ཕྱག་རྡོར་གཏུམ་ཆུང་གི་སྒྲུབ་ཐབས་བདག་བསྐྱེད་དཀོན་མཆོག་འབངས་ཀྱིས་མཛད་པ་དང་། མདུན་བསྐྱེད་དོན་ལྡན་ཞབསཀྱིས་མཛད་པ་བསྒྲིགས་པའི་བུ་ཡིག་ཟིན་བྲིས་མ་རུངས་ཚར་གཅོད།
ཕྱག་རྡོར་གཏུམ་ཆུང་གི་སྒྲུབ་ཐབས་བདག་བསྐྱེད་དཀོན་མཆོག་འབངས་ཀྱིས་མཛད་པ་དང་། མདུན་བསྐྱེད་དོན་ལྡན་ཞབསཀྱིས་མཛད་པ་བསྒྲིགས་པའི་བུ་ཡིག་ཟིན་བྲིས་མ་རུངས་ཚར་གཅོད་ཅེས་བྱ་བ་བཞུགས་སོ།།
ན་མོ་གུ་རུ་བཛྲ་པཱ་ཎི་ཡེ། །ཕྱག་ན་རྡོ་རྗེ་ཁྱུང་གི་ཤམ་བུ་ཅན། །གཏུམ་མོ་མེ་འབར་མགུལ་ཁུག་མ་ཞེས་པའི། །སྒྲུབ་ཐབས་དཀོན་མཆོག་འབངས་ཀྱིས་མཛད་པ་ཡི། །མན་ངག་ཉུང་བསྡུས་གོ་བདེའི་ཚིག་གིས་བཀོད། །གསང་བདག་བཀའ་འཁོར་བཅས་པས་བཀའ་གནང་སྩོལ། །རྡོ་རྗེ་འཆང་ལ་ཡེ་ཤེས་དབང་ཕྱུག་མས། །ཞུས་པས་ཕྱག་རྡོར་གསང་བ་བསྟན་པའི་རྒྱུད། །གསུངས་པ་བླ་མེད་ཕ་རྒྱུད་ཡིན་པར་བཤད། །སྔགས་རིང་འདི་དག་གསང་སྔགས་རྙིང་མའི་རྒྱུད། །གཏུམ་པོ་ནཱ་ག་བདུད་འདུལ་རྒྱུད་ནས་བྱུང་། །གསང་བའི་བདག་པོ་རྩི་ལུ་པཎྜི་
ཏ། །སློབ་དཔོན་ལས་ཀྱི་རྡོ་རྗེ་ཐང་ལོ་པ། །ཤིང་ལོ་པ་དང་ཀཎྜ་རི་པ་དང་། །ཝ་ལ་ཙཎྜ་རས་ཆུང་རྡོར་གྲགས་ནས། །དེང་སང་བར་དུ་སྒྲུབ་བརྒྱུད་མ་ཆད་པ། །འདི་ཉིད་ཉམས་སུ་ལེན་ཚུལ་བསྒྲིགས་དགོས་ལྟར། །ཐུན་བཞིར་བདག་བསྐྱེད་བསྙེན་པ་བྱ་བ་དང་། །ཐུན་མཇུག་མདུན་བསྐྱེད་མཆོད་བསྟོད་གཏོར་མ་བསྔོ། །ཡིག་བརྒྱས་ཁ་བཀང་ཐུན་བསྡུ་གཞུང་ལྟར་རོ། །རྒྱུན་ཁྱེར་བྱེད་ན་ཉིན་རེ་ཐུན་རེར་བྱ། །སྔོན་དུ་ལྷ་གཞན་བསྙེན་པ་མ་སོང་ན། །ཨོཾ་བཛྲ་པཱ་ཎི་ཧཱུྃ། ཞི་བསྙེན་འདི་ཉིད་འབུམ་མམ་སུམ་འབུམ་བཟླ། །ལྷ་གཞན་བསྙེན་པ་སོང་ན་མི་དགོས་
སོ། །དེ་ནས་བསྙེན་པའི་དུས་ཀྱི་དམིགས་པ་ནི། །རང་གི་ཐུགས་ཀའི་ཧཱུྃ་ལས་འོད་ཟེར་ནི། །སྔོན་པོ་ཤས་ཆེ་འོད་ལྔའི་མདངས་ལྡན་པ། །ཕྱོགས་བཅུའི་འཇིག་རྟེན་ཁྱབ་པར་འཕྲོས་པ་ཡིས། །ཕྱོགས་བཅུའི་དུས་གསུམ་སངས་རྒྱས་ཐམས་ཅད་ལ། །མཆོད་པའི་སྤྲིན་ཕུང་དཔག་མེད་གྱུར་པས་མཆོད། །དེ་ཀུན་རྡོ་རྗེ་གཏུམ་པོའི་སྐུར་གྱུར་ཏེ། །འོད་ཞུ་འོད་ཟེར་ཁ་དོག་རྣམ་ལྔར་གྱུར། །ཚུར་འདུས་རང་གི་སྤྱི་བོར་ཐིམ་པ་ཡིས། །ཡེ་ཤེས་ལྔ་ཡི་དབང་བསྐུར་ཐོབ་གྱུར་ཏེ། །དབང་རྟགས་དབུ་རྒྱན་ཐོད་སྐམ་ལྔ་ཡི་རྩེར། །ཨོཾ་ཧཱུྃ་ཏུཾ་ཧྲིཨཱཡིས་མཚན་པར་གྱུར། །དེ་ལ་རྡོ་རྗེ་ཕྲ་མོའི་ཆར་བབས་པས། །རང་ལུས་རྡོ་རྗེའི་གོ་ཁྲབ་ཞུ་ལུབས་གསོལ། །སླར་ཡང་སྔགས་ཕྲེང་འོད་ཟེར་འཕྲོས་པ་ཡིས། །རྒྱལ་བ་ཀུན་མཆོད་ཐམས་ཅད་གཏུམ་པོར་གྱུར། །འོད་ཞུ་ཚུར་འདུས་སྤྱི་བོའི་གཙུག་ནས་ཐིམ། །འོད་འཕྲོས་འགྲོ་བ་ཀུན་གྱི་སྒྲིབ་གཉིས་སྦྱངས། །ཀུན་ཀྱང་གཏུམ་པོའི་སྐུར་གྱུར་སྔགས་སྒྲ་སྒྲོག །དེ་ལྟར་བསྒོམ་ཞིང་པཱ་ཎི་འབྲུ་དྲུག་བཟླ། །དེ་ནི་འདི་ཡི་བསྙེན་པ་ཡིན་པར་བཤད། །ཕྱག་གཡོན་སྡིགས་མཛུབ་བསྒྲེངས་བའི་རྩེ་ལ་ནི། །ཁྱུང་གཅིག་ཁྲ་ཐབས་ཚུལ་དུ་ལྡིང་
