གནམ་ཆོས་ལས་བྱུང་བའི་རྣམ་འཇོམས་ལྗང་སྔོན་གྱི་བྱབ་ཁྲུས།
གནམ་ཆོས་ལས་བྱུང་བའི་རྣམ་འཇོམས་ལྗང་སྔོན་གྱི་བྱབ་ཁྲུས་ཞེས་བྱ་བ་བཞུགས་སོ༔
འདིའི་བྱབ་ཁྲུས་ལ་གཞིའི་སྟེང་དུ་འབྲུའི་པདྨ་འདབ་བརྒྱད༔ དེའི་སྟེང་བུམ་པ་རྫས་ལྡན་ཁ་རྒྱན་མགུལ་ཆིངས་དང་བཅས་པ༔ དེའི་མདུན་དུ་མཆོད་པ་སྤྱི་ལྟར་བཤམས༔ བྱབ་ཁྲུས་ཀྱི་རྫས་ཏིལ་ལམ་ཡུངས་ཀར་རམ་ཡུངས་གཞི༔ བལ་འདབ་དཀར་ནག༔ ལྕོག་རྡོག༔ ཆངས་བུ༔ ཏིང་ལོ༔ བྱབ་པའི་རྫས་ཀུ་ཤ༔ རྨ་བྱའི་མདོངས༔ ཡང་ན་རལ་གྲི༔ བཟང་ཤིང་གི་ཡལ་ག༔ བྱ་རོག་གི་སྒྲོ༔ ངར་མི༔ རྡོར་དྲིལ་སོགས་འཛོམ་པར་བྱས༔ སྐྱབས་སེམས་སྤྱི་ལྟར་སྔོན་དུ་སོང་ནས༔ མངོན་རྟོགས་གཅིག་གིས་བདག་དང་མདུན་བསྐྱེད་དང་བུམ་པའི་ནང་དུས་གཅིག་ལ་བསྐྱེད་པ་རྙིང་མའི་ཁྱད་ཆོས་སོ༔ ཨོཾ༔ ཆུཆུངྐུ༔ རྡོ་རྗེ་རྣམ་པར་འཇོམས་ལ་འདུད༔ འདི་ཉིད་བསྒྲུབ་པའི་རིམ་པ་ནི༔ རང་ཉིད་རྣམ་འཇོམས་
ལྗང་སྔོན་ལ༔ ཞལ་གཅིག་ཕྱག་གཉིས་གཡས་པ་ཡིས༔ སྣ་ཚོགས་རྡོ་རྗེ་ཐུགས་ཀར་གསོར༔ གཡོན་པས་དྲིལ་བུ་དཀུ་ལ་བརྟེན༔ ཞབས་གཉིས་སེམས་དཔའི་སྐྱིལ་ཀྲུང་བཞུགས༔ དར་དང་རིན་པོ་ཆེ་ཡིས་བརྒྱན༔ ཞལ་གཅིག་ལ་ནི་སྤྱན་གསུམ་པ༔ ཞལ་ནི་འཛུམ་ལ་སྤྱན་ནི་བགྲད༔ པདྨ་ཉི་ཟླའི་གདན་ལ་བཞུགས༔ ཐུགས་ཀའི་ཧཱུྃ་ལ་སྔགས་བསྐོར་བས༔ འོད་ཟེར་དཔག་ཏུ་མེད་པ་འཕྲོས༔ རྡོ་རྗེ་རྣམ་འཇོམས་སྤྱན་དྲངས་བསྟིམ༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ་སྭཱ་ཧཱཿ དེ་ཡིས་རྡོ་རྗེ་རྣམ་འཇོམས་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔
འདིའི་ཞལ་གདམས་ལ༔ དང་པོ་སྐད་ཅིག་གིས་བསྐྱེད༔ སྔགས་གྲངས་སོགས་མེད༔ འདི་ལ་གཟུངས་རིང་བཏགས་ནས་བཏོན་ན་ལེགས༔ ས་མ་ཡ༔ ཞེས་པ་འདི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་པ། མེ་སྤྲེའུ་ལོ་མགོ་ཟླ་བའི་ཚེས་བདུན་ནུབ་རྡོ་རྗེ་རྣམ་འཇོམས་མངོན་རྟོགས་དང་མཚུངས་པ་གཅིག་ཞལ་དངོས་སུ་གཟིགས་ནས་སྒྲུབ་པ་འདི་དངོས་སུ་བཀའ་སྩལ་ཏོ༔ ༈ དང་པོ་བདག་བསྐྱེད་ལ་དམིགས་ནས་གཟུངས་ཚར་གཅིག་དང་སྙིང་པོ་བརྒྱ༔ དེ་ནས་བུམ་བསྐྱེད་ལ་དམིགས་ནས་གཟུངས་ཚར་གཅིག་གམ་ཉེར་གཅིག་སྙིང་པོ་བརྒྱ་རྩ༔ དེ་ནས་བདག་མདུན་བུམ་པ་གསུམ་ཀ་ལ་རྒྱས་པར་འདོད་ན། རབ་འབྱམས་རྒྱ་མཚོ་སོགས་དང་༔ ཁ་དོག་དབྱིབས་ལེགས། རྒྱལ་སྲིད་མཆོད་པ་དང་༔ མཉམ་མེད་མ་དང་། སངས་རྒྱས་ཀུན་བས་སོགས་མཚན་བརྒྱས་བསྟོད་ཀྱང་རུང་ལ༔ བསྡུ་ན། ཨོཾ་ཨཱབཛྲ་བི་དཱ་ར་ཎ་ཨརྒྷཾ་སོགས། དེ་བཞིན་གཤེགས་པ་ཐམས་ཅད་ཀྱི༔ སྐུ་གསུང་ཐུགས་ཀྱི་ངོ་བོ་ཉིད༔ ཐུགས་ཀྱི་རྣམ་འཕྲུལ་རྡོ་རྗེ་སེམས༔ རྣམ་པར་འཇོམས་ལ་ཕྱག་འཚལ་བསྟོད༔ ཤོ་ལོ་ཀ་གཅིག་གིས་བསྟོད་པས༔ བུམ་ལྷ་འོད་དུ་ཞུ་ནས་བདུད་རྩིའི་ཆུར་བསམ༔ དེ་ནས་ནད་པ་སོགས་སློབ་མ་མདུན་དུ་འདུག་བཅུག་ལ་འོ་ན་ད་ལམ་ཁྱེད་རྣམས་ལ་རྡོ་རྗེ་རྣམ་པར་འཇོམས་པའི་སྒོ་ནས་ཁྲུས་བྱབ་སྲུང་གསུམ་བྱེད་པ་ཡིན་
ཏེ༔ སྔོན་རྒྱལ་པོ་ལོག་པའི་སྙིང་པོ་ཅན་དེ་བདུད་ལྷས་བྱིན་གྱིས་བསླུས་ནས་སངས་རྒྱས་ལ་གླང་པོ་ཆེ་སྨྱོན་པ་དང་ཁྱི་གཏུམ་པོ་བཀྱེས༔ སྐྱོགས་སྟོབས་ཆེན་རྐང་དྲུག་བརྒྱབ༔ གཙུག་ལག་ཁང་བཤིགས༔ གླེགས་བམ་རྣམས་ཆུར་བསྐུར༔ རང་གི་ཕ་བསད་པ་སོགས་བྱས་པས་ཆོས་སྐྱོང་བའི་སྲུང་མ་རྣམས་འཁྲུགས་ནས༔ འཛམ་བུ་གླིང་དུ་མི་ནད་དང་ཕྱུགས་ནད་ཆེན་པོ་བྱུང་༔ རྒྱལ་པོ་ཉིད་ནད་རྐང་བཀྲ་བྱ་བའི་ཟུག་གཟེར་ཅན་བྱུང་བས༔ དེ་རྣམས་ཕན་ཕྱིར་རྒྱལ་པོ་སྡེ་བཞིས་ཞུས་ནས། བཅོམ་ལྡན་འདས་ཀྱིས་རྡོ་རྗེ་རྣམ་འཇོམས་རྩ་རྒྱུད་ལེའུ་བརྒྱ་རྩ་བརྒྱད་གསུངས༔ རྒྱལ་ཆེན་སྡེ་བཞིས་རྒྱལ་པོ་ལོག་པའི་སྙིང་པོ་ལ་བཤད༔ རྒྱལ་པོས་ཁྲུས་བྱས་པས་ནད་ཕན༔ མི་ནད་ཕྱུགས་ནད་ཆད་དོ༔ དེ་ནས་རྒྱ་གར་དུ་འདིའི་སྒོ་ནས་གྲུབ་པ་ཐོབ་པ་ལྔ་བྱུང་སྟེ༔ རྒྱལ་པོ་གཟུགས་ཅན་སྙིང་པོའི་ལུས་ངག་ཡིད་གསུམ་གྱི་སྒྲིབ་པ་མ་དག་ནས་སྤྱི་བོ་དང་ལྕེ་དང་སྙིང་ག་གསུམ་དུ་ཝ་ཊྛོབ་ཆེན་པོ་གསུམ་བྱུང་བ་ཡང་རྣམ་འཇོམས་ཀྱི་ཁྲུས་འདི་བྱས་པས་ཕན༔ ནཱ་རོ་པཎྜི་ཏ་གསུང་གི་དམ་ཚིག་ཉམས་ནས་ལྗགས་ལ་ཆུ་བུར་ཆེན་པོ་བྱུང་ནས་འདས་ལ་ཁད་དུ་ཡོད་པ་ལ་
