ཡིག་དྲུག་བསྐུལ་བ་ངོ་མཚར་ཅན་གཅིག
ཡིག་དྲུག་བསྐུལ་བ་ངོ་མཚར་ཅན་གཅིག་བཞུགས་སོ།
ཨོཾ་མ་ཎི་པདྨེ་ཧཱུྃ། དཔལ་གྱི་བྱེ་བ་ཕྲག་བརྒྱ་ནས། །པད་འབྱུང་བྱེ་བ་ཕྲག་བརྒྱ་ཡིས། །འདིར་ཚོགས་ཁྲོམ་པའི་བར་ཆད་སོལ། །ལྕང་ལོ་ཅན་གྱི་གནས་མཆོག་ནས། །གསང་བདག་བྱེ་བ་ཕྲག་བརྒྱ་ཡིས། །འདིར་ཚོགས་ཁྲོམ་པའི་བར་ཆད་སོལ། །བདེ་ཆེན་དབང་དྲག་རོལ་པ་ནས། །ཁྲོ་བོ་རྟ་མགྲིན་རིགས་ལྔ་ཡིས། །འདིར་ཚོགས་ཁྲོམ་པའི་བར་ཆད་སོལ། །འོག་མིན་ཆོས་དབྱིངས་ཞིང་ཁམས་ནས། །དྲིན་ཅན་རྩ་བརྒྱུད་བླ་མ་ཡིས། །འདིར་ཚོགས་ཁྲོམ་ལ་བྱིན་གྱིས་རློབས། །ལྷོ་ཕྱོགས་དཔལ་གྱི་རི་བོ་ནས། །གྲུབ་ཆེན་བརྒྱ་དང་བརྒྱད་ཅུ་ཡིས། །འདིར་
ཚོགས་ཁྲོམ་ལ་བྱིན་གྱིས་རློབས། །པདྨ་འོད་ཀྱི་གཞལ་ཡས་ནས། །རྗེ་འབངས་ཉི་ཤཱུ་རྩ་བདུན་གྱིས། །འདིར་ཚོགས་ཁྲོམ་ལ་བྱིན་གྱིས་རློབས། །གངས་ཅན་བོད་ཀྱི་ཞིང་ཁམས་ནས། །གཏེར་སྟོན་བརྒྱ་དང་རྩ་བརྒྱད་ཀྱིས། །འདིར་ཚོགས་ཁྲོམ་ལ་བྱིན་གྱིས་རློབས། །དག་པའི་ཞིང་ཁམས་ལྔ་པོ་ནས། །ཞི་བ་བཞི་བཅུ་རྩ་གཉིས་ཀྱིས། །འདིར་ཚོགས་ཁྲོམ་ལ་དངོས་གྲུབ་གནོང་། །དུར་ཁྲོད་མེ་རི་འབར་བ་ནས། །ཁྲག་འཐུང་ལྔ་བཅུ་རྩ་བརྒྱད་ཀྱིས། །འདིར་ཚོགས་ཁྲོམ་ལ་དངོས་གྲུབ་གནོང་། །ཚོམ་བུ་དགུ་ཡི་ད་ལ་ནས། །སྒྲུབ་པ་བཀའ་བརྒྱད་ལྷ་ཚོགས་
ཀྱིས། །འདིར་ཚོགས་ཁྲོམ་ལ་དངོས་གྲུབ་གནོང་། །རང་བཞིན་རྣམ་དག་གཞལ་ཡས་ནས། །བླ་མ་དགོངས་འདུས་ལྷ་ཚོགས་ཀྱིས། །འདིར་ཚོགས་ཁྲོམ་ལ་དངོས་གྲུབ་གནོང་། །ཕྲིན་ལས་གྲུབ་པའི་གཞལ་ཡས་ནས། །བདུད་འདུལ་ཕུར་པའི་ལྷ་ཚོགས་ཀྱིས། །འདིར་ཚོགས་ཁྲོམ་ལ་དངོས་གྲུབ་གནོང་། །པོ་ཊ་ལ་ཡི་གནས་མཆོག་ནས། །ཐུགས་རྗེ་ཆེན་པོ་སྤྱན་རས་གཟིགས། །འདིར་ཚོགས་ཁྲོམ་གྱི་ལམ་སྣ་དྲོངས། །སྟེང་ཕྱོགས་དགའ་ལྡན་ལྷ་ཡུལ་ནས། །རྒྱལ་ཚབ་བྱམས་པ་མགོན་པོ་ཡིས། །འདིར་ཚོགས་ཁྲོམ་གྱི་ལམ་སྣ་དྲོངས། །ཨོ་རྒྱན་གནྡྷོའི་གཙུག་ལག་ནས། །ཡུམ་མཆོག་རྡོ་རྗེ་ཕག་མོ་ཡིས། །འདིར་ཚོགས་ཁྲོམ་གྱི་ལམ་སྣ་དྲོངས། །རྒྱ་ནག་རི་བོ་རྩེ་ལྔ་ནས། །འཇམ་དཔལ་གཞོན་ནུར་གྱུར་པ་ཡིས། །ཆོས་བཤད་གོ་བར་བྱིན་གྱིས་རློབས། །རྒྱ་གར་ཆུ་བོ་གང་གཱ་ནས། །རིག་པའི་ལྷ་མོ་དབྱངས་ཅན་མས། །ཆོས་བཤད་གོ་བར་བྱིན་གྱིས་རློབས། །ཆོས་ཀྱི་དབྱིངས་ཀྱི་ཕོ་བྲང་ནས། །འཕགས་མ་ཤེར་ཕྱིན་དཀར་མོ་ཡིས། །ཆོས་བཤད་གོ་བར་བྱིན་གྱིས་རློབས། །རི་རབ་རི་ཡི་རྩེ་མོ་ནས། །ཁྱུང་ཆེན་ཉི་ཤཱུ་རྩ་གཅིག་གིས། །ཆོས་བཤད་གོ་བར་
བྱིན་གྱིས་རློབས། །འདིར་ཚོགས་ཁྲོམ་པའི་སྲུང་སྐྱོབ་མཛོད། །སྟག་ཚང་སེང་གེ་བསམ་འགྲུབ་ནས། །གུ་རུ་རྡོ་རྗེ་གྲོ་ལོད་ཀྱིས། །འདིར་ཚོགས་ཁྲོམ་གྱི་བར་ཆད་སོལ། །གཡུ་ལོ་བཀོད་པའི་ཞིང་ཁམས་ནས། །སྒྲོལ་མ་བརྒྱ་དང་རྩ་བརྒྱད་ཀྱིས། །འདིར་ཚོགས་ཁྲོམ་གྱི་བར་ཆད་སོལ། །ཤར་ཕྱོགས་དག་པའི་ཞིང་བདུན་ནས། །བདེ་གཤེགས་སྨན་ལྷ་མཆེད་བརྒྱད་ཀྱིས། །འདིར་ཚོགས་ཁྲོམ་པའི་ནད་རྣམས་སོལ། །རྒྱ་གར་མངོན་དགའི་རི་ཁྲོད་ནས། །ལྷ་མོ་ཤིང་ལོའི་ན་བཟའ་ཅན། །འདིར་ཚོགས་ཁྲོམ་པའི་ནད་རྣམས་སོལ། །རི་བོ་གྲུ་འཛིན་སྐེད་པ་ནས། །འཕགས་མ་ཡིད་བཞིན་འཁོར་ལོ་ཡིས། །འདིར་ཚོགས་ཁྲོམ་པའི་ནད་རྣམས་སོལ། །གྱི་མི་ཤན་གྱི་གནས་མཆོག་ནས། །སེམས་དཔའ་ས་ཡི་སྙིང་པོ་ཡིས། །རྩྭ་ཁ་ལོ་ཏོག་རྒྱས་པར་མཛོད། །རི་རབ་ཆེན་པོའི་བྱང་ཕྱོགས་ནས། །ལྷ་མོ་ཆེན་མོ་དཔལ་ཆེན་མོས། །རྩྭ་ཁ་ལོ་ཏོག་རྒྱས་པར་མཛོད། །དབང་ཆེན་གསེར་གྱི་ས་གཞི་ནས། །ས་ཡི་ལྷ་མོ་བརྟན་མ་ཡིས། །རྩྭ་ཁ་ལོ་ཏོག་རྒྱས་པར་མཛོད། ༈ འདིར་ཚོགས་ཁྲོམ་པས་ཅི་འདྲ་བསམ། །ང་དེ་ནམ་འཆི་ནམ་འཆི་
བསམ། །ཟས་གོས་འདི་ཚོ་ཟད་ལུགས་ཀྱིས། །མི་ཚེ་ཟད་ཤི་ན་ཡོད་ཡོད་འདྲ། །ཕུ་ཤི་མདའ་ཤི་ཟེར་བའི་དུས། །རང་ཡང་དེ་དང་འདྲ་སྣང་བྱུང་། །ཕྱུག་པོ་ཤི་བ་ཐོས་པའི་ཚེ། །སྨན་དང་རིམ་གྲོས་མི་ཕན་དོགས། །བཙན་པོ་ཤི་བ་ཐོས་པའི་ཚེ། །དཔུང་གིས་འཆི་བ་མི་ཁོག་དོགས། །གབ་བླ་རྐང་རུས་མཐོང་བའི་ཚེ། །རང་ཡང་དེ་འདྲ་ནམ་ཡོང་བསམ། །དེ་འདྲའི་དུས་ཤིག་བྱུང་ཙ་ན། །དམ་