བ་དང་། །བ་སྤུ་ཀུན་ཏུ་ཁྱུང་ཕྲུག་ཕྲ་མོས་གཏམས། །དེ་མིན་དམིགས་པ་གོང་དང་མཚུངས་པར་བསྒོམས། །ཙཎྜ་མ་བཟླས་འདི་ཡི་ཉེ་བསྙེན་ཡིན། །རང་གི་ཐུགས་ཀར་རྡོ་རྗེ་མཐིང་ནག་ནི། །ཚོན་གང་ཙམ་ཞིག་གྱེན་དུ་འགྲེང་བའི་ལྟེར། །ཉི་ཟླའི་གདན་ལ་ཧཱུྃ་མཐིང་ནས་འབྲུ་ཙམ། །དེ་མཐར་རྩ་སྔགས་གཡས་སུ་འཁོར་བ་ལས། །མེ་འབར་ལུས་ཀྱི་ནད་གདོན་ཐམས་ཅད་བསྲེགས། །འོད་ཟེར་ཕྱིར་འཕྲོས་ཁྲོ་བོ་ཁྱུང་གི་ཚོགས། །མཚོན་ཆ་མེ་དཔུང་འཚུབ་མ་ཆེར་འཕྲོས་པས། །སྟོང་གསུམ་ཁམས་གང་གནོད་བྱེད་ཐམས་ཅད་བསྲེགས། །དེ་ལྟར་བསྒོམ་ཞིང་ཙཎཱའི་སྔགས་བཟླས་པས། །འདི་ཡི་སྒྲུབ་པའི་དམིགས་པའི་གཙོ་བོ་ཡིན། །རབ་ཀྱིས་སུམ་འབུམ་འབྲིང་གིས་བདུན་འབུམ་དང་། །ཐ་མས་འབྲུ་འབུམ་ཡང་མཐའ་སུམ་འགྱུར་བཟླ། །གྲངས་ལ་མི་ངེས་རྟགས་ལ་གཙོ་ཆེ་བས། །གཞུང་ནས་གསུངས་པའི་གཏུམ་པོའི་རྟགས་བརྒྱད་སྒྲུབ། །དེ་ནས་རང་ཉིད་གཏུམ་པོའི་གནས་ལྔ་རུ། །རིགས་ལྔའི་ཁྱུང་ནི་དཀར་དམར་མཐིང་སེར་ལྗང་། །འཁོར་ལོ་པདྨ་རྡོ་རྗེ་རིན་ཆེན་དང་། །རལ་གྲི་རྣམས་ནི་གཡས་ཀྱི་ཕྱག་ན་བསྣམས། །གཡོན་པས་རང་མདོག་
སྦྲུལ་ནི་ཞལ་དུ་གསོལ། །ཐུགས་ཀའི་ཁྱུང་སྔོན་ཐུགས་ཀར་ཡེ་ཤེས་སེམས། །གཏུམ་པོ་རང་འདྲའི་ཐུགས་ཀར་ཉི་ཟླའི་སྟེང་། །བཟླ་བྱའི་སྔགས་ཕྲེང་གཡས་སུ་འཁོར་བ་ལས། །འཕྲོས་པའི་འོད་ཟེར་ཁྱུང་གིས་སྟོང་གསུམ་གང་། །འཕུར་འབབ་ལྡིང་འཇུམ་གཤོག་སྒྲ་འབྲུག་ལྟར་གྲག །གནོད་ཅིང་འཚེ་བའི་ཀླུ་གཉན་ས་བདག་རྣམས། །མིག་བྲུ་སྙིང་དང་ནང་གྲོལ་འདྲེན་ཅིང་ཟ། །སྤུ་གསེབ་བྱེ་ཚན་ཆར་གྱིས་ཤ་རུས་ཕྱེ། །གཤོག་པ་བརྡབས་པས་མེ་རླུང་འཚུབ་མ་ཡིས། །གནོད་བྱེད་ཐམས་ཅད་བྱ་སྒྲོ་མེར་བསྲེགས་ལྟར། །དེ་དག་ཀུན་གྱི་མཐུ་སྟོབས་གཟི་བརྗིད་ཀུན། །ཁྱུང་རྣམས་ལ་ཐིམ་ཁྱུང་རྣམས་བདག་ལ་ཐིམ། །བདག་ཉིད་མཐུ་སྟོབས་གཟི་བརྗིད་ཆེར་འབར་བསྒོམས། །ཐུང་འདོགས་ག་རུ་ཊ་ཡི་སྔགས་ཤམ་དེ། །འབུམ་ཕྲག་གཅིག་གམ་གཉིས་སམ་གསུམ་བཟླས་ཏེ། །མང་ཉུང་རང་ལ་གནོད་འཚེ་ཡོད་མེད་བསྟུན། །འདི་ནི་སྒྲུབ་པ་ཆེན་པོ་ཡིན་པ་སྟེ། །རྣོ་ཕྱིར་སོ་འདྲའི་བསྙེན་པ་ཞེས་ཀྱང་གྲགས། །དེས་མ་ཐུལ་ན་སྔགས་ཐུང་གཉིས་པོའི་མཐར། །གཏུམ་པོ་གློག་གི་དྲག་སྔགས་ཉེར་བརྒྱད་པ། །ཅི་ལ་བཏབ་ཀྱང་ཐོགས་པ་མེད་དེ་བཏགས།། །གལ་ཏེ་དེས་ཀྱང་ཐུལ་
བར་མ་གྱུར་ན། །དེ་མཐར་དྲག་སྔགས་ཞེ་དགུ་པ་ཉིད་བཏགས། །དེ་ཚེ་རང་གི་ཐུགས་ཀའི་འོད་ཟེར་གྱིས། །སྣོད་བཅུད་མེ་འོད་འབར་བའི་གཏུམ་པོས་གང་། །ཟླ་གདན་ཞབས་གཡོན་བརྡབས་པས་འཁོར་ཀུན་འདར། །འཁོར་རྣམས་གནོད་བྱེད་གཅུན་པས་འདར་ཞིང་འདུད། །དེ་ནི་ཞབས་ཀྱི་ཕྲིན་ལས་ཞེས་བྱའོ། །བ་སྤུའི་ཁུང་ནས་མེ་དཔུང་འབར་མཆེད་འཚུབ། །འཁྱིལ་བས་གནོད་བྱེད་བྱ་སྒྲོ་ལྟ་བུར་བསྲེགས། །དེ་ནི་སྐུ་ཡི་ཕྲིན་ལས་ཞེས་བྱའོ། །རང་ལྕེ་ཟླ་སྟེང་རྡོ་རྗེ་རྩེ་གསུམ་པ། །རྩེ་མོ་རེ་ལ་སྔགས་ནི་ཚན་གསུམ་རེ། །སྔགས་མཇུག་ཕྱིར་བསྟན་ཕཊ་གསུམ་བྲུལ་ལ་ཁད། །སྔགས་ཀྱི་རང་སྒྲ་འབྲུག་ལྟར་སྒྲོག་བྱེད་ཅིང་། །ཕཊ་གསུམ་ལས་ནི་རྡོ་རྗེའི་སེར་ཆེན་འཕྲོས། །གནོད་བྱེད་ཤོ་མང་སེར་བས་གཏོར་བ་བཞིན། །དེ་ནི་གསུང་གི་ཕྲིན་ལས་ཞེས་བྱའོ། །སྐུ་ལ་བརྒྱན་པའི་ཀླུ་བརྒྱད་སྦྲུལ་ཆེན་བརྒྱད། །དེ་དག་ཁ་ནི་ཕྱིར་ལ་ཕྱོགས་པ་ལས། །མཐོང་དུག་རེག་དུག་ཁ་རླངས་མཆེ་བའི་དུག །བསམ་ངན་དུག་ལྔ་ན་བུན་བཞིན་དུ་འཕྲོས། །དགྲ་བགེགས་མེ་ཏོག་སད་ཀྱིས་ཁྱེར་ལྟར་བཅོམ། །དེ་ནི་རྒྱན་གྱི་ཕྲིན་ལས་ཞེས་བྱའོ། །རང་གི་ཐུགས་ཀར་རྡོ་རྗེ་ཧཱུྃ་