རྣམ་འཇོམས་ཀྱི་ཁྲུས་འདི་བྱས་པས་ཕན། མཁའ་འགྲོ་མ་ཌོམ་བི་ཀཱ་ར་མས་རྣམ་འཇོམས་བསྒྲུབས་པས་ལོ་གཅིག་ནས་སྤྱི་བོར་བུམ་པ་དངོས་སུ་བབས༔ གསེར་གྱི་བུམ་པ་བདུན་སྟོང་ལྔ་བརྒྱའི་གཏེར་ཐོན༔ བྲམ་ཟེ་ཤི་ཀ་རས་བསྒྲུབས་པས་ཀླུ་རིགས་བཞི་བསྒྲལ༔ སློབ་དཔོན་བི་མ་ལས་བྱབ་ཁྲུས་མཛད་པས་ཤི་བ་གསོན་པོར་བསྒྱུར༔ དེ་བསྟན་པ་ལ་གནོད་པའི་མི་ཡིན་ཞུས་པས་རྣམ་ཤེས་རྣམ་འཇོམས་ཀྱི་སྐུ་ནས་འབྲུ་ཙམ་བྱས་ནས་འོག་མིན་དུ་སྤར་རོ༔ དེ་ལྔ་ནི་རྣམ་འཇོམས་ཀྱི་སྒོ་ནས་གྲུབ་པ་ཐོབ་པ་ཡིན་སྐད༔ དེ་ལ་བི་མ་ལ་མི་ཏྲ་ནས་བརྒྱུད་པའི་རྙིང་མ་དང་༔ བ་རི་ལོ་ཙཱ་ནས་བརྒྱུད་པའི་གསར་མ་དང་༔ གཏེར་ཁ་ཡང་མང་པོ་ནས་བྱུང་བའི་རྣམ་འཇོམས་རིགས་མང་ན་ཡང་༔ འདི་ནི་གནམ་ཆོས་ལས་བྱུང་བ་སྟེ་བརྒྱུད་པ་ཉེ་བའི་ཕྱིར་བྱིན་རླབས་མྱུར་བ་ཡིན་ནོ༔ འདིའི་ཕན་ཡོན་ནི༔ སྡིག་པ་ཐམས་ཅད་བྱང་བྱས་ནས༔ སྡུག་བསྔལ་ཐམས་ཅད་མེད་པར་བྱེད་རྒྱུད་དོ་ཅོག་གི་རྩ་བ་སྟེ༔ དཔལ་ཀུན་གྱིས་ནི་ལེགས་པར་བརྒྱན༔ སེམས་ཅན་དབང་པོ་ཉམས་པ་དང་༔ ཚེ་ཟད་པ་དང་ཚེ་ཉམས་དང་༔ ཕུན་སུམ་ཚོགས་མིན་གང་ཆགས་དང་༔
ལྷ་རྣམས་རྒྱབ་ཀྱིས་ཕྱོགས་པ་དང་༔ མཛའ་སྡུག་སྐྱེ་བོ་སྡང་བ་དང་༔ བྲན་བཟའ་ལ་སོགས་གཙེས་པ་དང་༔ ཕན་ཚུན་མཐུན་པ་མ་ཡིན་དང་༔ ནོར་གྲིབ་པས་ནི་གནོད་པ་དང་༔ མྱ་ངན་ངལ་དང་གནོད་པ་དང་༔ འཇིགས་པ་དང་ནི་ཕོངས་པ་དང་༔ གཟའ་དང་རྒྱུ་སྐར་བྱད་སྟེམས་དང་༔ མི་བཟད་གདོན་གྱིས་ཉེས་པ་དང་༔ མྱ་ངན་ངལ་ལས་བྱུང་བ་ཡི༔ རྨི་ལམ་སྡིག་པ་མཐོང་ན་ཡང་༔ དེ་ནི་རབ་བཀྲུས་གཙང་མ་ཡིན༔ མདོ་སྡེ་དམ་པ་མཉན་པར་བྱ༔ གང་དག་ཡིད་དགེ་སེམས་དང་ཞིང་༔་གཙང་མའི་གོས་ཀྱིས་རབ་བརྒྱན་ཏེ༔ ཟབ་མོ་སངས་རྒྱས་སྤྱོད་ཡུལ་བ༔ མདོ་སྡེ་འདི་ནི་ཉན་བྱེད་ན༔ མདོ་སྡེ་འདི་ཡི་གཟི་བརྗིད་ཀྱིས༔ སྲོག་ཆགས་དག་ནི་ཐམས་ཅད་ཀྱི༔ མི་བཟད་པ་ཡི་ནད་རྣམས་ཀྱང་༔ དེ་དག་ཐམས་ཅད་ཞི་བ་ལྟར༔ ཚེ་དང་བསོད་ནམས་འཕེལ་བར་གྱུར༔ སྡིག་པ་ཀུན་ལས་རྣམ་པར་ཐར༔ ཞེས་སོགས་རྒྱུད་ཀྱི་ཕན་ཡོན་ཀུན་གྱི་ཚིག་ཐུགས་ལ་མངའ་བ་ལྟར་ཡིན་པས་དེའི་དོན་དུ་མཎྜལ་ཕུལ༔ ས་གཞི་སྤོས་སོགས། འདི་མན་ཆད་ཚིགས་བཅད་ཡིན་པས་དབྱངས་འདེབས་ཐུང་གིས་བྱའོ༔ ཧཱུྃ༔ མདུན་གྱི་ནམ་མཁར་རྣམ་འཇོམས་
ལྷ་ཚོགས་བཞུགས༔ ཁྱེད་རྣམས་བྱབ་ཁྲུས་ཞུ་བའི་ངོ་ཆེན་ཚུལ༔ བདག་གིས་གསོལ་བ་འདེབས་རོགས་བྱས་པར་བསྒོམ༔ དྲིལ་བུ་འཁྲོལ་ཞིང་༔ སྔོན་ཚེ་བདེ་གཤེགས་ཕོ་བྲང་སྤྱན་སྔ་རུ༔ གདུག་པ་འདུལ་ཕྱིར་རྡོ་རྗེ་ཅན་གྱིས་ནི༔ རྗེས་མཐུན་ཕྲིན་ལས་ཁྱད་པར་གང་བསྒོམས་པ༔ དམ་བཅས་ཕྲིན་ལས་དེ་ནི་རྗེས་དགོངས་ལ། དེ་ཕྱིར་བགེགས་དང་ལོག་འདྲེན་ཚར་ཆོད་ཅིག༔ འགྲོ་བ་འདི་དག་རྗེས་སུ་བཟུང་བའི་ཕྱིར༔ སྡུག་བསྔལ་ངེས་བསལ་བདེ་ལེགས་འབྱོར་ལ་སོགས༔ ཁྲོ་རྒྱལ་ཁྱེད་ཀྱིས་དེང་འདིར་བྱིན་རླབས་མཛོད༔ ལན་གསུམ་མམ་གཅིག་ཀྱང་རུང་ངོ༔ དེ་ནས་ལྕོག་རྡོག་གསུམ་མམ་གཅིག་༔ ཆངས་བུ་ཏིང་ལོ་གསུམ་རེའམ་གཅིག་བཤམས་ལ་བྲན་ནས༔ ཨ་ཀཱ་རོ་སོགས་བརྗོད་ལ་བྱིན་བརླབས་ནས༔ ན་མོ་སངས་རྒྱས་ཆོས་དང་དགེ་འདུན་དང་༔ བདེན་སྨྲ་ཀུན་གྱི་བདེན་ཚིག་དང་༔ སྙིང་པོ་སྔགས་དང་ཕྱག་རྒྱ་དང་༔ གསང་སྔགས་རིག་སྔགས་གཟུངས་སྔགས་དང་༔ རྡོ་རྗེ་རྣམ་འཇོམས་བདེན་པའི་མཐུས༔ བསྲུང་བྱ་འདི་ལ་གནོད་བྱེད་པའི༔ བགེགས་དང་ལན་ཚོགས་འབྱུང་པོ་རྣམས༔ གཏོར་མ་འདི་ཡིས་ཚིམ་པར་གྱིས༔ བུ་ལོན་ལན་ཆགས་འཇལ་ཟིན་
