གནམ་ཆོས་ཐུགས་ཀྱི་གཏེར་ཁ་ལས་སྨེ་བརྩེགས་སྒྲུབ་ཐབས་ཀྱི་ཟུར་རྒྱན་བྱབ་ཁྲུས་ཤེལ་གྱི་མེ་ལོང་།
གནམ་ཆོས་ཐུགས་ཀྱི་གཏེར་ཁ་ལས༔ སྨེ་བརྩེགས་སྒྲུབ་ཐབས་ཀྱི་ཟུར་རྒྱན་བྱབ་ཁྲུས་ཤེལ་གྱི་མེ་ལོང་ཡོད༔
གུ་རུ་རིན་པོ་ཆེ་ལ་ཕྱག་འཚལ་ལོ༔ གནམ་ཆོས་སྨེ་བརྩེགས་བྱབ་ཁྲུས་ནི༔ བུམ་པ་རྫས་ལྡན་སྤྱི་ལྟར་བཤམས༔ དམ་ཡེ་དབྱེར་མེད་དྲན་རྫོགས་བསྒོམ༔ བདག་དང་མདུན་གྱི་བར་སྣང་དང་༔ བུམ་ནང་སྨེ་བ་བརྩེགས་པ་སྨུག༔ ཞལ་གཅིག་ཕྱག་གཉིས་ཁྲུས་བུམ་དང་༔ ལས་ཀུན་སྒྲུབ་པའི་ཐིག་ལེ་བཞི༔ གཡས་གཡོན་པདྨའི་སྟེང་ན་འཛིན༔ སྐུ་ལ་དུར་ཁྲོད་ཆས་བརྒྱད་རྫོགས༔ འདོར་ཐབས་པད་ཉིའི་གདན་ལ་བཞུགས༔ སྐུ་ལས་ཡེ་ཤེས་མེ་དཔུང་འབར༔ དམ་ཚིག་ཡེ་ཤེས་དབྱེར་མེད་པའི༔ ཐུགས་ཀར་ཉི་སྟེང་ཧཱུྃ་སྨུག་ལ༔ སྔགས་ཀྱིས་གཡས་སུ་འཁོར་བ་ལས༔ འོད་
ཟེར་ཕྱོགས་བཅུར་འཕྲོས་པ་ཡིས༔ སྨེ་བརྩེགས་དཔག་མེད་སྤྱན་དྲངས་ནས༔ བདག་མདུན་བུམ་པའི་ལྷ་ལ་ཐིམ༔ བདག་བསྐྱེད་ཐུགས་ཀའི་ཧཱུྃ་ཡིག་ལས༔ མེ་འབར་གྲིབ་དང་མི་གཙང་བསྲེག༔ བུམ་བསྐྱེད་སྐུ་ལས་བདུད་རྩིའི་རྒྱུན༔ བབས་པས་བུམ་པ་གང་བར་གྱུར༔ ཨོཾ་བྷཆུང་དྷིས་ཧཱུྃ་ཧཱུྃ་ཕཊ་སྭཱ་ཧཱཿ ཞེས་པ་བརྒྱ་སྟོང་ཅི་འགྲུབ་བཟླས༔ ཨརྒྷཾ་སོགས། ཧཱུྃ༔ རབ་འཇིགས་ཆོས་སྐུའི་ངང་ལས་མ་གཡོས་ཀྱང་༔ གདུག་པ་འདུལ་ཕྱིར་རབ་ཏུ་ཁྲོས་པའི་སྐུ༔ དུས་གསུམ་རྒྱལ་བའི་ཕྲིན་ལས་གཅིག་བསྡུས་པ༔ ཁྲོ་རྒྱལ་སྨེ་བ་བརྩེགས་ལ་ཕྱག་འཚལ་བསྟོད༔
དེ་ནས་ནད་པ་སོགས་མདུན་དུ་འཁོད་རྐང་ཞབས་སུ་བལ་འདབ་ནག་པོ་གཅིག་བཞག་ལ༔ མེ་ལོང་ཁྲུས་སྡེར་སོགས་འཛོམ་པར་བྱ་སྟེ༔ འོ་ན་རང་རེ་རྣམས་ཐོབ་དཀའ་བའི་མི་ལུས་རིན་པོ་ཆེ་འདི༔ སྐྱེ་བ་གཏན་གྱི་སོ་ནམ་མ་འགྲུབ་ཀྱི་བར་དུ་ཆུད་མི་ཟ་བའི་ཕྱིར༔ འདུལ་བ་དང་བྱང་ཆུབ་སེམས་དཔའི་སྡེ་སྣོད་ལས༔ ལུས་བསྲུང་བའི་ཐབས་དུ་མ་གསུངས་ཤིང་། ཁྱད་པར་དུ་ལུས་ངག་ལ་གནོད་པ་ནི་གྲིབ་དང་མི་གཙང་བ་ཡིན་ཏེ༔ དམ་ཚིག་དང་ཚུལ་ཁྲིམས་ཉམས་པའི་གྲིབ་ཀྱིས་ས་ལམ་ལ་སྒྲིབ༔ མཁའ་འགྲོ་ཆོས་སྐྱོང་འཁྲུག་པའི་གྲིབ་ཀྱིས་ཚེ་དང་བསོད་ནམས་ལ་གནོད༔ སྡེ་བརྒྱད་མི་མ་ཡིན་འཁྲུག་པའི་གྲིབ་ཀྱིས་ལུས་སྲོག་ལ་གནོད་དེ༔ བདུད་གྲིབ་ལྕི་ཞིང་འཐིབས་པ་དང་༔ རྒྱལ་པོའི་གྲིབ་སྨོ་ཞིང་འབོག་པ་དང་༔ བཙན་གྱི་གྲིབ་གློ་བུར་དུ་གཟེར་བ་དང་༔ གཟའ་ཡི་གྲིབ་ལྐུགས་ཤིང་རེངས་པ་དང་༔ ཀླུ་ཡི་གྲིབ་མཛེ་དང་ཤུ་བ་ཞ་གྲུམ་དང་༔ མ་མོ་མཁའ་འགྲོ་འཁྲུག་པའི་གྲིབ་ཡམས་ནད་རིམས་ནད་དང་༔ གཞན་ཡང་རོ་བག་དང་ཟས་གོས་མི་གཙང་བའི་གྲིབ་ཀྱིས་ཁམས་ཉོག་ཤེས་པ་བྱིངས༔ ཚིག་པ་ཟ་ཞིང་སྙིང་མི་དགའ་བ་སོགས་འབྱུང་བར་སློབ་དཔོན་པདྨས་གསུངས༔
