རྗེ་དྲུག་པས་བསྩལ་བའི་སྒྲོལ་དཀར་བསྡུས་པའི་ལྷན་ཐབས་ཀྱི་མདུན་བུམ།
རྗེ་དྲུག་པས་བསྩལ་བའི་སྒྲོལ་དཀར་བསྡུས་པའི་ལྷན་ཐབས་ཀྱི་མདུན་བུམ་བཞུགས་སོ།
ན་མོ་ཨཱརྱ་ཏཱ་རེ་ཡེ། རྗེ་རྒྱལ་བ་ཐམས་ཅད་མཁྱེན་པ་ཞྭ་དམར་རིན་པོ་ཆེ་དྲུག་པས་བསྩལ་བའི་སྒྲོལ་དཀར་བསྡུས་པའི་ཁ་སྐོང་ལྷན་ཐབས་མདུན་བུམ་ནི། །མཎྜལ་ཚོམ་བུ་བུམ་པ་མཆོད་གཏོར་འདུ་བར་བྱས་ལ་བདག་བསྐྱེད་སྔོན་དུ་སོང་ནས། ཨོཾ་ཤཱ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཏྨ་ཀོཉཧཾ། ཧཱུྃ་ལས་བུམ་པའི་ནང་དུ་མཎྜལ་སྟེང་། །གཞལ་ཡས་ཁང་དབུས་པདྨ་ཟླ་བའི་སྟེང་། །ཏཱཾ་ཡིག་དཀར་པོའི་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཚུར་འདུས་ཡོངས་གྱུར་ལས། །འཕགས་མ་སྒྲོལ་མ་རབ་དཀར་ཞི་འཛུམ་ཅན། །ཕྱག་གཉིས་གཡས་པས་མཆོག་སྦྱིན་གཡོན་པ་ན། །མཐེབ་སྲིན་སྦྱར་
བས་ཨུཏྤལ་ཡུ་བ་འཛིན། །བྱེ་དང་མ་བྱེ་མེ་ཏོག་ལྷག་པ་ཡི། །རྩེ་མོ་གསུམ་གྱི་དུས་གསུམ་སངས་རྒྱས་མཚོན། །སྒེག་ཅིང་ཡིད་འོང་ཡེ་ཤེས་སྤྱན་བདུན་ལྡན། །རིན་ཆེན་རྒྱན་སྤྲས་དར་དཔྱངས་སྨད་གཡོགས་གསོལ། །དབུ་སྐྲ་ནག་ལ་སྣུམ་པ་བཅིངས་ཤིང་གྲོལ། །རྡོ་རྗེའི་གདན་ལ་བཞུགས་པའི་གནས་གསུམ་པོ། །འབྲུ་གསུམ་མཚན་དང་ཐུགས་ཀའི་ཧཱུྃ་ཡིག་ལས། །འོད་འཕྲོས་ཡེ་ཤེས་པ་དང་དབང་ལྷ་རྣམས། །ནམ་མཁར་སྤྱན་དྲངས་བཛྲ་ས་མཱ་ཛ། །པོ་ཊ་ལ་ཡི་གནས་མཆོག་ནས། །ཏཱཾ་ཡིག་དཀར་པོ་ལས་འཁྲུངས་ཤིང་། །ཏཱཾ་ཡིག་འོད་
ཀྱིས་འགྲོ་བ་སྒྲོལ། །སྒྲོལ་མ་འཁོར་བཅས་གཤེགས་སུ་གསོལ། །འཕགས་མ་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བ་ནི་བཞུགས་སུ་གསོལ། །ཨོཾ་ཨཱརྱ་ཏཱ་རེ་པདྨ་ཀ་མ་ལཱ་ཡེ་སྟེ། ཛཿཧཱུྃ་བཾ་ཧོ༔དམ་ཡེ་དབྱེར་མེད་འདྲེས། །དབང་ལྷས་དབང་བསྐུར་རིགས་བདག་གིས་མཚན་པའི། །ཐུགས་ཀར་འཁོར་ལོ་རྩིབས་བརྒྱད་ལྟེ་བར་ཧཱུྃ། །གཡས་གཡོན་ཨོཾ་ཧཱ་ལྷག་མའི་ཡི་གེ་བརྒྱད། །རྩིབས་སྟེང་གནས་པའི་འཁོར་ལོ་མུ་ཁྱུད་ལྔ། །དབྱངས་གསལ་རྟེན་འབྲེལ་རྡོ་རྭ་པོ་མེ་རིས་བསྐོར། །འོད་ཟེར