གྱིས༔ ཕྱིན་ཆད་གནོད་པའི་སེམས་སྤོངས་ཤིག༔ ལྕོག་རྡོག་ཐེབ་ཙེ་གཡས་སུ་བསྐོར་ཞིང་༔ ན་མསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་སོགས་ལན་གསུམ་བྱ་ཞིང་ངར་མིའི་ནང་དུ་བླུགས་བསྲུང་བྱ་འདི་ལ་གནོད་བྱེད་རྣམས༔ ཆངས་བུ་འདི་ཡིས་ལམ་བརྒྱགས་དང་༔ ཏིང་ལོ་འདི་ཡིས་ལམ་སྒྲོན་གྱིས༔ གནོད་ཅིང་འཚེ་བའི་རིག་སྤངས་ནས༔ ཕྱི་ཡི་ལྕགས་རི་ནག་པོའི་རྒྱབ༔ གླིང་བར་མུན་པའི་ནང་དུ་སོང་༔ ཐེབ་ཙེར་ཆངས་བུ་ཏིང་ལོ་བཞག་པས་གཡོན་བསྐོར་བྱ་ཞིང་༔ ཨོཾ་སུམ་བྷ་ནི་སོགས་བརྗོད་པས་ལན་གསུམ་ངར་མིའི་ནང་དུ་བླུགས་སོ༔ དེ་ནས་མདུན་དུ་ཏིལ༔ གཡས་སུ་མེ༔ གཡོན་དུ་ཆུ་བཞག་ལ༔ ཧཱུྃ༔ སྦྱིན་བདག་སྙིང་གར་པཾ་ཡིག་ལ༔ ལུས་ངག་ཡིད་ཀྱི་སྡིག་སྒྲིབ་ཐིམ༔ རྐང་མཐིལ་ཡཾ་ལས་རླུང་གཡོས་པས༔ ལྟེ་བའི་རཾ་ལས་མེ་འབར་བས༔ པཾ་ཡིག་དེད་ནས་སྣ་གཡས་ནས༔ སྡིག་པ་རྭ་ཅན་རྣམ་པར་ཐོན༔ མདུན་གྱི་ཏིལ་ལ་ཐིམ་པར་གྱུར༔ མེ་ནང་ཞི་བའི་ཐབ་ཁུང་ནང་༔ ཁྲོ་བོ་ཧཱུྃ་མཛད་ཞལ་གདངས་བའི༔ ནང་དུ་སྡིག་པ་བསྲེགས་པར་གྱུར༔ ཨོཾ་བཛྲ་ཊཱ་ཀ་ཁ་ཁ་ཁཱ་ཧི་ཁཱ་ཧི༔ སརྦ་པཱ་པཾ་ད་ཧ་ན་བྷསྨིན་ཀུ་རུ་ཡེ་སྭཱ་ཧཱཿ ཞེས་ཏི་ལ་མེར་བསྲེགས་ཆུར་དོར་ཏེ་ཁྲུས་སྡེར་དུ་
བླུགས་པར་བྱའོ༔ དང་པོ་མཆོད་གཞིའི་དྲུང་དུ་རིན་པོ་ཆེའི་སྡེར་རམ་སྣོད་གཙང་མ་བཞག༔ བུམ་པ་རྡོར་དྲིལ་ཐོགས་ནས་མེ་ལོང་ངོས་ནས་ལྷ་ལ་ཁྲུས་གསོལ་ཏེ། ན་མོ་སྲིད་ཞུའི་མགྲོན་གྱུར་དཀོན་མཆོག་གསུམ་བླ་མ་ཡི་དམ་མཁའ་འགྲོ་དང་༔ ཡེ་ཤེས་ཆོས་སྐྱོང་སྲུང་མ་རྣམས༔ ཁྲུས་ལ་སྤྱན་འདྲེན་གཤེགས་སུ་གསོལ༔ སྡིག་སྒྲིབ་དམ་ཚིག་ཉམས་ཆག་གིས༔ ཡེ་ཤེས་ལྷ་ཚོགས་མ་མཉེས་ནས༔ བཀའ་ཡི་ཆད་པས་སྡིག་གྱུར་ན༔ ལྷ་ལ་དྲི་མ་མི་མངའ་ཡང་༔ ཡོན་བདག་སྡིག་སྒྲིབ་དག་པའི་ཕྱིར༔ ཡེ་ཤེས་བདུད་རྩིས་སྐུ་ཁྲུས་གསོལ༔ ཕན་བྱེད་ལྷ་ཡི་བཀྲ་ཤིས་དེས༔ ཡོན་བདག་འདི་ལ་བདེ་ལེགས་ཤོག༔ ཛ་ཡེ་ཛ་ཡེ་རྒྱལ་གྱུར་ཅིག༔ མེ་ལོང་ངོས་སུ་བུམ་ཆུ་བླུགས་སོ༔ དྲིལ་བུ་འཁྲོལ་ལ་འགྲེས་སོ༔ ཡོན་ཏན་མགྲོན་གྱུར་དཔལ་མགོན་ཚོགས༔ ཚངས་དབང་བརྒྱ་བྱིན་ཕྱོགས་སྐྱོང་བཅུ༔ ལྷ་བརྒྱད་ཀླུ་བརྒྱད་གནོད་སྦྱིན་བརྒྱད༔ གཟའ་བརྒྱད་རྒྱུ་སྐར་ཉི་ཤུ་བརྒྱད༔ ཁྲུས་ལ་སྤྱན་འདྲེན་གཤེགས་སུ་གསོལ༔ ཕོག་ཐུག་འགྲམས་འཁྲུགས་ཉེས་པ་ཡིས༔ འཇིག་རྟེན་ལྷ་རྣམས་མ་མཉེས་ན༔ ཡེ་ཤེས་བདུད་རྩིས་སྐུ་ཁྲུས་གསོལ༔ ཐུགས་དགྱེས་འགྲམས་འཁྲུགས་ཞི་གྱུར་ཅིག༔ ཕན་
བྱེད་ལྷ་ཡི་བཀྲ་ཤིས་གང་༔ ཡོན་བདག་འདི་ལ་བདེ་ལེགས་ཤོག༔ ཛ་ཡེ་ཛ་ཡེ་རྒྱལ་གྱུར་ཅིག༔ ཡུལ་ལྷ་ཕོ་ལྷ་དགྲ་བླ་དང་༔ མ་ལྷ་ཞང་ལྷ་ཕ་ལྷ་དང་༔ ཁྱིམ་ལྷ་མཁར་ལྷ་ཐབ་ལྷ་སོགས༔ འཇིག་རྟེན་སྲིད་པའི་ལྷ་དགུ་དང་༔ སྐྱོབ་པར་བྱེད་པའི་ལྷ་ལྔ་རྣམས༔ ཁྲུས་ལ་སྤྱན་འདྲེན་གཤེགས་སུ་གསོལ༔ མནའ་དང་ཐབ་གཞོབ་དམེ་བཙོག་གིས༔ ལྷ་ལ་གྲིབ་ཕོག་རྨུགས་འཐིབ་ན༔ ཡེ་ཤེས་བདུད་རྩིས་སྐུ་ཁྲུས་གསོལ༔ ཉམས་དང་རྒུད་པ་སོས་གྱུར་ཅིག༔ བྱིང་དང་རྨུགས་གབ་སངས་གྱུར་ཅིག །བཀྲག་དང་གཟི་བརྗིད་ལྡན་གྱུར་ཅིག༔ ལྷ་ཞལ་དུང་བས་དཀར་བར་ཤོག༔ ཕན་བྱེད་ལྷ་ཡི་བཀྲ་ཤིས་གང་༔ ཡོན་བདག་འདི་ལ་བདེ་ལེགས་ཤོག༔ ཛ་ཡེ་ཛ་ཡེ་རྒྱལ་གྱུར་ཅིག༔ ཨོཾ་ཨཱཿབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ སརྦ་དེ་ཝ་ཤུདྡྷེ་ཤུདྡྷེ་བི་ཤུདྡྷེ་སྭཱ་ཧཱཿ ཁྲུས་ཆུ་དེ་ཡར་ཁང་ཁ་ན་བསྐྱལ་ལོ༔ དེ་ནས་ནད་པའི་རྐང་ཞབས་སུ་བལ་འདབ་ནག་པོ་བཞག༔ རང་གིས་རྡོར་དྲིལ་དང་བུམ་པ་ཐོགས་ལ༔ ཧཱུྃ༔ རིན་ཆེན་ལས་གྲུབ་བུམ་པའི་ནང་༔ རྣམ་པར་འཇོམས་པ་འོད་ཞུ་བའི༔ ལྷ་ཡི་བདུད་རྩི་དཀར་ལ་འཚེར༔ ནད་རྣམས་ཞི་བའི་སྨན་ཆེན་པོ༔ གདོན་
རྣམས་འདུལ་བའི་གཉན་པོ་སྟེ༔ སྤྱི་བོ་ཚངས་པའི་ལམ་ནས་ཞུགས༔ ལུས་ཀུན་ཡེ་ཤེས་བདུད་རྩིས་གང་༔ ནད་གདོན་སྡིག་དང་གྲིབ་རྣམས་ཀུན༔ འོག་སྒོ་རྐང་པའི་མཐིལ་རྣམས་ནས༔ དུད་ཁུ་སོལ་ཁུ་བཞིན་དུ་ཐོན༔ ནང་ཁྲུས་མཆོང་བས་དམར་བར་ཤོག༔ ཕྱི་ཡི་ལུས་ལ་བུམ་ཆུས་བཀྲུ༔ གངས་ལ་ཉི་མ་ཤར་བ་བཞིན༔ ཕྱི་ཁྲུས་དུང་བས་དཀར་བར་ཤོག༔ ཅེས་རྣམ་འཇོམས་ཚར་གཅིག་འདོན་ཞིང་ཆབ་གསུམ་ལེན་པ་དང་༔ བུམ་ཆུ་ཐིགས་གཅིག་འཐུང་༔ ཡན་ལག་ལྔ་ཁྲུས་བྱེད་བཅུག་ལ༔ དེ་ནས་མེ་ལོང་ངོས་ལ་ནད་པའི་གཟུགས་འཆར་བ་ལ་ཁྲུས་བྱེད་དོ༔ སརྦ་པཱ་པཾ་སོགས་རྒྱ་སྐད་ལ་བོད་སྐད་དུ་བསྒྱུར་བ་འདི་དག་པར་ངེས་པས་ལེགས་ཏེ༔ ཧཱུྃ༔ རྣམ་པར་འཇོམས་པའི་བདུད་རྩིས་ཆུས༔ མི་དགེ་བཅུ་དང་མཚམས་མེད་ལྔ༔ ལོག་ལྟ་བརྒྱད་དང་ལྕི་བ་བཞི༔ བཀྲུའོ་སྡིག་སྒྲིབ་ཐམས་ཅད་བཀྲུ༔ སོ་སོར་ཐར་བའི་སྡོམ་པ་དང་༔ བྱང་ཆུབ་སེམས་དཔའི་བསླབ་པ་དང་༔ རིག་འཛིན་སྔགས་ཀྱི་དམ་ཚིག་ལས༔ ཉམས་ཆག་ཉེས་ལྟུང་གང་བྱུང་བ༔ བཀྲུའོ་དག་ཅིང་བྱང་གྱུར་ཅིག༔ དམ་ཚིག་ཉམས་ཆག་བསྐང་གྱུར་ཅིག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ སྡིག་པ་དང་སྒྲིབ་པ་ཐམས་ཅད་ཤཱནྟིཾ་
