ཡིག་དྲུག་དུང་ཁ་གང་དུས་དགའ་སྟོན་བྱེད་ཅིང་སྨོན་ལམ་འདེབས་པ།
ཡིག་དྲུག་དུང་ཁ་གང་དུས་དགའ་སྟོན་བྱེད་ཅིང་སྨོན་ལམ་འདེབས་པའི་དབུ་ཕྱོགས་བཀྲ་ཤིས་པར་གྱུར་ཅིག ༈ །དུང་གིས་ཁ་གང་དུས་སྨོན་ལམ་བཏབ་པ་འདི། དུང་གཉིས་ཟེར་བ་ཚིག་ཁ་བསྒྱུར་ནས་བསྙེན་པ་གང་ཐོན་གྱི་མཇུག་ཏུ་ཐོན་ན་ལེགས། སྒྲུབ་པའི་མཇུག་ཏུ་བྱས་ཀྱང་དེ་དང་འདྲ། བྱེ་བ་ཁ་གང་དུས་དུང་གཉིས་ཟེར་བ་བྱེ་བ་ཁ་བསྒྱུར་ནས་ཚར་རེ་འདོན་ནོ། །
ན་མོ་གུ་རུ། དུས་མཐའི་སྔགས་འཆང་རཱ་ག་ཨ་སྱ་བདག །ནོར་གྱི་སྙིང་པོ་སྔགས་དང་བསྙེན་སྒྲུབ་སོགས། །ལྷ་དང་དྲང་སྲོང་རྣམས་ཀྱིས་བཤད་པ་ཡི། །རིག་སྔགས་ཀྱིས་ཀྱང་བསླུ་བ་མེད་པ་ལས། །རྫོགས་སངས་རྒྱས་ཀྱིས་གསུངས་པའི་རིག་སྔགས་ཀྱིས། །ནམ་ཡང་བསླུ་བ་མེད་སྙམ་ངེས་ཤེས་བསྐྱེད། །ལོ་བརྒྱད་ལོ་དགུ་ལོ་བཅུ་དུས་ཀྱི་ཚེ། །བཛྲ་གུ་རུ་འཐོར་བསྙེན་བྱས་པ་དང་། །དེ་ནས་བཅུ་དགུའི་བར་དུ་མཚམས་ཡིན་པས། །གུ་རུ་ཞི་དྲག་འཐོར་བསྙེན་མང་པོ་དང་། །དབུས་སུ་ལོ་བདུན་ལོ་ངོ་དྲུག་ཐོག་ཚེ། །སྒྲོལ་དཀར་ལ་སོགས་འཐོར་བསྙེན་མང་པོ་དང་། །ཕྲེང་བ་འཐོར་དང་བོར་བ་ལ་སོགས་ཀྱིས། །དགེ་བ་གྲངས་སུ་བརྩི་རྒྱུ་མ་རྙེད་ཀྱང་། །ཁ་བཀང་ལྷག་དང་ལྷུག་པ་འོང་ངོ་སྙམ། །གཞོན་ཚེ་འཇིག་རྟེན་པ་
ཡི་ལྷ་ཕྲན་རིགས། །རྣམ་གྲངས་ཉི་ཤཱུ་རྩ་ཙམ་བསྙེན་སྒྲུབ་པ། །ཕྱི་མར་ཕན་གནོད་མེད་སྙམ་འདིར་མ་རྩིས། །བཅུ་གཅིག་ནས་བཟུང་བཅུ་དགུའི་ལོ་མགོ་བར། །ཟླ་མཚམས་འགའ་ཟུང་བྱས་ཚེ་གང་ཐོན་རྣམས། །ཡི་གེར་བྲིས་ནས་འདུག་པ་གཞིར་བྱས་ཏེ། །ཉེར་ལྔ་ནས་བཟུང་དེང་སང་ང་དགུའི་བར། །མཚམས་དང་སྒྲུབ་པ་འཐོར་བསྙེན་ཀུན་བསོགས་པ། །དུང་ཕྱུར་གཅིག་དང་སུམ་འབུམ་བཟླས་པ་ཐེམ། །དེ་ཡི་ནང་དུ་ཚེ་སྒྲུབ་བསྙེན་པ་ནི། །བྱེ་བ་དྲུག་དང་དྲུག་འབུམ་འདྲེས་པ་ཡིན། །དེ་ལྟར་ཡི་དམ་ལྷ་ཚོགས་དུས་འདི་ལ། །ལོ་གྲངས་བཞི་བཅུ་ཞེ་དགུ་ཐོག་པར་གྱུར། །ཉེར་ལྔ་ནས་བཟུང་ཐུགས་རྗེ་ཆེན་པོ་བསྙེན། །ཡིག་དྲུག་ཡིག་བདུན་ཡིག་བཅུ་ལ་སོགས་དང་། །རྒྱལ་བ་རྒྱ་མཚོའི་སྔགས་རིང་གཉིས་ལ་སོགས། །མཚམས་དང་སྒྲུབ་
པ་འཐོར་སྙེན་ཀུན་བསྡོམས་པའི། །ཐུགས་རྗེ་ཆེན་པོ་དུང་ཕྱུར་གཅིག་དང་ནི། །ཁ་བཀང་འབུམ་ཕྲག་གཉིས་ནི་ཐེམ་པ་ཡིན། །དེ་ལྟར་ཐུགས་རྗེ་ཆེན་པོའི་དུང་འདི་ལ། །ལོ་གྲངས་སུམ་ཅུ་སོ་གཅིག་ཐོག་པ་ནི། །གཏོར་བསྔོས་དུས་མཆོད་རྣམ་གྲངས་མང་བ་དང་། །ཞལ་གདམས་ཟིན་བྲིས་གནམ་ཆོས་ཆག་ཕྱི་སོགས། །རྣམ་གཡེང་བྱ་བ་མང་བས་ལན་པ་ཡིན། །ཁ་བཀང་རྣམས་ནི་སླད་ནས་འདོན་རྒྱུ་ཡིན། །གཞི་མ་ཉིད་དུ་བརྩི་བར་བྱེད་པ་དང་། །འཐོར་བསྙེན་གཞན་གྱི་ཚེ་སྒྲུབ་བདུད་རྩི་ཡིན། །ཁ་བཀང་ལས་བཞིའི་སྦྱིན་སྲེག་བརྒྱ་རྩ་རེ། །རྒྱལ་བ་རྒྱ་མཚོའི་དབང་བཞི་གཏོར་དབང་གཉིས། །གནམ་ཆོས་ཚེ་དབང་བདག་འཇུག་བརྒྱ་རྩ་རེ། །བསྔོ་བ་བརྒྱ་རྩ་བཟླས་པ་རབ་གནས་ཀྱི། །རྟེན་འབྲེལ་སྙིང་པོ་བཟླས་པ་མང་ཞིག་བཅས། །རང་ལོ་ང་དགུ་མེ་མོ་ལུག་གི་ལོ། །ཆོ་འཕྲུལ་ཆེན་པོའི་ཡར་ཚེས་བརྒྱད་ལ་འགྲུབ། །དགའ་སྟོན་བཀྲ་ཤིས་ཚོགས་ཀྱི་འཁོར་ལོ་བྱས། །འདི་ཉིད་བྲི་བ་དགོས་པ་མི་འདུག་ཀྱང་། །བཟླས་པའི་ཁ་བཀང་སྦྱིན་སྲེག་བདག་འཇུག་དང་། །བཟླས་པ་མི་ཉམས་རབ་གནས་རྟེན་འབྲེལ་སྙིང་། །བསྔོ་སྨོན་བརྒྱ་རྩེ་བཀྲ་ཤིས་དགའ་སྟོན་སོགས། །ཕྱི་རབས་རྗེས་འཇུག་རྣམས་ཀྱིས་ཤེས་ཕྱིར་བྲིས། །དུས་ཆེན་སྐར་མ་བཟང་དང་བསྒྲིགས་པ་ཡིན། །རང་གི་ཚོད་ཀའི་དགེ་བ་རླབས་ཆེན་ལ། །བསྔོ་སྨོན་གོ་མ་ལོག་པ་རྒྱ་ཆེན་པོ། །བཏབ་ན་གང་བཏབ་འགྲུབ་པ་རྒྱལ་བས་གསུངས། །དེ་ཕྱིར་རང་གི་འདོད་པ་དང་བསྟུན་པའི། །བསྔོ་བ་སྨོན་ལམ་གང་ཤེས་འདི་ལྟར་གདབ། །།ན་མོ་
རཏྣ་ཏྲ་ཡཱ་ཡ། ཕྱོགས་བཅུའི་འཇིག་རྟེན་རབ་འབྱམས་ཐམས་ཅད་ན། །འདས་དང་མ་བྱོན་ད་ལྟ་དུས་གསུམ་གྱི། །རྒྱལ་བ་རྒྱལ་སྲས་ཉན་ཐོས་རང་རྒྱལ་ཚོགས། །ཐམས་ཅད་མ་ལུས་བདག་ལ་དགོངས་སུ་གསོལ། །ཡེ་ཤེས་སྤྱན་གྱིས་ཉིན་མཚན་དུས་དྲུག་ཏུ། །ཐུགས་རྗེའི་བརྩེ་བས་སེམས་ཅན་ཐམས་ཅད་ལ། །རྟག་ཏུ་གཟིགས་རྣམས་བདག་ལ་ཐུགས་རྗེས་གཟིགས། །རྡོ་རྗེའི་སྙན་གྱིས་སེམས་ཅན་ཐམས་ཅད་ཀྱི། །ངག་ཏུ་ཅི་སྨྲས་རྟག་ཏུ་གསན་པ་རྣམས། །བདག་གིས་སྨྲས་པའི་ཚིག་འདི་གསན་དུ་གསོལ། །མངོན་ཤེས་ཐུགས་ཀྱིས་སེམས་ཅན་ཐམས་ཅད་ལ། །ཡིད་ལ་ཅི་འགྱུས་རྟག་ཏུ་མཁྱེན་པ་རྣམས། །བདག་གི་འདོད་པའི་དོན་འདི་མཁྱེན་པར་གསོལ། །བདག་ནི་ཐོག་མེད་དུས་ནས་ད་ལྟའི་བར། །དགེ་བའི་རྩ་བ་བགྱིས་དང་བགྱིད་བསྩལ་དང་། །གཞན་གྱིས་བགྱིད་ལ་རྗེས་སུ་ཡི་རང་དང་། །འདི་ལྟར་ཐུགས་རྗེ་ཆེན་པོ་དུང་ཕྱུར་དང་། །རྩ་གསུམ་ལྷ་ཡི་བསྙེན་པ་དུང་ཕྱུར་དང་། །དགེ་བའི་རྩ་བ་ཐམས་ཅད་གཅིག་བསྡུས་ཏེ། །སངས་རྒྱས་འོད་དཔག་མེད་པ་གཙོར་བྱས་པའི། །ཕྱོགས་བཅུ་དུས་གསུམ་རྒྱལ་བ་སྲས་བཅས་དང་། །
རྩ་བརྒྱུད་བླ་མ་ཀུན་གྱི་སྤྱན་སྔར་འབུལ། །མཆོད་སྤྲིན་རྒྱ་མཚོ་ནམ་མཁའི་མཐའ་ཁྱབ་པའི། །ཉེར་སྤྱོད་ལྔ་དང་འདོད་ཡོན་རྣམ་པ་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །མཆོད་པའི་ལྷ་མོ་བཅུ་དྲུག་ལ་སོགས་པ། །དུས་གསུམ་རྒྱུན་ཆད་མེད་པར་འབྱུང་གྱུར་ཅིག །དེ་ལ་བརྟེན་ནས་རྒྱལ་བའི་བསྟན་པ་ནི། །རབ་འབྱམས་འཇིག་རྟེན་ཁམས་རྣམས་ཐམས་ཅད་དུ། །རྙེད་དང་བཀུར་བསྟི་དང་བཅས་རྒྱས་གྱུར་ཅིག །བསྟན་པ་འཛིན་པའི་སྐྱེས་བུ་དམ་པ་ནི། །གང་ན་སུ་བཞུགས་གང་ཕན་བྱེད་པ་དང་། །དེ་དག་ཐམས་ཅད་ཡུན་རིང་ཞབས་བརྟན་ཞིང་། །འགྲོ་དོན་ཕྲིན་ལས་ཕྱོགས་མཐར་ཁྱབ་གྱུར་ཅིག །དེ་ལྟར་དགེ་རྩ་ཐམས་ཅད་གཅིག་བསྡུས་ཏེ། །ཕ་དང་མ་དང་སློབ་མ་ཡོན་བདག་དང་། །བདག་ལ་འབྲེལ་བ་ཐོགས་ཚད་གཙོར་བྱས་པའི། །འགྲོ་དྲུག་སེམས་ཅན་མ་ལུས་ཀུན་ལ་བསྔོ། །ངན་སོང་འཁོར་བའི་སྡུག་བསྔལ་ཀུན་བྲལ་ནས། །མྱུར་དུ་བླ་མེད་བྱང་ཆུབ་ཐོབ་གྱུར་ཅིག །དེ་ལྟར་དགེ་རྩ་དེ་དག་ཀུན་བསྡུས་ཏེ། །བདག་གི་རྒྱུད་ལ་ད་ལྟ་སྐད་ཅིག་ཉིད། །སྨིན་ནས་དེ་ཡི་འབྲས་བུ་གསལ་གྱུར་ཅིག །ནད་གདོན་འཇིགས་
པ་བཅུ་དྲུག་ཀུན་ཞི་ནས། །ཚེ་དང་བསོད་ནམས་ཉམས་རྟོགས་འཕེལ་གྱུར་ཅིག །བྱང་ཆུབ་བསྒྲུབ་ལ་བར་ཆད་མི་འབྱུང་ཞིང་། །ཚེ་དང་སྒྲུབ་པ་མཐའ་རུ་ཕྱིན་གྱུར་ཅིག །བདག་གི་རིགས་རྒྱུད་ཆོས་བརྒྱུད་ཐམས་ཅད་ནི། །ཇི་སྲིད་གསང་སྔགས་བསྟན་པ་གནས་ཀྱི་བར། །གང་གཱའི་རྒྱུན་བཞིན་འཕེལ་ཞིང་རྒྱས་པ་དང་། །མཁས་བཙུན་བཟང་པོའི་ཡོན་ཏན་ཀུན་ལྡན་ཞིང་། །མི་ནུབ་བསྟན་པའི་རྒྱལ་མཚན་ཚུགས་གྱུར་ཅིག །ཡུལ་ཕྱོགས་འདི་དང་ཡངས་པའི་རྒྱལ་ཁམས་སུ། །ཡམས་ནད་མུ་གེ་འཁྲུག་རྩོད་མི་འབྱུང་ཞིང་། །ལོ་ལེགས་བདེ་སྐྱིད་ཕུན་སུམ་ཚོགས་གྱུར་ཅིག །བདག་ནི་ནམ་ཞིག་འཆི་བའི་དུས་ཀྱི་ཚེ། །དུག་མཚོན་བསམ་སྦྱོར་ངན་པ་མི་འབྱུང་ཞིང་། །གནད་གཅོད་ཟུག་ཟེར་ཆགས་ཞེན་མེད་གྱུར་ཅིག །དྲན་པ་གསལ་ཞིང་ཐིམ་རིམ་ངོས་ཟིན་ནས། །འཆི་བ་འོད་གསལ་མ་བུ་འཕྲད་གྱུར་ཅིག །འོད་གསལ་ངང་དུ་ཅི་འདོད་གནས་པ་དང་། །དེ་ལ་འབྲོག་སོགས་བར་ཆད་མེད་གྱུར་ཅིག །དེ་ནས་འཁོར་བའི་སྒོ་བརྒྱད་བཀག་བྱས་ཏེ། །ཤེས་བཞིན་ཚངས་པའི་བུག་ནས་འཕོ་གྱུར་ཅིག །དེ་ནས་འོད་གསལ་གཉིས་པ་ངོ་
འཕྲོད་དེ། །དེ་ཡི་ངང་ལ་ཅི་འདོད་གནས་གྱུར་ཅིག །དེ་ནས་ཡི་དམ་ཐུགས་རྗེ་ཆེན་པོའི་སྐུ། །བསྒོམས་པས་བར་དོ་ཡིད་ལུས་གནས་གྱུར་ནས། །ལྷ་སྐུ་ཕྱག་རྒྱ་ཆེན་པོ་འགྲུབ་གྱུར་ཅིག །གལ་ཏེ་སྒྲ་འོད་ཟེར་གསུམ་ཞི་ཁྲོའི་ལྷ། །ཤར་ནས་མི་སྐྲག་རང་ངོ་ཤེས་གྱུར་ནས། །ཡི་དམ་ལྷ་དང་དགོངས་པ་མཉམ་གྱུར་ཅིག །ཁྱད་པར་བཅོམ་ལྡན་རྒྱལ་བ་འོད་དཔག་མེད། །དགེ་སློང་དགེ་འདུན་ཚོགས་ཀྱིས་མདུན་བདར་ཏེ། །བསུ་བའི་ཚུལ་གྱིས་མདུན་དེར་འབྱོན་གྱུར་ཅིག །སྨན་བླའི་དྲུང་ནས་བྱང་ཆུབ་སེམས་དཔའ་བརྒྱད། །ནམ་མཁར་བྱོན་ནས་བདེ་ཆེན་ཞིང་ཁམས་སུ། །འགྲོ་བའི་ལམ་ཡང་གསལ་བར་སྟོན་གྱུར་ཅིག །ཕྱག་བཞི་པ་དང་ཞིང་སྐྱོང་རྣམ་སྲས་སོགས། །ཡེ་ཤེས་ཆོས་སྐྱོང་སྲུང་མ་ཐམས་ཅད་ཀྱིས། །ཞིང་ཁམས་བསྒྲོད་པའི་ལམ་གྱི་བར་ཆད་སྲུངས། །བདེ་བ་ཅན་གྱི་ཞིང་དེར་སྐྱེས་གྱུར་ཅིག །འོད་དཔག་མེད་པའི་སྐུ་རྒྱབ་རྟེན་པའི་ཤིང་། །མཐོ་ཚད་དཔག་ཚད་སྟོང་དང་དྲུག་བརྒྱ་པ། །དེ་མཐོང་ཡོན་ཏན་དཔག་མེད་ཐོབ་པར་ཤོག །དེ་ཡི་དྲུང་ན་རིན་ཆེན་རྨ་བྱའི་ཁྲིར། །རྒྱལ་བ་འོད་དཔག་མེད་པ་མཚན་དཔེ་འབར། །སྤྱན་རས་གཟིགས་
དང་མཐུ་ཆེན་ཐོབ་ལ་སོགས། །བྱང་ཆུབ་སེམས་དཔའི་དགེ་འདུན་འཁོར་དང་བཅས། །མངོན་སུམ་ལྷང་ངེར་བདག་གིས་མཐོང་གྱུར་ཅིག །སྐུ་ཡི་འོད་ཟེར་ཕོག་པས་སྒྲིབ་པ་དག །ལུས་ངག་ཡིད་གསུམ་དགའ་ཞིང་བདེ་བ་རྒྱས། །མེ་ཏོག་པདྨའི་སྦུབས་སུ་བདག་ཞུགས་ནས། །སྐད་ཅིག་དེ་ལ་བརྫུས་ཏེ་སྐྱེ་གྱུར་ཅིག །དབུ་ལ་གཙུག་ཏོར་ཞབས་ལ་འཁོར་ལོ་སོགས། །མཚན་དཔེ་ཀུན་རྫོགས་འོད་ཟེར་འབར་བའི་ལུས། །ཞིང་དེའི་སེམས་པ་གཞན་དང་མཚུངས་གྱུར་ཅིག །དེ་མ་ཐག་ཏུ་པདྨ་ཁ་བྱེ་སྟེ། །རྒྱལ་བ་འོད་དཔག་མེད་པ་མཐོང་གྱུར་ཅིག །རང་གི་ལག་པའི་མཐིལ་ནས་མཆོད་པའི་སྤྲིན། །དཔག་མེད་སྤྲུལ་ནས་རྒྱལ་བ་མཆོད་གྱུར་ཅིག །འོད་དཔག་མེད་ཀྱི་ཕྱག་གིས་དབང་གནང་ནས། །བྱང་ཆུབ་མཆོག་གི་ལུང་བསྟན་ཐོབ་གྱུར་ཅིག །དེ་མ་ཐག་ཏུ་རབ་དགའི་ས་ཐོབ་ནས། །རིམ་གྱིས་ས་བཅུ་མངོན་དུ་བྱེད་གྱུར་ཅིག །པོ་ཊ་ལ་དང་ཟངས་མདོག་དཔལ་གྱི་རི། །དགའ་ལྡན་ལྕང་ལོ་ཅན་དང་ཨོ་རྒྱན་ཡུལ། །འོག་མིན་འཐུགས་པོ་བཀོད་དང་མངོན་པར་དགའ། །རྫུ་འཕྲུལ་སྟོབས་ཀྱིས་སྐད་ཅིག་བགྲོད་བྱ་ཞིང་། །ཞིང་དེའི་གཙོ་