དེ་ལ་སྤྱིར་སངས་རྒྱས་ཐམས་ཅད་ཀྱི་ཡེ་ཤེས་ལ་ཆེ་ཆུང་ཐུགས་རྗེ་ལ་མྱུར་བུལ་མེད་ཀྱང་༔ གྲིབ་དེ་དག་སེལ་བ་ལ་ཁྲོ་བོ་རྨེ་བརྩེགས་འདི་ཐུགས་རྗེ་མྱུར་ཞིང་བྱིན་རླབས་གཞན་ལས་ཆེ་བ་ཡིན༔ དེ་ལ་སྨེ་བརྩེགས་འདིའི་ལོ་རྒྱུས་ལ་གསུམ་སྟེ༔ དང་པོ་སངས་རྒྱས་གཞན་གྱིས་མ་ཐུལ་བའི་བདུད་བཏུལ་བ་དང་༔ བར་དུ་རྟ་མགྲིན་དང་ཕག་མོ་གཉིས་ཀྱིས་བར་ཆད་བསལ་བ་དང་༔ ཐ་མ་ལྷ་གཞན་ལས་བྱིན་རླབས་ཆེ་ཞིང་ཐུགས་རྗེ་མྱུར་བའོ༔ དང་པོ་བསྐལ་པ་དཔག་ཏུ་མེད་པའི་གོང་རོལ་དུ་བདག་འཛིན་རུ་ཏྲའི་སྡེ་དཔོན་ལ་བདུད་རིགས་བྱེ་བ་དུང་ཕྱུར་གྱིས་བསྐོར་ནས་སེམས་ཅན་རྣམས་ལ་གནོད་པ་སྣ་ཚོགས་བྱས་སོ༔ དེར་བཅོམ་ལྡན་འདས་ཀུན་ཏུ་བཟང་པོས་བདུད་དེ་དག་བཏུལ་བའི་ཕྱིར་སྟོབས་དང་སྤྲུལ་པ་དཔག་ཏུ་མེད་པ་བསྟན་ཀྱང་བདུད་ཀྱིས་ཀྱང་དེ་ལྟར་བསྟན་ནས་མ་ཐུལ༔ དེ་ནས་བདུད་འདི་སྟོབས་ཀྱིས་མི་ཐུལ་ཐབས་ཀྱིས་འདུལ་བར་དགོངས་ཏེ༔ བདུད་ཀྱི་བུ་སྨེ་བརྩེགས་ལྗང་ནག་ཏུ་སྤྲུལ་ནས་བདུད་ཀྱི་མགོ་ལ་ཙནྡན་གྱི་བེང་བརྒྱབས་ནས་བསྒྲལ༔ བདུད་དམག་བྱེ་བ་ས་ཡ་བཏུལ་ཏེ་འཁོར་དུ་བསྐོར་རོ༔ དེ་རྗེས་ཐུབ་པའི་བསྟན་པ་མ་བྱུང་
གི་གོང་ཙམ་དུ་བདུད་ཕོ་མ་ཏྲཾ་རུ་ཏྲ་འཁོར་སྡེ་བརྒྱད་དང་འདྲེ་སྲིན་ཐམས་ཅད་ཀྱིས་བསྐོར་ནས་མི་རྣམས་ཨ་ཅང་ཡང་ཆེ་སྟེ་ལྷ་མ་སྲིན་དང་སྲིན་པོའི་རྒྱལ་པོ་ཡང་བསད་ཅིང་ཟོས་སོ༔ དེར་སངས་རྒྱས་རྣམས་བཀའ་བགྲོས་ནས༔ རྟ་མགྲིན་དང་རྡོ་རྗེ་ཕག་མོ་གཉིས་བཏང་༔ ཁོང་རྣམ་གཉིས་བདུད་ཕོ་མོ་གཉིས་ཀྱི་ཁོག་ཏུ་ཞུགས་ཏེ༔ སྤྱི་གཙུག་ནས་རྟ་ཞལ་དང་ཕག་ཞལ་བཏོན་ཀྱང་༔ བདུད་ཀྱི་གྲིབ་ཀྱིས་གསུང་འགགས་པ་ལ༔ འོག་མིན་ནས་སྨེ་བརྩེགས་ཡབ་ཡུམ་བྱོན་ནས་ཁྲུས་མཛད་པས༔ གྲིབ་སངས་ནས་རྟ་སྐད་ལན་གསུམ་བཏོན་པས་ཁམས་གསུམ་དབང་དུ་བསྡུས༔ ཕག་སྐད་ལན་ལྔ་ངུར་པས་དཔའ་བོ་མཁའ་འགྲོ་འབུམ་ཕྲག་ལྔ་བྲན་དུ་བསྐོར་རོ༔ དེ་ཡང་སྨེ་བརྩེགས་འདིའི་དྲིན་ཡིན༔ ལྷ་གཞན་རྣམས་གྲིབ་དང་མི་གཙང་བས་གོས་ན་མི་འགྲུབ༔ འགྲུབ་ཚར་བའི་ནུས་པ་ཡང་ཉམས་པའི་ཕྱིར་གྲིབ་ལ་འཛེམ་དགོས༔ གྲིབ་དང་མི་གཙང་བ་ལ་མི་འཛེམ་པ་སྨེ་བརྩེགས་ཀྱི་དམ་ཚིག་ཡིན༔ སྨེ་དགུ་བརྩེགས་བྱས་པའི་གྲིབ་ཀྱང་སྐད་ཅིག་ལ་འཇོམས་པས་སྨེ་བརྩེགས་ཞེས་བྱའོ༔ བྱ་བ་ཡོངས་སུ་བསྟན་པའི་མདོ་ལས༔ སྡེ་འཁྲུག་བྱས་པའི་ཉེས་པ་དཔག་ཏུ་