པའི་ཆོས་ཤིག་མ་གཏོགས་པ། །ཅིས་ཀྱང་ཕན་པ་མི་གདའ་བསམ། །གསུང་མཆོག་ཡི་གེ་དྲུག་པ་འདིས། །དེ་དུས་ཕན་ངེས་ཡིན་ནོ་བསམ། །ཡར་མཆོད་མར་སྦྱིན་གང་ཐིངས་ཀྱང་། །དེ་དུས་ལམ་རྒྱགས་ཡིན་ན་བསམ། །དེ་རིང་འདུས་པའི་ཁྲོམ་པ་ཚོ། །ལོ་བརྒྱ་སོང་ནས་གཅིག་ཀྱང་མེད། །དེ་ལ་བསམས་ནས་མཆི་མ་ཤོར། །དེ་རིང་ཚོགས་པའི་མཛེས་མ་ཚོ། །དྲུག་ཅུ་སོང་ནས་ཡི་དྭགས་འདྲ། །དེ་ལ་བསམས་ནས་ཡི་མུག་སྐྱེ། །སྐྱེས་མཐའ་འཆི་དང་བསགས་མཐའ་ཟད། །གང་ལ་སྙིང་པོ་མི་འདུག་པས། །སྙིང་པོ་དམ་པའི་ལྷ་ཆོས་མཛོད། །ཨ་ཀྱང་བུས་ནི་ཀུ་རེ་མིན། །དབྱར་ཁའི་འབུ་སྲིན་མང་ལུགས་ཀྱིས། །མི་ལུས་ཐོབ་པ་དཀའ་དཀའ་འདྲ། །ད་རིས་
ལུས་ལ་སྙིང་པོ་ལོངས། །གདན་གཅིག་ངག་བཅད་ཁས་ལེན་མཛོད། །དུད་འགྲོ་ཚོ་ལ་ཕར་བལྟས་པས། །སྨྲ་བརྗོད་ཤེས་པ་དཀའ་དཀའ་འདྲ། །ད་རེས་ངག་ལ་སྙིང་པོ་ལོངས། །ཡིག་དྲུག་འདོན་པའི་ཁས་ལེན་མཛོད། །བཤའ་ལུག་འདི་ཚོའི་སྡུག་བསྔལ་ལ། །དམྱལ་བའི་སྡུག་བསྔལ་ཇི་ལྟར་ཁྱག །སྡིག་སྤངས་དགེ་སྒྲུབ་ཁས་ལེན་མཛོད། །བར་དོའི་འཕྲང་ལ་འགྲིམ་པའི་དུས། །གྲོགས་སུ་རིག་པའི་ཁྱེའུ་ཆུང་བཟང་། །ད་ལྟ་ངོ་ཤེས་མཛད་ན་ལེགས། །དམ་པ་རིགས་བརྒྱའི་ལྷ་ཚོགས་རྣམས། །བར་དོའི་འཕྲང་ནས་བསུ་བ་མཛད། །ད་ལྟ་ཞལ་འགྲིས་ཡོད་ན་ལེགས། །ཆོས་ཀྱི་རྒྱལ་པོའི་ཁྲིམས་ར་ནས། །སྡིག་པ་གསང་ཡང་མེ་ལོང་གསལ། །ད་ལྟ་བཤགས་པ་བྱེད་ན་བསམ། །དགེ་བ་འདོད་ཀྱང་ཚོལ་ཁུངས་མེད། །ཡང་ལྗིད་གཤིན་རྗེའི་རྒྱུ་མར་བཀྱག །ད་ལྟ་རང་དབང་ཡོད་དུས་འདིར། །དགེ་བའི་རྒྱ་ཁ་མཐོ་ཙམ་རེམ། །སྤྲང་པོ་ང་ཡི་དཀོར་བཤགས་མཛོད། །ཨ་ཀྱང་ང་དོ་དཀོར་བཤགས་ལ། །ནམ་མཁའ་འདི་ལ་ཕར་བལྟས་པས། །ལྟ་བ་ཕྱོགས་རིས་མེད་པ་དྲན། །ཉི་ཟླ་འདི་ལ་ཕར་བལྟས་པས། །རང་རིག་རང་གསལ་རྗེན་པ་དྲན། །སྤྲིན་
