རྡོ་རྗེ་རྣམ་པར་འཇོམས་པའི་གཟུངས་བཟླ་དུས་དམིགས་རིམ་ཟིན་བྲིས་ཤིན་ཏུ་གསལ་བ།
རྡོ་རྗེ་རྣམ་པར་འཇོམས་པའི་གཟུངས་བཟླ་དུས་དམིགས་རིམ་ཟིན་བྲིས་ཤིན་ཏུ་གསལ་བ་བཞུགས་སོ།
ན་མོ་བཛྲ་བི་དཱ་ར་ཎ་ཡེ། རྣམ་འཇོམས་འདི་ནི་བྱ་རྒྱུད་ཡིན་པ་ཡིས། །ཤ་ཆང་སྤངས་ནས་གཙང་སྦྲ་ཆེ་བར་དགོས། །འོན་ཀྱང་རྒྱུད་དོ་ཅོག་གི་རྩ་བ་སྟེ། །རྒྱུད་སྡེ་བཞི་ཀ་ལྟར་དུ་ཉམས་ལེན་རུང་། །བི་མ་མི་ཏྲ་ནས་བརྒྱུད་དཀར་པོ་འདི། །ཤ་ཆང་ལ་སོགས་སྤངས་ཡང་མི་དགོས་ཤིང་། །དྲན་རྫོགས་སྒོམ་ཆོག་སྤྱན་འདྲེན་མེད་ཀྱང་རུང་། །དེ་ཕྱིར་ཀུན་ལ་ཕན་ཆེ་འདི་ཉིད་བཤད། །མངོན་རྟོགས་ངག་ཏུ་བརྗོད་ནི་མི་དགོས་ཏེ། །གཟུངས་ཉིད་འདོན་ཚེ་ཡིད་ཀྱིས་བསྒོམས་པས་ཆོག །སྟོང་པའི་ངང་ལས་སྐད་ཅིག་དྲན་རྫོགས་སུ། །རང་ཉིད་དམ་ཚིག་ཡེ་ཤེས་དབྱེར་
མེད་པའི། །བདག་ཉིད་རྣམ་པར་འཇོམས་པ་སྟོན་ཟླའི་མདོག །དཀར་ལ་ཅུང་ཟད་སྔོ་བའི་མདངས་ཆགས་པ། །ཞལ་གཅིག་སྤྱན་གསུམ་ཅུང་ཟད་ཁྲོ་ཞིང་འཛུམ། །དབུ་སྐྲ་ཐོར་ཚུགས་རིན་ཆེན་དབུ་བརྒྱན་དང་། །དབུ་གཙུག་རིགས་བདག་རང་ཆས་རྡོར་སེམས་མཚོན། །ཕྱག་གཡས་རྡོ་རྗེ་རྩེ་ལྔ་ཐུགས་ཀར་འཛིན། །གཡོན་པས་བུམ་པ་ལྟེ་བའི་ཐད་དུ་བསྣམས། །སྣ་ཚོགས་དར་དང་རིན་ཆེན་རྒྱན་གྱིས་སྤྲས། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་ནི། །པདྨ་ཉི་ཟླ་བརྩེགས་པའི་གདན་ལ་བཞུགས། །ཡེ་ཤེས་རང་འོད་འཁྲུགས་པའི་དབུས་ན་གསལ། །དེ་ཡི་ཐུགས་
ཀར་ཟླ་བའི་དཀྱིལ་འཁོར་སྟེང་། །ཧཱུྃ་ཡིག་དཀར་ལ་སྔོ་བའི་མདངས་ཆགས་པ། །དེ་མཐར་གཟུངས་སྔགས་གཡས་སུ་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །བདག་དང་སེམས་ཅན་ཀུན་གྱི་སྒྲིབ་པ་སྦྱངས། །དུས་གསུམ་རྒྱལ་བ་སྲས་བཅས་ཐམས་ཅད་ཀྱི། །ཐུགས་རྗེ་བྱིན་རླབས་འོད་ཟེར་རྣམ་པར་བསྡུས། །ཐུགས་ཀའི་ཧཱུྃ་དང་སྔགས་ཕྲེང་ལ་ཐིམ་པས། །སྔགས་ཕྲེང་དེ་ལས་ཡེ་ཤེས་བདུད་རྩི་བབ། །བདག་ལུས་ཡེ་ཤེས་བདུད་རྩིས་ལྟེམ་གྱིས་གང་། །སྡིག་སྒྲིབ་མི་གཙང་གྲིབ་དང་ནད་གདོན་རྣམས། །འོག་སྒོ་རྐང་མཐིལ་བ་སྤུའི་བུ་ག་ནས། །ནག་མདངས་ཉིལ་ཉིལ་ཕྱིར་ཐོན་རང་གི་ལུས། །དྲི་མེད་ཤེལ་སྒོང་ལྟ་བུ་གྱུར་