མེད་པ་གསུངས་ཤིང་༔ སྡེ་འཁྲུག་བྱས་པའི་ས་ཆ་དེར་སྒྲུབ་པ་ལོ་བཅུ་གཉིས་བྱས་ཀྱང་འབྲས་བུ་མི་འབྱུང་བར་གསུངས་པ་ལ༔ དེའི་ཉེས་སྐྱོན་ཡང་སྨེ་བརྩེགས་འདིས་སེལ་བར་ཇོ་བོ་རྗེས་གསུངས༔ ལྷ་འདིའི་ངོ་བོ་ནི་ཁྲོ་བོ་སྟོབས་པོ་ཆེ་དང་མགོན་པོ་མ་ནིང་དང་གཅིག་པས༔ བྱིན་རླབས་གཞན་ལས་ཆེ་བ་ཡིན༔ ལྷ་གཞན་བསྙེན་སྒྲུབ་མ་བྱས་པར་བྱིན་རླབས་མི་འཇུག་ལས་ཚོགས་མི་འགྲུབ༔ བསྙེན་པ་ཡང་དུས་སྙིགས་མ་ལ་བཞི་འགྱུར་དགོས་པར་བཤད༔ སྨེ་བརྩེགས་འདི་ལ་བསྙེན་སྒྲུབ་མི་དགོས་པར་འཕྲལ་དུ་ལས་ཚོགས་ཐམས་ཅད་འགྲུབ་ཅིང་བྱིན་རླབས་འཇུག་པས༔ ཐུགས་རྗེ་གཞན་ལས་མྱུར་བ་ཡིན༔ འདིའི་བྱབ་ཁྲུས་སོགས་ཞུས་པས་མི་གཙང་བ་རྣམས་གཙང་བར་འགྱུར༔ མ་དག་པ་རྣམས་དག་པར་འགྱུར༔ སྡིག་སྒྲིབ་ཐམས་ཅད་བྱང་བར་འགྱུར༔ གངས་རྒྱུད་བཞིན་དུ་དཀར་བར་འགྱུར༔ ལྷ་དང་སྲུང་མ་ཐམས་ཅད་ནི༔ མི་དགའ་རྣམས་དགའ་བར་འགྱུར༔ དེ་ལ་སོགས་པ་ཕན་ཡོན་མཐའ་ཡས་པ་འདིའི་རྒྱུད་ལས་གསུངས་སོ༔ དེ་ལ་ཡང་བིར་ཝ་པ་ནས་བརྒྱུད་པའི་དུད་ཁ་ཞལ་གསུམ་ཕྱག་དྲུག་པ་དང་༔ ཇོ་བོ་རྗེའི་
ལུགས་ལྗང་གུ་ཞལ་གསུམ་ཕྱག་དྲུག་པ་དང་༔ སྔོན་གྱི་གཏེར་ཁ་རྣམས་ནས་དུད་ཁ་ཞལ་གཅིག་ཕྱག་གཉིས་པ་དང་༔ གནམ་ཆོས་ལས་ཀྱང་ལྗང་གུ་ཞལ་གསུམ་ཕྱག་དྲུག་པ་གཅིག་དང་༔ དཔའ་གཅིག་དང་གཉིས་ཡོད་པ་ལས༔ ཕྱག་གཉིས་པ་འདི་ལ་བྱབ་ཁྲུས་སྦྱར་བར་གསུངས་པ་ལྟར་བྱ་བ་ཡིན་ཏེ༔ དེ་ཡང་ཟླ་བ་སྒྲོན་མའི་མདོ་ལས༔ གང་ཞིག་སངས་རྒྱས་ཡིད་བྱེད་པ༔ དེ་ཡི་མདུན་ན་ཐུབ་པ་བཞུགས༔ ཞེས་གསུངས་པས༔ ཁྱེད་རང་གི་མདུན་དུ་ངེད་བཅོམ་ལྡན་འདས་སྨེ་བ་བརྩེགས་པ་ལ་སངས་རྒྱས་དང་བྱང་ཆུབ་སེམས་ཟློདཔའི་ཚོགས་ཀྱིས་བསྐོར་ནས༔ ཁྱེད་རང་ལ་ཁྲུས་བྱབ་ཀྱི་ཆོ་ག་མངོན་སུམ་དུ་མཛད་པའི་མོས་པ་མཛོད། དེ་ལ་ཡང་རྒྱས་པར་ཁྲུས་དོན་བཅུ་གསུམ་མ་དང་༔ འབྲིང་བ་ཁྲུས་དོན་བདུན་མ་དང་༔ བསྡུས་པ་ཁྲུས་དོན་གསུམ་མ་ལས༔ འདི་གསུམ་མ་དེ་ཡིན༔ འདི་ལ་ཡང་ཁྲུས་ཀྱི་ཆོ་ག༔ བྱབ་པའི་ཆོ་ག༔ བསྲུང་བའི་ཆོ་ག་གསུམ༔ དེ་རེ་རེ་ལ་དོན་གཉིས་གཉིས་ཡོད་པ་ལས༔ དང་པོ་ལྷ་ཁྲུས་ཀྱི་དོན་དུ་མདུན་གྱི་ནམ་མཁར་བཅོམ་ལྡན་འདས་སྨེ་བ་བརྩེགས་པ་ལ་ཁྱེད་རང་གི་ཕོ་ལྷ་ཕྲག་ལྷ་ལ་སོགས་པ་སྐྱོབ་པའི་ལྷ་ལྔ་