ཚོགས་འདི་ལ་ཕར་བལྟས་པས། །གང་ཤར་ངོ་བོ་སྟོང་པ་དྲན། །ཆུ་བོ་འདི་ལ་ཕར་བལྟས་པས། །གཉུག་མ་རྒྱུན་ཆད་མེད་པ་དྲན། །ཆུ་རླབས་འདི་ལ་ཕར་བལྟས་པས། །འགྱུ་བ་རང་ཞི་རང་གྲོལ་དྲན། །འཇའ་ཚོན་འདི་ལ་ཕར་བལྟས་པས། །སྣང་སྟོང་ཡི་དམ་ལྷ་སྐུ་དྲན། །བྲག་ཆ་འདི་ལ་ཕར་བལྟས་པས། །གྲག་སྟོང་སྔགས་ཀྱི་རོལ་པ་དྲན། །ཨ་ཀྱང་དེ་ཚོ་ཀུ་རེ་ཡིན། །སྟོང་སྒྲུབ་ཚེས་པ་མཐོལ་ལོ་བཤགས། །ནུབ་ནི་གཏི་མུག་གཉིད་ལ་སོང་། །ནངས་ནུབ་ཟས་གོས་གཡེང་བས་ཁྱེར། །བྱ་བཞག་ཆུ་ཡི་གཉེར་མ་འདྲ། །དོན་ཆུང་ལས་ལ་མི་ཚེ་ཟད། །དམ་ཆོས་བྱེད་བསམ་ངང་ལ་ལུས། །བསམ་རྒྱུ་མེད་པ་འཆི་བདག་སླེབས། །དེ་འདྲའི་དུས་ཤིག་ནམ་ཡོང་ཨང་། །བསམ་ལོ་ཡོད་པའི་མི་ཡོད་ན། །དམ་ཆོས་བསྒྲུབ་ན་ད་རན་གདའ། །རན་པས་མི་ཚད་ཕྱིས་པ་འདྲ། །དེ་ལ་སོམས་ལ་ལྷ་ཆོས་མཛོད། ༈ །ཤར་གྱི་ཕྱོགས་ནས་བཀྲ་ཤིས་པ། །ཐུགས་རྗེ་ཆེན་པོ་སེང་གེ་སྒྲ། །འདིར་འཚོགས་ཁྲོམ་ལ་བཀྲ་ཤིས་ཤོག །ལྷོ་ཡི་ཕྱོགས་ནས་བཀྲ་ཤིས་པ། །ཡིད་བཞིན་འཁོར་ལོ་སྤྱན་རས་གཟིགས། །འདིར་འཚོགས་ཁྲོམ་ལ་བཀྲ་ཤིས་ཤོག །ནུབ་ཀྱི་ཕྱོགས་
ནས་བཀྲ་ཤིས་པ། །འཇིག་རྟེན་དབང་ཕྱུག་སྤྱན་རིས་གཟིགས། །འདིར་འཚོགས་ཁྲོམ་ལ་བཀྲ་ཤིས་ཤོག །བྱང་གི་ཕྱོགས་ནས་བཀྲ་ཤིས་པ། །དོན་ཡོད་ཞགས་པ་སྤྱན་རས་གཟིགས། །འདིར་འཚོགས་ཁྲོམ་ལ་བཀྲ་ཤིས་ཤོག །སྟེང་གི་ཕྱོགས་ནས་བཀྲ་ཤིས་པ། །པདྨ་གཙུག་ཏོར་སྤྱན་རས་གཟིགས། །འདིར་འཚོགས་ཁྲོམ་ལ་བཀྲ་ཤིས་ཤོག །འོག་གི་ཕྱོགས་ནས་བཀྲ་ཤིས་པ། །མགྲིན་པ་སྔོན་པོ་སྤྱན་རས་གཟིགས། །འདིར་འཚོགས་ཁྲོམ་ལ་བཀྲ་ཤིས་ཤོག །དབུས་ཀྱི་ཕྱོགས་ནས་བཀྲ་ཤིས་པ། །ནམ་མཁའ་རྒྱལ་པོ་སྤྱན་རས་གཟིགས། །འདིར་འཚོགས་ཁྲོམ་ལ་བཀྲིས་ཤོག །ཕྱག་སྟོང་འཁོར་ལོས་སྒྱུར་རྒྱལ་སྟོང་། །ཕུན་སུམ་ཚོགས་པའི་བཀྲ་ཤིས་ཤོག །སྤྱན་སྟོང་བསྐལ་བཟང་སངས་རྒྱས་སྟོང་། །འབྲེལ་ཚད་དོན་ལྡན་བཀྲ་ཤིས་ཤོག །ཅེས་པ་ས་མོ་བྱ་ཡི་ལོ། །མགོ་ཟླའི་ཚེས་དྲུག་ནུབ་མོ་ལ། །བླ་མ་སྦྱིན་པས་བསྐུལ་བའི་ངོར། །ར་གཱ་ཨ་སྱས་གང་དྲན་སྨྲས། །བསྐུལ་བ་པོ་དེས་ཞུན་མར་གྱི། །ངོས་ལ་མགྱོགས་བྲིས་བྱས་པའོ། །མངྒ་ལཾ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།