མཚན་ལས། །ཁྲོ་བོའི་རྡོ་རྗེ་རྩེ་མོ་གསུམ་པ་དང་། །ཁྲོ་བོའི་དམག་ཚོགས་ཆེན་པོ་སྤྲོས་པ་ཡིས། །གནོད་བྱེད་བྱ་སྤུ་རླུང་གིས་གཏོར་བ་ལྟར། །ཕྱི་ཡི་རྒྱ་མཚོ་ཆེན་པོའི་ཕ་མཐར་བསྐྲད། །གང་དག་འགྲོ་བར་མི་བྱེད་པ་རྣམས་ནི། །མྱོས་བརྒྱལ་རེངས་འབོག་ཡིད་དབྱུང་ལ་ལ་བསད། །ཟོས་ཤིང་སྙིང་ཕྱུངས་གཏུབས་དང་རྒྱ་མཚོར་བསྒྱུར། །དེ་ཉིད་ཐུགས་ཀྱི་ཕྲིན་ལས་ཞེས་བྱའོ། །ཕྱག་གཡས་རྡོ་རྗེ་ཕྱར་ཞིང་བསྣུན་པ་ལས། །རྡོ་རྗེའི་ཐོག་ཆེན་གྲངས་མེད་ཚག་ཁྲོབ་འཕྲོས། །ཁང་རུལ་སྐྱོགས་ལྟར་གནོད་བྱེད་རྡུལ་ཧྲུལ་སོང་། །རྡོ་རྗེ་གསོར་བས་རང་འདྲའི་ཁྲོ་བོའི་ཆར། །དེ་དག་ཀུན་གྱི་ཕྱག་གཡས་རྡོ་རྗེ་ཡི། །ཐོ་བེ་བཟུང་ནས་གནོད་བྱེད་དམྱལ་དམྱལ་བརྡུངས། །ཐམས་ཅད་ཕྱེ་མ་ཐལ་བ་རྡུལ་དུ་བརླགས། །དེ་ལ་དག་གཏུམ་པོའི་ལས་དྲུག་དམིགས་པའོ། །ཐུན་མཐར་སྤྲུལ་པ་ཐམས་ཅད་བདག་ལ་ཐིམ། །སྙིང་གར་ཡེ་ཤེས་སེམས་དཔའི་ཐུགས་ཀ་རུ། །པདྨ་འདབ་བཞི་རྒྱ་སྲན་ཙམ་གྱི་དབུས། །ཉི་ཟླའི་གའུ་ནང་དུ་རང་གི་སེམས། །ཨ་ཤད་དམར་པོ་སྤྱི་ཡི་རྩེ་མོ་ཙམ། །མར་མེ་ལྟ་བུར་གསལ་ལ་དམིགས་པ་གཏད། །མ་ཡེངས་རྩེ་གཅིག་གནས་པ་ཞི་གནས་ཏེ། །
དེ་ནས་ཡིད་ལ་ཅི་ཡང་མི་བསམ་པར། །གང་ཤར་ངོ་བོ་སྐྱོང་བ་ལྷག་མཐོང་ཡིན། །དེ་ནི་འདི་ཡི་ལུགས་ཀྱི་ལྷག་མཐོང་སྟེ། །དེ་དོན་ཕྱག་རྡོར་གསང་བསྟན་རྒྱུད་ཉིད་ལས། །བསྐྱེད་པའི་རིམ་པ་དམིགས་པ་ཐོབ་ནས་ནི། །རང་གི་སྙིང་གར་ཡེ་ཤེས་སེམས་དཔའ་བསྒོམ། །ཡེ་ཤེས་སེམས་དཔའི་ཐུགས་ཀར་ནི། །པདྨ་འདབ་བཞི་རྒྱ་སྲན་ཙམ། །དབུས་སུ་ཉི་ཟླའི་གཞལ་ཡས་ཁང་། །གཞལ་ཡས་ཁང་གི་ནང་དུ་ནི། །ཨ་ཤད་མར་མེའི་རྩེ་ལྟར་བསྒོམ། །དེ་ལ་དམིགས་པ་ཐོབ་ནས་ནི། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམས་ནས། །དེ་ལས་ཡེ་ཤེས་ཐོབ་པར་འགྱུར། །གསལ་ལ་རྟོག་མེད་རིག་པའི་སྐུ། །ཡེ་ཤེས་ཞེས་ནི་དེ་ལ་བྱའོ། །ཞེས་གསུངས་པ་ཡི་དོན་ཡིན་ནོ། །རང་གི་ཐུགས་ཀའི་ཧཱུྃ་གི་འོད་ཟེར་ལས། །རང་འདྲའི་ཁྲོ་བོ་ཕྱོགས་བཅུར་ཁྱབ་པར་འཕྲོས། །གནོད་བྱེད་གདུག་པ་ཅན་རྣམས་དཔའ་བཀོང་སྟེ། །ཚར་བཅད་ཚུར་འདུས་འཁོར་ལོའི་ཕྱི་རོལ་དུ། །རྡོ་རྗེའི་གུར་ཁང་མེ་རི་འབར་བར་གྱུར། །འཁོར་ལོའི་ནང་དུ་བསྲུང་བྱ་ཐམས་ཅད་ཚུད། །གལ་ཆེན་ཐུགས་སྲོག་ཧཱུྃ་གི་ནང་དུ་སྦ། །རྩ་སྔགས་ཤམ་བུར་སྔགས་འདི་
བཏགས་ལ་བཟླ། །བསྲུང་བྱ་ངོས་འཛིན་ཡོད་ན་མིང་སྦྱར་ཞིང་། །རང་ཉིད་ཡིན་ན་མ་མ་སྦྱར་བ་ཡིན། །གཉིས་ཀར་བསྲུང་བྱ་མ་མ་ཀཱ་ཡ་ཝཱཀ་ཙིཏྟ་རཀྵ་རཀྵ་ཀུ་རུ་ཧཱུྃ་མཾ་སྭཱ་ཧཱ། ཅི་ནུས་བཟླས་པས་རང་གཞན་བསྲུང་བའི་མཆོག །ཕྱི་རོལ་སྣོད་བཅུད་འོད་ཞུ་བདག་ལ་ཐིམ། །བདག་ཉིད་འོད་ཞུ་ཐུགས་ཀའི་ཧཱུྃ་ལ་ཐིམ། །ཧཱུྃ་གི་ཞབས་ཀྱུ་ཡར་ཐིམ་ཧཾ་དུ་གྱུར། །དེ་ལས་མེ་འབར་རང་གི་གནས་ཁང་བསྲེགས། །ཆེར་མཆེད་མེ་འབར་ཡུལ་ཁམས་ཐམས་ཅད་བསྲེགས། །མེ་སྒྲ་འབྲུག་བཞིན་སྔགས་སྒྲ་སྒྲོག་པར་བསམ། །རྩ་སྔགས་ཤམ་བུ་འདི་ཉིད་བཏགས་ལ་བཟླ། །གནོད་བྱེད་ཨུ་ཙ་ཏ་ཕཊ། ཁྱིམ་དུ་གདོན་ཆེན་ཞུགས་པ་འཕུད་ཐབས་སོ། །རང་ལ་གཟའ་ཡི་གནོད་པ་བྱུང་གྱུར་ན། །གཟའ་ཆེན་བརྒྱད་པོ་སྐུ་སྟོད་དྲང་སྲོང་གཟུགས། །ཐལ་མོ་སྦྱར་ཞིང་བདག་ལ་གུས་པའི་ཚུལ། །སྐུ་སྨད་སྦྲུལ་མཇུག་རང་གི་གདན་འོག་མནན། །རང་གི་ཐུགས་ཀའི་སྔགས་ཕྲེང་འོད་ཟེར་གྱིས། །རང་ལུས་གཟའ་ནད་བ་མོར་ཉི་ཕོག་བཞིན། །རང་གི་ཐུགས་ལས་གསང་བདག་ཚོན་གང་པ། །བརྒྱད་སྤྲོས་གཟའ་བརྒྱད་སྤྱི་བོ་ནས་ཞུགས་ཏེ། །སྙིང་གར་ཐིམ་པར་དམ་བཏགས་བྱིན་གྱིས་བརླབས། །
གནོད་པ་མི་བྱེད་ཁས་བླངས་དམ་བཅས་བསམ། །རཀྵ་རཱ་ཧུ་ལ་བཏགས་སྔགས་དེ་ནི། །བརྒྱའམ་སྟོང་སོགས་གནོད་ཚབ་དང་བསྟུན་བཟླ། །རྐང་ལག་ན་ས་སོགས་སུ་སྔགས་མཆིལ་བཏབ། །གཞན་དག་གཟའ་ཡི་ནད་ཀྱིས་ཟིན་པ་ལ། །རང་གི་ཐུགས་ཀའི་ཧཱུྃ་ལས་འོད་འཕྲོས་པས། །ལྕང་ལོ་ཅན་ནས་གསང་བདག་རང་འདྲ་བ། །གཟའ་བརྒྱད་ཞབས་ཀྱིས་མནན་པ་དང་བཅས་པ། །དཔག་མེད་སྤྱན་དྲངས་ནད་པའི་རྣ་བར་ཐིམ། །ཁ་ཏྲ་རུ་ཏྲ་ལ་སོགས་སྔགས་བཏགས་པ། །བརྒྱ་རྩ་བརྒྱད་བཟླས་ཕུ་མཆིལ་བཏབ་པས་ཕན། །གཏུམ་པོ་རིགས་བཞིའི་སྔགས་ནི་དཀྱིལ་ཆོག་ལ། །གསུངས་ཀྱི་འདི་རུ་དགོས་པ་མ་ཡིན་ནོ། །བུམ་པ་སྤྱི་མཐུན་གཞུང་ལྟར་བཅས་བྱས་ལ། །མཚན་ཉིད་ཡོངས་རྫོགས་རྣམ་རྒྱལ་བུམ་པའི་དབུས། །མདུན་བསྐྱེད་བཞིན་དུ་གཙོ་འཁོར་ཡོངས་རྫོགས་བསྐྱེད། །ཡོད་ན་ཡུངས་ཀར་འབྲུ་བདུན་སྔགས་ལ་བླུགས། །རྩ་སྔགས་མཇུག་ཏུ་སྔགས་འདི་བཏགས་ལ་བཟླ། ཨེ་ཧོ་ཤུདྡྷེ་ཤུདྡྷེ། ཡཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། བི་ཧོ་ཤུདྡྷེ་ཤུདྡྷེ། ལཾ་ཧོ་ཤུདྡྷེ་ཤུདྡྷེ། ཨེ་ཡཾ་རཾ་བཾ་ལཾ་ཤུདྡྷེ་ཤུདྡྷེ། སརྦ་པཱ་པ་བྷི་ན་ས་ཨ་ཨཱ༔ ཞེས་པ་ཅི་མང་བཟླས་རྗེས་
སྔགས་འདི་བརྗོད། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཀཱ་ཡ་ཝཱཀ་ཙིཏྟ་སྭ་བྷ་ཝ་ཤུདྡྷོཉཧཾ། བུམ་ལྷའི་སྐུ་ལས་བདུད་རྩིའི་རྒྱུན་བབས་པས། །བུམ་པ་གང་བའི་ཆུའི་རྡུལ་ཕྲན་རེའང་། །ཁྲོ་ཆུང་དང་ནི་ཁྱུང་གི་རང་བཞིན་བསྒོམས། །ཆུ་དེས་བདག་ཉིད་ཐོ་རངས་ཁྲུས་ཆབ་བྱ། །མི་གཙང་གྲིབ་ཀྱིས་ཚུགས་པར་མི་འགྱུར་ཞིང་། །བུམ་ཆུ་བཏུང་དང་བཀྲུས་པས་འགོས་ནད་བསྲུང་། །མི་ཕྱུགས་གློ་བུར་ན་བ་རྣམས་ལ་ཡང་། །བུམ་ཆུ་བཏུང་དང་བཀྲུས་པས་འཕྲལ་དུ་བདེ། །རྟག་ཏུ་བཏུང་དང་བཀྲུས་པས་སྲིའུ་སོས། །སྨྱོན་པ་ལ་སོགས་ནད་པ་གདོན་ཆེན་ལ། །དང་པོ་ཆ་གསུམ་བྱིན་ལ་བདེན་སྟོབས་བརྗོད། །དེ་ནས་བུམ་ཆུས་བྱབ་ཁྲུས་སྤྱི་ལྟར་བྱ། །དེ་ནས་བུམ་པ་གཏོར་མ་ལ་སོགས་པས། །དབང་བསྐུར་སྤྱི་ལྟར་བྱས་པས་ནད་པ་སོས། །ནད་གདོན་སྨྱོ་འབོག་ཀླུ་དང་ས་བདག་ནད། །དུག་གི་རིགས་དང་མཛེ་རིགས་བཅོ་བརྒྱད་སེལ། །མཇུག་ཏུ་གཏོར་ཟན་ཁམ་གསུམ་བཟའ་རུ་འཇུག །སྲིའུ་ཡིན་ན་གཏོར་མ་སྔས་སྲུང་བཞག །དེ་དག་ཉེར་མཁོའི་ལས་ཚོགས་མདོར་བསྡུས་ཡིན། །ཀླུ་སོགས་གདོན་ཆེན་ངེས་པར་གསོད་པ་ནི། །རང་ལ་ཙི་ཙི་ཛཱ་ལའི་ནད་བྱུང་ན། །གང་གནོད་ལིང་གི་