དང་༔ དགྲ་ལྷ་ཡུལ་ལྷ་ལ་སོགས་པ་བརྟེན་པའི་ལྷ་དགུས་བསྐོར་བ་ལ་སྐུ་ཁྲུས་གསོལ་བས་གྲིབ་དང་མི་གཙང་བས་གོས་པ་ཐམས་ཅད་སངས་ནས༔ སྐུ་ལུས་བཀྲག་མདངས་གཟི་བརྗིད་རབ་ཏུ་རྒྱས་ཏེ༔ ཁྱེད་རང་གི་མགོན་སྐྱབས་དང་དཔུང་གཉེན་དུ་བཞེངས་པའི་མོས་པ་མཛོད༔ ཡར་མཆོད་གཞི་ངོས་ལ་མེ་ལོང་བསྟན་ཏེ་ཁྲུས་བྱ་ཞིང་༔ ཇི་ལྟར་བལྟམས་པ་ཙམ་གྱིས་ནི༔ ལྷ་རྣམས་ཀྱིས་ནི་ཁྲུས་གསོལ་ལྟར༔ ལྷ་ཡི་ཆུ་ནི་དག་པ་ཡིས༔ དེ་བཞིན་བདག་གིས་སྐུ་ཁྲུས་གསོལ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤི་ཡེ་ཧཱུྃ༔ དེ་ནས་སྒྲོ་མདོངས་ཀྱི་ཡུ་བས་མེ་ལོང་བྱུག་ཚུལ་བྱ་ཞིང༔ སྟོང་གསུམ་ཀུན་ན་དྲི་ངད་ལྡང་བ་ཡི༔ དྲི་མཆོག་རྣམས་ཀྱིས་ཐུབ་དབང་ཀུན་གྱི་སྐུ༔ གསེར་སྦྱངས་བཙོ་མ་བྱི་དོར་བྱས་པ་ལྟར༔ འོད་ཆགས་འབར་བ་དེ་དག་བྱུག་པར་བགྱི༔ ཨོཾ་ཧཱུྃ་ཧཱུྃ་ཧཱུྃ༔ སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱ་ཧཱཿ དེ་ནས་དར་རམ་རས་ཀྱིས་ཕྱི་ཚུལ་བྱ་ཞིང་༔ རྒྱལ་དང་རྒྱལ་བའི་སྲས་ཀྱི་སྐུ་རྣམས་ལ༔ རེས་དཀར་སྨན་དང་ལྡན་པས་སྐུ་ཕྱིས་པས༔ མི་ཤེས་སྒྲིབ་པ་མ་ལུས་ཀུན་བསལ་ནས༔ ཉེས་པའི་ཚོགས་རྣམས་མ་ལུས་དག་གྱུར་ཅིག༔ ཨོཾ་ཧཱུྃ་ཏྲཱྃ་ཧྲཱིཿཨཱཿ
སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱ་ཧཱཿ དེས་ལྷ་ལ་ཁྲུས་གསོལ་སོང་ནས༔ སྐྱེས་བུའི་ངན་ཁྲུས་ནི༔ བཅོམ་ལྡན་འདས་སྨེ་བ་བརྩེགས་པའི་ལྷ་ཚོགས་རྣམས་ཀྱིས་ཕྱག་ན་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་ཐོགས་ནས༔ ཁྱེད་རང་རྣམས་ལ་ཁྲུས་བྱས་པས་ལུས་ཀྱི་ན་ཚ་ཐམས་ཅད་ཞི་ཞིང་གྲིབ་དང་མི་གཙང་བ་ཐམས་ཅད་དག་ནས་ལུས་ཤེལ་གོང་དྲི་མ་མེད་པ་ལྟར་གྱུར༔ བུམ་ཆུ་ནང་དུ་འཐུང་བས་སྡིག་སྒྲིབ་ཉོན་མོངས་རྣམ་རྟོག་ཐམས་ཅད་དག་ནས་སེམས་རྟོག་མེད་ཆོས་ཀྱི་སྐུར་གྱུར་པའི་མོས་པ་མཛོད༔ བུམ་པ་ཐོགས་ལ་དབྱངས་དང་བཅས༔ ཇི་ལྟར་བལྟམས་པ་ཙམ་གྱིས་ནི༔ ལྷ་རྣམས་ཀྱིས་ནི་ཁྲུས་གསོལ་ལྟར༔ ལྷ་ཡི་ཆུ་ནི་དག་པ་ཡིས༔ དེ་བཞིན་བདག་གིས་སྐུ་ཁྲུས་གསོལ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཏེ་ཀ་ཏེ་ས་མ་ཡ་ཤྲི་ཡེ་ཧཱུྃ༔ བུམ་པ་མགོར་བཞག༔ ཆབ་གསུམ་བླངས་ལ་ཁྲུས་སྡེར་དུ་བླུགས་བཅུག༔ ཡན་ལག་ལྔ་ཁྲུས་བྱ༔ བུམ་ཆུ་བླུད༔ དེ་རྣམས་བྱེད་ཚེ་རང་གིས་སྔགས་བཟླའོ༔ དེ་ནས་མེ་ལོང་ངོས་ལ་ནད་པའི་གཟུགས་འཆར་བ་ལ་ཁྲུས་བྱ་ཞིང་༔ འདི་ནི་ཁྲུས་མཆོག་དཔལ་དང་ལྡན༔ ཐུགས་རྗེའི་ཆུ་ནི་བླ་ན་མེད༔ བྱིན་རླབས་ཡེ་ཤེས་ཆུ་ཡིན་ཏེ༔ ཅི་འདོད་དངོས་གྲུབ་སྩོལ་བར་མཛོད༔