ཀུ་རུ་ཡེ་སྭཱ་ཧཱཿ ཞེས་མེ་ལོང་ངོས་སུ་ཁྲུས་བྱའོ༔ དེ་བཞིན་དུ༔ ཧཱུྃ༔ བགེགས་ཆེན་བཞི་དང་བཅོ་བརྒྱད་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ ཡོན་བདག་ཚེ་དང་བསོད་ནམས་དང་༔ ཁ་རྗེ་དང་ནི་དབང་ཐང་ལ༔ བར་དུ་གཅོད་པའི་བགེགས་རྣམས་ཀྱི༔ བསམ་ངན་སྦྱོར་རྩུབ་གདུག་སེམས་རྣམས༔ བཀྲུའོ་བདུད་རྩིའི་ཆུ་ཡིས་བཀྲུ༔ གངས་རྒྱུན་བཞིན་དུ་དག་གྱུར་ཅིག༔ ཤེལ་དཀར་བཞིན་དུ་དྭངས་གྱུར་ཅིག༔ བགེགས་ཀྱི་བར་ཆད་མེད་པར་ཤོག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔་བགེགས་ཐམས་ཅད་ཤཱནཾ་ཀུ་རུ་ཡེ་སྭཱ་ཧཱཿ ཧཱུྃ༔ རླུང་ནད་ཉི་ཁྲི་ཆིག་སྟོང་དང་༔ མཁྲིས་ནད་ཉི་ཁྲི་ཆིག་སྟོང་དང་༔ བད་ཀན་ཉི་ཁྲི་ཆིག་སྟོང་དང་༔ འདུས་པ་ཉི་ཁྲི་ཆིག་སྟོང་དང་༔ འབྱུང་བཞི་འཁྲུགས་པའི་ནད་རྣམས་ཀུན༔ བཀྲུའོ་བདུད་རྩིའི་ཆུ་ཡིས་བཀྲུ༔ བ་མོ་ལ་ནི་ཉི་ཟེར་བཞིན༔ ནད་ཀུན་མྱུར་དུ་ཞི་གྱུར་ཅིག༔ ཨོཾ་ཨཱཿབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ ནད་ཐམས་ཅད་ཤཱན་ཀུ་རུ་ཡེ་སྭཱ་ཧི༔ ཧཱུྃ༔ ཟ་བའི་འདྲེ་དང་ཤི་བའི་གཤེད༔ འགབ་འདྲེ་ཡུལ་འདྲེ་འཁྱམས་པོ་དང་༔ རྒྱལ་འགོང་དམ་སྲི་དཀོར་གྱི་འདྲེ༔ ལ་
ཁའི་བཙན་དང་ལུང་ཁུང་བདུད༔ ཤི་འདྲེ་མོ་དང་གསོན་འདྲེ་མོ༔ བསེ་རག་ལྟོགས་འགོང་དབུལ་བའི་སྲི༔ མ་རུངས་གདུག་པ་ཅན་རྣམས་ཀུན༔ བཀྲུའོ་བདུད་རྩིའི་ཆུ་ཡིས་་བཀྲུ༔ མུན་པ་ལ་ནི་ཉི་ཤར་ལྟར༔ ཐམས་ཅད་སངས་ཤིང་དག་གྱུར་ཅིག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ གདུག་པ་ཅན་ཐམས་ཅད་ཤཱནཾ་ཀུ་རུ་ཡེ་སྭཱ་ཧཱཿ ཧཱུྃ༔ མ་མོ་མཁའ་འགྲོའི་ཁ་རླངས་རིམས༔ ཉིན་གཅིག་པ་དང་ཉིན་གཉིས་པ༔ ཉིན་གསུམ་པ་དང་ཉིན་བཞི་པ༔ ཉིན་བདུན་པ་དང་རྟགས་པའི་རིམས༔ མི་ནད་ཕྱུགས་ནད་ཡམས་ཀྱི་ནད༔ འགོས་ནས་གློ་བུར་འཆི་བའི་རྐྱེན༔ ཐམས་ཅད་ཡེ་ཤེས་ཆུ་ཡིས་བཀྲུ༔ བྱང་ཞིང་དག་ནས་ཡམས་ནད་ཀུན༔ ཐམས་ཅད་རྒྱུན་ཆད་ཞི་བར་ཤོག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ རིམས་ནད་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ ཧཱུྃ༔ ཕོ་གདོན་ཉི་ཁྲི་ཆིག་སྟོང་དང་༔ མོ་གདོན་ཉི་ཁྲི་ཆིག་སྟོང་དང་༔ ཀླུ་གདོན་ཉི་ཁྲི་ཆིག་སྟོང་དང་༔ འདུས་གདོན་ཉི་ཁྲི་ཆིག་སྟོང་དང་༔ སྔོན་ལས་འཕྲལ་རྐྱེན་ལས་བྱུང་བའི་གདོན་རིགས་སྟོང་ཕྲག་བརྒྱད་ཅུ་ཡི༔ བསམ་ངན་སྦྱོར་རྩུབ་ངན་པ་ཀུན༔ བཀྲུའོ་ཡེ་ཤེས་བདུད་
རྩིས་བཀྲུ༔ ནད་དང་གདོན་ལས་ཐར་གྱུར་ཅིག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ གདོན་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ ཧཱུྃ༔ རྒྱུ་ནི་སྔོན་གྱི་ལས་ལས་བྱུང་༔ གདོན་དང་བགེགས་ཀྱིས་རྐྱེན་བྱས་ནས༔ འབྲས་བུ་འབྱུང་བཞི་འཁྲུགས་པའི་ནད་ཚོར་བ་སྡུག་བསྔལ་ཉིད་དུ་སྨིན༔ རྣམ་པར་འཇོམས་པའི་མཐུ་སྟོབས་དང་༔ གཟུངས་སྔགས་ཟབ་མོའི་བྱིན་རླབས་དང་༔ ཁྲུས་མཆོག་རྟེན་འབྲེལ་ནུས་པ་ཡིས༔ ད་ལྟ་རྒྱུ་སྦྱོར་ཡོན་བདག་ཉེ་བར་འཚེ་བ་བྱེད་པ་རྣམས༔ བཀྲུའོ་གནོད་འཚེ་ཐམས་ཅད་བཀུ༔ ཐམས་ཅད་བྱང་ཞིང་དག་གྱུར་ཅིག༔ ཨོཾ་བཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ ཉེར་བར་འཚེ་བ་ཐམས་ཅད་ཤཱནཾ་ཀུ་རུ་ཡེ་སྭཱ་ཧཱཿ འདི་མན་ཆད་སྔགས་མི་དགོས༔ དྲིལ་བུ་འཁྲོལ་ཞིང་ཚིག་མཚམས་སུ་མེ་ལོང་ངོས་སུ་བུམ་ཆུ་བླུག་པར་བྱའོ༔ ཧཱུྃ༔ མེ་དང་ཆུ་དང་དུག་དང་མཚོན༔ གཡང་ས་གཅན་གཟན་ལ་སོགས་པ་དུས་མིན་འཆི་བ་བཅོ་བརྒྱད་རྣམས༔ བཀྲུའོ་ཡེ་ཤེས་ཆུ་ཡིས་བཀྲུ༔ ཚེ་ཡི་བར་ཆད་ཞི་གྱུར་ཅིག༔ མེ་ལོང་ངོས་སུ་བུམ་ཆུ་གཏིགས་སོ༔ དེ་འགྲེའོ༔ ཧཱུྃ༔ དངངས་སྐག་གྲིབ་ཀྱིས་ནོན་པ་དང་༔ གཉིད་རྡོལ་སད་ལངས་
