྨ་དང་ཤུ་བ་དང་། །གཡན་པ་དང་ནི་འབྲུམ་བུ་དང་། །ལྡོག་པ་དང་ནི་གཡའ་བ་ཡི། །ནད་སོགས་གནོད་པ་རབ་ཏུ་བཅོམ། །སྔགས་དང་ཁྲུས་བྱ། འདོད་ཆགས་ཞེ་སྡང་གཏི་མུག་གསུམ། །དེ་དག་འཇིག་རྟེན་དུག་གསུམ་ཏེ། །སངས་རྒྱས་ཆོས་དང་དགེ་འདུན་གསུམ། །དཀོན་མཆོག་གསུམ་ལ་དུག་མི་མངའ། །དཀོན་མཆོག་གཟི་ཡིས་དུག་བཅོམ་མོ། །དུག་རྣམས་གཏན་ནས་དག་གྱུར་ཅིག །སྔགས་དང་ཁྲུས་བྱ། འབྱུང་བཞི་དུག་གི་ཕ་ཡིན་ཏེ། །འབྱུང་བཞི་དུག་གི་མ་ཡང་ཡིན། །བདེན་པའི་བདེན་ཚིག་འདི་དག་གིས། །བསྲུང་བྱའི་དུག་ནི་དུག་མེད་ཤོག །དུག་རྣམས་གཏན་ནས་དག་གྱུར་ཅིག །འབྱུང་བཞི་དུག་གི་མ་ཡིན་ཏེ། །འབྱུང་བཞི་དུག་གི་ཕ་ཡང་ཡིན། །བདེན་པའི་བདེན་ཚིག་འདི་དག་གིས། །དུག་ནི་ས་ཡི་ནང་དུ་སོང་། །གང་བའི་སྣོད་དུ་དུག་སོང་ཞིག་སྭཱ་ཧཱ། ཞེས་རྡོ་རྗེ་དང་སྒྲོ་མདངས་
ཀྱིས་བྱབ་པའི་ཚུལ་བྱས་ལ། ཞེས་ཁྲུས་ཆུ་ས་ཡི་ནང་དུ་བླུགས་བཅོལ། དེ་ནས་ལག་གཡོས་རྡོ་རྗེ་ཕྱར་ཞིང་། སངས་རྒྱས་རྣམས་ཀྱི་གཟི་བརྗིད་དང་། །གཙུག་ཏོར་ཅན་གྱི་སྟོབས་རྣམས་དང་། །ཐམས་ཅད་སྐྱོབ་པའི་བདེན་ཚིག་དང་། །ལོག་པར་དད་སེལ་ཏིང་འཛིན་དང་། །གསེར་ཞེས་བྱ་བའི་ཡེ་ཤེས་དང་། །འོད་སྲུང་གི་ནི་རྫུ་འཕྲུལ་དང་། །ཤཱཀྱ་སེང་གེའི་མཐུ་རྣམས་དང་། །རླུང་ལས་གྱུར་དང་མཁྲིས་ལས་གྱུར། །བད་ཀན་ལས་གྱུར་འདུས་ལས་གྱུར། །ནད་རྣམས་ཐམས་ཅད་རབ་བཅོམ་སྟེ། །འདི་ལ་རྟག་ཏུ་བདེ་ལེགས་ཤོག །བདེན་པའི་བདེན་ཚིག་འདི་དག་གིས། །ནད་པ་རྣམས་ནི་ནད་སེལ་ཞིང་། །ཉེས་པ་ཐམས་ཅད་འཕྲོག་བྱེད་པ། །བསྲུང་བ་བདུད་རྩིར་འགྱུར་བར་ཤོག །དེ་ནས་རྡོ་རྗེ་མགོར་བཞག་ལ། ཚངས་པ་དང་། བརྒྱ་བྱིན་དང་། །རྒྱལ་པོ་ཆེན་པོ་བཞི་དང་། དབང་ཕྱུག་ཆེན་པོ་དང་། གནོད་སྦྱིན་གྱི་སྡེ་དཔོན་དང་། གནོད་སྦྱིན་སྟོབས་པོ་ཆེ་དང་། འཕྲོག་མ་ཀླུ་ལ་སོགས་པའི་མིང་གིས་དཀོན་མཆོག་གསུམ་ལ་མཆོད་པར་བགྱིའོ། །དེ་རྣམས་སྟོབས་དང་དབང་ཕྱུག་དང་། གཟི་བྱིན་གྱིས་འདི་ལ་བདེ་ལེགས་སུ་གྱུར་ཅིག །འདི་ལ་བསྲུང་
བར་གྱིས་ཤིག །དེ་ནས་ལྷ་མོ་ལྔ་པོ་སོ་སོའི་སྔགས་མཇུག་ཏུ། ལྷ་ལྔའི་སྔགས་ནི། ༀ་ཨཱཿཔྲ་ཏི་ས་རེ་པྲ་ཧཱུྃ། ཨོཾ་ཨཱཿམ་ཧཱ་ས་ཧ་སྲ་པྲ་མརྡ་ནི་ཧཱུྃ་ཧཱུྃ། ཨོཾ་ཨཱཿ་མ་ཧཱ་མ་ཡུ་རི་མཾ་ཧཱུྃ། ཨོཾ་ཨཱཿམ་ཧཱ་མནྟྲ་ཨ་ནུ་དྷ་རི་ཧཱུྃ་ཧཱུྃ། ཨོཾ་ཨཱཿམ་ཧཱ་ཤཱི་ཏ་བ་རི་ཛཿཧཱུྃ། ཨོཾ་བཛྲ་རཀྵ་རཀྵ་ཧཱུྃ༔ ཞེས་བརྗོད་ཅིང་མགོ་དང་རྐང་ལག་བཞིར་རྡོ་རྗེ་བསྣོལ་མར་བཞག །དེ་ནས་མེ་ཏོག་གཏོར་ཞིང་། སངས་རྒྱས་རྣམས་ཀྱིས་བདུད་ཕམ་མཛད། །ཆོས་མ་ཡིན་ནི་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་གྱུར། །ལྷ་མིན་རྣམས་ཀྱིས་ཟླ་བ་ཕམ། །ནམ་མཁའ་ལྡིང་གིས་རྒྱ་མཚོ་ཕམ། །མེས་ནི་ཤིང་རྣམས་ཕམ་པར་གྱུར། །ཆུས་ནི་མེ་རྣམས་ཕམ་པར་འགྱུར། །རླུང་གིས་སྤྲིན་རྣམས་རབ་ཏུ་ཕམ། །རྡོ་རྗེ་ཡིས་ནི་རིན་ཆེན་ཕམ། །ལྷ་རྣམས་བདེན་པར་རབ་ཏུ་གནས། །ས་ཡང་བདེན་པར་གནས་པ་ལགས། །སངས་རྒྱས་དང་ནི་ཆོས་ཀྱང་བདེན། །བདེན་པ་རྒྱལ་གྱུར་རྫུན་མ་ལགས། །བདེན་པའི་བདེན་ཚིག་འདི་དག་གིས། །བསྲུང་བྱ་འདི་ལ་ནད་དང་གདོན། །ཕྱིར་རྒོལ་བ་ནི་ཀུན་ལས་རྒྱལ། །སྡིག་པ་ཐམས་ཅད་རབ་ཏུ་ཕམ་སྭཱ་ཧཱ། ལྷ་མོ་ལྔ་ཡི་སྔགས་མཇུག་ཏུ། ཛ་ཡེ་
སྭཱ་ཧཱ། བི་ཛ་ཡེ་སྭཱ་ཧཱ། ཛ་ཡེ་བི་ཛ་ཡེ་སྭཱ་ཧཱ། ཞེས་མེ་ཏོག་འཐོར་རོ། །དེ་ནས་རྗེས་ཆོག་སྤྱི་ལྟར་བྱའོ། །དེས་སྲུང་བ་ལྔའི་ཆོ་ག་རྫོགས་སོ།། །།འདིའི་དབང་བསྐུར་བར་འདོད་ན། སྐུ་གསུང་ཐུགས་ཀྱི་རྗེ་གནང་སྤྱི་ལྟར་ལས། བཀྲ་ཤིས་རྫས་རྟགས