སྤྱི་མཐུན་ལྟར་བྲིས་ལ། །དྲིལ་ལ་སྤྲ་ཚིལ་བག་ཟན་སྙིང་ཁར་བཅུག །ཁྲག་སྣ་དུག་སྣ་དྲག་པོའི་ས་སྣས་བྱུགས། །སྔོན་དམར་སྐུད་པས་བཅིངས་པ་གཟུངས་ཐག་སྣར། །དེ་སྟེང་རོ་གཡམ་རྡོ་རྗེ་རྒྱ་གྲམ་བྲི། །མཚམས་བཞིར་ནན་བཞི་ལྟེ་བར་ཛཡིག་དང་། །རྭ་གདེངས་བར་དུ་མཱ་ར་ཡ་ཕཊ་དང་། །སྟེང་དུ་རི་རབ་གླིང་བཞི་བཅས་པ་བྲི། །ཧོམ་ཁུང་ལིང་ག་བཅུག་སྟེ་དེ་ཡིས་མནན། །དེ་སྟེང་ཨོཾམ་བྱས་སྒྲུབ་གཏོར་ཟུར་གསུམ་བཞག །སྟོད་ནི་མདུན་བསྐྱེད་སྨད་ནི་མཆོད་པར་དམིགས། །བགེགས་རིགས་འདུལ་ལ་མི་ཡི་རྗེ་ངར་དང་། །ཀླུ་ལ་སེང་ལྡེང་དགྲ་ལ་གྲི་ལྕགས་མཆོག །མ་རྙེད་དྲག་པོའི་ཤིང་ནི་གང་ཡང་རུང་། །ཕུར་པ་སོར་བཞི་དར་སྔོན་ཅོད་པན་བཏགས། །སྟོད་ནི་གསང་བདག་སྐུ་སྨད་ཕུར་པར་བསྒོམས། །ལིང་གའི་གཟུངས་ཐག་ཕུར་པ་དེ་ལ་བཏགས། །ཡུངས་ཀར་ལ་སོགས་ཐུན་རྫས་གང་འཛོམ་དང་། །ཕུར་པ་དེ་ལ་རྒྱུན་དུ་ཕུ་བཏབ་སྔགས། །དུས་བཞིར་བདག་མདུན་མངོན་རྟོགས་མཆོད་བསྟོད་རྗེས། །ཧོམ་ཁུང་ལྕགས་ཁང་ནང་དུ་གནོད་བྱེད་བཀུག །སྔགས་རིང་སྦྲེལ་མ་ཁོ་ན་བཟླ་བྱ་ཞིང་། །དམིགས་པ་གོང་གི་ལས་དྲུག་ཁོ་ན་བསྒོམས། །
སྔགས་རིང་སྦྲེལ་མཇུག་ཕུར་སྔགས་འདི་ཉིད་བཏགས། །བཛྲ་ཀཱི་ལི་ཀཱི་ལ་ཡ་གནོད་བྱེད་སརྦ་ཤ་ཏྲ་ཧུར་ཐུམ་ཛམཱ་ར་ཡ་ཧཱུྃ་ཕཊ། ཅེས་བརྗོད་ཕུར་པ་བཏབ་ཅིང་ཐུན་གྱིས་བྲབ། །ཆུ་ལྟཡི་ཕ་རོལ་བརྒལ་དང་ལམ་བུ་བཅོས། །རི་གཟར་རྦབ་འདྲིལ་བྱ་ཆེན་བྱ་བྲན་བསད། །ར་གཡག་ཤ་བ་མ་ཐུབ་རྨིས་ནི་ངན། །རང་ལས་མཐོ་ཞིང་འཇིགས་པ་རྒྱབ་རྟེན་ཡོད། །ཁོ་ཡི་རྒྱབ་རྟེན་ལྷ་ལ་གཏོར་མ་བསྔོ། །རྩ་སྔགས་ཤམ་ལ་འདི་ཉིད་ཅུང་ཟད་བཟླ། །དགྲ་བགེགས་ལྷ་སྲུང་དང་ཤག་ཕྱེས་ཤག་ཕྱེས་མ་མ་ཏྲག་རུ་དྲ་མཱ་ར་ཡ་ཧཱུྃ་ཕཊ། ཅེས་བརྗོད་ཁོ་ཡི་ལྷ་སྲུང་། བྱེར་བར་བསྒོམས། །མི་སྡུག་འཇིགས་གཟུགས་བསྟན་ཡང་སྐྲག་མི་བྱ། །སྙན་པའི་ཚིག་གིས་བྲིད་ཀྱང་བདེན་མི་བཟུང་། །ཉི་ཟླ་དུས་གཅིག་ཤར་དང་རང་ཉིད་ཀྱི། །ཁྲག་དང་ནང་གྲོལ་ཕྱི་རུ་ཕྱུང་རྨིས་བཟང་། །ལིང་ག་འཚག་དང་སྐད་ངན་ཙིར་ཙིར་འདོན། །བྲུབ་ཁུང་ནང་དུ་སྒྲ་གྲག་འོད་འཁྱུག་དང་། །བྲུབ་ཁུང་འོག་གམ་རང་འོག་ས་འབུར་འོང་། །དེ་ནི་ཁུག་པའི་རྟགས་ཡིན་བཟང་བ་སྟེ། །མི་གནོད་ཁས་ལེན་དམ་བཅའ་ཞུ་འབུལ་དང་། །བརྡུངས་བསད་ཤ་ཁྲག་དམར་ཉོབ་ཐུབ་པའི་རྟགས། །ལིང་གའི་མགོ་བཅད་མཆོད་རྟེན་ཞབས་འོག་
མནན། །ལིང་གའི་སྨད་བཅད་གཏོར་མའི་ནང་དུ་བླུགས། །གཏུམ་པོ་འཁོར་བཅས་ཞལ་དུ་གསོལ་བར་དམིགས། །སྐེད་པ་དྲག་པོའི་སྦྱིན་སྲེག་སྤྱི་ལྟར་བྱ། །ལིང་གའི་ཚད་ནི་སོར་བཞི་འམ་སོར་བཅུ་གཉིས། །མནན་སྣོད་གཅན་གཟན་ཐོད་པ་ཡོད་ན་ལེགས། །ས་འོག་ཆུ་སྲིན་ཁ་རུ་བཅུག་པར་དམིགས། །རོ་གཡམ་རྒྱ་གྲམ་བྲིས་པས་སྟེང་། །ནས་མནན། །རྐང་པས་བརྫིས་སོགས་བྲོ་མནན་སྤྱི་དང་མཚུངས། །དེ་བྱས་ནག་པོའི་ཀླུ་ཡང་སོད་གྱུར་ན། །གདོན་བགེགས་གཞན་ལ་སྨོས་ཀྱང་ཅི་དགོས་གསུངས། །ཕུར་པ་དེ་ཉིད་བསྒྲུབ་པའི་རྟེན་དུ་འཆང་། །སྨྱོན་པ་སེར་བ་སོགས་ལ་གདེངས་པས་ཐུལ། །གསང་བ་ཐུགས་ཀྱི་ཕུར་གཅིག་མ་ཞེས་བྱ། །གཏོར་མ་བྲུབ་ཁུང་ལིང་གར་བརྡེག་གསུངས་ཀྱང་། །དང་པོ་གནས་གསུམ་གཏུག་ལ་དངོས་གྲུབ་བླངས། །རྩ་སྔགས་ཤམ་ལ་དངོས་གྲུབ་ལེན་པའི་སྔགས། །ཀཱ་ཡ་ཝཱཀ་ཙིཏྟ་སརྦ་སིདྡྷི་ཧཱུྃ། །སྒྲུབ་པ་ཡིན་ན་བསྒྲུབ་པ་མ་གྲོལ་བར། གཞུང་གི་གཏོར་མགྲོན་གཤེགས་པའི་ཚིག་དེ་བསྐྱུར། །དངོས་གྲུབ་བླངས་རྗེས་གཏོར་ལྷ་ནམ་མཁར་བཏེག །ལིང་གའི་སྨད་བཅུག་ཤ་ཁྲག་དམིགས་ལ་བསྔོ། །དེ་ལྷག་གཏོར་མ་མེ་