་འཕྲོ་འདུས་འཆི་མེད་ཚེ་ལ་སོགས། །ཡོན་ཏན་ཡེ་ཤེས་ཐམས་ཅད་འཕེལ་བར་གྱུར། །ཅེས་བསྒོམས་ནས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་སམ། །ཡང་ན། ཨོཾ་ཏཱ་རེ་ཏུཏྟ་རེ་ཏུ་རེ་མ་མ་ཨཱ་ཡུཔུཎྱེ་ཛྙཱ་ན་པུཊྚི་ཀུ་རུ་ཡེ་སྭ་ཧཱ། ཞེས་པ་ཅི་འགྲུབ་དང་། གཟུངས་ཐག་བརྒྱུད་ནས་འོད་འཕྲོས་བུམ་ལྷ་བསྐུལ། །ཐུགས་ཀའི་འོད་ཀྱིས་བརྟན་
གཡོའི་ཚེ་བཅུད་བསྡུས། །སྐུ་ལས་བདུད་རྩིའི་རྒྱུན་བབ་བུམ་པ་གང་། །གོང་ལྟར་ཡིག་བཅུའམ། ཡང་ན་ཚེ་སྙིང་དང་། ཨོཾ་ཏཱ་རེ་ཏུཏྟ་རེ་ཏུ་རེ་ནད་གདོན་སྡིག་སྒྲིབ་ཐམས་ཅད་སརྦ་ཤཱནཾ་ཀུ་རུ་ཡེ་སྭཱ་ཧཱ། ཞེས་བརྒྱ་རྩ་བརྒྱད་བཟླས། ལས་བུམ་ནང་དུ་བདུད་རྩི་འཁྱིལ་པ་གསལ། ཨོཾ་ཨ་མྲྀ་ཏེ་ཧཱུྃ་ཕཊ། ཅེས་ལན་བདུན་བཟླས། ཧཱུྃ་ལས་མཆོད་སྤྲིན་བསམ་གྱིས་མི་ཁྱབ་པར་གྱུར། ཨོཾ་བཛྲ་སྥ་ར་ཎ་ཁཾ། རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་བགྱིའོ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པའི། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་ཚོགས་ཀྱིས་བཞེས་སུ་གསོལ། །ཨོཾ་ཨཱརྱ་ཏཱ་རེ་ཨརྒྷཾ། པཱདྡྷཾ། པུཥཱ། དྷ་པེ། །ཨཱ་ལོ་ཀེ། གྷནྡྷེ། ནི་ཝི་ཏྱཱ། ཤཔྟ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྤུ་ར་ཎ་ས་མ་ཡེ་ཧཱུྃ། རྒྱལ་ཡུམ་ཟག་མེད་འབྱོར་པ་མངའ་སྒྱུར་ཡང་། །འགྲོ་བའི་དོན་དུ་འདོད་ཡོན་རྣམ་ལྔ་ཡིས། །མཆོད་པས་མཁའ་མཉམ་སེམས་ཅན་ཐམས་ཅད་ཀྱི། །བསོད་ནམས་མི་བཟད་གཏེར་ལ་སྤྱོད་
པར་ཤོག །ཨོཾ་ཨཱརྱ་ཏཱ་རེ་རུ་པ་ཤབྡ་གནྡྷེ་རྭ་ས་སྤངྒེ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མི་དབང་རིན་ཆེན་སྣ་བདུན་འདི་དག་ནི། །འཕགས་མ་སྲས་དང་བཅས་པ་མ་ལུས་ལ། །བཤམས་ཤིང་ཡིད་ཀྱིས་དམིགས་ཏེ་ཕུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ཨོཾ་ཨཱརྱ་ཏཱ་རེ་སསྟ་རཏྣ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྨྲ་ར་ཎ་ས་མ་ཡེ་ཧཱུྃ། ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བའི་ཡུམ་དང་བྱང་ཆུབ་སེམས་དཔའ་རྣམས། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །ཨོཾ་ཨཱརྱ་ཏཱ་རེ་ཨཊྚ་མངྒ་ལཾ་དྲ་བྱ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། རིན་ཆེན་གདུགས་དང་གསེར་ཉ་པདྨ་དུང་། །བུམ་པ་དཔའ་བེའུ་རྒྱལ་མཚན་འཁོར་ལོ་སྟེ། །ལྷ་ཡི་དགའ་ཚལ་མཛེས་པར་བྱེད་པ་ཡི། །བཀྲ་ཤིས་རྟགས་བརྒྱུད་དག་ནི་འབུལ་བར་བགྱི། །ཨོཾ་ཨཱརྱ་ཏཱ་རེ་ཨཊྚ་མངྒ་ལཾ་ཧེ་ཏུ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། བསོད་ནམས་ཡེ་ཤེས་སྐུ་ལྔ་བརྙེས་པ་ལ། །རིན་ཆེན་སྨན་འབྲུ་དྲི་དང་སྙིང་པོ་སོགས། །ལྔ་ཕྲག་ལྔ་ལྡན་རྫས་མཆོག་མཆོད་པ་འབུལ། །འགྲོ་བའི་
བདེ་གཤེགས་སྙིང་པོ་རྟོགས་པར་ཤོག །ཨོཾ་ཨཱརྱ་ཏཱ་རེ་གརྦྷ་པཉྩ་སརྦ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཐེག་མཆོག་བླ་བྲེ་གདུགས་དང་བ་དན་དང་། །བདུད་བཅོམ་རྒྱལ་མཚན་ལྷབ་ལྷུབ་སྟེང་འཕན་དང་། །གར་དང་རོལ་མོ་མཆོད་པའི་སྒྲ་དབྱངས་ཀྱིས། །འཕགས་མའི་དཀྱིལ་འཁོར་མཛེས་པར་བརྒྱན་པར་བགྱི། །ཨོཾ་ཨཱརྱ་ཏཱ་རེ་སརྦ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞིང་ཁམས་རྣམ་དག་རྡོ་རྗེའི་ས་གཞི་ལ། །གླིང་བཞི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། །རྡོ་རྗེའི་མཎྜལ་བླ་མེད་བཀོད་པ་འདི། །རྡོ་རྗེ་སྒྲོལ་མ་སངས་རྒྱས་ཀུན་ཡུམ་མར། །མཆོག་ཏུ་དད་པས་ཀུན་ཏུ་བདག་འབུལ་ལོ། །བདག་དང་འགྲོ་བ་རྟག་ཏུ་བདེ་ལེགས་ཀྱིས། །གཞལ་ཡས་འབྱོར་པ་ཟད་མེད་བསྩལ་དུ་གསོལ། །ཨོཾ་ཨཱརྱ་ཏཱ་རེ་མཎྜ་ལ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ། །ལེགས་སྦྱར་འདི་ནི་འཕགས་མ་སྲས་བཅས་ལ། །དད་པས་ཕུལ་བའི་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་