རྒྱུག་པ་དང་༔ མགོ་བཅད་སྙིང་ཕྱུང་རྨི་བ་དང་༔ མེ་དོང་ལྟུང་དང་ཆུ་ཡི་ས་ཁྱེར༔ དགྲ་དང་གཅན་གཟན་གདོང་དགུས་དེར༔ ས་ཞབས་བྱིངས་དང་རི་ཡིས་མནན༔ རྨི་ལམ་ངན་པ་ཐམས་ཅད་ཀུན༔ བཀྲུའོ་ཡེ་ཤེས་ཆུ་ཡིས་བཀྲུ༔ དེ་དག་འབྲས་བུ་མེད་གྱུར་ཅིག༔ བུམ་ཆུ༔ རོ་གཉན་ཁུར་དང་མནའ་གཉན་བསྐྱལ༔ ཤིང་གཉན་བཅད་དང་རྡོ་གཉན་རློག༔ ས་གཉན་བརྐོས་དང་ཁང་གཉན་བཤུས༔ སྤར་ཁ་གཟའ་སྐར་མི་རུང་བྱས༔ བྱ་བྱེད་ངན་པ་ཐམས་ཅད་ཀུན༔ བཀྲུའོ་ཡེ་ཤེས་ཆུ་ཡིས་བཀྲུ༔ ཉེས་བྱས་ཐམས་ཅད་དག་གྱུར་ཅིག༔ བུམ་ཆུ་ཧཱུྃ༔ ལས་ནི་སེམས་པ་དང་དེས་བྱས༔ སེམས་པ་ཡིད་ཀྱི་ལས་ཡིན་ཏེ༔ མི་རུང་བསམ་ངན་སྣ་ཚོགས་དང་༔ མི་དགེ་མཚམས་མེད་ཡིད་ལ་དྲན༔ འདོད་ཆགས་ཞེ་སྡང་གཏི་མུག་དང་༔ ང་རྒྱལ་ཕྲག་དོག་བསམ་པ་ཤར༔ རང་སྐྱོན་མེ་ལོང་གཟུགས་བརྙན་ལྟར༔ བསམ་པ་དུག་ལྔས་རྐྱེན་བྱས་པས༔ ཕྱི་ནས་ནད་གདོན་དགྲ་བགེགས་ལངས༔ སེམས་ཀྱི་གཡེང་བ་ངན་པ་རྣམས༔ བཀྲུའོ་ཡེ་ཤེས་ཆུ་ཡིས་བཀྲུ༔ མེ་ལོང་ཕྱིས་པ་ལྟ་བུར་ཤོག༔ སེམས་ཀྱི་ཉེས་པ་དག་གྱུར་ཅིག༔ བུམ་
ཆུ༔ གཞན་ཡང་བྱུར་དང་སྐལ་པ་ངན༔ བཀྲ་མི་ཤིས་པ་ཐམས་ཅད་བཀྲུ༔ ཕ་རོལ་ཆོད་གཏོང་བྱད་ཁ་དང་༔ ཟོར་ཁ་ཕུར་ཁ་ཐམས་ཅད་བཀྲུ༔ བཟའ་ཉེས་པ་དང་བསྒོམས་ཉེས་དང་༔ དྲི་ཉེས་བཤད་ཉེས་ཐམས་ཅད་དང་༔ བཟླས་བརྗོད་མ་དག་སྐྱོན་རྣམས་བཀྲུ༔ གཟའ་དང་རྒྱུ་སྐར་གནོད་པ་ཡི༔ གཟའ་ནད་ལྐུགས་རེངས་ཐམས་ཅད་བཀྲུ༔ འཆི་བདག་གཤིན་རྗེའི་ཕོ་ཉ་དང་༔ བདུད་ཀྱི་ཞགས་པ་ཁྲམ་འདེབས་བཀྲུ༔ མཚན་མོ་ནག་མོའི་གནོད་པ་དང་༔ མོ་འདྲེ་བསེན་མོའི་གནོད་པ་བཀྲུ་ནད་རིགས་བཞི་བརྒྱ་རྩ་བཞི་བཀྲུ༔ བགེགས་རིགས་སྟོང་ཕྲག་བརྒྱད་ཅུ་བཀུ༔ ཡེ་འདྲོག་སུམ་བརྒྱ་དྲུག་ཅུ་བཀྲུ༔ གློ་བུར་དགུ་བཅུ་རྩ་གཅིག་བཀྲུ༔ ཕ་ཚན་ནང་གི་རྒྱབ་འདྲེ་བཀྲུ༔ མ་ཚན་ནང་གི་སྟོང་འདྲེ་བཀྲུ༔ མ་བུ་གཉིས་ཀྱི་བྱུར་འདྲེ་བཀྲུ༔ བྱད་དང་འཁོན་གྲིབ་ཐམས་ཅད་བཀྲུ༔ ཟས་ངན་ལྟོ་རུ་ཟོས་པ་བཀྲུ༔ གོས་ངན་ལུས་ལ་གྱོན་པ་བཀྲུ༔ མི་གཙང་ཕྱོགས་ངན་བདུད་གཅོད་བཀྲུ༔ དམེ་དང་ཁྲེལ་དང་བྱུར་རྣམས་བཀྲུ༔ མི་གཙང་མནོལ་གྲིབ་ཕོག་པ་བཀྲུ༔ ལུས་ཀྱི་ན་ཚ་ཐམས་ཅད་བཀྲུ༔ སེམས་ཀྱི་
སྡུག་བསྔལ་ཐམས་ཅད་བཀྲུ༔ ལུས་ངག་ཡིད་གསུམ་སྡིག་སྒྲིབ་བཀྲུ༔ གངས་རི་བཞིན་དུ་དཀར་གྱུར་ཅིག༔ ཤེལ་དཀར་བཞིན་དུ་དྭངས་གྱུར་ཅིག༔ ནད་མེད་བདེ་བ་ཐོབ་གྱུར་ཅིག༔ འཆི་མེད་རིག་འཛིན་ཐོབ་གྱུར་ཅིག༔ ན་མཤྩཎྜ་བཛྲ་ཀྲོ་དྷ་ཡ་སོགས་ཉེ་སྙིང་བརྗོད་ལ་བུམ་ཆུ་མགོ་ལ་བླུག་གོ༔ ངག་ཏུ་བླུད་དོ༔ དེ་ནས་ལག་ཏུ་ཀུ་ཤའམ་རལ་གྲི་སོགས་བྱབ་རྫས་གང་རུང་ཐོགས༔ རང་གི་གཡས་རྡོ་རྗེ་དང་༔ གཡོན་མཐེ་བོང་གི་མཛུབ་ཆུང་མནན༔ གཞན་གསུམ་བརྐྱང་བ་རྡོ་རྗེ་རྩེ་གསུམ་གྱི་ཕྱག་རྒྱས་རྨ་བྱའི་སྒྲོ་སོགས་གང་འཛོམ་བཟུང་༔ མདུན་དུ་ངར་མི་བཞག་ལ༔ ཧཱུྃ༔ ང་ནི་རྡོ་རྗེ་རྣམ་པར་འཇོམས༔ ཕྱག་གཡས་སྣ་ཚོགས་རྡོ་རྗེ་འཛིན༔ གཡོན་པས་རྡོ་རྗེ་རྩེ་གསུམ་གྱི༔ ཕྱག་རྒྱས་བྱབ་པའི་རྫས་འཛིན་པའི༔ དབུས་སུ་ཟླ་བའི་དཀྱིལ་འཁོར་སྟེང་༔ ཧཱུྃ་ཡིག་མཐའ་མར་སྔགས་ཀྱིས་བསྐོར༔ ཡིག་འབྲུ་རྣམས་ལས་འོད་བྱུང་ནས༔ ནད་དང་གདོན་དང་གྲིབ་རྣམས་ཀུན༔ འོད་དེས་བསྡུས་ནས་ངར་མི་ལ༔ སྤོ་བའི་ཚུལ་དུ་ཐིམ་པར་གྱུར༔ ཧཱུྃ༔ བྱབ་རྫས་རྩ་མཆོག་ཀུ་ཤ་འདི༔ ཚངས་པ་ལྷ་ཡི་བྱིན་གྱིས་བརླབས༔ དག་ཅིང་གཙང་བར་བྱེད་པའི་རྫས༔ རྒྱུ་སྦྱོར་ཡོན་གྱི་བདག་པོ་ཡི༔ ཚེ་རབས་