དཔུང་ཆེན་པོར་དམིགས། །བྲུབ་ཁུང་ནང་གི་ལིང་རོའི་སྟེང་དུ་བརྡེག །བསྲེག་མནན་ལ་སོགས་ཐམས་ཅད་ཚར་བའི་རྗེས། །མཆོད་གཏོར་བཟང་བཤམས་བདག་མདུན་ཚར་གཅིག་བཏང་། །གཏང་རག་ཚུལ་དུ་གཏོར་བསྔོས་གཞུང་ལྟར་བྱ། །གཏོར་མགྲོན་གཤེགས་དང་ཐུན་བསྡུ་གཞུང་ལྟར་རོ། །དེ་ནི་རྗེས་ཆོག་ཡིན་ཞིང་མཚམས་གྲོལ་བྱ། །དེ་ཡིས་གཞུང་གི་སྒྲུབ་པའི་དོན་རྣམས་ཚང་། །དེ་ནས་སྒྲུབ་པའི་རྗེས་སམ་ནམ་ཡང་རུང་། །ལས་བཞིའི་སྦྱིན་སྲེག་སྤྱི་ལྟར་ཤེས་པའི་མིས། །ཐེབ་ཙེའི་ནང་དུ་ཏིལ་ནི་ནག་པོ་བླུགས། །རང་གི་སྙིང་གར་པཾ་ཡིག་ནག་པོ་ལ། །ལུས་ངག་ཡིད་གསུམ་སྡིག་སྒྲིབ་ཐིམ་པར་བསམ། །རང་གི་རྐང་མཐིལ་ཡཾ་ལས་རླུང་གཡོས་པས། །ལྟེ་བའི་རཾ་ལས་གཏུམ་མོའི་མེ་ལྕེ་འབར། །སྙིང་གའི་བཻ་ཡིག་སྡིག་པ་རྭ་ཅན་གྱི། །རྣམ་པར་སྣ་བུག་གཡས་ནས་ཏིལ་ལ་ཐིམ། །དེ་འདྲའི་དམིགས་པ་བདུན་ནམ་ཉེར་གཅིག་བྱ། །དེ་ནས་ཡམ་ཤིང་མར་ཁུ་ཕུལ་བའི་རྗེས། །ཏིལ་ནག་བརྒྱ་དང་རྩ་བརྒྱད་སྔགས་འདིས་ཕུལ། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་སརྦ་པཱ་པཾ་ད་ཧ་ན་ཤཱནཾ་ཀུ་རུ་ཡེ་སྭཱ་ཧཱ། སྡིག་པ་ཆེ་ན་ཉིས་བརྒྱ་སུམ་བརྒྱ་བསྲེགས། །ཤིན་ཏུ་ཆེ་ན་སྟོང་སོགས་
སྐབས་དང་བསྟུན། །མེ་ཏོག་དཀར་པོ་དཀར་གསུམ་ལ་སོགས་པ། །ཞི་བའི་བསྲེག་རྫས་ཅི་འབྱོར་ཙམ་ཞིག་འབུལ། །མདུན་བསྐྱེད་མེ་ལྷ་ཕྱག་རྡོར་ཐུགས་ཀ་ནས། །འོད་ཟེར་དཀར་པོ་རང་གི་སྤྱི་གཙུག་ཞུགས། །སྡིག་སྒྲིབ་ཐམས་ཅད་དུད་ཁུ་སོལ་ཁུ་ལྟར། །བཤང་ལམ་ནས་ཐོན་ས་འོག་སོང་བར་དམིགས། །འདི་ནི་རང་གི་སྒྲིབ་སྦྱོང་མཆོག་ཡིན་པར། །རྒྱ་གཞུང་ཉིད་ནས་ཤིན་ཏུ་རྒྱ་ཆེར་གསུངས། །ནད་པ་གསོ་ན་ནད་པའི་མིང་གཟུགས་བྲིས། །དགྲ་བགེགས་ཞི་འདོད་དེ་ཡི་མིང་གཟུགས་བྲིས། །མེ་ལྷ་ཕྱག་རྡོར་འོད་ཟེར་དམར་པོ་ནི། །མེ་ཡི་རང་བཞིན་འཕྲོས་པས་ནད་པའི་ནད། །དགྲ་དང་བགེགས་ཀྱི་གདུག་རྩུབ་བསམ་ངན་རྣམས། །ཐམས་ཅད་འོད་ཟེར་དེ་ཡིས་གཞོབ་ཐུལ་བསྲེགས། །སླར་ཡང་འོད་ཟེར་དཀར་པོ་འཕྲོས་པ་ཡིས། །ནད་དང་གདུག་རྩུབ་ཐམས་ཅད་ཞི་བར་དམིགས། །གཟུགས་མིང་དེ་ཡང་སྦྱིན་སྲེག་ནང་དུ་བཞུ། །ནད་ལ་གྲོ་དང་བགེགས་ལ་ཡུངས་ཀར་འབུལ། །གོང་ལྟར་ཕཊ་སྤངས་པ་ཡི་སྔགས་དེ་ལ། །ཆེ་གེའི་ནད་གདོན་ཤཱནཾ་ཀུ་རུ་ཡེ་སྭཱ་ཧཱ། བརྒྱ་སྟོང་ལ་སོགས་སྐབས་དང་བསྟུན་པར་བྱ། །དེ་བཞིན་མེ་ཏོག་སེར་པོ་རིན་