ཤོག །ནམ་མཁའ་མཛོད་ཀྱི་ཕྱག་རྒྱས། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། བདུད་རྩིས་རྒྱ་མཚོར་བྱིན་གྱིས་བརླབས་ནས། ཨོཾཨཱརྱ་ཏཱ་རེ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་ཕུལ་ནས། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །བདག་ཅག་རྗེ་ཞེས་བྱ་འཁོར་བཅས་རྣམས། །ཚེ་རིང་ལྕེ་ནད་མེད་འཇིགས་པ་ཐམས་ཅད་ནི། །བསོད་ནམས་དཔལ་འབྱོར་ཡར་ངོའི་ཟླ་ལྟར་འཕེལ། །ཕྱི་མ་བདེ་བ་ཅན་དུ་བརྫུས་སྐྱེས་ནས། །འགྲོ་བའི་དོན་དུ་བྱང་ཆུབ་ཐོབ་པར་ཤོག །ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ལ་ཡང་ཕྱག་འཚལ་བསྟོད། །པདྨ་དཀར་པོའི་དབུས་གནས་པའི། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་མཛད་མ། །མཆོག་སྦྱིན་མ་ལ་ཕྱག་འཚལ་བསྟོད། །སྟོན་ཀའི་ཟླ་བའི་མདོག་འདྲ་ཞིང་། །ཟླ་བ་ལ་ནི་རྒྱབ་རྟེན་མ། །རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ་ཕྱག་འཚལ་བསྟོད། །བཅུ་དྲུག་
ལོ་ལོན་ལུས་དང་ལྡན། །རྫོགས་སངས་རྒྱས་ཀུན་དེ་ཡི་སྲས། །འཆང་བའི་ཡུམ། །འཕགས་མ་སྒྲོལ་མ་ལ་ཕྱག་འཚལ། །འཁོར་ལོ་དཀར་མོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་འཁོར་བའི་རྣམ་པ་ཅན། །འཁོར་ལོ་ཅན་ལ་ཕྱག་འཚལ་ལོ། །ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་གཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་ལོ། །འཕགས་མ་སྒྲོལ་མ་སྒྲོལ་མཛད་ཡུམ། །ཡིད་བཞིན་འཁོར་ལོ་ཚེ་འཕེལ་མ། །ལྷ་མོ་ཁྱོད་ལ་གསོལ་བ་ནི། །བདག་གི་ཚེ་ཡི་བར་ཆད་དང་། །ནད་དང་སྡུག་བསྔལ་ཐམས་ཅད་ལས། །ནུས་ལྡན་ཁྱོད་ཀྱིས་བསྐྱབ་ཏུ་གསོལ། །མཆོག་དང་ཐུན་མོང་དངོས་གྲུབ་ཀུན། །མ་ལུས་བདག་ལ་གནང་བར་མཛོད། །འཕགས་མ་ཁྱོད་ལ་དད་བྱེད་པ། །དེ་ལ་རྟག་ཏུ་བུ་བཞིན་དགོངས། །བདག་ཀྱང་ཁྱེད་ལ་གསོལ་འདེབས་ཀྱིས། །ཐུགས་རྗེའི་ལྕགས་ཀྱུས་བཟུང་དུ་གསོལ། །ལྷ་མོའི་སྐུ་མདོག་ཟླ་འདྲའི་མདོག་།སྒེག་ཅིང་དུལ་བའི་ཆ་བྱད་ཅན། །