འཁོར་བ་ཐོག་མེད་ནས༔ བསགས་པའི་སྡིག་པ་སྒྲིབ་པ་དང་༔ དམ་ཚིག་ཉམས་ཆག་ཐམས་ཅད་ཀུན༔ བྱབ་བོ་ཀུ་ཤའི་རྫས་ཀྱིས་བྱབ༔ སྤོའོ་ངར་མི་ཁྱོད་ལ་སྤོ༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ སྡིག་པ་དང་སྒྲིབ་པ་ཐམས་ཅད་ཨ་པ་ན་ཡེ་སྭཱ་ཧཱཿ ཞེས་བྱབ་ཅིང་འོག་མ་རྣམས་ལ་ཡང་སྔགས་འདི་འགྲེའོ༔ ཧཱུྃ༔ བྱབ་རྗེས་ཡུངས་ཀར་གང་བུ་འདི༔ བསྐལ་པ་བརྒྱད་ཀྱི་ཕ་རོལ་ན༔ ཁྲོ་བོ་བརྒྱད་ཀྱིས་བསྒྲུབས་པ་ཡིན༔ ཏ་ཀྲྀཏ་བརྒྱད་ཀྱིས་རྨོས་པ་ཡིན༔ ཕྲ་མེན་བརྒྱད་ཀྱིས་བརྩམས་པ་ཡིན༔ དབང་ཕྱུག་མ་ཡི་ཕོ་ཉ་ཡིན༔ ཕྱག་ན་རྡོ་རྗེས་ཕུལ་བ་ཡིན༔ ཐུབ་པ་ཆེན་པོས་བྱིན་གྱིས་བརླབས༔ བགེགས་རྣམས་འཇོམས་པའི་རྫ་ས་མཆོག་ཡིན༔ ཡོན་བདག་འདི་ལ་གནོད་པའི་བགེགས༔ བྱབ་བོ་ཡུངས་ཀར་གང་བུས་བྱབ་སྤོའོ་ངར་མི་ཁྱོད་ལ་སྤོ༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ བགེགས་ཐམས་ཅད་ཨ་པ་ན་ཡེ་སྭཱ་ཧཱཿ ཧཱུྃ༔ བྱབ་རྫ་ས་ཕོ་རོག་ནག་པོའི་སྒོ༔ ཡེ་ཤེས་མགོན་པོ་ནག་པོ་ཡིས༔ བྱ་རོག་ནག་པོ་གཅིག་ཏུ་སྤྲུལ༔ དཔག་བསམ་ཤིང་གི་རྩེ་ལ་བབ༔ བྱ་རོག་སྤྲུག་སིལ་ལན་གསུམ་བྱས༔ བྱ་རོག་སྤྲུལ་པས་ནམ་
མཁའ་གང་༔ ལྷ་མིན་དམག་ཚོགས་ཁྲག་ཏུ་སྐྱུགས༔ བྱ་རོག་གཤོག་པ་བརྡབས་པ་ཡིས༔ ཁ་ནས་མེ་འབར་རྒྱ་མཚོ་ཁོསིང་ག་གླིང་གི་སྲིན་མོ་བཏུལ༔ བྱ་རོག་ཀྲོག་ཁྲོག་ལན་གསུམ་གྱིས་གཤིན་རྗེ་བེ་བྷ་སྭ་ཏ་ཡི༔ ཀླད་པ་དྲངས་ནས་དམ་ལ་བཏགས༔ དེ་ཕྱིར་ཕོ་རོག་ནག་པོའི་སྒོ༔ ནད་དང་གྲིབ་རྣམས་འཇོམས་པའི་རྫས༔ ནད་རིགས་བཞི་བརྒྱ་རྩ་བཞི་དང་༔ རིམས་ནད་ཡམས་ནད་དལ་ཡམས་དང་༔ ཟས་གྲིབ་གོས་གྲིབ་བཙོག་གྲིབ་རྣམས༔ གྲིབ་བྱ་ཕོ་རོག་སྒོ་ཡིས་བྱབ༔ སྤོའོ་ངར་མི་ཁྱོད་ལ་སྤྲོ་ཨོཾ་ཨཱཿབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ ནད་དང་རིམས་དང་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ ཧཱུྃ༔ བྱབ་རྫས་རལ་གྲི་འབར་བ་འདི༔ འཇམ་དཔལ་དབྱངས་ཀྱིས་བྱིན་གྱིས་བརླབས༔ དཔལ་ལྡན་ལྷ་མོའི་ཐུགས་ཀྱི་རྟགས༔ ཤེས་རབ་རལ་གྲི་འབར་བ་ཡིས༔ བདག་འཛིན་འཁོར་བའི་རྩ་བ་གཅོད༔ མཚོན་ཆས་མི་འཇིགས་གང་ཡང་མེད་འཚོ་བའི་སྲོག་ལ་ཀུན་ཀྱང་འཛེམ༔ ནད་པ་འདི་ལ་གནོད་བྱེད་པའི༔ བྱིངས་ཆེན་གདོན་དང་ཚབ་ཆེན་བགེགས་མ་རུངས་མི་བསྲུན་གདུག་པའི་ཚོགས༔ བྱབ་བོ་རལ་གྲི་སོ་ཡིས་
བྱབ༔ སྤོའོ་ངར་མི་ཁྱོད་ལ་སྤོ༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ གདོན་གདུག་པ་ཅན་ཉེ་བར་འཚེ་བ་ཐམས་ཅད་ཨ་པ་ན་ཡེ་སྭཱ་ཧཱཿ ཧཱུྃ༔ དཔག་བསམ་ལྗོན་ཤིང་བྱབ་རྫས་འདི༔ སངས་རྒྱས་རྣམ་པར་སྣང་མཛད་ཀྱི༔ འོད་ཟེར་བྱང་ཆུབ་ཤིང་དུ་འཁྲུངས༔ ཤིང་གི་ལྷ་མོ་འོད་ཟེར་ཅན༔ མཁའ་འགྲོ་ཞིང་སྐྱོང་ཐམས་ཅད་བསྟེན༔ ལྗོན་ཤིང་ལྕུག་མ་གསར་པ་འདི༔ བཀྲ་ཤིས་ལྷ་རྣམས་མཉེས་པའི་རྫ་ས༔ བྱུར་དང་སྐལ་བ་ངན་པ་དང་༔ བཀྲ་མི་ཤིས་པ་ཐམས་ཅད་དང་༔ རྨི་ལམ་མཚན་མ་ངན་། པ་དང་༔ བྱ་བྱེད་ངན་པ་ཐམས་ཅད་ཀུན༔ བྱབ་བོ་ཤིང་གི་ལྕུག་མས་བྱབ༔ སྤོའོ་ངར་མི་ཁྱོད་ལ་སྤོ༔ ཨོཾ་ཨཱཿབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ བཀྲ་མི་ཤེས་པ་ཐམས་ཅད་ཨ་པ་ན་ཡེ་སྭཱ་ཧཱཿ ཧཱུྃ༔ བྱབ་རྫས་རྨ་བྱའི་སྒྲོ་མདོངས་འདི༔ སངས་རྒྱས་སྣང་བ་མཐའ་ཡས་ཀྱི༔ བཞུགས་གདན་མཛེས་བྱེད་རྨ་བྱ་སྟེ༔ ལྷ་ཆེན་གཞོན་ནུའི་ཆིབས་ཀྱི་བྱ༔ དུག་རྣམས་འཇོམས་པ་རྨ་བྱ་སྟེ༔ ཁ་དོག་ལྔ་ནི་ཡེ་ཤེས་ལྔ༔ དུག་ལྔའི་ནད་གདོན་འཇོམས་པའི་རྫས༔ དུས་མིན་འཆི་དང་རྦོད་གཏོང་དང་༔ སེམས་ཀྱི་གཡེང་བ་བྱ་བྱེད་ངན༔
བྱབ་བོ་རྨ་བྱའི་སྒྲོ་ཡིས་བྱབ༔ སྤོའོ་ངར་མི་ཁྱོད་ལ་སྤོ༔ གཟའ་དང་རྒྱུ་སྐར་གནོད་པ་དང་༔ བདུད་ཀྱི་ཞགས་པ་མཚན་མོ་གདོན༔ བྱབ་བོ་རྨ་བྱའི་སྒྲོ་ཡིས་བྱབ༔ སྤོའོ་ངར་མི་ཁྱོད་ལ་སྤོ༔ བཟའ་ཉེས་བསྒོམས་ཉེས་སྐལ་བ་ངན༔ བྱུར་དང་མི་ཁ་བྲ་མཆུ་རྣམས༔ བྱབ་བོ་རྨ་བྱའི་སྒྲོ་ཡིས་བྱབ༔་སྤོའོ་ངར་མི་ཁྱོད་ལ་སྤོ་ནད་རིགས་བཞི་བརྒྱ་རྩ་བཞི་དང་༔ བགེགས་རིགས་སྟོང་ཕྲག་བརྒྱད་ཅུ་དང་༔ བྱིས་པའི་གདོན་ཆེན་བཅོ་ལྔ་རྣམས༔ བྱབ་བོ་རྨ་བྱའི་སྒྲོ་ཡིས་བྱབ༔ སྤོའོ་ངར་མི་ཁྱོད་ལ་སྤོ༔ གློ་བུར་དགུ་བཅུ་རྩ་གཅིག་དང་༔ ཡེ་འདྲོག་སུམ་བརྒྱ་དྲུག་ཅུ་རྣམས༔ བྱབ་བོ་རྨ་བྱའི་སྒོ་ཡིས་བྱབ༔ སྤྲོའོ་ངར་མི་ཁྱོད་ལ་སྤོ༔ ཕ་ཚན་ནང་གི་རྒྱབ་འདྲེ་དང་༔ མ་ཚན་ནང་གི་སྟོང་འདྲེ་རྣམས༔ བྱབ་བོ་རྨ་བྱའི་སྒོ་ཡིས་བྱབ༔ སྤོའོ་ངར་མི་ཁྱོད་ལ་སྤོ༔ འཁོན་དང་གྲིབ་དང་མི་གཙང་བ༔ མི་མཐུན་གནོད་པའི་ཕྱོགས་རྣམས་ཀུན༔ བྱབ་བོ་རྨ་བྱའི་སྒོ་ཡིས་བྱབ༔ སྤོའོ་ངར་མི་ཁྱོད་ལ་སྤོ༔ ན་མཉྩནྡྷ་བཛྲ་ཀྲོ་དྷ་ཡ་དང་། མི་མཐུན་པའི་ཕྱོགས་ཐམས་ཅད་ཨ་པ་ན་ཡེ་སྭཱ་ཧཱཿ དེ་ནས་རྐང་ཞབས་ཀྱི་བལ་འདབ་ནག་པོ་དེ་ངར་མི་ལ་བསྐོན༔ རྐང་ཞབས་སུ་བལ་འདབ་དཀར་