བསྒོམ་ཞིང་། །གཟུངས་སྔགས་བཟླ་བ་རང་དོན་དམིགས་རིམ་ཡིན། །གཞན་གྱི་རིམ་གྲོའི་དོན་དུ་འདོན་པའི་ཚེ། །རང་ཉིད་རྣམ་འཇོམས་སྐུ་ཆེ་རི་བོ་ཙམ། །ཕྱག་གཡོན་བུམ་པ་དཀར་པོ་མཆུ་ཡོད་པ། །ཁ་རྒྱན་ཁྲོ་ཞལ་དཀར་པོས་མཚན་པ་འཛིན། །བུམ་པའི་ནང་དུ་ཟླ་བའི་དཀྱིལ་འཁོར་སྟེང་། །ཧཱུྃ་ཡིག་དཀར་ལ་སྔོ་མདངས་ཆགས་པའི་མཐར། །གཟུངས་སྔགས་གཡས་སུ་འཁོར་བའི་འོད་ཟེར་གྱིས། །རྣམ་འཇོམས་
ཁྲོ་བོ་བཅུ་སོགས་སངས་རྒྱས་དང་། །བྱང་སེམས་ཀུན་གྱི་བྱིན་རླབས་འོད་དེས་བསྡུས། །བུམ་ལྷའི་ཧཱུྃ་དང་སྔགས་ཕྲེང་ལ་ཐིམ་པས། །བདུད་རྩིའི་རྒྱུན་བབས་བུམ་པ་ལྟེམ་གྱིས་གང་། །བུམ་པའི་མཆུ་ནས་བདུད་རྩིའི་ཆུ་རྒྱུན་ནི། །རྐྱལ་པའི་ཁ་ནས་འོ་མ་བྱོ་བཞིན་བབ། །ནད་པ་ལ་སོགས་བསྲུང་བྱ་གང་ཡིན་གྱི། །སྤྱི་བོར་བབས་ནས་འགའ་ཞིག་ཚངས་བུག་ཞུགས། །ལུས་ཀྱི་ཕྱི་ནང་གཉིས་ཀ་བཀྲུས་པ་ཡིས། །སྡིག་སྒྲིབ་ནད་གདོན་གྲིབ་དང་མི་གཙང་དག །ལུས་ཀུན་དྲི་མེད་ཤེལ་སྒོང་ལྟར་གྱུར་བསྒོམ། །དེ་དག་ལན་བ་གཅིག་བསྒོམས་པ་མ་ཡིན་ཏེ། །གཟུངས་ནི་ཇི་ཙམ་འདོན་པའི་ཡུན་དེ་ཡིས། །ཕྱེད་ཡན་རང་དོན་ཕྱེད་མན་གཞན་དོན་བསྒོམ། །རང་དོན་དམིགས་པར་བསྙེན་སྒྲུབ་གཉིས་འདུས་ཏེ། །ལྷ་སྒོམ་བསྙེན་པ་འཕྲོ་འདུས་སྒྲུབ་པ་ཡིན། །གཞན་དོན་དམིགས་པ་ལས་སྦྱོར་ཡིན་པའོ། །དེ་ནས་བསྐྱེད་རིམ་བསྡུ་སོགས་མི་དགོས་ཏེ། །སྒོམ་མཁན་ངོ་བོ་ལྟ་བ་རང་གིས་འཐུས། །རྡོ་རྗེ་ཞེས་བྱ་མི་ཆོད་མི་ཤིགས་པ། །སེམས་ཉིད་ངོ་བོ་འགྱུར་བ་མེད་པ་ཡིན། །དམྱལ་བའི་མེས་ཀྱང་བསྲེགས་པར་མི་ནུས་ཏེ། །དེ་ཕྱིར་སྲ་བ་བརྟན་པ་ཞེས་བྱའོ། །དེ་
ཉིད་རྟོགས་ན་འཁོར་བའི་སྡུག་བསྔལ་ཀུན། །རྣམ་པར་འཇོམས་པར་བྱེད་པས་རྣམ་འཇོམས་ཟེར། །དེ་ཕྱིར་རང་སེམས་ངོ་བོ་ཉིད་ལ་བལྟ། །དེ་ལྟར་བལྟ་ཞིང་བཟླས་ཀྱང་ལེགས་པ་ཡིན། །བགེགས་རིགས་སྟོང་ཕྲག་ཞི་བ་ལ་སོགས་པའི། །སྨོན་ལམ་ཤེས་བརྗོད་སྤྱི་ལྟར་བྱ་བའོ། །པདྨ་མཐར་ཕྱིན་ཞེས་བྱས་བསྐུལ་བའི་ངོར། །རཱ་ག་ཨ་སྱས་ཉུང་ལ་ཟབ་པར་གདམས་།ཉེས་པ་མཆིས་ན་ཡེ་ཤེས་ལྷ་ལ་བཤགས། །དགེ་བས་གཞན་ཕན་དཔག་མེད་འབྱུང་བར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།