ནད་གདོན་ཀུན་སེལ་རིམ་གྲོ་གཏོར་འབུལ།
ནད་གདོན་ཀུན་སེལ་རིམ་གྲོ་གཏོར་འབུལ་ཞེས་བྱ་བ་བཞུགས་སོ༔ ཀེ་ཀེ་རུའི་རྒྱ་ཅན་ལེགས་པར་སྣང་ངོ་༔
ན་མོ་གུ་རུ་དྷེ་ཝ་ཌཱཀྐི་ནཱི་ཡེ༔ པད་འབྱུང་འཆི་བ་མེད་ལ་ཕྱག་འཚལ་ལོ༔ སྙིགས་དུས་འགྲོ་ལ་ཕན་པར་བྱ་བའི་ཕྱིར༔ ནད་གདོན་ཀུན་སེལ་རིམ་གྲོ་གཏོར་འབུལ་ནི༔ གབ་འཁྲུགས་བསལ་ཏེ་སྤྲུལ་སྐུའི་གསུངས་བཞིན་བཀོད༔ ཆོས་བདག་སྲུང་མས་བཀའ་ཡི་གནང་བ་སྩོལ༔ སྤྲུལ་པའི་རིག་འཛིན་མི་འགྱུར་རྡོ་རྗེ་དེ༔ དགུང་ལོ་དགུ་ནི་བཞེས་པའི་དུས་ཚོད་ལ༔ ཟངས་རི་འབར་བ་རྩེ་དགུའི་ཉེ་ལོགས་སུ༔ ཉམས་དང་རྨི་ལམ་འདྲེས་པའི་སྐབས་ཤིག་ན༔ གནོད་སྦྱིན་དམར་པོ་ཤན་པ་དམར་ནག་དེ༔ རྒྱན་དང་ཆ་ལུགས་ཡོངས་སུ་རྫོགས་པར་བྱུང་༔ འདི་ལྟར་རིམ་གྲོ་འདི་ཉིད་ལུང་བསྟན་ནས༔ འདི་ཡིས་ནད་རིགས་གདོན་རིགས་ཐམས་ཅད་ལ༔ ཕན་པར་འགྱུར་ཞེས་ལུང་དུ་བསྟན་པ་སྟེ༔ ཐུགས་ཐོག་ཉིད་
ནས་ལན་འགའ་མཛད་པས་ཀྱང་༔ རྟེན་འབྲེལ་ལེགས་ཤིང་ཕན་ཐོགས་ཆེ་བར་བྱུང་༔ དེ་ནས་དགུང་ལོ་བཅུ་གཅིག་ལོན་པའི་དུས༔ གཞུང་གི་རྩ་ཚིག་ཡི་གེར་བཀོད་ན་ཡང་༔ རྒྱུད་ཚིག་འདྲ་བས་ཕྱག་ལེན་ཐེབས་པར་དཀའ༔ དེ་ནས་སྤྲུལ་སྐུའི་གསུངས་བཞིན་ཕྱག་ལེན་བཅས༔ འདི་ནི་ཤིན་ཏུ་གསལ་བར་བྲིས་པའོ༔ དང་པོ་དཀྱིལ་འཁོར་རབ་ནི་རྡུལ་ཚོན་ཏེ༔ རས་བྲིས་སམ་ནི་ཤོག་བུར་བྲིས་ཀྱང་རུང་༔ དེ་ཡང་རྒྱས་བསྡུས་འབྲིང་པོའི་བྲི་ལུགས་གསུམ༔ པདྨ་འདབ་བཞི་ལྟེ་བ་མཐིང་ཀ་ལ༔ ཤར་དཀར་ལྷོ་སེར་ནུབ་དམར་བྱང་ལྗང་བ༔ མཚམས་བཞིར་པད་ཚབ་སྔོན་པོ་བྱ་བ་སྟེ༔ ཤར་གྱི་པད་ཤུན་དམར་པོ་བྱ་བ་སྟེ༔ ལྷོ་ཡི་པད་ཤུན་ལྗང་གུ་བྱ་བ་ཉིད༔ ནུབ་ཀྱི་པད་ཤུན་དཀར་ཞིང་བྱང་ཤུན་སྔོ༔ དེ་རྒྱབ་པདྨའི་གོང་རས་ནག་