པོ་བཞག༔ ཧཱུྃ༔ དེ་ལྟར་ཁྲུས་ཀྱི་ཆོ་གས་བཀྲིས༔ བྱབ་པའི་ཆོ་གས་བྱབ་པ་ཡིས༔ སྡུག་བསྔལ་འཁོར་བའི་གདན་ནག་པོ༔ སྤངས་ནས་བདེ་བ་ཐར་པ་ཡི༔ གདན་ནི་དཀར་པོའི་སྟེང་དུ་ཕྱིན༔ བྱང་ཕྱོགས་ལྕང་ལོ་ཅན་གྱི་གནས༔ ཕྱག་ན་རྡོ་རྗེའི་ཞབས་དྲུང་དུ༔ ཕྱིན་པས་ནད་གདོན་བགེགས་ལས་ཐར༔ དེ་ལྟར་བསྒོམས་ལ་ཐལ་སྦྱར་ནས༔ རྡོ་རྗེའི་རྩེ་མོ་འདི་ལ་འཇུས༔ དེ་ནས་འདི་ཡི་རྗེས་ཟློས་མཛོད༔ སྡིག་པ་ཐམས་ཅད་བྱང་བྱས་ནས༔ སྡུག་བསྔལ་ཐམས་ཅད་མེད་པར་བྱེད༔ རྒྱུད་དོ་ཅོག་གི་རྩ་བ་སྟེ༔ དཔལ་ཀུན་གྱིས་ནི་ལེགས་པར་བརྒྱན༔ ལན་གསུམ༔ དེ་ནས་ངར་མི་བྲན་ལ༔ ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་དང་༔ རིན་ཆེན་མང་དང་གཟུགས་མཛེས་དང་༔ འབྱམས་ཀླས་འཇིགས་ཀུན་བྲལ་བ་ཡི༔ དེ་བཞིན་གཤེགས་ལ་ཕྱག་འཚལ་ལོ༔ གླུད་གཏོར་འདོད་པའི་ཡོན་ཏན་ལྔ༔ ངར་མི་མི་བས་གླུད་བཟང་བ༔ ཁམས་དང་སྐྱེ་མཆེད་ཡོངས་སུ་རྫོགས༔ གཅིག་ལས་བརྒྱ་སྟོང་གྲངས་མེད་འཕྲོ༔ སྣང་སྲིད་ལྷ་འདྲེ་ཐམས་ཅད་དང་༔ སྟོང་གསུམ་བདག་པོ་སྤྲིན་གྱི་སྒྲོན༔ རྡོ་རྗེ་མཆུ་དང་བི་ན་ཡ༔ བགེགས་རིགས་སྟོང་
ཕྲག་བརྒྱད་ཅུ་དང་་ཟ་འདྲེ་ཤི་འདྲེའི་གྲི་བོ་དང་༔ འགོང་པོ་འདྲེ་མོ་བསེ་རག་སོགས༔ ལན་ཆགས་བདག་པོ་ཐམས་ཅད་ལ༔ རྒྱུ་སྦྱོར་ཡོན་གྱི་བདག་པོ་ཡི་ཚེ་སྐྱིན་སྲོག་་གླུད་འདི་འབུལ་ལོ༔ དགའ་མགུ་ཡི་རང་ལྡན་གྱུར་ནས༔ བུ་ལོན་ལན་ཆགས་བྱང་གྱུར་ཅིག༔ མ་གནོད་མ་འཚེ་རང་གནས་དེངས༔ ཨོཾ་སརྦ་བིགྷཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ དེ་ནས་ཁྲུས་ཆུ་དང་ངར་མི་གཅིག་གིས་བཟུང་བཅུག་ལ༔ ཧཱུྃ༔ ང་ནི་རྡོ་རྗེ་རྣམ་པར་འཇོམས༔ སངས་རྒྱས་ཀུན་གྱི་མཐུ་སྟོབས་བདག༔ ཡོན་བདག་འདི་ལ་གནོད་བྱེད་བགེགས༔ འདི་རུ་མ་འདུག་གཞན་དུ་དེངས༔ གལ་ཏེ་བཀའ་ལས་འདའ་བྱེད་ན༔ རྡོ་རྗེ་རྣམ་འཇོམས་ཐུགས་ཁྲོས་ནས༔ ས་གས་རྒྱ་མཚོ་གནམ་དུ་འཕྱུར༔ གནམ་གྲུམ་འབྲུག་སྒྲས་ཀླད་ཁྲག་འགེམས༔ སྲིད་རྩེ་མནར་མེད་ཡན་ཆད་ཀྱི༔ བདུད་དང་བགེགས་ཀྱི་གནས་རྣམས་ཀུན༔ ཡེ་ཤེས་མེ་ཆེན་མཆེད་ཅིང་འབར་སྐད་ཅིག་ཉིད་ལ་སྲེག་པར་བྱེད༔ དེ་བས་མྱུར་དུ་ཕྱིར་དེངས་ཤིག༔ ཨོཾ་སུཾ་བྷ་ནི་སོགས། དྲག་སྔགས་བརྗོད༔ རོལ་མོ་བྱ༔ ནས་ལྕག་བྲབ༔ བགེགས་གནས་པའི་ཕྱོགས་བྱང་ཤར་དུ་བསྐྱལ་བཅུག་གོ༔ དེ་ནས་གཡོན་དྲིལ་བུ་འཁྲོལ་གཡས་རྡོ་རྗེ་གསོར་
ཞིང་༔ ཧཱུྃ༔ བདག་མདུན་རྣམ་པར་འཇོམས་པ་ཡི༔ སྐུ་ལས་སྣ་ཚོགས་རྡོ་རྗེ་ཡི༔ ཆར་བབས་བསྲུང་བྱའི་ལུས་ལ་ནི༔ རྡོ་རྗེའི་གོ་ཁྲབ་ཞུ་ལུབས་གྱུར༔ སུས་ཀྱང་ཚུགས་པར་མི་འགྱུར་བ༔ རྡོ་རྗེ་ཕ་ལམ་ལྟ་བུར་གྱུར༔ ན་མཤྩཎྜ་བཛྲ་སོགས། བཛྲ་རཀྵ་རཀྵ༔ ཞེས་སྤྱི་བོར་རྡོ་རྗེ་རྒྱ་གྲམ་དུ་བཞག༔ དེ་བཞིན་དུ༔ ན་མོ༔ དཀོན་མཆོག་གསུམ་དང་རྩ་བ་གསུམ༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་སྔགས་དང་ཕྱག་རྒྱ་དང་༔ རྡོ་རྗེ་རྣམ་འཇོམས་བདེན་པའི་མཐུས༔ ཡོན་བདག་བསྲུང་བྱ་འདི་ཉིད་ལ༔ སྡིག་སྒྲིབ་བགེགས་དང་བར་ཆད་རྣམས༔ སྲུངས་ཤིག་སྲུངས་ཤིག་བསྐྱབ་ཏུ་གསོལ༔ ཨོཾ་ཨཱཿབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ སྡིག་པ་ཐམས་ཅད་ལས་སྲུངས་ཤིག༔ བགེགས་ཐམས་ཅད་ལས་སྲུངས་ཤིག༔ བར་ཆད་ཐམས་ཅད་ལས་སྲུངས་ཤིག༔ རཀྵ་རཀྵ་སྭཱ་ཧཱཿ ཞེས་སྙིང་གར་རྡོ་རྗེ་རྒྱ་གྲམ་གྱི་ཚུལ་དུ་བཞག༔ གདུག་པ་ཅན་དང་རིམས་ཀྱི་ནད༔ ཉེ་བར་འཚེ་དང་གདོན་གྱི་ཚོགས༔ དུས་མིན་འཆི་དང་རྨི་ལམ་ངན༔ མཚན་མ་ངན་དང་བྱ་བྱེད་ངན༔ སེམས་ཀྱི་གཡེང་བ་ལ་སོགས་པ༔ སྲུངས་ཤིག་སྐྱོབས་ཤིག་