གཟུགས་བཟང་རིན་ཆེན་རྒྱན་གྱིས་སྤྲས། །མཛེས་པའི་དར་གྱི་སྨད་གཡོགས་ཅན། །པདྨ་ཟླ་བའི་གདན་དབུས་སུ། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །ཞལ་གཅིག་བྷཕྱག་གཉིས་འཛུམ་བག་ཅན། །དུས་གསུམ་སངས་རྒྱས་བསྐྱེད་པའི་ཡུམ། །ལྷ་མོ་ཁྱོད་ལ་རྟག་ཏུ་འདུད། །ཁྱོད་ལ་བག་ཙམ་བསྟོད་པ་ནི། །བདག་ཅག་བྱང་ཆུབ་བསྒྲུབ་པ་ལ། །དུས་འདི་ནས་བཟུང་བྱང་ཆུབ་བར་། །མི་མཐུན་ཕྱོགས་རྣམས་ཞི་གྱུར་ཅིག །མཐུན་རྐྱེན་ཕུན་སུམ་ཚོགས་པར་ཤོག །ཅེས་བསྟོད། བུམ་ལྷ་འོད་ཞུ་བུམ་ཆུ་དང་འདྲེས་ཤིང་། །ལས་བུམ་ཁྲོ་བོའི་བགེགས་རྣམས་བཟློག་པར་མཛོད། །སྐབས་འདིར་བདག་འཇུག་ལེན་པ་དང་བསྐུར་བ་སོགས་བྱའོ། །རྗེས་ཆོག་ནི། ཨོཾ་ཨཱརྱ་ཏཱ་རེ་ཨརྒྷཾ་སོགས་ཀྱིས་མཆོད། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་བསྟོད། །སོགས་ཀྱིས་མཆོད། ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་
ཤིས་ཤོག །བཟོད་གསོལ་བྱ། མདུན་བསྐྱེད་ཡེ་ཤེས་པ་གཤེགས་སམ་རྟེན་ལ་ཐིམ་པར་བསམ་དམ་ཚིག་པ་བདག་ལ་བསྟིམས། ཐུན་བསྡུ་བ་ནི། བཅོམ་ལྡན་འདས་མ་འོད་ཞུ་ས་བོན་ལ། །ཐིམ་ཞིང་དེ་ཡང་མི་དམིགས་འོད་གསལ་བ། །སླར་ཡང་ཟུང་འཇུག་སྐུ་ཡིས་འགྲོ་དོན་བྱ། །དགེ་བས་འགྲོ་ཀུན་ཤེར་ཕྱིན་ཡུམ་འགྲུབ་ཤོག །ཅེས་པ་འདི་ནི་རང་གི་ཐུགས་དམ་བྱ་བའི་ཆེད་དུ་སྔར་གྱི་བཀའ་གདམས་ཡིག་རྙིང་དང་། རྒྱ་གཞུང་གཉིས་དང་། སྤྱན་སྔ་ཆོས་གྲགས་དང་། དཔའ་བོ་གཙུག་ལག་ཕྲེང་བ་དང་། དཀོན་མཆོག་འབངས་དང་རྗེ་དབང་ཕྱུག་རྡོ་རྗེས་མཛད་པ་ཐམས་ཅད་གོ་བསྟུན་ཏེ། རྗེ་དྲུག་པས་མཛད་པའི་ཁ་བཀང་དུ་༧ཀརྨ་ཨ་རཱ་གས་ཆུ་སྟོད་ཟླ་བའི་ཚེས་བཅུ་གསུམ་ཉིན་སྔ་དྲོའི་ཚེ་ལ་རྫོགས་པར་བྲིས་པའོ། །འདི་ལ་ཟིན་བྲིས་རི་ཆོས་ནང་གི་ཚེ་གཡང་ཁ་སྤྲོད་དང་། པདྨ་ཐབས་མཁས་ལ་གནང་བ། ནང་ཆེན་ཨ་ཉོག་ལ་གནང་བ་སོགས་དུ་མ་ཡོད་པས་ཁ་བསྒྱུར་སོགས་དམིགས་བསྲུང་ཚེ་སྒྲུབ་སྦྱིན་སྲེག་ལས་ཚོགས་གང་དགོས་རིག་པས་དཔྱད། དགེ་བས་བཀྲ་ཤིས་བདེ་ལེགས་ཚེ་དང་བསོད་ནམས་སྟོབས། ཡར་ངོའི་ཟླ་འཕེལ་ཆོས་དང་མཐུན་པ་ཡིན། གེགས་མེད་མཐར་ཕྱིན་རྒྱལ་ཡུམ་ཉིད་འགྲུབ་ཤོག །དགེའོ།། ། ༧ བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།