ཆེན་འབྲུ། །བརྒྱ་རྩ་བརྒྱད་བསྲེགས་འོད་ཟེར་སེར་པོ་ཡིས། །རང་གཞིན་ཚེ་དང་བསོད་ནམས་རྒྱས་པར་དམིགས། །ཆྒེ་པུཥྚིཾཀུ་རུ་བྷྱོ་ཤད། །མེ་ཏོག་དམར་པོ་སྨན་སྣ་བརྒྱ་རྩ་བསྲེགས། །འོད་ཟེར་དམར་པོས་སྣང་སྲིད་དབང་བསྡུས་བསམ། །གང་འདོད་ཆེ་གེ་ཛ་ཛཿཧོཿ །མེ་ཏོག་སྔོན་པོ་དུག་སྣ་ཤ་ཁྲག་ཚོགས། །ཐུན་རྫ་ས་ལིང་གར་བཏབ་པ་བརྒྱ་རྩ་བསྲེགས། །སྔགས་རིང་ཉེར་བརྒྱད་པའམ་གཉིས་ཀའི་མཇུག །གནོད་བྱེད་མཱ་ར་ཡ་ཕཊ། ཚངས་པའི་ཚེ་དང་ལྡན་ཡང་བརླག་པར་གསུངས། །འདི་ཡི་སྔགས་རིང་ནཱ་ག་ཞེས་པ་རྣམས། །ཀླུ་ཡི་གནོད་དང་ཀླུ་ཉིད་འདུལ་སྔགས་ཏེ། །དེ་མིན་དགྲ་བགེགས་གཞན་ལ་ཡིན་ན་ནི། །ཀླུ་ཉིད་ལས་མཁན་གྱུར་ནས་དེ་གསོད་བྱེད། །དེ་ནི་སློབ་དཔོན་རྣམས་ཀྱི་ཞལ་ཁྲིད་ཡིན། །རང་ཉིད་གཏུམ་པོའི་བ་སྤུའི་བུ་ག་ནས། །ཁྲོ་ཆུང་མཚོན་ཆ་ཐོགས་པ་སྐར་ལྟར་འཁྲུགས། །རང་ཉིད་བསྐལ་པའི་མེ་དཔུང་ཀློང་ན་བཞུགས། །ཀླུ་ལས་འཕྲོས་པའི་མེ་དཔུང་ཁྲོ་ཚོགས་ཀྱིས། །གནོད་བྱེད་གང་ཡིན་ནམ་མཁའི་མཐར་བསྐྱེད་བསྒོམ། །རྩ་སྔགས་མཇུག་ཏུ་འདི་བཏགས་ཅུང་ཟད་བཟླ། །ཨོཾ་ར་ཙ་སྟེ་བྷ་ཡ་ཆིང་ཆིང་སྭཱ་ཧཱ། །དེ་ཡིས་ཕོ་
གདོན་རྒྱལ་པོའི་གནོད་པ་ཟློག །བྷྱོ་མ་མ་ཏྲག་རཀྵ། མ་མ་ཏྲག་རུ་སྭཱ་ཧཱ། དེ་ཡིས་མོ་གདོན་རིགས་ཀྱི་གནོད་པ་ཟློག །དེ་ཡིས་ལས་ཚོགས་ཉེར་མཁོ་ཐམས་ཅད་ཚང་། །དེ་ནས་དེ་དག་ཕན་ཡོན་བསྟན་པ་ནི། །ཕྱག་རྡོར་གསང་བ་བསྟན་པའི་རྒྱུད་དང་ནི། །གཏུམ་པོ་ནཱ་ག་ཀླུ་འདུལ་ནག་པོའི་རྒྱུད་གཉིས་ཀ་ནས་རྩ་སྔགས་ཙཎྜ་མ་གསུངས། འཕགས་པ་བར་དུ་གཅོད་པ་སེལ་བའི་གཟུངས་ལས་ཀྱང་ཙཎྜ་མ་གསུངས་ནས། གཤིས་ངན་དུ་འཆི་བ་བཅུ་གསུམ་སྟེ། དུག །མཚོན། ལྷོག་པ། མཚོན་བརྒྱབ་པ། གཅན་གཟན་གྱིས་ཟ་བ། མེས་ཚིག་པ། ཆུས་འཆི་བ། འགོ་བའི་རིམས་གཞན་ཡ་ང་བ། མཛེ་ནད། གསོར་མི་རུང་བའི་ནད་ཡ་ང་བ། གཡང་ལ་ལྟུང་བ། གཞན་གྱི་བྱད་དང་། ཟས་ཀྱིས་བརྣངས་བ་དང་། བདག་རང་གིས་གསོད་པ་སྟེ། གཤིས་ངན་དུ་འཆི་བ་བཅུ་གསུམ་གྱིས་རྐྱེན་བྱེད་པར་མི་འགྱུར་རོ། །འདི་འཛིན་པ་དང་། འཆང་བ་དང་། །བཟླས་བརྗོད་བྱེད་པ་ལ་ནི། ས་དང་ནམ་མཁའ་ལ་གནས་པའི་བགེགས་དྲེགས་པ་ཅན་མ་རུངས་པ་རྣམས་ཀྱིས་གླགས་རྙེད་པར་མི་འགྱུར་རོ། །དེ་ལ་ལས་ཀྱི་སྒྲིབ་པ་དང་། ཉོན་
མོངས་པའི་སྒྲིབ་པ་དང་། ཤེས་བྱའི་སྒྲིབ་པ་ཐམས་ཅད་བྱང་ཞིང་དག་སྟེ་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །ནཱ་ག་ཀླུ་འདུལ་གཏུམ་པོའི་རྒྱུད་ལས། ཀླུ་རྣམས་ཀྱིས་གསོལ་པ། གཏུམ་པོ་ཁྱུང་གི་ཚོགས་རྣམས་ཀྱི། །བཀའ་ལས་མི་འདའ་ཚུལ་བཞིན་སྒྲུབས། །གལ་ཏེ་བཀའ་ལས་འདས་གྱུར་ན། །བདག་ཅག་ཀླུ་རྣམས་རྡུལ་དུ་བརླག་གྱུར་ཅིག །ཅེས་ཀླུ་རྣམས་ཀྱིས་དམ་བཅས་སོ། །གཏད་མནན་བྱས་པ་རང་ལ་ལོག་དོག་གམ། །རང་ཉིད་གཞན་གྱི་གཏད་ཞབས་སོང་བའམ། །ཀླུ་དང་ས་བདག་ནད་གདོན་ལུས་ཞུགས་ན། །རང་གི་ལུས་ནི་བུད་ཤིང་ཕུང་པོར་བསམས། །རང་སེམས་རཾ་ལས་ཡེ་ཤེས་མེ་འབར་བས། །རང་ལུས་བུད་ཤིང་ཀླུ་དང་བཅས་པ་ཚིག །ཙཎཱའི་སྔགས་མཇུག་འདི་ཉིད་བཏགས་ལ་བཟླ། །ༀ་བཛྲ་མ་ཧཱ་ཀྲོ་དྷ་པད་མ་ཀྲོ་ཏཱི་ཤྭ་རཱི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་རཾ་ཧཱུྃ་ཕཊ། ནཱ་ག་དུ་ཙནྡ་ཙནྡྲ་མི་ལི་མི་ལི་བྷནྡྷ་བྷནྡྷ་ནཱ་ག་ནི་སྭཱ་ཧཱཿ །སྙིང་མི་དགའ་དང་བརྒྱལ་དང་འདར་ན་བཟླ། །དེ་མིན་སྔགས་རིང་དེ་ཉིད་བཟླ་མི་དགོས། །དེ་ནས་རང་ལུས་སྟོང་པར་གྱུར་པ་དེ། །སྐད་ཅིག་དྲན་རྫོགས་རྡོ་རྗེ་གཏུམ་པོར་
