རྡོ་རྗེ་རྣམ་པར་འཇོམས་པའི་རྒྱུན་ཁྱེར་ཡིད་ཀྱི་ཟླ་ཟེར།
རྡོ་རྗེ་རྣམ་པར་འཇོམས་པའི་རྒྱུན་ཁྱེར་ཡིད་ཀྱི་ཟླ་ཟེར་ཞེས་བྱ་བ་བི་ཛ་ཧ་ར། བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་ཀུན་དོན་དུ་རྣམ་པར་འཇོམས་པ་བསྒྲུབ། །རང་ཉིད་ལྷར་གསལ་འོད་ཀྱིས་ཚོགས་ཞིང་རྣམས། །ནམ་མཁའ་སྤྱན་དྲངས་ཕྱག་འཚལ་མཆོད་ཚོགས་འབུལ། །སྡིག་པ་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་རྟག་པར་བཞུགས་གསོལ་འདེབས། །དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །འགྲོ་ཀུན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་དང་མི་འབྲལ་བཏང་སྙོམས་ལ་གནས་ཤོག །ཚོགས་ཞིང་རང་ཐིམ་མི་དམིགས་སྟོང་ཉིད་ངང་། །རྡོ་རྗེའི་རྭ་གུར་མེ་རི་འབར་བའི་ནང་། །པད་ཉི་ཧཱུྃ་ལས་རྒྱ་གྲམ་ཧཱུྃ་མཚན་ལས། །འོད་འཕྲོས་དོན་གཉིས་བྱས་ནས་ཚུར་འདུས་པས། །རང་ཉིད་རྣམ་འཇོམས་ལྗང་སྔོན་ཁྲོ་ཞིང་འཛུམ། །དབུ་སྐྲ་ཁམ་སེར་གྱེན་བརྫེས་སྤྱན་གསུམ་ལྡན། །ཕྱག་གཡས་སྣ་ཚོགས་རྡོ་རྗེ་ཐུགས་ཀར་གསོལ། །གཡོན་པས་དྲིལ་བུ་དཀུར་བརྟེན་སྐྱིལ་ཀྲུང་བཞུགས། །དར་དང་རིན་ཆེན་རྒྱུན་ལྡན་མེ་དཔུང་འབར། །གནས་གསུམ་འབྲུ་གསུམ་ཧཱུྃ་ལས་འོད་འཕྲོས་པས། །ཡེ་
ཤེས་སྤྱན་དྲངས་དམ་ཡེ་དབྱེར་མེད་ཅིང་། །དབང་ལྷས་དབང་བསྐུར་རྡོར་སེམས་དབུ་བརྒྱན་གྱུར། །ཐུགས་ཀར་ཉི་སྟེང་སྣ་ཚོགས་རྡོ་རྗེའི་ལྟེར། །ཧཱུྃ་མཐར་གཟུངས་སྔགས་གཡས་སུ་འཁོར་བ་ཡི། །འོད་ཀྱིས་གྲིབ་དང་སྔགས་ཀྱི་ལྷག་ཆད་སྦྱངས། །རིག་སྔགས་ནུས་མཐུ་དཔག་མེད་འཕེལ་བར་གྱུར། །རྒྱ་གར་སྐད་དུ་བཛྲ་བི་དཱ་ར་ཎ་སོགས་གཞུང་ཅི་ནུས་བཟླ། དེ་ནས། རང་ལས་སྤྲུལ་པའི་མཆོད་པའི་ལྷ་མོ་ཡིས། །རྡོ་རྗེ་རྣམ་པར་འཇོམས་ལ་མཆོད་ཅིང་བསྟོད། །ཨོཾ་བཛྲ་བི་དཱ་ར་ན་ཨརྒྷཾ་སོགས་ཤབྟ་ཨཱཿཧཱུྃ། དེ་བཞིན་གཤེགས་པ་ཐམས་ཅད་ཀྱི། །མཐུ་སྟོབས་གཅིག་ཏུ་བསྡུས་པ་ཡི། །རྡོ་རྗེ་ཁྲོ་བོའི་སྐུར་སྟོན་པ། །རྣམ་པར་འཇོམས་ལ་ཕྱག་འཚལ་བསྟོད། །ཡེ་ཤེས་པ་གཤེགས་དམ་ཚིག་མི་དམིགས་གྱུར། །དགེ་བས་རྡོ་རྗེ་རྣམ་འཇོམས་བདག་འགྲུབ་ཤོག །ཅེས་ཨོཾ་རྒྱན་རིག་འཛིན་རྒྱུན་ཁྱེར་དུ། ཨ་རྭ་གིས་བྲིས་པ་ཉེས་བཤགས་དགེ་བ་བྱང་ཆུབ་རྒྱུ་བསྔོའོ། །སརྦ་མངྒ་ལཾ།། །།