ཆུ་ཐིགས་རེ་དང་སྔགས་སྤྲད་ཅིང་མེ་ལོང་ངོས་ལ་བླུགས་ཤིང་༔ ཨོཾ་བྷུཆུང་དྷིས་ཧཱུྃ་ཧཱུྃ་ཕཊ༔ སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱཿ ཨོཾ་བྷུཆུང་དྷིས་ཧཱུྃ་ཧཱུྃ་ཕཊ༔ སརྦ་བིགྷ་ནཾ་ཤཱནྟི་ཀུ་རུ་ཡེ་སྭཱ་ཧཱཿ ཨོཾ་བྷཆུང་དྷིས་ཧཱུྃ་ཧཱུྃ་ཕཊ༔ སརྦ་རོ་ག༔ དེ་བཞིན་དུ་མགོའི་སྙིང་པོ་དང་མཇུག་གི་ཤཱནྟིཾ་ཀུ་རུ་ཀུན་ལ་འགྲེས་ཏེ༔ སརྦ་དུཥྛ༔ སརྦ་ཛཱ་ར༔ སརྦ་ཨུ་པ་དྲ་ཡེ༔ སརྦ་གྲ་ཧེ༔ སརྦ་ཨ་ཀ་ལ་ཀྲྀ་ཏ་ཡུ༔ སརྦ་དུར་སོབ་ནན༔ སརྦ་དུར་མི་ཏི༔ སརྦ་ཙིཏྟ་བྱུ་ཀུ་ལེ༔ ཞེས་བསྡུས་ན་དེ་ཡན་གྱི་ཆོག་ལ༔ སྤྲོ་ན༔ ནད་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ གདོན་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱཿ གྲིབ་ཐམས་ཅད་ཤཱནི་ཀུ་རུ་ཡེ་སྭཱ་ཧཱཿ ཟས་གྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ གོས་གྲིབ་ཐམས་ཅད་ཤཱནི་ཀུ་རུ་ཡེ་སྭཱ་ཧཱཿ རོ་གྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ བཙོག་གྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ ཉམས་གྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ དམེ་གྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ ཡུགས་གྲིབ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱཿ འཁོན་གྲིབ་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱཿ མནོལ་གྲིབ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱཿ བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱཿ འོ་
དེས་ཁྲུས་ཀྱི་ཆོ་ག་སོང་བས༔ སྡིག་སྒྲིབ་མི་གཙང་བ་ཐམས་ཅད་དག་ངེས་བསམ་པའི་མོས་པ་མཛོད༔ གཉིས་པ་བྱབ་པ་ལ་བྱབ་པ་དངོས་དང་༔ ཁྲུས་ས་ནས་ཕྱུང་བ་གཉིས་ལས༔ དང་པོ་བྱབ་པའི་དོན་དུ༔ ངེད་བཅོམ་ལྡན་སྨེ་བ་བརྩེགས་པའི་སྐུར་གསལ་བའི་ཕྱག་ན་ཡོད་པའི་རྨ་བྱའི་སྒྲོ་མདོངས་འདི་ལ་ཁ་དོག་ལྔ་ཡོད་པ་ཡེ་ཤེས་ལྔའི་མཚོན་བྱེད་ཡིན་ཅིང་༔ དེའི་སྟེང་དུ་སྣ་ཚོགས་རྡོ་རྗེའི་ལྟེ་བར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྨུག་ནག་གི་མཐར་སྙིང་པོས་བསྐོར་ནས་ཡོད་པ་དེས་ཁྱེད་རང་ལ་བྱབ་པའི་དུས་སུ་སྔགས་ལས་འོད་ཟེར་འཕྲོས་ནས་ཁྱེད་རང་གི་ལུས་ལ་ཕོག་པས༔ དཔེར་ན་རྡོ་ཁབ་ལེན་གྱིས་ལྕགས་ཕྱེ་བསྡུས་པ་བཞིན་དུ༔ ནད་གདོན་ཐམས་ཅད་འུབས་སེ་བསྡུས་ནས་སྤྲུགས་པའི་དུས་སུ་མདུན་དུ་ཁྲུས་ཆུ་འདིའི་ནང་དུ༔ ཁྱེད་རང་གི་གཟུགས་བརྙན་ཤར་བ་ལ་ནད་སྤོ་བའི་ཚུལ་དུ་བྱབས་པས༔ ལུས་ངག་ཡིད་གསུམ་བདེ་སངས་སངས་སོང་བའི་མོས་པ་མཛོད༔ ཨོཾ་བྷུཪྑུང་དྷིས་ཧཱུྃ་ཧཱུྃ་ཕཊ༔ སརྦ་པཱ་པཾ་ཨ་པ་ན་ཡེ་སྭཱ་ཧཱཿ གོང་གི་རྩ་སྔགས་དང་མཇུག་གི་ཨ་པ་ན་ཡེ་ཀུན་ལ་འགྲེའོ༔ ཕྱག་གཡས་རྨ་བྱའི་མདོངས་ཀྱིས་ནད་པའི་ལུས་ནས་ཁྲུས་ཆུ་ནང་དུ་བྱབ་པའི་ཚུལ་རེ་དང་དྲིལ་བུ་
བསིལ་བར་སྤྲུགས་ཏེ༔ སརྦ་བིགྷ་ནཾ༔ སརྦ་རོ་ག༔ སརྦ་དུཏྟཾ༔ སརྦ་ཛཱ་ར༔ སརྦ་ཨུ་པ་ཏྲ་ཡེ༔ སརྦ་གྲ་ཧེ༔ སརྦ་ཨ་ཀ་ལ་མྲྀ་ཏ་ཡུ༔ སརྦ་དུར་སོབ་ནཾ༔ སརྦ་དུར་མི་ཏི༔ སརྦ་ཙིཏྟ་བྱཱ་ཀུ་ལེ༔ ནད་ཐམས་ཅད་ཨ་པ་ན་ཡེ་སྭཱ་ཧཱཿ གདོན་ཐམས་ཅད་ཨ་པ་ན་ཡེ་སྭཱ་ཧཱཿ གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ ཟས་གྲིབ་ཐམས་ཅད་ཨ་། པ་ན་ཡེ་སྭཱ་ཧཱཿ གོས་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ རོ་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ བཙོག་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ ཉམས་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ དམེ་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ ཡུགས་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ འཁོན་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ མནོལ་གྲིབ་ཐམས་ཅད་ཨ་པ་ན་ཡེ་སྭཱ་ཧཱཿ བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཨ་པ་ན་ཡེ་སྭཱ་ཧཱཿ དེས་བྱབ་པའི་ཆོ་ག་སོང་ནས༔ ཁྲུས་ས་ནས་ཕྱུང་བ་ནི་དེ་ལྟར་འཁྲུ་བ་དང་བྱབ་པའི་ཆོ་ག་བྱས་པས༔ ནད་གདོན་བཀྲ་མི་ཤིས་པ་ཐམས་ཅད་དག་ནས༔ སྟན་ནག་པོ་འཁོར་བའི་རང་བཞིན་དེ་སྤང་བར་སྒོམས་ཤིག༔ རྐང་ཞབས་ཀྱི་བལ་འདབ་ནག་པོ་དེ་ཁྲུས་ཆུ་ནང་དུ་འཕང་བཅུག༔ ཁྲུས་ཆུ་ཕྱི་རོལ་དུ་
བསྒྱུར༔ དེ་ནས་རྐང་ཞབས་སུ་བལ་འདབ་དཀར་པོ་གཅིག་བཅུག་ལ༔ ད་སྟན་དཀར་པོ་ཐར་པའི་གནས་བྱང་ཕྱོགས་ལྕང་ལོ་ཅན་དུ་དཔལ་ཕྱག་ན་རྡོ་རྗེའི་སྤྱན་སྔར་བསླེབས་པས༔ ནད་གདོན་གང་གིས་ཀྱང་གླགས་མི་རྙེད་པར་སྒོམས་ལ༔ ཐལ་མོ་སྦྱར་བའི་བར་དུ་རྡོ་རྗེའི་རྩེ་མོ་འདི་ཟུངས་ལ༔ རྗེས་ཟློས་མཛོད༔ སྡིག་པ་ཐམས་ཅད་བྱང་བྱས་ནས༔ སྡུག་བསྔལ་ཐམས་ཅད་མེད་པར་བྱེད༔ རྒྱུད་དོ་ཅོག་གི་རྩ་བ་སྟེ༔ དཔལ་ཀུན་གྱིས་ནི་ལེགས་པར་བརྒྱན༔ ཚིག་རྗེས་མ་ལན་གསུམ༔ དེས་བྱབ་པ་སོང་ནས་བསྲུང་བ་ནི༔ བྱབ་ཁྲུས་ཀྱི་ཆོ་གས་ནད་གདོན་བསལ་ནས༔ སླར་མི་འཇུག་པའི་ཕྱིར་གོ་ཆ་བགོ་བ་ཡིན་ཏེ༔ ངེད་བཅོམ་ལྡན་འདས་སྨེ་བ་བརྩེགས་པར་གསལ་བས༔ ཁྱེད་རང་རྣམས་ལ་རྡོ་རྗེའི་གོ་ཁྲབ་ཞུ་ལུབས་སུ་བསྐོན་པས༔ ལུས་ལ་རྡོ་རྗེའི་གོ་ཁྲབ་མེ་འབར་ཞིང་ཚྭ་ཚྭ་འཕྲོ་བས༔ ཅིས་ཀྱང་མི་ཆོད་པ་མི་ཤིགས་པ༔ སྲ་བ་བརྟན་པ་བགེགས་དང་ལོག་འདྲེན་གང་གིས་ཀྱང་མི་ཚུགས་པར་སྒོམས༔ ཨོཾ་བྷཆུང་དྷིས་ཧཱུྃ་ཧཱུྃ་ཕཊ༔ སརྦ་པཱ་པཾ་རཀྵ་རཀྵ་སྭཱ་ཧཱཿ ཞེས་སྤྱི་གཙུག་ཏུ་རྡོ་རྗེ་རྒྱ་གྲམ་དུ་བཞག༔ དེ་བཞིན་དུ་མགོ་བོའི་ཕྱོགས་བཞི་དཔུང་པ་གཉིས༔ པུས་མོ་གཉིས༔ སྙིང་
ག༔ རྒྱབ་རྣམས་སུ་རྡོ་རྗེ་རྒྱ་གྲམ་དུ་བཞག་ཅིང་༔ མགོ་ནས་རྩ་སྔགས་དང་མཇུག་ཏུ་རཀྵ་རཀྵ་སྦྱར་བས༔ སརྦ་བིགྷ་ནཾ༔ སརྦ་རོ་ག༔ སརྦ་དུཥྚ༔ སརྦ་ཛཱ་ར༔ སརྦ་ཨུ་པ་དྲ་ཡེ༔ སརྦ་གྲ་ཧེ༔ སརྦ་ཨ་ཀ་ལ་མྲྀ་ཏ་ཡུ༔ སརྦ་དུར་སོབ་ནཾ༔ སརྦ་དུརྨི་ཏི༔ སརྦ་ཙིཏྟ་བྱཱ་ཀུ་ལེ༔ རཀྵ་རཀྟ་ཡེ་སྭཱ་ཧཱཿ དེས་ཆོག་ལ་སྤྲོ་ན་རྡོ་རྗེ་གདེངས་ཤིང་༔ ཁོ་ལ་ཚད་ཙམ་བྱ་ཞིང་༔ ནད་ཐམས་ཅད་ལས་སྲུངས་ཤིག་རཀྵ་རཀྵ༔ གདོན་ཐམས་ཅད་ལས་སྲུངས་ཤིག་རཀྵ་རཀྵ༔ གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ ཟས་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ གོས་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ རོ་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ བཙོག་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ ཉམས་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ དམེ་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ ཡུགས་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ འཁོན་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ མནོལ་གྲིབ་ཐམས་ཅད་ལས་སྲུངས་ཤིག་རཀྵ་རཀྵ༔ བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ལས་སྲུངས་ཤིག་རཀྵ་རཀ་ཡེ་སྭཱ་ཧཱཿ