གསལ། །གནས་ལྔ་ཁྱུང་ལྔ་ཡེ་ཤེས་སེམས་དཔའ་བཅས། །སྤྱི་གཙུག་རྒྱལ་རིགས་འདུལ་བྱེད་ཁྱུང་ནི་དཀར། །དཔུང་གཡས་དམངས་རིགས་འདུལ་བའི་ཁྱུང་ནི་སྔོ། །བརླ་གཡས་བྲམ་ཟེ་འདུལ་བའི་ཁྱུང་ནི་དམར། །བརླ་གཡོན་གདོལ་པ་འདུལ་བའི་ཁྱུང་ནི་ལྗང་། །དཔུང་གཡོན་རྗེའུ་རིགས་འདུལ་བའི་ཁྱུང་ནི་སེར། །རྒྱབ་ཏུ་ཀླུ་མོ་འདུལ་བའི་ཁྱུང་མོ་བཞི། །སོག་གཡས་མེ་ཏོག་འཛིན་པའི་ཁྱུང་མོ་དཀར། །སོག་གཡོན་བདུག་སྤོས་འཛིན་པའི་ཁྱུང་མོ་སེར། །དཔྱི་གཡོན་མར་མེ་འཛིན་པའི་ཁྱུང་ནི་དམར། །དཔྱི་གཡས་དྲི་ཆབ་འཛིན་པའི་ཁྱུང་མོ་ལྗང་། །བ་སྤུ་ཐམས་ཅད་ཁྱུང་ཕྲུག་སྔོན་པོས་གཏམས། །སྐུ་ལས་སྤྲུལ་པའི་ཁྱུང་ཆེན་སྣ་ཚོགས་འཕྲོ། །ཡང་སྤྲུལ་ཁྱུང་ནི་བུ་ཡུག་བཞིན་དུ་འཚུབ། །སུམ་སྤྲུལ་ཁྱུང་གིས་སྟོང་གསུམ་འཇིག་རྟེན་གང་། །ཀུན་ཀྱང་གཡུ་ཡི་སྨིན་མ་མེ་ལྕེ་འབར། །སྤྱན་ནི་ཁྲག་གི་རང་བཞིན་རྦ་རླབས་འཁྲུགས། །གནམ་ལྕགས་འབར་བའི་རྭ་ལ་དུད་པ་ཐུལ། །སྤྱི་གཙུག་ནོར་བུ་དགོས་འདོད་ཆར་པ་འབེབས། །རྡོ་རྗེ་ཕ་ལམ་མཆུ་སྡེར་རྣོ་ཞིང་མཁྲེགས། །རལ་གྲིའི་གཤོག་པ་ཆུ་གྲིའི་མཇུག་སྒྲོ་ཅན། །སྤུ་གྲིའི་ཐིལ་ཕྲན་གསེབ་ནས་
བྱེ་ཚན་འབེབས། །ཀྲང་ཀྲིང་སྒྲ་སྒྲོག་འཕུར་ལྡིང་སྣ་ཚོགས་བྱེད། །གནོད་བྱེད་རང་མདོག་སྦྲུལ་གྱི་རྣམ་པར་ཟ། །དེ་ལྟར་ཁྱུང་ཆེན་ཉེར་གཅིག་གོ་ཆ་འདི། །ལས་སྐྱོགས་དྲག་པོ་ནམ་ཕྱེད་བསྒོམ་པར་གསུངས། །དེ་ནས་མཚམས་གཅོད་བསྲུང་བའི་དམིགས་རིམ་ནི། །བསྲུང་བྱ་ཐམས་ཅད་རང་གི་གཡས་གཡོན་བསམ། །སྐུ་ལས་འོད་ཟེར་ཁ་དོག་ལྔ་འཕྲོས་པས། །སྟེང་འོག་ཕྱོགས་མཚམས་བར་མཚམས་སྲུབ་མེད་པར། །འོད་ཟེར་དཀར་པོ་རྡོ་རྗེ་དཀར་པོའི་གུར། །སེར་པོ་ནོར་བུས་མཚན་པའི་ཕུར་པའི་གུར། །དམར་པོ་པདྨས་མཚན་པའི་གྲི་གུག་གུར། །ལྗང་གུ་རྒྱ་གྲམ་མཚན་པའི་རལ་གྲིའི་གུར། །མཐིང་ཀ་སྟེང་འོག་གནམ་ལྕགས་འཁོར་ལོ་ནི། །རྩིབས་སྟོང་སོ་འཐབས་གཡས་གཡོན་འཁོར་བའི་གུར། །དེ་རྒྱབ་འོད་ལྔ་འཁྲུགས་པའི་ཡེ་ཤེས་ཀྱི། །མེ་རི་ཁ་དོག་ལྔ་ལྡན་འབར་བར་བསྒོམ། །ཡེ་ནས་དམ་ཚིག་ཡེ་ཤེས་དབྱེར་མེད་དེ། །སྤྱན་འདྲེན་དབང་བསྐུར་མི་དགོས་དྲན་རྫོགས་ཡིན། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་གནོད་བྱེད་ཨུ་ཙ་ཏ་ཡ་ཧཱུྃ་ཕཊ། །འདི་ནི་རྒྱུན་ཁྱེར་རང་གཞན་བསྲུང་བའི་མཆོག །དེ་ལྟར་སེམས་དཔའ་རང་བྱུང་རྡོ་རྗེ་ཡི། །ཁྱད་ཆོས་ཤམ་བུ་ཅན་གྱི་ཆོས་བཞི་
ལས། །ཕྱག་ན་རྡོ་རྗེ་ཁྱུང་གི་ཤམ་བུ་ཅན། །རྒྱ་ཆེན་རྒྱུད་གཞུང་རྣམས་ནས་འབྱུང་བ་དང་། །མན་ངག་སློབ་དཔོན་རྣམས་ཀྱི་ཞལ་གདམས་དང་། །རང་ལོ་བཅོ་བརྒྱད་ལོན་ནས་ད་ཡི་བར། །ཉམས་སུ་བླངས་བའི་མྱོང་བ་དང་བསྟུན་ནས། །རིག་སྔགས་འཆང་བ་མཐར་ཕྱིན་ཞེས་བྱ་བས། །ཡང་ཡང་ནན་གྱིས་བསྐུལ་བ་དོན་ཡོད་ཕྱིར། །ལུག་ལོ་ས་གའི་དམར་པོའི་ཚེས་གཅིག་གི་།སྔ་དྲོའི་ཆ་ལ་རཱ་ག་ཨ་སྱས་གདམས། །ཡི་གེ་པ་ཡང་ཞུ་བ་པོ་དེས་བྱས། །ཉེས་འགལ་གང་མཆིས་ཡི་དམ་ལྷ་ལ་བཤགས། །དགེ་བས་འགྲོ་ཀུན་རྡོ་རྗེ་འཛིན་ཐོབ་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།