བོ་རྣམས་ལ་མཆོད་སྤྲིན་མཆོད། །དབང་དང་གདམས་ངག་ཞུས་ནས་སྐད་ཅིག་ལ། །སླར་ཡང་བདེ་བ་ཅན་དུ་སླེབས་གྱུར་ཅིག །བདག་དང་སློབ་མ་བརྒྱུད་པར་བཅས་པ་ལ། །ཟས་ནོར་ཆོས་ཀྱིས་འབྲེལ་པའི་འགྲོ་བ་ཀུན། །ནམ་ཞིག་བར་དོར་འཁྱམས་པ་དེ་ཡི་ཚེ། །བདག་གི་མངོན་པར་ཤེས་པས་དེ་མཐོང་ནས། །རྫུ་འཕྲུལ་སྟོབས་ཀྱིས་སྐད་ཅིག་དེར་འོང་སྟེ། །བདེ་བ་ཅན་གྱི་ཞིང་དེར་ཁྲིད་གྱུར་ཅིག །འཛམ་གླིང་བྱེ་བ་ཕྲག་བརྒྱའི་ཞིང་ཁམས་ན། །བྱམས་པ་ལ་སོགས་བསྐལ་བཟང་སངས་རྒྱས་སྟོང་། །བྱེ་བ་ཕྲག་བརྒྱ་རིམ་བཞིན་བྱོན་ནས་ཀྱང་། །ཐེག་ཆེན་ཆོས་ཀྱི་འཁོར་ལོ་བསྐོར་བའི་ཚེ། །སྐད་ཅིག་ཉིད་ལ་བདག་ཀྱང་དེར་འོང་ནས། །སངས་རྒྱས་མཆོད་ཅིང་དམ་ཆོས་ཉན་བྱས་ཏེ། །སྐད་ཅིག་ཉིད་ལ་བདེ་ཆེན་ཞིང་སླེབས་ཤོག །དེ་བཞིན་ཤར་ཕྱོགས་བཻཌཱུརྱ་སྣང་ཞིང་། །ལྷོ་ཕྱོགས་དཔལ་ལྡན་ཞིང་དང་ལས་རབ་རྫོགས། །དག་པའི་ཞིང་ཁམས་རབ་འབྱམས་ཐམས་ཅད་དུ། །རྫུ་འཕྲུལ་སྟོབས་ཀྱིས་སྐད་ཅིག་བགྲོད་བྱེད་ཅིང་། །དབང་དང་གདམས་ངག་ནོད་ནས་སྐད་ཅིག་ལ། །བདེ་བ་ཅན་གྱི་ཞིང་དེར་ཕྱིན་པར་ཤོག །འོད་དཔག་མེད་པའི་སྐུ་ཚེ་
བརྟན་པའི་ཡུན། །ཇི་སྲིད་གནས་བར་ཞིང་དེར་བདག་གནས་ཤོག །དེ་བཞིན་འོད་ཟེར་དཔལ་བརྩེགས་རྒྱལ་པོ་ཡི། །སྐུ་ཚེ་བསྟན་པ་ཇི་སྲིད་གནས་བར་དང་། །ཡོན་ཏན་ནོར་བུ་བརྩེགས་པའི་རྒྱལ་པོ་ཡི། །སྐུ་ཚེ་ཇི་སྲིད་གནས་པ་དེ་ཡི་བར། །བདག་ནི་ཞིང་དེར་ཁོ་ནར་འཛིན་པར་ཤོག །དེ་ནི་བདག་གི་ཚེ་དེ་བརྗེས་མ་ཐག །ཞིང་ཁམས་དེའམ་དག་པའི་ཞིང་ཁམས་སུ། །བདག་ཉིད་མངོན་པར་རྫོགས་པར་སངས་རྒྱས་ཏེ། །པདྨ་ཆུ་སྐྱེས་དྲི་མེད་ཅེས་བྱར་ཤོག །དེ་ཡི་སྐུ་ཚེ་བསྟན་པ་འཁོར་ལ་སོགས། །འོད་དཔག་མེད་པ་ཉིད་དང་མཚུངས་པར་ཤོག །བདག་ཉིད་ནམ་ཞིག་རབ་དགའི་ས་ཐོབ་ནས། །སྤྲུལ་པ་ཡང་སྤྲུལ་མང་པོ་འབྱེད་པ་ཡང་། །གཞན་ཕན་ཕྲན་ཚེགས་ཙམ་པ་མ་ཡིན་པར། །སྤྱན་རས་གཟིགས་དབང་བྱེ་བ་ཕྲག་བརྒྱ་ཡི། །འགྲོ་དོན་གཅིག་ཏུ་བསྡུས་འདྲའི་ཕྲིན་ལས་དང་། །འཇམ་དབྱངས་བྱེ་བ་ཕྲག་བརྒྱའི་མཁྱེན་རབ་དང་། །ཕྱག་རྡོར་བྱེ་བ་ཕྲག་བརྒྱའི་མཐུ་སྟོབས་དང་། །ཨོ་རྒྱན་བྱེ་བ་ཕྲག་བརྒྱའི་རྫུ་འཕྲུལ་དང་། །རྣམ་སྲས་བྱེ་བ་ཕྲག་བརྒྱའི་དཔལ་འབྱོར་རྣམས། །གཅིག་ཏུ་བསྡུས་འདྲ་ཁོ་ནར་འབྱུང་བར་ཤོག །དེ་
འདྲའི་བརླབས་ཆེན་མཛད་པའི་ཕྲིན་ལས་ཀྱིས། །སྲིད་པ་ཇི་སྲིད་འགྲོ་དོན་བྱེད་པ་ལ། །འཕགས་མཆོག་རིགས་གསུམ་མགོན་དང་དབྱེར་མེད་ཤོག །བདག་ནི་སྐྱེ་བ་འདི་དང་སྐྱེ་བ་གཞན། །ཟས་ནོར་ཆོས་ཀྱིས་འབྲེལ་པ་ཐོབ་པ་དང་། །མཐོང་དང་ཐོས་དང་དད་ཅིང་གུས་པ་ཡིས། །བདེ་བ་ཅན་གྱི་ཞིང་དུ་སྐྱེ་བར་ཤོག །ཤ་ཁྲག་རུས་དང་སྐྲ་དང་གོས་དུམ་སོགས། །ལུས་ལ་འཆང་ངམ་དེ་ཡི་དྲི་ཚོར་བ། །ནད་རིགས་གདོན་རིགས་ཐམས་ཅད་ཞི་བ་དང་། །ངན་སོང་གསུམ་གྱི་སྐྱེ་སྒོ་ཆོད་པར་ཤོག །འཕགས་པ་དཀོན་མཆོག་གསུམ་ཚེགྱི་བྱིན་རླབས་དང་། །སངས་རྒྱས་བྱང་སེམས་ཀུན་གྱི་ཐུགས་རྗེ་དང་། །ཆོས་ཉིད་གདོད་ནས་རྣམ་པར་དག་པ་ཡི། །བདེན་ལྡན་ཇི་སྙེད་རྣམས་ཀྱི་བདེན་སྟོབས་ཀྱིས། །སྨོན་ལམ་དེ་དག་བསླུ་མེད་འགྲུབ་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏདྱ་ཐཱ་པཉྩ་དྲི་ཡ་ཨ་ཝ་བོ་དྷ་ན་ཡེ་སྭཱ་ཧཱ། ཞེས་པ་འདི་ནི་མེ་མོ་ལུག་གི་ལོ་ཆོ་འཕྲུལ་ཆེན་པོའི་ཡར་ཚེས་བརྒྱད་ཀྱི་ཉིན། །དུང་ཕྱུར་ཁ་གང་བའི་དགའ་སྟོན་ཚོགས་འཁོར་དུས། །གཉིས་མེད་རཱ་ག་ཨ་སྱས་བདག་གིས་སྨྲས། །ཡི་གེ་པ་ནི་བེ་ཁྲོ་དགེ་བཤེས་པདྨ་སྦྱིན་པའོ། །སྨོན་ལམ་འདེབས་དུས་ཚེས་བདུན་ཉིན། །སརྦ་མངྒ་ལཾ།། །།