པོ་བྱ༔ དེ་རྒྱབ་དུར་ཁྲོད་བཀོད་པ་ཚང་བ་དང་༔ དེ་རྒྱབ་རྡོ་རྗེའི་ར་བ་མེ་རི་བྲི༔ འབྲིང་ནི་ལས་བཞི་རྡོ་ར་མེ་རིས་བསྐོར༔ བསྡུས་པ་འདབ་བཞི་མུ་ཁྱུད་སེར་པོས་བསྐོར༔ འདབ་བཞི་བྲི་ལུགས་ཚོན་སོགས་གོང་དང་མཐུན༔ དཀྱིལ་འཁོར་ལྟེ་བར་ལྷ་བཤོས་གཅིག་བཞག་སྟེ༔ འདབ་བཞི་ཤར་སྟེང་སྣོད་ནང་དཀར་གཏོར་གཅིག༔ ལྷོ་རུ་རྟ་དང་ནུབ་ཏུ་དམར་གཏོར་དང་༔ བྱང་དུ་མཛོ་མོའི་གཟུགས་རྣམས་ཟན་ལ་བྱ༔ དཀྱིལ་འཁོར་ནུབ་ངོས་དུར་ཁྲོད་སྟེང་དུ་ནི། བུམ་པ་ཁ་རྒྱན་བཅས་པ་བཤམས་པ་རྣམས༔ དཀྱིལ་འཁོར་དེ་ནི་རང་གི་གཡས་སུའོ༔ རང་གི་གཡོན་ངོས་སྣོད་ནི་གཙང་མ་རུ༔ དབུས་སུ་གཏོར་མ་སྟོད་ཟུར་གསུམ་པ་ལ༔ མར་གྱི་བརྒྱན་བཏགས་དེ་ཡི་གཏོར་རྒྱན་ལ༔ ཤར་དུ་ཤོག་དཀར་གཡས་སུ་ཤོག་ནག་དང་༔ རྒྱབ་ཏུ་ཤོག་དམར་བྱང་དུ་ཤོག་ལྗང་དང་༔ སྟེང་དུ་ཤོག་སེར་དུམ་རེ་སྟོད་དུ་སྦྱར༔ དེ་ཡི་ཤར་དུ་ཟན་ལ་པར་བཏབ་པའི༔ ཤར་དུ་སེང་གེ་ནུབ་ཏུ་ཁྱི་ཡི་གཟུགས༔ བྱང་དུ་ཕག་དང་ཤར་ལྷོར་ར་ཡི་གཟུགས༔ ལྷོ་ནུབ་ལྕོག་རྡོག་ལྷོ་རུ་དམར་གཏོར་གཅིག༔ ནུབ་བྱང་ལྕོག་རྡོག་བྱང་ཤར་འབྲང་གི་གཟུགས༔ ཇ་ཕུད་རྔ་ཡབ་དང་བཅས་བཤམས་པར་བྱ༔ རང་མདུན་ཤིང་གཉིས་ཕར་ལ་བརྐྱངས་བའི་ངོས༔ རེ་བྱེད་ཅེས་ཀྱི་ཙཀླུ་རྣམས་བཤམས་ཏེ༔ རང་ངོས་གཡས་ནས་ཕར་ལ་རིམ་པ་ལྟར༔ རྒྱལ་མཚན་ཁུར་བུ་ཆུང་བ་གདམས་པ་འཛིན༔ ཁྲབ་ཆེན་མི་ཡི་སྤོས་འཛིན་རྟ་དང་དྲེལ༔ བཻ་རོ་ཕོ་རྣམས་བཀྲམ་ཞིང་གཡོན་ངོས་སུ༔ གཡོན་ངོས་མི་ནི་བྱི་ལའི་མགོ་ཅན་ལ༔
བལ་ལྗང་གཡོན་པས་ལྕགས་ཀྱུ་ལག་ཏུ་འཛིན༔ མཛོ་གཡག་མཛོ་མོ་འབྲི་ཡི་གཟུགས་དང་ནི༔ ལམ་གྱི་གཡས་གཡོན་སྟག་གཟིག་གིས་བསྲུང་ལ༔ བམ་རོ་མོ་རྣམས་རིམ་པར་ཕར་ལ་བཀྲམ༔ དེ་ནས་འདི་ལྟར་གྱེར་སྒོམ་བྱ་བ་ཡིན༔ དཀོན་མཆོག་ཀུན་འདུས་པདྨ་འབྱུང་གནས་ལ༔ བདག་དང་བསྲུང་བྱ་ནད་པ་སྐྱབས་སུ་མཆི༔ ཚེ་རབས་མང་པོའི་མ་རྒན་ནད་པ་འདིའི༔ ནད་གདོན་བར་ཆད་བདག་གིས་བསལ་བར་བྱ༔ ཨ་ཆོས་རྣམས་དམིགས་མེད་ཡེ་ནས་རྫོགས་པ་ཆེ༔ དེ་ཡི་རང་མདངས་སྐད་ཅིག་དྲན་རྫོགས་སུ༔ རང་ཉིད་སྣང་སྲིད་ཀུན་གྱི་སྟོབས་བསྡུས་པ། གནོད་སྦྱིན་དྲག་པོ་ཤན་པ་དམར་ནག་ནི༔ རབ་ཁྲོས་དམར་ནག་ཞལ་གཅིག་ཕྱག་བཞི་པ༔ སྤྱན་གསུམ་ཞལ་གདངས་མཆེ་གཙིགས་ཧ་ཧ་རྒོད༔ ཁྲག་རལ་གྱེན་གཟིངས་དུར་ཁྲོད་ཆས་ཀྱིས་བརྒྱན༔ ཕྱག་བཞི་གཡས་གཉིས་རལ་གྲི་གྲི་གུག་དང་༔ གཡོན་གཉིས་ཐོད་ཕྲེང་བྷནྡཱ་ཙིཏྟ་འཛིན༔ སྟག་གི་ཤམ་ཐབས་བེར་ཆེན་དམར་པོ་གསོལ༔ ཟངས་ཀྱི་ཁྱུང་དམར་བཅིབས་ཤིང་མེ་འོད་འཕྲོ༔ དེ་ཡི་ཙིཏྟ་པདྨ་དམར་པོ་ནི༔ འདབ་བརྒྱད་གྱེན་དུ་ཁ་བྱེའི་ཟེའུ་འབྲུ་ལ༔ སངས་རྒྱས་ཀུན་འདུས་པདྨ་འབྱུང་གནས་ནི༔ སྐུ་མདོག་
མཐིང་ག་རྡོ་རྗེ་དྲིལ་བུ་འཛིན༔ མཚན་དཔེ་རབ་རྫོགས་དར་དང་རིན་ཆེན་བརྒྱན༔ གཟི་བརྗིད་མདངས་ལྡན་རྡོ་རྗེ་སྐྱིལ་ཀྲུང་བཞུགས༔ ཡེ་ནས་དམ་ཡེ་དབྱེར་མེད་གསལ་བ་ཡི༔ ཐུགས་ཀར་ཟླ་སྟེང་ཧཱུྃ་ཡིག་མཐིང་གའི་མཐར༔ སྔགས་ཀྱིས་བསྐོར་ལས་འོད་ཟེར་ཕྱོགས་བཅུར་འཕྲོས༔ རྒྱལ་བ་སྲས་བཅས་ཀུན་གྱི་བྱིན་རླབས་དང་༔ ཡི་དམ་ཆོས་སྐྱོང་དྲེགས་པ་ཐམས་ཅད་ཀྱི༔ མཐུ་སྟོབས་ནུས་པ་ཀུན་བསྡུས་བདག་ལ་ཐིམ༔ བར་ཆད་རྐྱེན་ངན་བཟློག་པའི་སྟོབས་ལྡན་གྱུར༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱཀྐི་ནཱི་སརྦ་སིདྡྷི་ཕ་ལ་ཧཱུྃ་ཨཱཿདམིགས་པ་དང་བཅས་བསྙེན་པ་བརྒྱ་ཙམ་བཟླ༔ པད་འབྱུང་རྩ་བ་གསུམ་གྱི་བདེན་པ་དང་༔ ཆོས་སྐྱོང་ཤན་པ་དམར་ནག་བདེན་པའི་མཐུས༔ ནད་པ་འདི་ཡི་ནད་གདོན་བར་ཆད་ཀུན༔ སྐད་ཅིག་ད་ལྟ་ཉིད་དུ་ཞི་གྱུར་ཅིག༔ ཨོཾ་ཨཱཿཙྪཱཧཱུྃ་བཛྲ་གུ་རུ་དྷེ་ཝ་ཌཱཀྐི་ནཱི་སརྦ་སིདྡྷི་ཕ་ལ་ཧཱུྃ་ཨཱཿཨེ་ཧེ་མ་རུ་རྩེ་གུ་ཎ་ཧིཏྲི་ཧཱུྃ་ཛཿ ནད་པ་འདིའི་ནད་གདོན་བར་ཆད་ཀུན་སརྦ་ཤིནཾ་ཀུ་རུ་ཡེ་སྭཱ་ཧཱཿ ཞེས་པ་དེ་ནི་ལན་བདུན་བརྗོད་པར་བྱ༔ ཧཱུྃ༔ དེ་རིང་ཡུལ་གཞན་དག་ན་ནི༔ ཆོས་སྐྱོང་གཉེན་པོ་གཞི་བདག་ཀུན༔ དེ་རིང་དགྲ་བོའི་སྟེང་དུ་ཆོས༔ རྨེ་
