ཀླུ་གཏེར་འཛུགས་པ།
ཀླུ་གཏེར་འཛུགས་པའི་དབུ་ཕྱོགས་ཡོད།
ཀླུ་གཏེར་འཛུགས་པའི་ཕྱག་ལེན་ནི། ལག་པ་གཡས་གཡོན་རྩེ་གསུམ་གྱི་ཕྱག་རྒྱ་བྱས་པའི་བར་དུ། རིན་པོ་ཆེའི་དྷ་རུ་བཟུང་ལ། ཧཱུྃ། ཀླུ་རྒྱལ་འཁོར་བཅས་གཏེར་སྒོ་ཕྱེས། །ཞེས་སོགས་ཤོ་ལོ་ཀ་གཅིག་ལན་གསུམ་བརྗོད་དེ། དྷ་རུའི་གཏེར་སྙིང་ཁ་ཕྱེས་ནས། གཏེར་བླུགས་བཏོན། དེ་ནས་གཏེར་བུམ་གསར་པ་ཡོད་ན་རབ། མེད་ན་རྙིང་པའི་ནང་དུ། འབྲུ་ལྔ། རིན་ཆེན་ལྔ། དར་སྣ་ལྔ། གཞན་ཡང་ཀླུ་སྨན་སྣ་ཚོགས་ཀྱིས་བཀང་། གཡམ་པས་བཀབ། སྟེང་དུ་ཀླུ་གཟུགས་སྣ་ཚོགས་བ་ལ་ཚོན་གྱིས་དཀྲིས་པ་སོགས་ཕྱག་ལེན་མཐོང་བརྒྱུད་ལྟར་བཤམ་མོ། །ན་མོ་གུ་རུ་ཀླུ་ཡི་གཏེར་འཛུགས་པ་ནི། ཧཱུྃ། ཀླུ་རྒྱལ་འཁོར་བཅས་གཏེར་སྒོ་ཕྱེས། །ས་ཡི་ལྷ་མོ་གཏེར་སྒོ་ཕྱེས། །འདིར་གནས་ཀླུ་
དང་ས་བདག་རྣམས། །མི་བཟད་གཏེར་སྦས་སྒོ་ཕྱེས་ཤིག །ཅེས་ལན་གསུམ་བརྗོད་ལ། གཏེར་རྫས་བྱིན་གྱིས་བརླབས་པ་ནི། རང་ཐུགས་རྗེ་ཆེན་པོར་བསྐྱེད་ལ། རྡོ་རྗེ་གནོད་སྦྱིན་གྱི་ཕྱག་རྒྱས། ཨོཾ་བཛྲ་ཡཀྵ་ཧཱུྃ། རྡོ་རྗེ་མེ་ཡི་ཕྱག་རྒྱས། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ༔ ཨོཾ་སྭ་བྷ་ཝ་ཤུདྡྷསརྦ་དྷརྨསྭ་བྷ་ཝ་ཤུདྡྷོཉཧཾ། གཏེར་རྫས་རྣམས་སྟོང་པར་གྱུར། སྟོང་པའི་ངང་ལས་ཧཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། བཅུད་རྣམས་བདུད་རྩིའི་རྒྱ་མཚོ་ཆེན་པོ་ཀླུ་རྣམས་ཚིམ་ཞིང་ནད་ཀུན་གསོ་བའི་བདེ་བ་བསྐྱེད་པའི་བྱེད་ལས་དང་ལྡན་པར་
གྱུར། རྡོ་རྗེ་བསྡམས་པའི་ཕྱག་རྒྱས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་དྱ་ནུཏྤནྣ་ཏྭཱཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ན་མསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱསརྦ་ཐ་ཁཾ་ཨུཏྟ་ཏེ་སྤ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ལན་གསུམ་གྱིས་བྱིན་གྱིས་བརླབས་ལ་ཀླུ་ཁང་དུ་བཅུག་སྟེ། ཧཱུྃ། ཀླུ་རྒྱལ་འཁོར་བཅས་གཏེར་སྒོ་ཕྱེས། །ས་ཡི་ལྷ་མོ་གཏེར་སྒོ་ཕྱེས། །འདིར་གནས་ཀླུ་དང་ས་བདག་རྣམས། །མི་བཟད་གཏེར་སྦས་སྒོ་ཕྱེས་ཤིག །བང་མཛོད་རྣམས་སུ་གཏེར་སྦེད་དོ། །ཆོས་ཉིད་མཁའ་ལ་གཏེར་སྦེད་དོ། །འབྲུ་དང་བཟའ་བཏུང་གཏེར་སྦེད་དོ། །དར་ཚོན་གོས་ཀྱི་གཏེར་སྦེད་དོ། །ནད་སེལ་སྨན་གྱི་གཏེར་སྦེད་དོ། །རིན་ཆེན་སྣ་ཚོགས་གཏེར་སྦེད་དོ། །ཡིད་བཞིན་ནོར་བུའི་གཏེར་སྦེད་དོ། །མཛེས་པའི་གཟུགས་དང་སྙན་པའི་སྒྲ། །དྲི་ཞིམ་རོ་མཆོག་ལྡན་པ་དང་། །རེག་བྱ་བདེ་གཏེར་གཏེར་སྦེད་དོ། །གཏེར་ཆེན་དམ་པ་འདི་སྦས་པས། །མི་ཟད་ནམ་མཁའི་མཛོད་ལ་སྤྱོད་པ་དང་། །མཁོ་བའི་རྫས་སུ་འདི་གྱུར་ཅིག །ཉམས་དང་སྨས་པ་སོས་གྱུར་ཅིག །དབང་པོ་གཟི་མདངས་འཕེལ་གྱུར་ཅིག །ཆར་ཆུ་དུས་སུ་འབབ་པ་དང་། །ལོ་ཕྱུགས་རྟག་ཏུ་ལེགས་པ་དང་། །མི་ནད་
ཕྱུགས་ནད་ཞི་བ་དང་། །སྤུ་ཕྱུགས་ཐམས་ཅད་འཕེལ་གྱུར་ཅིག །བདག་ཅག་ཡོན་མཆོད་འཁོར་བཅས་ལ། །ཀླུ་གཉན་གདུག་པའི་ཁ་རླངས་དུག །མཛེ་ཤུ་གདུག་པའི་ནད་རྣམས་ཀུན། །ཡུད་ཙམ་གྱིས་ནི་ཞི་གྱུར་ཅིག །རྟག་ཏུ་བྱམས་པའི་སེམས་དང་ནི། །འཚོ་བ་ཅུང་ཟད་དག་ལ་ཡང་། །ངན་པའི་ལན་གྱི་གནོད་མ་བྱེད། །ཀྱེ། བདག་དང་རྒྱུ་འབྱོར་ཡོན་བདག་གིས། །ཀླུ་གཉན་ས་བདག་གནས་པའི་ཕྱོགས། །ས་གཉན་བསྐོས་དང་ཆུ་གཉན་དཀྲུག །ཤིང་གཉན་བཅད་དང་རྡོ་གཉན་རློག །དཀར་ཐབ་དཀར་ཐབ་ཤོར་བ་དང་། །སྐྱུར་ཐབ་ལུས་ཐབ་ཤོར་བ་དང་། །ཐབ་གཞོབ་མཁོན་དང་ཉམས་གྲིབ་སོགས། །མི་གཙང་བྱས་པའི་གྲིབ་མ་ཡིས། །ཀླུ་གཉན་ས་བདག་ལ་ཕོག་པས། །ཁྱེད་རྣམས་ལུས་སེམས་བསྣད་གྱུར་ན། །རྫ་ས་སྔགས་ཏིང་འཛིན་བདུད་རྩི་ལ། །བརྟེན་ནས་ལུས་སེམས་བདེ་གྱུར་ཅིག ༈ །ཝ་རུ་ཎ་སོགས་ཀླུ་ཆེན་བརྒྱད་པོ་དང་། །ས་བདག་ཀླུ་ཡི་རིགས་སུ་གྱུར་པ་ལ། །ག་པུར་ཛཱ་ཏིའི་དབུགས་ཉམས་སོས་གྱུར་ཅིག །གུར་གུམ་ཙནྡན་དྲི་ངད་བཟང་གྱུར་ཅིག །དབང་པོ་ལག་པས་ཡན་
