སྒྲོལ་དཀར་ཡིད་བཞིན་འཁོར་ལོའི་བཀའ་བབས་གསོལ་འདེབས།
སྒྲོལ་དཀར་ཡིད་བཞིན་འཁོར་ལོའི་བཀའ་བབས་གསོལ་འདེབས་ནི། ན་མོ་ཨཱརྱ་ཏཱ་རེ་ཡེ། རྒྱུད་རྒྱལ་གསུངས་མཛད་བཅོམ་ལྡན་ཤཱཀྱ་ཐུབ། །འདུས་པའི་འཁོར་དང་ཞུ་སྤོབས་འཇམ་པའི་དབྱངས། །མངོན་པར་འབྱུང་དང་སྣ་ཚོགས་ལས་བྱུང་རྒྱུད། །སྟོན་འཁོར་ཆོས་དང་བཅས་ལ་གསོལ་བ་འདེབས། །འཕགས་མ་ཉིད་དང་དེ་ཡིས་རྗེས་བཟུང་ནས། །རྒྱུའཆི་བསླུའི་བསྟན་བཅོས་མཛད་པོ་ངག་དབང་ཕྱུག །བསྟན་བཅོས་རྒྱས་པའི་ལས་མཛད་ངག་དབང་གྲགས། །དེ་སྲས་ཐུ་བོ་རྣམས་ལ་གསོལ་བ་འདེབས། །སྒྲུབ་ཐབས་བརྒྱ་རྩ་མཛད་པ་རྡོ་རྗེ་གདན། །མན་ངག་བོད་དུ་སྣང་མཛད་བ་རི་པ། །སླེ་ནག་པ་དང་སྒྲེ་པ་ཟུར་ཁ་པ། །བཀའ་བབས་བརྒྱུད་པ་རྣམས་ལ་གསོལ་བ་འདེབས། །པཎ་ཆེན་གསེར་གླིང་པ་དང་ཨ་ཏི་ཤ །འབྲོམ་སྟོན་རྗེ་དང་རྒྱལ་སྲས་སྤྱན་སྔ་པ། །འཕགས་མས་དངོས་སུ་རྗེས་བཟུང་སྒྲ་པའི་ཞབས། །ཞལ་གཟིགས་བརྒྱུད་པ་རྣམས་ལ་གསོལ་བ་ཀླུའདེབས། །མ་འོངས་རྒྱལ་བ་བདུན་པ་ཤཱཀྱའི་སྲས། །གནས་ལྔ་མཁས་པའི་པཎ་ཆེན་དཱ་ན་ཤི། །བཙན་ཐང་བླ་མ་ཀ་པ་ལ་ལ་སོགས། །བྱིན་རླབས་བརྒྱུད་པ་རྣམས་ལ་
གསོལ་བ་འདེབས། །དྭགས་པོ་ཕག་གྲུ་རྒྱལ་བ་སྟག་ལུང་པ། །བ་ལམ་པ་དང་ཤཱཀྱ་གཞོན་ནུ་དང་། །གྲགས་པ་སེང་གེ་དར་རྒྱལ་མཁའ་སྤྱོད་དབང་། །བརྒྱུད་པའི་བླ་མ་རྣམས་ལ་གསོལ་བ་འདེབས། །གཞན་ཡང་གཡུང་སྟོན་རྡོ་རྗེ་དཔལ་ལ་སོགས། །དབང་གིས་རབ་སྨིན་རིམ་གཉིས་མཐར་སོན་ནས། །འཕགས་མའི་རྒྱུད་གཞུང་ཆུ་བོ་རྒྱས་མཛད་པ། །ངོ་མཚར་བརྒྱུད་པ་དྲུག་ལ་གསོལ་བ་འདེབས། །བསོད་ནམས་འབུམ་དང་བླ་མ་རྒྱལ་མཚན་དང་། །ཆོས་ཀྱི་གྲགས་པ་མཉན་པ་མི་བསྐྱོད་རྗེ། །དཀོན་མཆོག་འབངས་དང་ཞྭ་དགུ་པའི་ཞབས། །བརྒྱུད་པའི་བླ་མ་རྣམས་ལ་གསོལ་བ་འདེབས། །འཕགས་མ་ཡང་ཡང་ཞལ་གཟིགས་ལུང་བསྟན་ཐོབ། །གནས་ལྔ་མཁས་པའི་བྱང་ཕྱོགས་པཎྜི་ཏ། འཇམ་དབྱངས་བླ་མ་ཆོས་ཀྱི་སྣང་བ་ཅན། །རྩ་བའི་བླ་མའི་ཞབས་ལ་གསོལ་བ་འདེབས། །ཚེ་དཔག་མེད་ཡུམ་བཅོམ་ལྡན་གོས་དཀར་མོ། །བསྒོམ་དང་བཟླས་པས་འཇིགས་པ་ཀུན་སྐྱོབས་ཤིང་། །ཚེ་དཔལ་ཡོན་ཏན་ཡེ་ཤེས་རྒྱས་མཛད་མ། །ཡི་དམ་འཕགས་མའི་ཞབས་ལ་གསོལ་བ་འདེབས། །འཕགས་མའི་རྗེས་འབྲངས་ནོར་འཆང་གནོད་སྦྱིན་
མ། །སྤྲུལ་པའི་ལྷ་མོ་ལྕགས་སྤྱང་སྔོན་མོ་སོགས། །སྒྲོལ་མའི་རྒྱུད་གཞུང་གང་ཟག་སྲུང་མཛད་པ། །ཆོས་བདག་སྲུང་མའི་ཚོགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཡིད་བཞིན་འཁོར་ལོ་གཡས་སྐོར་འོད་ཟེར་གྱིས། །ཉོན་མོངས་སྒྲིབ་གཉིས་བྱང་བར་བྱིན་གྱིས་རློབས། །ནུས་ལྡན་གསང་སྔགས་གཡོན་སྐོར་ཏིང་འཛིན་གྱིས། །ཚེ་དཔལ་ཡེ་ཤེས་འཕེལ་བར་བྱིན་གྱིས་རློབས། །འཁོར་ལོ་འོད་ཟེར་རིམ་དྲུག་ཏིང་འཛིན་གྱིས་། །འཇིགས་པ་ཀུན་ལས་སྐྱོབས་པར་བྱིན་གྱིས་རློབས། །སྣ་ཚོགས་སྔགས་དང་ཏིང་འཛིན་འཁྲུལ་འཁོར་གྱིས། །འགྲོ་བའི་རེ་འདོད་བཀང་བར་བྱིན་གྱིས་རློབས། །ཆོས་ཀུན་སྒྱུ་མ་མེ་ལོང་གཟུགས་བརྙན་ལྟར། །རྒྱལ་ཡུམ་དགོངས་པ་རྟོགས་པར་བྱིན་གྱིས་རློབས། །འཆི་ཚེ་རྣམ་ཤེས་ཧཱུྃ་ཡིག་མདའ་འཕང་བཞིན། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་འདི་ཁ་ཆེ་པཎྜིཏ་ཉི་མ་སྦས་པ་ནས་ཉེ་བར་བཟུང་སྟེ་སྐྱེ་བ་ཐམས་ཅད་དུ་འཕགས་མས་རྗེས་སུ་བཟུང་ནས་གཏམ་རྒྱུད་མཐའ་ཡས་པ་མངའ་ཞིང་སྐུ་སྐྱེ་བ་འདི་ལའང་ལན་དུ་མར་ཞལ་གཟིགས་ཤིང་ལུང་བསྟན་པ་ཐོབ་པའི་ཚུལ་བསྟན་པ་རྗེ་ཆོས་ཀྱི་དབང་ཕྱུག་གིས་ཞལ་སྔ་ནས་འཕགས་མའི་
སྤྲུལ་པ་རྒྱ་གསུམ་དང་ཁྲི་བཙུན་གཉིས་ཡུན་རིང་དུ་བཞུགས་པའི་གནས་ཤར་འོད་ཟེར་དབ་པའི་ཕོ་བྲང་དུ་སྒྲོལ་མ་ཡིད་བཞིན་འཁོར་ལོའི་རྗེས་གནང་གི་རིམ་པ་ཇོ་བོ་རྗེའི་ལུགས་སུ་ཐོབ་པས་རྭ་ག་ཨ་སྱས་བརྒྱུད་རིམ་ལ་གསོལ་བ་བཏབ་པའོ།། སརྦ་མངྒ་ལཾ། །