དེ་ནས་རྡོ་རྗེ་མགོར་བཞག་ལ༔ རྒྱལ་བ་སྲས་བཅས་བདེན་པའི་བྱིན་རླབས་དང་༔ ཁྲོ་བོ་སྨེ་བ་བརྩེགས་པའི་བདེན་པ་ཡིས༔ འགྲོ་བ་འདི་དག་བདག་གིས་བསྲུངས་ཟིན་གྱིས༔ འདི་ལ་སུས་ཀྱང་གནོད་པ་མ་བྱེད་ཅིག༔ ཨོཾ་བཛྲ་རཀྵ་རཀྟ་ཡེ་སྭཱ་ཧཱཿ དེས་བསྲུང་བ་སོང་ནས་གཉིས་པ་ཤིས་པ་བརྗོད་པའི་དོན་དུ་བཅོམ་ལྡན་འདས་སྨེ་བརྩེགས་ལྷ་ཚོགས་རྣམས་ཀྱིས་བསྲུང་བའི་ཆོ་ག་བསྒོམས་པ་དེ་མི་ཉམས་ཤིང་བརྟན་པའི་ཕྱིར་བཀྲ་ཤིས་བརྗོད་ཅིང་རབ་གནས་མཛད་པའི་མོས་པ་མཛོད༔ ཅེས་ནས་གཏོར་ཞིང་༔ ཨོཾ་འབྲས་བུའི་རྡོ་རྗེ་སངས་རྒྱས་རྡོ་རྗེ་འཆང་༔ ལམ་གྱི་རྡོ་རྗེ་ཐེག་པ་ཆེན་པོའི་ཆོས༔ རྒྱུ་ཡི་རྡོ་རྗེ་དགེ་འདུན་རྡོ་རྗེའི་རིགས༔ མཆོག་གསུམ་རྡོ་རྗེས་སྐྱོབ་པའི་བཀྲ་ཤིས་ཤོག༔ སངས་རྒྱས་སྟོང་གི་རྡོ་རྗེའི་མི་མཛོད་འཛིན་ཞིང་༔ རྡོ་རྗེའི་སྐུ་ཅན་ཕྱག་ན་རྡོ་རྗེ་འཛིན༔ རྡོ་རྗེའི་གསུང་གི་རྡོ་རྗེའི་ཧཱུྃ་སྒྲ་སྒྲོག༔ རྡོ་རྗེ་སྨེ་བ་བརྩེགས་པའི་བཀྲ་ཤིས་ཤོག༔ གཉེན་པོའི་རྡོ་རྗེས་མི་དགེ་བཅུ་པོ་འཇོམས༔ སྟོབས་བཅུ་རྡོ་རྗེས་འཇིག་རྟེན་སྐྱོང་བཅུ་གནོན༔ ཕ་རོལ་ཕྱིན་བཅུ་མཐར་ཕྱིན་རྡོ་རྗེ་ཅན༔ རྡོ་རྗེ་ཁྲོ་རྒྱལ་བཅུ་ཡི་བཀྲ་ཤིས་ཤོག༔ རྡོ་རྗེའི་རིགས་ཅན་ཚངས་དབང་
བརྒྱ་བྱིན་དང་༔ རྡོ་རྗེའི་བཀའ་ཉན་ཕྱོགས་སྐྱོང་ལྷ་ཀླུ་དང་༔ རྡོ་རྗེའི་ཕོ་ཉ་གཟའ་དང་རྒྱུ་སྐར་ཚོགས༔ རྡོ་རྗེའི་རིགས་ཀྱི་སྲུང་མའི་བཀྲ་ཤིས་ཤོག༔ རིན་ཆེན་བུམ་པ་རྡོ་རྗེས་མཚོན་པ་ལ༔ རྟེན་འབྲེལ་རྫས་དང་རྡོ་རྗེའི་ཆུས་བཀང་ནས༔ རྡོ་རྗེའི་གཟུངས་ཐག་རྡོ་རྗེའི་འོད་ཟེར་འཕྲོ༔ རྡོ་རྗེ་དག་བྱེད་ཁྲུས་ཀྱི་བཀྲ་ཤིས་ཤོག༔ ཉོན་མོངས་བརྒྱད་ཁྲི་བཞི་སྟོང་རྡོ་རྗེས་འཇོམས༔ བགེགས་རིགས་སྟོང་ཕྲག་བརྒྱད་ཅུ་རྡོ་རྗེས་བརླག༔ ནད་རིགས་བཞི་བརྒྱ་རྩ་བཞི་རྡོ་རྗེས་ཞི༔ སྨོན་ལམ་རྡོ་རྗེས་འགྲུབ་པའི་བཀྲ་ཤིས་ཤོག༔ ཨོཾ་བྷཆུང་དྷིས་ཀཱ་ཡ་ཝཱཀ་ཙིཏྟ་བཛྲ་སིདྡྷི་ཧཱུྃ༔ ཛ་ཡེ་ཛ་ཡེ་བི་ཛ་ཡེ་སྭཱ་ཧཱཿ དེས་བཀྲ་ཤིས་པར་བྱ་བ་སོང་ངོ་༔ འོ་དེ་རྣམས་ཀྱི་དགེ་བ་བྱང་ཆུབ་ཏུ་བསྔོ་བའི་རྗེས་ཟློས་མཛོད༔ དགེ་བ་འདི་ཡིས་མྱུར་དུ་བདག༔ སྨེ་བ་བརྩེགས་པ་འགྲུབ་གྱུར་ནས༔ འགྲོ་བ་གཅིག་ཀྱང་མ་ལུས་པ༔ དེ་ཡི་ས་ལ་འགོད་པར་ཤོག༔ དེས་ནི་ཁྲུས་བྱབ་བསྲུང་གསུམ་ལེགས་པར་གྲུབ་པ་ཡིན་པས༔ གཏང་རག་གི་མཎྜལ་ཕུལ༔ ས་གཞི་སྤོས་ཆུས་སོགས༔ ཞེས་པ་གནམ་ཆོས་སྨེ་བརྩེགས་སྒྲུབ་ཐབས་ཀྱི་མཇུག་ན་འདི་ལ་བྱབ་ཁྲུས་སོགས་སྦྱར་རུང་ངོ་ཞེས་གསུངས་
པའི་ཕྱིར་རཱ་ག་ཨ་སྱས་སྦྱར་བའི་ཡི་གེ་པ་ནི་དབོན་པོ་མཐུ་སྟོབས་སོ༔ མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།