་གང་རུང་གིས་མཐའ་བརྟེན་ནས། གཏོར་མའི་བཀའ་བསྒོ་བ་ཡང་བྱའོ། །དེ་ཡང་གཟུངས་ཆེན་སྡེ་ལྔ་ལས། ནད་པ་རྣམས་ནི་གསོ་བྱ་བ། །དེ་ནས་རབ་ཏུ་ཤེས་པར་བྱ། །ཞེས་སོགས་དང་། སྤོས་ཆབ་སྣ་ཚོགས་སྦྱར་བྱས་ཏེ། །བུམ་པ་ཆེན་པོའི་ནང་དུ་བླུགས། །གང་བྱད་སྟེམས་ཀྱིས་ཕོག་པ་དེ། སྐུད་པ་དེས་བཅིངས་ཏེ། བུམ་པའི་ཆབ་ཀྱིས་བཀྲུ་བར་བགྱིའོ། །སྐུད་པ་ཡང་མཚོན་གྱིས་བཅད་དེ། ཞུགས་ཀྱི་ནང་དུ་དོར་བར་བྱའོ། །ཞེས་དང་། བསྐྱེད་པ་ཙམ་དང་། རྡོ་རྗེས་བྱབ་པ་ཙམ་གྱིས་དུས་མ་ཡིན་པ་འཆི་བ་དང་། ནད་ཆེན་པོ་ལས་ཡོངས་སུ་ཐར་བར་འགྱུར་རོ། །དེའི་ནད་ཐམས་ཅད་ཀྱང་རབ་ཏུ་ཞི་བར་འགྱུར་རོ། །རྒྱུན་རིང་དུ་ན་བ་ལ་བྱབས་པ་ཙམ་གྱིས་རབ་ཏུ་ཞི་བར་འགྱུར་རོ། །ཞེས་གསུངས་སོ།། ༈ ཨེ་མ། ཐུབ་པའི་བཀའ་དངོས་བྱིན་རླབས་ནུས་ལྡན་འདི། །ཟབ་ཀྱང་སྔོན་ཆད་སུས་ཀྱང་མ་བསྒྲིགས་ལུས། །ལྕགས་ཕོ་ཁྱི་ལོ་སྟག་ཟླའི་ཉ་བསྐོར་ནས། །གྲྭ་ལྔ་གཅིག་ཤེས་ཀུན་གྲོལ་རྡོར་ཕྲེང་དང་། །དེ་བཞིན་སྒྲུབ་ཐབས་རྒྱ་མཚོ་བརྒྱ་རྩ་དང་། །མི་ཏྲ་བརྒྱ་རྩ་ལ་སོགས་གོ་བསྟུན་ནས། །སྔགས་དང་ཞལ་ཕྱག་ལ་སོགས་ཞུ་དག་བྱས། །བསྒྲིགས་པ་རུང་དང་མི་
རུང་ཐེ་ཚོམ་པས། །ཞག་མང་ལུས་ཚེ་ཡར་ངོའི་ཚེས་བཅུ་ནུབ། །ཚོགས་དང་མཆོད་པ་ལ་སོགས་གཟབ་པའི་ཚེ། །མཛེས་སྡུག་ལྟ་ན་སྡུག་པའི་བུ་མོ་ལྔས། །འཛུམ་ཞིང་འཇིགས་པའི་འཕྲང་ལས་སྒྲོལ་བར་རྨིས། །ཕྱིར་ནངས་ཉིད་ནས་གསར་དུ་བརྩམ་འདོད་སྐྱེས། །བྲིས་པས་དེ་ཉིན་ཉིད་ལས་ལེགས་པར་འགྲུབ། །ཐུབ་པའི་བཀའ་ལ་བར་ཆོད་མ་ལགས་སོ། །འོན་ཀྱང་ཉེས་པར་གྱུར་ན་འཆགས་བགྱི་ཞིང་། །ཕྱི་རབས་ནད་པ་ཀུན་ལ་ཕན་པར་ཤོག །ཅེས་པ་འདི་ནི་༧ རཱ་ག་ཨ་སྱས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།