ལག་སོས་གྱུར་ཅིག །ཆུ་སྲིན་སྡེར་མོས་སེན་མོ་སོས་གྱུར་ཅིག །དཀར་དམར་མཚལ་གྱིས་ཁྲག་ཉམས་སོས་གྱུར་ཅིག །དུང་གིས་རུས་པ་ཉམས་པ་སོས་གྱུར་ཅིག །གཟི་ཡིས་མིག་འབྲས་ཉམས་པ་སོས་གྱུར་ཅིག །རྒྱ་དར་དམར་པོས་ལྕེ་ཉམས་སོས་གྱུར་ཅིག །ཟི་ཧུན་རས་སྐུད་རྩ་ཉམས་སོས་གྱུར་ཅིག །གླ་གོར་ཞོ་ཤས་ཤ་ཉམས་སོས་གྱུར་ཅིག །མཁལ་མ་ཞོ་ཤས་མཁལ་ཉམས་སོས་གྱུར་ཅིག །སྤུ་ཤེལ་རྩེ་ཡིས་རྩ་ཉམས་སོས་གྱུར་ཅིག །རྨ་བྱའི་མདངས་ཀྱིས་མདངས་ཉམས་སོས་གྱུར་ཅིག །སྦྲུལ་གྱི་པགས་པས་པགས་ཉམས་སོས་གྱུར་ཅིག །རྡོ་རྒྱུས་དག་གིས་རྒྱུས་ཉམས་སོས་གྱུར་ཅིག །གུ་གུལ་དཀར་པོས་ཚིལ་ཉམས་སོས་གྱུར་ཅིག །བུམ་རམ་ཀ་རས་རོ་མཆོག་མྱོང་གྱུར་ཅིག །མེ་ཏོག་ཤིང་ཏོག་ལུས་ཀུན་མཛེས་གྱུར་ཅིག །རིན་པོ་ཆེ་ཡིས་ཚེ་དཔལ་རྒྱས་གྱུར་ཅིག །རྒྱ་མཚོ་སྦུ་བས་རྐང་ཉམས་སོས་གྱུར་ཅིག །ནཱ་ག་པདྨས་རྣ་དབང་སོས་གྱུར་ཅིག །གཞན་ཡང་ལི་ཤི་སུག་སྨེལ་དང་། །ཟི་ར་དཀར་ནག་ཨུཏྤལ་སྔོན་པོ་དང་། །ཨ་རུ་ར་དང་སྤང་སྤོས་ཏིལ་དཀར་ནག །ཐལ་དཀར་རྡོ་རྗེ་གསོ་མ་ར་ཛ་དང་། །གུར་གུམ་ཤིང་མངར་སྦྲང་རྩི་
དར་ཟབ་ཚོགས། །དཀར་གསུམ་གྱིས་མཛེས་མཆོད་སྦྱིན་གཏོར་མ་དང་། །མངར་གསུམ་གྱིས་བྲན་འོ་མའི་རྒྱ་མཚོ་དང་། །ཀླུ་རྣམས་དགའ་བའི་མཐུན་པའི་་རྫས་རྣམས་ཀྱིས། །སོ་སོའི་རེ་བ་མྱུར་དུ་སྐོང་གྱུར་ཅིག །ནང་གི་དོན་སྣོད་ཕྱི་ཡི་ཤ་པགས་རུས། །སྐྲ་སེན་བཀྲག་མདངས་རྩ་རྒྱུས་ཉམས་པ་དང་། །གཞོགས་སྐམ་ཞྭ་འོན་ལྐུགས་སོགས་སྡུག་བསྔལ་གྱི། །འཇིགས་པ་ཀུན་ལས་ཀླུ་རྣམས་ཐར་གྱུར་ཅིག །བྱེ་ཚན་མཁའ་ལྡིང་མེ་དང་ཐོག་ལ་སོགས། །གནོད་པ་ཀུན་བྲལ་སྦྲུལ་མགོའི་གདེངས་ཀ་ལྡན། །རིན་ཆེན་བྲག་སྐྱིབས་མཚོ་རྫིང་ཆུ་མིག་དང་། །ནེའུ་སིང་སྐྱིད་ཚལ་རྣམས་དང་ལྡན་གྱུར་ཅིག །མདོར་ན་ལུས་དང་སེམས་ལ་བདེ་བ་དང་། །དཀའ་སྐྱིད་མ་ལུས་ཚོགས་ཀུན་འབྱུང་གྱུར་ཅིག །དེ་ལྟར་ཀླུ་རྣམས་སྨན་གྱིས་ལེགས་སོས་ཤིང་། །བཟང་པོའི་སྨོན་ལམ་བཏབ་པ་འདི་ཡི་མཐུས། །བདག་སོགས་འགྲོ་བ་སེམས་ཅན་མ་ལུས་པ། མཐོང་རེག་བསམ་དང་ཁ་རླངས་སྦྱོར་བ་ཡིས། །ས་བདག་ཀླུ་ཡི་ནད་ཀུན་ཞི་བར་མཛོད། །འཕགས་མཆོག་སྤྱན་རས་གཟིགས་ཀྱིས་བཀའ་གནང་བའི། །འདོད་ཡོན་ལྔ་ལྡན་
གཏོར་མ་འདི་བཞེས་ལ། །ལན་ཆགས་འཁོར་ཞིང་ཤ་འཁོན་མ་ལུས་བྱང་། །འཇིག་རྟེན་ཁམས་སུ་ཆར་ཆུ་དུས་འབབས་ཤིང་། །ལོ་ཕྱུགས་སྨན་དང་ནགས་ཚལ་རབ་ཏུ་རྒྱས། །འགྲོ་རྣམས་བདེ་སྐྱིད་ཕུན་སུམ་ཚོགས་པ་ཡི། །ལེགས་པའི་ཡོན་ཏན་མ་ལུས་འགྲུབ་པར་མཛོད། །ཀྱི། ས་བདག་ཀླུ་གཉན་ཐམས་ཅད་ཉོན། །རིན་ཆེན་བུམ་པ་བཟང་པོ་འདི། །དགོས་འདོད་སྣ་ཚོགས་འབྱུང་བ་ཡིན། །ཀྱེ། ས་བདག་ཀླུ་གཉན་ཐམས་ཅད་ཉོན། །ཀླུ་ཆེན་བརྒྱད་པོ་འཁོར་དང་བཅས། །གཉན་རིགས་སྡེ་ལྔ་ལ་སོགས་རྣམས། །བདག་གིས་ཁྱེད་ལ་གཏེར་ཅིག་འབུལ། །རིན་ཆེན་བུམ་པའི་གཏེར་ཆེན་ནི། །ཀླུ་ཡི་ནོར་དུ་གྱུར་པ་འདི། །དགུན་གྱི་དུས་སུ་མ་སྐམ་ཞིག །དབྱར་གྱི་དུས་སུ་མ་རུལ་ཞིག །མི་ཟད་རིན་ཆེན་འདི་སྦས་པས། །ཀླུ་རྣམས་རྟག་ཏུ་ལོངས་སྤྱོད་ལྡན། །བདེ་སྐྱིད་ཕུན་སུམ་ཚོགས་གྱུར་ཅིག །རིན་ཆེན་སྣ་ལྔའི་གཏེར་སྦས་པས། །མི་ཟད་གཏེར་དང་འཕྲད་པར་ཤོག །སྙིང་པོ་ལྔ་ཡི་གཏེར་སྦས་པས། །དབང་པོ་ལྔ་པོ་ཚང་བར་ཤོག །སྨན་སྣ་ལྔ་ཡི་གཏེར་སྦས་པས། །ནད་ཀྱི་སྡུག་བསྔལ་ཞི་བར་ཤོག །འབྲུ་སྣ་
ལྔ་ཡི་གཏེར་སྦས་པས། །མུ་གེའི་བསྐལ་པ་ཞི་བར་ཤོག །སྤོས་སྣ་ལྔ་ཡི་གཏེར་སྦས་པས། །ཚུལ་ཁྲིམས་རྣམ་དག་ཚང་བར་ཤོག །ཤིང་ཐོག་ལྔ་ཡི་གཏེར་སྦས་པས། །རྩི་ཤིང་ནགས་ཚལ་རྒྱས་པར་ཤོག །འོ་མ་ལྔ་ཡི་གཏེར་སྦས་པས། །ཟས་སྣ་རོ་མཆོག་ལྡན་པར་ཤོག །དར་སྣ་ལྔ་ཡི་གཏེར་སྦས་པས། །ཁ་དོག་མདངས་དང་ལྡན་པར་ཤོག །བལ་ཚོན་ལྔ་ཡི་གཏེར་སྦས་པས། །གོས་སྣ་དྲོ་དང་ལྡན་པར་ཤོག །མངར་གསུམ་དག་གི་གཏེར་སྦས་པས། །གཟི་མདངས་བཀྲག་མདངས་ལྡན་པར་ཤོག །དཀར་གསུམ་དག་གི་གཏེར་སྦས་པས། །ཁ་ཟས་བཅུད་དང་ལྡན་པར་ཤོག །ཀླུ་ནོར་བརྒྱད་ཀྱི་གཏེར་སྦས་པས། །མི་འཇིགས་སྐྱབས་དང་ལྡན་པར་ཤོག །ཀླུ་གཟུགས་སྣ་ཚོགས་གཏེར་སྦས་པས། །འཁོར་དང་ལོངས་སྤྱོད་ལྡན་པར་ཤོག །རྫ་བུམ་གསར་པའི་གཏེར་སྦས་པས། །ཡུལ་ཕྱོགས་ཞིང་བཅུད་རྒྱས་པར་ཤོག །མི་ཟད་ཆེན་ཕུལ་བ་འདིས། །སྔགས་དང་ཕྱག་རྒྱས་བྱིན་བརླབས་ནས། །དཀོན་མཆོག་གསུམ་གྱི་བདེན་པའི་བཀའ། །སྦས་ནི་མི་མངོན་དབྱིངས་སུ་སྦས། །བཅོལ་ནི་གདུག་པའི་ཀླུ་
ལ་བཅོལ། །ཀླུ་ཡི་ས་བཅད་མི་ལ་ཕན། །མི་ཡི་ས་བཅད་ཀླུ་ལ་ཕན། །ས་བདག་ཀླུ་གཉན་གཏེར་དང་འཕྲད་པ་བཞིན། །སྦྱིན་བདག་འགྲོ་རྣམས་གཏེར་དང་འཕྲད་པར་ཤོག །འོག་ཏུ་ཀླུ་ཕྱུག་སྟེང་དུ་མི་ཕྱུག་ཤོག །སྟེང་དུ་མི་དར་འོག་ཏུ་ཀླུ་དར་ཤོག །འོག་ཏུ་ཀླུ་གཉན་སྟེང་དུ་མི་གཉན་ཤོག །རིན་ཆེན་ལྔ་ཡི་བུམ་པ་འདི། །ཀླུ་གཉན་གནས་པའི་ས་ཕྱོགས་སུ། །སྲིད་པའི་ཆུ་མིག་ཆེན་པོ་བརྡོལ། །ནོར་ཁ་ཆུ་མིག་ཆེན་པོ་བརྡོལ། །ནས་ཀྱི་ས་ཆ་ཆེན་པོ་བརྡོལ། །ཕྱུགས་ཀྱི་གཡང་ར་ཆེན་པོ་བརྡོལ། །རིགས་རྒྱུད་བུ་མང་ཆེན་པོ་བརྡོལ། །ད་ནི་སྦས་སོ་དབྱིངས་སུ་སྦས། །དབྱིགས་སུ་སྦས་པས་རུལ་མི་སྲིད། །ད་ནི་བཏབ་བོ་རྒྱ་ཡིས་བཏབ། །རྒྱ་ཡི་བཏབ་པས་འཁྲོལ་མ་གྱུར། །གཅིག་པ་བྱང་ཆུབ་སེམས་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །ཕྱོགས་བཞི་མཚམས་བརྒྱད་སྟེང་འོག་བཅུ། །མི་འགྱུར་ངེས་པའི་རྒྱ་ཡིས་བཏབ། །སྟེང་དུ་ཤིང་ཐོག་མཁར་སྒོང་བཞག་གོ །གཏེར་འཛུགས་ཀྱི་ཆོ་ག་རྫོགས་སོ།། །།དགེའོ། །དགེའོ། །དགེའོ། ༈་ཁུངས་དག་གང་ཡིན་མ་ཤེས་ཀྱང་ཆགས་མེད་རིན་པོ་ཆེའི་གསུང་ཡིན་པ་འདྲ།