འཚོ་བར་མཛོད༔ ཨོཾ་ཨཱབཛྲ་དཱ་ར་ཎ་ཧཱུྃ་ཧཱུྃ་ཕཊ༔ གདུག་པ་ཅན་ཐམས་ཅད་སྲུངས་ཤིག༔ རིམས་ཐམས་ཅད་ལས་སྲུངས་ཤིག༔ གདོན་དང་ཉེར་བར་འཚེ་བ་དང་དུས་མིན་འཆི་བ་སྲུངས་ཤིག༔ རྨི་ལམ་མཚན་མ་ངན་པ་དང་བྱ་བྱེད་ངན་པ་སྲུངས་ཤིག་རཀྵ་རཀྵ་སྭཱ་ཧཱཿ ཞེས་དཔུང་གཡས་དང་༔ བྱུར་དང་སྐལ་བ་ངན་པ་དང་༔ བཀྲ་མི་ཤིས་དང་རྗོད་གཏོང་མཐུ༔ བཟའ་ཉེས་དང་ནི་བསྒོམས་ཉེས་དང་༔ གཟའ་དང་རྒྱུ་སྐར་གནོད་པ་དང་༔ བདུད་ཀྱི་ཞགས་པ་གཤིན་རྗེ་ཡི༔ ཕོ་ཉ་ཐོམས་ཅད་སྲུང་ཞིང་སྐྱོབས༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ བྱུར་དང་སྐལ་ངན་བཀྲ་མི་ཤིས་པ་ཐམས་ཅད་སྲུངས་ཤིག༔ བཟའ་ཉེས་བསྒོམས་ཉེས་གཟའ་དང་རྒྱུ་སྐར་གྱི་གནོད་པ་ཐམས་ཅད་སྲུངས་ཤིག་ཞགས་པ་གཤིན་རྗེའི་ཕོ་ཉ་ཐམས་ཅད་སྲུངས་ཤིག་རཀྵ་རཀྵ་སྭཱ་ཧཱཿ ཞེས་ཕྲག་པ་གཡོན་དུ་བཞག་གོ༔ མཚན་མོའི་གདོན་དང་བྱད་འཁོན་གྲིབ༔ ནད་རིགས་བཞི་བརྒྱ་རྩ་བཞི་དང་༔ བགེགས་རིགས་སྟོང་ཕྲག་བརྒྱད་ཅུ་དང་༔ གློ་བུར་ཡེ་འདྲོག་སུམ་བརྒྱ་དང་༔ དྲུག་ཅུ་ཐམས་ཅད་བསྲུང་དུ་གསོལ༔ ཕ་ཚན་རྒྱབ་འདྲེ་མ་བུ་ཡི༔ བྱུར་འདྲེ་མི་གཙང་
གྲིབ་ལ་སོགས༔ མི་མཐུན་ཕྱོགས་ཀུན་བསྲུང་དུ་གསོལ༔ ཨོཾ་ཨཱབཛྲ་དཱ་ར་ཎ་ཧཱུྃ་ཧཱུྃ་ཕཊ༔ མི་མཐུན་པའི་ཕྱོགས་ཐམས་ཅད་རཀྵ་རཀྵ་སྭཱ་ཧཱཿ ཞེས་རྒྱབ་ཏུ་བཞག༔ སངས་རྒྱས་སྐུ་གསུམ་བརྙེས་པའི་བྱིན་རླབས་དང་༔ ཆོས་ཉིད་མི་འགྱུར་བདེན་པའི་བྱིན་རླབས་དང་༔ དགེ་འདུན་མི་ཕྱེད་འདུན་པའི་བྱིན་རླབས་དང་༔ རྒྱལ་བ་སྲས་དང་བཅས་པའི་བྱིན་རླབས་དང་༔ རྡོ་རྗེ་རྣམ་པ་འཇོམས་པའི་མཐུ་སྟོབས་ཀྱིས༔ འགྲོ་བ་འདི་ལ་བདག་གིས་བསྲུངས་ཟིན་གྱིས༔ འདི་ལ་སུས་ཀྱང་གནོད་པ་མ་བྱེད་ཅིག༔ ཨོཾ་ཨཱབཛྲ་བི་དཱ་ར་ཎ་ཧཱུྃ་ཧཱུྃ་ཕཊ༔ བཛྲ་རཀྵ་རཀྟ་ཧཱུྃ་སྭཱ་ཧཱཿ ཞེས་སྤྱི་བོར་བཞག༔ དེ་ནས་རབ་གནས་ཀྱི་ཚུལ་དུ་མེ་ཏོག་འཐོར་ཞིང་༔ ཧཱུྃ༔ སྔོན་ཚེ་བཅོམ་ལྡན་ཐུབ་པའི་དབང་པོ་ཡིས༔ རྡོ་རྗེ་རྣམ་འཇོམས་རྩ་བའི་རྒྱུད་གསུངས་པས༔ རྒྱལ་པོའི་སྡིག་བྱང་མི་ནད་ཕྱུགས་ནད་ཆད༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ རིན་ཆེན་ཁང་བུ་བརྩེགས་པའི་གཞལ་ཡས་སུ༔ བཤད་པའི་རྒྱུད་གསུངས་དགའ་རབ་དབང་ཕྱུག་བཏུལ༔ དེ་བཞིན་དེང་འདིར་བདུད་དང་ལོག་འདྲེན་ཐུལ༔ བར་ཆད་རྐྱེན་རྣམས་ཞི་བའི་བཀྲ་ཤིས་ཤོག༔ དེང་
འདིར་རྒྱུ་སྦྱོར་སྦྱིན་པའི་བདག་པོ་ཡི༔ ཚེ་དང་བསོད་ནམས་དབང་ཐང་ཆོས་སྲིད་རྣམས༔ ཡར་ངོའི་ཟླ་བཞིན་འཕེལ་བའི་བཀྲ་ཤིས་ཤོག༔ ནད་གདོན་བར་ཆད་རྐྱེན་དང་སྡིག་སྒྲིབ་རྣམས༔ མྱུར་དུ་ཟད་ཅིང་སྟོང་པའི་བཀྲ་ཤིས་ཤོག༔ སློབ་དཔོན་ཚེ་རིང་བུམ་པ་བཀྲ་ཤིས་ཤིང་༔ ཡོན་བདག་ནད་མེད་བདེ་བའི་བཀྲ་ཤིས་ཤོག༔ ཡུལ་ཁམས་མི་ནད་ཕྱུགས་ནད་རྒྱུན་ཆད་ཅིང་༔ ལོ་ལེགས་འབྲུ་འཕེལ་བདེ་སྐྱིད་ཕུན་སུམ་ཚོགས༔ ལྷམ་མེ་ལྷན་ནེ་ལྷང་ངེ་གསལ་གྱུར་ནས༔ གསང་སྔགས་བསྟན་པ་མཐའ་རྒྱས་བཀྲ་ཤིས་ཤོག༔ འོ་དེས་རྡོ་རྗེ་རྣམ་པར་འཇོམས་པའི་བྱབ་ཁྲུས་ཀྱི་ཆོ་ག་ལེགས་པར་གྲུབ་པས་གཏང་རག་གི་མཎྜལ་ཕུལ༔ ས་གཞི་སྤོས་སོགས༔ ཞེས་པ་འདི་ནི་གནམ་ཆོས་སྒྲུབ་ཐབས་ལས་བྱུང་བའི་ལྷན་ཐབས་ཁ་སྐོང་གི་ཚུལ་དུ༔ གསང་སྔགས་རྙིང་མའི་སློབ་དཔོན་བི་མ་ལའི་ལུགས་ཀྱི་བྱབ་ཁྲུས་རྗེ་རང་བྱུང་བས་བསྒྲིགས་པར་མཛད་པའི་དོན་བསྡུས་ཏེ་ཚིགས་བཅད་དུ་ཕབ་ནས་བྲིས་པ་ཡིན་ཏེ༔ འདི་བྱ་རྒྱུད་གསར་མའི་ལུགས་ལྟར་ཤ་ཆང་སྤང་དགོས་པ་སོགས་མིན་པས་ཕྲག་ཡངས་པ་དང་༔ གསར་མའི་ལུགས་ལ་རྣམ་འཇོམས་གཟུངས་རིང་འབུམ་ཕྲག་གཅིག་བསྙེན་ཚད་དེ༔ དུས་ཀྱི་དབང་གིས་འབུམ་ཕྲག་བཞི་དགོས་ལ༔ བསྙེན་པ་མ་ཐོན་པའི་བྱབ་ཁྲུས་བྱིན་རླབས་ཆུང་
ཞིང་༔ དེའི་བསྙེན་པ་ཐོན་པ་དཀོན་ལ༔ གནམ་ཆོས་འདིའི་སྔགས་ཉུང་ངུ་དེ་སུམ་འབུམ་མམ་དུས་ནི་ཞག་བདུན་བཟླས་ཀྱང་ཆོག་པས་འགྲུབ་སླའོ༔ ཞེས་གོ་འཇོ་བླ་མ་ལྷུན་གྲུབ་བས་བསྐུལ་ནས༔ དུ་སྦྱར་བས་སེམས་ཅན་མང་པོ་ལ་ཕན་པར་གྱུར་ཅིག༔ མངྒ་ལཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།