འདི་ལ་མ་གནོད་ཅིག༔ གདོན་བགེགས་ཐམས་ཅད་སོ་སོའི་གནས་སུ་གཤེགས༔ ༈ གདོན་རྫོངས་ཐིག་རྒྱ་ཅན་བཞུགས་སོ༔ ཧཱུྃ༔ རྣལ་འབྱོར་བདག་གིས་གདོན་རྫོངས་སོ༔ རྫོངས་སོ་རྒེའི་གདོན་རྫོངས་སོ༔ སྤོས་ཀྱི་དུད་པས་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ མི་རོ་འདི་ཡིས་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ ཟས་སྣ་རྣམས་ཀྱི་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ དམག་དཔོན་རྒྱལ་པོས་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ རྟ་དྲེལ་ཁྱུ་ཡི་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ གདོན་ཁྱོད་བཻ་རོ་ཕོ་ཡིས་དེད༔ ཀྱུ་ཧུ་ལེ་ཡི་གདོན་ཁྱོད་དེང་༔ མཛོ་མོ་འབྲི་ཁྱུའི་གདོན་རྫོངས་སོ༔ རྫོངས་བཞིན་ཁྱོད་ཉིད་འགྲོ་བར་གྱིས༔ མཛོ་གཡག་ཁྱུ་ཡིས་གདོན་རྫོངས་སོ༔ སྟག་གཟིག་གྲུས་མས་གདོན་རྫོངས་སོ༔ བཻ་རོ་མོ་ཡི་གདོན་ཁྱོད་དེད༔ རྫོངས་བ་བཞིན་དུ་ཁྱོད་སོང་ཞིག༔ རྫོངས་བཞིན་མི་འགྲོ་འདིར་འདུག་ན༔ བདག་ཉིད་ཆེན་པོ་ཐུགས་ཁྲོས་ཏེ༔ གནམ་ས་མེ་ཡི་ཕུང་
པོས་གང་༔ བར་སྣང་གནམ་ལྕགས་རྡོ་རྗེ་དང་༔ ཧཱུྃ་དང་སྡིག་པའི་དྲྭ་བས་བཀང་༔ ཁྱོད་ཉིད་མགོ་བོ་འགེམས་བྱས་ཏེ༔ རྡོ་རྗེ་དམྱལ་བར་ལྟུང་ཏ་ར༔ དེ་བས་ད་ལྟ་ཕྱིར་། དེངས་ཤིག་རྗེ་འདི་ལ་ད་ཕྱིན་ཆད༔ མ་གནོད་གནོད་ན་ལྕགས་སྡིག་གིས༔ ཁྱོད་ཀྱི་སྙིང་ཁྲག་འཇིབས་ཏ་ར༔ བླ་མ་རྣམས་ཀྱི་བྱིན་རླབས་དང་༔ ཡི་དམ་རྣམས་ཀྱི་བརྟུལ་ཞུགས་དང་༔ མཁའ་འགྲོ་ཆོས་སྐྱོང་སྟོབས་མཐུ་ཡིས༔ ཁྱོད་ཀྱི་སྙིང་ལ་ལྕགས་སྡིག་ཞུགས༔ དེ་ཡིས་སྙིང་ཁྲག་ཐམས་ཅད་འཇིབས༔ གནམ་ས་གནམ་ལྕགས་རལ་གྲི་འབེབས༔ ཁྱོད་ཀྱི་མགོ་བོ་དེ་ཡིས་འགེམས༔ རྒྱབ་ནས་བསྐལ་པའི་མེ་ཡིས་དེད༔ སྔོན་ནས་མུན་ནག་ཆེན་པོས་ཁྲིད༔ རྡོ་རྗེའི་དམྱལ་བར་ལྟུང་བ་ལ༔ བདག་ཉིད་ཆེན་པོ་གདོན་མི་ཟ༔ ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ ཧཱུྃ་བཞི་བརྗོད༔ རིམ་གྲོ་གཏོར་འབུལ་གྱི་ལྷན་ཐབས་སུ་སྤྲུལ་སྐུ་ལ་མ་ནིང་གིས་དངོས་སུ་གསུངས་པའོ༔ ཤུ་བྷཾ་༈ དེ་ནས་ཙཀྐི་མདུན་ནས་ཕོར་ལ་བསྡུ༔ དེ་ནས་སྔགས་འདི་དྲག་ཏུ་བརྗོད་པར་བྱ༔ བྷྱོ་མི་མི་ལྷ་ཧཱུྃ་ཕཊ༔ ཨ་ཨཱཿ་ཨི་རི་རི༔ ཀ་ཁ་གྷ་ཏྲ་ཧཱུྃ་ཧཱུྃ་ཕཊ༔ དེ་ནས་རང་ཉིད་ལག་ཏུ་ནས་གཏོར་ལ༔ ཀ་ལ་ཁ་ག་བྷྱོ༔ རྨི་མི་སྲོག་
བྷྱོ༔ ཌཱཀྐི་ཐམས་ཅད་བྷྱོ༔ བྷྱོ་ཐམས་ཅད་བྷྱོ་མ་ཐིམ༔ བྷྱོ་བྷྱོ་བྷྱོ༔ དེ་ནས་ཇ་ཕུད་དེ་ཉིད་ཕྱོགས་བཅུར་གཏོར༔ མཎྜལ་ཞིང་ཁམས་སྲིད་ཀྱང་ག་ལ་རུང་༔ དེ་ནས་དཀར་གཏོར་བཤམས་པ་དེ་ཉིད་བྲན༔ བྷཾ་ལས་རིན་ཆེན་སྣོད་དུ་གཏོར་མ་ནི༔ དཀར་གསུམ་མངར་གསུམ་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཧཱུྃ༔ རྣལ་འབྱོར་ཆེན་པོ་བདག་ཉིད་ལ༔ དད་པ་དང་ནི་དམ་ཚིག་གིསཾ༔ གནོད་བྱེད་ཐམས་ཅད་འདི་རུ་འདུས༔ ཕཊ༔ ཅེས་བརྗོད་དཀར་གཏོར་དེ་ཉིད་ཕུལ་བར་བྱ༔ དེ་ནས་ལྷོ་ཡི་དམར་གཏོར་བྲན་ལ་བཟུང་བཅུག་སྟེ༔ ཧཱུྃ༔ རྗེ་འདི་ལ་གནོད་བྱེད་རྣམས༔ གཙྩ་རི་ཡི་གནས་སུ་གཤེགས༔ ཕཊ༔ ཅེས་བརྗོད་དེ་ཉིད་ཕུལ་དུ་བཅུག༔ དེ་ནས་འདི་བཟླས་དམར་གཏོར་གཅིག་ལ༔ སྔགས་བཟླས་པ་ཡི་ཕུ་ནི་འདེབས་པར་བྱ༔ ཨོཾ་ཏྲག་ཏྲ་ཅང་སྭཱ་ཧཱཿ ཕྲེང་སྐོར་ཙམ་བཟླ༔ དམར་གཏོར་རྩེ་མོ་བཅད༔ ར་དང་ལུག་དང་ནོར་དང་གསུམ༔ རྟ་དང་དྲེལ་དང་བ་དང་གསུམ་འཕེལ་བར་གྱུར་ཅིག༔ ཅེས་བརྗོད་ལྕོག་རྡོག་གཅིག་ནི་ཕུལ་བར་བྱ༔ ལྷོ་ནུབ་ཀྱི་ལྕོག་རྡོག་མེ་ལ་བསྲེག་པར་བྱ༔ ཤར་གྱི་ཤོག་བུ་དཀར་པོ་བཏོག་ལ་འཕེན༔ ལྷའི་གནོད་པ་སྒྱུར་ཅིག༔ ལྷོ་ཡི་ཤོག་ནག་བཏོག་ལ་འཕེན་ནས། བདུད་ཀྱི་གནོད་པ་སྒྱུར༔ ནུབ་ཀྱི་ཤོག་
དམར་བཏོག་ལ་འཕངས་ནས༔ བཙན་གྱི་གནོད་པ་སྒྱུར༔ བྱང་གི་ཤོག་ལྗང་བཏོག་ལ་འཕངས་ནས༔ གནོད་སྦྱིན་གྱི་གནོད་པ་སྒྱུར༔ སྟེང་གི་ཤོག་སེར་བཏོག་ལ་འཕངས་ནས༔ རྒྱལ་པོའི་གནོད་པ་སྒྱུར༔ ཞེས་བརྗོད༔ སངས་རྒྱས་ཀུན་འདུས་ཐུགས་རྗེ་ཚད་མེད་པར༔ གུ་རུ་པདྨ་འབྱུང་གནས་བདེན་པ་ཡིས༔ ནད་གདོན་མྱུར་དུ་ཞི་བའི་བཀྲ་ཤིས་ཤོག༔ སྣང་སྲིད་དྲེགས་པའི་སྡེ་དཔོན་མཐུ་སྟོབས་བདག༔ ཤན་པ་དམར་ནག་འཁོར་བཅས་མཐུ་སྟོབས་ཀྱིས༔ ནད་གདོན་བར་ཆད་མྱུར་ཞི་བཀྲ་ཤིས་ཤོག༔ སྣང་སྲིད་ཐམས་ཅད་འོད་ཞུ་བདག་ལ་ཐིམ༔ བདག་ཉིད་ཤན་པ་འོད་ཞུ་པད་འབྱུང་ལ༔ པད་འབྱུང་འོད་ཞུ་ཐུགས་སྲོག་ཧཱུྃ་ལ་ཐིམ༔ ཧཱུྃ་ཡང་གྱེན་རྫོགས་མི་དམིགས་སྟོང་པ་ཉིད༔ ལྷ་དང་འདྲེ་དང་ནད་གདོན་ལ་སོགས་པ༔ ཡང་དག་དོན་ལ་རྡུལ་ཙམ་གྲུབ་པ་མེད༔ ཐམས་ཅད་རང་གི་སེམས་ཉིད་གཅིག་པུས་འཕྲུལ༔ སེམས་ནི་ཡེ་ནས་ཡོད་མེད་རྟག་ཆད་བྲལ༔ ཨ་ཨ་ཨ༔ འདི་ཉིད་བྱེད་ཚེ་ཐེབ་ཙེ་གཙང་མའི་ནང་༔ ཆུ་གཙང་གིས་བཀང་དེ་ཡི་ནང་དུ་ནི༔ ཅོང་ཞི་འབྲུག་ཤི་ང་རྡོ་རུས་བབ་ལ་དང་༔ རོ་སོལ་བཙག་རྣམས་ཞིབ་བཏགས་ཕྱེ་མ་བཏབ༔ རང་གི་རྒྱབ་ཀྱི་ཕྱོགས་སུ་
བཞག་པར་བྱ༔ དེ་ནི་ས་ལེའུ་སྨན་ཞེས་བྱ་བ་ཡིན༔ འདི་ལྟར་རྫས་དང་བཅའ་སོགས་དམིགས་རིམ་དང་༔ འདོན་བྱ་བཅས་པ་མ་ནོར་ཚང་བ་ནི༔ ཐེ་ཚོམ་མེད་པར་བྱས་པར་གྱུར་ན་ནི༔ རིགས་ཀུན་ལ་ཕན༔ ཁྱད་པར་དུས་ངན་སྙིགས་མའི་ནད་ལ་ཕན༔ གཟའ་ཀླུ་སྡེ་བརྒྱད་ལ་སོགས་གདོན་རྣམས་ཞི༔ ཁྱད་པར་རྒྱལ་བསེན་ས་བདག་ནད་ལ་ཕན༔ དུས་ཀྱི་དབང་གིས་འདི་ཉིད་ཕན་ཐོགས་བསྲུང་ཕྱིར་ཤིན་ཏུ་རྣོ༔ གནོད་སྦྱིན་ཆེན་པོའི་གསུངས་པའི་རྒྱུད་ཚིག་ལས༔ སྤྲུལ་སྐུ་ཉིད་ཀྱིས་ཇི་ལྟར་གསུངས་པ་རྣམས༔ རྡོ་རྗེའི་ཚིག་ལ་ནོར་འཁྲུལ་ཅི་མེད་དོ༔ འོན་ཀྱང་ཁྱེར་བདེ་རཱ་ག་ཨ་སྱས་བསྒྲིགས༔ སྐུ་ཉིད་ལ་བརྟེན་ནས༔ མི་རྣམས་ནད་དང་གདོན་ལས་ཐར་གྱུར་ཅིག༔ མངྒ་ལཾ།། ཨྠྀི༔ ཟབ་བོ༔ རྒྱ་རྒྱ་རྒྱ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།